رواية للخُلة رأي اخر الفصل الرابع 4 - بقلم اورجانزا الطائي

اتمنى منكم تطرحون رأيكم وتفاعلكم يسعدني

#للخُلة_رأي_آخر
بارت ال٣
بقلمي: اورجانزا الطائي..
.
.
.
.
.
.
.
.
.
...
كلام الدكتورة يرن براسي..
احس روحي ذابلة ماريد اكوم مسحت دموعي الي موراضية توكف، التفتت على الجهه الثانية إسلام يتصل واضح علية الحزن..

مرتاك على الحايط ويحجي
_بنت عمي محتاجه اسويلها غسل معده كلش ضروري

؛ اي للاسف مااكدر اجي شوف واحد من الشباب

؛ لا يمعود ميحتاج جيتك يومين وتطلع لان عدها عملية..

؛ اي اي ياله سلام، وراقب الشباب لاتنسى.

سد جهازه التفت علية عقد حواجبة گال
_لاتضوجين روحج مصار شئ.

بلعت ريگي حجيت
_مراح تتركني وحدي؟!

ابتسم هز راسه گال
_يازمال يترك خُلوتة اله الماعده عقل..

تقرب عليه باس راسي گال
_بدون هل دموع تهون ان شالله.

ابتسمت التفتت جهه الثانية مجرد غمضت عيوني غفيت بين النايمه والكاعدة رجعت ذاكرتي قبل سنوات..

مقتطفات بسيطة كدرت تنهيني رجع الحلم المزعج بحياتي، ابجي واصرخ وخرر وخررر

مااحس غير اسلام يكعدني صفنت بوجهه ثواني اريد اعرف وين جنت..

ابلع ريكي بخوف وتوتر حضني اسلام وهمس

_بان انتِ قوية ركزي وياي ماكو شي هذه حلم..

بادلته الحضن بقوة بحيث ماريده يبتعد عني، كان الحلم كفيل يرجعني بذاكرتي قبل سنواات بيوم الحادث الي كسرني بااختي..

ساعة تقريب ال١٢ونص الظهر رجعنه اني وسبيل وحدنة اليوم من دون الايام سبيل كامشة ايدي.

ردنة نعبر السايد ماحس غير السيارة جاية بتجاهنه سريع دفعتني سبيل وكعت بالكاع مااشوف غير سبيل نشالت ليفوك وردمت بالكاع..

صرخت بصوت عالي
_سبييل

رحت ركض عليها حطيت راسها بحضني دموعي تنزل اريد احد يساعدها ماكو اصرخ واصيح الناس انجمعت علينه الي يكلك كرنفال احس صوتي طبك من كد ماصرخت حاجيت رجال مرد علينه عافنه ومشه من خوفي صحت بوجهم

_ولكم ساعدوووو اختي راح تموووت ياهل المروة

حجه واحد من الواكفين
_اذا نساعدها توكع براسنه..

من لوعتي على اختي وكلام هذه حجيت ومتندمت

_تفووو على شواربكم الازكه بوجهكم ولكم راح تموووت، ياعديمين الضمير شوبس بالاسم زلم ولكم حرام طالعين بالشارع ..

قطع كلامي سبيل هية تكمش ايدي وتگول
گولي لماما جيلان احبها هواي، ابد لاتضوج مني والله احبها.. .

بان حضنت ودموعي تنزل احجي وياها
_مابيج شي سبيل هسه اخذج للمستشفى

ثواني واسلام فوكانه شاف سبيل نزل بمستوانه راد يشيلها من حظني شافته ابتسمت بوجهه وقطعت التنفس اضرب على وجهه واحجي

_سبيل سبيل كعدي سبيل فدوة كعدي وين عايفتني

شالها اسلام واني فقدت جسمي يرجف نفسي سريع اختي ماتت بيدي...

عله صوت شهكاتي اصرخ وابجي دون وعي حسيت الولد الي گال اذا نساعدها نتورط هوه الي قتلها بحيث رحت عليه ردت اضربه حسيت على احتضان كتوفي نفرت بصياح سكتني عموجساس اخذني بسيارته الطريق كله ابجي وجسمي يرجف..

حاول وياي عمو جساس لاكن عقلي رافظ يستوعب شئ..

وصلنه للبيت دك الباب ماريد اواجهه امي اختي ماات شلون اكللها بنتج ماتت..

ثواني فتح الباب مجرد شفت امي حضنتها وابجي

عرفت سبيل ماتت تبجي وتنعي عليها..

رده فعل لبيب صدمتني ابد ماتأثرت وهذه الشي الي خلاني ابتعد عنها..

تعب حزن ارهاق ذبول كلهن بوقت واحد نعزلت عن الكل سمعت امي اخذوها للمستشفى.

ولباب وحدها كاعده.

مر اليوم من اصعب ايام حياتي لاابوي ولاامي ولااختي يمي.

اليل كله ابجي ماكدرت انام دمها على ملابسي وجربايتها كدامي فارغة كل يوم تحجي عليه لان مندمجه بالقصص لو تكعد تحجيلي عن اسلام وحبها الة بس اليوم ماحجت وياي..

اريد واحد يكلي هذه حلم ويخلص، بابا ولا شفته للضهر سمعت صوت امي احس روحي محتاجه حضنها..

طلعت من الغرفة امي حالتها فرد مره تعبانه تبجي والوجه مخرمش ..
انتبهت لوجودي اشرلتلي، شهكت رحت يمها بسرعه حضنتني تبجي وتمسد على راسي تگول

_لاتبجين يبعد روحها لامج لاتبجبن هسة اخيتج تضوج ييمه..

حنية الي بصوتها تجبرني ازداد بدل مااسكت.
مرو وقت بسيط اجه عمو حسنين يصيح على انو اني سبب موت اختي..

تشادد بالكلام وية امي لحد مااخر شئ حلفت امي الي يمد ايده عليه او يتقربلي تضربة..

بس الي يتسمه عمي بالمقابل ضرب امي وحلف انو بدل اختي اتزوج اسلام وفوك كل هذه طلعو دافنين اختي بدون ميحضر ابوي اويجيبوها للبيت تشوفها امي..

ذب سمة بالبيت طلع وامي زادت بالطم وتخرمش فد مره صارت حالتها...

صرت ابجي على امي واختي.

كاعده يمها كامشة ايدها وابجي اريدها تهدئ ماكو تنعي وتبجي.

احس طاقتي خلصت عفت امي دخلت للغرفة ابجي مددت على جربايتها حضنت مخدتها واعاتبها..

_ليش عفتيني ليش مو انتِ اختي هيج هنت عليج وعفتيني سبيل ماگلتي بان منو الها..

عتبت على امي الي ولدتنه وعافتنه عتبت على الزمن الي دهورنه عتبت على مجتمع اخذ حقنه..

عصرت عيوني بقوه طلعت اخذت جهاز امي من غرفتها بدون تردد اتصلت عليه دموعي تنزل ونفسي سريع..

قرب الاتصال يخلص رد
_ ها حبيبتي

شهكت حجيت.
_هذه اني

رد بااستفسار وعصبيه مكتومة
_بان؟!!

بجيت حجيت
_اي اي اني، دفنو سبيل وعمو حسنين اجانه هاد وضرب امي..

حجه بنبره عصبيه
_والكح**شعليها ياكوا* دفنها من دنعل والدينهم بان روحي مسافه الطريق اوصل.

سد الجهاز واني فقدت احس جبل على صدري ثواني دخلت امي بيدها تراك اسود.

انطتنياه گالت
كومي سبحي يروحي مايصير لان ماتت بحضنج هيج تضل روحها معلعله..

حضنتها بقوة بدون مااحجي شي مسدت على راسي گالت

_ياله يروحي گومي سبحي وتعالي يمي.

ماعافتني اله دخلت للحمام كدامها..
نزعت ملابسي وادية يرجفن، فتحت الدوش كعدت بالكاع ابجي على شكل امي وحرموني من اختي اله اشتتهم ماخليهم يرتاحون امي ناطية مجال لليسوة والمايسوه..

بدلت وطلعت لغرفتي..
لليل على نفس المنوال لبابه كاعده ولاشفتها نزلت دمعه منها..

اجت گمرة وعمه بسيل وامي رجعت نفس الاول تنعي
ماتحملت طلعت من الهول بدون مااحد ينتبه لوجودي..

مددت على جرباية سبيل..
دموعي تنزل بكل هدوء، سمعت صوت بابا سحبت نفس من اعماق گلبي، گمت وكفت سمعتة يريدني طلعت گالت

_هِجان يگول خليها تلبس وتلحكني يرد تطلعون

هزيت راسي رجعت للغرفه مرتاحه لان ارف بابا كدها وكدود لبست حجاب وفوكاها بشت لان البدي قصير..

طلعت لكيته بالسيارة صعدت وياه ساق بسرعة بدون مايحجي حرف.

وكف السيارة قريب على بيت امي القديم گال

_احجي كل شئ بدون خوف وممنوع تجذبين بحرف واحد.

ركزت علية حالته فد مرة، بلعت ريكي وحجيتلة كل شئ بحيث جفلت من رده فعلة

ساق السيارة بسرعه جنونية وكف كدام بيت جدو ابو عمه ذات

نزل واشرلي نزلت وياه

دخلنه للبيت كلهم كاعدين بالحديقة بما فيهم جدو وعمامي وعمام ابوي

گام عمو حسنين يسلم علينه
وبابا كمش كتف عمو وضربه بوكس بطنه شمره بالكاع داس بطنه گال

_بأي حق دوس عتبة بيتي وتمد ايدك على زوجتي، وتمسها بكلام لاصار ولا دار وهيه بنت عمك شرفك.

فتح عيونه بصدمة بدون ما يحجي شي بس يتئتئ

دنك علية بابا رفعه من ركبتة گال

حقك عليه يخوي لاكن وعدت بنت عمك اكسر ايد الي تنمد عليها وانت مسيت بنت عمي ولاتتوقع بحياتك اعبرها الك..

جر ايده ولواها وره ضهره شمره على الدجه مال الحديقة

صفك ايد بأيد بعدم اهتمام وعمو حسنين يصير ويعيط.

راحوله ولد عم ابوي ايده مايكدر يحركها..

بابا كعد على الكرسي ساد قبضة ايده بقوة غمض عيونة بقوة حجة بهدوء.

_منو الي هادي بنتي گلولي حتى اكطع السانه الي نطق بدون ميگول عدها ابوها..

كلها سكتت محد حجه شي بس جدو گال
؛ اني هديته رد اعتبار النه.

ضحك بصوت عالي بستهزاء، رفع حاجبة گال

_ حجي من يصيرلك اعتبار وكلمه ثابته ماتنثنة دور رد اعتبار.
وبناتي خط احمر والي يرشهن بمي ارشه بدم واني الممتن

سكت باوع على الموجودين گال

_سبق وحجيت لبيب، سبيل، وبالاخص بان يعادلن الف زلمه لاكن مامئذون الهن يسترجلن، لاتخلوني انطيهن الاذن وينعلن سااس والديكم.

لاتنسون بناتي
تربات زلمة واكيد تعرفوني شنو، الله وكيلكم والعباس كفيلكم ولو برو منكم

زلمه شراني اكتل بدم بارد لدرجه لااعترف باابو ولا بااخو.

ثقو رضة الله ثم بناتي ثم زوجتي ثم رضه نفسي والباقي لاشئ لهذه صيرو اوادم لا انهيكم.

جدي نخلس لايحجي ولا يكول..

تحمحم گال

هسه فهمتو الي حجيته لاكن بقه اهم شي
انتم منو تدفنون بنتي، لعلمكم ماشرف بناس مثلكم همهم القال والقيل يدفنونها بنتي انقة منكم ومن عشيرتكم..

هسه مااحجي شئ وسالفه ساكت عنها بس بين مايفتح التجبير حتى اخذها معدله منك انت

اشر على عمو حسنين.

ضرب على رجلة كام وكف التفت عليه گال
_ امشي بنيتي، عمامج واجدادج يسمعون الكلمة فهمو الي اريد اوصلة.

انطاني ايده كمشتهة طلعنه ثعدنه بالسياره راد يمشي اجه إسلام وكف كدامنه
ابوي ضرب الستيرن نزل حجه إسلام بصوت.

_ عمي لاتتوقع اقبل واتقبل بان، تبقى اخت الي احبها وگلبي رادها بس باين مامقسوملي افرح بيها..

حضنه ابوي گال
_ لاتهتم لكلام جدك، يصفط وحده، ياله تعال ويانه.

صعد بابا گال
_نزلي وره بان اسلام يجي ويانه.

طبعا اني شلون استلطف اسلام نزلت صعدت وره
الطريق كلة ابوي واسلام يحجون عن موضوع الحادث شلون صار؟!

بس بابا عارف الي سوه الحادث تابع لشخص يشتغل لسيد..

وصلنه للبيت نزلنه سولفت لگمرة وعمة بسيل عفتهن دخلت لغرفتي..

نمت بمكان سبيل، مرت الايام وعلاقتي بگمرة تطورت رغم جنت احجي وياها على كد السوال والجواب بس على گولت بيبي من توكع تعرف ناسك

رجعت حياتي نوعا ما نفس قبل..
لحد قبل يوم اجة اسلام كلها نخبصت بي لان سنة كاملة مااجاي.

واليوم نفس العادة ارجع من المدرسة،بس هل مره تأخرت لان ابوي مااجة.

نطريت اطلع وحدي الطريق شبة فارغ وصلت نهاية الطريق وكفت كدامي سياره تكسي صفرة.

من غبائي انتضرت تمشي حتى اعبر

نزل السايق ولد شاب مو جبير حيل وللصراحه شكلة حلو.

صار كدامي گال
_ابوج دزني عليج لان الخط تأخر واعتذر على التأخير.

اجيت اصعد بس تذكرت القصص الي اقراهن هم هيج يگولون ويخطفوهن صديت عنه رفعت حاجبي حجيت

_دام تأخرت مااصعد.

مشيت خطوتين مااحس غير جر ايدي بقوة فتح الباب دفعني بالسياره تعورت بالباب بكصتي صحت بوجهه

_عمه اي والله شبيكك انت ردت افتح الباب ساق بسرعه حاولت افتح الباب بس مقفول..

شمرت جنطتي جريته من شعره حجيت
_شبيك خبل ويننن ماخذني

صد عليه گال
_كعدي وسكتي اني خاطفج

ضحكت بستهزاء حجيت
_وعود اني مهمه وخطفتني وتساوم عليه وتاخذ فلوس خب اهمداك متعرف خو روح بوكلك بنك محل ذهب وتصير غني لو اكلك اشتغل وجيب فلوس.

صاح بصوت گال
_اگلج خاطفج تنطيني نصايح ع فيهن لنفسج ماريدهن، ولعلمج مامعتاز فلوس خير ابوي مغطيني

هزيت ايدي حجيت
_ انت گلت خير ابوي يعني مابيك حظ.

ماحجه شئ

هناك اجه بالي هذه خطفني واني احجي وانطي نصايح شكد غبيه لعد.

شهكت حجيت
_نزلني حيوان نزلني

ضحك بستهزاء گال
-وصلت واخيرا

وكف السياره كدام بيت فتح الباب نزل مط جسمه فتح الباب گال

_نزلي خاتون

خفت حجيت
_مانزل والله

عقد حواجبة گال
_اگلج صارلج ساعه اريد انزل تالي هسة ماتردين تنزلين

جرني من ايدي نزلني صحت كرصني من ايدي عاد خرمشته بوجهه

جرني فتح الباب دفعني داخل..

ثواني دخل للبيت ابتسم بحقاره گال
_شيصير لو ايجة انتي.

عض شفتة تقرب عليه لعبت روحي من حركاته المستفزة.

جرني من ادية گال
_اليوم اجر بيج تدرين.

رديت بخوف
_بالبداية اسبح ريحتك لعبان نفس

ضحك گال
_اي مو اني ابوج المن*** لاتبيعين سوالفة علية.

رديت _بالبداية اوصل اله واحجي.

ضربني راجدي كمشت خدي باوعتله بحقد وهو مبتسم.

خرمشت وجهه بضافيري كمش وجهه گال
_بنت الك****

مااحس غير الضربات ماعرف منين تجيني رغم هذه مانزلت دمعتي..

رفعني من راسي دفعني ويه الدفعه نضرب راسي بالحايط احس وشيش براسي افتح عيوني واغمضهن بس سواد..

ثواني فقدت الوعي مااحس بأي شي.

مر وقت ماعرف شكد حسيت على صوت غلط وفشار..

فتحت عيوني بخفة راسي يوجعني وجسمي كذالك..
بالكوه رفعت روحي وانصدم بروحي خالية من الملابس فقط الداخ***

شهكت وبجيت بنفس الوقت بدون وعي اصرخ بهل وقت دخل شخص ماميزتة بس ضخامة..

تقرب عليه شفتة اسلام ابن عمي حسنين صرخت حضنت جسمي نزع قميص زدت بالبجي والصريخ تقرب عليه لبسني القميص وعيونه بوجهي.

زدت بالبجي حجيت
_ اريد بابا

غمض عيونه بقوة طلع ثواني رجع بيدة بطانية لفني بيها من رجليه لراسي شالني مشة شوي

سمعت صوت بابا يگول

_موجودة؟!!!

مجاوبه اسلام اسمع صوت ابوي يصيح وهذه يگلة هية سلمتني روحها بجيت حجيت

_والله جذاب والله

حسيت على اسلام ضغط بحضنة همس
_ماعليج بي الاهم احنه نعرفج شنو.

كل الي بعقلي هذه هو راح يذبحوني نفس عمة ذات.
عقلي يصورلي هواي شغلات.

ثواني واسمع صوت طلق اكثر من مره شهكت صرخت
_ بااااباااااا

حسيت بااسلام طلع من الببت فتح باب السياره نزلني بالسياره گال

_لاتطلعين صوت ولا توخرين البطانية بين مايجي عمي على الاقل، وبان انتِ قوية مصار شئ لاتهتمين لكان ميكون..

مغمضة عيوني وابجي معقوله هذه نفسة اسلام..

ثواني نفتح باب السياره مشت سمعت صوت اسلام يگول

_عمي ابد لاتجيب طاري واني التمها

رد عليه بابا
_شلون ما ائمه الاسلام تعرف واكيد ماجيب وين اكو الي ينطي ببنته..

رد اسلام
_ هسة همه يدورون نزلني عند الفلكة اروح للولد على انو ادور وياهم وانت من توصل وترتاح بان. اتصل گول لكيتها..

والي يسألك گله
_خطفوها على مو القضية وهيج مطلع بان من السالفه، ولاتجيب طاريي اعتبرني ماعرف شئ.

رد عليه بابا
_شعجب اتصلت عليه واني اكثر من مره رفضته ليش مااخذت ابوك لو جساس بعتباره بالسلك.

رد بهدوء
_حسب عقليتي محد غير الاب ستر لبنتة واكيد مو عمها لو ابن عم ابوها لابد تصير خلافات ويفضح المستور..

وانت تعرف معزتك بگلبي شكد ميحتاج احجيلك واريد وعد منك هسه.

بان امانة الله ومحد وعلي يمك ليوم الدين ومحد يمسها.

رد عليه بابا
_وانت تأمني بنتي وين صايرة

ضحك گال
_صايرة وياي عمي ياله هسه اوكف هنا نزلني.

وكفت السياره ثواني ومشت عم الهدوء وتنهيدات بابا.

غمضت عيوني غفيت.
حسيت على بابا شالني

شهكت وبجيت سمعت صوته يکول
_وياج بنيتي لاخر نفس.

دخل للبيت سمعت صوت امي تبجي وتصيح الله اكبر عليكم موتو بنيتي..

ثواني حسيت بابا نزلني على الجربايه فتح البطانيه من وجهي باس راسي وعيوني صاح لامي.

اجت شافتني عايشة ركعت بالكاع تقربت عليه بابا سد الباب.

رجع عليه گال
_تعالي سبحي بان و اي شئ تشوفي تسكتين بدون حرف واحد.

تقربت عليه امي وابوي نطانه ضهره

فتحت البطانية شافتني نزلن دموعها عليه الي يكلك شلال..

حضنتني بقوة گالت
_ياله بنتي گومي.

كومتني مشيت وياها وبس القميص والداخ**على جسمي فتحت باب الحمام نزعتني القميص تسبحني وتسمي وحجي مامفهوم تحجي.

جابت ملابس بدلتلي طلعنه من الحمام نومتني على الجرباية ضلت تمسد براسي لحد ما ادعيت النوم.

اسمعها تحجي ويه ابوي تريد تعرف شلون لكاني وهو ساكت

ابوي يحجي على المبايل بس صدمني گلامه يگول
_روحو اخذو جثة ابنكم من ****اخذت حق بناتي ثنينهن منه وانصحكم تسدون السالفه لان وداعتكم تفشلون القانون بيدي والدين بيدكم لا اسكت انت اخر من يحجي تضحك على الناس بالدين.

اي اخر شي احجي تلكو مزرف تزرف يالة يالة حثالة يتبع..

توقعاتكم للبارت القادم.