رواية لمْ تكُنْ خطيئَتُنا الفصل الأول 1 - بقلم نورا ناصر

#لم تكن خطيئتنا

من سنتين تركت وضيفتي .. كشرطي مرور .. واتخذت من السيارة هذه مصدر رزقي .. امتهنت مهنة سايق تكسي ..
يمكن جانت ساعة عصبيه لا بل من الممكن ان اعتبرها لحظة غباء
صح شغل المرور متعب بس على الاقل .. راتب نهاية كل شهر وعندي عطلة بالاسبوع ..
فكرت ..خاف اموت وأماليد تاخذ راتبي مااريدها تتمتع بي من بعدي .. مااريد هالشي يصير.
وحتى حصتي من البيت راح اتنازل عنها لامي
خاف تحضى بيهاا .. امي ماتظلم بناتي ابد ..
واني اجول بشوارع البصرة .. بحثا عن الرزق ..
الظهر والجو حار .. والتبريد عطلان ماادري شبي
فكرت بعدين اخذ السياره للصناعيه.
واصلح التبريد ..
ركنتها على صفحه .. سحبت الخاولي الي نشف من الحر .. نزلت من السياره ..
وبيدي الخاولي .. وصلت للصندوق مال السياره طلعت منه ترمز الماي .. وسديته .. خليته على مؤخرة السياره وفتحت الماي وبديت ابلل الخاولي
بالماي البارد .. الي سوته الي رقيه .. ابلله واتذكرها كل يوم قبل لااطلع للشغل بالسياره من الصبح ..اشوفها كبالي وابتسامة بريئة مرسومة على وجهها ..
وبيدها الترمز تارسته ماي وثلج .. ابوسها على راسهاا واطلع ..
تذكرتها وضحكت .. انرسمت كبالي ملامحها وهي مبتسمة ..
بللت الخاولي وخلصت ..شربت ماي بارد.. رجعت الترمز لمكانه ..
ورجعت صعدت بالسياره .. خليت الخاولي على راسي حتى احس بالبرودة شويه ولو لفتره قصيره على الاقل ...
سقت السياره. .. وظليت ادور على رزقي ..
وافكر ببناتي ..
اتمنى تجيهن قسمه واطلعهن .. الاثنين الكبار يمشن
بس رقيه شلون؟ ومنو يتزوجها؟ .. وهي بهذه حالتهاا..
اله اشوفلي واحد من ولد اخواني لو خواتي .. حتى لو متزوج .. يكولون اخطب لبنتك قبل ابنك ..
وانا ماعندي ولد .. اريد ازوجهن واهاجر منا

وامي شلون؟ امي ياخذها واحد من اخواني او اختي زين واذا هاجرت وهن ماارتاحن ويا ازواجهن؟
هم البنات للممات ماجذبوا من كالوهااا ..
قطع سلسلة افكاري .. رجال كبير بالعمر لابس دشداشة بيضه وغتره .. اشرلي .. وكفت السياره .. مديت راسي من جامة السياره
گتله .. هاا عمي وين توصل؟ ؟
.. كال .. للدير
.. فكرت شويه الدير بعيده .. كتله يلا عمي اصعد
رزق وجايني ..
صاح مره كبيره كاعده ع الارض وفتح الها الباب بخمول وايد متعبه عليها تجاعيد سنين مرسومه بالم صعدت المريه وهي تتنهد من التعب .. سد الباب وصعد يمي الرجال ..
الرجل العجوز .. الله بالخير ..
أيوب .. الله بالخير عمي حياك .. تريدون ماي خاف عطشانيين ..،؟
الرجل العجوز .. كلك خير وبركه .. عدنه بطل مي جبير ..خلته النه بنتي كالت تعطشون بالطريق ..
أيوب .. على بركة الله ..
سقت السياره .. عرفت من خلال كلامه انه جاي يزور بنته هنا .. وصلتهم بعد طوول طريق .. وعدت ادراجي رجعت لديرتي. . وصلت لبيتنا .. دخلت السياره بالگراج .. ورحت للبيت .. طبيت من باب المطبخ .. شفت امي كاعده ع الارض .. تشلف رگي وتاكل .. رفعت راسها شافتني .. گالت .. هاا يمه اجيت؟
.. لا يمه بعدني فد شويه ..
.. هاا خوش جا لو جيت جيب وياك خضره ..
.. هههههه ضحكنا واحد يحشش ع ثاني ..
... هاا يمه الله يساعدك
... ويساعد بختج ..
رحت غسلت ايديني بالسنگ .. وكعدت يمها
تناوشتلي شلف وظليت اكل ..
.. سوده عليه يمه جوعان .. اصيح للبنات يصبلك غدا
.. شو ماكو ولا وحده منهن شعجب؟
.. تلاكيهن بالغرفه الفوك ..
.. الغرفه الفوك حاره شعجب كاعدات بيها ..
.. ماادري ييمه صيحلهن ..

صحت رقية، رقيه ..

امي .. يلله بلله ماتصيح اله لرقية منين تسمعك ..
أيوب .. هم صدگتي يمه بس شسوي هالبنيه دوم لساني يلهج باسمها ..
.. اي ادري بيك تعزها اكثر وحده والله انه هم مكسور گلبي عليها من يوم الصارت لهسه ..
.. الله كريم يمه .. اكول صفا وسمية سمعوا صوتي شو مااجن .. ؟
.. يمه خاف نايمات ..؟
.. بهالحر ينامن وهسه الساعه ب4 العصر .. مو من عوايدهن .. اكوم اشوفهن وين ..
.. اي يمه كوم ..
..طلعت من المطبخ وتوجهت للغرفه الجوه .. فتحتها ماكو احد بيها تصفر .. استغربت وين راحن يوميه ماليات البيت .. بصياحهن وعركتهن اسمعها من ادخل السياره للكراج ومن ادخل يسكتن ..
اليوم سنطه.
طلعت من الغرفه .. وكفت يم الدرج .. وظليت اصيح
صفا سميه وينجن ..
ولاجنه اصيح ولااكو صوت الهن ..
تنهدت وزاد استغرابي .. الوضع مثير للشك ..
رغم تعبي وشعوري بالاعياء .. شكلت الدشداشه وصعدت فوك .. واني اصيح بأسماء بناتي ..
صفا، سميه ..
وصلت للغرف الفوك وعددهن 3 .. بس كلهن مو صالحات للعيش .. لان هذا بيت العائله وقديم كلش ..
فتحت الغرف وحده وحده ماكو الهن اثر ..
زاد استهجاني واستغرابي .. وين راحن ياترى؟
لاأكول وكت مدرسه وراحن للمدرسه .. اشو بعد شهر يلا تخلص العطله الصيفيه ..
ولا متعلمات يطلعن يشترن لو يرحن لمكان ..
رجعت لأمي .. لگيتها بمكانها بالمطبخ ..
بعدهه تاكل رگي .. باوعتلي كالت ها وينهن
..ماكو مهنه ...
.. حتى بالغرفه الفوك؟
..اي سألتها.. . يمه انت وين جنتي گبل لاتجين للمطبخ ..؟
.. جنت نايمه بالهول .. كعدت وجيت للمطبخ شربت ماي وكعدت اكل ..
.. مااشفتيهن طلعن ماحسيتي ماسمعتي شي غريب ؟
.. لايمه والله جنت نايمه ..

عصبت كلش ورحت ادور بالحمام ووره البيت ع السطح ماكو فص ملح وذاب ..

رجعت يم امي .. شافتني كالت .. روح شوفهن خاف يم بيت اخوك المرحوم ..

.. هن متعودات يرحن هيج وكت يعني ..؟
.. لا والله يمه ولا يطلعن ..
.. عجيييب وين وولن .. بديت اغلي ..
اروح واشوف امري لله ..
طلعت من البيت طكت الشمس بيه ومنا انه مشتعل شعل ..عائلة بيت اخوي المرحوم بصفنه كلش ..
دكيت الباب .بقوة. مره ثنين محد طلع .. دفرته وچفتت ..
وصلت لنص الحديقه .. انفتحت الباب الرئيسيه وطلع منها اسلام ابن اخوي .. لابس فانيلة تعلاكة وجاي يلبس بالقميص .. وشعره مبعثر على گصته .. شافني
اجه حافي ويمشي سريع ..
إسلام .بقلق. ها عمو خير صاير شي .. ؟
ايوب .. البنات عدكم؟
.. يا بنات عمو؟
.. بناتي بعد منو؟
.. ها والله عمو ماادري جنت نايم بالديوانيه هسه ادخل اشوفهن ..
.. يلله ولك بالعجل .
دخل اسلام وانه بقيت انتظره .. بالطارمه وين راحن؟

ثواني وطلع اسلام .. گال عمو ماكو ولا وحده منهن هنا ..
.. لعد وين راحن ..؟عفته واريد اطلع .. صاح عليه وهو يمشي ورااي ..
ها عمو وين رايح؟
رايح لبيت عمك سليمان يمكن الاگيهن هناك ..
جاي وراك عمي بس اللبس شحاطتي ..
انت ابقى يم بيبيتك خاف يرجعن ..
طلعنه من بيت اخوي اني واسلام ..
شفت امي كاعده بالباب ووجهه كله خوف وترقب ..
رفعت راسها باوعتلي .. گالت .. ها يمه وينهن لگيتهن.
.. ماكو رايح لبيت سليمان ادورهن ..
أسلام .. عمو اروح للاسواق اشوفهن خاف رايحات يشترن؟
ام ايوب .. يمه هنه مايطلعن للاسواق .. ولا لبيت سليمان خاف طلعن وضاعن بالمنطقه ..
ايوب .. يمه شيضيعن قابل هنه جهال شو التوم عمرهن طك با17 ورقيه 15 سنه سولفيهه للمخبل يمه انه رايح لبيت سليمان واذا مالكيتهن هناك السالفه بيهه إنه ..
خليت امي تبجي وتنعي .. واسلام مكرفص يمها ويفرك بشعره ومبينه الحيره بين ملامحه وهيئته ..

تركتهم وطبيت بالفرع الي بصفنه .. امشي واللهث ..
وصلت لبيت اخوي سليمان .. دگيت الباب ..
طلعت مرته جانت يم الباب .. تغسل الطارمه ..
تريد تسلم قاطعتها وبدات طاقة صبري بالنفاذ.
بلحظة گتلهاا .. زينب بناتي ماهما عدكم؟
زينب .. لا والله ايوب جا وينهن مو ابيتكم .. ؟

ماجاوبتها عفتها ومشيت واني عاجز.. قربت اوصل
لنهاية الفرع وانا شارد الذهن .. سمعت صوت سليمان .. ايوب، ايوب ..
مادرت وجهي .. من اليأس ماجاي احس بشي ..
وصل يمي لزمني من كتفي. .. دارني اله بايد وحده
كال وينهن بناتك وين ولن زينب تكول جاي تدور على بناتك؟
ايوب .. بيأس گتله انه ادري وينهن واجيك
عفته ومشيت ..
مشي وياي .. اسمعه يكوول .. همزين ماعندي بنات بس هم وشلعان گلب ..
مااهتميت لحچيه رغم غثني ..
مشينه وصلنه لبيتنه .. امي كاعده يم الباب وتبجي واسلام مكرفص يمها ومدنگ راسه .. شافنه من بعيد اجه يمنه ..
اسلام .. عمو رحت لسوبر ماركت دورتهن ماكو مالكيتهن ..
عفته مااهتميت لكلامه
رحت بسطت يمهم .. اجه سليمان كعد يمي ..
الام .. سامحني يمه ايوب ماداريت بالي على بناتك.
والله خذتني النومه ..
اسلام .. عمو امشي نبلغ الشرطه خاف خطفوهن ..
سليمان .. اي يلله امشينه ..
ايوب .. لالا مايحتاج انه يمكن ادري بيهن وين ..

يتبع .. قريباااااا بعد رواية الحب العاثر
نلتقي هنا 😍