رواية لم يكن غريب الفصل الأول 1 - بقلم دانيا

رواية لم يكن غريب

الفصل الثالث3

بقلم دانيا

ريم عاينت لهاشم وقالت ليهو مالك ما ترد يمكن في شيء مهم وهو لسه بعاين لتلفونو الكان قاعد يضرب وهو مختوت في الطاوله ..... عاين للإسم مكتوب " ابوي سندي " طوالي اتنهد بزهج وقال ليها فكك منهم اكيد عمي اتصل لأبوي كلمو عشان كدا متصلين لي دا كله ،، قالت ليهو بنبرة إستهتار شغل مخك ياهاشم ما اظن يكون الفي بالك وإلا مرت عمك ح تضرب ليك ليه ؟ المكالمه فصلت وتاني جات واحده قال ليها طيب المره دي ح ارد والبحصل يحصل .

قلت للزول عليك الله قوم بالإجراءات انت واي شيء بتحتاجو ح نرسلو ليك الله يفتح عليك اتكلم معاهم خليهم يبدو .... قال لي يابتي لو المسأله في القروش كان اتحلت من اول ما دخلنا المستشفى لكن دقيقه انا ح اطلع اتكلم مع المدير الطبي واقول ليهو الحاله مستعجله وحرجه م بتتحمل تأخير والمسافه دي انتي حالي اتواصلي مع زولكم الهنا دا عشان يجي سريع قلت ليهو تمام ،، قفلت منو واتصلت في تلفون هاشم بديني مشغول حاولت كم مره وهنا امي من شدة البكاء لمن ضغطها ارتفع قلت ل هاله اطلعي الشارع جيبي ركشه والبنات شغالين يهدو فيها وانا لسه بحاول اتصل بديني مشغول .

هاشم بعد نهى المكالمه ملامحو كلها اتغيرت وطلع جري ريم بتحاول تتكلم معاهو عشان تفهم الحاصل م رد ليها .... وصل المستشفى نزل من الركشه وجرى جوا حتى بتاع الركشه م حاسبو ،، بقى واقف بعاين ليهو قال ليهو الحساب يااخ م سمعه وجرى جوا بتاع الركشه قال مامشكله ربنا يشفي مرضاك ويعافيهم ودور مشى ... هاشم مشى على موظفة الإستقبال وقال ليها لو سمحتى جابو مريض مضروب حادث قبل ساعه يمكن وين حالياً ؟ قالت ليهو في الطوارئ طوالي جرى بإتجاه الطوارئ كان في ممرضه واقفه جنب موظفة الإستقبال قالت ليها انا هسي كنت في الطوارئ تقريباً المريض بقى في رحمة الله بعد دخلوهو العمليات نزف دم كتير وفصيلتو نادره م لقو ليهو دم طوالي اتوفى ربنا يرحمه .

هاشم مشى الطوارئ فتش م لقاهو جاء طالع لقى حاج واقف جنب الباب التاني وكان ببكي ... للحظه جسمه رجف بس قال لالا ربنا لا يقدر مشى على الراجل وسألو قال ليهو لو سمحت الزول الجابوهو مضروب حادث خاتنو في ياتو قسم ؟ عاين لهاشم وعيونو محمرة من البكاء قال ليهو انت قريبو ؟ هاشم قال ليهو ااي انا ود اخوه ،، الراجل دنقر راسو وقال لهاشم الدوام لله ياولدي ربنا يرحمه بواسع رحمته .... هنا هاشم كلمات الراجل دي جات زي الخناجر على قلبه اتجمد في مكانو الراجل جاء مسكه وقال ليهو دي سنة الحياة ياولدي هم السابقون ونحن اللاحقون ،، البركه فيكم وطلع من جيبو التلفون والجزلان اداهم لهاشم الكان لسه من الصدمه م قادر ينطق ، الراجل قال ليهو عن إذنك ياولدي انا لازم امشي وطلع مشى .

الممرضه جات قالت لهاشم لو سمحت اتفضل معاي عشان تكمل الإجراءات حقت تسليم الجثمان .... هاشم خلاص بقى في عالم تاني م سامع زاتو هي بتقول في شنو تاني كررت ليهو الكلام مشى وراها في صمت واثناء ماهو ماشي تلفونو اتصل عاين لقاهو دا ابوهو م رد عليهو تاني اتصل المره دي ريم برضو م رد مسك تلفونو شغله صامت ودخلو في جيبو ومشى بدأ في الإجراءات.

الركشه جات البنات ساعدوني لزمنا امي وديناها ركبناها في الركشه هاله قالت للبات انتوا امشوا انا بمشي معاها المستشفى ... اثناء ما واقفين جات مرت عمي مارقه من بيتها اتخلعت لمن شافت امي مغمي عليها جات سألتنا الحاصل شنو ،، وريتها وانا رجليني يرجفو م شايلني من الصدمه طوالي قالت لهاله انا بمشي معاهم انتي اقفلي البيت وسوقي زيد وديهو ل اماني في بيتنا قالت ليها حاضر وطوالي ركبنا والركشه دورت .

هاشم اتصل لأبوه وهو ببكي بحرقه قال ليهو البقاء لله ياابوي عمي الباغر بقى في رحمة الله .... عمي كان واقف على حيلو قرب يقع إلا صاحبه لزمو قال لا حوله ولا قوة إلا باالله العلي العظيم لا إعتراض على حكمك يارب ،، قال ليهو ياابوي انا هسي كملت الإجراءات وح اجيب الجثمان بعربية الإسعاف بس المشكله في مرة عمي م ح تقدر تتحمل الصدمه دي ولا عبير وزيد م ح يقدرو يتحملوا ربنا يصبرهم على الجاتهم .... قال ليهو حاره والله لكن قدر مكتوب انا ح امشي اتكلم معاهم واحوال اهديهم .

قلت لمرة عمي خليك جنب امي كانت نايمه ومركبين ليها درب قلت ليها ح اتصل لعمي اشوف الحاصل شنو .... قمت ماشه عمي جاء خاشي وقفت وبقيت بعاين ليهو وهو كان بتفادى إنو عيني تتلاقى مع عينو ووشو م بتفسر ،، مشيت عليهو وقلت ليهو عمي طمني ابوي منو خبر ، هاشم وصل المستشفى ، اها ابوي حالتو كيف ؟ سكت مسافه ودنقر راسو وم قدر يقول اي شيء من سكوتو دا انا حسيت الأرضت انطوت علي حسيت بقبضه قوية قلت ليهو ياعمي قول ابوي كويس صاح وللحظه دموعي بدأت تنزل .

واخيراً اتكلم واول شيء جاب لي مقدمه عن الصبر والإبتلاءات وحقيقه الموت والحياة انا خلاص بقيت بشوف طشاش طشاش وراسي بقى تقيل وكلامو وصوتو بقيت اسمعو بعيد .... قلت ليهو بصوت خافت ياعمي الكلام الكتير دا لزومو شنو قول لي ابوكي كويس وبس ،، واخيراً نطق بكلمات حسيتها زي الحراب على صدري قال لي " ربنا يصبرك يابتي إنا لله وإنا إليه راجعون " ومسكني وبقى يبكي زحيت منو وقلت ليهو استغفر الله ياعمي دا كلام شنو ؟ ابوي كويس الظهر كنت بتكلم معاهو حتى كان مبسوط شديد بنجاحي يلا قول لي ابوي كويس ياعمي عليك الله ياعمي .... مسكني وقال لي عارفها صعبه والله وشديد كمان بس دا الطريق الدائم يابتي وكلنا ح نسلكه عاينت ليهو وصرخت صرخه عاليه ابووووي لمن امي قامت مخلوعه طلعت السير من يدها ونزلت من السرير جات علي .

وهي زاتها في حالة صدمه وعدم تصديق فتحنا العنبر بيت بكى وعمي ومرتو مره يحاولو يهدونا ومره يبكوا معانا.... عمي تلفونو اتصل طلع برا اتكلم مع هاشهم وجاء قال لينا الصبر ياجماعه وبشر الصابرين البكاء م بفيد شيء نحن لازم نرجع البيت لإنو قربو يوصلوا عمي ملزمني وقال لمرتو تمسك امي وطلعنا من المستشفى ،، حالتنا لا توصف عمي وقف ركشه ركبنا ومشينا البيت نزلنا من الركشه وكل واحد فينا في حته تانيه خالص م بعرف هو ماشي وين و ماشي كيف