تحميل رواية لن اشرق في سمائك بقلم عبير سليم pdf

ما أسوأ أن يحب المرء و يعشق من ناحيته فقط يسهر وحده و يحب وحده و يعشق وحده و يتحمل آلام قلبه وحده فهل هذا يعد حبا هل من العدل أن نحب من لا يرونا و نعشق من لا يشعرون بوجودنا و تجافي أعيننا النوم من

أجلهم و هم يغطون في سبات عميق أي عدل هذا و من ذاك الذي يتحمل كل هذا العناء فنحن لسنا ملائكه مفطورون على العطاء فقط إنما نحن بشر نريد أن نحب و يحبنا الآخرون نعطي و نأخذ بقدر ما تعشقهم قلوبنا و تهواهم افئدتنا

يتحدث إليها عبر الهاتف : إيه يا شوشو فينك يا بنتي مش باينه من امبارح طول اليوم و انتي مختفيه و مش عارف اوصلك و سالت عنك رنيم قالتلي متعرفش انتي فين ممكن تقوليلي حضرتك كنتي فين و مكلمتنيش ليه اياكي تكوني رحتي فحته من ورايا حطين عشتك

أشرقت : هههههههه يا بني بالراحه علية واحده واحده يا بدوره خليني أعرف أرد عليك

بدر : ابني ابني ميضرش اتفضلي قولي كنتي فين حضرتك

أشرقت : كان عندنا ضيوف يا سيدي

بدر : ضيوف اه قلتيلي بقى و ضيوف مين دول بقى حضرتك اوعي يكون عريس و انا معرفش

أشرقت : و ده يزعلك يعني

بدر : أيوة طبعا لازم تاخدي الإذن مني و انا اقول اه أو لاء

أشرقت : هههههههه ماشي يا سيدي

بدر : طب اتفضلي كملي ايه حكاية الضيوف دول

أشرقت : قرايب بابا من البلد نزلوا اسكندريه يومين و بابا عزمهم عندنا و طول اليوم ماما موقفاني على رجلي معاها في المطبخ و بالليل بابا اخدنا و خرجنا كلنا و رجعنا متأخر اوي اول نا حطيت راسي عالمخده رحت فسابع نومه محستش غير و التليفون بيرن دلوقتي

بدر : يعني حضرتك طول اليوم هيصه و فسح و خروج و انا قاعد عمال اضرب اخماس في اسداس مش كده

أشرقت : و ايه المشكله يا بدر ان فات يوم من غير ما نتكلم فيه

بدر :تصدقي انك بارده و غلسه يعني انتي مش عارفه اني مقدرش يعدي علية يوم من غير ما اسمع صوتك

أشرقت : و لا انا والله يا بدر خلاص يا سيدي متزعلش حعوضك بكره عن غيابي و حعزمك انت و البت روني الفطار ايه رايك

بدر : لا يا ستي اذا كان عالفطار انا اللي حعزمكم المهم متتاخريش عشان عندنا في المكتب شغل كتير اوي متأخر

أشرقت : حاضر ان شاء الله حاجي بدري

تقفل معاه الخط و تحضن الموبيل و هي فرحانه و مبسوطه أوي إن بدر ملهوف عليها بالشكل ده و تاني يوم تلبس طقم شيك

أوي و تفرد شعرها على ضهرها و تروح الشركه توصل تلاقي بدر موجود و اول ما يشوفها يقوم من على المكتب و يصفر واو إيه الحلاوة دي يا شوشو يخرببيت عقلك كل يوم بتبقي أحلى من اليوم اللي قبله

أشرقت : ههههههه بس بقى متكسفنيش، يا بدر

هي فين رنيم صحيح

انا اهوه انا اهوه انا اهوه قمر اربعتاشر اهوه

أشرقت و بدر : هههههههه

رنيم و هي بتبوس أشرقت : حبيبة قلبي يا شوشو كده بردو يا اختي يجيلكم شوية فطير و جبنه قريش تقومي تنسينا يوم كامل ده انا و بدوره كنا يتامى من غيرك يا قمري

أشرقت : حبيبة قلبي يا روني انتوا كمان والله وحشتوني

بدر : انا بقول نبعت بقى نجيب الفطار عشان انتوا عارفني مش بعرف اشتغل على معده فاضيه

رنيم : تمام يا معلم

يبعت بدر الساعي و يجيب لهم الفطار و يقعدوا كلهم يفطروا مع بعض و يبدءوا الشغل اللي مبيخلاش من الضحك و الهزار بينهم هما التلاته و بعد ما ينتهي اليوم يعرض عليهم يوصلهم في طريقه زي ما بيعمل كتير لكن رنيم تقوله انها عاوزة تشتري حاجات و حتاخد أشرقت معاها

يروحوا يشتروا اكسسوارات و هدوم و يروحوا يقعدوا فكافيه يرتاحوا شويه و تلاحظ رنيم ان أشرقت وشها بيبتسم و بيضحك لوحده و كل شويه تسرح : شوشو شوشو

أشرقت : ايه بتقولي حاجه حبيبتي

رنيم : بقول اللي واخد عقلك يتهنى به يا قمر بتحبيه اوي كده يا اختي

أشرقت : اوي اوي يا رنيم و بعدين انتي بتسالي على اساس انك مش عارفه يعني

رنيم : لا عارفه طبعا يا قلبي امتى بقى نبل الشربات و نرقص و نفرح

أشرقت : مش لما ينطق يا رنيم و يقولها

رنيم : يا حبيبة قلبي مش لازم كل حاجه تتقال بالكلام في حاجات بتبان من التصرفات و كل تصرفات بدر بتقول انه بيحبك و بيحبك اوي كمان ده أول امبارح جنن امي من كتر سؤاله عنك كنت حاساه زي البيبي الصغير اللي بيدور على مامته

أشرقت : طب حيتكلم امتى طيب مستني ايه عشان يتكلم عارفه يا رنيم انا اوقات كتيره بقعد احلم مع نفسي و اتخيل إني أنا و بدر متجوزين و مع بعض و عايشين حياه سعيده

رنيم : ان شاء الله يا حبيبتي حتعيشوا سوا كل اللي بتحلمي بيه انا عارفه انتي بتحبيه اد إيه و انه حب عمرك كله

أشرقت : عمر عيني ما شافت و لا حتشوف غيره

رنيم : على يدي يا اختي ده كفايه العرسان اللي كل شويه تطفشي فيهم عشان سي بدوره

أشرقت : بحبه أوي يا رنيم و مش متخيله حياتي من غيره مش بقدر استحمل فكرة ان حد تاني يشاركني حياتي غيره

من وقت ما كنا فالجامعه و أنا بحبه ده انا فرحتي بالشغل هنا كانت عشان حكون معاه مش أكتر

رنيم : ان شاء الله قريب أوي حلاقيه جاي يقوللي الحقيني يا رنيم جوزيني صاحبتك بسرعه مش قادر

أشرقت : تفتكري يا بت يا روني

رنيم : طبعا يا بنتي هو هزار و اللا إيه حيحصل و بكرة تشوفي و تقولي كان عندك حق يا صاحبتي

تمر الأيام و أشرقت منتظره اليوم اللي بدر حيعترفلها فيه بحبه ليها كل تصرفاته معاها بتقول ان في حاجه جواه تجاهها كلامه و أفعاله و أوقات كمان غيرته من أي حد يتكلم معاها أو يحاول إنه يقرب منها

و فيوم يدخل المكتب و هو متضايق جدا و رنيم تلاحظ ده : مالك يا بدر في حاجه

بدر : مفيش يا روني

رنيم : مفيش ازاي ده انت شكلك متضايق اوي ما تقول يابني في ايه

بدر : الهانم صاحبتك

رنيم : أشرقت مالها

بدر : واقفه مع مازن و سايبه شغلها

رنيم : يعني انا عاوزه افهم انت متضايق عشان هي واقفه مع مازن و اللا عشان سايبه شغلها

بدر : هو مش المفروض اننا احنا أصحابها يعني المفروض ماتتكلمش مع حد غيرنا صح و اللا انا غلطان

رنيم : لاء طبعا غلطان يا بدر انت عارف ان أشرقت ما شاء الله عليها محبوبه من كل اللي شغالين في الشركه و علاقتها كويسه بالكل و هي من حقها تتكلم مع اللي هي عاوزاه احنا مش حنحكر عليها يا بدر

بدر : يمكن يكون عندك حق بس يمكن اكون بقول كده لأنك عارفه أشرقت ايه بالنسبه لي

رنيم : إيه يا بدر أشرقت ايه بالنسبه لك

بدر : مش عارف يا رنيم جوايا حاجات كتيره متلغبطه من ناحيتها اوقات بحسها أمي اللي بتتحملني في كل لحظات حياتي فرحي و حزني غضبي و هدوئي لا بتكل و لا بتمل مني

و أوقات بحسها اختي اللي دايما شايل همها و عارف انها شايله همي

و اوقات تانيه بحسها صديقتي اللي بقولها كل حاجه جوايا من غير كسوف و لا احراج منها

رنيم : و مفيش حاجه تانيه يا بدر

بدر : حاجه تانيه ازاي يعني

رنيم : يعني انت قلت انك تحسها اختك و مامتك و صاحبتك طب مفيش حاجه تانيه

بدر : و هو في ايه اكتر من كده

رنيم : فعلا معاك حق مفيش أكتر من كده طب ممكن أعرف أبو الهول ناوي ينطق امتى بقى عشان انا تعبت و الله

بدر : سلامتك من التعب يا رنيم لو علية انا نفسي انطق النهارده قبل بكره بس خايف

رنيم : خايف من ايه

بدر : خايف من ردها مش عارف حتقول ايه خايف ميطلعش الي جوايا هو نفسه اللي جواها

رنيم : أقولك انا انت تقول لصاحبتها و هي تقوللها إيه رأيك بقى في الفكره دي

بدر : بجد يا رنيم يعني انتي عاوزاني اقول لصاحبتها مش ليها

رنيم : مش انت يابني اللي بتقول خايف تفاتحها خلاص كلم صاحبتها و هي اللي حتجيبلك الخبر اليقين و لو اني متأكده من ردها

بدر : بجد يا رنيم

رنيم : و جد الجد يا بدر

بدر : يعني حقدر اجي ازوركم قريب

رنيم : انت تشرفنا في أي وقت يا بدر و انت عارف ماما بتحبك اد ايه دي حتفرح اوي بوجودك

تفتح أشرقت الباب و تلاقي رنيم و بدر مركزين في الكلام مع بعض : مالكم في حاجه

بدر بفرحه : في كل خير ان شاء الله

ياخد شغل في ايده و يروح على مكتب المدير

أشرقت : هو في حاجه

رنيم : خلاص يا روحي الظاهر ابو الهول حينطق خلاص

أشرقت : انتي بتقولي ايه يا رنيم

رنيم : بقول ان حبيب القلب حيتكلم معايا عشان أبلغك إنه بيحبك و واقع لشوشته و عاوز يتجوزك و انا بقى ارد عليه و اقولله رأيك بس انا طبعا حقولله إني اقنعتك و قلتلك ارحمي الواد الغلبان ده و اعطفي عليه و اتجوزيه و خلصوني بقى عاوزة ازغرد و ارقص يا ناس

أشرقت و هي قلبها حيقف من الفرحه : لاء لاء انا مش مصدقه بجد بجد يا رنيم بجد بدر حيكلمك علية حيقولك انه عاوز يتجوزني بجد اوعي تكوني بتهزري طب أحلفي عشان أصدق

رنيم : هههههههه أيوة و ربنا و حياة أشرقت عندي ما بضحك عليكي

أشرقت : ياااه يعني حلم عمري اتحقق خلاص يعني انا حكون لبدر و بدر حيكون لية انا مش مصدقه يا رنيم

رنيم : لاء صدقي هو انتي مش عاوزه تفرحي يا اختي و اللا إيه

أشرقت : بس هو ليه حيكلمك انتي يا رنيم

رنيم : خايف يا ستي لتكوني مش بتحبيه زي ما بيحبك و بصراحه انا اللي اقترحت عليه إنه يكلم صاحبتها اللي هو انا طبعا و هو ما صدق

أشرقت : طب هو حيكلمك امتى طيب

رنيم : قريب أوي إن شاء الله تصدقي ان المجنون ده حييجي يكلمني فبيتنا ياللا عشان ماما ترقع زغروده و الجيران يفتكروا اني انا اللي اتخطبت

أشرقت : هههههههه ان شاء الله يا حبيبتي تتخطبي و نعمل خطوبتنا مع بعض ان شاء الله

رنيم : مفيش حاجه بعيده عن ربنا يا قمري

يرجع بدر و يلاقيهم بيتكلموا مع بعض و يقعد يكمل شغله و هما كل شويه يبصوا لبعض و يضحكوا

يمر اليوم و أشرقت منتظرة أهم لحظه فحياتها اللحظه اللي حتكلمها رنيم و تقوللها إن خلاص بدر كلمها كل ما التليفون يرن تجري عليه لحد ما مر اليوم من غير ما يحصل حاجه

في اليوم التالي راحوا الشغل و اول ما جه بدر لقى رنيم مش في المكتب و أشرقت لوحدها : أمال فين رنيم يا أشرقت

أشرقت : راحت تسلم الشغل لرئيس القسم

بدر : أشرقت

أشرقت : نعم يا بدر

بدر : كنت عاوز اقعد انا و انتي في اي مكان بعد الشغل بس لوحدينا

أشرقت لفرحه : ماشي

تيجي رنيم و تسلم عليه و تقعد على مكتبها و تلاقي أشرقت الفرحه بتتنطط على وشها

بعد شويه يجيله تليفون و ياخده و يخرج يتكلم

تقوم رنيم و تقعد ادامها : في إيه

أشرقت : مش حتصدقي

قالتلها أشرقت ان بدر حيقابلها و طبعا رنيم استغربت انه حيقابلها و المفروض الاتفاق مكنش كده لكن قالت يمكن رجع في كلامه و قرر يكلمها علطول و فعلا بعد ما خلص اليوم خرجت معاه و قعدوا

فكافيه و طلب حاجه يشربوها و هي مستنياه يتكلم : شوشو طبعا انتي عارفه انتي ايه عندي و عارفه ان الدنيا كلها فكفه و انتي في الكفه التانيه و ان غلاوتك عندي ملهاش حدود أغلى من اي حد في الدنيا

أنا طلبت منك نقعد لوحدنا عشان أتكلم معاكي فحاجه مهمه جدا بالنسبه لي لأنك اكتر واحده بتحس بية

أشرقت و هي مبتسمه : و عمر ما حد حيحس بيك ادي يا بدر اتكلم انا سمعاك

بدر : أنا في واحده فحياتي بحبها بحبها أوي و نفسي اني اتجوزها

أشرقت : واحده فحياتك من غير ما اعرف بقى كده طب يا ترى مين بقى سعيدة الحظ اللي اخدت قلبك

بدر : انتي عارفاها كويس و يمكن أقرب حد ليكي كمان انا بقالي سنين بحبها و برغم اننا بقالنا سنين مع بعض من أيام الجامعه للشغل و تقريبا مفيش غير يوم الإجازة اللي مبشوفهاش فيه لكن مجاتليش الجرأه إني اصارحلها بمشاعري حتى محاولتش لحظه اني اظهرلها ده و حاولت أخبي عن الكل احساسي بيها

أشرقت : ليه يا بدر ليه تخبي إحساسك بيها ما دام جواك الحب ده تجاهها

بدر : اصلنا طول الوقت بنتعامل زي الأصحاب و الأخوات فهي أكيد ده اللي اترسخ جواها فبقى صعب بالنسبه لي اني اتكلم معاها فحاجه تانيه و أروح بيها لسكه تانيه خالص لكن أنا بقول ان كفايه أوي كده نفسي بقى ارتبط بيها و أعيش معاها الحياه اللي طول عمري بتمناها بس أنا قلقان اوي يا أشرقت

أشرقت : من إيه

بدر : خايف متكنش بتبادلني نفس المشاعر خايف ميكنش جواها اللي جوايا ناحيتها

أشرقت : طب و لو يعني لقيت مشاعرها مش زي مشاعرك

بدر : لاء متقوليش كده ارجوكي انا مش حستحمل حاجه زي دي انتي متعرفيش أنا بحبها اد إيه

أشرقت : طب و لما جواك الحب ده ليها سكت ليه بس كل الوقت ده كنت منتظر ايه عشان تتكلم إيه كنت مستني لما تشوفها و هي مع غيرك

بدر : مانا قلتلك يا أشرقت و بعدين اديني اهوه يا ستي عاوز الحقها بقى

أشرقت : اطمن يا بدر مش معقول يكون جواك الحب ده كله تجاهها و هي متكنش بتحبك أكيد طبعا بتحبك و أكتر مانت بتحبها كمان

بدر بفرحه : يعني تفتكري يا أشرقت ان رنيم تكوني بتحبني زي ما بحبها

تختفي الضحكه من على وشها و يحل محلها الهلع و الصدمه من اللي قاله تغيب الابتسامه و يحل محلها العبوس : ر رنيم

نطقتها بحروف متقطعه مش مستوعبه الاسم اللي نطقه مش فاهمه حاجه رنيم مالها رنيم و ماله بيها

بدر : بحبها أوي يا شوشو معلش بقى سامحيني أنا عارف إنك زعلانه مني عشان مقلتلكيش قبل كده مشاعري ناحيتها و أنا عمري ما خبيت عنك اي حاجه قبل كده بس سامحيني و الله انا كنت حريص إني متكلمش عنها خالص و لا الفت نظرك و لا نظرها و لا نظر اي حد إني بحبها

أشرقت انتي لازم تكوني معايا فكل خطوة انا مش حقدر أعمل أي حاجه غير وانتي معايا معلش بقى اخوكي و حغلس عليكي هههههههه عقبال ما اتعبلك يوم فرحك يارب بصي بقى يا ستي انا قلتلك اهوه انتي بقى حتقولي لرنيم تمام و هي طبعا حتعمل نفسها مكسوفه و هي بتقولك انها موافقه و بعد ما تبلغيني ححدد معاد معاها و اروح لها بقى و انتي طبعا معايا زي ما قلتلك

أشرقت رحتي فين انتي سايباني عمال اتكلم لوحدي و انتي مش بتردي علية اتفاجئتي مش كده

مش قادره ترد عليه الكلام مش بيطلع بتاخد نفسها بصعوبه حسه ان قلبها حيعلن توقفه عن الحياه

مش قادره تمنع نفسها من البكاء مش قادره تتحكم في د.. موع عينيها مش قادره توقف رعشة ايدها حسه ان جسمها كله بيتنفض

تمسك كوباية المياه و ايدها بتترعش عشان تشرب لكن المياه تقع عليها من غير ما تحس

بدر : مالك يا أشرقت انتي تعبانه

تهز رأسها بنفي

بدر : أشرقت انتي بتعيطي في إيه مالك

تقوم أشرقت : انا تعبانه عن اذنك

تمشي بسرعه من غير ما تركز لدرجة انها تخبط في الجارسون و تعتذرله وتخرج و هي بتجري بسرعه و توقف تاكسي و اول ما تركب تحط رأسها على زجاج العربيه و تنهار من البكاء

اما بدر فيحاول يلحقها لكن على ما يخرج وراها يلاقيها ركبت التاكسي خلاص

محتار مش عارف في ايه و ليه قامت من ادامه فجأة كده

مستغرب ازاي ما ردتش عليه و لا قالت أي حاجه

يتصل عليها كتير لكن مفيش أي رد منها قلق عليها أوي و مش عارف يعمل ايه

... .. ...... ...........

تفتح عليها باب اوضتها تلاقيها نايمه عالسرير و مغطيه رأسها بالمخده: يا سلام حضرتك نايمه و لا فدماغك و انا قالبه الدنيا عليكي طبعا ما هو من لقى

احبابه نسى صحابه بقى يا هانم كده بردو يا أشرقت أرن عليكي و مترديش طب ردي علية يا جذمه طمنيني عليكي

تشيل المخده من على رأسها و تتخض من منظرها : إيه ده مالك يا أشرقت في إيه يا بنتي حصل ايه

أشرقت :مفيش

رنيم : مفيش مفيش إيه ده انتي مفلوقه من العياط انتي رحتي مع بدر

أشرقت و هي منهاره : أيوة يا رنيم

رنيم :، اتكلمتوا

أشرقت : اتكلم هو اللي اتكلم يا رنيم

رنيم : طب في ايه طيب مادام اتكلم و قالك عاللي جواه في ايه بقى حصل ايه عشان تبقي في الحاله دي

أشرقت : هو قال اللي جواه فعلا عاوزة تعرفي قاللي ايه يا رنيم

رنيم : مانا عارفه طبعا قالك إيه قالك انه بيحبك و عاوز يتجوزك

أشرقت بتنهيده : لا يا رنيم قاللي إنه بيحبك انتي و عاوز يتجوزك انتي انتي مش أنا يا رنيم

رنيم :انتي بتقولي إيه يا أشرقت إيه الكلام الفارغ ده بدر بيحبني انا

أشرقت و هي بتبكي بشده و الحروف بتخرج منها بصعوبه : أيوة يا رنيم و طلب مني إني أكلمك و أبلغه ردك اللي هو واثق منه و انه عاوزني أكون معاه وقت ما يروحلكم مانا أصلي طلعت مامته اللي بتحتويه و بتحس بيه

رنيم : أشرقت انتي بتقولي ايه يا حبيبتي انتي مستوعبه للي انتي بتقوليه ده أشرقت بطلي هزار بقى و اتكلمي جد

أشرقت و هي منفعله : هزار إيه الهزار في اللي بقوله بدر بيحبك انتي و عاوز يتجوزك انتي انتي مش انا يا رنيم و كمان متأكد من انك حتوافقي يبقى فين الهزار في كده فهميني

رنيم : لما تقوليلي انه بيحبني انا يبقى أكيد هزار طبعا لاء أكيد في حاجه غلط هو بدر اتجنن واللا ايه بدر بيحبك ايوة انا متاكده انه بيحبك

أشرقت و هي منهاره : أيوة هو بيحبني فعلا بس زي أخته مش أكتر من كده

رنيم الله يخليكي أنا قلبي واجعني أوي و مش قادره صدقيني سيبيني يا رنيم سيبيني انا محتاجه اقعد لوحدي و الملم نفسي

رنيم : لاء يا أشرقت لاء أنا مش حسيبك جرحك هو جرحي و وجعك هو وجعي

فجأة تلاقي تليفونها بيرن باسم بدر

تبص أشرقت للاسم و تضحك : بيتصل بية عاوز يعرف ردك يا رنيم

تاخد رنيم التليفون من ايدها و تفتح الخط و الاسبيكر : ايوة يا بدر

بدر بفرحه : رنيم انتي مع شوشو

رنيم : أيوة طبعا معاها يا بدر و حفضل معاها العمر كله انا مليش في الدنيا دي كلها غيرها و لا عندي اغلى منها

بدر : أنا عارف يا رنيم عشان كده لما قلتيلي اكلم صاحبتها عرفت ان قصدك على أشرقت و كلمتها هيا كلمتها عشان تقولك اد ايه انا بحبك و بحلم باليوم اللي حنكون فيه مع بعض

رنيم : بس أنا مش بحبك يا بدر و عمري ما حبيتك انت بالنسبه لي صديق اخ زميل مش أكتر من كده و عمري ما بصتلك بشكل تاني يا بدر

بدر : يعني ايه يا رنيم يعني انتي مش موافقه علية

رنيم : لاء طبعا يا بدر مش موافقه و عمري ما حوافق عليك حتى لو كنت اخر واحد في الدنيا و تقفل الخط

أشرقت : ليه كده يا رنيم بدر بيحبك هو ملوش ذنب اني بحبه لكن هو بيحبك انتي

رنيم : و أنا بحبك انتي يا أشرقت و مفيش عندي أغلى من حبي ليكي

تقعد معاها رنيم فتره طويله و تهديها و بعد كده تمشي و بدر يفضل يسأل نفسه ليه في ايه ليه رنيم ترفضه بالشكل ده اكيد في سر يتصل على أشرقت برغم ان الوقت كان اتأخر جدا و يطلب منها انها تكلم رنيم و تعرف مالها و إيه اللي مزعلها و تقوللها إنه بيحبها أوي و يحلفها انها لازم تقف جنبه و متسيبهوش و انه بيحب رنيم أوي و مش حيقدر يتجوز حد غيرها

كانت أشرقت بتسمعه و قلبها ببيتقطع و كل كلمه كان بينطفها كأنها نصل بيتغرز في قلبها جر. ح بيضغط عليه بكل قوته من غير شفقه و لا رحمه

يقفل معاها السكه وتتصل بصاحبتها اللي النوم كان جافى عيونها و ترد عليها و تبلغها بكلامه و تحاول تقنعها انها تديله فرصه و انه بيحبها هي و حيسعدها.

تقفل معاها السكه و تتصل عليه يفرح اوي ان رنيم اتصلت و يفتح الخط بسرعه لكنه يلاقي من رنيم رد قاسي و كلام بلهجه اول مره يسمعها منها

يعني انت اعمى القلب و البصيره لكن كمان اعمى البصر

بدر : ليه يا رنيم كده ليه أنا عملت ايه عشان تقوليلي كده مش انتي بنفسك اللي قلتيلي أكلم صاحبتك

رنيم : انا قلتلك كلم صاحبتها و انا كل قصدي كان انا تكلمني انا

بدر : أكلمك انتي ازاي مش فاهم أكلمك على مين يا رنيم

رنيم : تكلمني على اشرقت يا بدر أشرقت مش انا

بدر : أشرقت

رنيم : إيه اتخضيت و اللا اتفاجئت

بدر : أنا مجاش في بالي حاجه زي دي

رنيم : مجاش في بالك إيه انت بتتكلم ازاي انا عاوزه أفهم أمال حبك ليها و اهتمامك بيها طول الوقت ده كان ايه خوفك و قلقك عليها كانت ايه غيرتك عليها لو لمحت أي حد بيكلمها أو واقف معاها يبقى تفسيره إيه كل ده تفسيره ايه غير إنك بتحبها يا بدر

مش معقوله يا بدر متكنش شفت حب اشرقت ليك مش معقوله متكنش شفت د.. موع عينيها و انت بتكلمها بدر أشرقت بتحبك بتعشقك يا بدر انا و هي كنا فاكرين انك طلبت تقابلها عشان تعترف لها بحبك و انك عاوز تتجوزها بدر انت متتخيلش حالة اشرقت ازاي دلوقتي أشرقت أشرقت يا بدر اشرقت اللي تعتبر أهم حد عندك أقرب حد ليك في الدنيا كلها

بدر : رنبم انا فعلا بعز أشرقت أوي و غلاوتها عندي ملهاش وصف و لا حدود لكن انا مكنتش متخيل انها تفتكر اني ممكن أكون بحبها انا محبتش غيرك انتي يا رنيم و متمنتش غيرك بس كنت منتظر الوقت المناسب و كنت منتظر اكون جهزت نفسي عشان محدش يعترض عندكم مش أكتر من كده

رنيم عشان خاطري متعاقبينيش على حاجه انا مليش ذنب فيها أشرقت حرة فمشاعرها و انا كمان حر المشاعر مش ملكنا يا رنيم مش احنا اللي بنتحكم فيها و انا و الله عمري ما وعدتها بحاجه انا بحبك انتي يا رنيم

رنيم : و انا بحب أشرقت يا بدر

بدر : يعني انتي عاوزه تقوليلي إنك رافضاني عشان أشرقت مش كده مش عشاني مش لشخصي طب و انا ذنبي ايه

رنيم : بدر من فضلك انا كلامي خلص خلاص تصبح على خير

بدر : لاء، يا رنيم الكلام مخلصش و انا مش حسيبك تقفلي و لو قفلتي حتلاقيني ادامك في البيت متضحكيش على نفسك يا رنيم انتي بتحبيني زي ما بحبك انتي خايفه على مشاعر صاحبتك مش اكتر بس حرام عليكي تعملي كده فينا اشرقت بكرة تلاقي اللي يحبها و يقدرها لكن انا عمري ما حقدر أحب غيرك أنا بحبك يا رنيم بحبك

رنيم : و انا مبحبكش يا بدر افهم بقى ارجوك بدر الله يخليك خلينا زي ما احنا زملا و اخوات هو ده اللي حيدوم و الله

بعدها تقفل الخط

يحاول يتصل بيها كتير متردش

يمر كذا يوم و رنيم و أشرقت مبيروحوش الشغل و بدر بيحاول يتصل عليها و مبتردش عليه و مش قادر يتصل على أشرقت و لا يكلمها أول مره يحس انهم بعيد اوي كده عن بعض مش مصدق ان أشرقت اللي كانت اقرب حد ليه في الدنيا و اللي كانت اول واحده بيجري عليها لما يحتاجها تبقى بعيده عنه و مش قادر يكلمها

بعد مرور حوالي اسبوع

يروح الصبح يتفاجئ بأن رنيم بتعزم كل زمايلها في الشركه على حفلة خطوبتها و الكل بيباركلها و بتأكد عليهم ييجوا

يبصلها بعيون كلها لوم و عتاب : معقوله اللي انا سمعته ده يا رنيم

رنيم :عقبالك يا بدر طبعا حتيجي حزعل منك بجد لو مجتش

بدر : انا مش حاجي غير خطوبتي انا و انتي يا رنيم

رنيم : انا خطوبتي يوم الجمعه الحايه ان شاء الله حتيجي يا بدر ما هو مش معقوله حتسيب أختك في يوم زي ده و انت عارف اني معنديش اخوات صبيان و اني طول عمري بعتبرك اخويا

بدر : بس انا مكتش عاوز ابقى اخوكي يا رنيم

رنيم عشان خاطري انا عارف انك ماخدتيش الخطوة ده غير عشان تبعدي نفسك عني بس انتي كده بتظلمي نفسك و بتظلميني لازم تتراجعي عن الخطوة دي يا رنيم

رنيم : اتفضل يا بدر دعوتك اهيه حستناك يا بدر

يدخل المكتب يلاقي اشرقت بتشتغل يسلم عليها وترد عليه السلام من غير اي كلمه زياده بتبص له و قلبها واجعها عليه و على د. موعه اللي شايفاها بقلبها و هو بيحاول يداريها مش عارفه تعمل له ايه هي حاولت تقنع رنيم كتير انها تديله فرصه و انه بيحبها و هو ملوش ذنب فحبها ليه لكن رنيم رفضت حتى انها تكلمها في الموضوع ده

مر الاسبوع و جه يوم خطوبة رنيم واتفاجئت أشرقت ببدر بيتصل بيها و بيبلغها انه حيعدي عليها يروحوا الخطوبه سوا

وقف أدام باب العماره مستنيها تنزل بعد شويه لقاها خارجه من العماره و على وشها ابتسامه جميله بص عليها انبهر بيها و بهيئتها لابسه فستان بينك جميل و رقيق و عامله شعرها تسريحه بسيطه و ميك جميل و هادي راح ناحيتها سلم عليها و فتحلها باب العربيه و دخلت طول الطريق بيتكلم معاها و بيضحكوا سوا وصلوا القاعه حاول يقاوم احساسه بيها حاول يتمالك نفسه و يسيطر على اعصابه سلم عليها و باركلها هو و أشرقت و اتصوروا معاها هي و خطيبها

و راح هو و أشرقت و سلموا على كل زمايلهم في الشركة وقعدوا معاهم عينيه مكنتش بتنزل من على رنيم و طبعا اشرقت ملاحظه ده و قلبها واجعها اوي و مش عارفه تعمل إيه لحد ما بدأت الرقصه السلو و طلبوا من كل كابل يشاركوا العروسين الرقصه

وقتها اتفاجئت اشرقت ببدر بيطلب منها انها تشاركه الرقصه

وقفت ادامه و حطت ايدها على كتفه و هو حاوط خصرها بايديه قلبها كان بيدق اوي و هو كان بيحاول يركز معاها على ما اد ما يقدر

انتي جمبله أوي الليلادي يا أشرقت

أشرقت : بجد يا بدر يعني عجبتك

بدر : انتي طول عمرك عجباني يا اشرقت انا مش عارف ازاي مكنتش شايف الجمال ده كله ادامي قبل كده

أشرقت : عشان انت مكنتش راسملي فخيالك صورة غير صورة واحده بس

بدر : واضح اني كنت غلطان بس جه الأوان اني لازم ابص للأمور بشكل احسن تتجوزيني يا أشرقت

أشرقت : إيه انت قلت إيه يا بدر

بدر : تتجوزيني يا أشرقت

أشرقت : بس انت بتحب يا بدر

بدر : محتاجك تنسيني ده يا اشرقت انا مش حكدب عليكي و اقولك اني فجأة نسيتها و حبيتك فجأة مش حفكر فيها و حفكر فيكي مش حكدب عليكي و اقولك اني مشاعري مرة واحده اتحولت ليكي لكن انا عاوز أحبك يا اشرقت عاوز اكون معاكي اشرقت انتي طول عمرك الوحيده اللي بتفهميني و بتعرف تخرجني من اي حالة حزن بمر بيها

أشرقت :الحاله اللي انت فيها دي يا بدر انا موعدكش إني حقدر انسيهالك حبك لرنيم لازم انت اللي تقرر تنساه لازم انت اللي تاخد الخطوه دي لازم انت اللي يكون جواك الرغبه انك تنسى يا بدر انا مش حقدر لوحدي صدقني

بدر :، ححاول و الله يا اشرقت بس و انتي معايا انا محتاجك جمبي يا أشرقت

يتكلم معاها كتير و يحاول يقنعها بالارتباط بيه و انه مش واخد قراره فلحظة اندفاع و انه مسئول عن قراره و هي تتكلم مع رنيم اللي تقنعها انها تديله فرصه و انه لما حيبص لها بشكل جديد و مختلف أكيد حيشوف الجانب اللي مكنش شايفه و أكيد حينساها وحيجبها هي بس

تقتنع أشرقت بكلام رنيم لأنها كانت متتظره تسمع ده نفسها تكون معاه و يكون ليها يروح يتقدملها و يعملوا خطوبه و يطلب انهم يتجوزوا بسرعه و فعلا يحددوا معاد الفرح و يعملوا فرح جميل يعزم فيه كل صحابهم و زمايلهم و رنيم تيجي هي و خطيبها و يسلموا عليهم و يباركولهم و ينتهي الفرح و يدخل بدر الشقه و معاه أشرقت اللي الدنيا مكنتش سايعاها من الفرحه و يطلب بدر منها تدخل أوضة النوم تغير هدومها براحتها

و يدخل هو التويلت و يبص في المرايه ويكلم نفسه : هو إيه اللي انا عملته ده هو اللي انا عملته ده صح و اللا غلط هو انا ليه مش مبسوط مع ان المفروض ان دي اسعد ليله فحياتي انا كان نفسي رنيم هي اللي تكون معايا دلوقتي كان نفسي انها هيا اللي تشاركنى فرحتي الليلادي

يحس نفسه أتأخر أوي يغسل وشه بالمياه و يخرج يروح ناحية الباب و يخبط عليها تخرج له و هي فقمة جماله و انوثتها يبتسم لها و ينزل على شايفها و يبوسها برقه و هو مغمض عينيه و بيتخيل رنيم هي اللي معاه

أشرقت كانت مندمجه معاه و حسه انها طايره في السما مش مصدقه نفسها ان حلم عمرها اتحقق و انها دلوقتي بين أحضان حبيبها سعادتها مكنش ليها وصف

وقت طويل مر عليهم و هما دايبين مع بعض فعالم تاني

بحبك أوي يا بدر

بدر : بحبك بحبك يا رنيم

فجأة تتحول سعادتها لحزن تتحول رغبتها لنفور يتحول حلمها لكابوس متحسش بنفسها غير و هي بتدفعه بكل طاقتها بعيد عنها

د. موع نازله سيول على خدها بتداري نفسها منه و كأنه شخص غريب عنها بتغطي جسمها و كأنه بقى مش من حقه يشوفه

بعد ما كانت حاسه انها طايره في السما فجأة حست انها نزلت لسابع أرض كل كلامه مش سمعاه كل اعتذاراته ملهاش اي اعتبار بالنسبه لها

طلبت منه يسيبها و يبعد عنها حاول يتأسف لها لكن مفيش فايده هي عارفه ان رنيم فقلبه بس مش في الليله دي و في الوضع ده

دي حاجه بتاعتها هي خاصه بيها هيا مينفعش حد ياخدها منها

مهانش عليه يسيبها و هي زعلانه فضل يتأسف لها و يقوللها انه غصب عنه و انه مش حيحصل تاني

حبها ليه اتغلب على زعلها منه اخدها فحضنه و ناموا

مرت ايام و ايام و هما الاتنين بيمثلوا السعاده على بعض

بدر بيحاول يقنع نفسه انها بتحبه و انها الأولى بمشاعره لكن غصب عنه بيفكر في رنيم و لما يسمعها بتكلمها قلبه بيدق و أشرقت بتحاول تقنع نفسها ان بدر حيحبها و حينسى رنيم لكن في حاجات بتحصل بتخليها تحس ان ده شئ مش حيحصل بسهوله

تيجي رنيم هي و خطيبها و يباركوا لهم و بدر يحاول يبين لرنيم حبه و اهتمامه باشرقت لكن ده مفرحش أشرقت بالعكس ضايقها

ممكن افهم انتي ايه اللي مزعلك في حاجه زي دي مع انك المفروض تكوني فرحانه بحبي و اهتمامي بيكي

أشرقت : انا فعلا حبقى فرحانه بحبك و اهتمامك بية يا بدر بس لما يكون نابع من جواك لما تكون حسه لكن اللي انا حسيته انه كان تمثيل مش اكتر

كان ممكن تخللي الموضوع عادي على فكره مش لازم يعني تبين لها حبك لية و اهتمامك بية اللي هي حرمت نفسها منه عشان تزعل انها ضيعت الحب ده بايديها

و تندم على رفضها ليك

بدر : معقوله يا أشرقت هو ده ظنك فية

أشرقت : يا ريته يبقى ظن يا بدر لكن اللي انا متأكده منه ان هي دي الحقيقه

ينزلوا الشغل و يرجعوا هما التلاته تاني يشتغلوا فنفس المكتب

تحاول رنيم انها تركز في شغلها و بس

بدر بيشتغل لكن من وقت للتاني عيونه بتيجي عليها

أشرقت تعبانه و مش مرتاحه حسه انها محطوطه تحت ضغط نفسي و عصبي هي مش حمله كل شويه بتبص عليه كل شويه تراقبه

و أول ما يخرج تتكلم معاها رنيم عشان تطمن عليها و أشرقت تقوللها على كل اللي هي حساه و رنيم تطمنها ان كل ده حيتنسى و تقوللها انها اصلا بعد جوازها حتقعد من الشغل خالص

تمر الأيام و الشهور و أشرقت أوقات تحس ان بدر بيحبها و اوقات تحس انه مش معاها

بتحن كتير لأيام زمان لما كان بيحكيلها عن كل حاجه بياخد رايها فكل شئ لما كانوا بيتكلموا من غير احراج من بعض

دلوقتي بقى في حساب لكل كلمه و كل حرف و اوقات بتلوم نفسها انها اتجوزته و بدل ما الحواجز تتشال دي اتبنت من جديد

بدر كنت عاوزة اتكلم معاك في حاجه

بدر : قولي يا شوشو

أشرقت : كنت عاوزة اروح لدكتور

بدر : دكتور انتي تعبانه فيكي حاجه

أشرقت : لا يا حبيبي اطمن انا كويسه بس انا عاوزة اطمن ان مفيش موانع للحمل

بدر : حمل

أشرقت : أيوة يا بدر هو انت مش عاوزنا نجيب اولاد

بدر :لا طبعا يا حبيبتي اكيد عاوز طبعا نجيب ولاد بس احنا ملحقناش احنا متجوزين من ست شهور بس و المفروض اننا نبتدي ندور بعد سنه مثلا

أشرقت : نفسي اوي يكون عندي طفل يا بدر نفسي اجيب منك طفل

بدر : خلاص يا حبيبتي مفيش مشكله روحي اطمني

أشرقت : بس على فكرة انت كمان لازم تكون معايا عشان اكيد الدكتور حيطلب منك تحاليل

بدر : ماشي يا أشرقت شوفي عاوزة تروحي امتى و نروح

أشرقت : حبيب قلبي ربنا يخليك لية اه على فكرة نسيت اقولك كتب كتاب رنيم الاسبوع الجاي ان شاء الله

بدر : و المطلوب

أشرقت : ايدك على الف جنيه عشان اجيب فستان احضر بيه كتب الكتاب

بدر : حاضر يا أشرقت

تبوسه أشرقت بحب : ربنا يخليك لية يا حبيبي

بدر : طب انا نازل دلوقتي رايح أزور امي

أشرقت : ماشي يا قلبي

بعد مرور اسبوع يتم كتب كتاب رنيم لكن للأسف بعدها بفتره قصيرة تحصل مشكله كبيرة بين اهل رنيم و بين عريسها و يبان ليهم انه ضعيف الشخصيه و مش حيعرف يحافظ على بنتهم فيصمموا انه يطلقها و بالفعل يتم الطلاق و نفسية رنيم تبقى وحشه و أشرقت جنبها بتواسيها

و فيوم من الأيام تستئذن أشرقت من الشغل عشان تروح للدكتور توريه نتيجة التحاليل اللي عملتها و بعد ما تمشي يتكلم بدر مع رنيم

بدر : عامله ايه يا رنيم طمنيني عليكي

رنيم : الحمد لله بخير

بدر : محمد محاولش يرجع تاني

رنيم : الموضوع ده انتهى خلاص يا بدر

بدر : هو الخسران يا رنيم

رنيم : و الله انا شايفه ان الخسران الوحيد هو انا كفايه اني بقيت مطلقه و انا لسه اصلا متجوزتش يا ترى الناس بتقول علية ايه دلوقتي

بدر : قطع لسان اللي يجيب سيرتك بكلمه ده انتي ست البنات كلهم أن شاء الله ربنا حيعوضك باللي احسن منه يكون بيحبك و يشيلك في نن عنيه

رنيم : يارب

تقوم رنيم و تاخد أوراق و تروح توديها لرئيس القسم يمضيها اما بدر يقعد يفكر فيها و كل عقله معاها

يمر الوقت و يروح البيت و يلاقي أشرقت رجعت و عملت الغدا و جهزت كل حاجه و في استقباله تجري عليه زي عادتها و تحضنه و تساعده فتغيير هدومه و تقولله ان الدكتور طمنها و قاللها انها محتاجه شوية منشطات مش اكتر لكن تلاحظ ان بدر مش معاها خالص و لما تسأله اذا كان في حاجه يقولها تعبان من ضغط الشغل و عاوز يرتاح شويه تتحايل عليه ياكل معاها الأول لكن يقولها انه مش جعان تسيبه و تخرج من الاوضة و هي قلبها مش مطمن حسه ان في حاجه

حسه انه متغير من وقت ما رنيم خطبتها اتفسخت لكنها بتكدب نفسها

تلاقي رنيم بتتصل بيها تطمن عليها و تقوللها أشرقت اللي حصل و تقفل معاها

بعد مرور حوالي اسبوعين أشرقت قامت من النوم حست نفسها تعبانه و قالت لبدر انها حتاخد اجازه النهارده و حترتاح شويه

راح بدر الشغل و لقى رنيم موجوده بتشتغل سلم عليها و قعد يشوف شغله و مر الوقت عليهم و هما بيشتغلوا و هو عينه عليها كل شويه و لسانه عليه كلام كتير عاوز يقوله و مش قادر

قامت عشان تودي الشغل لرئيسهم و هو قاعد يكلم نفسه انه لازم يفاتحها فموضوع ارتباطهم ببعض و هي راجعه للمكتب سمع صوتها بتتكلم مع حد من الزملاء و بتضحك معاه

اول ما دخلت سألها كانت بتكلم مين بره استغربت أوي من طريقة سؤاله و قالتله و قعدت تكمل شغلها و هو متغاظ و عمال ينفخ

اما أشرقت كانت لبست و نزلت المعمل تعمل اختبار حمل لأنها شكت انها ممكن تكون حامل و بالفعل بعد نص ساعه اخدت النتيجه و لقتها ايجابيه و في حمل وقتها الدنيا مساعتهاش من الفرحه و راحت تجري

على بدر و رنيم عشان تفرحهم وصلت الشركه و فطريقها للمكتب و بمجرد ما وصلت المكتب وقفت على صوت بدر و هو بيكلم رنيم و بيقولها

...............................

و

رنيم أنا اكتر حد حاسس بيكي و مقدر كل الوجع اللي بتمري بيه و نفسي تديني الفرصه أكون جمبك و اساعدك انك تتخطي الازمه دي على خير

رنيم : مانت فعلا جمبي يا بدر هو انا لية مين غيرك انت و أشرقت ربنا

يخليكم لية دايما واقفين جمبي و معايا ربنا يديم بينكم المحبه و ميحرمنيش منكم

بدر : انا مجبتش سيرة أشرقت دلوقتي يا رنيم أنا عاوز انا اللي اكون

جمبك و معاكي انا لوحدي

رنيم : عاوز تكون جمبي و معايا لوحدك ازاي مش فاهمه

بدر : رنيم أنا اللي عاوزك تفهميه كويس اني منستكيش لحظه صحيح انا و أشرقت اتجوزنا و ربنا يعلم انا بقدرها ازاي و غلاوتها عندي إيه لكن انتي اللي فقلبي يا رنيم

غصب عني مش بأيدي مقدرتش اخرجك من قلبي و لا قدرت انساكي لحظه يا رنيم

رنيم أنا بحبك و كل يوم بيمر بحبك اكتر من اليوم اللي قبله

رنيم : انت بتقول إيه يا بدر انت واعي للي بتقوله ده

بدر : انا واعي لكل كلمه بقولها رنيم أنا عارف كويس أوي إنك وافقتي على محمد عشان تبعديني عن طريقك و اكون مع أشرقت و واثق ان لو مكنتش أشرقت هي اللي حطتنا في الوضع ده كان زماننا دلوقتي مع بعض

لكن خلاص الحمد لله التجربه اثبتتلك انك كنتي غلط في اختيارك و جه الوقت اللي لازم نصلح فيه الوضع ده

تتجوزيني يا رنيم وافقي يا رنيم عشان خاطري وافقي و انا اوعدك حخليكي اسعد انسانه في الدنيا

رنيم : اتجوزك و أشرقت يا بدر

بدر : أشرقت عارفه اني بحبك

رنيم : ياااه عالانانيه يعني مش كفايه عليها انها اتجوزتك بالوضع ده و كمان جاي تقوللي انها عارفه

عارفه ايه عارفه انك حتغدر بيها و تسيبها يااااه تصدق ان أشرقت خساره فيك انا اللي غلطانه اني شجعتها انها تتجوزك افتكرتك بني آدم حتحس و تقدر و تعرف تحب الانسانه الوحيده اللي حبتك

معقوله بعد كل الحب و الاهتمام اللي أشرقت اديتهولك عاوز تتجوز عليها بسهوله كده طب و يا ترى بقى حتقوللها

بدر : طبعا حقوللها انا مش حعمل حاجه من وراها لأني مبعملش حاجه غلط افتكر ان من حقي اني اكون مع اللي بحبها

رنيم : و الله اللي انا شايفاه انك مبتحبش غير نفسك يا بدر عاوز كل حاجه من الدنيا و اللي بيعوز كل حاجه مبيخدش حاجه يا بدر

بدر : متظلمنيش يا رنيم انا بحبك و الله بحبك و أشرقت اكيد حتفهم و تقدر ده و لو حابه تفضل معانا انا معنديش مانع و الله

فجأة يلاقوها بتفتح الباب عليهم : تخليني معاكم لا و الله كتر خيرك يا جوزي و انا حفضل معاكم اعملكم ايه اخدمكم و اللا اروقلكم الجو بس العيب مش عليك العيب على قلبي انا اني مشيت وراه ورا سراب لحد ما بقيت في اللي انا فيه ده لا يا بدر اطمن انا حسيبك تعيش الحياه اللي نفسك فيها مع الحب اللي تتمناه و انا تقدر تعتبرني ماضي و انتهى خلاص و من دلوقتي مش عاوزة اشوفك تاني و ورقة طلاقي توصللي على بيت أهلى

تخرج من المكتب و هي بتجري و منهاره من العياط

رنيم :عاجبك كده مبسوط دلوقتي بقى يهون عليك تعمل كده في أشرقت منك لله يا بدر منك لله

تسيبه و تجري وراها وقتها كانت أشرقت بتجري و هي مش شايفه ادامها خرجت من باب الشركه و بتعدي السكه و هي مش واخده بالها من العربيه اللي جايه عليها و فجأة فقدت الوعي و الناس كلها اتلمت و رنيم واخداها فحضنها و بتصرخ عشان حد يجيب إسعاف و السواق بيحلف للناس انه معملش حاجه و هي اللي ظهرتله فجأة

نزل بدر بسرعه لما سمع صوت الفرمله و اول ما عرف ان أشرقت هي اللي عملت الحادثه جرى عليها و اخدها من حضن رنيم و حطها في العربيه و طلع بيها بسرعه عالمستشفى و هي فاقده للوعي رنيم كانت بتبكي و قالتله لو أشرقت حصللها حاجه حيكون هو السبب و ذنبها فرقبته مر وقت و أشرقت في

العمليات و اخيرا خرج الدكتور و طمنهم انها عندها كسر في دراعها و كان في نزيف و قدروا يوقفوه لكن للأسف فقدت الجنين

صدمه نزلت عليهم اول ما عرفوا ان أشرقت كانت حامل و اجهضت قعدت رنيم عالكرسي و انهارت من العياط على صاحبتها و أبنها اللي كانت بتتمناه و ازاي راح منها كده فغمضة عين و بدر هو كمان صدمته كانت كبيره ان أشرقت كانت حامل في ابنه و راح قبل ما يعرف بوجوده

اول ما فاقت أشرقت لقت رنيم قاعده جمبها و بتعيط : رنيم

رنيم : أشرقت يا حبيبتي الف حمد لله على سلامتك

أشرقت : ابني يا رنيم ابني كويس

أشرقت : الحمد لله انك انتي بخير يا حبيبتي

أشرقت : ابني كويس يا رنيم

رنيم : معلش يا حبيبتي ملكيش فيه نصيب ربنا يعوض عليكي يارب

تنهار أشرقت من العياط و رنيم بتحاول تهديها و بعد شويه وصلوا أهلها و رنيم طمنتهم عليها

أشرقت نامت بعد ما اخدت حقنه مهدئه و رنيم فضلت جمبها مسابتهاش لحظه و بدر عاوز يدخللها و فنفس الوقت مش قادر يوريها وشه

في اليوم التالي

رنيم : أشرقت انا

أشرقت : متقوليش حاجه يا رنيم انا عارفه كل حاجه و محدش ليه ذنب فحاجه انا اخدت قرار كنت مقتنعه بيه كنت فاكره انه حيبجي اليوم اللي يحبني فيه زي ما بحبه لكن للأسف كنت غلطانه انا مكنتش سعيده معاه يا رنيم اد ما كنت تعيسه مكنتش مطمنه اد ما كنت قلقانه مكنتش مرتاحه اد ما كنت تعبانه

قلبي كان بيوجعني اوي و هو بيغلط في اسمي و هو صاحي و بيهلوس باسمك و هو نايم جيت على نفسي كتير و اعصابي تعبت حطيت نفسي تحت ضغط عصبي شديد كان فوق طاقتي

يدخل عليهم و عيونه مليانه بالدموع انا اسف يا أشرقت اسف سامحيني على كل اللي عملته فحقك انتي متستاهليش اللي حصل ده سامحيني يا أشرقت سامحبني و انا حعوضك عن كل اللي عملته فحقك

أشرقت : لا يا بدر خلاص فات الأوان

انا ازاي ما اخدتش بالي قبل كده ان اشرقت و بدر مينفعوش يجتمعوا شروق الشمس عمره ما يجتمع مع البدر اللي وجوده دايما في الليل

الليل و النهار ميجتمعوش يا بدر

و انا شمسي عمرها ما حتشرق في ليلك و لا حتنور في سماك

تمر الأيام و أشرقت حالتها تتحسن و بدر بيحاول بكل الطرق معاها لكن مفيش فايده اضطر انه يطلقها زي ما طلبت اما رنيم فكان ليها خال عايش في السعوديه بعتلها عقد عمل و سافرتله و راحت اشرقت معاها وصلتها المطار

و حضنوا بعض و وعدوا بعض انهم حيكونوا على اتصال دائم ببعض

بعد كده اشرقت دورت على شغل تاني و لقت شغل في شركه تانيه

و كانت على اتصال دائم برنيم و عرفت ان رنيم ان اتجوزت ابن خالها و بعتتلها صور و فيديو الفرح و اشرقت كانت فرحانه اوي علشانها

اما أشرقت فبدات تهتم بنفسها و تتصالح مع وضعها و تبدأ حياتها من أول و جديد حاول بدر كتير انه يرجعلها و يقوللها انه مش قادر يعيش من غيرها لكن هي رفضاه

انا اسفه يا بدر اللي كان بيننا عمره ما حيرجع تاني

بدر : ارجوكي يا اشرقت انا لوحدي حاسس اني ضايع من وقت ما خرجتي من حياتي

أشرقت : انت اللي خرجتني مش انا يا بدر

بدر : طب اديني فرصه تانيه و انا والله

أشرقت: بدر الله يخليك متتعبش قلبي اكتر من كده ياريت تحترم رغبتي و تبعد عني و تسيبني فحالي الله يخليك

بدر : يااه معقوله انتي يا أشرقت ياللي كنتي اقربلي من الدنيا كلها تطلبي مني اني ابعد عنك و اني موريكيش وشي تاني بس انا مش حعتب عليكي لأن انا اللي وصلتك لكده و انا اللي عملت فيكي كده

يمشى بدر و هو مقرر انه حيخرج تماما من حياتها و مش حيحاول يضايقها تاني

لاحظ محمود مديرها انها شكلها حزين و اتكلم معاها و حكتله باختصار من غير تفاصيل اتعاطف معاها و دايما كان بيشجعها

برافو عليكي يا أشرقت

أشرقت : متشكره اوي يا افندم

يفتح الباب و يدخل : سلام عليكم

يرد عليه محمود : و عليكم السلام ورحمة الله وبركاته

يلاحظ محمود انه عينه عليها

اعرفكم ببعض الأول مدام أشرقت بتشتغل معانا هنا من فتره قريبه بس الصراحه اثبتت كفائتها من اول يوم

يمد لها ايده : اتشرفت بمعرفتك

إيهاب مهندس ديكور

أشرقت : أهلا بحضرتك يا استاذ إيهاب عن اذنكم

تخرج أشرقت و إيهاب متتبعها

محمود : ايه يا عمنا عجبتك اللا إيه

ايهاب : هي قمر الصراحه بس مش انت بتقول مدام

محمود : هي مدام بس منفصله

ايهاب : منفصله لا ده انت تحكيلي بقى

تقعد أشرقت على مكتبها و تتابع الشغل و تلاقي رنيم باعتلها بتطمن عليها و على أخبارها

بعد كده تقعد تكمل شغلها و تمر الايام و تلاحظ ان محمود مديرها بيكلمها كتير عن صاحبه ايهاب و ان ظروفه مشابهه لظروفها و انه كان كاتب كتابه على واحده من العيله بس اكتشف انها بتحب حد غيره و ان اهلها هما اللي ضغطوا عليها عشان تقبله

ايهاب كان دائم الزياره لمحمود و بيحاول يشوف أشرقت و يتكلم معاها لكن أشرقت مكنتش بتديله فرصه خوفا على سمعتها و وضعها لحد ما محمود طلب منها انها تديله فرصه يتكلم معاها و قاللها ان ايهاب شخص محترم جدا

سابلهم المكتب يقعدوا براحتهم و خرج للاجتماع مع رؤساء الأقسام

ايهاب حكى لأشرقت ظروفه كلها

و أشرقت حكتله ظروفها و حكايتها

ايهاب : و انا عاوز اتجوزك يا أشرقت

أشرقت : بس انا سبق لية الجواز قبل كده

ايهاب : ميهمنيش انا اللي يهمني حاجه واحده بس ان ميكنش جوة قلبك اي شئ من الماضي و ان قلبك يكون ملكي انا و بس

أشرقت: انا الماضي انتهى من جوايا و مبقاش ليه اي اثر

ايهاب: أشرقت ممكن تحدديلي معاد معاد اهلك

بعد مرور شهر كانت أشرقت و ايهاب بيقضوا شهر العسل و الفرحه مالية قلوبهم حب اشرقت كان مالي قلب ايهاب ليها هما الاتنين كانوا مستغربين اوي ازاي قلوبهم اتآلفت لبعض بسرعه كده

هو مش عارف ازاي حبها بسرعه كده و هي مش عارفه ازاي حبته و نسيت كل حاجه مرت عليها و كل وجع حسته

انا مبسوطه علشانك اوي يا شوشو

أشرقت : حبيبتي يا رنيم ربنا يخليكي ليا يارب

رنيم : لا بس واضح انك واقعه فيه لشوشتك

أشرقت : بحبه بحبه أوي يا رنيم

مناقصنيش غير حاجه واحده بس عشان تكمل فرحتك

رنيم : ان شاء الله يا حبيبتي ربنا حيكرمك و تجيبي بنوته قمر للواد اللي حيشرف ده كمان شهرين ده

أشرقت : ربنا يقومك بالف سلامه يارب

تقفل معاها السكه و تتفاجئ بيه بيبوسها من خدها : حبيبتي كانت بتكلم مين اكيد رنيم صح

أشرقت : صح طبعا يا حبيبي

ايهاب : مالك يا شوشو

أشرقت : رنيم حتولد كمان شهرين كان نفسي اكون معاها واشيل ابنها على أيدي

ايهاب : بس كده بسيطه يا ستي حوديكي عندها و تحضري ولادتها و تشيلي ابنها كمان

أشرقت: ايهاب انت بتتكلم جد حتوديني السعوديه

ايهاب: و انا عمري كدبت عليكي يا شوشو

احنا حنسافر نعمل عمره أن شاء الله و بعد كده نعمل اللي احنا عاوزينه و احنا هناك متنسيش ان عمي في السعوديه و حيرحب بينا جدا و هو اصلا من كتر ما كلمته عنك نفسه اوي يشوفك

أشرقت و هي بتحضنه : انا بحبك بحبك بحبك أوي يا هوبه يا احلى هوبه في الدنيا كلها

ايهاب : طب هوبه جعان مش حياكل و اللا إيه

أشرقت : يا خبر حالا يا حبيبي الأكل حيكون جاهز

ايهاب : لا انا جعان من حبك يا حبيبة قلبي و عاوز اكلك انتي يا بطتي

أشرقت : هههههههه

فعلا يوفي ايهاب وعده ليها و ياخدها يسافروا السعوديه يأدوا العمره و يروحوا لرنيم اللي الدنيا ماساعتهاش من الفرحه و تحضر ولادتها و سبوعها و تشيل البيبي الصغير و هي فرحانه بيه اوي و بعد ما يرجعوا من السعوديه ربنا يكرمها و تحمل و سعادتها هي و ايهاب كانت تفوق كل وصف

كان بيدلعها و بيعملها كل حاجه تفرحها و مرت الأيام و الشهور و السنين و السعاده و الحب ماليين قلوبهم

مامي يا مامي الحقيني

أشرقت : في إيه يا رنيم

رنيم : يزن عاوز يضربني يا مامي

أشرقت : انت عاوز تضرب اختك يا يزن

يزن : بتلعب في حاجتي يا مامي

رنيم : لاء يا مامي ده متغاظ عشان انا شفته و هو بيكلم أشرقت فيديو يا مامي

اشرقت : انت كنت بتكلم أشرقت فيديو يا يزن

يزن : ايوة يا مامي اصل طنط رنيم وحشتني و كنت بسالها عنها

رنيم : بقى طنط رنيم هي اللي وحشتك بردو

تضحك أشرقت و تخليهم يصالحوا بعض و تتصل على رنيم و تحكيلها اللي حصل و يضحكوا و تقوللها رنيم انهم حيوصلوا مصر اول الشهر يقضوا اجازه الصيف زي كل سنه

يرجع ايهاب من الشغل و يبوسها زي ما اتعود دايما معاها و تحكيله اللي حصل و يضحك على ابنه اللي بيحب و هو لسه في أولى اعدادي و يقوللها انه. حجز اسبوع في شرم الشيخ و يطلب منها تحضر الشنط عشان يسافروا

تقوم أشرقت عشان تحضر الشنط فتلاقي اجنده كانت شايلاها من سنين و نستها فتحتها و افتكرت كل اللي مر عليها كل السنين دي

تمسك القلم و تكتب السطر الأخير في مذكراتها

من لا يرفع شأن نفسه لن يرفع شأنه أحد ومن يقبل على نفسه أن يكون بديلا لن يكن هو الأصل مطلقا

لا تكن مجرد سد خانة في حياة بعضهم فإن لم تكن كل حياتهم فليس لوجودهم معنى و ليس لقلبهم سبيل

فالحب الحقيقي يكون بين فؤادين يتعلقان ببعضهما و يستشعران جمال الحياه سويا اما الحب من طرف واحد فهو مهانه للنفس و ضياع للكرامه و لا نحصد منه سوى الدموع و الآهات

تقفل االاجنده و تحس انها خلاص ملهاش مكان في حياتها ترمي بيها في سلة المهملات و هي بتبتسم على حياتها الجميله اللي عايشاها و حبها لزوجها اللي مالي قلبها