رواية ليالي رمضانية الفصل السابع والعشرون 27 - بقلم عبد الرحمن الرداد

كانت علامات الحزن ظاهرة بشكل واضح على وجه الشيخ أثناء إلقائه للبيان، هتف بنبرة هادئة تعبر عن حالته تلك: - أسرع شهر ممكن يعدي على البشرية كلها هو شهر رمضان، امبارح كنا بنقول أهلا رمضان ودلوقتي بنقول مهلا رمضان، خلاص مبقاش غير يومين على أفضل شهور السنة.. يومين على فتح أبواب الجنة وغلق أبواب النار.. رمضان سوق قام ثم انفض.. ربح فيه من ربح وخسر فيه من خسر، لسة قدامك فرصة ذهبية لسة يومين.. اليومين دول متخليش دقيقة إلا وأنت ذاكر ربنا فيها.. سبح ربنا واستغفر ربنا وصلي على رسول الله صلى الله عليه وتصدق وأعمل أي عمل خير يجي على بالك، شيل الكره والحقد من قلبك وازرع حب وتمني خير للغير.. أنت مش عارف أي عمل من دول ممكن يكون سبب في إن ربنا سبحانه وتعالى يرحمك ويعتق رقبتك من النار... أسأل الله العظيم رب العرش العظيم أن يجعلنا من الفائزين في هذا الشهر الكريم وأن يجعلنا من عتقائه من النار.