رواية ما بين النسر والشيخه الفصل السادس 6 - بقلم اوسار

#قدك_المياس
مابين النسر والشيخة

من كتابات زهراء العراقية

الفصل السادس

يقين
رجعت اني ونسوان عمي وكلنا معدا عمتي تأخرت لأنها صعدت بسيارة العريس وصعدت العروس وية اختها  للجناح
اما احنه زفيناهم ورجعنا
...
دخلت عمتي وذبت البوشية

اووف يا يقين يعني صدك لا كالو العرسان اثنين والمجانين ألف  .. لو ادري ما حاطة  هذا المكياج اتورطت ضليت لازكة بالبوشية
بالكوة امشي مدري اساعد العروس مدري اساعد نفسي

كعدت على كرسي الاستراحة

ها عمة اشلونه السويد

يا يابة فد تعبت لا وبعد اخت العروس كلشي ماكو كلتلها الزمي ثوب اختج لا ينعدم من ورة

واني الملم بيها من كدام ... عافت البدلة اجلب بالباب زين ما انمزكت ....

اكلج عمة السويد اشلونه

اشلونه زين حالة حال غرف الفنادق يعني  اشلونه ....
على هالتعب راح انام بعد ما اصحى

اسم الله عليج عمتوا

اههه تسأل على الفندق ام الهلس تردين اتعرسين بيه

فد خجلت ....

راحت للحمام ...صدك اريد بيه  عجبني من خارج شكلة ههههههه

طلعت عمتوا من الحمام ..

هاي الحمرة  فد فضيحة ما راحت الا بعد ما شلعت كلبي  ....
سكتت اشوية .... وهي تمشط شعرها
سألت
اكلج صدك هذا اخو العروسة الجبير ما مزوج لهسة ؟؟؟

جنت   اشيل بثوب عمتي اكتره ..

لا بس هو مزوج جان انكليزية ومطلك

اهااا

اي يكول محسن امها لبنانية وابوها برطاني

ها لعد كولي هيج هذا شابع من الاجنبيات ...شسوي بمغثة العربيات

عا عمة احنه مغثة

ابتسمت وانطرحت  ...
...
ثاني يوم الضحى وصلوا العرسان

احنه محضرين الذبايح وانريد.نذبح ونطبخ غده  للخطاطير وعمي تأخر الا جه
ما خلونه نطلع للحديقة نستقبلهم
مليانه زلم

دخل هو وعروستة
ومرت جدي اطش جكليت واتهلهل هي وبيبياتي خالات عمي وعمتي جواهر

اجته عمتي بوسته ..بس شو هو وجهه مكلوب وضايج .. واهنا بدت همسات بين عمامي ونسوان عمامي وعمتي مدري اشبيها اتروح منا وتجي منا محتارة وضايجة  .. !!!

اهنا اجو اهل البنية عازميهم ...

عمتي اول ماكعدت ام البنية كالت الها خالة تعاي واخذتها وراحت لغرفة البنية ..... عمي طالع ويه الخطار ....

اني كمت احوس شكوو شكوو

اجتني
رنيم بت عمي الي قبل فترة تزوجت

ولج يكولون لهسة مماخذها ..

وين ياخذها .

غبرة يعني ما داخل عليها

ها فهمت فهمت ما مسوين احم احم

اي ههههههه انفصحوا

شافتنا امها  سمر نضحك عاطت بينا عرفت حتى احنه وصلت السالفة النا .... 

التهينا بالطبخ والنفخ ...  اليوم عمي عايد وية اثنين طباخين طبخوا بالحديقة ....

و احنه علينا هم كم صنف ثاني ...

واخيرا اجت رباب او خالة رباب ..بت خالة ابوي ....يعني بت خالة جواهر ... مزعطتها البنات كدامها يتراكضن و الولد اضاهر يم ابوهم عدها ثلاث بنات واربع ولد بس اتخلف  فصاير جسمها سمين من تراكمات الولادات والاكل ...!

دخلت علينا من الباب الخلفي .. لأن الباب الامامي متروس زلم ....
هلهلت و طكت اصبعتين ... الي يشوفها ويشوف خفتها وضحكتها  العايقة ما يصدك ابد هاي صديقة عمتي الروح بالروح الاثنين على نقيض من بعض ....
كالت
صيحونا  العريس

و عزمت الا اشوف العريس واتبارك اله هي ما اجت على العرس بس بيوم الحنه حضرت .لأن عمتها مريضة .... اجه وضلت تكفل واتهوس واله واتهفي بعبايتها و اجتي امي اتهوس وياها ... نسيت اذكر امي هم اصير بت خالتهن لجواهر و رباب ... اجتها  عمتي ..

واخيرا شرفتي ست رباب ما جان خلصتي ايام العرس

نزلت عبايتها ..
وراحت يمها ....

يمعوده حتى بصباحية اخوج مبوزة  .

وطكتها ضحكه بادلتها عمتي بخزرة .. سكتتها
اما عمي مثل اللي صارت بكلبة غصة من ذكروا الصباحية يمكن هي شغلة جدا عادية واتصير بس عدنا بالعراق وخاصة عمي ابن الشيخ لا هاي جبيرة والناس كلها تصير اسولف بيها ومنو اللي يطلعها ..النسوان و بالاخص الكنات ..
فكلنا ندري هذا العريس ما ماخذ مرته !!!!!

اخذت عمتي رباب وراحن على صفحه وكفن بممر الهول .. 

واني وراهن احب لقائهن يونس !!
وكفت يم الدرج متحركت وجه رباب عليه شافتني وعادي وكفتي  البيت يضج بالناس
عمتي همست الها  وردت بشهكة رباب

يا عزة ... ما ماخذها

رباب عود انت ما تدرين ؟

لا والله يا جواهر ادري بس اغشم نفسي قبل ساعة وصل النا الخبر  اخيج ما داخل عليها ههيييي
وحطت ايدها على حلكها

رباب !!!؟؟ مو ادري خواتج راح ينشرنها

جا انه غريبة والله انت بطرانة ... اروح اشوف الجدورة ...

لا تعاي خل نحاجي عروس البين ..

يا اشبيج عليها

ادري بيها عايقة

هنه ويصعدن واني ردت اصعد وراهن صدتني عمتي بنظراتها .. 

ما يمكن خايفة البت واخوج هاجم عليها
وما ماخذه عليه فصدته

ما ماخذه علية ام التلفونات ..لو تتعيقل

عمتي حيل مغثوثة منها  كملن الدرج واني رحت ..واكول صدك هي بعد ماخذه عليه وحب بيهنم ليش هيج صار اني سمعت من الهمسات هي تبجي  الليل كله وكاسرة خاطرة و عايفها
مممم اني شو حيل متلفهة على حسوني ..
وحدي خجلت خدودي صارن ورديات

  لكيت رنيم تغمز الي بمعنى اشبيج تتبسمين وحدج ..
...

دا انصب للنسوان جابونه جدر اللحم من كمل الطباخ ..

نحط فوك التمن الوذر...

  عمتي حاطو تخته وكاعده  اتصب تمن وابصفها رباب اللي اتخلي ..

عمتي  كالت
رباب كثري اللحم ..

يا شدعوة بعد  ناقص اكطع من كرشي واحطلهم

كلنا كركرنا معدا عمتي ابتسمت

كريمة من يوم يومج جواهر جان اتكرمتي ع ذاك الرجال
ابسرعة ضربتها سكتتها 

هيههههه اقصد  رجلي واخذتج ضره اللي

دسكتي اسكتي
سكتتها عمتي
بس اني احلف مجانت تشاقة جانت تقصد بالفعل رجال و لزكتها لزك علينا  بسالفه الضرة
..

واتأكدت من فرغ المطبخ والخطار يتغده بقت بس هي و رباب .. 

جنت اريد اخذ علب ماي ..

هيهيهي اي وشفتيه مطك على شفتج هيهيهي

ابسرعه شافتني عمتي وانخطف لونها

هاااااا شرايده ؟؟
من سالت دارت عليه وجها رباب وبلعت الضحكة

اريد ماي

اطلعي من المجمده

رباب حطت ايدها على حلكها .. اخذته وطلعت واني جسمي كزبر من سوالف المزوجات بس شنو هاي مال مطك وخالتي رباب كالتها يعني  المقصودة عمتي !!! رجعت اني وصينية العلب مال الماي يصير كلاص صغير ومسلفن .. 
البيه ما خلاني اروح واريد اسمع تعقيب عمتي على العبارة
سمعتها اتلوم برباب ..

يووه اشمدريني المفعوصة بلكت ما سمعت انه صوتي ناصي

انت صوتج ناصي يا خالة رباب اني سمعته قبل لا اوصل الباب ...

رباب كافي ساعة السوده الكتلج بيها قبل اشوية ولمحتي ...  وتعاي صدك شنو قصدج
من كلتي اتكرم عليه هااا ...

خربت عليه  الجو مرت جدي طلعت من الاستقبال وجايه ناحيتي رحت الها

ليش تأخرتي

دتعاي

رجعت ورحت وياها حطيت الماي وطفرت للمطبخ
كل النسوان مطشرات قسم بالهول وقسم بالاستقبال و قسم  بالصالة  الجبيرة يتغدن
اما الزلم المضيف البراني وبيتنا احنه بيت ابوي اقصد هم مفتوح وبس للزلم وخاصة الي عدهم مبيت يمنا .. امي وخواتي اهنا اجن بيت جدي 

وكفت .... وهنه ساكتات .. واسمع صوت خواشيك ..اخذتلي نظرة ..عمتي اتنصب بقواري الجاي و رباب مربعة وتاكل ...

ردت اروح بس الله خلى رباب اتكول

اكلج وانت اشمالج   متعجبة  لان هيج باوعلج

هم رجعت لنفس الموضوع رباب عندي غرفة وانسولف بيها

ما اصبر بعد وانه ورة الضهر رايحه ..  انت ليش هيج  اتفكرين بالسالفه اهنا الأنة

اني اكلج ..  بصراحة رباب نظرته خجلتني حيل واني بس اشوية رفعت البوشية ... بس هو نظرته مال واحد واحد يعني افهمي يريد مرته هيج شي

دا تحجي  واجت مرت عمي سويت نفسي اريد ادخل بس وجهي صار اصفر . .

من خلصوا اكل رجع البيت ضج بالناس بكل كتر

بعد ما انفردن سوية عمتي ورباب واني ما شبعت فضولي .... ترة اني مو فضولية بس بأمور عمتي اي شي يخصها اتمنى يكون عندي علم بيه حتى غرت من رباب اتمنيت اني صديقتها واسولف الي  مو رباب ...
اريدها كصديقه مو ام بس ما فاتحه كلبها الي .. ما عرفت منو هذا اللي مباوع الها بنظرة شهوانية ..!؟ 

وانتهى اليوم وجان حيل يونس رباب تحلي الكعدات بتصنيفها ...هي اصغر  من عمتي بسنة ومزوجه من عمرها 16 سنة ..  بس هي سينما تخرب ضحك بالتصنيف بس حيل طيبة ..ترست اكدورتها وراحت هي هم بت خير بس اتكول حتى ما اطبخ باجر ...
..............

مرت اربع ايام والبيت صار لا يطاق كلها تحجي بسالفة رغدة وعمو حتى جدي الصبح شفته صاير اعصايب يصيح كام ويه مرته بالهول
يكول خل يفضها الناس اكلت وجهنا يقصد اخوته

وابوي هم كلساع جاي واعرف على مود هاي الشغلة وكلهم خايفين لا بيه شي......
  بالليل ع العشا
طبعا هي ما تنزل اكلها يصعد الها تستحي
نزل هو  ديغسل
ومر للهول يريد يسلم ع خاله توه اجه من النجف هو جان يدرس اهناك بالحوزة العلمية    وازوج منك علوية من عشرين سنة  وشيخ طيب هو اللي شار على عمتي تدرس
..

عمي عايد
هاااا بشر  ..

جنا بس احنه ماعدنا خطار غير خالي

باوع قحطان اله بمعنى مو وكتها ...

ذكر جدي بالسالفة وجدي هم يحب خالي اقصد خال ابوي يعتبرة منا وبينا

ولك قحطان سودت وجهنا .... اشوكت اتفضها

عود يحجون بالالغاز

فاض بعمي الصبر وصاااح
يابة عوفوني على راحتي شسوووي تردون اكتلها  لو اغصبها

اعيط ويصيح  وطلع لحديقة صاير اعصاب .. اخوته سحلووه لا يطاول ع ابوه .. احنه عود البنات والصغار هم كلنا اطشرنا بالغرف عيب نسمع وكاموا يعقدون جلسات ...واحنه اني رنيم واختي مرام

كلساع وحده تطلع تسلل لكعده الكبار .. طبعا الكعده تشمل الزلم وبس و مرت جدي و عمتي جواهر  مابيها چنات ....
العريس طالع خارج البيت  هج من الملامة 

اجت مرام اتكول ولج يقين ابوي يكول البنية مو صاحية ليش ما تخلي وجدي الشيخ رضى (خال ابوي) يكله حرام الشك
عالكة يا اختي ....
بس سمعت عمتي جواهر اتكول ممكن اتعوفوني اني اصرف ...ردت ادخل من اول يوم بس قحطان ما خلاني يخاف على زعلها ...
سألتها
ولج مرام شراح اسوي عمتي

رنيم - بلكت تكتلها والله غاثتني اوووف نفسية ولا حبيتها

اسكتي رنومه هاي اخت الحوووب مالي

دطيري انت الحوووب ماااالي
عيبت عليه رنيم

انفتحت الباب من قبل مرت عمي سمر وكالت انتفح الحصار اطلعن ...رحت لغرفتي دصعد وشفت عمتي واصلة لاخر باية  رحت اتمركض وراها .  غرفة رغدة كدام غرفتنا .... دخلت عليها هجم  .. وقفلت الباب سمعت دورات القفل ..... 

انتظر وانتظر بغرفتي بعد ساعة الا طلعت  عمتي ....

بالليل اني مغفية واسمع هلاهل بالبيت

هاي شنو الهلاهل

كلتها واني مطفية باوعت سرير عمة فارغ ...
دخلت عليه  جانت برة

عمه وين جنتي وليش اتهلهون ..؟؟

اش معليج انت
خرستني وراحت لفراشها
الصبح احنه المراسلات وحده تسأل الثانية ليش الهلاهل ...اجت رنيم وكالت النا ولجن اخذها
كمنا نضحك بعدين تذكرت دخلت عمتي عليها ساعة كاملة شنو سوت ؟؟؟؟؟

صار السابع وسوينا الها حفلة بيتنا ...

واجتي رباب .. 

اني ورنيم و مرام نتمكيج  بغرفة ام رنيم .
... ع المراية وحده ادفع بالثانية  اجت رباب دفعتنا و لطخت وجها بالاساس

اجت مرت جدي ...

اكلج رباب انت رفيجة جواهر
اشسوت جواهر وخلت رغده تخاف وتمكن رجلها منها

مطت بشفتها وكالت 
يااا سودت عيشتها هددتها بيومها  اخر يوم الها اذا ما تمكنه توصل السالفه لاخوها حسين

هااا خوش سوت

يا عمة عيارة هاااي جبانه  وهذا قحيطين رهيف الكلية ما طلعته سبع مثل اخوته

يسولفن واحنه وحده تباوع للثانية وتضحك

غمتنا رباب
ولجن انتن كلجن على وجه زواج  مخطوبات  وانتي رنيمة ماخذة رجل مو الج الكلام بس انتن مو تخزنا مثلها
تقصدنا اني واختي
كالت  الها رنيم

خالة رباب انت من اول ليلة  اخذج ؟؟

لا يعيني انه اللي اخذته

هي كالت هيج واحنه متنا ضحك

وجان اعيونا اصير على عمة اللي متخوصرة وتخزر برباب يم الباب ما تقبل ابد نحجي بهيج مواضيع
اوف عمة مو بس شكل بيبي لا حتى سوالف نسوان قبل ...هسة وين اكو بنية اظل مغمضة لليلة الدخلة ؟

عمة لابسة فستان سهرة والشعر برم رفيع على طولة وتاتوا ع شكل فراشة صغيرررة حيل بحنجها جنها غجرية ...

مرام
اكولج يقين شو ام حسن عينها كله على عمتج

اشمدريني بس عمة مبهرة ههههه

****

ليان كاعدين ع العشا
وامي كلش مبهورة  بجواهر

يمة الحك اخذها كعدت يمي اليوم بت خالتها

وسولفت الي جم عريس ترفض بالشهر 

اني استغربت شو اشوي مبالغ بالامر لو هنه بنات الشيوخ هيج سوكهن مرغوب

***
حسين
يوم اني مخطط لكلشي بوقته

هي اتكول هيج واني بدا الخوف يسلل بداخلي لا اتروح الجوهرة بيد واحد ثاني  بس هي صارلها سبع سنين كاعده من اجيت اني كل شهر صارت تنخطب !؟

اووف يوم بكيفك

ليان كالت
يمة  هي منو كالت الج بس لا هاي الضحوكجية اللي اسمها رباب ماخذ الجوة بضحكها  شفتج اسولفين وياها

اي يمه هاي السمينه بت خالتها  اظن

**
يقين
ومرت فترة ... وانتهت العطلة وبديت اداوم
حاول محسن يقدم موعد الزواج بس فشل كدام قرار عمتي الصارم ......
...
بيوم البيت هم ما عنده سالفة غير عمتي جواهر والخطيب الجديد اللي رفضته بس هالمرة جدي
اهواي الح عليها وضغط وجابوا الها رباب تقنع وهي لا يعني لا ... بصراحه حيل متحسفة على عمرها اللي دا اضيعه هيج ...
وجدي اتأخر الا انطى الناس الرفض .. ومثل الزعل منها مثكل وجهه عليها .. وهي على رأيها

كعدت على صوت حركة هدفون  يطكط

...صحيت بس الضوة مطفي فما شافتني  عمتي عبالها نايمه جان الوقت متأخر ...

اسمعها  مثل اللي تحجي

دكعدي رباب
ها صحصتي
اني حيل مضايكه ... ومناك ابوي زعلان علية  حيل زودها عليه  ...

ما اسمع ردود رباب بس كلام عمتي  وبكل ودي اعرف علتها عسى ولعل اوخر هالة الحزن من عيونها   ....

كل ما يجي واحد   هيج اختنك ....يا رباب مدا اتحمل اللي يصير

حست على نفسها ورجعت نصت صوتها لان على

ما اكدر اتخيل نفسي ازوج مرة ثانية .. الموت اهون ...انوب شفت صورته كدامي ... 

اي اي يارباب اني لهسة احبة وفراكة صعب جان عندي امل ...بس من راح ماتت روحي

الألم  اللي بيها انتقل الي وحدها طلعت دموعي مو هين ابد وحده تخسر زوج حبته ... معذورة يعمتي ....

اسمع بس اهاتها و ودي اروح امسح دموعها بس اخاف منها ما تتقبل اشوفها تبجي ادري بكبريائها  وشموخها  ...

اي والله اقبل .  اقبل يا رباب   ويمكن هذا اكبر ذنب اللي احس بيه

مافهمت هاي العبارة الي انختمت بيها المكالمة
بيمن تقبل وبشنو تقبل وشنو الذنب و شنو القضية يا عمتي .....

***

ليان

رحنا اني  وامي اليوم نطلب ايد جواهر لأخوية حسين طبعا انطينا  الهم علم بس ما كلنا الهم شنو سبب الزيارة ...بس رغده  بس ادك على امي واتلح لا يجن ما تحبها ما اتريدها تاخذ اخوها .....
من امي طلبت الطلب الوجوه اتكلبت ....

والعيون كلها صارت صوب جواهر بت الشيخ اللي كاعدة ويانا ...
***
يقين اجونا اهل محسن واتأنقت وكعدت يمهم اني ونسوان عمامي ورنيم و عمتي جواهر ورغده كأي خطار ...
بعد الكلام والاحاديث الجانبية  انصعقنا بطلب
ام حسن

والله يا ام عزيز (يصيحون لمرت جدي بام عزيز بس هي معدها جهال منه اخذها ع كبر )

اجينا وكلنا عشم بيكم ما اتردونا اذا طلبنا ايد بتكم جواهر !!!!!

كلنا لا أراديا باوعنا لعمتي اللي كاعده على صفحة وهي هم بان عليها الاستغراب ...

مرت جدي
ها والله انتم ونعم منكم ...بس الرأي رأي جواهر ...شكولين يمة ..

اتعمدت مرت جدي تحرجها ....

ام حسن .. اوليدي حسن مهندس خبير والكل تحلف بيه  ورجال ابن رجال ..  ما يتعيب يا يمة  واني شفتج بت اصول وبت ناس اجاويد

حسيت بتردد عمتي ... لكنها واخيرا نطقت

يتبع