رواية ما بين النسر والشيخه الفصل الثامن عشر 18 - بقلم اوسار

#مابين_النسر_والشيخة
قدك المياس
من كتابات زهراء العراقية

الفصل الثامن عشر

يقين
كعدت الصبح .... بدلت لحمودي و نزلت لجوة اتريكت وريكته ...جانت  ام حسن بس كاعدة .... انطيته الها ورحت للخط ما وديته مثل العاده يم جواهر !!

من رجعت ورة الضهر  دخلت شفت بس جواهر كاعدة وابحضنها احمد يلعب وهي تلعب بالفون .... اخذته منها انتبهت لوجودي و رحت صادفتني ختام
اشلونج ختام

هلا اجيتي 
اي هاج حمودي  بس ابدل ...صعدت لفوك

نزلت اتغدة لكيت الاكل محمى وجاهز كالعادة   على الطاولة ....  ما اكلت منه طلعت جبن و سويت لفة ورحت لختام اشوف حمودي .... ويه طلعتي صادفتني جواهر دتدخل وشافت الاكل ع حاله واني بيدي لفة

ليش ما اكلتي ؟؟؟

ما جاوبت ورحت .... مشت وراية

يقين ...ليش جاي هيج تتصرفين ..تعالي

سمعنا اهنا صوت حمودي يصرخ بأعلى صوته ....ركضت على صوته شفت ختام شايلته وهو يصرخ بدموع و يرافس ..

جواهر
اشبية الطفل

ختام
انچوى  والله ما ادري اشلون مشى للصوبة
الدنيا توها بدت اتبرد وكمنا نفتح صوبات

ابني راح مني بس يبجي وايده حمر ...

يمه ابني
كعدت ابجي

اجتني عمتي ام حسن وعرفت منچوي
فاهية جويتي ابنج ...ما اديرين بال عليه
ثولة

عمتي جواهر   اخذت الولد منا وراحت .... اشوكت لبست عباتها ما ادري ....

وحسين اجه وراها اضاهر جان نايم وصحته بسيت بيتي اني اريد البس عباتي فوك وفهيت ..عافتني عمتي واخذته . خبصتهم بالاتصالات وعمتي فوك راسي ام حسن تلوم بيه

سديت الخط من جواهر  كالت طببنا للحرك ومابيه شي انشالله لا تخافين ...

سديته
يااارب كون صدوك مابيه شي
اجانه محسن جان توه طالع ورجعنا  من اتصلت بيه امه..
اعيونه بكصته
اشبيه  حمودي

ختام خلت وشردت لغرفتها

امه جاوبته

مرتك الفاهية تتغده وناسيه ابنها بالكيعان اكيد يأذي نفسه

هم لامني واني دموعي ما جفت انتظر رجعتهم .....

رجعت عمتي شايلته .... رحت الها ركض ..دمعته بعينه  مغمض وايده ملفلفة بشاش و الايد الثانية لازم بيها نستلة بس راخية اتريد  توكع ومبرطم ابو الوجه الابيض .
اخذته منها ... اجاني محسن اخذ مني وراح للغرفه بعد ما سال حسين عن ايده
اخترعت من كالو كشطوا جلده وضمدوا سودة عليه ....

نزل محسن واني جنت اريد  احضر اله عصير بالممة من يكعد يشربة مع النستلة ماصعدت ..

حسين خو ما يظل اثر .  .

لا تخاف فترة ويروح

ام حسن

مرتك الفاهية اشوكت اتخلص دراسة وتفرغ لأبنها
ظلت تحجي عليه ومحسن بس خزر بيه حسسني ام مهملة

ختام
اني اقرة وهي حطته حتى ما انتبهت اله

يمتى ما جنتي لازمه كتاب والله

جواهر نزلت مبدلة  ..

ام حسن
هسة الولد خطية لو دايره بالج مجان احتركت ايده

جواهر كعدت يم حسين وحصرته هو يباوع الها مبتسم
جواهر
القدر وصار  والملامة ما تفيد ... يقين ثلاث مرات باليوم اتغسليها بصابونه ركي واتحطين المرهم

ام حسن
المرهم  يحركة انحط الها شكر  هسة يصير مثل الورد

جواهر
يا شكر عمة المرهم يطيبه

انت شفهمج هاي ولدي جنت احط الهم مرهم  كل ما ينچون يصيرون مثل الورد

جواهر
مشبعتهم حروك وهسة اتلومين بالبنية

كالتها بشقه
ومحسن ضحك  واشوية ارتخى
خله امه اتضوج

انت شفهمج بالخلفة هااا   حابلة جايبة

حسين
يووووم !!!

شكلنا هسة

جواهر
صحيح الله ما رزقني اطفال من رحمي

حسين ضاج عليها
جواهر لا حب......

اوكف حسين بس خل اكول لأمك اني  ياما أطفال وكعوا على ايدي و اركض بيهم للدكاترة و للمستشفيات يا ما كمطت و رضعت ممات ... اكثر من عدد اولادج يا عمة  من واني طفلة عافوا طفله يمي أربعين يوم اني اهتم بيها ...وهسة ما اتباوع لوجهي  ...

اخر جملة كالتها بصوت شفاف وطغى عليه الحزن والزعل
.....
لليل  بدأ التأنيب ياكل بيه .... هاي عمة جواهر الي دوم امشي وراها  واتبع خطاها ...اشلون انطاني كلبي ازعلها ....
رحت دورت عليها ماهي بغرفتها فارغة ... نزلت ... لجوة ...اريد ادخل للمطبخ واسمع صوت عمتي ام حسن العالي
يعني باجر هم طالعه

اي عمة غير اجهز وية رباب البيت .مابيه اثاث ..

ما عدها خوات

عدها ...بس هي ما عافتني من جهزت ..
دخلت
اها

***
ليان

كاعدين بالمطبخ نحشي كبة برغل لباجر وحسين كاعد ياكل حشو منتظر اتصال حتى يطلع .. وامي بس كاعده يمنا من خابرت رباب جواهر ...جواهر كالت لحسين باجر الصبح اروح وية رباب نشتري بعض الاغراض ونحجز همين
وامي ادخلت
دخلت علينا يقين وجانت معصبة حيل واعيونها على عمتها يترسها التانيب والملامة

اهاااا راح اجهزين بيت بابا على ايدج ..!!

هيج يعني صارت الله يشربج من نفس الكاس انشالله
دعت بصياح على عمتها كدامنا
وطلعت ثايرة .... جواهر عافت اللف وغسلت اديها وصعدت ..

امي كالت
هههههه حقها والله جا ازوج ابوها وتسكت

حسين
و جواهر شعليها

هي مرتك كل البلى بيها

***
حسين

شفت جواهر صفوا بالها متعكر ضجت عليها ...

طلعت وبنص الليل الا رجعت تعبان ..
واليوم جواهر ما منتظرتني نايمة ومطيه الي ضهرها ....

بس اخذتها لحضني ...

الصبح هم شفتها تعبانه وكالت راسي يوجعني ... اجتي سيارة بيها سواق ورباب دكوا عليها وطلعت ....
بالليل الا التقينا

جوجو  باجر نطلع نغير جوو

من غير اهتمام
اي
نمت يمها
اي ليش اليوم هيج كله ضايجة ...الصبح وكولتي راسج يوجعج هسه اشبيج ...

حطت راسها على صدري ...
خاطري مكسور يا حسين

سلامته لخاطرج ما سلم  اللي يكسرة

بس لا من يقين صرخت بوجهج انت لهسة ضايجه ؟؟

محملتني ذنب امها ... ماتدري اللي سويته لخاطرها هي وخواتها

الي صار مو قليل هي عرفت بسعيج بزواج ابوها على امها ...

ااه حسين حتى انت ... ما اكدر اظل بارزة كدامك بلا مشاعر جاحدة وراح اكول الك سبب تصرفاتي

اني من جان عمري ١٧ سنة رغم صغر سني لكن من اخوي قرر يزوج على مرته اتوسلت لأبوي ما يكسر  برباب وتنزل على ضرة ولا انطيت بأم قيس لكن هسة اني سعيت

لأن اخوج ما اتراهم وياها ...كنت افضل اتبعدين نفسج عن هاي الامور ...شفتي خسرتي ثقة  يقين بيج

حسين ..... انت روحي مراح اضم عليك ... اني جنت راكنه نفسي على جنب وما ناوية ادخل .. بس  عزيز هاجر مرته و كلش نفسه مو بيها لان تزوجها جبرا وهي اكبر منه ب٦ سنوات ... ظلت نفسه ما متقبلتها وبين فترة وثانية يهجر  ويرجع بسبب ضغوط الاهل عليه وهو يحب والدي ما يحب يكسر اله كلمة ..  لكن بهاي السنوات حتى ابوية ما كدر عليه ... انفجر وتركها ...وراح ازوج بالخفا بالمتعة .. و الاعظم من هذا ابنه قيس اتوسل الي احاول ويه رباب تقبل حتى يحفظ سمعتهم اذا طش الخبر يريد ابو يستقر ويه الرادها لا الامر يكبر من عن هذا الحد ...

شنو هاي لهلدرجة واصلة علاقتهم  وقيس عارف

اي لهدرجه ولو ما عادتنا جان طلكها من زمان دوم اتحسسه بالنقص و هي افهم منه ماكو تواف ..........اني غض النظر عن مشاكلهم ...........سعيت حتى يطلك ذيج بت الشوارع ام المتعة لان بدت تفرض سيطرتها وكايل لأبنه اريد ازوجها كدام الناس واعلن ..

هاي شنو

اي  من وافقت رباب تركها  اني كولت بمكان ما يجيب ضرة لمرته ام متعة . ياخذ اللي رادها و اللي هم ضايعه وتنذل اذا قبلت بكريم ما يريدها ولا نفسه تتقبل ياخذ مرت اخوه ... يعني اهناك بس تخدم اظل هم ماعدها سند .......اووف رغم هذا من ترك ام المتعة ظلت اتهدد بيه تفضحه كدام الاهل ... ودفع الها مبلغ

شورط نفسه عزيز

اي ورط نفسه ويه هاي نغم لحد هسة خايفه لا هم تضهر النا مرة ثانية

انصدمت من ذكرت اسمها نغم وتزوج بالسر !!!!!! نغم   وزواج متعة !!!!!
نغم وعزيز  !!!!!!!!
رجعت لشغلتها على رغم مساعدتي الها  ورجعت تصطاد زلم زنكيلة  و تسحب منهم !!!

حسين حسووون اشبيك صفنت لا يكون انت هم مزوج عليه متعة ...

وخرت راسها عن صدري واني عفت السكف الصافن عليه وصفنت عليها من ضربتني بخفه على متني ..

لا هيج اريد انام تعبان
درت راسي وحطيت المخده عليه

تعبان لو ضجت من عرفت بست نغم مزوجة اخوية ....لا يكون تحن الها

وخرت المخده من فوك راسي
وصفنت عليها ...

شنو ؟؟؟؟

هزت بحواجبها

اي ياباش مهندس لا عبالك نايمة على اذني ......

جواهر انت اتعرفين نغم

لا حشى قدري اتعرف على هيج ناس قذرة

شكرا الج يعني اني قدري قذر واتعرف عليها شكرا

حشى اني ما ازوج  الا الشريف

اشلون عرفتيها

اني من كال الي قيس وذكر اسمها عرفتها نفسها

واشلون عرفتي اسمها

هاا هههههه تذكر المهلة اللي شرطتها عليك قبل الزواج

حطيت ايدي على خدي منتظر المهرة الداهية تعترف

حجت بفهاوة و تمثل الرقة

ايي اني حصرتي يعني خليت احد يراقب شقة الؤنس مالتك ..

اهاااا

غمزت
اييي سايقي اله هجمت عليه بسلاحك

اشوية واهجم عليج  بسلاحي ترة صبري نفذ  شنو هاي خططج ؟

مو خطط تدابير اشلون  امن بيك لعد المهم
شافها هي تجيك للشقة بس محد فتح الها ...شكره وشعرها كصير راقبها من راحت لبيتها و سأل عنها وعن اسمها وجابلي عنها كلشي ......

اي

اي وظليت مراقبتك ابد ما رحت للشقة ولا التقيت بيها اطمن الك وهاي هي

حجتها ببساطة و واخذت شفتي ببوسة طويلة  .. وخرتها من فوكي وصرت اني فوك وهي تحت

هيج ام التدابير  .... اوراقي مكشوفة يمج

هزت راسها وهي مغمضة تعالي لعد انشوف اوراقج ...

***
ليان

تم زواج عزيز من رباب بيوم العقد راحت جواهر ويقين راحت اتواسي امها ...

رجعت جواهر وكالت اخذها لبيته هي وأطفالها ورجعت رباب ولدها الي كل واحد منهم ببيت من ابيوت عمامه ....

احس بنار بيه تدبي اشلون هيج ورطت نفسي بقرب عزيز واني متعلقة بيه بفكاري ....

***

حسين

جواهر كافي بس تتصلين

اوكف خل اترد.

هااا رباب بشري ....شنو صار

شنو يااا خرب ههههههههه يلا يستاهل خل يصبر
هههههههههههههه

لبوتي تضحك من كل گلبها .

كاعد على المراية احسب بفلوسي وبالي صار يمها ...من نهت المكالمة

هههههه حسين رباب طارده الرجال ههههه واليوم مصرة ماخذة  اولادها وياها هههههههه

والله خطية احنه اتلعبون علينا

هههه حيل يستاهل قاهرني منو كاله يزوج نغومه والله رباب كون ماتقصر وياااه واطلع حيف هالمسكينة ام قيس

انتي شنو من تركيبة هاا

هههههههه انتم مستفزين يا حسين

استغفر الله هي ازوجه بيدها وتكلب عليه فد عقول عدجن

اشبيهن اعقولنا !؟؟ احسب افلوسك احسب لا اكلب عليك

***
يقين
امي منهارة وانكسرت .... الصبح .. شو راحت للغرفة مال بابا .. طنكرت طلعت كل ملابسة ونزلت وحطتهن بغرفتها وكسرت الاخشاب .... قيس وخرها طلعها

يمة الله يخليج ...لا اسوين بنفسج هيج
ضربت قيس راشدي
ولي عني مو انت الي اشجعه وليي
دفعته

اييي
ولي ولك ولي
راح وهو لازم خده مصدوم

اني ومرام اخذنها

تبجي و تعبانه لغرفتها  ... 

مرام عدلي ملابس ابوج بكنتوري ..

كمت ابجي وياها بوست اديها

شفتي عمتج شنو سوت ...

اي يوم شفت والله لساني ما خاطب لسانها يوم اني ما ارضى عليج ..
حضنتها ....

سمعنا صوت هورن .. عرفنا مال بابا يريد واحد يفتح اله الباب

همست
هذا بابا رجع ما توقعت يجي اليوم

امي وخرت عني
اني داخله للحمام مرام جيبي وراية ملابس
شو اخذت علبة مكياج ورادت تطلع
كالت
ثوب لونه زاهي مرام

طلعت للحمام .. 
اني ومرام وحده اتباوع للثانية
كعد ابوية بالهول واجته اختي الصغيره اتلكته واخوي هم الصغير حطه بحضنه بوسة ....

سالت بابا متريك ما رد

طلعت امي لابسة  فستان ازرق كصير اشوية و مشطه شعرها الرطب وحاطه مكياج ناعم

ها صباح الخير يا عريس عساك ارتاحيت هسة ؟؟

نزل اخوية من حضنه ..

باوع الها بوجه تعبان

جوعان ام قيس ...

مطت حلكها وكالت اها كومي سوي اله ريوك مرام  ..
اي يوم حاضر

اريدة من ايدج  .  

هزت ايدها وكالت ...  ايدي تعبانه .. وراحت لغرفتها ...ابوية صعد لغرفته واحنه وحده صافنه ع الخ ..نزل اضاهر شاف الدمار اللي بيها ..

مرام يقين
هاي اشصاير فوك

مرام
بابا زلزال

امجن مووو

اي بابا

لعد ملابسي وين شنو حركتهن

مرام
لا بغرفتكم ...اقصد غرفتها

هااا
حك شاربه وصفن اشوية ....
ودخل عليها ...  اني ومرام انحوس بالممر     

سمعنا صوت امي
روح الهااا رووح اشعندك جاي
ما نسمع جوابه

مرام
راح تعلك والله

اشعنده اجه

اني ادري

شو اشوية وسكتت امي  .....

***
ليان
جنت اشتغل ... واندكت الباب ...راحت امي تفتحها لان جواهر ما تفتح بيبيان ابد

وختام ويقين بالدوام ..

واني انظف زوري سمك صغير بالمطبخ ..

جواهر بغرفتها ...

اني كاعده بباب المطبخ الي اطل على الممر الخارجي وشفت مرت عمي ابو ناصر و  بتها ..اتباوسن ويه امي ودخلن

غسلت ادية ورحت طلعت الهن بالهول كعدن سلمت

مرت عمي
هااا ليان على الخير سمعنا راح اتناسبون ابن الشيخ مرة لخ ..

امي بفخر
اي مرتين خطبها ورفضنا ..ورجعوا النا وكلنا عيب منهم

اهااا بالعافيه عليكم النسب قابل ما نفرح الكم نبقى اهل ...

اشكرج عيني
اكلج ام حسن ترة ابو ناصر وابو حسام وابو عبدالله  (عمامي )
ماخذين بخاطرهم منكم

ها خير بعد هالكطع شنو جد

الكطع انتم بديتوا بيه و راد ابو ناصر الوصل وابنج جافي

الوصل بعد ما اتخليتوا عنا ومن صرنا بخير الا ذكرتوا الوصل

يا عيني لا اصيرين شيالة  احنه الماضي ركنا على الصفحة ... وعمام اولادج ما يردون هاي الكطيعه سو الهم خاطر وخل يحضرون مشية ليان

هااا انتم من وين دريتوا

جنج ما تردينا ندرة

طبعا عرفنا دارين من رغده موصلةخبر الهم لانها على اتصال ببنت عمي ابو عبدلله ...
يردون يحضرون الكعده مالتي اني ما عندي اي اعتراض بس كون  حسين يرضى ...
وية ما ذكرت اسمه .. سمعت صوت سيارته

كومي ليان اخوج اجه من برة

كمت فتحت الباب دخل ..

دخل انصدم بيهن ...

احلام ظلت صافنه عليه .. خطيبة الطفولة  من جنا زغار ابوي يكوله احلام الك ...هسة احلام تزوجت وعدها اولاد  ...

كانها استحت ...مدري من السنين والسمنة الي غيرت من شكلها  لو لان صارلها اهواي ما شايفته سلم عليهم بثكل ........

اكعد عمة وين رايح

ها ام ناصر اشوية عندي مشاغل ...اخذو راحتكم انتم

لا عمة انتظر ..

كعد ولبى طلبها ومبين على اعصابة كاعد ..

دتسولف وياه واتعاتبة مرت عمي ...دخلت جواهر ... كالعاده تلبس ثوب حيل ضيك يبرز خصرها النحيف من محسن طالع . و ربع ردن ابيض وبيه ازهار وردية كبار .. والذهب ماخذ مكانه بجسدها .. وشعرها ضفيره متينة ازين ضهرها .. و تلبس شحاطه كعبها خشب داخل البيت حتى على الفراش مخصصتها اتخاف على بشرة قدمها

من دخلت ما عبالها تلكه ناس ما تعرفهم لهذا جانت حيل مصدومه مثل الي حرنت لا تكدر تكمل ولا تكدر ترجع جانت متردده

واعيونها على احلام

يتبع

البارت اقصر لأن صار يومي ومتعب لاناملي الفتانة😁 لا عدا الشقة الكتابة مضرة على العين واليد بس شسوي القلب وما يهوى احب القصص