رواية ماء مغلي الفصل الأول 1 - بقلم Zoka 🌷

..♣️🩸 ماء مغلي 🩸♣️..
٢٠١٥ / تموز

ساعه ١١ الظهر بنص الازدحام والسياره تجوي وبوخه .. تبريد عاطل والعرك ينزل من شعري لركبتي و وره اذاني
عيوني جمرت من حراره السياره
اطلع راسي من الجامه بس بوخه ولهيب
هوا شرجي حار يلهب بالوجه
صوت الهورنات سطر راسي ورجلي راحت من تحويله البانزين والبريك وبالكوه يمشي السير ..

امسح وجهي بالكلينس واهفي بي وعيني على التقاطع شوكت ينفتح ويفضنه ..

عمرها بغداد ماتهدأ وتصفى ..
اذا كل هذوله بشر هنا چا هالنجف الماليتهه الكبور ياهوالنايم بيهه !!!

ازدحام دومهه ازدحام ..
هسه اني ماعرفت اشتغل الا هنا !!

سمعت صوت تلفون اخذته وجاوبت ...
- هااا سيد شلونك
- هله هله بالعضيد وينك اليوم ما مريت
- طالع اسلم شغل لواحد بغداد
- هاا وين بغداد
- بغداد جديده
- هاا زين ،، ماحجيتلي شصار على سالفتنه شو لاحس ولا نفس نسيتنا شني!
- لااا بويه ماناسي وعلي بس مالكيتهه شسوي فريت عكه ومكه وماجاي الكاهه متكلي شسوي
- شدعواك عصبي اليوم
- من هالازدحام خرب بيومهم شوارعهم دود يروش بيهه
- هههههه ولك حيدر استعجل اذا مادبرهه خليني ارجع للرجال ويشتغلهه من يمه صار شجم سنه انتظر بيك متكلي شوكت تفضهه
- سيد شبيك يعني شجم مره كال الرجال ماترهم سالفتهه مو يمي لزكتله انته شبيك عوفه لخاطر الله اني من يمي بزعت
- شسوي يلا عندك غير حل ! اضل صافن وحاط ايدي على خدي ! شسوي فهمني
- كلتلك هي ماكو غير هاي الي بالي بس هي تكدر وعوفني ادبرهه ان شاء الله اصبرلي هالشهرين وبلكت احصلهه
- هاي اخر مهله تره
- رحمه لجدك يعني لو خلصت شسوي تبطل !!
- شبطل ولك جان بطلت من زمان بس غير مغلوب على امري من الله لايوفقهن
- ههههه اصبر اصبر ماضل الا القليل اصبر بحيل الله تدبر
- الله كريم يلا انتبه على دربك مع السلامه
-الله وياك

سديته وشمرت تلفون على الكشن هو بليه شي انه كاره روحي والنوب يجيبلي طاري هالسالفه .. شاغت روحي

كضيتهه ادك هورن لحد ماعبرت التقاطع
اريد بس اوصل وانزل من هالسياره حركتني حرك .. اريد اغسل بوخت ودبكت من العرك

طبيت بغداد جديده وخابرت ابو البيت
يدك يدك وميجاوب
رجعت خابرت ويرفضني ردت اكسر التلفون
متعني من الصبح لحضرته ومسموط بالحر وهو ميكلف نفسه يخابر !!!

وصلت منطقتهم وخابرته جاوبني ..
- خويه ماتكلي وينك رحمه لاهلك
- يابه طالع اني طالع اعذرني ماجاوبتك ردت اخابرك هسه
- خويه البيت وين دليني انه طبيت منطقتكم وين اروح هسه تطلعلي توصفلي فهمني
- لاا لاا مو اني طالع كلتلك
-ايييي نسيت وشلون بشغلنه ؟
- راح اوصفلك البيت وروح انته بس ارفع السركي مال باب من جوه وفوت وباب المطبخ تلكى مفتاحهه فوك الميزانيه افتحه وفوت كمل شغلك واني ماتاخر شغله ساعه واصير يمك
- خويه شلون حجي هاذ يعني شلون اطب البيت ومابي احد
-عادي عادي ماعدنا شي اخذ راحتك والاهل طالعين البيت فارغ و كمل شغلك براحتك
- اضل انتظرك لحد ماتوصل ماعندي مشكله تره حتى ادليني تفهمني شلون اشتغل على عمى عيني
- يااابه مو كلتلك فوت شتسوي سوي اني مفهمك على كل شي المهم اريد اشوف وين تحطهن حطهن بكيفك
- يلااا ماشي ماشي

اخذت وصف البيت وسديته  وضليت استغفر ربي شجابني لهالشغله التعبانه !!!

وصلت واني وياه على الخط وطبكت سيارتي ونزلت فتحت الباب من جوه وطبيت كبل للمغسله حطيت راسي جوه المي وغسلت نكعت تشيرت وايدي ورجلي سبحت سبح
بالمي وتالي يلا اخذت مفتاح باب المطبخ
وطبيت اخذتلي فره بالبيت وشغلت المبرده وضليت كاعد كدامهه اتبرد
بعدين تمددت ريحت راسي شويه واخذتلي فوك النص ساعه اتبرد بعدين كمت شربت مي ثلج وخليت البطل بايدي وافتر بالبيت
اباوع لكل زاويه وافحص قواعد الكلوبات
اريد اضبط الاماكن الي اشد بيهه الكاميرات
لجناب الدكتور ...

رجعت لسيارتي نزلت الغراض المشتريهن
وحطيتهن يم الدرج وبديت اشتغل
كملت دواخل البيت وصعدت للسطح ربطت الخارجيات على الستاره ونزلت هم غسلت
انسمطت بالشمس هالظهريه انشويت شوي
كعدت ارتاحيت وجعت كلش باوعت ساعه اربعه الا ربع وهاذ لهسه مارجع !!

خابرته ميجاوب .. ضليت متمدد على البروده واكول اكوم اكلي شغله لو ميصير عيب ؟
جوعااان فد مره صار العصر و اني على الريوك من ساعه سته ونص صبح

اطلع شلون اعوف البيت مفتح واذا هو رجع شلون ؟ اكوم اكل عيب شلون اخذ بدون علمهم ؟

ضليت للاربعه ونص  اتكلب تالي رجعت خابرته جاوبني وصوت هوسه يمه كلتله ..
-خويه صار العصر اريد امشي لاهلي شلون ابات هنا انتظر بيك
- حيدر ماكدر ارجع عندي مشكله والله ومتورط ورطه بس الله يعلم بيهه
-خير خويه تريدلك فزعه كول هسه اجيك
- لاا مو مال فزعه رادلهه عقل
- هسه شلون
- انته كملت كلشي
-اي خلصتهن بقى بس تجي حتى اربطهن لحاسبتك وشوف اذا تريد تضيف غير مكان
- اني واثق بيك مادقق بعد وراك شسويت انته هاهيه كافي
- ان شاء الله يفيدنك
- اي اي ان شاء الله هسه اني اطول تريد ترجع انته ؟
- اي والله يادوب الحك اوصل كبل ماتظلم تعرف طريقي بعيد
- وعفتك بدون غدا والله ياخويه حقك عليه
بهذلتك وياي وماقمت بواجبك اعذرني
-معذور خويه معذور هسه بس فهمني شلون اعوفهه غير يوم نكمل لو شلون
-لااا يابه دفضهه اليوم روح اخذ حاسبتي واشتغل
- ههههه خويه هيج مأمن بيه
- والله من لا جاره هههههه شسوي مضطر
-هههه لاا لاا سدك امين اطمن انه مو خوان
- لاا والنعم منك كد الثقه ان شاء الله
روح اخذهه من غرفتي بجنطتهه تلكاهه
وهسه ادزلك باسوورد برساله
و كملهه فدوه  لعينك خلي بالي يرتاح
- يلا ماطول شغله نص ساعه بالزايد
- انتظر اتصالك

سديته ورحت اخذت الحاسبه وكعدت اربط
و اروح واجي اضبط الصوره لحد ما كملتهن
خابرته ..
- هااا خويه كملن وكلشششي ضبطته
-عاشت ايدك مشكور تعبتك وياي
- ادلل خويه هسه ماترجع تشوفهن
- يمعود شيرجعني اني انحصرت حصره
من هاي الزينه
- وين انته شصاير وياك
- متعارك ويه وحده وهسه طلعلي فيلق وراهه وتعال شوف حالي راح اروح بالرجلين
- خويه اجيك بس دليني وينك
- تعال اي بربك تعال اقلها واحد وياي كلشي يصير  وهم انطيك فلوسك
- عوف الفلوس هسه كلي وينك
- من توصل شارع ابو نؤاس ادليك وين بالضبط
-ماشي يلا اقفل البيت واجيك

سديته ولميت الغراض ورجعت كلشي لمكانه
وقفلت وطلعتله .. كلت هذا امني على بيته ووثق بيه وهو بضيق لازم اوكفله ..
طلعت بسرعه امشي لحد ما وصلت شارع ابو نؤاس خابرته ودلاني مكانه ..

طبكت ونزلتله جان واكف يم سيارته
سلمت عليه وكعدنا بسيارته كلتله ..
- شو هنا چا وين اهل العركه
- اصبر اصبر جايين
- هي شنو سالفه فهمني
- يابه احجيها الك من الاخير
اني اجيتلي هنا بهالنادي كم سهره ويه جماعتي ومره من هالمرات رافقتلي وحده منهن تعرف بعد ميز وسهره وجو يعني واحد يتسرسح بكيفه واخذت راحتي وياهه
ليش ما تطلع صاحبتهه مصورتنه
ويعرفن بيه دكتور و كل يوميه جايتني من صفحه تجيب هالكد لو انشر
تدفع لو ادزهه لمرتك واهلها
تجيبلي هالشي لو اشاركه بفيس مرتك واشهرك بينهم ، خبلني وسحبن فلوس وارصده وتالي طكت روحي اجيت عليهه هنا اريد اخصمهه صارلهه خمس شهور جيب ماجيب مابقت عليه فلس
- ايي و شفتهه تفاوضت وياهه ؟
- هي هنا المصيبه اجيت اريد افوت مايخلوني فهمتهم السالفه يمعودين بس هالبنيه اريدهه يكولون ماكو مو هنا
تالي لتلاثه اجني كلهن بسياره ونزلت هي وياهن رحت جريتهه وكلتلهه بيعي الي هسه ونخصم السالفه ماترضى كلمه منا ومنا تعاركنا وهي ضلت تلعلع لمت الحرس
عاد كلتلهم اريد جبيرتهن ولحيت عليهم هاي من سديته منك بالاربعه لحد قبل شويه اني اتعارك وياهم وانتظر بيهه تجي
- هاي راح تفيدك يعني لو خاف تطلع انكس منهن
- تفيد ماتفيد هاي بعد اريدهه منهه
- تعرفهه انته شايفهه ؟
-شايفهه شلون لعد هاي بلوه مو مره تكتل
-هههه يمعود جوز عاد ماشفت تاليها شلون
- لك هاي شايفهه شنووو من جسم شنو من شخصيه هاي معروفه هنا باسم ريري
منهم يسموهه داده ريري لان مسؤوله على البنات ومنهم يصيحولهه الست ريري
- هالله هالله شدعوا بويه كلهه خلك .. استغفر الله
- لك هاي صح وحده كاوليه وام دعاره
بس موكفتهم على تك رجل
شايف هذني البنات الي يلعلعن بالشارع ومايهابن شي بس خلي تصيح على وحده بيهن يروحلها ركض ويخنسن
عدها بيت وسياره ومالكه هذا النادي وعدها بيت ثاني مكعده بي البنات وعايشه وحدها
و نص هالولد مثل الخدم جوه ايدهه مشيتهم
فد وحده شخصيه ولسان ماكو مثلهه والله شكد شايف نسوان بس مثل هاي ماشفت

- وحده كبحيه غير ولسان مترين والناس تتجفى شرهه
- هي مال كبحيه اي كبحيه بس هسه توصل وشوفهه بعينك شلون يركضون ركض كدامهه
- زين يصير بين ماتوصل نروح ناكل شي
تره بطني حتتكطع من الجوع ضال على الريوك من السته
- هههه والله يابه حقك حتى اني جوعان
امشي ناكل ونرجعلهه
-اييي رحمه لاهلك

شغل سيارته وطلعنه .. مانزلنه بمطعم اخذنه سفري وضلينه ناكل بالسياره ورجعنه لنفس المكان ..

وره ماوصلنه بعشر دقايق هي وصلت
طبكت سيارتهه سوناتا نيلي تلمع لمع
و ركض واحد من الولد راح فتحلهه الباب
وهي تأشرله ينزل غراض ..

نزلنه احنه ورحنه عليهه .. اباوعلهه
طويله جسمهه مربرب .. كتوف عريضه وصدر وارداف مشدوده و بارزه.. لابسه بنطرون اسود وقميص وردي فسفوري مخليه نص منه بالبنطرون ونص عايفته .. شعرهه
شادته صفح ومنزلته على كتوفهه مبين مصبوغ جوزي .. والوجه يلمع اكثر من السياره .. حاجب مرفوع وعيون بس رموش
بارزه وحلك منفوخ وردي يلمع والركبه بيضه تلمع.. 

جنت اباوع لكل شبر بيهه وناسي هالولد شيحجي وياهه مانتبهتله ..
بس صارت عينهه بعيني وخزرتني وكبل نترت وكالت ..
- خييير شبيك ماشبعت تبصبص

فكيت عيني وابتسمت كلتلهه ..
- لا كافي
- ديلا امشو
- وين ؟

هي هزت ايدهه ومشت كدامنه والولد كالي..
-شبييك انته انثولت مو صار ساعه نحجي
وكالت نفوت جوه نتفاهم
-هااا اي مانتبهت
- مو كلتلك حلووووه تكتل
- هاي شدعوا هيج كلشي بيهه مصبوب صب
- شدراني دمشي امشي

مشيت وياه وجانت اول مره اطب هيج مكان
اباوع ظلمه بس ضوايات صفر مشتغله بكم مكان .. حتى من كد ماظلمه كلشي مشفت بس الطريق الكدامي امشي وياهم ..

طبينا بغرفه جبيره وبيهه بس قنفات ومرايه
جبيره وبيهه اضويه .. ضلينه واكفين وهي تخابر وتعدل بشعرها ..

سدته وراحت كعدت واحنه هم كعدنا وره شويه طبو البنات خمسه كلهن لابسات برمودات وبديات ربع ردان وشعرهن مهوس وبس يتمعلجن ..

وكفن وحده بصف اللخ وساكتات هي كبل صاحت بيهن ...
- ذبببببي العلج

كلهن راحن لسله الزبل ذبن علوجتهن ورجعن لنفس وكفتهن ..
كالت  ..
-  ياهيه منهن الكعدت وياك

الولد اشرلهه عليهه وكاللهه ..
- هاي كعدت وطلعنه بس الصورت ماعرفها
وهي تكول مو عندي عند البنيه الثانيه

باوعت لوجوهن وكالت ..
- ولجن ياهيه الصورت اني مو كايله تلفون مينفتح هنااا
عينك عيننننك تصورن وتجيبلي بلاوووي
ياهيه الصورت تحجي يلااا

ضلن ساكتات وهي وكفت يمهن كرصت زند هاي الطلعت ويه الولد وهي كبل كلتلهه على البنيه .. جرت تلفوناتهن كلهن وخابرت واحد وصته يجر تلفون وحده من البنات من ايدهه ويجيبه الهه هسه ..

كلبت بتلفوناتهن بدون ماتطلب منهن رمز هي تفتحهن واحد واحد .. تكلب وتشمر بالكاع
الي تفصخ والي تفطرت شاشته والي راح جوه القنفه وهنه ساكتات مانطقن بحرف
وبعدين الولد جاب التلفون الوصته عليه
واخذته كلبت بي وطلعت الفيديو كلتله

-هذا مو ؟
- اي هو

لزمت التلفون من النص وكسرته وشمرته بالكاع كالتله ...
-يلا خلصت سالفتك توكل
- شيضمنلي بعد ماكو
- هاي مو شفت كلهن تكسرن بعد شتريد
- خاف هم تطلع بعد وحده مصوره
- عيني اني اعرف اوادمي ومن اكولك خلص يعني خلص
يلا عندي شغل راح اطلع ماضل مكابلتك
وانته هالمكان بعد لاتعتبه اذا تريد تستر على روحك  زين .

اخذت جنطتهه و مشت  شويه وكالت  للبنات ..
- لليل حسابجن امشن نظفن يلاااا

دفعتهن وطلعن بره واحنه هم طلعنه وهي قفلت الغرفه ومشت كدامنه .. صعدنا بسياره وهي لبست نظارتهه وحركت سيارتهه وطلعت ..

الولد كال..
- همزززززين خلصت يا يابه التوبه بعد
اتورطلي ويه وحده
- ايي ديربالك بعد
- شفتهه شلونهه هاي هسه زين هاديه وحبابه
لو تشوفهه بالليل فد شخصيه مسيطررره
باشاره اصبعهه تمشي السهره والناس
- اكلك هي شلون عرفت اكو غير تلفون بي البلاوي ؟
- تعرف هاي مفلستهن تفلس وماسمعتهه كالت اعرف اوادمي يعني تعرف منو الي تسوي هالدكايك
- هااا زين هاي بشكد تطلع ؟
- هاي متطلع
-شعجب
- بس للروس الكبار على الطلب يلا يعني مال واحد يكعد وياشر يريدهه تحط رجلهه بحلكه وتفركه فرك واطلعه دفرات
- روووح عمممي مسترجله هاي
- حييل
- زين هالروس شلون يطلبوهه
- مبين عاجبتك وادورهه
-ههههه لاا بس هيج سؤال
- هاي عدهه واحد هو رقمه لهالسوالف
من خلاله يوصلولهه

صفنت شويه  وهو كال ..
- شكد انطيك اتعابك
-مادري كيفك
-شبيك حيدر شكد تريد فهمني شكد صار سعرهن شكد شغل ايدك
- اكلك وين بيتهه ؟
-هههه صدك تحجي انته !!!
- والله عن الشقه وين بيتهه اريد احاجيهه بسالفه
- لك ياسالفه كلتلك متطلع هااي متطلع
- ماريدهه تطلع اريدهه بسالفه بس حجي يعني
- بيتهه بالبتاويين بس ماندله بالضبط سامع هناك بيتهه بس هيج
- يعني اذا اسال اندل
- يجوز ! هي طاشه وين متصيح ريري يدلوك
- زين خلي الحكلهه
- وييين يمعود يجوز مو هناك
ماسمعتهه عدهه شغل
- اجودر بابهه اليوم لو للفجر

نزلت ورحت لسيارتي وهو ورايه يصيح ..
-الفلوس ولك

صحتله ..
- حولهن حوولهن

كبل شغلت سياره وطلعت للبتاويين ..
بالي تتردد صورتهه وصوتهه .. هاي النباهه
واحساس يكلي .. هاي الي اريدهه ...

طبيت البتاويين واسال كل شويه واحد وطلعت ماشاء الله مثل شاره على علم
كلهه تندل بيتهه .. ووصلوني لباااب البيت
ومن زين حظي جانت هي هناااا ...

طابكه سيارتهه بالباب ..
اخذت نفس وقريت ايه الكرسي لتسهيل امر
ونزلت اعدل بشعري ودكيت الباب ..

بعدني ادك الباب ودك تلفوني .. جاوبت بسرعه...

- حيدر وينك غربت الدنيا ماترجع !
- سيد لكيتهه
- شلكيت ولك !؟
- ريري
- شني ! شني هاي
- البنيه لكيتهه يلا بعدين بعدين نحجي
- ولك انته وييين احجي
- هههخخ انه بالبتاوين
- حييددرررر شصخم وجهك وداك هناك
- رحت اجيبهه
- شتجيب ولك شعرفك بيهه حيدر شعرفك بمصخمات هالمنطقه
- عرفتهه صدفه وحك علي هسه اصبر خلي احاجيهه  راح اطب لبيتهه بعدين نحجي
- لك شلوووون اطب لبيتهه لك هاي منووو فهمننننني
- كالولي هاي الراس الجبير بينهن هذني بنات الكحاب الي هنا يسموهه داده مدري شنو
- لك من شوكت انته تعرف هالسوالف شوداك على هالكحاااااب حيددددر ارجع اررررجع لاااتسوددددنننني ارجع اكلك
اررجع
- والله ماارجع بلياهه هاي حصلتهه بعد مااهدهه لو مو انته تكول
- لك اتريد تفضحنه انته ! تريد تصخم وجوهنه جايب  ام الكحاب على بيت ساده !!!
- مالكه احسن منهه سيد وماعدنه بعد وكت
- عوووفهه خلي ايطبهه مرض لبنتي خليهه تموت موووت الكرفهه وكرفك وياهه ولا تجيبلنه هيج بلوه وتصخم وجوهنه حيدر وحك علي مااخليك تعتب الباب لو جبتهه
- اذا انته متريد بنتك اني اريدهه ووصيه اختي حالف يمين لو على كص لوزه هم احققهه واجيبهه لريري اجيبهه تريد تزعل ازعل جيب البنيه يمي وروح مالك شغل بعد اطلع انته من السالفه وعوفهه بركبتي

سديت الخط بوجهه وقفلت تلفوني وضليت ادك بالباب .. ماسمع بس صوت الجلب ينبح
شويه وانفتحت الباب ..

ضلت رافعه حاجبهه ومتخوصره وتباوعلي كلتلهه ..
- السلام عليكم
- هلا
شرايد ؟
- اريد احجي وياج بفد موضوع عندج مجال
- شنو احجي شتريد
- مو مال هيج وكفه
- اكولك لا تضل تماطل كول شتريد
داتعشى وانته مكومني من اكلي على شنو شعندك ؟؟؟
- اا هوو الصراحه سالفه طويله ماعرف منين ابديهه
- تريد بنات تعالي باليل هناك
-لاا ماريد
- ماشتغل لدرب الولادي تره
- بووويه شسالفتج ياولادي
-لعد جاي على صخام وجهي !!
شتريد ابيعلك خضره !!!
احجي فضني شكو شتريد

ضليت افرك بكصتي وبعدين كلتلهه ...
- تعشي انتي براحتج وانتظرج هنا شوكت متكملين كليلي ونحجي

تاففت وطبكت الباب بوجهي ورجعت لسيارتي كعدت واحضر بالحجي اسولف ويه نفسي واكول هيج وابدا هيج وايدي شويه ترجف متوتر .. هالناس غريبين عليه واحسهه خطوه جبيره وخطره بس لازم تصير ماالكه احسن من هالفرصه بعد ...

حسبت ثلث ساعه ضبط يلا فتحت الباب وصاحتني ..

رحتلهه واول ماعتبت باب البيت الجلب اجاني .. جلب بوليسي اسود ولسانه بطوله
ويفتر يم رجلي واني ارجع لوره وهي جرته وراحت اخذته ربطت سلسلته واشرتلي اطب للبيت ...

طبيت البيت وجانت هيج غرفه مفتوحه على المطبخ بيهه قنفه وحده لون كريمي وطبله كزاز عريضه وكبالهه مرايه طويله معلكه بالحايط وتلفزيون يم الشباك ..

كعدت وهي هم كعدت حطت رجل على رجل
وجرت باكيت الجكاير وصارت ادخن واني اباوعلهه ومتردد احجي لو انسحب ؟؟؟

كالت ..
- لك والله دقيتني شتريد دحجيي  مو بطيته لكلبي
- ها اي هو يعني
اريدج تساعديني بشغله انسانيه
- اي شنو تريد فلوس ؟
- لاا مو فلوس بس مساعدتج انتي يعني
وجودج
- اكلك احجيلي طك بطك شتريد يلا ورايه طلعه ومالي خلك سوالف
- اي حقج اي
احمم
شوفي هو صحيح طلب غريب وراح تستغربينه بس صدكيني محتاجه وشغله حياه او موت يعني لا تستهزأين بسالفتي
- هي شنوووو غير افهم
- اريد تجين وياي لبيتنه تساعديني
-بشنو ؟
- احم ااا هو .. بيتنه بي سحر
- هههههههاااااايييييييي شنو شنووو
سحر ! شكلولك عليه اشمشم السحوره اني !!!
- لاا بس اسمعي مني جايتج السالفه
-كبل متكمل انته منين ؟
- من النجف
- شسمك
- حيدر
- اي كمل شبي بيتكم
- بيتنا بي كوارث الدنيا
مسكون ومسحور وراحلي من وره هالشي اربعه من الاهل وهسه ابويه وامي واكعين بنفس المرض ونفس الشي رجعلهم
ماريد اخسرهم بعد وحاير بزماني
يشهد الله عليه مامجذب بحرف ولا عندي فد مصلحه وياج ولا اعرفج كبل اليوم هاي اول مره شفتج بيهه العصر وبس
كلت هاي تكدر تساعدني عدهه جرأه متخاف ونبهه وتكدر تجي وياي للبيت متحرره يعني
صار كم سنه ادور وحده مثلج من لكيتج ماصدكت بس احجيلج واقنعج
- اي واني شعليه بكل هالخريط هذا
واذا بيتكم مسكون مسحور اني شكووووو
- ادري متهمج السالفه بس هي شغله انسانيه كتلج حياه او موت
- ما فيدك اني شغلي لفوك راسي مالي خلك هالسوالف ولا عندي وكت
- اترجاج ست فكري بس فكري بيهه شويه
شوفي شكد متاذي من هالشي وجاي اطلبه بهيج طريقه منج
- ولك بابه اني شعليه بيك هسه قابل بس انته متاذي من السحوره شو نص العراق مسحور هم اروح ادورلهم مدري شنو
وبعدين اني شمفهمني بهالسوالف اني شغليييي واضح ومفهوم ماعرف هالدروب
- ادري متعرفين ادري
وانه هم ماعرف صدكيني ماعرف شي عنهن يعني انه جربت ادور انتبه على كل واحد يطب لبيتنه حاولت بس ماعرف شادور وشاريد ماعرف والله لو شكد مااوصفلج حالنه قليل بس خلي يكون بعلمج اني خسرت اخويه الجبير ومرته واختي الجبيره ومرت اخويه الثاني وهسه الحبل بعده ع الجرار بسبب هالسحر والبلاوي الماعرف منين تجي
- عليهم الرحمه
بيعو بيتكم وفضوهه
- بعناه وكاعدين بيت جديد صار سنه ونص
ونفس الشي وكعو ابويه وامي وبنت اختي هم هسه هذوله حال الضيم حالهم ماكدر اضل اباوعلهم شلون يموتون واحد وره الثاني
- يعني هسه شسويلك اني فهمني شتريد بالضبط
- تجين وياي للبيت ونشتغل اني وياج لهالسالفه
- تاخذني  لبيتك شنو هيج اهلك كلجيه !
- لااااا شسالفه اجيبج هيج بصفتج زوجتي
-هههههههيييييييي الدور زوجتك !
- اي غير شي مضبط تره صار فتره انه افكر لهالشي ومحسبهه شبر شبر بس وافقي كلشي مخطط
- دروح بابه روووووح
زوجته وصخام وسحر ناقصني بلاوي اني بيه مكفيني
- ست ريري فكري اترجاج وشتريدين حاضر فلوس شكد متردين انطيج شتطلبين يصير والج الامان يشهد الله مااخلي يمسج شي بس عينيني بامري
- حيدر تره مافارغه اني للرايح والجاي
وانته بيك بخت جماعتي مايعرفوك جاي لبيتي جان نعلست بس اني اليوم مزاجي زين وفوتك لبيتي دافهم شعندك وجهك يتبجبج
- هسه فهمتي كليلي شنو ردج
- روح لاهلك وكابل الساده اني شعندي كشاف واشغله واطلع سحورتهم
والله بطران
- كتلج محسب لكلشي بس وافقي بعدين نتفاهم بالتفاصيل
- ماوافق روح يلا كافي لحيت تره
- انطيج الي تريدي والله مو رجال اذا اخلف بكلمتي
- شكد تنطيني يعني شكم مليون
- عشره
- ههههيييييييي عشررررره !! كلفت روحك
تريد هسه اطشهن عليك
دروح بابه روووح انته لا تفيدني ولا افيدك
- انطيج اكثر عشرين خمسين شكد ماتردين
والله لو ما ضايك المر فلا اكعد هالكعده واتوسل بيج انتي متعرفيني ولا تدرين بحياتي شلونهه بس افهمي جايج انه من بيت ساده علويين ومجازف هيج وراضي بكل مبلغ تطلبي حتى اخلص من ضيم الي جرى علينه
لا تستهزأين بيه لان ماضايكه هاللوعه
- اييييي شخبصتنا
لوعه وضيم عادي ياهو هسه ممتلوع وكاتله الضيم شنو الجديد يعني تحمل كلمن وقسمته
- استغفر الله ربي واتوب اليه
اعتبريها لوجه الله هالخدمه يابويه
- عيووونييييييي ماعندي سوالف مبجله انيييي لا وجه الله ولا اشراف النبي ذني طكطكهن يم العلويين   مو يمي
- استغفر الله
- باوع كل الاكدرله انطيك وحده شاطره اخذهه وروح شتسوي سوي حط فلوسك واخذهه ولاتشوفوني خلقتكم بعد
- بس انه اريدج انتي لو رايد وحده جان كلتلج دبريلي
- واني مااااورط نفسي علمودك
شدراني شكو من مصايب عدكم اجي احط خشمي بالنص وابتلي منو يفيديني بوكتها امك ابوك انته !!
ياروح مابعدج روووح
تريد ادبرلك وحده نتفق بالفلوس هسه ووكت اجيبهن انطيك البنيه اخذها وروح
متريد دير وجهك واطلع يلا دوختني هواي
- مااااريد بناااات رايدج انتي مثل مواصفات الي اريدهه انتي تكدرين وانتي اطلبي وحاضر
- اكولك شوف اني سالفتك كلهه على بعضهه ممقتنعه بيهه فلا تحاول وياي

وكفت وراحت اخذت من كارتونه كلاص مي
شربته وشمرتلي واحد وكالت ..
- يلا هاي ضيافتك  بعد شوفنا عرض جتافك
- اطلبي شتريدين انطيج
هم لابد واكعه بشده بيوم واحتاجيتي مساعده لخاطر الله فكري بيها واطلبي اي شيي يجرالج والفلوس ادبرهن شكد مايصيرن
بس خلصيني الله يخلصج من جبير همج

وكفت كدام المرايه ورفعت شعرها وبعدين كالتلي ..
- اذا كدرت تقنعني افكر وكتها بسالفتك واعدل عليها ماامشي بخططك اني امشي بالي يناسب مزاجي
- مااشي اقنعج اكدر سهله هاي
- اي تروح هسه وترجع بعد ٣ ايام الك بس ٣ ايام يوم الثالث اذا مااجيت بعد بس توصل هنا اخلي اهلك يدوروك بالمستشفيات ومايلكوك
لان صراحه انته تغث واني ماتحمل هالنماذج الغثيثه تضل تنك فوك راسي
ف لو تجي بيوم الثالث وتقنعني لو لتجي بعد
مفهوم. !

كالتهه وجانت واكفه يمي ورافعه حاجبهه
كلتلهه ..
- يوم الثالث من الصبح تلكيني بالباب
وراح اقنعج ونكعد نتفاهم والي تردي يصير

.
.

يتبع 💕

احزرو لو تقدرو تحزرو
شلون راح يقنعها ؟؟؟؟