رواية ماء مغلي الفصل الحادي عشر 11 - بقلم Zoka 🌷

..♣️🩸   ماء مغلي  🩸♣️..

*Adzzon*

دنكت يمهه وشغلت الفلاش وضليت اباوع
واشوف خمس عظمات ملفلفه بخيوط
ومتلزكه بشكل نجمه .. ملزوكات بنص الجربايه من جوه ..

كلتلهه..
- شلون لكيتيهن هذني مشايفهن من جنت ادور

- جان فوكاهه كارتونه طويله ملزوكه ومثبته ويه الحدايد هاي بحيث ممبينات بس اني جريت كلشي نفضته وجريت هاي هم وشفتهن بس مكلت لاحد انتظرتك تجي يلا
وشوف هنا فوك شكو بعد شوف الصخااام المصخمينه   لابوك

شالت الفرشه وفتحت سحاب الدوشك وضلت تسحب خيوط بيض طوال .. تسحبهن وبعد بيهن طول .. لحد ما كومتهن كدامي
وركضت قفلت الباب واجتي يمي ..

- شوف هاي مو فصخت الشلته مال دوشك
جان شفت سحاب الدوشك كلت خلي اشوف خاف مدحوس شي بي كلشي يصير
واجتي عدله كبل بس مديت ايدي لكيتهن
وهاا تره جانن ملفوفات على الاسفنج هذا
بس اني جريت نصهن بالبدايه  وبعدين من رجعتهن هيج تكومن جانن مضبوبات ضب على الدوشك

- ريري هذني شوصلهن لفراش ابويه !!!

- شوصلهن بعد اكو غير هالاثنين المصخمات منو يكدر غيرهن يوصل هنا

اخذت الخيوط اباوعلهن كلهن عكد والعكده
مشخطه بالاحمر ... قربت الخيط كلش يم عيني وكبل ذبيته  من ايدي .. كلتلهه..

- هذا بي دم

- ايي هم شكيت بي

- نكس هذا
استغفررر الله حسبي الله ونعم الوكيل

- هسه شنو ؟ شنسوي بيهن !

- خلي اصور العظام هسه حتى نشيلهن

- هم تحجيله لهذاك السحار

-اي اكيد غير افهم هاي مال شنو وشلون افكهه

انه الي متعلم افكهن مو هيج ابببد مووو هيج

- ديلا بسرعه خلي نطلع خاف هذني يشكن بينه عرفنا

دنكت جره الجربايه وصورتهن ورجعنه الفراش .. لميت الخيوط بعلاكه ودحستهن بالمجر .. وردت اطلع جان تكلي..

- اوكف ولك اسمع

-شكووو

- هسه مو نطلع عود ترومنس شويه

-اترومنس شنو؟

- ياحظي ولك يعني هيج شويه كدامهم نضيع سالفه
شويه اضحك وشاور احجيلك كلمتين حبجيه كدامهن شبيك اضل اعلم بيك

- اهووو ولج اااانه بيا حااال
مال رومانسيه هي !!

-دمششي ولك ااااني اترومنس بس امشي
خرررب بحظظظي لك همزين ممتزوجيني صدك جان شمرت روحي من السطح وخلصت منك

طلعت وهي ادردم وانه اختنكت حيييل
من شفت هالسوالف بعد قفل عقلي

رحنه للمطبخ وهي بس تضحك ولازمه ايدي
شالت المسواك وتكلي ..

- فدوه لكلبك حبيبي مقصرت
ماخليت شي بنفسي ماجبته تسلم عيوني انته

- تدللين

شفت ام سيف تباوعلنه صفح وهي واكفه ع الطباخ ..

بهاللحظه تمنيت احطهن اصلخهن اثنينهن واخلص منهن اذا طلعن صدك هنه امهات السحوره والبله ..

ماتحملت اضل اشوفهن .. عفت ريري ورجعت لغرفه ابويه ..

خابرت السحار وهو يدك ويدك وميجاوب
دزيتله الصوره بالواتساب وضليت انتظر بي

جان تجي ريري جايبه وياهه ماعون فواكه
وكعدت يمي ..

كبل حطت عنب بحلكي وتكلي ..

- دكُل شبيك وجهك هيج صوفر هاي عود انته النابش المكابر نبش هسه خيط وعظمتين صوفرن وجهك ويبسن ريكك

- ريري ااانه لو بس افهم ليييش !!
ليش يسون هالشي شغايتهن !!!

- يسيطرن شكو غيرهه

- معقول هنه !!!

- اكيد هنه لعد منو اليكدر يفوت بيتكم وهيج يسوي غيرهن

مبينااااات هذنيج وينهن هنه متكتكاتهه وملزكاتهه سكتاوي وضامات روسهن الخايسه

- حسبي الله ونعم الوكيل عليهن اذا صدك

- هسه دكل مو من يمي دخت من شفتك هيج اصفريت

ضلت تخلي بحلكي العنب وانه اكل وادز رسايل لهالرجال ..

دحست شيف البرتقال بحلكي وانه جضيت بيهه جان تدحس الثاني وخلتني اخرب ضحك ..
ضلت تكلي..

- يالفطير لك شلون راح نلزمهن نفصخهن فصخ ونكص روسهن وانته هيج ضعيفوني
كبل ضغطك يوشل باول جفته غير
واضل اني حايره بيك

- مااابيه شي
هسه شفتيني خربت !

- لو عايفتك ساعه النوب تخرب مو زين تلاحكتلك ورفعت ضغطك انته شايف نفسك شلون مصوفر وفجوجك طالعه

ادحي بيك ادحي بعد خاف ميعجبك
امك وصتني اسمنك

- هههههههههه لاااابربج

- صدك كلتلي حيدر خطيه مياكل سوده عليه
كللللش ميشتهي الاكل انتي سويله واهس

وسويله الاكله الزينه ورجعي حيله وسمنيييييييه انفخيه انفخييييييه

-هااااااا امي تكول هيج !

-ايييي لعد شعبالك تريدك تصير طحش
ثوووور اكشر تريدك تنطح

- اثنينجن فكن عنننننييي عوفني انه مقتنع بشكلي وجسمي انتتن ياهو اليمجن

- درررروووح فوك مااسمنك واسوي بيك حيل تتبطر

- من طبخج اليخبل راح تسمنيني

- مو كلت تعلمني يلا وينك

-خلي استعدل شويه راسي يصفى واعلمج

- زييين ديلا كمل الماعون
حكوم اتلوك شويه واجي اذا لكيت مبقي شي ادحسه كله بحلكك واخنكك بي
اكل لتضل صافن

-بسس روحييي ااانه اكل معليج بيه روحي

راحت وضليت انه اكل واخابر بي لحد ما جاوبني .. حجيت وياه وفهمت كلشي بعدين
رحت صحتهه .. جانت واكفه ويه بنات عزيز
وتتمضحك كبل عافتهن واجتني .

سديت الباب وكلتلهه..

- ريري هذا حصلته

-السحار ؟

-ايي مو دزيتله صوره وشافهه كام يضحك

-ليشش

- يكلي انعلستووو

-يااااا صخامات

- طلعت هالعظام مال هدهد

- اييي وهذا منين يجيبوه وشيسوي ؟

- يحصلوه مكومه هالسوالف بالسوك

- ياااا سواكتكم بيهه هيييج!!!

- لاااا اكو سوك خاص بس للسحوره
هسه عوفي السوك ركزي وياي

هذني لازم نشيلهن و نكعد نفك الخيوط العليهن بالملح بس انه خايف من شغله

- شنو ؟ دفهمني شحجالك هو عليهن شيسون هذني

- كال هذني وين لكيتهن كلتله بجربايه ابويه
كالي هو مشلول مو كلتله اي عاد فهمني
هذني العظام تعبر عن عظام جسمه يعني
وكل عظمه مخطوط عليهه لفد مكان
بالجسم ولهالسبب هو انشل دتفهميني!

-اي ايي افهم
عزااا العزاهن يامفلوكااات شلون الهن خلك يخطن ويصخمن فلك الفلكهن وصخمهه لعيشتهن

- كااااررررثه وحك عليييي ماشايف هيج بشررر حتسودن وعلي

- دصبر وبعد وبعد هسه نطلع بلاوي
اصبر لتتسودن من هسه عيوني

- لج ريري تدرين شكالي
هااي العظام ربع من العمل دتفهمين شنو رررربع !!! يعني اكو بعد لابويه كووم سوالف ماندري شلونهه

- يااا ياااا

- چا متشوفيني متسودن منه
لو هو على هاذ جان فرحت واكوم هسه احركه واخلص من شره وبلاه

بس اخااف اسوي شي وينعكس عليه
كالي هاي الاصل الاصل مال العمل تلكوه
مثل لعابه هي مخطوط عليهه كلشي يخص ابوك وبيهه يتحكمون وهالسوالف التلكاهه قريبه منه هاي توصيله وسيطره

بس الجبير الجبير يصير بعيد بمكان بي عباده شيطان حتى يضل مشتغل

- عزااا ولك هاي وين نلكاااااهن النووب !!

- شمدرررريينننيييييي
ياااالله صبرك دخيل اسمك ثبت عليه العقل يارب

- دطول  خلكك هسه بعدنه باول جفته
شبيك دنطي صبر

- ريري كتلج خايف هسه اسوي شي بهالعظام واخاف تاثر على ابويه

- هو ماكلك شلون تخلص منهن

- كالي كسرهن وكطع كل الخيط والعكد كلهه فلها وكطعها بس كال بعد انته وحظك بالباقي شيصير

- يعني شنووووو غير ينطي شي براسه خير لووويكرمنا بسكوته

- ولج هو كال هيج لان هذني يبطلن عملهن بس خايف من الباقي الي ماندري شلون مربوطات واحد بالثاني
هذا اذا راح شيصير بالباقي ؟؟؟
هيييج القصد ولج افهمي لاتعبيني

- ايييييي فهمتتتت
زين هو ميعرف هالعمل كله شلون يصير
شمستخدمين ؟؟

- يعرف بس يكول كلمن وطريقته بعد
ماكدر اجزملك هيج وهيج مستخدمين
يكول كله مايمشي الا برضاه الشيطان
شوف همه شلون بيا طريقه يرضونه
ومشين هالعمل وهالطرق كل واحد يختلف بيهه عن الثاني

- ولك هاي صارت بيهه شيطان
ولك شيخلصهه شيفضهه هاااااي

- ربنا الكريم هو قادر على كل شي
ريري نتوكل على الله بعد واليصير خلي يصير

- دمشي نصعد

- جيبي الملح وياج ومكص

- شلون اخذ الملح وهالمعزايه واكفه هناك

- منيه ؟ ام سيف!

-ايييي لطشه لاطشه بالمطبخ
لا واحد يكدر يحيص ولا يفيص

- يلا هسه مو مشكله
اجيب من المحل ونخلي فوك مبين هواي راح نحتاجه

-اي احسن

- صدك اكلج حجيتي وياهن تفاهمتن

- ياااا غير وريتهن ور
ولك اااني ريري اغسل عقووول

- هههه شسويتي ولج

- تلوووووكتتتت لحد ماوكع لساااني
اخذتلهن القماش وهذاك الحجي الحلو
وتعذرت منهن وكلتلهن اني شويه من توصل سالفه يم رجلي اتخبل احبه ماااتحممممل احد يحجي عليه

-ايبااااه

- ايييي كلتلهن احببه هذا اتخبل عليه
ينزرف كلبي وتطبك فيوزاتي بس ينحجي عليه واعذرني واني اخيتجن والصغيرونه بينجن وشعندي غيرجن هنا وصرنا اهل بعد
واني ماريد من هسه نتخارب وتضل وجوهنه ثكيله وسوالف متسوه و هذا البيت نتقاسم شغله ونقوم بواجبه ومنجن اتعلم طبايعهم
و بوستهن ولعبت نفسي وتحملت لخاطرك كون يغزر بيك بعدين تضحياتي هاااااي
وانطيتهن قطعهن وكلبتهن كلاااب
وتعال شوف سوالفنه هسه تخبل

- هههههههههههه
اااااي هيج اريدج هيييج
فرحتيني والله عفييه عفييه عليج
بعد ضاي كثريلهن لواكه هذني تره يموتن بالينفخ ريشهن ويدكلهن ناعم

- لتوووصييي عيوووونييي
حسويهن عجين بايدي بس اصبرلييي

- عفييه عفيييييه بمريتي السبعه

- دروح يلااا للمحل وجيبلي جكاير وياك
عود اني موصيتك كل يوم باكيت وانته درب التغليسه عندك 

- انسسسى والله اااانسسسسسى

- ذكرتك هسه جيبلي

- بين مارجع انتي شلعيهن واخذيهن فوك ويه العلاكه هاي بالمجر

- اووكيي استعجل ورانه غده

- منين ناكل ؟

- طنطوله عااازمتنه ع الغده من ايدددههه الي تنكط وصخ

ايييععععع لك اني اننني هاااي اكرررهههههه
محد يكللهه حفييي وجهج المعشعش بالشعر الوصخ المدهن المطكع ايييعععععععع لك هاي اخوك شلون مكابلهه

- هههههههه الله وايدج تكليلهه وتعدليهه لخاطر اخويه خطيه مظلووووم بيهه

- اووويييي يطبهه مرررض خلي تخيس هي هيج شكولات متلوكلهه النظافه

رادت تطلع وكمشت  ايدهه ..

-ريري دبريلنه عذر ااانه ماكل من ايد احد بهالبيت لا تورطيني خلي نضل ساترين على ارواحنه

- ع اساس اني ميته على اكلهه
جنت مفكره اكضيهه ركي

- اووووف شلون ورطه ياربي
النوب هسه ماناكل تضل علينه العين
ناكل نتورط

- شهالعيشه الزفررره دمشششي اخذنه لبيت صخيم وخلي نفضهه

- ماترررهم بويه هم عيب منهم عايشين بروسهم احنه ! ابتلو بينه متكليلي

-لعد دفضنننني شسوي هسه

- نكضيهه ركي وخبز مثل ماكلتي

-اي شبي الركي طيب يلا اكل صحي عادي

-اااوووف ياربي اووف
شفتي الضيم شفتتتي

- ديلااا هسه مو دنشتغل ونحل هالضيم ونخلص منه دنطي صبر شكد تتشكى
شويه خليك ايجابي بطيت كلبي

- محررروك حرك على ابويه وهي تكلي ايجااابي !! استغفر الله

عفتهه ورحت للمحل اخذت جيسين ملح
صغار والجكاير ورجعت للبيت كبل صعدت لغرفتي ولكيتهه هناك تنتظرني ..

اخذت الباكيت وصارت تدخن وانه ادورلي
وصله افرشهه واخلي هذني عليهن

لفيتهن بالوصله كلهن وخليتهن على صفحه
ونزلنه لان غدانا من وكت يصير مانلحك
نكعدلهن كعده معدله ...

ضليت كاعد يم امي بين ما صبو الاكل
وكعدت يمي ريري وامي وكدامنه كعدن هنه وجهالهن ..
اخوتي كلمن بمحله مايرجعون للعصر

امي صارت تاكل وريري شاورتني .
- لك متكول لامك متاكل شبيك
- ريري ينتبهن علينه عوفيهه
شيصير بعد اكثر من الصارلهه
- اوووف ولك جوعانه من كد ماشتغلت
هسه  ركيتين ماتشبعني

ضحكت وضليت منتبه عليهن شلون يباوعلنه ومبتسمات ...
عينهن ضلت علينه وانه وريري بس ركي وخضورات وخبز ناكل
تالي كمت اخبط شويه مركه بالتمن وهي شاورتني ..

-هاااا شبيك نفسك دنت ع الاكل

- لاااا ولج بس هيج حتى لايبين علينه
انتي هم سوي نفسي يلا بس هيج كدامهم
حتى اذا تاكلي ذبي عادي

ضلينه نجيبهه منا ونوديهه منا وانه ع النص وكمت اخابر وخلصت من هالغده
جابو الجاي هم ماشربت عفته وصعدت
وصحتلهه تلحكني فوك ..

تمددت وانتظرهه وهي طبت كبل كالت..

- لك حرب نفسيه هااااي خرا بلشتهننن
الزفره
هاي شلون نضل كل يوميه هيج ولك انجلط

- ولج بويه اطبخيلنه انتتتي وفكينه

مو كلتن كلمن جدرهه وحد

شهالحنيه النزلت بينجن اليوم !!

- اييي غير دنسوي عود صلح بينه ونحنن كلب على كلب

- وتسونهه برااااسي !!!
ريري هاي انتي دبريهه معليه اااانه طالع منهه

سوالف نسوان بينجن فضنهه

- اكولك انته شلون تريدني اعزل واني الجك من البك ماعرفه بالطبخ !!

اطبخلك حَـو !!!!!

- موووو كلت اعلممممممج هي بلوه الوحده
ضلت على هاااي

- ديلااااا شوكت عااااد مو متت من الجوع

- مريتي عيني شبيهه الفواكه هسه
مو صحيه وفيتامينااااااات اكليهن واسكتي

- اووووف اوووف
لك هي بس بالاكل

اني كلاص مي مداشرب كاتلني الخوف حتى من البواري والفلتر

-هههههه عيشي مثلييييي عيشييي واشبعي
ضيم

- جيبليي صناديك مي هناا خليهن بالثلاجه وخلي نخلص

- اي اي اجيبلج
اكو بغرفه ابويه تره اجيبلهم اخذي منهن

-اخذت لعد هو شداشرب بس منهن

- يلا هم اجيب النه  بالليل من ارجع

كعدت بالكاع وجريت الوصله .. فتحتهه
وهي كعدت كبالي ..

- ريري تخافين ؟

-لا

- اي عفيه قوي كلبج وياي هسه زين

- ايي اووكيي هسه هو شكو

- انزلي جيبي فد دولكه انكع بيهه هذني

- يلا هسه اجيب

ضليت انتظرهه لحد ماجتي جايبتهه
قفلت الباب وكعدت كبالي والوصله مطشره بيهه الخيوط والعظام بيناتنه صايره ..

- راح ابدا وانتي بس ضلي ساكته ولا تطخين  شي

اخذت اول عظم رشيت عليه الملح وبديت افتح الخيط واقرا بتجويد ....

«وَاتّبَعُواْ مَا تَتْلُواْ الشّيَاطِينُ عَلَىَ مُلْكِ سُلَيْمَانَ وَمَا كَفَرَ سُلَيْمَانُ وَلَكِنّ الشّيْاطِينَ كَفَرُواْ

وَاتّبَعُواْ مَا تَتْلُواْ الشّيَاطِينُ عَلَىَ مُلْكِ سُلَيْمَانَ وَمَا كَفَرَ سُلَيْمَانُ وَلَكِنّ الشّيْاطِينَ كَفَرُواْ

يُعَلّمُونَ النّاسَ السّحْرَ

يُعَلّمُونَ النّاسَ السّحْرَ

يُعَلّمُونَ النّاسَ السّحْرَ

وَمَآ أُنْزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ

وَمَا يُعَلّمَانِ مِنْ أَحَدٍ حَتّىَ يَقُولاَ إِنّمَا نَحْنُ فِتْنَةٌ

إِنّمَا نَحْنُ فِتْنَةٌ
إِنّمَا نَحْنُ فِتْنَةٌ
فَلاَ تَكْفُرْ

فَلاَ تَكْفُرْ
فَيَتَعَلّمُونَ مِنْهُمَا مَا يُفَرّقُونَ بِهِ بَيْنَ الْمَرْءِ وَزَوْجِهِ
وَمَا هُم بِضَآرّينَ بِهِ مِنْ أَحَدٍ إِلاّ بِإِذْنِ اللّهِ

وَمَا هُم بِضَآرّينَ بِهِ مِنْ أَحَدٍ إِلاّ بِإِذْنِ اللّهِ

وَمَا هُم بِضَآرّينَ بِهِ مِنْ أَحَدٍ إِلاّ بِإِذْنِ اللّهِ

وَيَتَعَلّمُونَ مَا يَضُرّهُمْ وَلاَ يَنفَعُهُمْ

وَلَقَدْ عَلِمُواْ لَمَنِ اشْتَرَاهُ مَا لَهُ فِي الاَخِرَةِ مِنْ خَلاَقٍ

وَلَقَدْ عَلِمُواْ لَمَنِ اشْتَرَاهُ مَا لَهُ فِي الاَخِرَةِ مِنْ خَلاَقٍ

وَلَبِئْسَ مَا شَرَوْاْ بِهِ أَنْفُسَهُمْ لَوْ كَانُواْ يَعْلَمُونَ»

ضليت اعيد بهالايه على كل خيط افتحه
وانكعه بالماي المالح ..

خلصت من الخيوط وتعبت ضليت بس ساكت وصافن على حال كعدتنه

انتبهت على ريري جامده معانيهه
كلتلهه ..

-شبيج
- احجي عادي
-اي شكو احجي شبيج خفتي ؟
- حيدر
شوف المي

انتبهت عليه انكلب لونه احمر والخيوط كلهه تشابكت سويه

كبل طلعتهن وضليت اكصكص بيهن
وهنه ينكطن من هالماي الاحمر

كصكصتهن كلهن خليتهن صغور صغور
ورجعت نكعتهن

كلتلهه...

-هااي جانن مخطوطات مو كتلج
يخطون عليهن بس شلوووون مااادري ؟
خيوط هالكدهه شيخطون بيهه !!! ماادري
حسبييي الله ونعم الوكيل

- حيدر خلصت لو بعد اكو

-بعد هالكارثه العظام
شبيج خفتي شو شكلج تغير ؟

- ماخفت بس اختنكت اريد اطلع منا
كمل واخذني لملوكه ماريد اضل هنا اختنكت حيل

- شجاج ريري لتخوفيني عليج يمعوده

- لك موووو منهن هذني ميخوفن جلبي
بس ضجت هيج ضجت
دكمل عاد يلاا
مو تعرف مزاجي بساع يضرب

-هاااا سالفه مزااج
سهله هاي تحملي شويه

-اي ديلا شوفلهن جاره

اخذتهن العظام واشوف بيهن شي ابيض
بالطول صاير

بحافه المكص ضليت اشيل بي لحد ما
طلع هالعظم الرفيع المفصول عن الثاني بينهن بسمار اسود بنفس طول الفتحه

كل عظم بي بسمار وهالبسمار ملفوف عليه
خيط وصخ مبين منكع بدم لان ريحته عفنه 
والخيط هذا معكود من الطرفين على البسمار

رجعت افك العكد هاي واقرا ..

« وَأَوْحَيْنَآ إِلَىَ مُوسَىَ أَنْ أَلْقِ عَصَاكَ فَإِذَا هِيَ تَلْقَفُ مَا يَأْفِكُونَ *

فَوَقَعَ الْحَقّ وَبَطَلَ مَا كَانُواْ يَعْمَلُونَ *

فَوَقَعَ الْحَقّ وَبَطَلَ مَا كَانُواْ يَعْمَلُونَ *

فَغُلِبُواْ هُنَالِكَ وَانقَلَبُواْ صَاغِرِينَ *
وَأُلْقِيَ السّحَرَةُ سَاجِدِينَ *

فَغُلِبُواْ هُنَالِكَ وَانقَلَبُواْ صَاغِرِينَ *
وَأُلْقِيَ السّحَرَةُ سَاجِدِينَ *

وَأُلْقِيَ السّحَرَةُ سَاجِدِينَ *

قَالُوَاْ آمَنّا بِرَبّ الْعَالَمِينَ * رَب .....  »

وجان تنضرب الباب قوووووويي
انرجت رج
ريري فزت وعاطت وكبل كامت على حيلهه
وانه وكع كلشي من ايدي
وضل ماينسمع بس صوت كلوبنه بالغرفه

عيونه ع الباب وخانسين .. اباوعلهه واكفه يم الكنتور وساده حلكهه بايدهه ..

جريت نفس و وحدت الله و اخذت العظم الي طلعت منه البسمار وخليته بالماي
وهي تكلي ...

-عوف كلشي ولك كوووم عوفهن

- لازم اكملهن ريري انه بطلعان الروح يلا لكيتهن

- حيدددر هالصوووت الصار شنوووو

- كولي يالله لتخافين كولي يالله
تعاي اكعدي يمي

اجتي وكعدت يمي وتباوع للباب
خليت تركيزي بس ويه هالعظام واخذت الثاني ورجعت اقرا بتجويد ...

<< وَأَوْحَيْنَآ إِلَىَ مُوسَىَ أَنْ أَلْقِ عَصَاكَ فَإِذَا هِيَ تَلْقَفُ مَا يَأْفِكُونَ *
فَوَقَعَ الْحَقّ وَبَطَلَ مَا كَانُواْ يَعْمَلُونَ *

فَوَقَعَ الْحَقّ وَبَطَلَ مَا كَانُواْ يَعْمَلُونَ * ...>>

بس خليت العظمه بالماي كبل انجفى وريري فزت وضلت مجلبه بايدي ..

وانه اباوع للدولكه ماطخيتهه والله ماطخيتهه
شوكعهه !!!

كلشي تنكع واحنه وكفنا .. ضليت اردد
لا اله الا الله ودنكت اشيلهن واقرا ايه الكرسي
وبعدني المهن وجان يطكن الكلوبات
واحد وره الثاني وريري تعيط

كبل جريتهه لحضني وضليت اردد
لا اله الا الله
وطلعت من الغرفه بسرعه

ضليت واكف يم الدرج وكامش ايدهه وهي
ترجف .. وانه كلبي يدك براسي

ام فاطمه صاحت علينه من يم الدرج
تسأل شكو ؟ وانه كلتله طكت الكلوبات ماكو شي ..

جريت ريري وطبيت للغرفه وهي تريد تطلع
مترضى تضل هنا .. كلتلهه..

- بس اصبري هذني ماريدهن يصعدن

- ماضل هناااا لك هاي الغرفه مسكونه
لك هنا همه هناااا ولك يمنه
امشي طلعني من هالبيت حيددررر ماضل هنا طلعننني طلعنننننييي

كمشت وجهه وكلتلهه..

- ادري يمنه بس الله موجود
يباوع لحالنه حتى لو بينه وبينهم شعره
الله يحمينا بهالشعره التفصل بيناتنا

- لك هي مال ايمان وحنان دمشي ولك خلي نشرد بريشاتنا

- خرررب ولج بس اصبري

- لك ليش هيج ليش اجوي مو متعود انته
احجيلي فهمنيييي شنو الصار

موو متعود تفك سحوره وميصير شي
لو جنت تجذب عليه !

- لااا بالله ماجذبت
بس مصايره وياي من كبل هيج ولا مره

-لعد الصااار ليييششش!!

ولك جان انضربناااا ولك يمنننه حيييدر

لك جسمي كزبر اختنكت فدددوه طلعني منااا فدوووه بعد مايضل بيه عقل اذا سوو شي النوب

- بس اهدي اهدددي
همه لان يخافون من ذكر الله هيج يسوون
لتخافين انتي بس اهدي والله ماخلي يصيرلج شي

- خلي نطلع حيدددر خلي نطللللع بعدين نحجي لك همه هنااا كلشي يسمعون ويشوفون اممششي خلي نروووح ولك شمبقينا بينهم
ياامعزاااا امششي

- ديلا البسي عباتج خلي نروح لبيت السيد

رحت الم الغراض من الكاع وهي تكلي عوفهن وانه كبل لميتهن بدون ماقرا شي
خليتهن بالعلاكه كلهن ورجعت خليت العلاكه بعلاكه ثانيه و وصيت ريري تخليهن جوه عباتهه ونزلنه ..

كلت لامي رايحين لملوكه نكعد وياهه شويه
وطلعنه ..
كلتلي ..

- حيدر تره هالشي لازم تشوفله جاره
لك هذوله يحركونا حرك مره الثانيه بس نطخ غراضهم

- لج شهالسحر الاكشر هذاااا يااامحمد

تعجبت ااانه تعجبت لج ريري ميه الف سحر مطلع وفاك ومصار وياااي شي وبنص المكبره اكعد بنص الكبور بنص الموتى
وكلشي مصارلي

هسه هنا من ايتين انهجمت الغرفه هجم
دخيلك ربي شنشوف بعد منهم دخيلك

- لتقرا بعد ايات

- لج شلون ماقرااا شلوون

- اييي لتقراااا مشفت شصااار بينه
اخذهن احركهن وخلصنه بعد لتسوي هالكعده

- ميصير ريري مو كلشي بالحرك ميصير
كل شغله الهه اصولهه

- خراااا بهالاصوووول ولك
جان متنااااا لو متلبسنه واحد منهم
شنسووووويييي ولك !!!
ولك يمممنه جااااانووووو عزااا ولللك عزاااا بعينيييييي

- استغففففر الله
اهدددي عاد كافي شجاااج
هاي عود انتي ام كلب القوي

- خلو كلب همه هجموه هجممم

اني من اول مابديت تقرا مارتاحيت
انعصر كلبي وخفت من هالشي يصير

حسيتهه شلون هاي بالافلام من يكعدون يستحضرون ارواح هييييج جنت انته مخوفني

- هههههه ابشرج هاي اضربين من الافلام

- نيااااال كلبك يالفطير تضحك بعد الصار
ولك اني مادري شلون حرجع افوت للغرفه

- ريري شجاااج يمعوده اريدج وياي مو اضل حاير بيج وبخوفج
قوي كلبج هاي بعد طبينا بيهه وكلشي نشوف

- اوووف اوووف
زين هسه هاي جبناهن ليييش

- نكملهن انه والسيد

- عزااا بعينك ولك بعدك تريد تكمل !

- چا اشمرهن واعوفهن  ! غير اخلص من بلاهن يلا

- يمممه عيني اني معليه بعد انته حير بيهن
اني اروح اكرص يم امليكه ومعليه بيك

- روحي رووحي بس شويه هدي نفسج
ريري اريدج تعاونيني افهمي هالشي لخاطر الاسلام

- اييي اييييي ادري

نزلنه لبيتهم وضليت كاعد ويه السيد احجيله
كل الصار من البدايه .. ضل هو صافن
على الغراض ويكلي..

- خويه احنه مالنه حوبه ! هالنفوس الماتت
وتعذبت مالهه حوبه يم ربك وتطلع بيهم
اعوووذ بالله من شر هالناس

- الهم يوم خويه الهم يوووم اذا مو بالدنيا بالاخره حسابهم عسير

- اريد من الله يشوفني بيهم يوم بالدنيا كبل الاخره واضل اتحسب عليهم ماطول بيه روح
اكول حسبي الله ونعم الوكيل على كل ظالم اثم وكافر منهم

حسبي الله ونعم الوكيل على كل جن وانس تعاونو لاذيتنه

- حسبي الله بيهم مالنه غير رحمته
شوفلنه حل خويه هسه شلون بهذني

- خابر هالغضب كله شلون بيهن ااانه شدراني شينفع ويه هالبله الاسود

ضليت اخابر بالسحار وجاوبني بعد ماطلعت روحي .. حجيتله الصار كله  وفاتح سبيكر والسيد يسمع الحجي عاد كالي

- كلش زين الصار حتى تصدكني وتثق بكلامي من اكلك العمل بالبيت وبمكان قوي
شفت هاي لو بره تفتحه جان كلشي مصارلكم
بس بيتكم عمل رابط بعمل

- يعني هسه اذا افتحه بغير بيت عادي ميصير شي ؟

- اي وين ما جان افتحه ماعليه شي
بس اريد افهمك شغله

- اي اسمعك

- الجاي يصير مو لان هالعمل قوي
وماينكدر عليه بس اكو عمل ثااااني
هو مسيطر عليهن كلهن يعني هو القوي
هو الي ميخلي احد يتقرب للبقيه

يعني هالعمل متأكد مليون بالميه مسوينه بيتكم
بحيث كل ماتريدون تخلصون من شي يرجع اقوى من قبل

- اي صدك منين مانحاول وياهن نرجع فارغين

- اييي هو هنا مربط الفرس
يم هذاك الجبير الي مغلف هالاعمال الصغار كلهه حاميهه فتضل شمتسوي تريد تتخلص منهه ياذيك لو يعرقل شغلك المهم ميخلي شي يبطل

- لا اله الا الله
وهاي شلون ؟؟ شنسوي

- ضل دور بس بعد الي تلكاه اخذه بره
اكلك
جيبه الي احسن

- هااا؟

- اي احسن احسن جيبلياه وانه اتصرف
بي

- خاف ماتكدر خويه ونتعبك وانته مابيك حيل ومريض ماكلفك وياي

- لاااا يمعود جيبه اتونس بي
لتخاف عليه انه اكبر عمل وجن مايوصلولي
خوش مداري نفسي وهذني هيج لعب العب بيهن للونسه

- كلش زين
چا لليل امرلك

- اكلك بثمانيه الا ربع  لعبه ابطال اوروبا
تصفيات التأهل الثالثه
خوش لعبه قويه هاي بين سبارتا براغ وسسكا

-هاا التشيك وروسيا اليوم

-اي ايي تعال هم نتعشى سوه ونشوفه
ونسولف بهذني

- يلا هاذ هوه يمك بالليل

-انتظرك

سديته وضليت اباوع للسيد ضاربله صفنه
كلتله..

-هااا بعد اخوك وين صافن

- هاي من شوكت ضارب ميانه وياه
ولك

- من زمان جا ماتدري !

- وانته شدراك باكلهم شلونه ورايح تتعشى

- خويه ااانه من خبرتي بهالحياه
فهمت ان المو زين وياك زين ماطول ساكتله
ومخليه على مايه ماتدخل بي

يعني انه هسه معاشره لهالسحار ميأذيني
ولااا يوصل كرباي لان مالي دخل بي
عندي شغلتين وياه كد سلام وسؤال
ومع السلامه
هيج ناس أمن بيهم لان عيني بعينهم اعرفهم شنو ويعرفوني شنو وكلمن كاف شره من الثاني

- هو انته كل المعاشرهم عوج ومو خوش

- كلمن اله فايدته بحياتي
وهذوله العوج بلياهم جان ضليت اعمى

سويلي طريق خلي اشوف ملوكه يلا

- اكلك
هاي تضل هنا ؟

- مضوجتك؟

- حيدر تره انته جبتهه تشتغل عندك مو
عندي
ماتحملهه انه
تره دمي يفور فوور عايف بنتي بحضن وحده  كيوليه ام دعاره وكاعد اتفرج عليهه

- كااافي سيد
عوفهه .. انه جبتهه حتى تلهي ملوكه شويه
وتونسهه وادري بيهه متزل وياهه

- هاي قناعتك بس انه ماتحملهه
كايلك من الاول كعدتها ويه العلويات
ماتنهضم عندي ومارضاهه

- يلا هاذ هوه
هسه اخذهه واروح وما كلفكم بعد

رحت للباب ودكيت عليهه كلتلهه تجي نرجع
وضليت واكف انتظرهه والسيد يمي يحاجيني
بس ماردله .. اخذتهه ورجعت للبيت

صعدنا للغرفه وضليت كاعد بس استغفر وافرك براسي وهي واكفه متخوصره تكلي ...

- شو هم جبتني هناا بنص هالبله !! شلحكت تسوي بهالنص ساعه !

- ريررري اسكتي لخاطر الله

-شبييييك شو مدلغم ؟

كعدت يمي وتكلي ..

- شبيك سمعتلك حجايه تغث مو

- استغفر الله استغفر الله
اتلكااااهه منين ربببيييي !!!
لج اانه كلشي اسوي لخاطر بنته
اروح واجي واصرف واجازف لخاطر هاليتيمه والله هي الكاسره كلبي اكثر من اهلي اكول ماشافت شي من عمرهه خطيه مو مثل اهلي عاشو وشافو هاي محرومه من يومهه ووكت الصدك يعوفني وحدي احير بامري

- ويطببببببه مرررض شكو مهتم!

- لتغلطيييين

- لك بابه لتضل فاهي وحساس

كلشي توقع بهالدنيا كلهه تصيح يارووووحييي

لاتضل بكل كلمه تسمعهه تنصبلك فاتحه ,

اسمع وطنش لو ترد الكلمه بالوجه وتخلي العيب بالجيب حبيبي

اليعيل وياك اكسر ظهره اوووكيييييي

لتصير نانسي عجرم عالمك وردي و كفخه هوا شرجي توكعك

الي يكبح وياك الزمه وشك حلكه بالكباحه

- افهم هالشي اعرفه مو صغير, بس مو طبعي اكبح ويه الناس كايلج احنه طبعنه اليسمعنه كلام يغث نعوفه ونمشي مانتلاغى بالحجي ويه احد

- وهسه هذا ماحس على نفسه من شافك كلبت خلقتك وياه وسكتت؟

- اي اكيد فهم بس انه حز بخاطري موقفه

- هو شكلك يعني

- يكلي ماريد مرتك تضل ويه بنتي أخاف عليهه

- دشوووف شووووف هالكحبجي شيكول
ولك هو انييي جايه علموووود منووو !!!

- علكيفج صوتج

- لك اننني اجيييت مو علمود صخيمته
بنته !!

شو هسه كااام يخاااف منييي وميريدني مو هو الي اجه برجليه لبيتي

هسه كام يستشرف براسي ابن التن...ج بالزويه

- ررييرررررررريييييييي

- وووجعة امي وابويه شبيك تصيح

- لج تسبين كدااااامييييي باااهليييييي

- اسب كدامك وكدااام الخلف اهلك 
اسمع ولك حويدر

تروح على هذا الجحش المصوفر تكوله
ماعايزين على بيته واهله ويطردنا منه

وبنته بعد تجيبهه هنااااا يمييييييي سمعتتتتت
هنااا تجيبهه من نص عينه الخايسه تاخذهه

- استغففففر الله رببببي واتوووووب اليه
لج لييييش هييييج ليييش تسبييين بيهم ولج
مو حطوج بعيونهم

- مبيييين من حجي ابن عمك المصون
شمدريك شحاجي بعد يم اهله علينه

- ميحجي شي هذا اعرفه حجايته بس بيناتنه

-عييينييي بينكم وراكم مايهمننننني زييين
يطبه ستين مرض ميهمننني ان عجبه او لا

المهم امليكه تروح تجيبهه يمييي هنااا وتكسر خشمه

ضليت افرك براسي ومخنووك من حجيها ومسبتها .. وهي تدخن يمي جان تكلي ...

- شبيييك شو خنست شكو

- حجيييج يااالكعبببه حجيييج ريرررري
ارحمييينيييي بطلييي مسبه وفشار بكل حجايه

- ايييييي هسه شخبصتنه
اليسمعك شو شكايله سبينا كعبتك هسه وتخبلت

- ومسبتج هاااي شنو هينه؟

- اكولك تره حجي عادي ماسبيت اووكييي

هسه هو احنه كلنه ولد المني...ج...ـه شكو بعد

-خرررربببب بييييج لج

- اييي شبيييك هسه لعد احنه جايين من فطر الحايط !!!!

مو كل امهاتنه مني....ت بعد شكو !

شنو قابل حبلن بينه من الهوا !؟

مو كلهن زويه و ن ..ج بعد شكو ضايج !
حاجيه شي غلط ؟؟؟

-ههههههههههههه نعلى على ابليسج ياريري

- دضححححك خرااا بييييييك شكد عكره
هسه اني بنت مني....ـه

وانته هم وابوك وابويه هم وامك هم وجدي وجدك هم وكل الكره الارضيه هم بعد شكو شغلت مكبر صوت بلعومك عليه !!!!

- ريريييي عيب هالحجي عيب مفرداتج ثكيله

- لاا مو ثكيله عيوني حاااره حاااره تجدددح

-هههه اييي

- اييي اني احجي طك بطك بعد عمرررري
هي الكلمه مبيهه شي بس انته تجفل منهه
ولا هي شبيهه

ن ...ج يعني جنس شبيك انته متعرف الجنس شنو ! شو متجفل من اكول جنس بس هناك تكب عندك

- هههههه لج هي شويه الفاظ لبقه

- عيونييي خليتهه الك صير لبق ويه اللبقين العندك اوووكيييي عوفني اني اجدح نار بحجيي

-اعوفج عمي اعوفج هو انه اكدر لحجيج !

- اييييي هسه متروح تجيب امليكه دنكمل الحلقه سوه

- ياحلقه؟

-شبيييك مو كتلك متابعين كارتون سوه

-ههههه شكبرج شكدج متابعه كارتون!

- شسوي تابعت كومه اباحي تعبت نفسيتي منه كلت خلي اسوي غسل وتشحيم لدماغي

- ايييييييييييييي لج انتي شكو درب اعوج ماشيتله

-يااااااه .
هستوك يلا دريت
امده حظي اذا صدك

- هههههههه شلووون بيج شلووووون

- اكولك شو حبيت حضنك حلو

مترجع نتحاضن بعد دنحس بالامان والاستقرار شويه

- استجلي بعد عيني استجلي

- اريد استجل بحضنننننك تعااال

- متتتتتوووووضيييييي وجايتنه الصلاه

-صلاتيش هاي ولك ساعه خمسه العصر

-صلاه العصريه وخري عوفيني

- خواااااف نعلى عليك

زوج جيس حب انته شمحصله منك خرا بيك

- خراااا بيج انتتتتي لتضلين تغلطين ولج سودنتيني شهالقابليه العندج

- يبوووووووو
بديناااااا ويه جناب السيد

لك هسه انته ماتغلط على احد !
ماتصير عصبي ؟ ممتعارك فد يوم ؟

-كللشششي ماعندي انه رجال اروح واجي بدربي لا اتعارك ولا اغلط

- اله اخليك توكف بالركن انته وتوثيتك
تكفخ بالرايح والجاي دصبرلي

- هااا ولج هاااااا شجاج

- ااانيي هالنفسيات المؤدبه زياده اريد اقرضهم واول ماابددددي بيييييييك

- اتعبين نفسج وياي انه من الابي مؤدب ماتغير

- اغيرك اغيرك لك معاشر ريري انته
متدري بالضيييم الي وياااك ولك بعدك ششايف منييي

- بوووييييييه هو على الشفته حتسودن
دخيل جدج فكي عني رحمه لوالدينج رحمه لدينج انسيني لتخليني بالج عوفيني

- يلاااااااا هااااي لخاااطر
طليان لاوي بس ذوله اعزهم وراح اعوفك علمودهم شويه ماشوفك شعندي ماعندي

- ههههه طليان لاوي شجابج عليهم !؟

- شلونهم فدوه رحت لصوفاتهم كاعدين بلبه كلبي يستاهلووون اعوفك علمودهم

- هم خلف الله عليج

- اكووولك
هسه شسويت ماسويت بيهن هالصخايم
الاخذناهن

- خابرت ابو سعد عليهن

-ابو سعد منو ؟

- السحار الحجيتلج عليه

-ايييي وشكال

- كال جيبهن وتعالي بالليل نتعشى ونشوف لعبه دوري الاوربي وهم اني افكهن الك

-هااا لك خوش سحار هذا يعرف الاصول

-والله شو هو خوش رجال بس شغلته عوجه ومخربته حرامات

- عادي كلنه بينه زين وموزين
ديلا كولي ماحجالك بعد منا منا

- اي كال هاي اكو عمل جبير قوي هو الحامي كل هالصغور وميخليهن يبطلن
كال هو السبب بكلشي ماكدرتوله لليوم
ومن اروحله هم افتهم منه بعد

- اييي
اسمع حويدر

كوله .. اليسوي هالاعمال كلها هذاك الابي يعني السحار المثله هم يشوف هذوله اليسخرهم بالاعمال لو لا ؟

- خوش سؤال هذا راح اكله عليه

-اي وكوله .. قوه السحار منين تجي ؟
وبيمن تضعف ؟ مو تنسى لازم نستفاد منه كولش زين

-اي ماشي

- هسه تروح لو لاااا

-لا حطلع للمحل

- زييين اكوووولك شلون نتعشى اليوم
تره ميته جووووع لاهم تكضيهه عليه ركي
تره جوعانه جوعااانه

- ريري اطبخي انتي اغلطي هالمره واوكفي على طباخ

- اطبخ ط....ي
اكوله ماااعرف اصخم بعينك شيوكفني ع الطباخ شسوي اتصفن على الجدر واطكطك بي

ضليت بس اضحك وافرك بوجهي
جلبت الضحكه بعد اريد اسكت ماكدر
وهي ايديهه تنتر بيهه ويه كل حجايه
تخليني افطس ضحك عليهه

- ولك شوفلي جاره حويدر لا اهج منا
كلشي ولا الاكل لتتحارش بي وياي

- ريري بالله العظيم انه على وشك التفليس
تفهمين شنو يعني ! هالشهر صرفت هواي وحاليا بديت اوشل لازم تدبرين نفسج
باكل البيت ماكدر كل يوميه غدا وعشه من المطعم

- بجى بجىىىى بعدك صرفتلك بالخمسين الف وكمت تلطم لعد لو تصرف مثلي شتسوي
يمكن تشمر روحك من السطح متتحمل ابو فليس ينوكل كلبك  على فلوسك

- ولج بوووويه ااانه مو جحفي بس ماعندي والله لج هنه ست ورقات استلمهن ونصهن للسلفه والباقي مصرف وسحب انه ساحب خط وحدي فوك لان ويه البيت تفصل ميكفي
وهاي الشهر كله عليهن

- والمنا ومنا الكلت تطلعهن وينهن ؟
تدحسهن مو ؟

-ههههه لج هو انه ملحك حتى ادحس
تره مو دايماً انه اخذ كل الشغل
وياي اثنين ولد ومتقاسمين بكل شي
يعني يمكن بالشهر احصلي اثنين لو تلاث
كاميرات بالزايد هاي يعني اذا حصلتهن
واذا ماحصلتهن تضل على تصليحه الحاسبه

- اييييييي ديلااااااااا انييي انطيك لتلطم

- ماااريد تنطيني اريدج بس تتعلمين تطبخيييييين

- دكووووم علمني مو دكيت صدرك واعلمج وسهله ديلاااا تلحلح عاد شكد روحك طويله

- ياااابويه ياااصوتج لج تسطرين انتييي تسطرررين علكيفج وياي بروح الحسين

- اييييييي حيييدددااااار تره بزعتني شنسوي هسه احجي

- راح اطلع انه وانتي شتسوين سوووي
زينن

- دروووووح عااد
خلي اخابر شويه اشوف شكو ماكو

- انزلي يم امي مو تضلين هنا كاعده

- اييي ادرررري روح معليك بعد

- زين بالليل راح اعوف اللعبه ماشوفهه حتىً نسوي العشه سوه وبعدين اروحله
بس كود هذني يصعدن ويخلصنه

- اني اشلعهن الك تددددللل حدوررررتييي

- رايح انه عيني رااايحححح

عفتهه وطلعت اخذت السياره وكبل للمحل
خبنت الشغل بسرعه بسرعه ونص اجلتهن بالبيت اشتغلهن ورجعت بثمانيه للبيت

سلمت على اخوتي واهلي وكعدت يمهم واجتني ريري .. شاورتني ..

- لك شحتتهن شحته ههههييييي
لك بس شوووف شوووووووف شسويتتتت
.
.
يتبع