رواية ماء مغلي الفصل الحادي والأربعون 41 - بقلم Zoka 🌷

..♣️🩸   ماء مغلي  🩸♣️..
* adzzon *

سديته من ريري  وخابرت حجينا .. فهمته سالفه وهو ضل وياي بالتلفون وفتحله كتاب ورجع كالي ..

- راح يرجعهه موضح عندي راح ترجع مرته لعزيز والله اعلم

نهيت مكالمه وياه وضليت استغفر ربي
اخذت نفس وخابرتهه .. كبل جاوبت ..

- رور الحجي يكول ترجع صدك
والله اعلم بعد

-اييي كل الهلاا بيها حياااتشي
شكو ضايج !

-صدك تحجين ! عايزنه مصايب
ولج هاي ترجع ملغومه سحوره غير تسمم عيشتنا

-عومرري انته ليش متصير ريلاكس وتعوفه عليه
مرتك  معدله وكلشي مدبره اووكي لتخاف

- شمخططه ! احجي مسويه شي ومكايلتلي

- لاا بس اسمع الخطه
راح اوز بأمك واخليهه تجبر عزيز اذا يريد مرته يأجر ويطلع يعيش وياهه هناك
ومتكعد بالبيت ويانه

وهي اكيد فرته لعقله وهسه تكيييف بس يطلعون ديحلالهه الجو وتاخذهه حجه على امك متريدنا وامك متحبلك الخير ومتهتم النه ولا للجهال وهيييج تغسل عقله وتخلي يطلع ويأجرلهه بيت
لهنا اووكي ؟

- اي بس هاي من شوكت انتي مخططه وراسمتهه بالج
جا ليش هسه تحجيلي !

- ولك بابه اني هسه فكرت وقررت هيج اسوي

-هسه هسه !! من عفتج !

-اي هسه من سديت الخط
لتستغرب عادي اني فكري يجدح بالمصايب
واصلا مناك عندي سابق تفكير فكبل ربطتهن

-هههه والله انتي تعجبيني وعليييي احب عقلج

- اي ديلا ادري اووكي
خلي اكمل

مو راح يطلعون هناك راح يبدأ شغلنه الزين
ااااني شكد جنت اريد الكط فد ثغره عليهم
واشوف الثالث منو بس ماكدرت لان مو كدام عيني

بس هاي هسه راح تفتح باب خرابهم كلهم
خليهه اتختخ بيتهه ونعوفهه تأمن ..واعرف شلون اسحلها واوكعهه بالنار هي وكل صخيم وراهه

- هااا
بلكت صدك تصير ونخلص منهم
بس انه خايف على عزيز منهه

-شكو تخاف ! هو مسطور مسطور هنا ولا هناك
عوفه لتخاف هذني مايموتنه يردنه غطى لجيافتهن يستفادن منه

- ولج بويه ادري بس اخويه واخاف عليه
هم يرجعن يسكطنه هو بالشافعات يلا رجع لصحته

- ديلاااا هسه عود نعالجه
اكوله مايموت لتخاااااف ابويه انته

- يلا يلا الله كريم
الله يحفظه ويسلمه من شرهن

- امم اكووولك حيااتشي شوكت العقد ؟

- جم يوم حبيبي ماضل شي

- زين اريد اطلع هسه واطلع من تجي

- شكو هاي وهاي ؟

- اريد هالايام اطلع اشتري شي البسه مناسب يعني مال عقد

-مااااااكو طلعه بالسوااكه رووور لا تهيجين اعصابي عوفيني مرتاح هيج
انتي بس تطبين السوك راح نتعارك
اكعدي وسكتي

-يبووووو
هسه شنووو تره معقدهه شلون بله واحد ميطلع يشتري! مايصير عنده احتياجات يجيبهن !  تره مو حاله هاااي

- هسه انتي شتردين من السوك مو كلشي عندج ! شمحتاجه !

- لبس جديد ولتكولي شنو ماعرف الا اروح واشوف بعيني واختار

- زين انه اجيبلج منا اطلع اختارلج بمزاجي
ماشي !

- ديلااااا بس خلصني اووكييي

- والثانيه شعندج بعد ؟

- تاخذني لبيتي اريد اشوف كوونييي ولتكولي لااا  تره احلف ماحاجيك بعد

- مو كلت اجيبه الج بس انطي صبر

- شووووكت من اموت ! ديلا عاد شكد روحك طويله

- على نزلتي الثانيه اجيبه الج زين هيج !

- هووااااااي

- كافي هسه كافي عوفيه
دزيلي صوره مشتاقلج
وخلي نتراسل بعد تعبت من الوكفه بره راح اطب للغرفه ونحجي رسايل

- اووكف .. كول فد شي اني احبه وانته ناسيه لحد هسه

-ههههه  .. والحسسسسييين احبج رايتي

- ديلا اني هم .. يلا چااووو

رجعت للغرفه وضليت متمدد واراسلهه
نحجي وتضل مثلا تجفص حجي وبعدين تعتذر واذا حجت على عيوني او خشمي
بالشقى ترجع تكولي دز خشمك ابوسه
ادزلهه صوره بس خشمي وهي ادزلي فيديو ثواني بس بوسات .. اضل اعيده خمس مرات واضحك

حياتي مابيهه شي يضحكني غيرها ..
كل شي هاادىء وروتين ممل حتى صحبه ماعندي هنا .. الولد على كد حجي الشغل ونسكت ..

طلعت وره صلاه المغرب ادورلهه شي تلبسه للعقد .. وهي وياي بالتلفون اخابرهه شنو بالهه لون او تصميم وتنطيني اوصاف خياليه
سديته منهه وبعد مشيت على ذوقي ..

اخذتلهه فستان طويل لونه ابيض ومشغول ذهبي .. دزيتلهه الصوره وهي كبل خابرتني
تريدني اشتري الي ستره لون ابيض
وضليت واكف بركن الشارع اتعارك وياهه بالتلفون ..

- ولج انه اتخبل من هاي الستر وعلي ماشتريهه

- معليه لعد شنو مناخذ صوره معدله مال عرس على الاقل صوره هسه شرايده منك

- ناااخذ صور بس مالبس هاي الستره البيضه لوو تلطخين راسج بالحايط

- يبوووووو حيدااااار هسه غير شي متناسق

- البس قميص ابيض وخلصنه هيج زييين

- رايح مدرسه ! لابسلي قميص ابيض

- جا ستره بيضه شني !

- اخذ  رصاصي فاتح هاي الحليبي شي فاتح
صخام اي شي

- يلا رصاصي اي ماشي هسه اخذهه

- يلا صور قبل لتشتري اوووكييي

سديته ورحت ادور ستره رصاصي فاتح
وانه ادور شفت قاط بنفس اللون الي بالهه
وجواه قميص اسود عجبني صورته ودزيتلهه
ورحت اقيسه شفت قماشته زين ترهم لجسمي
فتحت تلفون وشفتهه دازتلي
سبع رسايل اشترررررريه

اخذتهن ورجعت نمت وثاني يوم قدمت على اجازه للزواج ...

خابرت المحامي وانطاني موعدنا ..
دزيتلها رساله ..
' حضريلي نفسج يوم ٤/٢٩ صيريلي كيوووووت على الاربعه وعشرين ساعه '

دزتلي ..
' اي اي كيوت هذا الشهر كوله مزاجي تمام '

طلعت اشتري من المحل ورجعت بالطريق خابرتني ..
- ها حبيبي

- حيداار شوكت ترجع قبل هذا اليوم مو ؟

- اي ان شاء الله

- امم زين داكولك اني مختاره فد هديه الك واريد اخابر اثبت الموعد والعنوان اووكي

- هديه منين ؟

- هيج بيج كيوت مثلي طبعا وعجبني بي شغله اريدهه الك
اخابر لو لاااا يلا كول

- ههه خابري حبيبي خابري

-اوووكيي .. موواااح چاااو

سديته ورحت لفراشي تمددت واكل نساتل
واكلب بالتلفون .. كلت خلي ادورلهه هم هديه
عيب ماخذتلهه شي ..

بقيت بس اكلب بالانستكرام وكلهه هدايا فاشله
اجتني رساله منهه . .
' اشتاااقيت لحبيبي ابو كرفش  '

ضحكت وكمشت شعري تذكرت لازم اسويله معالج جديد ...

ضليت اراسلهه وسألتهه اذا تعرف مركز  زين هنا اروح اسوي شعري باجر ..
كلتلي  شويه ادور وارجعلك

ضليت انتظرهه واكلب بالبيجات شفت
ناشرين شغلات مال عرايس وصور ايد بنات لابسات سوار بي ورده جبيره
كبل طخت بالي اجيبلهه هيج سوار
اكيد كِلش تفرح بي ..

راسلتهم وهي اجتي راسلتني .. وانطتني اسم المركز والعنوان وضلينه نسولف ..
من كعدت الصبح للدوام شفتهم رادين عليه
كتبتلهم شلون مواصفات السوار الاريده
واذا يسوولي هيج نفسه .. وطلعت للدوام

للعصر طلعت سحبت تلفوني من القسم وفتحته شفتهم مجاوبين ..
يسوون بس مجموعه .. ضليت احاول وياهم
اريد بس واحد واخر شي صفينا اخذ منهم زوج ...

رحت للمركز سويت شعري وارتاحت نفسيتي .. جان هم شثكله عندي ..

دزيتلهه صورته وضلت تتغزل بي وانه مكضيهه ضحك ...

حصلت موافقه الاجازه واستلمت السوار
ورجعت لبيتي بالليل...

ضليت هناك سهران ويه اهلي .. وهي كاعده متحاضنه ويه امي وتباوعلي ..

صعدنا لغرفتنا وكضيناها حضن بحضن
ضلت تكوي بالملابس وعلكتهن واجتي
نامت بحضني ...

الصبح كعدنا مستعجلين تحضرنا وطلعنه للمحكمه ..
عقدنا وطلعنه هادئين مشينا للسياره
وهناك حركت السياره وهي شالت البوشي
وتكلي ...

- حبيبيييييي ابو الحيااادر اموووت عليييييك

- بعد بيتييي رايتي .. الي تضلين الي

- هههههههههه لك احبك ياكيك

- هههه بعد رووحي الصاكه

- ويييين نروح هسه ؟.

- شيعجبج للبيت ونطلع العصر لو نطلع كبل لبغداد ناخذ راحتنه وباجر نرجعلهم

- للبيت حتى اخذ كم شغله وهم نسلم على الاهل يلا نطلع براحتنه احسن

-هاذ هوه صار

- لك صاير كلش حباب خاف احسد نفسي عليك

- ههه ولج فرحاان وعلييي
هناك روحي مفرفحه عليج وانتي مخليتني مافكر بشي غير اجي يمج وهسه يمي صرتي وضمنت كل عيشتي وياج بعد
فرحتي ماتنوصف والحسييين مرتااااح
مرتااااح

- ههههه ااانييي هممم
تعال ابوسك

جرت وجهي وباستني وانه عيني على الطريق ..
وصلنه لبيتنه .. تلكتنه امي تبارك وتبوس
وابويه هنا كالي ..
- اي بالله رضيت عليك
صنت اليتيمه واختاريت الي تصون اهلك

ضاعفت فرحتي بحجايه ابويه .. واخوتي جانو حاضرين .. باركولي وطلعو ..

رجعت للسياره اخذت هديتها وصعدتلها فوك
لكيتها تحضر بالجنطه ..

عافتهه واجتي تلمست وجهي وتضحك
بوست شفتهه .. وكلتلهه..
- جايبلج هديه بسيطه
بس بقيهه تذكار حلو ليوم فرحتنا هذا

فتحت الجيس وطلعتلهه الاساور ...
كبل شهكت وحضنتني ...
- نفسسسس اميييي

- مو كايلج مقاييس ابوج تعجبني

ضلت تبوس  بخدي واخذت واحد منهن
لبستهه بايدهه اليسره وهي ضلت تفر بي وتباوع للشرايط وتضحك وتدمع عينهه

حضنتني وتكلي ..
- احلى هديه احلى زوج انته ماكو بحنيتك
انته احن من اهلييي عليه

- چا غير انتي مريتي وفرحتي مايستاهلني غيرج .. المن اطلع الحنيه اذا موالج !

باوعتلي وتضحك كرصت خدهه وهي اخذت
السوار الثاني وخلته بجيب الستره ..
- حتى نصير سوه موردين

- يلا بعد احلى صار القاط هيج
هذني عوضن مكان الرباط .. اكرهه مالبسه

- اي هيج احلى .. انته حلوو بعيوني كووولش حلوو

- ههه احبها للكيوووت والحسيين احبها

- هههههههه حيداااار

- نعويصه .. يلا خلصتي غراضج خلي نطلع

- مانتغدا ؟

- هناك نتغدا يلا ورانه طريق حبيبي استعجلي

تمددت وهي ضلت تلملم غراضهه
جنت مغمض وهي اجتي دنكت باستني
- عوومري تعرف شكد احبك ؟

- لا .. اريد اسمع منج

- هههه يعني مثلا بكد حبك للابتوبات ابل

ضليت فاك حلكي وهي خلت الكارتونه يمي
كعدت بساع واخذتهه اباوعلهه مغلفه
- عليييج علي  !

- لعد ابقي شي بنفسك واني مريتك !
تهنى بي حبيبييي انته

فتحت الكارتونه وطلعته
لابتوب  ماك بوك برو 2016
(touch bar )

ذبيته وكمت حضنتهه حيل .. وابوس بوجهه
- لج رور هذا البرو ماك !
لج منين حصلتيه !

- وصيته من البصره طلب خاص لان كميه محدوده منه

- ياااالله حبيبييييي لج احبج والحسسسسين احبج
لج هذا حلم جان عندي اشتري حلم
وانتي حققتيه برمشه عين
بيمن اجازيج رور !!
احبج وعليي وعلييي احبببببج

- ههههههه ايييي هيج حبني بهاي الفرحه
امووت عليك بيهه

كعدنا نفتحه سوه .. شفته شلون رفيع ورصاصي غامق لونه وصار ملكي
حلمي جان امتلكه للماك بوك ...

بوست ايدهه وحضنتهه ..
-  انه من كلتي هديه كيوت عبالي لبسه شي للسياره منا منا بس مو هيج جهاز !
بيش اخذتي !

- اني غير ادورلك الكشخه والفرحه
وشفتك منطي لايك لبيج ناشرين موديلات لابتوبات
ف دورت ارقى لابتوب هاي السنه شنو
وطلعلي هذا .. واعرف محل بالبصره ينزل كلشي اجهزه اصلي واول باول يستوردهن
و وصيتهم على الماك بوك برو
سعره زين مو غالي بس ٢٦٥٠ دولار ويه التوصيل

- يابعد روووحي
كضيتي كل فلوسج عليه هو هيج كالوهه

- هنه فلوسي كلهن الك
اني شابعه فلوس ومليت منهن شسوي بيهن جامعتهن المن ؟
فرحتك اغلى من كل فلس عندي

- صدقه لربج
لج انتي شنو ! هم يلوموني من احبج !
وعلي طاير فرح بعيشتي وياج
الله لا يحرمني منج يابعد اهلي انتي

حضنتهه وشميتهه حيييل .. وكمت عدلت ملابسي وهي لبست حجابهه وعبايتهه وقفلنه غرفتنا ونزلنه ...

اهلي استغربو نزلتنه .. كلتلهم نغير جو يومين ونرجع .. وماحجو شي .. همه يحبون فرحتنا وراحتنه يدعون الهه كل صلاه ..

طلعنه لبغداد .. هناك تغدينا بمطعم وطلعنه
للمصور ..
اخذنه صور زواجنه وثقنا احلى يوم بعمرنا
و كعدنا بالجادريه تعشينه وضلينه كاعدين على الهوا ونشرب عصير ..

كاعدين بمكان براحتنه ماعليه العين ..
ابوسهه كل شويه وهي تبوس اصابعي وتخلي ايدي على وجهه وتضحك .. كلتلي ...

- شنو بعد عندك امنيه بنفسك

- الصراحه .. بس اريد الله يرزقنا بطفل
واضل اعضعض بي بدالج

- ههههه ماتلكى مثل خدودي حتى عند ابنك

- اويلييي الله
ابني !.. اويييل كلبي ولج بس اكولهه روحي تفرفح لجيته شلون اذا صار بايدي

- ههههه انيي عن نفسي ابجي
تره حساسه بالجهال خاف متعرف

- وعلي انه هم ابجي جا كلبي يتمناه
وعلي غصه بروحي عليه

- يجي عيوني انته
هسه نتفرغ فد يوم ونروح نسوي فحص جديد
اني هم اريد افحص
جنت متعوده كل شهرين اروح دكتوره
اجيك وضعي
صار هواي مرايحه

- ليش تروحين ! شنو الفحص الي تسويه !

- مو اني عندي لزوجه بالدم من التدخين
فكولشش اتاذى بالشهريه وهي من زمان
تخربط عندي ماتجي الا بين شهر وشهر
ومرات تصير شهرين مره او اربع شهور مره
فمتعبتني واضل  دائما اروحلهه حتى تنظمهه الي
لان جسمي يورم امووت اذا طخيت نفسي باللبس او انام على بطني تشوغ روحي

- ليييش هيج
يابويه وانه اكول مره كيوت ومره عفريت
طلعتي مخربطه هرمونات

- اييييي ديلاا بعد فهمتها صير هم كيوت وياي اووكييي

ضحكت وعضيت ايدهه وكلتلهه..
- الكيوت والله يدلل

بالاحدعش بالليل رحنه لبيتهه ..
ضليت كاعد على القنفه وهي بالغرفه تنظفهه
وتغير الفرشه وراحت سبحت وانه  رحت بدلت وكعدت انتظرهه ..

اجتي لابسه ابيض طويل وكله فتحات
كبل ضحكت بعلو صوتي واشرتلهه تجيني

كعدت يمي وتكلي ..
- كل روحي وعوومري  الك

- يابعد رووحي يافله كلبي
اريد شي هسه بدون تراجع منا ومنا

- أمر تأمرني حبيبي

- اريدج وياي بكل شي هسه بعد ليلتنه هاي
ومتلهف لكل شي وياج لا تزعليني بشي
هذاك البرود مااااريده 

- باوع هي موو شغله برود
بس اني يعني
اخاف مثلا اي جركه تبدر مني وتخليك تفكر بالموزين وتضوجك
فأضل ساكته ماريد صوتي يجيبلك غير افكار

- ماااحب هيج
انه متعود عليج بشي وراسمج بالي بشي
واجي الكاج هيج بارده وياي يخرب واهسي بكل شييي بعد

واذا بالج افكار على هذيج حادثه الكلتي عليهه
فحاولي لا تخليهه ترجع الله يخليج انه نسيت وياج كلشي لا تضلين انتي تذكرينا

- لاا حبيبي
اني صح تجربتي جانت فوووك الصعبه
بس اني قويه وعقلي فصلته عن قبل بعد لغيته من زمان

اني ماخلي باب مفتوح بكلبي يأذيني
كلشي يمسني بجرح اني انهي بساعته
واعيش مرتاحه

- هسه يعني بالج بس الي
كلشي بيج اريده الي
تفكير ماريد تفكرين بشي غيري
مو بس هسه بعد كل عمرنا مايجي بالج شي بس الي .. لعيشتنه .. لراحتنا .. بس هنا تفكرين

- طبعاً هو شكو يسوى غيرك
هو اني شعندي غير ابو الحيااادر وافكرله

اخذتهه بحضني ووصيتهه بس تكلي احبك
بكل شي تحسه وياي ..

طاوعتني بكل شي وفوك الي بنفسي رضتني
عشت وياهه ليله بالجنه ماحصلهه
صارت مرتي ويه روحي مخليهه ماشوف شي بيومي غيرها ..

منين ماادير وجهي افكربيهه ..
ضلينه يومين بالبيت ماطالعين .. اكل نوصي وتلفونات مانفتحهه بس مره الصبح نخابر اهلنه واقفلهن .. والباقي كله عايشين الزواج
براحتنه ...

طلعنه ثالث يوم نتمشى العصر وتعشينه بره
و كانيور ويانه ...
ردت ارجع وماقبلت تريد تبقى تشبع بشوفته
وبقينا هنا خمس ايام يلا رجعنه للنجف ..

انه اجازتي اسبوع .. باقلي منهه يومين
كضيتهه نهار ويه اهلي والليل اعاني بي
بعلاقتي وياهه ..

تكأبت نفسيتي هنا .. جنت مرتاااااح هذيج الايام عايش احلى شعور وياهه
هنا بس الوجع والكأبه وشعور العجز هذا يذبح الصدر ..

ماتهتم لهالشي هي وتضل تغيرهه بالحجي
ىالاحضان بس انه ضلت تدك  بصدري هالسالفه ..

ودعتهه ورجعت لدوامي .. 
هناك خابرت ابو سعد حجيتله الصار
وفهمني ...
هذا كله من الموجود اثره بالبيت
اكو شي تسيطر عليه بس مانتهى مدام المرض بعده مانتهى شي ...

مشت الايام والتفكير كاتلني بهالسالفه
اخويه عزيز رجع مرته وكعدو بيت ايجار
بمنطقه اهلهه ..

خلص شهر الخامس ويوم اجازتي بالبيت
جنت وبيت اختي جانو العصر راجعين لاهلهم وانه طالع بره ماتعشيت ..
من جاي ارجع خابرتهه تحضرلي عشه
بين ماوصل ..

وصلت وكعدت بالمطبخ وهي خلتلي الصينيه وكمشت تلفونهه ووكفت يم السنك تراسل

باوعت للاكل وكلتلهه..
- بويه وين العشه !

- هذا يمك

- يعني موصيج صار شكد واجي الكاج مسويتلي بس طماطة!

- اي دكل اكل هسه شبيهه طماطه اكل عادي

- زين ماسويتي شي وياهه
لو هيج العجز كاتلج !

- ماكو مخلصين كلشي ماعدنا جهال اختك كلشي اكلو مصفرين ثلاجه

-هااا صدك !
زين بويه عليهم العافيه
زلاطه خضورات شي ماكو !

- باوع اني اصلا سويتلك زلاطه بالبدايه
كلت بين مافكر شسويلك عشه بس شنو
اني قررت اسويلك طماطه واني حنت مسويه زلاطه بس طماطه
خبطتهن سوه وكليتهن فراحت الزلاطه اووكييي

- نعلى على غيرتج اذا صدك. 
ولج شبيج وياي هسه انه يوميه متعشي عندج
هنه هاليومين واعوفج واروح
ماتعرفين تفكرين زين واداريني  بيهن !

- اييي حبي عومري انته
عندي مشكله بكد راسي وماكدر افكرر
يلا بس هسه عديها باجر باجر اعوضك
اموواح حياتششي انته فدوه لكلبك بس هسه اووكي

- لا اله الا الله
ذبي التلفون من ايدج وتعالي كعدي فهميني شعندج ! يلاااااا ويامن احجي ولج

-اجييييت
شوف هاي عندي صديقتي مو حاجيتلك عليهه هاي الي مثل اختي يعني

-اي شبيهه

-هاي ثوله طرنه كلشي متفهم
تبط كلبي .. مسحله روحهه بالثول

لك هي متزوجه وعدهه اثنين جهال
رجلهه واحد سرسري وارهابي مسجون
وعمتهه وحده كحبه واضرب من هذني الكحاب الي شاده راسي واركض وراهن
وهي فقيره طينه طييييينه حلكهه متفكه وتنفع بي نفسهه ضاله ملطخه للرايح والجاي

- يواشج بويه
هسه احنه شحاجين ! مو كلنا كلشي سدينه بعد هاي منين طلعت !!!

- شنو منين طلعت غير صديقتي !
تريد اعوفهه ! حتى يحركوهه وينثرونهه رماد ومحد يدري بيهه

- استغفر الله
اهلهه وين ! ماتمشي عند اهلهه

- اهلهه قنادر حشاك يعني
بس هم ثولان مثلهه
اهلهه من الناصريه وفقرا عدهم بسطات بالسوك عايشين منهه
وهذا رجلهه ع اساس جان خريج ومتعين بعقد
واهله ينحلف بروسهم تالي طلعو ازبل الزبايل

رجلهه ابتدائيه مخلص ومكضيهه عربده
ومنظمات ارهابيه لحد مالكطوه وصارله سنتين خايس بالسجون

واهلهه كايليلهه ضلي بيتج الجهال لعمامهم
مو لخوالهم .. وضاله هي وياهم علمود اهلهه فقرا وميكدرون يعيشوهه وبيتهم صغير
وهاي عمتهه مستجلبه عليهه
بسسسس اني دوااااههه
اخذني عليهه باجر خلي اروح اشوف صخام وجهه

- وييييين اخذج !
بويه شدخلج انتي بنصهم همه عايله
بيت انتي غريبه ترحيلهم شسوين !

- باع هذا !
لك بابه يا غريبه
لك هذوله دايستهم بالنعوله
شعبالك هاي اول مره اني اريد اروحلهم
غير رابطتهم بايدي ربط الزمايل
لعد اعوفهه كل هذا الوكت يكفخون على راسهه !!!

- لاااا بربج
هم سايكه عليهم ! وساكتيلج. !!

- شحدهم يفكون حلكهم كبالي
اشكهم بالنص
هاي مثل اختي والي يبجيهه ياااا ويله مني

هسه تاخذني مو .. حيااااتششششيييي

- لاااا حياااتشييي ماكو روحه
ماعايزنا مشاكل خابريهم وفضيهه

-ويييين اخابرهم يفيد بيهم مخابره
هذوله اذا مو وجه بوجه اكفش وانعل
مايجرون عدل وياها

حويدر اني حبابه وياك تضل حباب وياي
وصديقتي اروحلهه اروحلهه
متاخذني اشلع كلبك واخليك تصيح الغوووث
اخذني حبيبي احسن تره تعرفني من اقفل عليك شيصير

- والله عاد انه ماامشي بالتهديد
تريدين تزعلين وتقفلين يطبج مرض

- شنوووووووه سمعني زين

- اي هذا العندي لغوه زايده ماكو
تريدين شي طلبي بادب سوالف التهديد بطليهه
ومرة الثانيه من اكلج سويلي اكل تعوفين الصخامه البيدج وتوكفين مثل الاوادم تسويلي اكل .. مو تلتهين ويه فلانه وعلانه وعايفتني
احير بنفسي

كمت وعفتهه تصيحني تريد ارد عليهه
وانه غسلت وصعدت لغرفتي ..

فتحت اللابتوب وهي اجتي سدته وشالته ع الميز خلته .. واجتي كعدت بحضني ..
- حيداااار شبيك وياااي يعني هالمره طلبت منك اروح هسه شصار

- اي تغيرين اسلوووب طلبج

- يعني اقدملك عريضه! مو كعدت خرطتلك الاكو والماكو عليهه بعد شكو متكول خطيه البنيه تروح بالرجلين وهي فاهيه وثوله

- ولج افهمي ااانه ماريدج تطبين بمشاكل وعياط وصياح كافي هسه عايشين مرتاحين
شكو ترحين للهوسه برجلج

- اييي هسه ديلا عومري بس هالمره
مو خطيه البنيه وجهالها محرومين حتى من الاكل
هاي صخيمتهم لا تنطيهم مصرف ولا تخليهه تشتغل شي وبس ترزلهه وتكفخ بيهه
حتى تلفونهه ضامته بالختله تراسلني وتضمه خاف تدري بيهه عدهه تلفون وتاخذه منهه

- هاااي ليش هيج وياهه

- قندره غير
هسه ديلا نروح ؟

-لاااا

- حبيبييي نروح هم اغيرلك جو هناك
وو نشوف كووني
وهم نروح لدكتوره يلااا عوومررري كوول اي هسه مالي خاطر عندك حبيبييييي

- شكد تطولين يمهم. ؟

- نص ساعه حبيبي مااتاخر ابد

- زين اخذج بس ماريد صوتج يطلع
تحجين بتفاهم وياهم وتنطيهه مصرف وناخذلهم مسواك ملابس اي شي محتاجيه بس بدووون مشاكل

- اي اي اببببد ولااااا صوت يطلع تدلل عووومري انته
فدوه شلون رجااال عندي فدوووه لشعراته رحت فدووه فدوووه

ضلت تبوس بيه وشويه ونزلت .. رجعت فتحت اللابتوب وانه جاي ارتب بيانات من لابتوبي القديم لهذا ..

اجتي جايبه ماعون جبير اسباكتي ركعدت يمي تاكل وتوكلني ..

ثاني يوم طلعنه لبغداد ...
وصلنه للبيت ارتاحينه وضلت دلع ودلال
لليل .. شفتهه هادئه و كلشي تمام
طلعنه تسوكنالهم واخذتهه لبيت صديقتهه

نزلنه وهي كلتلي ..
- عومري انته ضل هنا اووكيي

- لاتتأخرين حتى نطلع للدكتوره

- اي عوومري هسه شغله نص ساعه
حبيبي لا يضل بالك

ضلت هي ادك الباب وتباوعلي وتضحك
ضحكتهه ام السنون .. وانه كاعدلهه بالسياره
فتحولهه الباب وهي لبست جنطتهه صفح
وطبت ..

صرت بس اسمع عياط النسوان نزلت كبل
وضليت واكف باب الشارع واصيحلهه
وهي صوتهه يلعلع ..

نزلت عليهن دك مسبه وهنه يتعايطن
اباوع للجيران محد طلع وكال شبيهن
شويه وهدأن ...

ضليت اخابر عليهه وهي ترفضني
وره شويه طلعلي جاهل شايل كلاص مي
انطاني .. شربته وكلتله يصيحهه ..

وهي طولت جوه وانه مشتول بالباب
طلعت بعدين عليه وكلتلي ...
- نزل الغراض و خليهن هنا جوه بالطرمه

- نتحاسب ..اصعدي بالسياره يلا

هي صعدت وانه اخذتلهم الغراض ورجعت حركت السياره وهي كبل كلتلي..

- كحاااب هنه كحاب مابيهن تفاااهم ابويه انته
هذني اذا مااملص روسهن مايجرن عدل

هنه ميعرفني هادئه ومتعودات ينكتلن مني عااااادي اصلا كووولش عااادي اووكيييي

- يطبهههههن مرررض فوك مرض
ليش تحجيلي شي وتسووووين شييييي

- اييي عومري مو اني

- انجبببيييي يلا تأليييف وجذب انتي
كلتيلي هاادئه وتفاهم وصوتي ميطلع
لج بعدج ماكعدتي وصوتج ملى الشارع

- حوووبي مو اني اعصاب شسوي يعني ردت اتحمل واسكت ولج ريري اسكتي رجلج هنا ميقبل ولج اسكتي بس اببببد
ماكدر

- قنعي نفسج

- وداعتك حبيبي شكد ردت اضبط اعصابي بس هذني صخامات برابيك ماينحملن وحدتهن صايره فيل من العلف وهاي الطينه عايفاتهه تاكل ويه جهالهه قنادر
وهي متلتلات ذهب وحدتهن صماخهه جنه تاير وهاي صايره دوده مابيهه كمشه
مو حقي اهيج اعصاب عليهه

لعد اشوفهن كدامي متختخات ويسوكن بهاي الفقيره واسكت !

- بسسس انه موووصيج ماريد مشاكل

- اييي هسه احنه ماتمشكلنه عادي حوبي اصلا ضيفوني مي وعصير وتفاهمنا وطلعت عادي ياااعوووومري هسه شصار

- همبلي عليه همبلي
يضيفنج ! هنه بقت بيهن روح !

- لك هذني برابيك كلشي ماعليهن وحدتهن جنهه الصل دفرتهن منا كامن منا جابن مي وعصير وكعدن وهنه الممنونات
شبيك يااعوومري تزعل منيييي مو اني حبيبتك

- خاب سكتي سكتتتي

- ديلااا حياااتششششي لتزعل
اصلا شايف هسه شكد فرحت البنيه خطيه
تكولي يذبحوني ويشردون جهالي لو مانتي ضابتهم
شوف مرتك شلون تسوي اعمال خيره للناس

- شلون خير فزع الشارع
هاي منين عرفتيهه ؟ وشلون هذني هيج خايفات وساكتات ؟ خاف يرحن يطلعنهه بيهه هاي الكتله

- هههيييي
شبيه ثوله اني حتى اعوفهن يخيطين بكيفهن ويخربطن وياهااا
لك حبيبييي هذني لازمتهن من خناكهن

شوف اني هاي البنيه عرفتها بالفيس
شفتهه مره ناشره تريد مساعده اذا احد عنده عرف اخوه ابوه ابن عمه او صديقه
محامي ومياخذ هواي فلوس لان هي فقيره
وعمتها ورجلها ماخذيهم سجن وحماها يريد يبيع البيت وياخذ الحصص كلهه اله
وهي وجهالها وحمواتها راح يصفون بالشارع محد ديساعدهم

فاني دخلتلها خاص وخابرتهه حجايه منا ومنا
فهمت مشكلتها .. طلع رجلها ارهابي وعمتها هم متورطه ويه خليه بس ماخذيها ماعدهم دليل قطعي عليها بس شكوك

حجتلي على حماها واحد سكرجي و عطال بطال كاضيهه ضرب بخواته ومعيشهم سم
فلوس امه كلهم تلفسهن للشارع

اني شسوويت ؟؟
عفت عمتها ورجلها بالسجن وجلبت بحماها
اخذته تكتكت وياه .. حصلتله شغل وصناديك مشروب وتلفون .. وكلتله تعوف البيت للبنيه وحصتها متلعب بيهه وتضل تحاميلها واذا سمعتهه مغثوثه اسحب منك كلشي واورطك
بتهمه ماتطلع منهه لو يحضر ابوك من كبره

عاد هو جر عدل .. صاحب مصلحه بعد
ضل موصي خواته على مرت اخوه ومداريهم .. راح وكل محامي وطلع امه من السجن وضل اخوه

هنا بدت المشاكل امه عرمه بربوك ماتكعد وتسكت لازم تنبص بعيشتهه

كامت تذلهه وكل يويمه طاردتهه وماخذه الجهال تشمرهه بالشارع لا ملابس لا تلفون لا فلوس تخلي عدهه وتضل هذيج ادك وتلطم
وتروح تخابرني من الجيران

عيني واني اروحلهه هداده وانعل شيبة عمتهه
اكفش اسب افشر ادفر حتى هدومهه اشكهن عليهه ومحد يفك حلكه وياي ليييش
لان ابنهم حاطته بجيبي

اكوله امك عالت ويه صاحبتي روح تصرف
يروح يهد البيت على راسهه وهنه يخنسن بعد
شوف شوكت هو طالع يرجعن يدكن بيهه الناقصه وارجع اني ادك تلفون عليه وهو يغسلهن غسل

بس لو هااااي الطينه شويه تتحرك واداعي بحقوقهه جان اني بخير

ضاله عيب وعيب امداااهه ثوووله
الف مره كلتلهه عوفيهم وتعالي عيشي وياي بس متقبل .. جهالي وجهالي وابويه وعمامي ورجلي خاف يطلع يبوووو شكد ثووووله ثووووله

باوعتلهه وكلتلهه..
- انتي مافيا شني ؟ كل يوم ترحين تهدين على بيت شبيج !

- اي غير هاي طرنه مدبرهه شسوي اني اروح افزعلهه

- والله عمي انه متزوجلي اسد على غفله يهجم

- اييي حياااتشي يمك اصير كتكوت بس يم الهمج اشغل همجيتي وياهم اووكييي
احبك انييي يلا لتضوج عادي عااادي اصلا تونست صار كد ممتعاركه اووووف وداعتك حويدر احس نفسي هسه صرت خفيفه

-هههههه وعلييي خبله

- اييي ديلاااا اخذني لهاي صخمانه.
داشوف شبيه مابيه هسه تقيس ضغطي يطلع معلك يبووو شلون بيه يبووو

- اخذج للبيت انزلج الضغط ارجعج مسترخيه
ونروح شتكولين؟

- لاا عوومري هذا الاسترخاء للصبح مايخلص خلي نفض سالفه دكتوره وبعدين تدلل

اخذت ايدهه عضيتهه واضحك عليهه صارت حمره ..
كعدنه بالعياده ودخلنه اثنينه ...

فحصتهه وانه كاعد انتظرهه .. اجتي شرحت الحاله كلها وحجينالهه بسالفه الحمل
شرحتلهه فحوصاتي كلهه وهي على حالتهه هم كالت يحتاج وكت علاج طويل والتزام
نظام صحي وتدخين ماكو

طلعنه وهاي كبل كالت ..
- تره هاي صارله كم سنه تكولي تدخين ماكو واني اطلع اشتري من محل الركن باكيتين

- رور مو لعب هي
بعد عدنه علاج لازم نلتزم بكل شي

- ايييي مو بالتدخين ماكدر

- حبيبي نريد طفل كلشي لازم نسوي علموده
هسه مو انه راح اعالج والتزم وياج بعد شكو

- ديلا يلا هسه عود نشوف
اهم شي اخذلي نفس واطفي اعصابي
بعدين نتفاهم

- خلي نوصل البيت واشوف بعد الي تعارض وتضل تماطل

اشتريت العلاج وخلص هنا كل راتبي
رجعنه للبيت وضليت انتظرهه تسبح
وتجي ..

شرحتلهه على الدوا واتفقت وياهه تدخين من باجر ينكطع .. واذا تدخن معناهه تخوني
وماسامحهه عليه ..

قبلت وضلت تراضيني وضلينه مرتاحين سوه
مرتي بعد هنا ماخذ راحتي بكل شي وياهه

وثاني يوم صار دوامي ... رحت داومت
وللعصر رجعتلهه .. لكيتهه محضرتلي غدا ومترتبه .. هي تلمع بكل شي وجسمهه طري منين مااكمشهه اريد بعد ..

ارتاحيت ونمت للمغرب كعدت وهي يمي تبوس بجتفي ... كلتلهه..
- حبيبي لو نشيل هنا بغداد مو احسن
مبين هذوله راح يطولها يلا ينقلوني

- لااا اهلك ميعرفون يعيشون بعيدين عن اهلهم وناسهم

- والله كون اجبرهم ونجي نعيش هنا ونخلص من المله هذيج كلهه
هنا مرتاح وياج وشغلي قريب كل يوم اشوفج
وعلي طكت روحي كل شهر اشوفج شجم يوم

- عوومري خلي نخلص مهمتنا واذا تريد بعدين نبيع البيت ونعيش هنا احسن
بس خلي ننطيهم الضربه القاضيه يلا

- اييي طولت يارور مادري هسه انتي شناويه ؟

- كم يوم حبيبي كم يوووم والكطهم
هسه ماريد ادوخ دماغك التعبان من الشغل
بسوالف المهاميج ذولاك
خليك وياي ريلاكس حيااتششي انتته

-ههههههه خبااال

- اليوم من شفتك راجع بهذني الملابس النيلي
شبهتك بهذا جونكيو الكوري

- ماعرفه .. حلو هذا ؟

- اييي لطييييف حيييل
انته جسمك مايل للكوريين كيك حبيبي كيك
اوووف اوووف ياحبك اووف

حضنتني وضلت تشمشم بيه .. انتظرت راحت المغرب وسبحت بعدين صليت
وكعدنه نتعشى
كلتلهه خلي ارجعج هسه للبيت والحك ارجع هنا وانام واطلع لدوامي صبح

عاندت تريد تضل وياي بس كلتلهه امي خطيه وحدها قبلت وكامت لمت غراضهه
وطلعنه للنجف ...

الطريق كله هي مخليه راسهه على جتفي وكامشه ايدي تبوس بيهه وتضل حاضنتهه

وصلنه للبيت سلمت على اهلي وكعدت وياهم شويه وصعدت حضنتهه واخذت ملابس جديده وهي انطتني بطاقتهه مال مصرف
خلتهه بايدي وباستني بخدي ..

- خليهه عندك حبيبي انته تحتاج الفلوس اكثر مني

- رور ماحتاجها عيني انتي عندي راتبي وكافي الحمدلله

- هو شيبقى من راتبك ! نصه دتعوفه النه
ونص باقي يادوب مكفيك بانزين واكل ورصيد
خليهه عندك اشتري ملابس واحذيه جديده اخذ كلشي بنفسك وضل دائما متكشخ ومحد مثلك ولا احد عنده الي عندك

احب رجلي حبيبي يضل مميز بين كل الناس
صدكني شكد افرح من اشوفك كل يوم ستايل شكل وكشختك وعيشتك محد واصلهه

- رووحي انتي
الحمدلله حالي احسن حال وانتي مخليتني بعيشتي ملك
بس بطاقتج هاي ماتلزم خليهه عندج

- ماريدهه اني عندي فلوس كاش هنا اذا احتاجيت اصرف منهن وانته هم منطيني نص راتبك بعد شسوي بيهه !

هو كلشي عندي صار ملكك خليهه عندك
انته بعيد عن عيني خاف تحتاج شي ومو يمك واضل اقهر بروحي ماوكفتلك
حتى مفتاح البيت اخذه وياك خاف يعجبك ترتاح هناك روح بكيفك بعد هو الك

حضنتهه حيل وتشكرتهه لثقتهه بيه
وضليت ابوس بيهه واشم بوجهه وشعرهه
شبعت منهه يلا طلعت لبغداد ...

بقيت هاي الليله بيتهه نايم والصبح اخذت كل غراضي وطلعت للدوام .. ورجعت لنفس الروتين ..

يومين وخابرني سيف  يكلي ابويه يريد يتزوج ..

.
.
يتبع 🌸