رواية ماء مغلي الفصل الرابع 4 - بقلم Zoka 🌷

..♣️🩸 ماء مغلي 🩸♣️..

رجعت للمره الثانيه خايب ودايخ بأمري
ومن كثر حيرتي بسؤالها ماطبيت البيت
ولا شفت احد من اهلي ضليت كاعد بالفلكه
اتصفن بالشارع و افكر ..

شنو اليسوى ويستاهل تجازفله وياي هالمره الغريبه ؟؟؟

ساعه اخلي نفسي بمكانها وافكر شحتاج واستغلهه فرصه من هيج شغله ؟
وساعه اكول هي ما محتاجه فلوس شنطيهه واقنعهه تجي بالبدايه ؟؟

كلشي جنت افكر بس مال اعوفهه وامل من المحاوله وياهه ماوصلتلهه ابد .. هاي عندي حرب لازم اربحهه .. لو اربحهه واعيش لو ارضى بموتي هذا ...

صارت ساعه ٢ بالليل وانه اتمشى بفرعنه
ماكدرت اروح لبيتنه بهالوكت مالي خلك هبطات اريد اضل مصحصح ومركز بسالفتي

دكيت على ابن عمي السيد حسنين و هو طلع فتحلي بابه .. كبل تمددت بالاستقبال وضل هو كاعد يمي .. كالي ..
- مخلصهه صفنه بصفنه شجاك شخبلك ماتكلي
- سيد بروح اهلك ماتشور عليه ،تنصحني شي
- بسالفتك العوجه النصح هم اعوج يصير
- استغفر الله هم رجعنه
خويه لاتحجي شي عوفني انام
- شجاريلك ماتكلي شجاريلك مبهذل روحك
- هاااه هاي انته تسألني هالسؤال !؟
چا شخلينه للغربه
- لك حيدر مو كلتلك هااااي دربهه اعووج
خلينه نفكر بعقل خويه هالتجفص مايفيد
- يله وينه العقل خليه كدامه يله
احجيلي بي
جيبلي سالفه منه عدله وتفيدنا احسن من سالفتي مال المخابيل
- لا اله الا الله نام هسه ناام والصبح نتفاهم
- لا صبح ولا عصر انته ماعندك حل ومتريد حلي فخصم الحجي عوفني اتصرف وحدي والك الصافي
- حيدر هي مو بس حجي
الي الصافي شني !
غير وياك بكلشي انه
تتورط اتورط وياك خويه احنه اثنينه مشكلتنه وحده
- مدامهه هيج خليك وياي بخبالي زين خويه
العقل هنا لو يفيدنا جان فادنا من زمان وكعد ويانه يم هذا وذاك تذكر ايام ماجنه نفتر من منطقه لمنطقه على هالعقول
شفادتنه !
عوفنه هيج مخابيل ومعذروين بخبالنه زين خويه
- زين هسه انته دبرتهه لو بعدهه تجر وتعر وياك
- بعدهه
-شتريد ؟
- تريد شي يسوى تجازف اله وهذا حقهه
وكلامهه منطقي
- هم تعرف بالمنطق هاي !
- سيد حجايتهه عدله
المره تجي على شنو ؟ تعب نفسهه وتجازف
وتعوف بيتهه وشغلهه ومنطقتهه وتكعد ويه ناس غربه بنص هيج ضيم
غير فد شي قوي يسوى وتجي عليه !
اذا هي شابعه فلوس شكد ماكللهه انطيج تضحك ومتريد
-ادري شتريد !!! هو شكو غير الفلوس
شتقنعها بيمن ! لا هي التعرفلهه عم ولا خال منا حتى لخاطر من خاطر
ولا هي الترضى بفلوس
شلوون حلهه ؟؟؟
- مادري سيد مااااددررري دايخ بالله العظيم مسطور راسي وماعرفت حلهه وين
- نام هسه ارتاح وربك يفرجها
اذا بيهه صالح تدبر واذا مابيهه صالح من هالسالفه وراح تكطع بعد وتصير سبابه لدفع البلاء
-الله كريم

راح جابلي غطوه ، تغطيت ونمت
وثاني يوم اخذت ريوك ورحت لاهلي تريكت وياهم واشوف امي شلون متعوب حالهه
وابويه ماضال بوجهه قطره دم
تفطر كلبي عليهم
ونخيت جدي علي .. نخيته وانه متيقن نخوتي ماتنرد .. واعرف شوكت ما اصيح
' جدي ياعلي المدد '
يجيبني حتى لو بعد حين ..

طلعت لشغلي والافكار براسي مثل الروج
ماهدت .. لحد ما رجعت للبيت بالليل
وضليت كاعد ويه اخوتي والجهال
بالهول ونباوع تلفزيون اجتي بالي فكره ..

كلت هسه انه ليش مدوخ روحي وافكر بالبعيد ، خلي اشوفهه كلشي وبعينهه هي تحكم وبلكي كلبهه يلين وترضى ..

فتحت تلفوني وبديت تصوير فيديو
وطبيت لغرفه اهلي ..
بدون ماخليهم يدرون فاتح تصوير صرت
احاجيهم واصور ..

وكفت يم ميز المرايه ومثبت الكاميرا على ابويه النايم وذبلانه روحه ..
وامي جانت تشرب دواهه كلتلهه..
- علويه مانسوي ثواب لروح اخوتي هالجمعه
- سوي يمه سوي
- توصين جناينج لو اجيب شوي
- لا يمه اشويلك سمجات وجيبهن مابيه حيل
فلانه وفلانه
- وهم تطلع علينه الاكله مزوهره من ايدهن
-اي جيب انته يمه هم خلف الله عليك تذكرهم باللكمه
من يومك حنين على اهلك
- اخوتي هذوله شلون ماذكرهم يشهد الله مامفاركين بالي
- الله يرحمهم برحمته الواسعه
راحو شباب
بنيتي المثل نبعه الريحان كطفهه الموت
وخله المايسون ترابات الغاطياتهه
- امر الله هذا
واخيتنا ضاله بكلوبنا عايشه
علويه هسه ماردت ارجلعج القهر دخيل الله لا كلشي وبجيتي
- يايمه كطعتين من هالكلب دفنت
شيوكف يابجي عليهم !!
ماكول غير حسبي الله ونعم الوكيل هو عالم وكادر على كل شي

رحت يمهه مسحت دموعهه وبوست راسهه
وكلتلهه ...
- علويه خلي احجيلج فد سالفه بالي ناويلهه
- ان شاء الله خير
- خير باذن الله لو صارت
ناوي اتزوج

امي فرحتهه بهالحجايه ماتكدر تضمهه
كبل جرت راسي وباستني وكالتلي..
- يمه عرس المهنى ان شاء الله يصير عرسك
بس يمه ماريد اكسر فرحتك
- ادري ادري مو وكتهه
- اي يعني لاكيلك بنيه يمه كلي
-اي بالي وحده
- منين اهلهه ؟
- بعدين احجيلج عليهه هسه بس ردت اخذ رأيج بزواجي شتكولين ابدا ارتب اموري
حتى منا لوكت ماتطلع دوره السنه للمرحوم
اتزوج
- يمه والبيت شلون ؟ اخاف هم تصير مذابح وكلوبنه خلصانه
- يعني ماترديني اتزوج هنا يمكم
- والله ياساعه المباركه واشوفك انته وعويلك بينا بس اريد راحتك يمه
من هسه دبر امرك واعزل اخذلك مشتمل ايجار وراتبك زين يكفيك وهم نعينك من التقاعد واكعد واستقر بيتك وحيدك
- شلون اعوفكم واطلع ! لا بالله ماطلع الا وانتو وياي
- مانكدر بدون ابيتنا هذا وعينه على هالجهال
انتو هم عرسان واكعدو براحتكم يمه هسه احنه مانطير
- لا علويه انه المره اريدهه تضل يمج اداريج واداري الحجي ماطلع واعوفكم
راح ابدا ارتب اموري واجهز غرفتي وهنا اتزوج
-يمه والمشاااكل مو جزينا منهه
- مرتي عاقله وام بيت معدله مو مثل هالنسوان هجامات البيوت
- صدك ! لو لانهه مطبعه بالك تمدحلها
- هههههه وحك عينج يمه
المره الي اختاريتها مامثلهه مره
-شبيهه مختلف
- كلبهه طيب هو احنه شنريد غير هالشي
-اي والله صدكت
غير طيبه الكلب مانحتاج بالبني ادم
الله ييسرلك هالزواج يابني ويرزقك بالمال والعيال وراحه البال
- بدعواتج علويه

بوست ايدهه وطلعت وانه بعدني فاتح التصوير .. حولته سيلفي وصعدت لغرفتي
من طبيت وشغلت الضوا .. صرت اصور الغرفه وكلت ..
- هاااي غرفتي
شوفي انسان بسيط على كد حالي مالي عزوه بهالدنيا غير اهلي

تمددت بفراشي وضليت مخلي الكاميرا سيلفي واحجي ..
- صارلي من ساعه الطلعت من بيتج افكر بسؤالج ودخت بي
ماعندي امور فخمه بحياتي واغريج بيهه
انه رجال بسيط هاي يسموني حيدر ابو النت
وهم البرج مو مالتي شريك بمحل
انه ادري مايهمج هالحجي كله بس حرت
بيمن اقنعج
كلت خلي اشوفج حياتي اشوفج اهلي
هذوله ابويه وامي شفتيهم
ابويه مريض مقعد وامي هم حالهه تعبان
ماتمشي الا تتوجى واسمعهه تون من ظهرهه
ساعه ماتندار وكلشي بفحوصاتهم نظيف
مابيهم اي عله بس حالهم منتهي
هسه صح شفتيهم بس مو مثل ماهنا وياهم
وتشوفين علتهم من صدك
اكو شغلات ماكدر اسولفهه هيج يرادلهه شوفه عين
ست ريري ماعندي غير اهلي يسوون تجازفيلهم مثل ما جازفت واجيتج
هاي انه كل مااملك همه و شاركتج بيهم

سديت التصوير وشويه ارتاحيت من حجيت هالشي و ضليت شويه صافن شسوي بعد
وكلت اروح لبيت السيد هم اصورلهه
ونزلت بسرعه طلعت من البيت ورحتلهم

طبيت سلمت شربت جاي وكلتله ..
- سيد سويلي طريق اريد اشوف ملوكه

راح وره شويه صاحني .. طبيت لغرفتهه
وكعدت يم راسهه .. شاقيتهه شويه وضليت احاجيهه وانتظرت السيد طلع وفتحت تلفوني
صورت وياهه فيديو وسديته بسرعه

بقيت اتعلل يمهم وكبل ماطلع كلتله ..
- سيد اريد السياره بلا زحمه
- هااا رايحلهه
- ماصبر بعد اريد اخصمهه
- شفكرت ؟
- رتبت خوش حجي اروح احجيلهه ونشوف
-حيدر هاي اخر مره ترجع لهالمكان
- ان شاء الله الاخيره

اخذت السياره وطبكتهه باب بيتنه ورحت نمت .. ومن الصبح بس تريكت ويه الاهل
طلعت لبغداد ...

هنا من اطب هالمنطقه يستلموني تحقيق كل خطوتين .. منين جاي و ين رايح .. المن تريد ! وواحد يضل يتفحص بالسياره خاف مخلي كاميرات ومن اكللهم لبيت ست ريري
يروحون وهم امشي شويه ويجوني غيرهم وارجع لنفس الحجي لحد مااوصل بيتهه ..

طبكت بابهه ونزلت ادك الباب وكالعاده يرحب بيه جلب البيت ويهرج الدنيا بصوته
فتحتلي هالمره وهي وجهه احمر وعركانه
وخاوليهه بايدهه ..
ابتسمت بوجهه وحكيت راسي وهي كالتلي..
- هم انته !
لك بابه روح شجلبت
- نتفاهم هسه انتي مو كلتي كلشي بالعقل
هاي جيتج نتفاهم مثل ماتريدين
- ياتفاهم شبيك انته !!
اكوله روووح بابه ماورط نفسي وياك لو تصبني ذهب هسه مالي خلكك روح احسن مالم عليك المنطقه واخليهم يطلعوك سحل منا
- بس اصبري شبيج
هسه هنه حجايتين
- لك دروح شجلبت مافيدك لزكت خماك لزكت ولي منا بزعتني
- هسه مو جاي احاجيج باحترام
- دنعل ساس الخلفك امشششييي وووولي يلاا روح منا

سدت الباب وطبت ..
ضليت اصبر بنفسي عليهه وصرت اروح وارجع يم بابهه .. ورجعت النوب دكيت الباب وما طلعت .. ضليت بالساعتين انه اروح وارجع ادك بالباب وما تفتح ...

تالي ضليت كاعد بالسياره وصافن على الباب
وافكر شسوي ؟شسوي؟
شفتهه فتحت الباب وطلعت متكشخه على اخر حبه ... وشايله بايدهه الجنطه والمفاتيح
نزلت ورحت يمهه .. كلتلهه..
- بس اسمعيني دقيقتين والله مااخرج
- لك شلحيييت يالكائنات شبييييك شكو بعد شكووو شتريد فضني احجي شكووو
- بس شوفي هالفيديو كلشي بي مااحجيلج شي انتي شوفي واحكمي

فتحت الفيديو وانطيتهه تلفون كالتلي ..
- ماسمع زين هيج
- ماجايب سماعاتي والله
- دتعال خلي اشوف تاليهه وين وياك

رجعت فتحت الباب وطبينه للبيت
كعدت وضلت تباوع للفيديو وانه ساكت بس اباوعلهه ..

خلص الفيديو وكلتلهه ..
- افتحي الثاني هم شوفي

فتحته وشويه وغيرت كعدتهه ..
استرخت وخلت ايدهه وره راسهه وضلت تتمعن بالفيديو الي بي ملوكه ..
كالتلي ...
- هاي ليش هيج مشدشديهه بهالاحمر
- هاي من رايه ابو الفضل العباس
مخليهه للحفظ يعني ابوهه شادهه على راسهه
-هااا وشبيهه هاي ؟
- مريضه ماتمشي وحجي هواي بعد اذا تريدين تسمعيه احجيلج
- هاي بنت من ؟
- بنت اختي الميته هاي اسمهه ملاك
عمرهه ٨ سنين

جانت بيدهه بعدهه المفاتيح شمرتهن على القنفه وكامت وبيدهه التلفون ..
راحت للمطبخ تشرب مي وتباوع بالتلفون
وراحت لغرفتهه وهم بايدهه تلفوني
وانه ضال كاعد وساكت بس اباوعلهه ..

وره شويه اجتي كعدت وكالتلي ..
- شكد راتبك
- ٦ اوراق بالشهر احصلهه من النت واي شغله اسويهه بايدي الي ربحهه اذا تصليح حاسبه او كاميرات
- هم تنصب كاميرات !
- اي والله شغله سهله وتعلمنالهه

ضلت حاطه رجل على رجل وتهز بيهه
وصافنه .. ضليت انه ساكت انتظر ردهه
وهي وره وين يلا كالتلي ...
- اهلك شسالفتهم بالضبط
- يعني رضيتي !
- تكدر تكول اقتنعت شويه
-هم نعمه
- لا صدك احجيلي شسالفتهم ؟
- شوفي هاي قبل ثمن سنين راح احجيلج الصار ويانه
- اي سولف
- جان بيتنا هادي وما بي شي
بيت ساده ناس اطب وتطلع علينه ومايفرغ بيتنا من الخطار
جان عدنا مضيف اكبر من بيتج هذا
خاص بس للخطار
ابويه رجال فقير من اهل الله صايم ومصلي
بعمره ما مسموع منه كلمه تغث
غير ذكر الله ابد ماينسمع من لسانه
وامي هم علويه والمنطقه كلهه تحبهه وتشورهه وهي اللكمه الي بحلكهه تشيلهه وتنطيهه لليدك الباب
احنه جنا اربع ولد واثنين بنات
انه اصغر واحد بيهم
اخواني كلهم مزوجين
خواتي هم تزوجن ولد عمنه وحده كاعده بالكوفه ووحده يمنه بنفس المنطقه اخذهه ابن عمي اللح وتوفت
ارجعلج على اخوتي
الجبير منهم اسمه هادي متزوج وعنده بنتين و ولد .. هذا اخويه توفى هو ومرته

- شلون توفو؟
- هو منا بدت السالفه
اخويه جان عسكري نقيب
وره ماترقى باسبوع صار عنده مثل صرع
ينشمر هيج على غفله وناخذه لدكاتره يعالجونه باغلى الادويه ويصير زين
بس كم يوم ويرجع ينشمر
وجان مياكل اي شي ولا حتى تمرايه يكدر يبلعهه بس مي عايش على المي والمغذيات
مرته هم صارت بيهه نفس هالنوبات بس هاي شنو تشوف يمهه بزازين وتتخبل تضل تصرخ وتملخ بروحهه
جانت تكول كل بزون يمهه تجي بطول الباب
و ضلت منين ماتتلفت تشوف شغلات عجيبه
وتصرخ
اخذناهه لبيت اهلهه بلكت نفسيتهه ترتاح
وهناك هم نفس الشي مخبله اهلهه وياهه
وتصيح رجعوني لهادي
وجبناهه يم رجلهه الي جان بس عيون مفتوحه حتى حجي ميحجي مانحس عليه الا ساعه الساعه جسمه يغتض وينشمر
وهي ضاله مكابلته وتبجي
امي وابويه ليل نهار فاتحين هالقران بالبيت
ويندعولهم ومرت اخويه تتخبل من تسمعه
تصير زركه وتضل ادك على راسهه وتهلس بشعرهه وخواتي جانن يلزمنهه يجتفنهه اتجتف وهي تنفض بجسمهه وتصرخ
عرفناهه ملبوسه جن وامي جانت كلشي تعرف واكثر من النعرفه بس ماتحجي
صار ابويه يرقيلها على مي يشربهه
ينومهه يمه ويحجي وياهه بالهداوه والعقل
وهي فصلت فد مره
ضلينه حتى قران مانفتح نخاف عليهه
امي تبخر البيت تبخرهه تلبسهه حجاب
مافاد كلشي مافاد لا زيارات ولا رقيه
ولدهم دزيناهم لخوالهم حتى لا يشوفون حالهم
لان حتى اخويه الي جان من شهور ساكت
وبس نوبات الصرع تخلينه نحس عليه
صار يصرخ مثلهه
الفجريه يصرخ ويريد يكوم من فراشه ومابيه حيل
انه واخوتي نلزمه نصلي على النبي نذكره بالله وهو مايسمع منا شي بس يأشر هنا وهنا
لحد ما بوحده من الليالي انشمر شمره موت
بحيث جسمه نصين انقسم وهو يضرب بنفسه بالكاع

جانت ايدي ترجف وانه احاول اسيطر على دموعي من اذكر اخويه وحالته وشلون جنت كاعد واشوفه يموت كدامي ..

اخذت نفس قوي وكملت حجيي ..
- دفناه بعد صراع عشر شهور ويه هالمرض
وضلت مرته ماتدري بالدنيا شبيهه مابيهه
بناتهه يجن بحضنهه يبجن ويكللهه ابونا مات
وهي بس صافنه وفاتحه حلكهه جانت امي ملبستهه شلون صدريه الطفل هاي مال الاكل
مثلهه هيج وحده مخيطتلهه وملبستهه بركبتهه
لان على طول لعابهه يسيل وحلكهه ماينطبك
ابد وشعرهه كله واكع حتى حواجبهه رموشهه واكعات ووجهه اختفى بياضه
لونه اسود على زراك
جانت امهه وياهه كاعده الليل والنهار تبخرلهه وتسبحهه بماي مرقى وتنذر لاشراف النبي بس ترجع عافيتهه
و امي رغم هي جانت ترقي للنسوان صارت ادز على غيرهه بلكت تشوف علتهه وين وتعالجهه واشكاااال العلاج والبخورات والاحجبه و رايات الائمه والنذوره
ماخلو شي ماسووه وهي نفس الحااال
وصلت بيهه مرحله تعض بجسمهه
تلزم ايدهه وتعض بيهه الا ادميهه يلا تكعد تضحك وامهه تجر بيهه وتصيح علينه نعاونهه بس ماينكدرلهه جانت سنونها كلهه تغرزهه بنص لحمهه
هاي اذا بالليل غفلو عنهه شويه ونامو من تنام
هي تفز وتضل تعض برجلهه باصابع ايدهه
والي تحس عليهه تتلاحكلهه
صرنا نربطهه ايدهه ورجلهه كل وحدهه من جهه كامت تعض بلسانهه ويضل الدم يكت من حلكهه
صرنا حتى حلكهه هم نخلي بي وصله ثخينه ونشدهه وتضل هي بس تصرخ وتعض بالوصله ..
امهه نضربت جلطه من وره حالهه
وهي ماطولت وره وفاه اخويه باربع شهور
ماتت وامهه وراهه بسنه هم ماتت

- هذا كله من السحر لو من البيت المسكون لو شنو بالضبط ؟

- مادري بالضبط ياهو منهم السبب بس هذوله جانو اول ضحيه لهالشي

- زين انتو مو بيت ساده ورقيه ومدري شنو
منين تجيكم هالسوالف
يعني شلون بيتكم يصير مسكون !

- مادري والله شلون صارت مادري
احنه بيتنه ما بينا واحد مايصلي ويقرا قران
و كله جان مليان ايات قرانيه على الحياطين
وابويه كل يوم الصبح يرش عتبه الباب بمي ورد مقري عليه الليل كله هو يسهر يقرا قران ويرش عتبات البيت منه الصبح
واهلنه نظيفين بشكل وماناكل من غريب
حتى اغاني بالبيت عمرنا مافاتحين بس شلون صار هالشي مااادري

- شوف منو دك الناقصه وياكم وجابلكم هالشعوذه كلهه

- بالله ماعدنه عداوه ويه احد لا قريب ولا غريب اهلي ناس مسالمين واخوتي كلهم صايمين مصلين جانو حتى اليلاغيهم بالحجي يكلوله روح انته وربك احنه مامعلمين نتطاول باللسان على احد

- تطلع السالفه تطلع يكولك هي كل مااطول تجيف وسالفتكم مدامهه طولت هسه تطلع

- بلكت الله
- ايي وبعد شعندك
- بعد عندي هوااي حجي هواااي لليل مانخلص
- هاا بس كولي منو بعد مات بهيج شي
- اختي ومرت اخويه ثاني
- هم نفس المرض والخبال
- مرت اخويه الثاني اي نفس الشي بس هاي ماطولت ووصلت نفس حد هذيج الاولى
لا هاي جانت هم تتشوف شغلات وتصرخ منهه بس ماطولت اربع شهور وماتت
هي خنكت نفسهه لكوهه مزلغه ركبتهه باظافرهه وطابكه ايدهه اثنينهن على بلاعيمهه ماردتهن مرد

- عليهم الرحمه
شجانت تشوف هم تحجيلكم

- تكول بزازين فوك راسهه يكعدن ويخرمشنهه والبزون جبيره بكبر الباب ضخمه تكعد فوك راسهه وتخلي ذيلهه بوجهه وتخرمش بيهه

- وصدك تلكوهه مخرمشه !

- لا مابيهه شي بس جانت المكان الي تأشر عليه مخرمش يطكع اسود
ويصير عدهه نزف من خشمهه واذانهه
كل يوميه وبس تتقيء وتنكلب سوده ترجعلهه ساعه ساعتين طبيعيه وترد تضرب بنفسهه وتركض من غرفه لغرفه واحنه وراهه نريد نهديها نلزمهه ابويه يضل يعلي صوته بالقران وهي تكوم تتقيء دم على حاله وتتخربط
وهم شكد حرنا بيهه بمستشفيات وائمه واكو ساده من معارفنه صارو همه يجون بس يريديون يطيبون علتهه وماكدرو يغيرون شي
ومالحكولهه موتت نفسهه بنفسهه .

- خطيه

- اييي بعد هاي جزء حجيتلج من الصاير ويه اهلي
اريد هسه اسمع منج
موافقه تعاونيني ونشوف بيتنا شبي ؟
بس تعالي ويايه اكو شغلات ماكدرلهه وحدي احتاج وياي مره مثلج

طكت اصابعهه وباوعتلي ..

- اوافق اذا وافقت بشروطي
- بكلشي تريدي حاضر بس امشي وياي
والله تعبت وانه اتوسل بيج تقنعين
- لعد اسمع الشروط حتى اذا وافقت بيهن من صدك نكمل حجي ونتفق واذا لا بعد لا تشوفني حتى خيالك لان بعد مااستخطيك
واشوفك ريري منو بوكتها وشتسوي .
مفهوم !
- اسمعج احجي شروطج شنو

.
.
.
يتبع