رواية ماء مغلي الفصل الثاني والثلاثون 32 - بقلم Zoka 🌷

..♣️🩸 ماء مغلي 🩸♣️..
* adzzon *

اندكت الباب وطلع سيف يفتحهه ..
وكبل صاح لابوه راح وياه .. ورجعو
ووياهم ام سيف شايليهه من ايدهه ورجلهه وخلوهه على القنفه ...

كلنه نباوعلهه وصافنين ..
المره حلكهه معووج وعينهه محوله وفجها كله مديور على اليسره .. اصابع ايدهه معووجه ومطبوكه ايدهه ويه ركبتهه
وبس اتئتئ..

طب اخوهه ويسلم من يم الباب لحد ماراحت ريري وامي جوه يلا طب يمنه ..
سألناه عليهه وكال ..

اليوم ويه صلاه الفجر  ماسمعنه بس صياحهه
وجانت بالحولي فوك يم الغرف بين مارحنالهه لكينه هذا حالهه ..

ماخذيهه للمستشفى عبالهم جلطه بس مابيهه شي وضلو محتارين بيهه وعادل قافل تلفونه
فجابوهه النه ...

انه ماستخطيتهه ولا هتميت لحالهه وسيف نفس الشي بس متجتف ويباوعلهه
عزيز ضل على كعدته ماتدخل بشي
وابويه يباوعلهه ويستغفر الله وكال لاخوهه يروح لبيتهم ...

من طلع انه ضليت احجي عليهه وابويه ما رضى كال حرام نتشمت بمريض

اجتي امي ووكفت يمهه وتفلت بنص وجهه
وكالت ..
- يالحرام بيج حتى هوا الله
هاي حوبه المظلوم والسحر يرد على الساحر ولو طال الزمان وسطرج ابو الحسنين هناك رحت يم بابه  ونخيته وحاشاه يرد مظلوم

ضلي على نومتج هاي ولا منا الي يوصلج
والي يحط ايده ويداريج انه تبريت منه تعلعلي وضوكي لوعه العافيه

حمدوالشكر ربي بردت كلبي واخذت حكي
ويوم الي ان شاء الله اشوفه بالاكبر منهه ونخلص من شرجن وبلاجن بجااه ابو الحسنين

كلهه ساكته لان امي حجايتهه صحيحه
ولوعه كلبنه كلنا هي حجتهه ..

ضل بس ابويه يكول ..
- بويه حرام نتشمت بني ادم وهو عليل ومريض و حرام نخليه بينا ذليل ونتشفى بعازته للعون

لو تردوهه لاهلهه لو يتكفلهه زلمتهه مال تخلوهه هالشكل مارضاهه انه
هاي  مو من شيم ال البيت يتشمتون  بعدو مريض واحنه منهم نسل وعلى خطاهم ماشين
غير الفعل الخير ويه الوادم مايبدر منا

- بويه على هالراس حجيك بس هاي مو شكول رحمه وخير واليزعل مني خلي يزعل
انه ضكت المر منهن و الي مايقدر الزين
ويكيدلي ويكيد لاهلي ماله رحمه بينا

- لاا يابويه مو هيج الحجي
احنه مالنه شغله بيهه بعد بس لا ناذيهه
لا نذلهه وهي عليله ونتشفى بعازتهه النه
حرام هالشكل
انه اكول لو تردوهه لاهلهه لو بعد يتكفلهه رجلهه وولدهه

- كيف عادل بعد هي مرته وهو يقرر
يريدهه يمه ياخذهه فوك ومتطلع من غرفتهه
وهو يحير بيهه
ميريدهه هسه خلي يرجعهه منين ماجابوهه

ضلينه نباوع لعادل وهو يباوعلهه
وهي بس تحرك براسهه وتئتئ وايدهه معوجه اصابعهه مثل مكرفصات هيج ومطبوكه ايدهه بركبتهه يم بلعومهه ومبين رجلهه هم متيبسه ..

سيف كال ..
- عمي انه اكول خليهه هنا وتضل بغرفتهه
احسن هيج واحنه نداريهه

- اخذهه انته وابوك فوك ومالنه دخل بيكم
بعد .. تعيش تموت بايدكم مانتدخل ولا تعتبون علينه بشي

ضل سيف مدنك راسه وراح يريد يشيلهه وعادل بس يتصفن عليهه .. ضل سيف يحاجيه يلا ركز وياه وشالوهه وراحو ...

ابويه وامي ضلو يتعاركون امي تكله ليش تخلوهه تبقى وهو يعتب عليهه شلون حجت ودعت وتشمتت هيج .. وريري اجتي تشاورني ..

- اكولك حويدر
هاي طنطول خاف تمثل ! شو اني ماصدك بسوالف سطره ابو الحسنين

- رور هو صدك اهل البيت ياخذون حوبه المظلوم مو مبالغه من امي تره

بس هاي انه هم اشك بيهه تمثل مادري بعد انتي ضلي عينج عليهه وشوفيلنه صدك جذب

- شايف اذا طلعت تمثل اويييلييي اويللييي
الا اشحطهه واخليهه جوه رجل امك وننزل عليهه دك وكفش والا ازوركهه واشيش امك عليهه واخليهه تتمنى صدك لو مشلوله

- هههههههههه سباااعيه ادري بيج
استلميهه رور بعد صارت بايدج

- ديلاااا اووكيي
اسمع هسسسه انيييي بالي ديفكر بعزوز اخيك

- شبي !!

- اريد اجيبله بنوته تكعده وزن

- ريرررري ايااااااج توصليله

- ههههههههااااييييي حووووبي
منا لباجر احسب عزوز اصبح مراهق
واخليه ينسى عشيره حنفيش ام الگلك

- لج صدك تحجين !!!  لتورطينه يمعوده احنه ماصدكنه نخلص من هالنسوان
بعد تجيبلنه الاضربين !!!

- لك بااااابه بس ونسه شبيييك
واذا اخوك بي زود خلي يكول اريد ازوج واطك حنفوش بمره لعابه والاااا اجيبله لوززه بالباكيت هو يفتحهه

- استري علينه ريري لا نريد لوز ولا جوز ولا كلشي من بناتج

عوفي اخوتي رحمه لذاك الاب عوفيهم خلي يرتاحون من نسوانهم شكو مدوخه روسهم
والله انه لو بدالهم ويصير بيه هيج الا احلف بعد ماعاشر مره
صوت مره بعد ماريد اسمع
بويه لعبان نفس هم ينحملن النسوان !

- عوومرييي هي كل مره مررره !!
دشوف الكيك العندك شوووف
هاي مثلي النسوان التبرد الكلب والجلاوي

- هههههههه وتشعل ابيي بس تفتح الشاجور هذاك تعرفينه مو ؟

- شنوه ! ماعرف اني هالسوالف بعدني صغنونه انته شدتحجي فهمني يااا كووولشي مفهمت عليك

- ايباااه ولج رووور ولج مو كلبي شيب
منج ولج خليني ساكت احسن
امشي روحي شوفيلنه طنطل تحرك لاا ؟؟؟

ضحكت بخباثه وراحت .. وانه فتحت تلفونهه
الكلكسي وفعلت الواتساب مالي وراسلت
ابو سعد (السحار) ....

دزيتله رسايل هواي وحجيتله بيهن على الصار هالايام وختمتهه بطنطل وحالهه..

بين ماانه باقي انتظر جواب منه وصلت رساله على الفيس مكتوب بيهه..
' شلونج بابه '

ترددت افتح رساله لا؟؟؟
ضليت اباوع للشاشه ووصلت رساله ثانيه
' بابه حولت اليوم من الصبح الفلوس
لويش ما دزيتيالي تاكيد  الاستلام ؟؟ '

رحت فتحت البريد مالهه ومالكيت اي رسائل بالوارد ! كلشي فارغ ماكو اي رساله هنا
كلت يجوز بجهازهه الثاني ..

وصلت رساله نوب ..
' بُنيتي مشتاق لجمالك  '

' صوري الاحبها طال حرمانها '

' وحيد بدون صوتك بابه لا تطولين الغيبه '

اقرا الرسايل بدون مافتحهه وحفظت اسم حسابه كلت يجوز احتاجه بيوم ...

اجتي هي وانطيتهه تلفون .. من قرتهن
طلعت بره تخابر ..

صار بالي هنا سؤال ..
اذا هالكد يحبها ومؤثره عنده ليش عايفها
وحدهه.  ! ليش مامعترض على زواجهه مني وعايفهه عايشه وياي هالظروف بدون مايسال على شي ؟؟.

طولت مكالمتهه وتالي رجعت كعدت يمي
كلتلي ..
- عمي يسلم عليك

- عليكم السلام
قريت رسايله مبين هواي يحبج

-اي

- شبي وضعج مو تمام !

ضلت صافنه شويه وكلتلي..
-حيداار اني انانيه ؟

قريت جدية سؤالها بملامحها.. كلتلهه
- اي احس عندج نوع من الانانيه
بس انتي طيبه كلب نفس الوكت

- زين اني من اسوي الشي الزين الي
اطلع انانيه !

- ليش جاي تسالين هيج
فهميني السالفة شنو؟

- هيج ماكو شي انسى

راحت منا وانه ضلت بالي سالفتهه ..
كلت هذا بس لا يريدهه تتزوج هناك يمه لمصالحه وهي متقبل وحاجي عليها بالانانية!!

بس هو ممبين وياهه هيج ؟؟

اخذت عكازاتي ورحت ادورهه .. شفتهه
كاعده بالمطبخ وحدهه وتفر بطرف الشال على اصابعهه ..

كلتلهه..
- ها رور شو فدنوب خانسه  ! تخوفيني هيج شبيج ؟

- دارتاح ميصير واحد يرتاح شويه

- لاا مو انتي راحتج غير شكل .. كليلي شبيج ؟

- اريد كانيور

- صدددك تحجين !!!

- اي ايي اييي صدك لعد صارلي شهرين محرومه منه متفكر انته بيه !
متعرفني الوب عليه !!

شوف ولك حويدر الك هالاسبوعين بالزايد اذا مصرت زين وتاخذني اله .. اعوفك وامشي بعد سحوره وخلصناهه شتريد مني مبقيني يمك !! 

- علكيفج علكيفج بويه شجاااج
ماخلصنه منو كلج خلصنه !

- شكو بعد مو حنفيش حتطلك وطنطول انشلت ووكعت والسحر وفتحتوه شتردون مني بعد !

- يعني مادري بالضبط بس بعد ماامنه كلش
وبعد ملوكه لتنسيهه
هسه انتي شكو مستعجله على الروحه !

- ضجت اريد ارجع لبيتي
اريد اخذ كانيور بحضني مشتاقتله فدمره مداتحمل فراكه اذا اضل هيج
تلكاني ابجي عليه ومااسكت الا هو بحضني

- تسودنتي شبيج!!
هو جلب

- وشبي الجلب ! شو تستهزء!!!
كم مره منبهتك لتحجي عليه
هذا روحي والحجايه الي تنحجي عليه
تدك بكلبي واني اجفص بطنه الي يحجي عليه

- هيييي شبييييج نهديتي
هسه انه شحجيت! 
جاي اكلج متسوى دموعج عليه هيج اقصد

-اووووي حيداااار اسكت فدوه مالي خلك
ضبط امورك ولراس الشهر رجعني لبيتي
وبعد لتكلبني

- هاا هيج ضايجه مني !

- اييي حيييل شبعت من مكابله وجهك
عوفني فد سنه يلا تجي تسال عليه هاي اذا بقيت تذكرني واذا مذكرتني عادي بعد احسن

- ها هيج يعني !

- اي هيج

- زين هاذ هوه بس يجاوبني ابو سعد واشوف شيبقى شغل نسوي وافتح رجلي وثاني يوم ارجعج

- اووكيي

ضليت واكف اباوعلهه وهي دايره وجهه
عني .. طلعت من المطبخ ورحت بره جريت كرسي وكعدت ويه حد الحديقه ..

مادري ليش احس بعد وكت على روحتهه
مو هيج جان بالي حساب لجيتهه ..
اكو بعد بالي هواي شغلات اريد اعرفهه بس ماجاي اركز بيهن ...

اخذتني الافكار وماحسيت الا على ايدهه تدغني بجتفي وتكلي ..
- كوم فوت خلي نام .. اهلك راحو جوه يلا
تره نعسانه

رحت وياهه جوه وتمددت بفراشي وهي بفراشهه شويه جان تكلي ..
- تره صخيمه صدك مشلوله

- شيثبت !

- شفتهه وحده بالغرفه عايفين بابهه مفتوح وسيف وابوه بالغرفه ثانيه سادين بابهم وكاعدين
وهي تبجي وتونون مارحتلهه بس ضليت من بعيد اباوعلهه

- استغفر الله
ليش وصلت نفسهه لهالمواصيل !!
انه متعجب على اهلهه شلون نطاهم كلبهم يجون يشمروهه هنا وميسألون !
لو اخيتنه هاي والله مانخليهه تغيب عن عينه
لحظه

- عادي نفسيات الناس مو كلهه متشابهه

سكتنا بعد ... وهي نامت ضليت انه سهران
مامرتاح ابد ..
اكلب بالتلفون وفزيت على صوت ريري
شهكت شهكه جفلتني بيهه ..

كبل شغلت فلاش وضليت اضوي عليهه واكعد بيهه وهي فاكه حلكهه ومغمضه

جريت العكازات ورحت وكفت يم راسهه وادغ بيهه بالعكاز واكعدهه وويييين يلا كعدت ..

مديتلهه ايدي وكمشتهه وايدهه جانت ناار
كامت وضلت تكلي ..

- لك شبيك متنام انته بومه !

- ريرررري
شبيج !

- شبيه ! نايمه مثل الاوادم انته الي شبيك !

- انه فزيت على صوتج شهكتي من كل كلبج
وصار ساعه اكعد بيج شبيج فاقده ! نومتيش هاي !!

- هاا صدك !! تره مابيه شي بس عركانه

- جسمج حاار مفور روحي غسلي

- تعال وياي وين اروح وحدي بنص الليل !!

رحت وياهه للمغسله جاي تغسل ورفعت راسهه تباوع بالمرايه وعاطت وكبل سدت حلكهه ...

كمشتهه واكللهه شبيج ؟؟ وهي بس فاكه عيونهه ومدمعه  ..

عطت عليهه وهي اخذت ايدي خلتهه على ركبتهه .. واشوف بيهه اثر خراميش
مدمايه ركبتهه بنص اثر الخرمشه
صايره خطين على جهتين البلعوم

صارت عيني بعينهه .. انه ارجف خوف عليهه وهي بس دموع وساكته ...

جريتهه حيل لحضني وضليت ابوس براسهه واكللهه ..
- ميصيرلج شي رور لتخافين والله ماخلي مخلوق منهم يأذيج
وماعوفج وحدج بعد والله ماعوفج وماتهاون بيج

ضلت حاضنتني وامي طلعت من غرفتهه
وتسأل شكو .. وانه بس اباوعلهه ماعرف شحجي ...

اجتي علينه وضلت تمسح على شعر ريري
وتسألهه شبيهه وهي شوفتهه ركبتهه
وامي كبل تعوذت من الشيطان واخذتهه تغسللهه وتقرا على الجرح بركبتهه المعوذات

رحنه كعدنه يم ابويه هم جان كاعد على اصواتنه .. وضل يهدي بريري ويطمنهه ماكو شي ويقوي بنفسيتهه ..

بس انه انعميت خوف عليهه ...
من ساعتهه بعد ماعفتهه وحدهه ..

امي على الفجر تنومهه على رجلهه وتفتح القران وتختم سوره كل يوم على راسهه
وابويه يرقيلهه على الماي ويشربهه ويخليهه تسبح بي ..

وبالليل ماخليهه تنام بالكاع وحدهه الا
يمي على الجربايه وبحضني وهي تغفى انه اضل امسد على راسهه واقرا كل ايه تحضرني ..

طنطل بعد ما وصلناهه ولا نسأل عليهه
بس نسمع عادل يتأفف من حالهه ويريد يجيبلهه اختهه تداريهه يكول لعبت نفسي ماتحملهه بعد ..

وامي ماترضى احد من اهلهه يعتب بابنه
وكل ساعه عركه شكل بينهم ..

سيف عايف الفوك ولا يوصله ومكابلنه وكاعد النهار كله على التلفون لو يروح لبيت السيد يضل يمهم .. وبالليل يصعد ينام بغرفته ومرات ينزل ينام يم اهلي ..

عادل اسبوع واحد ماتحملهه واخذهه لاهلهه
وضلو الجهال حايره بيهم ريري وامي
وعزيز هم جاب جهاله وضل البيت لريري
كله عليهه ...

امي استلمت الطبخ وريري تداري الجهال
وتنظف وتغسل ملابس وعينهه على الكل

بيت اهل ام فاطمه ( حنفيش) كل يوميه
يدكون تلفون على عزيز يعاتبوه على بنتهم
وهي مريضه وميسال عليهه وصارله بالشهرين  عايفهه ويحاججوه بالطلاك
وهو يضل ساكت
واخر شي يكللهم المره ماريدهه وكلمه منا ومنا يسد الخط ...

ابو سعد مارجعلي خبر ولا شاف الرسايل

طبينا محرم ... ٢٠١٥... نص شهر العاشر ..

الجهال بدت مدارسهم وحملهم زاد على ريري ... 

هي تجي تفرغ كل اعصابهه يمي وترجعلهم بالعيني واغاتي ..

تكعد  من السته تحضر لكل واحد علاكته بيهه اللفه والعصير والنساتل والف تدحسه وياهن
ومرتبه جنطهم يم الثلاجه تخلي بجنطه كل واحد علاكته .. وبطل الماي تلفه بجيس صغير وتخلي بالجهه مال جنطه ..

وامي توكف تسوي الريوك وهي تصعد تكعدهم وتضل ويه البنات تلبسهن وتمشطلهن
والولد ترتب قمصانهم و احنه ولدنا وكح ماينجرعون اضل بس اسمع صياحهه عليهم
حتى يسمعون كلامهه ..

وتنزلهم شحط حتى يتريكون .. وانه كاعدلهم بالمطبخ ...  العنده نشيد  حفظ اكله يقراه واسمعله وهو ياكل ..

والعنده تعاريف وتعاليل هم اسئله بيهن ويضلن البنات يمتمتن بالجواب وانه انتظر اسمع الزبده وينهه ..

ولحد ما ينزل سيف وياخذهم وياه ويطلعون احنه عدنا انذار ..

كل مايطلعون تجي ريري تكعد يمي وتخلي راسهه على جتفي وتكلي ..
- فركلي ولك انهلكت من صخام بعيونجن يامهات السحوره
مايعرفن بس يخلفن ويذبن
سممم كون ببطونهن المدوده

- جا انه شكول الليل كله ادرس والصبح يفرمتون عقولهم
ولج بويه انسليت
دخيلك ياعلي شلون ينجحون جانو !

- بالسحوره اكو غيرهه
فرك ولك فرك ااااخ لك هذا كرفش جني على امه يحب  الطيانه

كل يوميه اجلف قميصه من يرجع وبنطرونه مطين سابح بالطين
عفيه ولد ماتورث من امك بس الوصخ

انه وامي نضحك على سوالفهه .. امي صارت عاديه عدهه سوالفنه وتحب كعدتنه
و روحهه وعقلهه كله ويه ريري

تخاف عليهه من كل شي .. اذا ريري تريد تصعد لغرفتهه تروح تصعد وياهه لو العصريه تخلي سيف وياهه

والفجر حتى لو احنه نايمين ومتحاضنين تجي
يمنه تبوس بروسنه وتضل تندعيلنه
مرات اشاقيهه واكللهه عوفينا ماخذين راحتنه بالنومه لترحين تشوفين شي منا منا وهي تضحك وتكلي كلشي ماوراكم انتو بس محاضن حافظتكم واعرفكم من عوينكم

امي جانت كبل ماتخلي احد يجيب توزيع
ويفتر بالجداري على البيوت التطبخ بمحرم
اذا احد يجيب لبيتنه ناكل واذا لا محد يروح

بس هالسنه لخاطر ريري لان هي كلتلهه ما ضايكه اكلهم فخلت الجهال يجيبون ..

وتالي  كضنهه علينه غدا عشه قيمه ، هريسه .. اذا كلش يردن يغيرن فاصوليه
مال توزيع ..

انه احجي عليهن هنه بعد طباخ ماشافنه بس كاعدات وجرش سوالف لو يخيطن ..
وهنه قافلات الا يخلص كل التوزيع يلا يطبخن ..

وامي تكلبهه عليه محاضره دينيه
وتطلع منهه ..

وريري متعذرتلي بماعرف اطبخ عوفني مرتاحه ...

صارت ليله العاشر .. وهاي ليله المحيى
والكل سهرانه .. الجهال كلهه بالموكب بره براس الفرع واخوتي وامي  وحتى سيف بالامام علي (ع) ..

بس انه وابويه وريري ضلينه بالبيت ..

ابويه عايفيه بغرفته يصلي واحنه بالهول كاعدين ناكل لبلبي ..
سألتني ..
- اكولك
هسه اني صار عشر ايام استجوب امك على سالفه محرم
وخوش حجي حجتلي
بس ضلت بالي سالفه

-شنو؟

- شوف طبعا اني سامعه بالحسين بس ماعرفه
عرفت هو ابن امير الخلافه المظلوم بس مادخلت بي يعني هيج بس مجرد طلع اسمه ويه سيره الحياه عن الامير علي وهيج عرفته

- اي

- اي اسمع ناس يحلفون بي وانته منهم طبعا
خابصني والحسين والحسين بس ماثارني الفضول اعرف شبي مابي

بس من قبل جانت شغله بالي على محرم
اكول شمعنى هاي الناس الزينه والموزينه
هيج وفيه وتهاب شهر محرم !!

يعني اني عندي هناك من يجي شهر محرم الملهى يعزل .. المحلات للشرب نصهه تعزل
والي يبقى مفتح لازم يلزموه  ينعلون اهله
فيضل يفتح بالختله

- ايي

- والزبائن شكد اكولك يعني ٩٠ بالميه
يطكهم الشرف بهالشهر .. حتى بالتلفون منهم ينسحبون ...

يعني ناس تكلب نفسهه كلاب علمود شهر !
جنت اكول شبي هالشهر ! شكو حتصير القيامه !
تالي طلع شهر حزن معظم عندكم

- عند الامم كلهه مو بس عندنا

- اييي هنا هم اجيك بسوال اصبر خلي اكمل هذا

اي ف شنوو .. اني استغرب قمه الوفاء والاخلاق الي تصير بالناس بس هالشهر وبعدين ينكلبون طناطل مثل الجماعه

يعني فهمني همه من شنو خايفين هيج ويجرون عدل ؟

- هاااا شوفي اجيج وحده وحده

اول شي الامام الحسين عليه السلام تارك بكلوبنه محبه وثار

هسه انتي اي شخص تحبيه ويموت مظلوم
ينقتل بابشع طرق لازم يضل ثار بكلبج على الي كتله مو صح ؟

- اهجم الدنيا على راس الكتله اني ماسكت واحط ايدي على خدي وانتظر معجزات السماء 

- اهاا زين جا  شلون اذا هذا امامنا وابن امامنا وابن نبينا وحبيبنا ورحمه الله بالارض النه ويموت محروم وعطشان وغريب
وتنسبي العيال واتتذبح العشيره والاصحاب وكلهه ظلم بظلم

يعني هي ايام ماجرت مثلها بالبشريه
من جيل لجيل ظل هذا الثار يتوارث
بكلوب الناس محبين اهل البيت

فهذا الثار من طقوس احيائه وتجديده
هو نصب العزاء .. يعني من جاي ينصبون مواكب والناس تترك اشغالهه واعراسهه وحفلاتهه و تلبس الاسود وترفع الرايات السود هاي كلهه شنو ! جاي نجدد الحزن ونجدد الثار ونقيم العزاء لاهل البيت الي استشهدو هاي الايام

فهذا الوفاء لشهر محرم هو احترام لتضحيه هاي النفوس الزكيه الي راحت استشهدت حتى احنه نعيش على دين الاسلام

من يوم الي ضحو بي للاسلام ضلت الناس
تفكر بمصابهم .. مصابهم مو هين وينسي
مصابهم فتح عقول وكشف بني اميه على حقيقتهم بهذاك الوكت

جانو مستولين على الاماره ومستضعفين الناس وعاكسين صوره الاسلام كلهه
كدامهم .. بس قتل ال بيت النبي سوه فاجعه عدهم خلاهم يشوفون شكد ظلمه وكفره الي مدعين الدين وماخذين السلطه عليهم

هذوله همه صار منهم وبيهم الي يخطط لاخذ الثار ويتعاون ويه هواي اشخاص الهم بطولات بوكتهه ..

فالمعنى هنا هو تجديد العزاء وتجديد الثأر والااااهم هو تعزيه امامنا الحجه عجل الله فرجه الشريف ..

- شوف هسه انته دوختني بالازيد
طيرت حتى هذيج الاسئله العندي

منو هذوله اهل البطولات من اخذ بالثار !
شلون ياخذون ثار ! ياحجه هذا ! هم بعد عدكم ائمه ! شو امك تعددلي ومايخلصون !

- ريررري
عيني انتي ليش ما تجيبين ورقه وقلم وافهمج انه احسن

-هااا هيجي سالفه ادوخ !

- اي الج كلش ادوخ
كومي جيبي واليوم نحييها سوالف
والله لو رجلي تعيني جان اخذتج ورحنا هسه لضريح امير المؤمنين

شايفه شلون اجواء هسه هناك تبجي وعلي تبجي

الشبر الواحد ماتحصلين  محط رجل بي
الا بالشافعات

- زين شكو هيج ليش شدعواهم !
يعني اووكي تحبوهم وكذا بس اوفر
انطو لنفسكم مفكه هسه همه طايرين !

- ولج بويه انتي ماعندج هاي شراره حب اهل البيت
لو تنحط بصدرج شراره حبهم بعد تضلين مكابله حتى التلفزيون وتبجين من تشوفين المزار وانتي مو هناك يمهم

انه هسه اتمنى لو بس اروح اوصلهم وبس اسلم عليهم واعزي امير المؤمنين وارجع
وعلي روحي ممروده وماكلني القهر لان كاعد بالبيت

انه وييين كل سنه من يوم الثامن انه هناك بضريح الامير ... عدنا مواكب وننزل دك زناجيل ونرتب للمجالس وليله العاشر
بعد هاي انه هناك اضل واكف ويه جماعتي
فوك على االرافعات مال كاميرا ..
ويه جماعه التصوير ..
لان اذا توكف جوه تنداس لو تاخذك الروجه تشمرك شوف فوك منو ..

اذا انته مو من اهل الموكب الي يدخل للضريح تروح بالرجلين ...

فهناك مسنترين مكانه نضل واكفين نباوع
و ويه كل قصيده لموكب يجي احنه تلكينه مندمجين وياهم ...

وهااا طبعا احنه كل شويه نريد نوكع
لان هذوله من يطبون يرجووون الكاع رج
تعرفين شنو رج ..

وعلييي لو كلبج جلمود وصيهونيه انتي
هم اذا اوكفج هناك عشر دقايق تفقدين بجي
وكلبج غصب ماعليه يحن لاهل المصاب

هذوله  معجزتهم من الله هو حبهم بكلوبنه وهمه مفاركينه من سنيييييين واحنه حتى زمنهم ماحضرناه بس صرنا اكثر محبه بيهم من كل جيل ومن جيلهم نفسهم ماحبوهم مثلنه

انتي ماشايفه الجماعه هناك شلونهم
مسودنين وعلي طابين نازعين عقولهم
بس لطم وبجي وبالهم كله بس ويه صيحه
' ياااعلييي  حيددددر '

- معقول هيج اكو لو تبالغ احجي الصدك

- هسه انه ماحجيلج راح اشوفج بعينج
بس اول شي جيبي ورقه وقلم حتى تفهمين كلشي عدل

راحت كبل جابت دفتر وقلم وكعدت يمي
ضليت اكتبلهه من النبي ادم الى ان ختمتهه بالامام المهدي (عج)  ..

وعدتهه عليهه اكثر من مره .. ورسمتلهه اسهم ان هذا ابن هذا وسويتلهه مثل الخريطه
بس رسمت بيهه نجف وكربلاء ..
كل وحده منو بيهه مدفون ..

بعدين من فهمتهن وربطت عندهه .. طلعتلهه باليوتيوب بث مباشر بكربلا لليله العاشر وضليت اسولفلهه عليه..

وراهه طلعت مال نجف .. كلتلهه..
- شوفي هالليله بالنجف اقوى الاجواء من كربلا

-ليش مو هناك اهل الانه

- اي صح همه اهل المصاب هناك بس احنه اهل نجف محد يلحكنه بالمواكب واجواء محرم
لا بطبخ لا برواديد لا باللطم كلششي احنه
مرتبه اولى بي

وهنااا بضريح الامير تقريبا ٨٥ بالميه نجفيين
همه الي يحييون العزاء هالليله فيصير الجو قوووي هنا لان بس لاهلهه وهمه بدون شي حاميين نوب ينجمعون كلهم فد مره
يكلبوهه اضرب من كربلا

كلتلج يرجون الكاع رج .. الصوت مال دك صدورهم يرج بالضريح وهو شكد مفتوح وعالي بس تحسيه كله جاي يدك مره وحده براسج

اهل كربلا هم مضبوطين بالمواكب بس شنو
تصير عندهم خربطه .. لان كل المحافظات تلتم هناك وناس تجر وناس تعر مو كلهه تمشي بترتيب .. والي يجون من المحافظات بيهم تعب ما يدكون مثل الي همه بعدهم بحيلهم ومامتعبهم طريق ولا سهر هناك

وهم النجفيين شغلتهم هاي ..
احنه محرم روح كلبببنه
احنه هنا شلون اهل صنعه .. هاي صنعتنا محرم منين ماديرينا نبدع بي

- بس تره واوووو
كولشش واووووو

المكانين عجييييب تدري هسه اني احس فرحانه

- هاا يالله شنو السبب

- لان عرفت شديصير لو شايفتهه قبل جان ضجت لان مافهمكم
هيج احس نفسي منبوذه او مو عايشه مثل الناس

بس هسه من شرحتلي كلشي فهمت هواي شغلات صرت احس اكو جزء بدأ ينملي عندي جان فرااااغ تااام

اني صح ماحبهم مثلكم بس يجوز بعدين اضل ابحث عن سيرتهم واحبهم اكثر منكم

- نافسيني بمحبتهم وصيري اضبط مني بكل شي بالدين
انتي تستاهلين الزين ومكانج مو الج والله

ضحكت وباستني بخدي .. وخلتني اضحك
واباوعلهه وهي بس تبتسم ..

عدلت شعرهه وتكلي ..
- يلا شغل خلي نشوف بعد شكو ماكو

- تعالي بحضني واشوفج بعد

- ماااا شكو هسه وكت حضن !

-وانتي شكو هالكد تضوجين من حضني !

-انته شكو هالكد تحبه !

- ااانه احبه كيفي احبه
هيج ترتاح نفسيتي بي .. انتي يضوجج ؟

- اييي يعني

خليت ايدي على جتفهه وجريتهه الي وضليت مخلي راسي على راسهه واطلعلهه غير فيديو

- شوفي هسه راح اشوفج التطبير

- اييي بله شوفني امك تحجيلي حيداار يطبر بس مافهمت

شغلتلهه الفيديو عن التطبير وشويه وهي وكفته وكلتلي ..
- لك هاااي شنووو. !!!
تذبحون نفسكم !!! عزاا

- لاا رور مو ذبح هذا تطبير بس هيج شكه راس بالقامه شويه

- لك يا شويه دشوف الولد سابحين بالدم
هاي انته هم هيج ! 

- اي جا ربي وحد !
شوفي هاي الليله الولد كلهه كبار وصغار
تلبس الجفن الابيض .. يعني هيج شلون
الصدريه يصير وينشد من النص وينشد منه شويه وصله بالراس ...

وكلمن عنده قامته يضل يدك بيهه على بدايه الراس بس مو بالحافه الحاده لا هيج بالعرض
ويه اللطم والقصايد على نمطهه تصير الدكه بيهه على الراس هاي شنو هيج يخدرون المكان حتى الصبح من يضربوه مانتاذى وكبل يطلع الدم

- عزااا تره ماله داعي يعني شكو تجرحون نفسكم وحتى الجهاال عزاا جهال شكو مطبريهم !

- بويه هذا التطبير اصلا بي فايده للجسم
هذا مثل الحجامه بس اكو ولد الله يسلمهم يفقدون ويصير جرحهم الا خياط يلا يوكف الدم

احنه نطبر بس بعد مانلح على المكان نعوفه هو ينزف لحد ماينشف من وحده وكافي

اكو غيرنه لاااا هذاك يفقد من يسمع المقتل الصبح و ويه جو المواكب بعد ينهار يضل يعيد الطبره براسه اكثر من مره ويصير عنده طبرتين او طبره غميجه ... وهذا هو الي يسبح بالدم

- هااا زين هو شلون هيج يفقد ! ميتخربط من النزف

- اي اكو منهم يتخربطون بس الاكثريه لا
لان كبل يركضون وراهم بصياني الحلاوه
البقلاوه والزلابيه هاي بس يكمل التطبير
ياكلوهن ويكعدون يتحضرون لركضه طويريج

- اكولك صبر وحده وحده

هسه دفهمني شكو هيج انتو تفقدون وتطبرون بنفسكم ! بعدين فهمني طويريج شنو منو وين !

تره اني مو يم محرم كوولششش
غير الحجي على السبايه الي حجته امك ماعرف بعد الا الي زيدتهن بالحجي انته هسه

- ماشي ماشي
شوفي سامعه بالتصوف ! او الدروشه ؟

- صوفيين اعرفهم

-ايي والدروشه هاي تقريبا يعني نفس شي
هذوله الدراويش من يقيمون الذكر بعد هم يفقدون يعني احساسهم يصير بس بالله ماعليهم بكلشي يمهم حتى جسمهم مايحسون بي

ياخذون الحربه يدججون نفسهم بيهه ومايحسون بشي ولا ينزل منهم قطره دم

هذوله جماعتنا هم هيج على حب ال البيت
وحب الحسين انتي شايفه شنو يعني حب الحسين بكلب بشر !

نار هاي احنه عدنا محبته نار بكلوبنه شرارتهه ماتنطفي واحنه متعودين على المواكب وتالاجواء الحسينية من صغرنا
فهالشي متشبع بينه

من ينقري المقتل مال واقعه الطف واحنه بالامام والمصاب حاضر بينه كأنه هسه جاي يصير ونعيش المظلوميه نفسهه تنعاد عبالك كدامنه .. بعد مااايضل اي شعور بينه

الي يطبر ويلطم بنفس الوكت هذا تلكيه فاقد مايفكر بشي بحياته بس مقهووور ذابحه الحزن على الامام ... نحبه احنه مو بانصاف حبه عدنا ..

اذا ينصاح هناك ياحسيييين احنه كلوبنه ترجف جلدنه يكزبر والي مايحس برجفه بضلوعه من يصيح ياحسين بعالي الصوت ويه البقيه هذا مو حُسيني

لا تعتبين ولا تستغربين من المطبرين هذوله مجانين عشاك للحسين ..

التطبير اجه عن السيده زينب عليها السلام
هي ساعه ماعرفت اخوها انذبح طبرت راسهه اكو روايات تكول بعمود الخيمه واكو تكول بحافه الهودج الي على الناقه
بس الاكثر صحه هي بعمود الخيمه والله اعلم

اي فمنها طلعت شعيره التطبير وهم احنه نستذكر بيهه طبره الامام علي (ع) لان هو من مات مضروب براسه فهذا على هذا نجمعت عدنا وثبتت شعيره التطبير

وانه هسه موصي هنا اثنين ولد عدنا بالمنطقه
الصبح يطلعون ياخذون صياني مال الحلويات يطلعون بيهه لموكبهم هناك
وصيتهم يمرون عليه حتى اروح الحك بالتطبير وياهم

- عزاا شيوديك انته مو مريض ! اكعد واسكت

- وااالله ماكعد جا هي مره كل سنه واضيعها !!

مو كافي ضيعت هالايام كلهه وضيعت المحيى هناك ولا خدمت بموكب لا حضرت مجلس ولا اكدر اشارك بالركضه ولا اروح ازور الائمه وهم ما طبر !!!

وعلي انجلط ماتحمل كلشي ماشارك واضل اتصفن .. كلبي يوجعني وعلي

- يبووو زين شلون بيك خاف تتخربط
هو انته شضال بيك وتروح اطبر !!

- اعيش وعلي احتيي من جديد لتخافين
ماسامعه هذا الشاعر محمد الحجيرات يكول ..

انه مااملك وجودي .. كل وجودي بين ايديك
شلون يصير وانه ملكك .. ابخل بدمي عليك

ترديني اعز الدم على مولاي !

- اووكيييي .. زين تاخذني وياك ؟ اريد اشوف من قريب

- لااا والله لو ما رجلي جان اخذتج من هسه
بس هيج ماكدر صعبه كلش احير بيج احير بروحي شلون امشي

بس افتح رجلي اخذج لكل الائمه وحتى بالاربعينيه هم نطلع مشايه انه وياج وناخذ ابويه وامي ويانه واشوفج احلى اجواء

- اييي اوووووكييييي

ضحكت واشرتلهه على خدي وهي ضحكت بصوت عالي وباستني ..

صرت اشوفهه ركضه طويرج واحجيلهه عليهه وبعدين تمددنا وفتحت بالحاسبه تصوير واقعه الطف وضلينه سهرانين عليه وانه كل شويه اوكف الفيديو واحجيلهه شي عن هالمقطع وللفجر احنه كاعدين ...

دزيتهه لبوفيه امي تجيبلي القامه والجفن
و ضليت اتحضر للتطبير وهي مكابلتني
وتتفحص براسي تدور مكان الجرح القديم

طلعت ويه الولد وهناك ردتلي روحي
صح ضال كاعد على جهه يم الموكب بس
مرتاح من انه قريب وياهم ..

والولد رايح والجاي يصيحلي سلامات
المطبرجي اجاني على كعدتي وضل يكلي معذور انته ومريض بس انه كلتله

-مريض برجلي راسي مابي شي اطبر

طبرني وانه مخلي كلينس على خشمي
وريري كل شويه مخابرتني .. من طبرت هم شويه وخابرتهه كلتلهه وهي توصيني اخذلهه صور ...

صورتلهه فيديو وجمعتلهه حلويات وضليت كاعد اخابرهه واحجيلهه كلشي كدامي اوصفه الهه ... حتى اهل الجاي .. حتى الرايات احجيلهه شجم وحده هنا كدامي وكل لون المن ينتسب ...

رجعتلهه ب ٣ الظهر وهي كبل تلكتني تتلمس بوجهي وتضحك تكلي ..
- لك تخوف بس حلو

ضحكت ودنكت راسي على راسهه لطختهه بالدم وكلتلهه..
- طبرتج بدمي بعد شتريدين دم حيدر السيد هذا

- هههههه لك وشل دمك دتعال اكعد مدايخ ؟

- كلشي مابيه اصلا مرتاح فدنوب بس انه اكلج معوز حضن ييي جا انه ماجذب بكلشي  صريح

- ههههههههههه لك هسه ابوك يطكني برزاله
ثانيه على ضحكتي

- هااا شسويتي وترزلتي بالاول

- شسويت بس اجيت اعزل و جبتله الريوك
وهو رزلني يكولي ميصير لا تنظفين ولا تسوين شي حتى اكل ميصير تسوين
ولحد هسه يلا اكل هاي قبل شويه يلا حط لكمه بحلكه

- هاااا اي عادي رزاله ع الماشي هاي
مو صح ميصير تلتهين باي امر لان هذا وكت حزن

-ديلاا فهمت

طبيت جوه وهي محضرتلي ملابس كبل مااغسل كلتلي خلي ناخذ صوره هيج بالدم

واخذنه صور سوه يلا غسلت وبدلت
وكعدت اكلت وياهه هريسه .. اثنينه نحبهه بالملح ماعانيت وياهه بهالشي ...

وكعدت اشوفهه التصوير وهي تسألني على امي شوكت ترجع .. وكلتلهه باجر لان هالليله
تحييها مواساه للسبايا وهم تروح تزور بكربلا

نامت يمي وللمغرب يلا كعدنه على صوت ابويه .. وبهالليله شوفتهه فلم السبايا وهم حجيتلهه عليه .. وثاني يوم من الصبح امي واخوتي اجوي ..

امي كبل لا تسبح ولا تاكل حطت جنطتهه وصاحت ريري .. وضلت تفردش الغراض الي بيهه بنص الهول ...

انطتهه سبحه وتربه وازار صلاه و
علك شدته على بطنهه وتكللهه ...
- زورته الج ونخيت ابو الحسنين ونخيت ابو عبدالله الج وردت الله يرزقكم بوليد ويملي حضنكم و يفرح  كليبي و حلفتهم بالعزيزه زينب وغربتهه
وان شاءالله مايردونا

ضلت ريري فاكه حلكهه وتباوعلهه وترجع تباوعلي .. حيرتهه نفسهه عندي
انه ادري كلشي مايضبط بينا .. فتجاهلت الحجي كله وضليت ساكت ..

ردت امي انطتهه كلاده طويله وبيهه اسم ياعلي فضيه .. وريري كبل لبستهه وبوست امي تشكرتهه .. وامي توصيهه تصلي وتلتزم بصلاتهه وريري بس تكول اي ..

انطتني امي دهينه وعلك مزور .. ضليت اضحك واكول لريري..
- ولج اخذتني مكاني عند امي
جانت حصه الاسد بس الي

هسه كلشي ماحصلت هالدهينه هسه تجي تاخذهه وتوزعهه الكم ومنطيتني خيطين من العلك ! والله وووكت

- ههههههه حيييييييل صغيرون انته وتدلل على امك كافي ماشبعت

دنكت عليهه شويه وكرصتهه من ظهرهه
وضلينه واحد يخبث على الثاني ونتناكر
لحد ماامي دزتها تسويلهه اكل يلا راحت
وهدينا...

بفجر هذا اليوم ريري نايمه بحضني وهم جفلتني بشهكتها ... وهالمره زادت واكثر من مره تشهك وانه اضرب بوجهه اكعدهه وهي ماتكعد ..

اخر شي شهكت وجسمهه نرفع شويه ورجعت هدئت ... ضليت اهز بجسمه وهي كعدت ...

تباوعلي وخلت ايدهه على حلكي ونزلتهه على ركبتي ورجعت غمضت ..

شكد ضليت احاجيهه واضرب وجهه وهي ماتكعد ... ضليت اصيح لامي لحد مااجتي
وحجيتلهه حالتهه وريري فاقده امي تغسللهه وتكعد بيهه وهي ولا حس ..

اباوع لركبتهه مابيهه اي اثر هالمره
بس ضليت اتفحص جسمهه .. زندهه ويم اذانهه وماكو شي ..

بس النص بين صدرهه طكع على ثوبهه دم
لما جريته واشوف شخوط شخوط مسطرات
على طول صدرهه لحد بدايه بطنهه هاي كلهه شخوط مايله ومدمايه ...

ضلت امي ادك على صدرهه وتنخى ياعلي
وانه كامش وجهه وبس اصحي بيهه وايدي ترجف ماعرف شسوي واحميهه ..

صار وجهه اصفففر  وشفايفهه بيضت وخفت لا بعد ماتتنفس زين
ضليت اصيح على اخوتي وامي لبستهه الدشداشه والحجاب وكبل اخذناهه للمستشفى

انه العن هالرجل الي ماعانتني اليوم وخلتني متبهذل .. اجر بيهه جر يلا كدرت الحكهم وين مااخذوهه ...

ضليت بس ادعي ربي يحفظهه هي مالها ذنب بشي ماريدها تنصاب باذى بسببي ..

خلولهه اوكسجين ونفس الشي حالهه ..
خليت دكتوره تكشف على صدرهه وراهه
كالت يسون تنظيف للقصبه الهوائيه

انه وامي واخويه عزيز وسيف كلنه واكفين نندعيلهه ... والدكتوره مخبوصه بيهه

ماانسى هاللحظه ليوم الدين ...
انه واكف بالعكازات ومغمض وبالي بس يمهه اندعيلهه وسمعت صوت الدكتوره
فتحت عيني باوعتلهه وهي باوعتلي بنظره
يأس وحزن وانطتني جيس شفاف وراحت وهي ساكته ....

الجيس بي دود فارسي كبار وكلهن دم
بعد ما شفتهن ماكدرت اوكف على حيلي
وكعت حتى العكاز وجلبت بجتف سيف

رجع انطاني العكاز وضل ساندني ويباوع للجيس وانه حتى صوتي احسه اختفى

مشيت ورحتلهه .. جانت امي يمهه وهي على نومتهه وبوجهه الاوكسجين ....

عزيز جابلي كرسي كعدت ومديت رجلي وضليت كامش ايدهه ...

بجيت هنا وضليت ساد حلكي واباوعلهه
ادري بيهه ماراح تسلم بعد .. ادري ضيعتهه
وربطتهه بعذاب العيشه ...

يجون يضربوهه ابر ويحولون على ايدهه الثانيه هاي انه ماعفتهه ولا وكفت دموعي
فصلت عن الدنيا كلهه بس افكر بيهه شلون انه جازفت بيهه هيج !!

شلون لو ماتت مثل نسوان اخوتي واضل عايش وشايل خطيتهه بركبتي وهي يتيمه
عيشتهه غبره وتصير موتتهه غبره وكله انه سببه ...

جانت عايشه براحه بال وانه الجبتهه لنص الاذيه وبعد ماتسلم بعيشتهه ...

حسيت عليهه تحرك ايدهه بايدي .. وكبل شلتهه خليتهه على وجهي .. واريد احجي ماكدر مخنوك فد مره حتى الشهكه ماتطلع مني ...

ضلت تباوعلي وجرت الاوكسجين من وجهه
وامي اجتي تحاجيهه وتبوس بيهه .. وهي كبل كالتلي..
- حيداااار اني جنت مو هنا

هزيتلهه براسي وهي كملت حجي..
- جنت ويه خمس نسوان
بيت مابيه سكف بس حياطين واني كل مره يشيلني  اثنين ويعلكني على حايط ويضلن لازماتني ويجن اثنين كل وحده توكف يم رجل مني وتنكلب دود كبار وتضل تمشي على جسمي والخامسه تشيلهن مني وترجع تخليني على غير حايط ويرجعن ينكلبن دود ويمشن عليه

ضلت تكح وتكح وتتفل دم ... وانه حتى كلمه اسم الله ماكدرت اكللهه .... ضال بس اسمعلهه وكامش ايدهه .. وماعندي كل حيل

ارتاحت شويه ورجعت تكلي ..
- الخامسه طلعتني من البيت واني ماكدر اصيح خانكتني باثنين اظافرهه مادري شلون مشتني وطلعتني بس رجعن اثنين منهن علكني على شجره يابسه وبشعرهن يجرن ويلفن بايدي والدود رجع صعد عليه واني اصيحلك واصيح لامك وانتو ماكو
كل الدود دخل بخشمي واني اختنك واشوفهن ساجدات جوه الشجره

صدكني جنت احس كلشي ماجنت احلم
جنت كاعده وكلشي اتذكر ماجنت نايمه
اني من انته غفيت جنت اسمع صوت مشي العسكر وضليت كاعده اركز بي وبعدين رحت ويه هذني اخذني لهذاك البيت واني كلشي اشوف بس ماكدر اوكف وارجع

دنكت على ايدهه خليت راسي عليهه وابجي بدون صوت ... بس ماجاي اكدر اهدي نفسي
حسيت وكعتهه هي الاخيره لكل حيلي على اهلي ..

ضلت بس تكح وامي تمسح بحلكهه وخشمهه
كله دم .. وهي ترتاح وباصابعهه تمسح دموعي وتبتسم .. 

رجعت عليهه دكتوره وتباوعلي نفس هذيج النظره .. وانه اباوعلهه بدمعتي ..

كتبتلهه بخاخ وكالت اذا تختنك استعملوه الهه
وطلعناهه ...

الطريق كله هي زينه وتضحك تكول لامي
- هاي الحنافيش طكني بسحر بس خوش لمه مسوين .. صدك اكولج عيني علويه متعرفين هذني السحارات ليش شعرهن طويل ويخبل
يعني هو صح خايس وكله وصح بس طويل خرب بعرضهن مو شعر حبل هالمتنه

شو اني شعري هالكداته وخفيف صرفت عليه فلوس يابو فلوس يلا خليته بي خير وميوكع
بس مصار طويل

بس يلا هو الحظ للزركات حتى الشعر ماخذاته مربع من عدنا

نزلنه من السياره وطبينه البيت وبس عبرت باب الهول كبل ضلت تعيط وساده اذانهه

امي اخذتهه بحضنهه تسمي عليهه وجرتهه كعدتهه وانه ارفع براسهه وافتح بعينهه واحاجيهه وهي بس عياط وساده اذانهه

شمرت العكازات وكعدت يمهه .. حضنتهه وهي بس تضرب بيه وانه اسمي عليهه اقرالهه ايات وهي تزيد عيااااط وتضرب براسهه .. جرت حجابهه وانه اجر بايدهه
وهي تضرب راسهه بصدري

امي جابت القران فتحته بوجهه وهي ادفع بالكتاب والدم يجري من خشمهه وضلت تشهك وتختنك ..

نومتهه وضليت انطيهه من البخاخ وهي تاخذ نفس وتكح وترجع تتشاهك ..

امي ثبرت البيت بالصلاه على محمد وابويه يمهه يغسللهه وانه مادري شسويلهه منين
مااكمشهه تدفعني وتعيط ..

ضلينه اليوم كله احنه على نفس الكعده وياهه
وهي تهدا شويه وترجع تعيط وتحفز من مكانهه تضل تلوب بالهول وساده اذنهه
وامي وراهه تهدي بيهه وتقرالهه ايات
وهي نفس الحال من تتعب تضل تتشاهك
وتنكلب صفررره ويتلاحكولهه سيف وعزيز يجيبوهه ينوموهه ويضلون يخلولهه من البخاخ ..

وانه لا حيلي الي يعيني ولا رجلي الي نصحت وياي هاليوم ولا بالي شي واسويه بهالحال... ولا هي الي تخليني اوصل يمهه
تضل تدفع وتعيط بس اوصلهه ...

صار الغروب وكملو اهلي صلاه وهي بس تباوعلهم وهاديه ... ومن ظلمت كلش
ضلت تصيحلي وتريدني اجي يمهه ...

كعدت يم راسهه وهي خلت ايدي على وجهه وتكلي ...
- مادري شبيه حيداااار بلعومي مجرح
ونفس نار بصدري دايصير

دنكت راسي عليهه بوستهه وشاورتهه ...
- رور تحبيني ......
.
.
يتبع

** ردتو برتوت وماكدرت الاحداث ماتنكطع
فكملته بارت طويل .. هذا اصفنوله شويه
ويجيكم الثاني اعتذار و محبه 💕**