رواية ماء مغلي الفصل الثلاثون 30 - بقلم Zoka 🌷

..♣️🩸 ماء مغلي 🩸♣️..
* adzzon *

اجتني مجلبه بايد سيف وكعدت يمي وتجر نفس .. كلتله..
- شبييج رور شحجينا ياعيني شفهمتج البارحه

- حيدااار طلع كداااامي طلع بس
هذا سيف سيف
هو خلصني منه مادري شسوا ماادري

كمشت اثنين ايديهه واهدي بيهه وهي بس تباوع للباب وين واكف سيف ..

صحتله وكلتله يسد الباب ويروح .. بس طلع
جريتهه حضنتهه وهي ضلت تحضني قوي وتكلي ..

- حيدااار بعيييني شفته بيني وبينه شبرين
هذا ليش بس الي طلع ليييش

- بس اهدي خلي افهم شنو الشفتي شلون شكله ! وين جنتي !

- هو من شفتهم  فوتوك للبيت اني كلت خلي اروح على غرفه عادل مادام عافهه مفتوحه
وبين مايطلعون الولد حتى اجي يمك

-ايي ورحتي !

- اي رحت بس فتت كبل بيبان الكنتور نفتحت من وحدهه بوجهي واني جفلت
لان بسرعه انفتحت البابين هيج بوجهي
كلش جفلت

بعد ماتجرأت الزم شي منا درت وجهي طلعت من غرفتهم بس سديت الباب وانداريت واشوف هذا واكفلي

حيدااار واكف يباوعلي ويحرك براسه
مثل واحد يطك ركبته هيج يحركه وهو
هو مثل دب اسود بنفس طولي وحتى بي هيج شعر طويل مغطي جسمه واظافيره طواااال
يرفعهن ويه مايحرك راسه

ضلت تبجي وانه اهدي بيهه ورجعت تكلي
- ماعنده ملامح وجه بس شعر وسنون طالعااات طوال و و رجله

رجله مو نفس جسمه حيدااار مو نفسهه صدكني مووو نفس جسمه

-لا اله الا الله
لتخافين رور راح بعد رااح كافي اذكري الله وكافي لتبجين شبيج مو وصيتج قوي كلبج

- مدايروح من عينييييي
جان يحرك راسه واظافره عبالك ديريد يلزمني بيهن

لو ماا صعد سيف جان لزمنننييييي حيدااار لييش خليتني اضل وحدددي فوووك

-رور ياعيني كافي بس اخذي نفس واهدي
راح كلشي راح والله هذا خواف مايوصلج
هو بس يخوفج مايوصل ويلزمج والله

- لك اكوله واكف يممممي وهو الي يمكن فتح البوب بوجهي هو ميريدني اوصل لغراضهه
ميريدني اضل فوك اكيد راح يضل يرجعلي

- لاا والله ميرجعلج هذا بس يخوفج حتى بعد متوصلين بس هيج لتخافين رور والله ماخلي شي ياذيج

- ماااااا حيدااار لتعوفننني هيج وحدي بينهم
لك ماعرف شسوووي شسووي من يطلعولي

- لج كافي تبجين شبيييج ريررري
كاافي باوعيلي احاجيج

كمشت وجهه وهي بس دموع .. مسحت دموعهه وكلتلهه..
- ااانه جاي احارب بيج
لا تضعفين وتخسريني

مو كلتي هاي حرب لو نربحهه ونعيش لو نموت
وانه وياج نريد نموتهم ونعيش براحه
ويه اهلنه .. اذا تضلين هيج تخافين شلون نكمل !

هااا فهميني ! مو حجيتلج البارحه كلتلج بيتنا راح ينهجم ... هذوله اسم علي يصركعهم
يكعدهم من كبورهم ويخليهم شايشين علينه

مايردون ينجاب طاريه بالبيت يردون البيت بس الهم .. يكرهون الي يكول حتى بسم الله
وبكل شي يأذونه اكو اذيه احنه نحسهه بتعب
بس مانشوفهه واكو اذيه شوف عين يخلوهه النه من يطك خبالهم

من يحسون صار مكانهم بخطر بعد يهيجون يخوفونا حتى نطلع ونعوف كلشي الهم

بس احنه نضل صابرين ومتحملين كلشي من اذيه تجي منهم لان ندري تالي الربح النه

احنه يوكفلنه بهاليوم داحي باب خيبر
قسيم الجنه والنار يوكفلنه جدنا علي هو يحاميلنه من اذاهم وما يخلينه بطلبه ما يجيبهه
اهل البيت مايخلون مكان ذكرهم مدنس بالشياطين الا ماا يقضون عليهم لان همه اهل الطهر والايمان ودايماً الايمان غالب

بس احنه مشكلتنه هنا الشيطان عدنه انسي
منا وبينا هو جاي يدنس هالبيت ويخليه مكان راحه للشياطين .. وضل حالنه هيج مدهور
لان كلشي نخلص منه ونتعب عليه يجي فلان وفلان يرجعوه اضرب من الاول

- بسس اني خفت ماعبالي يطلعون بوجهي
كلت بس هوسه واصوات مثل كل مره

- لااا رور ماجذب عليج
بعد اكو هواي خبال راح يصير بس لتخافين كلشي خلي بالج هذا كلشي ينتهي

ابويه اليوم شاد الهمه على البيت وحتى دز على عمه الجبير تذكرين الي حجيتلج عليه
هذاك الشايب الي بالكوفه بيتهم

- اييي

- ايي هو هنا اجانه اليوم وهسه بعده وياهم بره فد شويه يطبون وراح يضل هو وابويه
للفجر همه يقرون قران ويمشطون البيت
بالتطهير والذكر

- وااني وين اروح ماصعد فوك بعد

- ايي طبعا متصعدين تضلين يم امي
هي هم راح تضل كاعده وراح تلكين سيف هم وياكم كاعد

تره سيف صوته حلو بالتجويد
صح هو معقد وعنده بلاوي بس قاري قران معدل ..

عنده نفس طويل بالتجويد واذا قرا فد سوره ما يعوفهه ويصدق الااا خاتمهه واذا جود كل احنه مانقاطعه نضل وياه نسمعله لان صوته وتجويده بنفس طويل ويجبر المقابل يركز وياه .. صوته كلش فخم بالتجويد كون يسهر الليله ويه امي على واهسها يجود القران واسمعيه

- مصدكتك .. اني احس بسيف عنده زين اكثر من خباله الي مطلعه النه

- ايي بعد انه مادري هو هواي مدوخني بس احجيلج الي اعرفه عليه يعني

رجعت حضنتني وانه كلتلهه..
- شسوى سيف من شافج ؟

- هو كبل اجه عليه حط هاي بركبتي مادري شنو شوفهه

باوعتلهه وانتبهت هاي ملبسهه سن الذيب
كلاده طويله والسن واصل ويه بطنهه

- ريري هذا يسموه سن الذيب هذا الي يلبسه ماتقربه الجان تخاف منه

-هاا يعني هو لان لبسني اياه هذاك راح !

-اي يجوز .. زين هو شافه مثلج لو بس انتي شفتيه !
يعني من اجاج سيف هو جان بعده واكف

- اي بعده بس سيف ابد ماخاف
مادري اذا شافه او لا بس هو جان يباوع لنفس مكان الي اباوعله وماهتم كبل اجه عليه
لبسني هاي واخذني ركض ركض جوه

كلشي صار عبالك برمشه عين بين ماصعدلي ولبسني هذا ونزلني جوه ماحسيت الا اني يمك

- والله هالسيف غريب امره
بس الله ينطيه الصحه والعافيه خوش وكفه وكفته النه اليوم

جا بعد لتخافين هذا من لبستيه حتى لو تشوفين شي مايتقربلج صدكي انتي وياي بأمان
انه مرات احضنج بس احصنج اخاف عليج وانتي ماتدرين

حتى ابويه موصيه بصلاته دايماً يدعيلج بالحفظ من شر البلايا وحتى لوو لا سامح الله
وصارلج شي صدكي ااانه اخلصج منه

انه لغيري اكدر بس لنفسي مانفعت والسبب هذول الي مايخافون الله

- لعد شبيك متكولي هيج اسوي جان كل يوميه احضنك وضل حصن بيه
لو محصني زين مطلعلي هالمصخم ابو الشعر اليوم

- هههههه الله يحركه بنار جهنم ولا يصيبج من اذاه شي

حضنتهه وضليت احصنهه من كل اذى وشر وكيد شيطان بهالبيت .. بعدين دزيتهه جوه

وشويه واجوي ولد عمي سلمو وراحو لبيوتهم
وضل عمنا الجبير الشايب كاعد وابويه هم
وسيف واخوتي ...

تعشو وضليت انه اكل على راحتي واخذت دوايه .. وهمه يشربون الجاي ..

عمي ترخص من ابويه ومني يريد يشوف مرتي .. وكال بس خلي تجي تسلم وتروح

عاد دزيت سيف يصيحلهه ..
واجتي هي تباوعلي وانه كلتلهه تروح تسلم
وتبوس ايد الحجي ...

راحت سلمت وهو انطاهه ايده بوستهه وضلت واكفه تباوعلي وترجع تباوع للحجي
وهو شال سبحته وضل مدندلهه وكالهه
اخذيهه ...

ريري ضحكت وكلتله..
- حجي اذا اخذهه تره مارجعهه
من هسه كولي حلال عليه لو لا

ضحك هو وكاللهه ..
- حلال عليج انه اريدج تاخذيهه

- زين لعد شكرا

جرتهه من ايده وضلت تتلمسهه .. وشمتهه كالت ..
- هاي نفس ريحتك هنا يابه
شنو كلكم تستخدمون نفس تركيبه العطر

ضحكو اثنينهم وابويه كاللهه ..
- بويه احنه هاي ريحتنا مو عطور احنه مانستخدم عطور
عدنا حبه مسك نتعطر بيهه كل جم يوم

- هااا بس طيبه
شكرا عيوني حجي راح احتفظ بيهه هاي احلى هديه من ريحتك
اردهه الك وعد مني اجيبلك ارقى هديه مقابيل هاي

ضحك الحجي وكاللهه ..
-  تشكرين بعد عمج ماريد غير راحتكم وعافيتكم
هسه انتي روحي حضريلنه شويه حليبه
وجيبلنه نشرب

- مو تدلل حجي اصلا مبين ذواق
خلي يتعلم منك حيدر اكوله عيني اشرب حليب بالليل زين لعظامك يكولي شيشربه ماريد
احجي وياه فدوه حجي بلكت يقتنع

- جاا مدامهه هيج السالفه
تمشين تسويلنه اربع كلاصات حليبه دافيه وتحليهه بعسل بويه موزين الشكر بعمرنه
هذا العسل نفع وعافيه للبشر

- ايي تدلل عيني هسه اسوي واجيبلكم كعك
تاكل كعك حجينا !؟

- ابو الدهن اذا عدكم واذا لا مالازم

- اخلقلك الكعك مو تدلل حجي
ههه خوما ضوجتك تره اني احب اشاقه بس ويه اهلنه يعني مو عبالك خفيفه بس قبل شويه انهبطت هبطه مصايره واذا هسه مضحكت وسولفت اطك واموت

كلهه ضلت تضحك حتى ابويه وكللهه ..
- بويه جيبي الحليب ونكعد نسولف ونسيج الهبطه

كبل ترخصت وراحت .. وانه اباوع للحجي
وهو بعده مبتسم ..

جابت ريري الحليب وانطتهم وبعدين اجتي انطتني كلاص وتشاورني ..
- ولك حويدر بعد اكلبهه لمعدتك بالحليب
فضني عاد صير زين مو شلعته لكلبي حشبع هبطات وانته ماكو تركضلي وتفزع

- ههه ريري بروح ابوج لا تذبين حركتج بيه
عوفيني انه جاي اصير زين على راحتي

- ديلااا يطبك مرض لتشرب

- ياااا والثووول شبيييج

- ايييي نسيت

راحت جاي تنطي لتخوتي مارادو وسيف هم ماقبل يشرب .. عاد الحجي صاح عليهه
وكللهه ..
- جيبي كلاصج واكعدي يمنه

كبل شكت وجهه بالضحكه واخذت كلاصهه
وراحت كعدت يم الحجي وتشرب وتباوعلي وتغمزلي وانه اخزرهه ..

الحجي شرب كلاصه جرتين وبقى بي شويه واخذ كلا ريري بي نص وداره فوك كلاصه
وكاللهه ..
- تاخذين تشربين ! لو شبعتي ؟

ريري ضحكت وكلتله ..
- حجي هسه انته شكو تجيبهه منا وتلوفهه منا
متحجيهه طك بطك

تره اني دااحسك تختبرني واني عادي عندي هسه اخذه واشربه هو شبي يعني
بس لتعوفني بفضولي احجيلي عود اووكي

يعني اقصد مو تخليني كلشي ماعرف احجيلي بلا زحمه

جرت الكلاص من ايده وشربته كله وكلتله ..
- اطيب شي الحليب اني ماشرب جاي الصبح الا حليب بس بالليل حيدااار ميسوي واهس
واحد هم يشربله كلاص

اي شلونكم. ؟ هاي خوش اناشيد اليوم سوو
صدك جنت متونسه

طبعا حجي اني ماشفتك مادري انته وين جنت كاعد ؟ شو ما مبين !

ابويه والحجي واحد يباوع للثاني وانه اكللهه ..
- بويه على كيفج انطي مجال

- اييي ميحجون هسه اني مسكتتهم

- ريرري

دارت وجهه للحجي وكلتله ..
- اكولك عيوني حجي تره اني هيج ذبتي شقايجيه مو تضوج مني تره مو قصدي اقلل احترام بس هيج يعني دانسولف وانتو سكتو

ليش تسكتون متحجولي لعد شكو دزيتو عليه
جان هسه رحت عدلت النضده مال العلويه
وخلصت

عفيه فراش هم لابد يتخربط هي ابد تريده مسطره .. هنه مخدات ويميلن اني شكو ابتليت بيهن اوووف اووف

مو تضوج يابه بس اندقيت من سالفه الفراش بعد ماكدر اسكت يعني شدعوه هيج كل شويه تعالي سفطي هسه مو راح نفرشهن فد شويه
ليش هي ضايجه ومخبوصه عليهن !!

خطيه اني انقهر عليهه ماريدهه تضل توهس بالفراشات خلي تريح بالهه شدعوه هالكد قلقه
كلولهه مخداتهه واللحف مطايرات نسفطهن بس لتضوج اجي الكاهه روحهه بخشمهه
خطيه يمعودين لا فد يوم يفول ضغطهه علمود نضده ! متسوى مو !؟

شبيكم شو عبالك مطايقيني !! اكوم ؟
عادي كولو

ابويه والحجي بس يضحكون بسكوت
وريري تريد بس تلوف كعدتهه وتجر بدشداشته وترجعهه جاي تلوب ادري بيهه
بس تريد منهم حجايه حتى تروح ..

الحجي كال ..
- والله حجايتج صحيحه هالنسوان يتسودنن بنضداتهن
ماتعرفيهن بويه هاي نضدتهن بعزيه روحهن
يتفاخرن بينهن بعلو النضده وعدالتهه

- هااا يعني الكل هيج عبالي بس احنه
يلا لعد ماراح اضوج بعد واضل طابه طالعه اعدل بهالنضده

- اييه ايييه
خوش حليبه تشكرين

- تدلل عيوني حجي
يلاا شو محجيتلي شعندك وياي
احجي عادي تره ماضوج بس الفضول يموتني اذا معرفت

- ههههه انه فهمت زلمتج وهو بعد شلون مايعرفج راح يفهمج مكصدي

- اييي ليش هيج حجي متحجي بوجهي هسه شكو !!
مو خوش كعده كاعدين لعد اذا نسد هالسالفه شنسولف متكولي

- نسولف جا خلصت الحجايات !
هم لابد نلكالنه سالفه
بس انتي شني الهبطج مساعه !

- يبووو عيننني اسكت وخليهه
هبطه اكلت نص عمري

- هااا خير ان شاء الله

- عيوني يااخير هذا طلع جني بوجهي ياخير
غير جان نعلست

يعني قصدي جان مدري شسوالي

- جني ! شلون هذا شفتيه وين !!

ضلت تباوعلي واخوتي ركزو وياهه
وانه كلتله ..
- حجي نفس الي نعرفه بس هي ماشايفته
وخافت هالمره
بعدهه الهبطه بيهه بس هي تضيعهه بالسوالف

ضل ابويه والحجي يسألوهه عليه وهي عادتلهم الحجي نفسه بوصفه بس ماذكرت الغرفه مال عادل كالت غرفه سيف

و الحجي كاللهه ..
- اكعدي بالكاع خلي احصنج بذكر الله

كعدت يم رجله وهو خله طرف عوجيته على جتفهه وضل مغمض ويقرالهه ..

تباوعلي هي وانه اطمنهه بعيوني وانتبهت لعزيز عينه علينه ومنتبه لكل اشاره بيناتنه

من كمل كاللهه جيبيلي مي وصبتله بالكلاص
وانطته شرب منه شويه وانطاهه كاللهه غسلي وجهج بي ..

راحت يم الباب ذبت بايدهه وغسلت وجهه
ورجعت كعدت يمهم .. عاد ابويه كاللهه..

- بويه انتي اليوم تصيرين سباعيه بعد بكلبج ايمان وعقيده وحواليج اهلج كل سوء يدنالج همه واكفيله عرضه لاتخافين ولا تهتمين

اريدج تكعدين ويه العلويه و وياهه تمدين سجادتج وتصلين مثل صلاتهه وتحافظين على نفسج بحدود سجادتج

انه ادري انتي ذكيه مو غشيمه بالصاير عدنا
وحيدر اكيد حاجيلج على هاليوم وانتي بعد شفتي بعينج لازم تعرفين شيحتاااج هسه
بويه !! هاا شيحتاج ؟

- كلب قوي

- ايييه وانتي مو كاصره عندج قوه ومره معدله وسباعيه بعد مرت السيد انتي لازم تصير عندج شجاعه وضبط النفس وايمانج قوي وهي كلها ترهيب للنفس بس الحافظ الله

- اييي ماشي

ترخصت هي وراحت جوه والحجي كالي ..
- هاذي طفله
بس حجي كلبها فطير هاذي ماتكدر تضل وحدهه الليله لا تعوفها
حول هناك نومتك هاليومين

باوعت لابويه وهو هم عادلي نفس الحجي
وصاح لاخوتي حتى يساعدوني اروح جوه وابويه ينام بدالي هنا ...

اخذوني جوه لغرفه ابويه .. وتمددت بفراشه
وهي اجتي كالت ..
- هاا شنو شصار

- شصار يعني اجيت انام هنا

- ها ليش ؟!

- خايف عليج يا مريتي

كعدت يمي وتكلي ..
- ولك حويدر احجي بسرعه قبل متطلع امك من الحمام وبعد تخلينه نخنس
احجي يلا هذا عمك الحجي شبي وياي !

- هههه عمي حبج صدكي لو مامرتاحلج فلا يكعد ويحاجيج هيج و ىيتحمل لغوتج هاي لج سطرتيه للرجال انه من يمي انسطرت
شجاب النضده والمخاد بالنص !

- ايييي سالفه جانت داقتني امك عقلهه ويه هالفراش شكت ط...ي
كل شويه سفطي سفطي ادري هسه احد طاخه مو شعلت الخلفوني بنضدتهه

- ههههه ريررري

- احبهه اني بس هي هم مرات تلح واني روحي طالعه بخلك فراش !
دحجي يلا شبي هذا الحجي الحليوه
لك سنونه تلهث خوش حجي نظيف هذا عجبني

- ههه ليسمعوووج صوتج

-ديلااااا احجي

- شوفي السبحه هاي جان يريد يشوفج
نقيه لو مشبعه بالاثام ..
لو اخذتيهه ووكعت من ايدج او حسيتيهه ثكيله وذبيتيهه فهاي انتي يعني تخوفين بيج الموزين الي نخاف منه

ولو ضلت عادي مثل مصار وياج يعني خوش انسانه ونقيه وتستاهلين العشره

- بس اني مو نقيه

- انتي مالج دخل بالدين يعني ما تظهرين شي وترحين تسوين شي ثاني
المهم هنا انتي روحج نظيفه مو ضغينه
مو مثل عبده الشيطان هذوله مايتحملون
جان كبل شمروهه من ايدهم

الي مشبع بداخله الكفر والشر مايكدر يتحمل شي من ريحه المؤمن او ريحه اهل البيت
وهاي السبحه مختومه بليالي خاصه بمراقد الائمه مو هيج عاديه فالي من الي نخاف يصيرون بينا بعشرتهم همه الي يريد يكشفهم بهالسبحه

لان الحجي هم كلبه جاز من النسوان
راد يتأكد

- هااا اوووكييي
صح اني مو نقيه بس على نفسي يعني ذنوبي ممأذيه بيهه احد ومالي دخل بالدين هيج اني بس اطلع عليه بس ماكفر

- اي هو هذا الي عرفناه ياعيني
وحتى الحليب هو تقصد يطلبه منج
حتى يخليج تكعدين تشربين يمه وياخذه منج
لو من دايره بكلاصه وصايره بي مثل رغوه هيج خفيفه تصعد ليفوك جان كال هاي مسحوره بس انتي الحمدلله ماعليج شي من سحورتهن

- ياااا نغل لك هذا شلون حجي ملعب

- ريررري شبيج لج سيد هذا يمعوده لا تبلينه

- اييي ديلا لساني فلت حبيته اني معليك هيج بس حجي لسان

- شلوون بيج
انتي يجيج يوم وتورطيني بلسانج هذا
شويه ثكل

- يبووووو عاااد بدينا ويه سيد حيداااااار

- رووور .. هسه هنا تفرشين وتنامين
من هسه تعوفين كلشي وتنامين وبس تحسين على شي تعالي يمي هنا انه اضل كاعد للصبح

-اوكييي

فرشت واجتي امي دزتهه تودي فراش للحجي بالهول ورجعت خلتهه تعدل النضده يلا عافتهه تنام ..

ضلت امي تحضر لصلاتهه وانطتني القران خليته يمي وغمضت ..

شويه وصرت اسمع صوت مشي فوك
ضليت اردد لا اله الا الله وبديت اسمع صوت تكبيرات ابويه والحجي ...

اجانه سيف وضل كاعد يم الميز ..
امي تحاجيه خايفه عليه وهو يكللها مو صغير انه ماخايف بس ابويه مايرضى اضل يمهم

ضل كاعد يكلب بتلفونه وانه غمضت وسمعي مركز ويه اصواتهم بره الغرفه ..

ضل الحجي يجود القران ويروح ويرجع على نفس المكان واخوتي حدهم لهنا بعد يطلعون مايتحملون بس يضلون اكثر كبل يتخربطون
فنعرفهم حدهم لهنا وكبل يسلمون ويطلعون

سيف بس سمعهم راحو كبل راد يطلع وانه ماخليته .. كل شويه يريد يكوم واصيح بي
عاد ضل كاعد ويتأفف ..

ابويه صاح بعلو حسه ..
- ياالله ياحبيب قلوب العابدين
يا عون المستضعفين
يااااا الـه العالمين
استعنا برب العزه والجبروت

صار الحجي يسلم على النبي وال بيته
ويمشي يم الغرفه ويجود القران بعلو صوته
ويضرب بالعوجيه ويه كل نهايه ايه ضربتين بكل كاشيه كدامه

هنا كبل صار صوت تركع البوب فوك
وابويه جوه يصيح
' يا مولاي ياجدي ياعلي المدد '

يصلي على محمد وال محمد ويرجع يطلب المدد جان تنطبك باب هالغرفه حيييل
كلنه جفلنه وريري كبل كمزت من فراشها ليمي جلبت بيه ..

وهمه بره مستمرين .. والباب تنفتح وتنركع
امي جرت سيف كعدته يمهه وتحضن براسه وهو يوخر منها وهي خايفه عليه بس هو ميرضى يريد يطلع وياهم ..

حضنت ريري الي ويه كل ركعه باب تجفل
وصار صوت دندنه قوي بحيث احس الصوت جاي يفتر يم راسي ويدندن ومفس الشي ريري ضلت ساده اذنهه وانه حاضنهه على صدري واردد الصلاه على النبي
وامي اجتي وغطتنه بعباتهه وضلت يمنه تردد ايات وتنخى باهل البيت وتبجي
وسيف طلع صحت عليه مارضى يرجع
بس ابويه كالي هذا وينه ضل يمي

بعدنه هستونه خلصنه من صوت الدندنه
وكلنه يالله جان ينكلب البيت صوت صياح
نسوان وجهال كلهه تتعايط يم روسنه
ريري ضلت تضرب بيه وتكلي طلعني منا
بس انه ماكدر اعوفهه تطلع بس تضل وحدهه
تتأذى لو وين متروح ...

ضليت اصبر بيهه وهي داحسه نفسهه بحضني .. وانه فتحت القران خليته على راسهه وضال اهديهه واصلي على النبي
وابويه والحجي بره من تجويد لتجويد
كل مايزيدون هالشياطين بصياحهم همه يزيدون تجويد ...

ابويه صاح ..
- حيدر بويه دك على اخوتك شوف شلونهم
وكللهم يحفظون نفسهم بذكر الله لا يتكاسلون

جريت تلفون من جيبي وخابرتهم وصيتهم
وسديته .. واجانه سيف ..

اخذ من امي النجانه والقماشه البيضه وراح وداهه لابويه ..

ضليت اباوعلهم وهمه كاعدين يم الدرج
ابويه مثل كل مره خلاهه النجانه وبيهه ماي
وضل يقرا سوره الاخلاص على الماي وبعدين غطاه بصينيه وفوكاهه حط القماشه البيضه الثخينه ..

وبعلو صوته يكول ..
- بسم الله الرحمن الرحيم
نقسم ونستعين بالله العلي العظيم
ونستعين بملك السماوات والارض
وبحق صاحب كرسي العرش والسماوات
بأمر الله الكريم
وبحق الاذااان نداء للمسلمين
وبحق محمد النبي الحبيب وآل بيته الطيبين الطاااهرين
تنزع وتغلب اي طلاسم او ارصاد او اسحار خااصه بسحر اسود
ارادو به موتاً او هلاكاً او دماراً او مرضاً
تنزع وتغلب بأمر الله الكريم الذي احاط علماً
بالاسرار والعقائد وابصر حتى دبيب النمل
وسالت لهيبته صعااب الجوامد
الذي بنى بيتا امر بقصده ِ وتلقي الوافد
واقسم بوحدانيته ولا ينكر الا معاني
ونصلي ونسلم على الحبيب المصطفى
الذي لا يخيب سائل وبحق السبع المثاني
وقلب القران يس وبحق علياً وحسيناً ومهدياً
نتوسل الى الله جلب ما لم نستطع له صبرا

صاحلنه نقرا سوره الفاتحه .. وكلنه قريناهه
وصاح يالله .. وشال القماشه البيضه والصينيه
وكبل صاح ...

- اعووووذ بالله من شر نفسٍ وما صنعت
وابرأ الى اااالله منهم

صحتله ..
-بويه دز بيد سيف خلي اشوف شطلع عندك

- جايك بويه جايك

وخرت ريري مني وضليت اعدل شعرهه
وانطيتهه شربت ماي وضليت كامش ايدهه
لحد ماجوي يمنه وسيف شايل النجانه و وكف يمي ..

باوعت وكلت ...
- لا اله الا الله
حسبي الله ونعم الوكيل

الي شفته هنا اضرب من الي كل مره شايفه

هالمره مو بس اوراق بشكل حجاب لا وياهه
جيس قماش وتايخ بالطين والابر كل وحده بطول الاصبع منجخات بي وباخرهن مدندل
بريعصيه يابسه

ريري كبل بس شافتهن ركضت بره وضليت بس اسمعهه تتقيء ..

ضلت امي تشوفهن وتدعي على الي سواهن
وسيف جاب ريري وكعدهه يمي .. ضليت
اهدي بيهه وهي تكلي ..

- راح تجلطوني مو عيشه هاي صخام بعين الخلفوني

- ريري شحجينا ياعيني طولي خلكج كلشي راح يخلص بس همتج ويانه

ضلت نحلانه وكامشه راسهه والحجي كعد واخذ النجانه يمه ودار عليهه بطل خل
وجاي يقرا سوره يس جان كبل يكب العياط بالمطبخ ...

عياط بشر صوت نسوان ..
شكينا لدرجه كلنه اكو احد بالمطبخ ومندري بي !

بس محد منا طلع من الغرفه ..
وضل الصياح يعلى واحنه سادين الباب ومانسمع بس صوت التكسر بالمواعين
والجدوره والصياني صوتهه يضرب بالراس
وصوت العياط بعده مستمر

وريري نزلت بالكاع حضنت امي وتصيحلهم
-كافي راح نموت كااافي

بس الحجي ماهتم لهالشي ولا ابويه
وعلى هدوئهم كاعدين ويشتغلون بفك السحر الي بين ايدهم ..

ريري تعيط عليهم حتى يوكفون شغلهم
لان الصوت مينحمل .. وماضل شي بمطبخنا عامر ..

وهمه مستمرين مايهتمون .. جرو الابر وكصو قماش الجيس وغسلوه بالخل والمي
وملح وصارو يطلعون منه البلاوي المشدشده
واول مافتحو واحد منهن كبل صارت ضربات على باب غرفتنا

وريري وسيف اثنينهم هنا تخبلو ..

.
.
.
يتبع

انتظر افكاركم وارائكم لهالبارتين
بكروب الفيس 💕 حتى النقاش يصير احلى