رواية مابعد الخطيئة الفصل العشرون بقلم Nada hs

#مابعد_الخطيئة

العشرون والاخير

Nada hs
adaena7 واتباد

كل جمعه لو خواتي يجني لو اني اروح الهن.. من يجن ينترس البيت عليه.. نشتغل كلنا سوه.. حتى ملابسي يغسلنها.. وايام اروح يمهن وابات..
اصلا زوج وماكو عايشه ارمله هه..
وبوحدة من روحاتي.. كنت رايحة لهدى .. خابرتني كالت تعالي عازمتج..
رحت اني وصفصف..
ومنو شفت.. هه وليد..شايل بنته صغيره ..
احسه انصدم من شافني.. دنك وماخله عينه بعيني ابد..كبران واحسه صاير عاقل وفاهم.. سلمت عليه.. تذكرت شكد قبل شمر حجي هه.. لو ينعاد الزمن واعرف هيج راح يصير كان قبلت بأول كلمة كالهه اليه.. كان امي رضت عني وارتاحت وهي بكبرهه.. بس كنت معميه..
من عرف اني راح ابقى يم هدى خله وراح.. ههه شي يضحك.. سنين مرت واخذت مني مااخذت.. صافنه ع حالي.. بيوم من الايام وصلت مرحلة الجنون اني.. وصلت مرحلة موتت نفسي بيهه..وشنو الحصلته؟ مثل العطشان وركض ورا سراب.. لا حفظ قوته وبقه واكف مياركض ويتعب ولاهو الگه الماي..
هيج اني صفيت ويه علي.. ياريت لو بس مايحبني.. ياريت بس هاملني..
بس فكرة انه تزوج ونسه كل شي بيني وبينه تجنني واطلعني من طوري.. احس جمر بصدري من اتذكر.. الحرارة تصعد لأذني..
مصطفى كبر .. وصار عمره سنه ...اخاف عليه من نسمه الهوى.. بس هو وضعه كلش زين.. بين فتره وفتره اخذه لطبيب.. حتى كم مره طردني الطبيب يكلي مابي شي لا تجين بعد.. بس اخاف عليه مو بيدي..وهذا كلة بقى ناعم حيل .. اخاف علي حتى من يتحرك أكول عظامة صغار ويجوز يطخ بشي ولا سامح الله ينكسر..
مرت ايام علي صار يدز مصرف ويتصل.. احاجي عبالك غريب.. حتى مانقهرت ولا امتنعت مااجاوب.. يسألني عن مصطفى.. اجه اكثر من مرة للبيت.. اجه يباوع بوجهي.. جامد وصامد مثل جبل ماخايف ولامستحي من شي.. نار وشبت بيه من شفته هيج.. ردت اضربه ردت املخه بس خفت مااكدرله .. بس لساني مكدر يسكت.. وعيوني همين.. انعميت من الدموع.. مخليت حجايه محجيتهه عليه.. الملطلط ابو النسوان الساقط الكو... واشكال الوان حجيت.. توقعت يجي يضربني.. بس ماسواهه..
اجه حضني كل قوته.. من حضني عبالك نار وذبو عليهه بانزين.. عطت بي ودفعته عني.. رجع حضني اقوه
علي:كافي منتهى لا تسوين هيج!
عطت بي:ليييييييش؟ كلي ليشششش بس فهمني ليش؟
جاوبني كبل برود:صار الي صار وخلص.. ماراح اقصر وياج بشي!
صرت كباله:زين وحبي؟ وتعبي؟ والشمات الورايه؟
ذب حسرة ىسكت..
رجع كال احبج منتهى..تخيلت بالزايد مدااعرف هل بني ادم شنو ووين يريد يوصل...
يمكن يضحك عليه يريد يسكتني ويمكن صدك..
مرت ايام وهو يتردد.. اني نار ومشتعله بيه من وراه..
ياريت لو مايجي احسن.. بس صار وكثرت جياته.. حتى اكثر من قبل.. بس اني صامده.. وصرت حايط مااحس بشي ويا.. غير القهر والهم.. يجي يحضني .. يتغزل بيه ويبوسني.. واني احس ابليس ديلزمني.. حتى من يعاشرني.. حايط مايهتز بيه شي.. وصار يتململ من طبعي ويا هيج.. بس خلص لمساته مو ذيج الاوليه ولا بعدني بذاك الگلب الخاوي والعقل التعبان...
اسقاط واجب اخلي يتقربلي.. ولو تصير فرصه اطلك منه ماعندي مانع..صح مااتخيل حياتي بدونه بس ع الشفته لا لو يصير فراكه مر اجرعه واسكت...
بس خواتي الي صايرات بطريقي.. علي .. ع كد المحبة.. صرت غصه بنص روحي.. اشغل نفسي افكر بأتفه شي بس حتى لاافكر بي.. وفعلا جزعت وتعبت ومليت.. وطلع من خشمي ..والي يكون مكاني من اول موقف ويه علي يعوفه.. مو اله يشوف هذا كله منه..
كان بعيني كل شي.. الدنيا.. الناس والحياة كلها هو.. كنت اشوفه ملاك..
وماافكر بشي يخرب هاي الصورة بعقلي..
حتى من شكيت بي عنده علاقه ويخابر.. هوايه اقنع بنفسي اكول لا علي ميسويهه.. بس اجتني الصدمة دفعه وحده.. نزعت كل شي حلو بداخلي اله..
نزعت ذاك الحب العشعش بگلبي وصار شجرة كبيرة صعب تنقلع..
بس الشجرة صارت يابسه.. يوميه يوكع منها غصن خاوي وتعبان..
ومابقت بذاك الثبات مال قبل..
هه هواي كالو ليش اذا هيج متحبي صرتي خربتي بيته قبل.. ونسو شخرب بيه قبل.. ولازال.. ابسطها امي.. راحت بسبب غبائي.. وكان ذنبي حبيته حب مخابيل.. حب مانوصف ولا تقدره ناس.. حب يعمي ويمشي بأي درب خاطر اوصله..
هواي ضحيت وبكل شي.. غالي عندي..
مرات احس ضيعت نفسي بيدي.. وكان ممكن اعيش افضل من هاي الحياة الي تشاركني بيهه اثنين نسوان والحبيته اغلب الوقت مو يمي.. ومرات اكول لا كافي عندي وجود مصطفى.. تارس حضني وتارس البيت عليه..
يحجي كلام ممفهوم بس الممه مفهومه.. يعني اني ماما..
طبعا من حملت بي لليوم مارحت زرت امي.. بس خواتي من يرحن..
اكتب رساله الهه.. هه اعرف شي ماينعقل.. بس اكتب الها كل شي بالورقه.. عني وعن ابني.. ىاخر شي اكلها سامحيني.. يعوفن الورقه بالمقبره يمهه ويجيبلي من ترابهه.. كل مره شويه.. صارت عندي قوطيه صغيره..
افتحهه واشتمهه كل ماضاكت عليه..
كبر صفصف.. وتقريبا استقريت من بعد فاجعتي بعلي.. قررت اروح لامي.. اشكيلهه حالي.. واحضن كبرهه واغمض عيني وابجي..
رحنا للمقبره اني وهدى وشذى..
شايله صوفي.. من نزلت لااراديا خليته بالكاع.. مادريت بنفسي امشي وماادري بالي ويايه..
وصلت يم كبرهه.. وكفت وصفكت ايد بأيد.. برطمت وبجيت..
-شوفيني يمه.. ايد وره وايد كدام.. ماحصلت شي.. يمه هم تدرين شصار بيه.. دريتي بكسرتي.. ادري انج مارضيتي عني لحد هل لحظة.. بس كافي يمه والله تعبت.. سامحيني اروح فدوة لترابج..
عفت دلالج وحضنج الدافي.. عفت الكعدة وياج ،عفت كلماتج الطيبه وركضت ع الذله..
ركضت مدري ع شنو.. انسحرت؟ لو انعميت؟ لو الله راد ينتقم مني بهذا الذنب؟

عفت كل درب للجنة..
ومشت بيه شياطيني كل درب ظال..
نسيت ذيج شيلتج البيهه ريحة الجنه..
ونسيت ذاك حضنج الدافي الينگط محنه
وضيعت ملامح ملاك البوجهج
ودورت وجه ناس..برحمانهه ماتتسمه
ذيج الناس.. تجرحني يمه..
وعافو بيه غصات وونه تجر ونه..
انفضي ترابج يمه.. كوميلي تعبت حيل
كومي امسح كل شينه وياج..
كومي نمشي ونرد مثل ماچنه
تمشين انتي واطش ورد بگفاج..
واصبح بوجه ملگاج..
االاكي شماتي بيج والوي كل لسان عاذلنه
حدر كترج يمه خليني.. واصير بحضرة الجنة
انام ع موسيقت لسانج
والكه روحي بمكانج..
انام بهذا التربان النايم ع فوادج
يندار الموت البيج بيه..
وتجين واسمع صرختج ردي يشظفه گمر
واگلج يمه الگمر انتي
يصبح بيج ويمسي
وين الله ويدير الموت بيه
ويدير ذاك اليوم وتصير بين اديج انتي المنيه
واغمض عيني بأخر وجه..انتي
يابعدهم ويانور عيني ومهجتي..
(بقلمي... الى منتهى)
رجعنا من المقبرة.. احس براحة عجيبه.. احس ظلام طلع من داخلي بقه بالمقبرة.. رحنا زرنا وكملنا كعدنا للصلاة بالصحن..
صليت بخشوع.. من كل كلب.. وكعدت استغفر وابجي.. اول مرة احس اني صدك مؤمنه ومقتنعه بصلاتي..
كانت امي تتوسلني اصلي وكنت التهي بشغلات وذنوب ودفعت ثمنهه غالي...
كاعدين سكتة اني وخواتي.. اجت كعدت يمنه مريه.. اشوفهه تصلي وتباوع النا.. كملت وكعدت بصفي.. طلعت سبحة وتباوعلي وتبتسم.. ضحكت الهه.. مدري ليش حسيت المرة هاي امي.. بالرغم هي شكلهه يخوف بس حسيت بيهه من امي..
انتي شكثر حلوة.. بس متعوبة..
ضحكت بتساؤل:شلون؟
انتي مامرتاحه. من سنين ..
ضحكت اني صح مااصدك بهيج امور مال عرافات بس كلامهه صحيح..
انطتني تربة:اسبحي بيهه!
-شلون يعني؟
خليهه بطاسه الشفاء.. واغسلي بيهه.. يرتاح كلبج ويزيل همج بجاه الامير ع..
ترددت اخذهه لان خفت وماعرف ليش نظراتهه العميقه خوفتني..
شذى:ها؟ شكو؟
هدى تباوعلي بتساؤل..
بدت هاي المريه الي حتى مانعرف اسمهه تحجي وتفصل منو المرتاحه بينا ومنو المهمومه..
اخذت النا خيرة بالقران... من اخذتلي صفنت بوجهي وضحكت.. كالت(نصر من الله وفتح قريب)
كزبر جلدي ع حجايتهه.. مااصدك راح اعيش براحة.. حتى نسيت شنو الراحة وشنو نومة الليل بدون هم وشنو واحد يمشي ع طوله ما شايل هم وحزن... وصتني اغسل بيتي بمي وملح مقري عليه..
بقت تاخذ خيره لخواتي واني صافنه واتبسم.. مادريت بيها شوكت عافتنه.. تفاجئت من لكيتهه ماكو.. باوعت يمنه ويسره ماكو اختفت.. ردت انطيها صدقة.. شكد باوعت مليكتها بعد فص ملح وذاب...
الكعده وياهه دقايق وريحت كلبي تمنيت اعرفهه وتكون قريبه مني..
رجعنه يم بيت شذى.. تعبانين هدى راحت لبيتها واني كملت يومي يم شذى...
ثاني يوم الصبح وصلني قاسم ع بيتي .. نظفت مثل ما وصتني المرية.. وسويت اكل.. اشتغل واذكرها وابتسم.. ادعيلها الله يحفظها وين ماكانت... كنت اول مرة احس براحة بيتي.. مامهتمه للوحدة ولا لاي بشر...
تغديت وخليت ابني بحظني ونمت..
فزيت ع ايد تتحرك ع راسي.. فتحت عيني شفت علي.. عبالك دااشوف شخص غريب.. ضحك وكال:شلونكم..
-زينين..
علي:ليش ماكلتي البارحة انج ماتحين؟
-كنت تعبانة.. مكدرت اتصل بيك..... ليش اجيت،
باس كصتي وكال:مشتاق الج..
ضحكت.. ضحكة واحد يعرف كل الكذب ومايعبرن علي..
-تريد اكل؟
علي:لا اريدج انتي..
سكتت.. مااريد اعاتب.. خلص عديت هل مرحلة..
حضني ملهوف.. عبالك صار سنين مشايفني.. بس اني نفسي ذيج اني. ماتحرك بيه شي.. مثل لعبة ويحرك بيهه..
كمل ونام.. كمت منه واباوعله.. لا حاقده ولا كارهه.. بس فراغ كبير اكو.. كأنه بالون بداخلي وانفجر.. ماعاف بس ذكريات توجع..
ومرت ايام علي سولته بيه.يكلي احبج ومشتاق بس مااصدك.. وشفته وسمعته نفس الحجي يكوله لصابرين..
يمكن يريد يعدل بينا هه.. بعد ما خلاني نصف انسان يريد يساويني ويه الناس الكاملة،..
صرت مااحب اجيب اسمه.. لا بسالفه ولاطرفه من الكلام.. دوامي مستمر
خواتي ع اتصال بيه..مااخطي خطوة بدونهن.. يومي كله يعرفنه..
ماطول اشتياق علي هوايه.. فترة ورجع لاهماله.. ميوصل ولايتصل.. وصارت شغله عاديه.. علي يحب يغير.. ويوميه يشوف منو الي تناسبه يروحلهه..
بان ع اتصال بينا دائما.. مرات احسهه وحدة من خواتي.. شلون هيج صار ماادري.. ومرات لا هيج فجأة اضوج منهه.. ومااريد قربها من عندي اني وابني.. ومرات احسدهاع الهدوء والبرود الي هي بي... شي اسمه علي بحياتهه منطيته دليت..حذف يعني..
صابرين.. الي احسهه اجت بوقت متأخر حتى توعيني اني وين وعلي وين..
طلعت حامل...
علي اخر فترة اغلب وقته يمهه.. بان معتمده ع نفسهه واني كذلك.. صح يتسوك بس بفترات متباعده ومو دائما هو يمنا..
فكنت معتمده ع نفسي و ع اخواتي.. نورس ماتنساني اذا جابت شي لبيتها.. اول ماتحيب شيي تصوره وادزه اليه وتسألني تردي؟.. شذى همين.. صح متكدر تيجي ادزلي بيد قاسم.. لو من امر اخذ صوفي الكيها محضرة خيرات الله اليه...وهدى همين متشتري شي اذا ماتعرضه عليه اول شي..
شمااكول مااوفيهن.. تحسدنا الناس ع خوتنا.. ماننسى بعض ولا نفرط ابعض.. وازواجهن الحمد لله كلش حبابين بس اني هه زوجي اعوج .. ومالوم بس نفسي عليه..
دوامي مستمر.. مالي شغل بأحد ولااريد قرب احد مني..
صفاوي تعود ع خالته كلش.. بيوم الجمعه والسبت اذا وحدنا يبقى بس يفتر ويبجبج.. ولمن يخابرون عليه اطفال شذى ويشوفهم صوت وصورة يزيد بجي عليهم.. يحب قاسم موت.. لان قاسم منطي كل شي.. الحنان والاهتمام.. وهو صفو محروم من الابو.. حتى من يجي هو لو نايم لو مشغول باللعب مايهتم لوجود ابو.. مرات اصفن بي واكول شلت ذنبه وجبته لدنيا وحياة مشتته وعايله ماتعرف بعضهه..
وهيج مشت حياتي .. اكثريتهه شغل ومحاضرات..
وبيوم صدفة رحت لجامعة علي.. كان اكو ندوة عدهم رحنا..
قبل لا ادخل لمحت علي كاعده بسيارته.. اشوفه داير وجهه ع جهة الثانيه .. انداريت شفت وحده كاعده يمه.. عزا؟ هاي مو صابرين.. ولا بان؟!من شافني خله وحرك شخط السياره شخط كبالي..
هه مدري اضحك مدري ابجي مدري اغم نفسي.. يمكن الرابعه بالطريق..
بس عسى حوبتي ماتتعداه.. حوبة حبي ودموعي .. حوبة السنين الخلصتهه وهيج راحت من عمري.. عرفته هو شنو..
بلا كلب. يحب نفسه.. ومصلحته وشهوته وبس..يحب وحده تتغنج وتتدلع.. ووين مايلكه هل شي ميكول لا..
.. ضكت المر والسم ويا..ياما ليالي خلصت. بس بجي.. لو عن ذيج الايام الاختنك بيهه بحسرتي.. لو روحة امي بذاك اليوم من ماتت بين اديه.. لو العار الخليت خواتي بي.. الغيرة،الحب،الشوگ والغصات... شنطيت وهو شنو رجعلي... وماوعيت اله متأخر... كل شي اجاني منه فجأة.. من حبيته ومن رفضني ومن بده هو يريد قربي ومن رفض زواجي ومن بعدين هو الي اجه برجليه واخذتي.. واني مثل الثولة..
ركضت ع سراب .. وفكرت العيشه يمه تنهي كل وجع عانيته بغيابه.. وعبالي الحب هو كل شي.. وعبالي الي حجاه اليه كله صدك،.. وعبالي حياة حلوة كدامي .. وما طلع الي وياه غير بس الهم... الكسرة. الحزن..
وماطلعت منهن اله بعد ما صفيت رماد.. وكوة جمعت روحي ووكفت ع حيلي.. وتخطيت وتناسيت .. ابتعدت وتندمت..
بس بعديش.. حلاة العمر هي ذيج السنين الضاعت..
نبقى بعاد عن بعض احسن..
وخلي يفكر بالرابعه وعلاقات غيرهه وغيرهه.. ومااعرف اذا راح ابقى ع هذا الوضع او انهي هل زواج الفاشل من بدايته لنهايته... مرات اكول يكبر ابني وانفصل من علي.. ومرات لا اكول اعيش هيج احسن من ما مطلقه.. لان اعرف مجتمعنا شنو يفكر .. ومخليه خواتي بين عيوني.. مااريد اكسرهن من جديد ولااريد يبدر مني شي بكد الشعره يزعلهن..
شسوي الهن مااجازي.. خاصه نورس.. احسهه امي. كل ماحنيت لامي اروح لنورس..
اكعد وهي تشتغل.. ابقى اراقبهه وهي. تتحرك.. كأنها امي..
وهاي اني.. انطيته ومااخذت منه بس الصدمات واللوعات..
نص عمري ضاع ويه علي . ومافهمت شي من حياتي.. بس بالاخير تعودت ووصرت احس نفسي بشر عاديه.. وقبل لا.. كنت يمكن مخبله؟ لو مراهقه؟ مااعرف شنو اوصف حالي.. ههه هواي مرات اضحك ع تفاهتي.. ع تفاهه قصة حبي الفاشل للشخص الخطأ وبالزمان الخطأ.. بالزمان الي مفروض اعيش بي احلى ايام العمر.. وبالمكان الي يكون الي بي ذكريات حلوة.. بس هسه.. اذا دخلت جامعه علي بكل ركن اكو قصه الي بي.. اختنك اذا فتت من ممرات ذيج الكلية.. ويمر كبال عيني ذيج السنين .. كل لحظة وكل ساعة مرت.. ماانسه حتى اذا وكفت بمكان تنعادلي نفس الوكفة قبل سنوات...

الروح روحي .. وبطلت ولويت اذنها..
شرد اكلك ياحزنها!
بطليت..
طلسم فكيت سحرك وانتهيت..
طلسم مكتوب كل شي..
ومامش شلون ابتليت..
مااجذبك..
انا ناسيك وبجيت..
شلون مااسكت بنفسي..
تلتفت للماضي تبجي..
تحط ع الحايط حلمها
هي حايط الايام يبجي
وانا صافن!
مثل المحجر ع الريح ارتجيت
لامتت انت
ولاانا احتييت
لكن الايام ماتت!
غلطتك يل جنت كل شي ومادريت
غلطتك صلحها بعدك
(لمظفر النواب)

انتهى...

ولهنا ختمنا.. وحابة اوضح وياكم هوايه شغلات،.
اولها انو القصه مو 100‎%‎ حقيقه.. يعني ضفت من عندي ومن خيالي..
الثانيه ماكتبت بلسان علي لان هو انسان بلا مشاعر وعينه فارغه وهيج شخص مايستحق اكتب بي..
الثالثه.. العبرة من هذا كله.. الخطيئة.. والاختيار الخطأ.. وسالفة الي يفكرون انو الحب هو كل شي.. وينصدم بعدين بأختياره.. حتى الي ماصار نصيبه ويه الي يحبه.. لايندم رب ضارة نافعه والعكس صحيح..
شفتو الي مرت بي منتهى.. والالاف مثلها.. بس كله تحت المستور والمخفي..
واشكر واعتذر من كل المتابعين جماعه التعليقات الحلوة والمشجعين.. بيكم استمر😘
وهمين حابة اشكر زينب ماجد واعتذر منها ع التأخير الي صار والايام الي راحت بدون نشر..
انتظركم بقصة جديدة.. من واقعنا وبدايتها قصة فعلا صارت بمحافظتي..
وطبعا اضيفلكم عليها خل وملح😅

والقادم اجمل بإذن الله...❤️