رواية مابعد الخطيئة الفصل الرابع عشر 14 - بقلم Nada hs

#مابعد_الخطيئة

الجزء الرابع عشر
Nada hs
adaena7 واتبادء

ماسكتنا لحد ماعاط فراس بينا هههه.. هدى كبل مسحت دموعهه وغسلت وجهه وراحت اتصلت ع شذى بتانكو..
هدى:شذاوي.. شلونج..
شذى تجاوب وصوتهه مشغوله بشي وحتى الكاميرا مو ع وجهه:هلاو حبي.. زينه الحمد لله انتي شلونج وزوجج واطفالج..
هدى:شذى..
شذى:ها؟- شكو؟
هدى:عدلي الكاميرا وشوفي..
وجهت الكاميرا عليه.. هدى تأشرلي ارفع ايدي حتى اشوفهه الحلقه..
باوعت مستغربه.. ويمكن الصوره يمها مواضحه..
شذى:وين انتي؟ يم نورس؟
هدى:اي..
شذى:منتهى شنو هذا محبس؟
هدى عاطت بعد متتحمل:لج منتهى انخطبت..
شذى:صدك؟ عليج الله؟ منو وليش ماكلتولي؟ شوكت !
هدى:ههههه وحده وحده هسه افهمج.. بدت تحجيلها. اني اتذكر علي واتبسم..
نورس اول مره اشوفها هلكد مرتاحه من يوم وفاة امي.. كان شي مثل الحلم.. نمت تعبانه واصلا مأيسه من علي كلش وولا متوقعه هل شي منه.. عمري كله ماتوقعت هيج..
بقينه نسولف .. يخططن وين احف وشسوي وشلبس..
ميدرن الزواج بلبنان.. من كلت الهن كيفن وكالن بعد احسن..
تبعت والنوم بده يرجعلي.. بالرغم اني مااريد انام.. واريد ابقى اتذكر الصار واللحظات الحلوة واللمه والضحكه.. بس مكدرت .. انسطرت سطر كوه كاعده يمهن.. صعدت الغرفه.. شفت الساعه هسه يله11
اخر شي شفته هو الساعه وبعد فقدت بنوم..
كعدت الصبح.. نشطه وجوعانه .. نزلت لكيت نورس تسوي ريوك.. صبحت عليه بأبتسامه..
كالت كعدي.. اني اصبلج.. صفنت .. مرار ولوعات  سنوات.. واخيرا راح يخلصن.. وين كنت.. شصرت.. شلون كنت اصبح وهسه هذا الصباح شحلاته.. حتى الي واهس اداوم.. بس المشكله جمعه ههه..
نورس اليوم بطوله كاعده يمي وتنصح.. لا تحاجي لا تخابري لا تقبلين ع طلعه ويا لا تنطي مجال يجوز يعوفج.. كومه نصائح.. بس كلهن اخذ بيهن لازم.. مااريد ارجع منتهى القديمه..
العصر خابرني.. نورس كبالي اشرتلي براسهه اروح من يمهه حته احجي ويا..
علي:مشتاقلج..
-اني اكثر..
علي:شنو رأيج البارحه؟ توقعتي لو لا..
-ههههه ابد ابد.. بس همين خايفه..
علي:من شنو؟
-تتركني..
علي:ضيعتج مره ومااضيعج اثنين!
-اروح فدوة لكل شي بيك..
علي:ياعمري.. شوفي حبيبي.. الاحد نروح للمحكمه.. لان اريد اكمل الاجراءات بسرعه علمود نفيز.. انتي ماعندج جواز مو؟
-ماشي.. اي ماعندي..
علي:اي هم يله لعد.. كلش مستعجل ومشتاااق..
-ياروحي..
علي:هسه لازم اسد.. بعدين اتصل بيج.. بوساتي..
-يحفظلياك..
رحت حجيت لنورس.. طارت من الفرح وكالت هاي هي.. هم يله نجهزج..
وكعدنا نتفق.. طلعت فلوسي من رواتبي.. وهي عدها حصتي من البيت.. بس مقبلت اخذ منها.. كلت الها اضمهن يجوز احتاجهن..
طلعنا بالليل.. تسوكنا كم قطعه ملابس.. عطورات مكياج.. كالت لا تكثرين من لبنان همين تشترين..
رجعنه من وقت ماوطولنا هوايه.. عزلت الشغلات الاشتريتها.. اصفن وممصدكه.. اجت نورس بيدهه لفه .. كالت اكليها حتى تاخذين دواج..
-لا عفيه مااريد الدوه يدوخ.
نورس:لتعاندين.. اكلي واشربي الدوه وره شويه.. حتى تنامين مرتاحه..
نفذت.. رحت سبحت وارتاحيت شويه. اخذت الدوه وماكو نص ساعه انسطرت سطر..
السبت خلص بسرعه بسرعه.. كلها التمت يم نورس.. هدى وشذى وازواجهن... سوينه جمعه تخبل.. من صدك احجي واسولف..
بس هل جمعه ناقصهه امي.. كلش بحاجتها .. اتمناهه لحظه كبالي ابوس ايدها واطلب السماح.. والمهم اسمع منها كلمه يمه..
العصر كعدن خواتي يخططن هههه هن العرايس واني الي ع صفحه..
قررن كل شي عني..
ودخلني حمام وانطني ملابس الوان.. لازم اغير من الاسود.. باجر العقد مالتي.. اول مالبست الالوان حسيت فشلانه ومستحيه منه.. اني ونورس اكثر شي بقينا بالاسود ع امي.. واخر وحده هي بقت نورس.. حفن حواجبي عدلنهن اليه شويه..
بالعشا تعشو وكلمن راح لبيته.. بعد ماعافن الي كومه توصيات..
اني همين رحت لفيت راسي ونمت.. حتى التلفون ماادري بي باقي صامت..
الصبح كعدت. لكيت علي داك عليه بالليل.. كبل اتصلت بي ..
رجع خابرني واعتذرت منه.. مكال شي.. بس كلي تريكي واستعدي حتى اجيج.. عاد اني من فرحتي نسيت حتى منين اروح ومنين اجي..
نزلت تريكت ع السريع.. سبحت.. مشطت وسشورت.. اباوع ع نفسي بالمرايه.. يارب خليني احلى وحدة بعينه..
رحت لبست.. خليت مكياج خفيف من غرفه نورس.. وكعدت اعدل بنفسي اخر لحظة.. اتصل عليه كلي اجيت.. بس نورس موجوده.. هي ودينا..
فراس وداليا بالدوام.. استقبلته بالاستقبال وقدمتله بين مااني كملت ونزلت..
علي:ام داليا اذا تردين تعالي ويانه؟
-اي عفيه..
نورس:لا مااكدر.. البيت مااحد بي.. واسوي غدا همين..
علي:علمود منتهى اني.. براحتج..
نورس:دير بالك عليها ابو ملاك..
علي:اخليها بعيوني..
نورس:سالمة عيونك.
علي:يله حبيبتي..
طلعنا.. فتحلي باب السياره وابتسم.. صعدت ..
علي:اي حبيبي؟ شلونج؟
-بوجودك زينه..
علي:عساج دوم..
-روحي.. انت..
علي:فدوة لحلكج..
طول الطريق واحد يباوع للثاني ويبتسم.. مشغل اغاني والسياره طايره بينا..
وصلنا المحكمه.. ماطولنا.. هوايه معارف اله وبسرعه مشينا.. القاضي الي عقد النا همين صديقه.. كلي اختاري شكد تردين مهر..
كلت بكيفك.. حدد من يمه.. 10 ب20 مليون..
كملنا وطلعنا.. ممصدكه.. واخيرا عقد ورسمي وع حسب الاصول..
بقت مستمكاتي يمه.. علمود تبديل الجناسي والجواز..
طول الطريق لازمه ايده.. مااريد اعوفها.. هذا القاتلت علموده هسه صار الي كدام خلق الله كلها..
وصلني ع البيت.. نورس رجعتني كالت خل ينزل يتغده هنا.. وفراس جاي واني محضره الاكل.. رحت كلت اله.. اول شي اعتذر بحجة عنده شغل ويه العميد.. نوب قبل.. اجه فراس ورا شويه.. كعد يمه.. اني اروح منا واحي منا .. نورس مجهزه كل شي.. ع كد ماكرهته قبل هسه تركض اله علمودي هههه.. تغده هو وفراس.. واني ونورس وحدنا..
لان نورس تكول مامتعوده علي ..
قبل لايطلع دز عليه.. سلم عليه .. اريد الوقت ولايام تمشي بسرعه واكون ويا.. خايفه لا يصير شي وتخرب .. قلقه ومااعرف ارتاح..
نورس يمي وتهديني.. تصبر عليه.. وصدك اسمع حجايتهه واهده.. بس همين من ارجع اكعد وحدي اخاف..
يومين اني وعلي بس مسجات.. هو طلب هيج.. يسالني عن حالي واني همين وبس.. حسب مافهمت ميكدر لان وضعه بالبيت ميسمح..
بعدهه لا رجع يخابرني.. من الدوام ومن كل مكان.. يحجيلي تفاصيل يومه كله.. واني همين رجعت لدوامي.. كلي نشاط وواهس..
طلابي مفتقديني.. والاساتذه هم الي ماخذيهم بغيابي.. وطبعا من عرفو انخطبت كلها باركتلي.. هههه شون اجازه هي مال مرض بس رجعت الهم كأني حصان وخطوبه هههه..
ومر اسبوع ع الخطبه.. وكملت الجوازات والفيز.. ردت ازور امي.. بس حايرة بيا وجه الاكيهه.. رحنا اني ونورس للمقبرة..
رحت هل مرة غير عن كل المرات.. صعب اوصف احساسي..
حضنت كبرهه.. عبالك اليوم راحت مو صار سنين..
يمة ردتج يمي.. يمة ليش رحتي.. اني سبب روحتج.. ليش ملك الموت ماانتظر وخلاج تشوفين هذا اليوم... جان ارتاح كلبج عليه.. ومحد عيرج بيه.. الناس كلهه راح سكتت وراح تسكت وعلي صار زوجي.. بس انتي يايمة رحتي بلاذنب.. شكد كنتي تفرحين من تزوجين وحدة بينا وتسليمن العروس بيد زوجهه وتوصينه بيهه.. يمة لعد منو يوصي علي بيه..
منو يجيني الصبح ويصابح بوجهي.. محتاجتج كد هذا الرمل المغطيج يايمه.. اكعدي وشوفيني .. ارضي عليه.. وسامحيني..
نورس:يله كومي كافي !
جرتني جر نورس .. احس روحي بقت هناك يم كبرهه..
رجعت للبيت مكلوبه احوالي.. حتى ضجت من الحلقة الي بيدي.. علي ماحجيت ويا ..

گوميلي يمه بگلبي تسعر نار
محتاج لحنانج فدوة ضميني
گوميلي يمه عيوني اجت خطار
تشكيلج عذابي وغربة سنيني
اسمعيني...
اريد بگبرج اغفه وياج خليني
من يوم الدفنتج يايمه مامرتاح
شلت الهم ييمه من اهد عشريني
طبعج وانه اعرفج ملگة للخطار
وخطارج عزيز وماتفشليني
انفضي تراب كبرج كسري السرداب
وبطيبة كلامج يمه حاجيني
محتاج النصيحه وداعتج محتار...
(منقول)

صار وقت السفر.. هدى اجت وجهزتلي كل شي.. ونورس همين استلمتني حف وهلس ونتف ..
عرس ماكو.. كبل من بيت نورس للمطار.. اجه العصر .. اخذني ورحنا للمطار.. وصلنا اخو مهيمن..كعدنا واحد بصف الخ.. لازم ايدي وكدام الدنيا كلها.. كل مااصفن اكول اني بحلم.. اتذكر شلون كان يطردني.. شلون صرفني وشلون هاني.. وهسه صار ويايه.. وهو الي راد وهو البادر وسوه كل شي.. صعدنا الطياره.. حتى الوقت ماحسيت بي وهو يمي.. لازمين ايد بعض وهو منصي يمي كلش.. وكل شوي يشمرلي حجايه حلوة ..
وصلنا شويه تأخرنا بالمطار.. ع فندق بشارع الحمراء.. جو يختلف والطبيعه والناس..  ظلمة الدنيا والجو بارد.. كملنا الحجز ودخلنا للغرفه الي اخذناهه..
باوعلي وضحك.. سويتيها يامنتهى.. شنو الي سويتي وخليتني هيج مجنون بيج..
-ماسويت.. بس حبيتك صدك..
قرب عليه.. باسني حيل.. موب ابتعد.. كال ارتاحي شويه ونطلع..
كعدنا شويه.. مو كعده عقال هههه لا مال كفره.. اخر شي كال كافي بعد مااتحمل لا اغير رأيي وابطل مانطلع..
طلعنا.. افترينا بالشوارع مشي.. وصلنا لمطعم.. شنو الخدمه شنو الاكل البي.. طلب الي ه ذوقه..
كملنا وطلعنا.. همين رجعنا مشي.. شحلاة المشي وهو طول بطول ويايه..
وصلنا الفندق.. بدت نظرات المكر تظهر عليه .. وصلت كبل دخلت حمام.. واني داسبح فات عليه.. بعد مابيهه مجال.. وخلص صرت زوجة علي اسم ع مسمى..
يباوعلي ويضحك.. هاي مقدمة ترا.. بعد لسه مابديت بشي..
-لاااا.. تريد تموتني شنو..
علي:ههههه لا حياتي اريد اطلع قهر السنين كلها..
.....
وبقيت اني ويا.. ساعات وايام وليالي.. حصلته وصار الي بس ممرتاحه ابد.. كل مااذكر امي ماتت ومراضيه عني احس روحي تشتعل وتطفى..
قبل ماكنت هل كد متأثره.. صح اذكرها وابجي واتمنى ترضى عني.. بس من اخذت علي هل شعور ابد مافاركني.. عشت بقلق واكتئاب دمرني. كدام علي اسوي نفسي ممتأثره.. واسايره واضحك بوجهه.. واول مينام لو اختلي لوحدي ابجي واظل الوب ..  هذا الدمرتي روحج علموده.. هذا القتلتي امج علموده..
اباوع ع علي وهو نايم وانعصر عصر من البجي.. من يصحى يشوفني عيوني مدمعه بس ابد مايسألني.. يمكن يعرف السبب ليش ابجي.. ماله داعي السؤال...
خلصنا اسبوع ببيروت... طلعنا وتمشينا وسولفنا.. بس ممرتاحه ابد..
امشي واني عقلي مو يمي.. حتى علي حسيته بده يمل مني.. خواتي من اخابررهن مااطول وياهن اخاف لايحسن ع صوتي اكو شي.. فطول السفره ماخابرت بس مرتين..
واحنا هناك تعاركنا.. كان يريد يخليني بحضنه.. واني ماادري شصارلي بعدت نفسي منه وتنرفزت كلش.. عاط بيه:هااا شبيج؟ ترا راح تخبليني!
مكدرت اجاوب.. نزلت دموعي كبل اني منتظره احد يحاجيني حتى انفجر ابجي... طلع عصبي وعافني وحدي وراح..
افتر بكل ركن واعيط.. حتى واني هنا ممرتاحه.. تكطع كلبي وهو ماكو..
صارالليل وماجه.. ايست ونمت..
فزيت ع حركه يم اذني.. فتحت عيني علي كبالي ومبتسم.. يبعد بشعري عن وجهي :ها ؟ شلون صرتي؟
كبل حضنته.. مشاعر متضاربه مااعرف نفسي شأريد.. قبل ساعات اني صديته مني وهسه حاضنته وابجي..
حضني حيل وبقه يهزني بأدي مثل طفل.. يحاجيني بهدوء ويكلي:منتهى لا تفكرين بالماضي.. انسي خلص انتهى وراح.. اني يمج هسه وراح نعدي كل هذا سوه..
-علي اني داختنك..
علي:ياروحي.. حاس بيج واعرف.. تردين احذج ع طبيب؟ خوش اكو اطباء هنا..
-لالا.. مااريد ..
علي:براحتج.. بس كافي بجي عيونج راحت..
دفنت نفسي بحضنه حيل.. جمر بصدري.. مااعرف شلون اطفي ولااعرف شلون اهده.. خلصنا 10 ايام .. وصار وقت الرجعه..
بس مو 10 ايام صارت سم عليه.. حتى ماتهنيت بيهن..
رجعنا للعراق.. وبگلبي كومة تعب.. حتى جسمي تعبان.. توجهنا لبيت علي الثاني.. كان مجهزه الي.. حتى مالي خلك اشوف البيت شنو..لكينه اخته منتظرتنا ومسويه اكل.. بوستني وتحمدت النا بالسلامه ..
عفتهم احس نفسي مااكدر اواجه بشر.. رحت للغرفه غطيت راسي ودك بجي.. ع شنو مااعرف بالضبط.. لحد مانمت..
كعدت لكيت علي حاضني من ظهري.. انداريت وشبكته حيل..
علي:نروح ناكل؟ مجوعانه؟
-اي..
علي:اوكي انتظرج..
-بس اسبح واجي..
علي:يله ماشي.. اشواق بعدها هنا واخواني وزوجاتهم راح يجون..
-هاا؟
علي:اي يله كومي..
انقبض كلبي من كال راح يجون.. شلون بيه.. وشلون اتصرف. سبحت وبدلت فستان مرتب.. وخليت مكياج بسيط.. وطلعت ..
اكلنا اني وعلي واشواق وابنها الصغير..
اكلها يجنن.. بس هم مااستلذيت بي.. افكر شلون من راح يجون.. ممتعوده عليهم ولا معاشرتهم قبل.. ولااعرف طبعهم..
كملنا اكل.. واشواق ماقبلت اغسل المواعين كالت انتي بعدج عروسه روحي اني اكمل كل الشغل.. طبعا هي مو محبة بيه.. بس لانو علي كلش مداريها من ناحية الماده.. ينطيها دوم هي واطفالهه..
وره شويه اجو اخوان علي 3 وزوجاتهم.. البيت انملى ناس.. اسلم ومااعرف هذا منو وشسمه.. النسوان اباوسهن ومااعرف شگول صرت.. بس اوتوت.. كعدن وعينهن مانزلت مني ابد.. واني منا كلش متوتره وع ساعه انفجر.. اطفالهم لعبو طوبه يطبون منا ويطلعون منا.. صوت السوالف الاسئله الكثيره الانسئلتها.. حسيت روحي تريد تطلع.. اباوع ع الساعه واكول شوكت يرحون..
علي يباوعلي ويعرف اني مو تمام.. تقصد يكول الهم:احنا نريد نطلع ع اساس.. بس بعد عيب منكم لازم نعشيكم يله ترحون..
هم سمعو هيج وكلهه تصيح لالا اصلا نريد نروح.. عاد صدك تلملمو وراحو.. حتى اشواق راحت..
فرغ البيت.. وصار هدوء.. اجه علي كبل حضني..
علي:شبيج عمري.. شديصير وياج..
بجيت بعد مااتحمل.. خاصه هل سؤال.. يجرح ويفلش:مادري..
علي:كافي.. تعالي للغرفه.. خلي نحجي شوي..
وصلنا الغرفه.. ابجي واشهك ..ساعدني وفتح الفستان وغيرلي ملابسي لبسني مال بيت.. رجع حضني واخذني ع الجربايه..
علي:اي.. منتهى شدتحسين.. احجيلي..
-مادري.. ضوجة وماادري شأريد..
علي:اوديج يم اختج ؟
-لالا.. لتعوفني بس ابقى يمي..كل شي مااريد..
علي:واني يمج.. مراح اعوفج..
بقيت ابجي وهو ساكتت.. كل ماتنزل دمعه يمسحها..
خطيه حتى نام بلا عشا بسببي.. واني همين غفيت .. كعدت بساعه متأخره.. حوالي2 بليل.. فلتت نفسي من حضنه.. ورحت افتريت بالبيت مثل المخبله.. امشي واتذكر شلون كنت ادخله لبيتنا وبيني وبين امي بس حايط..
روحي رادت تطلع.. مداقنع بشي.. امشي وابجي.. مااحس اله ادين اثنين شبكتني من ظهري.. فزيت خايفه..
علي:اششش لتخافين.. ليش كمتي.. تعالي رجعي نامي ولا تسوين بنفسج هيج؟!
-مجايني نوم..
علي:تعالي لعد..
فتح التلفزيون. وخلاني بحضنه وكعدنه نباوع.. صح عيني ع الشاشه بس عقلي مو يمي.. ووين مااعرف..
ومرت ايام واني ع هل حال.. اجن خواتي.. وعرفن بحالتي ورادن ياخذني للطبيب بس ماقبلت.. وحتى دوامي مرحت.. بس علي يروح لدوامه ويتأخر كلش.. يجي ساعه 7 بالليل.. واني وحدي.. اتمنى الموت صرت..
من اصفن اكول هاي حوبة بان زوجة علي.. ومرات اكول لا اني مخبله ..ومرات اكول هاي جزاء لسواياتي قبل..
علي ماعاد يهتم بيه مثل اول.. اذا شافني ابجي مايجي يمي..
ولا يكلي شبيج ولا يكلي شلون صرتي.. وصار الوقت الي يخلصه يمي كلش محدود.. منا هو دوام ويتأخر ونوب كال ميصير لازم اشوف بان والاطفال.. هو عنده ملاك الكبيره وحسن الاصغر..
ليالي خلصت وحدي.. اتمنى الموت ومايجي.. شكو فكرة وشكو شي موزين مريت بي يجي ابالي.. صرت اتصل ع خواتي بوقت متأخر..
خطيه ينفجعن عبالهن اكو شي.. بس اني من الوحده الي بيهه والوجع..
تعودن.. وصرت اخلي كامره مفتوحه وياهن كل الوقت.. ماارتاح اذا مااسوي هيج .. احسهن ويايه عايشات.. واذا كانت وحده منهن مشغوله اتصل ع ثانيه.. وهيج اخلصها لحد مااتعب وانام..
من ابتعد عني علي وصار اكثر وقته غايب عن البيت.. شوي احس نفسي هديت واستقريت.. صح ابجي وعيني ماتنشف بس مو ذاك القلق نفسه الي اول ماتزوجنا... وهو همين.. يتحجج بأطفاله ويخلص الوقت كله يم بان..
واني ياروح شيصبرج من اتذكر هو يمها..
ومره اجاني.. بقه يوم كامل.. كلت اله اريد ارجع لدوامي.. كالهه بحزم وبدون رجعه.. لااا مترجعين.. تخبلت وبقيت اتناقش ويا وهو يخليني احجي احجي ويسكتني يكلي لا..وكافي تحجين..
تخبلت.. ورجعت انتكست حيل.. ايام اتوسل بي وميقبل يرجعني..
يكلي الوظيفه انسيها.. اني ممقصر ولاراح اقصر.. قفل كلش مابيهه اي مجال.. وايست من الوظيفه وسكتت.. هملني كلش.. وماعاد نفس حبه الي بالاول.. تخبلت بالزايد.. صار بيني وبين الجنون شعره..

يتبع..