رواية مابعد الخطيئة الفصل السادس عشر 16 - بقلم Nada hs

#مابعد_الخطيئة

طلع من البيت.. اباوعله بحسرات.. وهو ولا كأن.. سبح وكشخ وعطر نفسه وطلع.. اصلا مو مال واحد رايح للدوام..
انتظرت ساعه وساعتين.. ومااجه.. حتى المسائي خلص الدوام وهو مااجه..
ايست منه.. سويت لكمه اليه من لاجاره.. تعشيت ونمت..
صوفي الليل كله يكعد يبجي.. ومو بجي عادي.. خبلني.. لا يريد يرضع ولايسكت بهز ولا حضن ولا مشي..
هو يبجي واني همين مكابلته وابجي.. شسوي ياربي شسوي.. دكيت ع علي طلعلي انتظار! تخبلت ازيد.. ساعه 1 بليل وانتظار؟! وين تخابر ياعلي..
ماعندي رقم بان.. كان خابرتهه وسألتها عن علي..
بقيت الوب.. 2 اتصلت ومشغول..
وره شويه رجع دك..
علي:شكو خبصيتني؟ شبيج؟
اجاوبه وبيه الف غصه ومنا صوفي يبجي:صوفي مدايسكت! تعال شوف مااعرف شبي؟!
علي:مابي شي.. رضعي زين ودفي ونومي!
-داكلك يبجي هوايه؟
علي:اي عادي كل الاطفال هيج.. يله اريد انام..
-وين انته؟
علي:يم بان..
سديته.. وكعدت اكل روحي اكل.. نسيت صوفي البصفي رايح من البجي..
حضنته وافتر بي بالبيت وابجي.. شبيدي عليك ياماما..
لل3 هو ع فد جره كاعد وكل شوي يصرخ .. اي احس بي موجوع صرخاته مو عاديه.. روحي تتكطع من اشوفه يبجي وماعرف شبي..
مانمت اله ساعه.. كعدت كبل اتصلت بنورس.. حجيتله ع صوفي..
كالت يحوز ممغوص ..غازات.. عندي قطرات .. انطيتهه اله..
شويه الصبحيه احسن.. مابجى هوايه.. ركض ركض كملت شغلي..
اجيت دارضعه.. كان ساكت .. خليت الممه.. ياخذهه شوي ويختنك.. حتى لونه يصير ازرك.. متت خوف نوب وحدي..
رجعت خليت الممه.. شرگ بيهه والگحه مالته رادت اطلع روحه وروحي..
افتريت بي شويه.. ومسحت ع ضهره.. اسمع صوت بصدره عبالك خرخاشه صاير... من شوكت وليش ماحسيت بي.. نام.. خليته بفراشه وبقيت اراقب نفسه.. سريع وكل شوي يفز..
من شفته هيج.. مكدرت استقر ولاارتاح...
انتظرت للعصر.. شويه احسن.. باللليل وهو انفجر عليه بجي.. نوب من يبجي يختنك ويصير ازرك.. ويعرك راسه هوايه..
خابرت نورس بالليل.. جاوبتني مرعوبه...مامنتبهه حتى ع الوقت.. الناس نايمه مرتاحه واني ماادري الوقت شنو...
نورس:ولج خاف افلاونزا ؟
-لا .. صدره متنگ كلش..
نورس:ياا.. يجوز مثلج قبل انتي عندج تحسس بالقصبات..
-فدوة كليلي شسوي.. ديختنك ويصير ازرك.. راح اتخبل نورس فدوة شسوي.؟
نورس:هسه الوقت متأخر.. وباجر عندي دوام.. اخلص دوامي وامرلج ناخذه للطبيب..
-فدوة لا تتأخرين عليه.. داموت والله..
نورس:شبيج ع كيفج كل الاطفال يصير عدهم هيج حالات.. لو ربو لو تحسس...
-خايفه عليه..
نورس:الله كريم كل شي مابي ان شاء الله... رضعي وخلي بحضنج ونامو.. علي يمكم؟
-لا.. وحدنا..
نورس:شبي هذا ماعنده احساس شنو.. روحي نامي حبيبتي واني وامرلج..
-مع السلامه..
كعدت صافنه بصوفي.. شبيك ياروحي.. شنو اليوجعك وليش هيج تصرخ..
كوه رضعته رقم واحد.. ونيمته بحضني. مكدرت اعوفه..
حتى النوم طار مني... علي وينك هسه.. ليش هيج تسوي بيه..
شكم صفنه وشكم غصه بكلبي منك.. اخ لو اعرف شغيرك..
غفيت مدريت بنفسي.. نهاري كله بس تعب وركض مخلص..
كعدت الفجر.. ع صوت صوفي يبجي.. خليت الممه بحلكه همين شويه وعافهه.. صدره ينوص..
مادري شلون انتظرت ع ما اجتني نورس.. صبر ماظل عندي..
كانت جاية بتكسي ومنتظرنا بالباب.. كبل لبست وطلعنا للطبيب...
دخلنه.. فحصه وسمع صوت الي بصدره.. كال سووله اشعه مااكدر اشخص اله اشوف ..
رحنه سوينه اشعه.. ورجعناهه.. طول ما الطبيب مخليهه كباله اني كلبي راد يوكف...
الطبيب:اكو فتحة بالقلب.. وهي الي دتسوي كل هاي الاعراض..
من كال هيج حسيت اني گلبي ال انفتح وصار نصين..
باوعت ع صوفي بحضن نورس.. ماادري بنفسي الدكتور يحجي ودموعي تصب...
الطبيب:راح انطي علاجات تساعده يتنفس براحته.. بس لازم عمليه بأقرب وقت.. وحاليا منكدر نسويهه.. لان بنيته كلش ضعيفه.. ميتحمل البنج..
يابويه.. ع كيفك يا زمن وياي.. مو كلهن سوه.. بهاي اللحظة تمنيت مامخلوقه للدنيا.. وصدك الي تشوف ظناهه هيج تتمناهه وتقصدهه بكل حرف.. لا تنخلق احسن...
اخذنا علاجاته.. موسع قصبات وجهاز تنفس خاف يختنك..
رجعت للبيت منتهيه.. روحي وديطلعوهه مني ع البطيء..
نورس مكدرت تعوفني.. واني مكدرت مااكابل ابني واعيط ع كل السواه بيه زماني ... كومتني نورس كوه من يمه..
نورس:لاتتخبلين .. كومي غسلي وجهج وخابري زوجج واحجليه بلكي تسافرون بي برا احسن..
بس اسمع ومالي قدره ارد عليهه...
رحت غسلت وتمالكت نفسي شويه.. دكيت عليه..
-علي وين انته؟
علي:ليش صاير شي؟
عطت جاوبني وين انته؟!!
علي:شبيج تصيحين ! احجي شكو؟
-ابنك ديموت وانت متدري بينا وين ماوين! انت شنو من گلب عندك!
علي:شكو شبي مصطفى؟
اختنكت.. مكدر اجاوب مكدر اكول شبي صوفي..عسى لساني انكطع قبل لا انطقها.. بقى يصيح عليه بالتلفون احجييي شبي مصطفى!!!
بلعت ريك وانطيتهه دفعه وحده.. كلت اله بي فتحة بالقلب..
محجى شي.. ويمكن اني الي ماركزت.. انسد الخط وعفت التلفون ع صفحة..
صافنه ع صوفي وميته خوف.. عيني متوكف ولاكلبي يرتاح.. انكتب عليه مااشوف الراحة من اليوم الي خليت بي عيني ع واحد مو الي.. وصار الي وكل شي ماحصلت بس الهم والقهر.. هي حوبة وماتتعدى..
ماكو دقايق.. دخل علي للغرفه اول مره اشوفه هيج مفجوع .. كل عمره الحياه زاهيتله ويضحك ممهتم شنو يصير..
اجه يم صوفي خله ايده ع راسه وباسه.. باوعلي بقلق وكال:ياطبيب الي كلج وشوكت اخذتي؟
نورس ورايه واكفه كالت:اخذنا.. الطفل اله شويه يختنك ويموت بيد امه وانت مادري عنهم..
غلس سوه نفسه ماسمع.. اني مركزه نظري بي.. هو يباوع ابنه واني بس مركزه.. اريد اعرف هذا نفسه الي قبل سنوات قاتلت علموده .. هذا نفسه الي بعت كل غالي علموده.. اي هو نفسه.. هذا هو بارد وجامد وما يكسر  خاطره ولا كلبه شي..
كعد مصطفى.. شوي شوي زادت حركته يدور يريد يرضع.. اني لازمه كلبي بيدي .. لان اعرف هذا الوقت تجي الخنكه من يرضع..
سويت الممه.. القرآن ختمته عليهه اله شوي.. خليتهه بحلكه.. بده ياخذهه حبيبي جوعان كلش .. الحمد لله جر خوش جره. بس ع اخر شي كام يشهگ.. كبل رفعته من حضني.. وكفته توكف ومشيت بي.. ماادري بنفسي امشي ونورس وعلي يمشون ورايه.. كام يصرخ وصار لونه ازرك نيلي..
نورس تريد تاخذه من ايدي واني فاقده بس افتر.. ابجي واصيح ولك ماما لاتموت .. ولك ماما تنفس.. عاطت بيه نورس وجرته من ايدي جر.. كبل خلته ع جهاز التنفس شويه صار احسن... نص عمري ضاع بهاي خنگاته عساهه بي ولابيك ..
سكت .. هزيته شويه ونام.. احس راسي صار طبل.. عبالك كنت كاعده بمحل حدادة من صوت البجي مالته. وهوستنا.. كعدت بالصاله تعبانه وحيل مابيه .. علي يباوعلي وهو اباب غرفه صوفي.. عيونه ذبلت وحته وجهه ذبل.. احسه انكسر خاطره عليه من شافني هيج وهذا حالي..
قرب وكعد يمي.. جر ايدي.. ودنك راسه ميباوع عليه..
علي:من شوكت هيج؟ وليش ماكلتي؟
مجاوبته دموعي صبت.. كلش مقهوره منه..
خله ايده وره ظهري قربني اله.. بس احس شي مكسور بداخلي تجاهه..
شنو يسوي وشنو يكول مايشفي النار البصدري..
علي:منتهى.. حبيبتي .. ازمة وتعدي..
-ابني راح يموت..
علي:اشش.. شنو هل حجي..
-علي لتروح خليك يمنا..
علي:مااروح.. باقي يمكم..
خليت راسي ع كتفه.. من زمان مشتاقه اخلي راسي عليه..
جسم ويمشي بي تعب مو دم..
نورس من بقى علي يمنه خلت وراحت .. صار الليل.. علي يمنه بس بعالم ثاني.. كاعد بالصاله وتلفونه بيده..
سويت عشا ع السريع وتعشى.. اريده يرفع عينه النا شوي ماكو.. بس مدنك لو ع تلفون لو ع الماعون..
شسوي وارجع اجذب انتباهك..
ومرت ساعات.. اني بغرفه صوفي وكل شوي يجي علي يمي يسألني ع صوفي ويروح.. لحد ماغفيت.. حتى وهو موجود واحنا ابيت واحد صار ةل واحد مننا بغرفه وحد.. كم مرة بالليل يكعد صوف يرضع وينام..
كعدت الصبح.. رحت كبل للغرفه مالتنه.. انهجرت وصارت حياتي بس بذيج الغرفه اني وابني..
فتت يم علي نايم .. بسته من خده.. صحى..باوع بوجهي وابتسم.. نوب سألني شلونه صوفي.. كلت اله زين.
صفنت بوجهه.. مشتاقه اله.. واريده.. بس ماكو وقت حتى اكعد اشتاق اله واهتم بي.. صوفي ماخذ كل الوقت..
من علي موجود يمي واشوف طوله يفتر بالبيت احس صدك احنا عائلة وارتاح بوجوده. بالرغم حالة مصطفى شالعه گلبي..
بقى يمنه للعصر..طلع ورجع النا بالليل.. صوفي كل هذا الوقت زين..
ع الادويه شوي احسن.. بس ممرتاحه من اباوعله.. ابقى اصفن بي..
اخاف يجي يوم وعيني بعدهه ماشبعت منه.. صبت دموعي من شفته هيج..
زين اذا ممكتوبلي ليش ماوكع وليش صار واخذ معزه بگلبي بس الله يعلم بيهه.. لو مكتوب عليه اشم ريحته والمس جلده الناعم ويترس حظني وبعدين يروح... ياريت الله ياخذ روحي ابداله..
صرت اخذ صوفي واروح لغرفتنا.. اريد الوقت كله لعلي وابنه.. وماريد احرم نفسي ولا احرمهم مني...
صح علي موجود يمي.. بس احس عقله ابد ولايمنا.. حاولت اعرف شبي ماحجالي.. بس كال مضغوط وعنده شغل...
اصفن بي وهو كبالي. اتذكر كل المريت بي .. القلق..البجي ..الدموع .. القهر ..الخطيئة..الاهانه ... وحصلته بالاخير.. بس لليوم مارتاحيت...
بقى يمنه 3 ايام.. بعدهه راح.. خواتي يخابرني كل شوي.. من عرفن بي راح اجتني نورس.. خطيه جايبة حتى طبخ وياهه علمودي ..
نورس:يله حبيبتي.. اكلي وكملي شغلج ومعليج بصوفي اني يمه..
-اااخ.. من شوكت ماكعدت مثل الناس واكلت..
نورس:ديله لا تضيعين وقتج.. واذا عندج ملابس عيفيهن اني اغسلهن..
-لالا هسه اني اكمل الشغل كله..
نورس كاعده يم صوفي.. اني اشتغل وعقلي يفكر.. بمصطفى.. بعلي..
خايفه افقدهم اثنينهم.. مادري هيج فجأة حسيت راح يرحون مني اثنينهم..
اشتغل ومادري بنفسي..
كعدت اكل..والف حسبة بهل بال.. مااعرف شوكت يصفى..
نورس باتت يمي.. الليل خلصناه سوالف.. مو سوالف مريحة.. لا كلها غصات ... سألتني عن علي.. مااعرف شجاوبهه.. اكولها زين وياي لو لا..
بالاخير حجيت الها شلون متغير..
نورس:هااا.. اني اشو هم ممرتاحتله..
-لا تخوفيني الله يخليج..
نورس:لالتخافين.. ماكو شي..
-تدرين ذاك اليوم دكيت طلعلي انتظار ب1 بليل!
نورس:هااا.. وشكالج ويامن يحجي؟
-ماسألته..
نورس:لا ماكو شي لتخافين.. بس ريحي بالج علمود ابنج خطيه..
-ومصطفى.. شلون شسوي.. داموت من اشوفه هيج..
نورس:يعني شبدينا غير ننتظر بلكي شوي يشتد يكبر..

ومرت ايام.. منتظره ابني يكبر.. حتى يتحمل العمليه.. بس من اتعس لاتعس.. ضعيف كلش.. وهو الممه يختنك بيهه
من اشوفه هيج أأيس منه.. ما يوم يمر عليه اذا مااشبع بي بچي..
علي ماموجود يمي اغلب الوقت.. ابني ديموت كدام عيني.. حتى الاطباء .. يوميه نغير شكل والي يشوفه يتعجب من حجمة.. اكابله وابجي بحركه..
شبيك ياماما ليش ماتكبر.. ليش صحتك بالنازل... كل مصايب الدنيا خل تصير بيه بس لا اشوف اليوم الي احترگ بي ع ابني..
تمنيته.. وطلبته بحرگه ومن كل كلبي.. شلته تسع اشهر بس تعب ومداريه نفسي لخاطر شوفه عيونه..
تالي يطلع هيج ليش.. نوب كل يوم يمر ياخذ معزة اكثر بگلبي..
ماخليت صلاة ماصليتها.. ماكو دعاء مادعيته.. حروز وتحصينات..
هه الي يشوف ابني يضحك ع عقلي.. يكول هاي صدك تترجى ابنها يكبر ويعيش مثله مثل كل الناس..
ومرت ايام.. ضعفت حيل وسليت.. يومي يخلص بس ركض وشغل وخوف ع مصطفى.. مرات اشتغل واني شايلته.. مااطلع لا سوك ولا مناسبه ولا اي شي. الي يريديني هو الي يجيني.. وطبعا مالي بالدنيا بس خواتي..
اهل علي يمكن مره لو مرتين اجو شافو مصطفى.. وبيومهه اجت وياهم بان.. اخخخ .. نظرتها تگلي هاي حوبتي وعثرتي بيج..
كعدت كبال مصطفى.. هي الانيقه.. المرتبه.. الوجه مضوي .. بال طويل وكعده مال اميرات.. واني مثل المخبله.. اركض.. اللون شاحب.. اللبس ماادري بنفسي شلبس..
كل نظره منها تشلع روحي.. صدك حسيت روحي مكسوره.. والظهر ماينكسر لغير الضنه..
بان:ماعليه شي ان شاء الله.. ابن صديقتي بالداوم همين هيج وسووله عمليه وصار زين..
دنكت وسكتت...
نورس بيهه كانت يمي.. هي التحجي ويه بان..
نورس:الله كريم.. الله يرحم بحاله..
بان:اي..؟ شلونج منتهى؟
شلت راسي صفنت بوجهه يله كدرت اكوللها زينه..
بان:اذا تحتاجين شي احنا موجودين..
-لا شكرا خواتي ممقصرات..
بان:الله يحفظهن الج..
ماكعدت اكثر من نص ساعه.. طلعت .. الملابس كلها تلمع ومكويه وع حسب الاصول.. الحذاء تلمع.. العطر يفوح وراهه..
رجعت باوعت لنفسي بالمرايه.. ثوب بنفسجي مال عجايز.. شعري لافته شلون ماكان.. عيوني من جوه اسود.. حاجبي هل ثخنه محافه..
نورس:ها؟ شو واكفه هنا؟
-شفتيهه.. هي الصغرت واني الكبرت يمكن؟!
نورس:لا.. بس هي معتنيه بنفسهه وانت ماعندج مجال..
-هه من هيج علي شارد مني.. ديشوف هاي ويروح يمهه!
نورس:اشش ولج هي هم مرته! كل هذا البيج وماتجوزين؟!
سكتت.. اصلا الي يشوفني قبل مايشوفني هسه.. الحمد الك يارب..
ومرت ايام...
احس كل الصار بيه من ماتت امي ماراضيه عني.. الله حرگ كلبي بأبني مثل مااني حركت كلبهه.. عرفت شنو الابن من ينمس .. وعرفت شنو الوجعه التصير بالگلب... كد مااستغفر احس ذنبي ماينغفر لو اغسل بمي زمزم ولو اطوف الكعبه عمري كله...
اجه علي يمنا.. متسوك واشوف الضحكة تارسه وجهه.. ع فرحته اني فرحت .. مااعرف شكو.. بس كافي عليه ضحكته..
رحت يمه.. حضنته وباوعت بعيونه:خير حبيبي.. شنو سبب هل ضحكة؟
علي:يعني شلون ابطل مااضحك؟
-لا مو هيج قصدي.. بس انت مو دوم هيج؟ خاصه بأخر فترة انت تغيرت عليه!
اخذ نفس طويل ووخر مني:لا بس كنت مشغول..
-وهسه راح تتفرغ النا؟
علي:يامنتهى ماتكليلي شبيج؟ يعني اكابلج واكعد؟
-لا.. بس احنا محتاجيك؟ مصطفى واني اثنينا بحاجتك.. اريد نكعد ونحجي بوضعه.. نشوف اذا بيهه مجال نسوي العمليه برا!
علي:منتهى! كافي راسي انسطر! شكد حجيتي؟!
-هاا.. هيج صاير تمل من صوتي؟
علي:اهوووو! عاد وتالي اليوم!
من شغله صغيره ومن كلمتين خله وطلع.. هه عافني مثل الجلب اركض ورا اعتذر واكله لتروح.. اخخ شكد ذليت روحي الك وانت مايوم ذليت..
مو بس اريدك لان مشتاقه.. لا محتاجتك.. اخاف بلحظة يصير شي ويه مصطفى واني وحدي.. اخاف وقلقه اريد ناس يمي.. اريده هو بالذات يصبرني ويكلي ماكو شي.. اريد يكلي نعالجه ويصير زين..
بقيت واكفه اباب المطبخ وعيوني تصب.. طلع ومر وقت واني صافنه وابجي... دخلت لمصطفى.. اباوعله واكول لو انت صاحي هسه مااحتاجيت ابوك ولااهتميت.. بس لا اعرف بنفسي.. مااقتنع بعيشه من دونه.. هو جزء مني .. وعايش بنص روحي.. مو سهل اعوفه لو اطلعه..

مابيه نقص خاطر تكملني..
بس مرات احسك منثلم مني..
بشر..
بس عازتك عازة هوى الله وماي
چم مرة نويت انساك،بس فني..

يتبع...

جدا اعتذر منكم... بس لسبب خارج عن ارادتي..مانشرت وان شاء الله بس ارجع اعوضكم.. اليوم بس هذا البارت

تحياتي للكل😘

ندى.ح.س