رواية مابعد الخطيئة الفصل الثامن عشر 18 - بقلم Nada hs

#مابعد_الخطيئة

الثامن عشر
Nada hs
adaena7 واتباد

بعد ايام.. تحسن مصطفى كلش.. والطبيب كال بعد ماعليه اي شي..
طبعا علي طول هل مدة متذمر ومال كلش. ماخله مكان ماراح زاره..
واني ماطلعت منا لهنا..
رجعنا للعراق.. بالطياره الطريق كله مااحجي ويه علي ولا هو يحاجيني .. مثل الغرب..
اجو اهله استقبلونا من المطار.. دخلت البيت متروس بشر.. جهال اخوانه واخته وخواتي وازواجهن واطفالهن.. كلهه اجت وبوستني وتحمدولي ع سلامة صوفي ومن حضن الحضن وخايفين عليه ومداري حتى من يشيلو..
ارتاحيت من ناحية مصطفى.. بس طلع الي هم جديد.. مااعرف شلون اخلص واطلع منه..
كعدو الكل تغدو يمنا .. الاكل مااعرف منو طابخه.. وهوسه ودوخه حتى مالي خلك اسأل...
خواتي يجيبن ويخلن اكل كدامي واني روحي بخشمي.. اباوع لعلي اشوفه الفرح تارس وجهه ممصدك رجع يمكن وانقهر بالزايد..
اكلت كم لكمة واخذت صوفي وكمت..
كعدت بالغرفه .. ساعات.. اسمع الهوسه بس مالي خلك.. روحي طالعه من الدنيا..
دخلت نورس وهي تنزل برداناتهه وفحطانه ..
نورس:ها.. شو كاعده وحدج؟
-تعبانه ومالي خلك.
نورس:تنامين اطفي الضوه؟
-لالا..
كعدت يمي ونظراتهه تتفحص حالي:شبيج؟ احسج مو ع بعضج؟
-مادري شكولج..
نورس:خير؟ شكو؟
-علي عنده علاقه..
نورس:ها! منو كالج؟ منين عرفتي؟
-اتصلت بي من كنا هناك.. وهددته اذا مرجع تنهي علاقتهه بي..
نورس:يمعوده تلكيها وحده دايحة ولازكتله!
حزت بگلبي الحجايه ودنكت.. اي اني هم هيج كنت بيوم من الايام..
نورس:لا تهتمين كلهه الزلم ادور.. مدام يحبج وعينه عليكم كافي.. درب الجلب ع الكصاب..
-اخر يوم بعمري اخلي هيج يسوي ويدور ويخابر.. اموته واموت نفسي..
نورس:ها رجعتي لسوالف المزعطة! شبيج ماتعقلين انتي؟
صفنت بيهه وكلت:بعد هذا كله تردين اعوفه؟
هدى دخلت:ها مجتمعين بدوني؟!
شذى:ههههه اي جنهن ريا وسكينه!
نورس:تعالن اكعدن..
كعدن وبدت تحجيلهن عن علي.. اني ضايجة كلش ومقهوره وبداخلي نار..
هدى:والله الصدك.. اني علي ابد ابد ماارتاحله.. يااختي مبين ذاك اياه يدور سوالف ونسوان!
-لالا.. هو مو هيج..
من كلت هيج.. تذكرت شكد كان يرفضني وشكد كان يحب بان ومافرط بيهه حتى من تزوجني ابد ميجيب طاريهه لبان.. بس يمكن لان اني هيج سويت ويا وحبيته انفتحت عينه ع هيج سوالف بعد وميكدر ..
شذى:يمعوده طز بي.. قابل تريد تاخذه! مدام يصرف عليكم وممقصر عوفي.
-مااكدر! فهموني مااكدر! بس الفكرة تشعل روحي شعل!
نورس:يعوفهه .. بس اصبري ولا تتعنتكين يمه.. البسي وخلي اهتمامج بنفسج وبصوفي..
هدى:هسه انتو تتحاجون؟
-لا.. ومااريد اشوف وجهه كبالي وهمين مااريده يطلع من البيت..
شذى:لا تصرفين هيج من يحاجيج ردي عليه!
-مادري.. كرهته!
نورس:انتي تكرهي؟ مااصدك؟! شكد سمعتج تونين بي وتبجين! ايام كرهتج بيهه من افعالج ومن كد ماتهلوسين بي وانتي نايمه! هسه تكولين كرهته!
هدى:اووو انسو الماضي الله يخليكم.. ومنتهى صيري خوش مره ولا تكبرين السالفه.. اول وتالي يعوفهه..
سكتت.. بس مامقتنعه بحرف من الي حجو ويايه.. محد يفهمني.. المسواك وجيته للبيت والمصروف مو كل شي .. اني اريده هو.. كل هذولي و بعيني.. اكعد ويا بخيمه ويكون بس اليه كافي..
العصر.. كلهه راحت لبيوتهه بقت يمنه بس اشواق.. وعلي همين طلع..
ماحاجيته من طلع.. بس ميته قهر ومااكدر امنعه.. اعرفه راح الهه يجوز.. ساعات مرت واني الوب..
اخذت رقم بان من اشواق .. طبعا كوه انطتنيا..
خابرتهه .. تحاجيني عبالك مو ضرتهه اني.. كل كلامهه معسول وحلو..
بعد السلام والسؤال..
بان:كولي حبيبتي شتردين؟
-لا ماكو شي.. بس اسأل عن علي اجاكم؟
بان:لا.. ليش وين هو؟
-ها عبالي اجاكم.. كنت محتاجة حليب لصوفي.. هيج ماكو شي!
بان:ها.. متأكدة؟
-اي..
بان:اوكي..
-يله مع السلامه..
اي هسه ثبت عندي هو راح الهه.. اني مالازم اكعد وانتظر هيج ع نار..
لازم اعرف منو هايه.. وشلون وصلت اله.. من طلعت من الغرفه بعد ماكملت اتصالي ببان لكيت اشواق يم باب الغرفه.. من شافتني فزت وضحكت سوت نفسهه دتروح للمطبخ..
-ها؟ اكو شي؟
ضحكت وارتبكت:لا.. سلامتج.. شسويلكم عشا؟
-مااريد.. وعلي يمكن مايجي..
ضحكت وكالت:اي مايجي!
استغربت.. عقجت حاجبي وباوعت الهه:شمدريج مايجي؟
ظلت تفر بعيونهه:هاا.. اي مو يجوز يروح يم بان.. يمكن هو هيج كال سمعته..
-بس اني خابرت بان هو مو يمهم؟!
اشواق:يا.. اي يجوز يتسوك الهم لو عنده شغل صار..
-ههه! لعد بان مو هي الي تطلع وتتسوك؟ صارلهه سنوات هي تتسوك! تعالي كوليلي.. تعرفين شي وضامته عليه؟
فتحت عيونهه حيل والنوب ضحكت:هاا.. لا شعرف قابل شكو واضم عليج؟!
-لا انت تعرفين شي.. احجيلي وخلينا حبايب احسن مانتخارب!
اشواق:واني شعليه.. ذاك رجلج واسألي!
عافتني وراحت بقت ادردم.. كعدت بالصاله.. صافنه افكر وين علي..
اسمع الباب انركع حيل.. راحت اشواق.. كلعه اللوكيه احسهه ضامه شي..
دخلت سبحت ونمت.. كعدت دنيا ليل.. علي لهسه مارجع..
طار النوم من عيني واني منتظره.. كل لحظة تمر اعصب اكثر..
صوت الي اتصلت يتردد ابالي.. اتخيل كلامه وياهه.. اتخيله يتغزل بيهه.. اشتعلت شعل.. اخ كون هو يمي واطلع قهري بي..
يومين وعلي مارجع للبيت.. نورس كل شوي تخابرني واتهدي بيه.. واني صايره رماد..
داسوي عشا من لاجارة اليه.. كصيت اصبعي وماادري.. عصبت كلش.. عوزي بس الجرح اني.. شمرت السجين والبتيته والسله وكل شي بالكاع.
لفيت ايدي بكلنس وكعدت ابجي.. ايدي توجعني وروحي همين..
كمت لميتهن واني دموعي تصب.. ذبيت البتيته وحتى بطلت ماسويت عشا.. اتعشى هم وقهر.. من يوم العرفت علي بي..
رضعت صوفي وكابلته والعب بي.. اريد بس التهي بشي..
وصدك شوفه صوفي نستني شويه.. اسمع الباب انفتح..
ذبيت حسرة كبيره وماشلت راسي.. اعرف بي هو الي اجه..
دخل للغرفه عبالك ميشوفني.. بعد ماطلع..
مرت ساعات واني اكابر مااريد ادخل الغرفه.. مصطفى نام.. واني تعبت اريد انام وملابسي الانام بيهه بالغرفه.. دخلت اجيبهن..
فتحت الكنتور اكلب بس ممركزه شريد.. ذهني شارد..
مااحس اله علي جر ايدي..
جريتهه بسرعه منه..
علي:شو خل اشوف! شبيهه ايدج؟
خزرته وكلت بنتر مابيهه شي!
جرهه .. وخر الوصله الي لافتهه بيهه..
علي:چچ!! هاي شنو؟ بيش تعورتي؟
سكتت مجاوبت.. راح طلع يود واجه.. عقمهه ورجع لفاهه.. يتصرف كأنه ممسوي شي.. كتلني بالبرود الي يعاملني بي ..
-منو هاي التخابرك؟
علي:وحدة ..
-اي اعرف قابل واحد يعني! بس كولي منو هي؟
علي:مو ضروري اجاوبج!
-لا ضروري!! وهسه تحجيلي شنو علاقتك بيهه!
علي:مامجبور اجاوبج واني حر بأفعالي!
-يعني انت ناوي ع الشر مو؟
دار وجهه عني وتغطى ونام..
-داحجي وياك جاوبني! علييي!
علي:اش لا تصيحين اريد انام!
-مااعوفك ترتاح ولا تنام اذا متجاوبني!
كعد ع حيله يحجي ورافع ايده خفت لا يضربني:شبيج! تردين مشكلة بهل ليل! وتالي وياج جزعتيني!
كبل رحت خليت راسي ع صدره.. يمكن خفت لان رفع ايده ويمكن اني مشتاقتله وزعلانه منه بنفس الوقت..
ظل يذب حسرات وماتنازل وحضني.. بقى مبتعد عني..
ضمني اله وكال:اوف منج يامنتهى.. لا تختبرين صبري ابد!
بجيت وكلت:علي اني اريدك.. احبك.. مااقبل تحجي ويه غيري!
علي:كافي بس لتبجين! يله تعالي نامي..
خله راسي ع ذراعه. نمت بحضنه واني زعلانه منه حيل.. بس شسوي.. مااكدر ع بعاده..
ثكلت انفاسه حسيته نام.. اختنكت خنك دموعي تصب سكته.. ايده بيدي واتخيله يلزم هاي الي حاجتني.. اتخيله نايم بصفهه.. عشت بقلق.. وخوف ..
صرت اتخيل بان..واكول هم هيج عاشت؟ هم هيج تخيلت؟
هم هيج مكدرت تنام ليلها؟ كل الي كنت اسويهن ويه علي اذكرتهن..
بس عكست الاية.. خليت نفسي بدالهه. قبل كل ماافكر بيهه واحاول اعطف عليهه رأسا اكطع هل فكره من بالي.. ماردت غير بس يكون علي يمي..
بجيت بجي بخنيگ .. بحضن الجارحني والظالمني وابجي..
وهو نايم رغد لا يمه ولا هامه شي..
كعدت الصبح من وقت.. غسلت ملابس وصوفي همين كعد ورضعته..
دخلت للغرفه ع طروف اصابعي.. علي بعده نايم..
اباوع تلفونه ع الميز بصفه.. اخذته وطلعت من الغرفه.. خليت الف رمز من عندي ومافتح...شكد انقهرت واحس الدم صفر بجسمي..
سمعت باب الغرفه انسد.. رحت مخليه التلفون بجيب التيشيرت.. صبحت علي ومخليته يحس.. رجعت الجهاز لمكانه..
تريك وراح لدوامه.. كلي يجي ع الغدا.. اسوي الغدا واشتغل والف حسبة ابالي..
كعدت شويه واهتيمت بحالي.. مكياج ع تسريحه شعر بسيطه.. بلكي الله يشوفني هيج ويتركهه..
اجه تغده ومابقى اقل الساعه ورجع كمل دوامه..
اجاني للمغرب وهمين كنت مجهزه نفسي ومعطره حالي والبيت وابني وع اخر حبة طالعين..
ماراد عشه.. كبل راح للغرفه.. دخلت ورا بس عاوج حواجبه ولازم التلفون..
-تريد اجيبلك شي؟
علي:لا!
-تنام؟
علي:لا
-تخلي صفاوي يمك؟
-لا!
-علي شكو؟ مركز ويايه؟
علي:ماكو شي! شتردين؟
درت وجهي وكلت:لا هيج مااريد شي..
كعدت ساعات بغرفه صوفي.. نار بصدري.. شسوي يارب شسوي.. ليش مكتوبلي هيج.. شوكت ارتاح..

ها يل چنت كلش ترف
وتسمع الشوغة بنبرتي؟
شو هسه كد ماصيحت طرشه احسهه حجايتي؟
وچن بس انه الاستمع.. ولا احد دره ولا احد سمع!(منقول)

تلث ايام علي يمي ومكدرت افتح التلفون ولا اعرف شبي.. حسيت نفسي وصلت مرحلة خبال بيهه.. وصلت مرحلة ايست من الحياة ومن عمري كله.. مابعيني لا اهل ولا ابن..
ومرت ايام.. ع نفس النار والقهر البيه.. لا عرفت ولا احد سمع الي وصدكني.. حتى خواتي ملن مني كد مااخابرهن واحجيلهن..
كل وحدة بيهن تكلي شي.. ها والله كلهه الزلم هيج.. ها هسه يعوفهه.. وهسه يرجع الكم.. وكله ماينفع ولا يقنع عقلي وكلبي..
ماكو غير حل .. اعزم اشواق وبلكي ازلكهه بالحجي..
عاد صدك خابرتهه.. ومن هذا الكلام الحلو.. حبيبتي وكلبي وعازمتج انتي والاطفال عاد هي كيفت.. اجتني ثاني يوم من الصبح..
مخلت شي مااشتغلته.. تشتغل وتحجي.. واني امشي وراهه.. ماردت اعوفهه ولا لحظة.. قبل اعوفهه اذا اشتغلت والتهي بغير شي .. بس هسه لا اي حرف يطلع منهه يفيدني..
حجت حجي هوايه مايفيد.. ع جيرانهه وع اطفالهه.. ماكو نتيجة.. للعصر وماحصلت منهه شي.. كانت حذره وماحجت شي..
دخلت الغرفه.. باوعت للكنتور.. ماكو غير انطيهه فلوس واخليهه تحجي..
اخذت شدة عشرات.. لفيتهه جوه الغطه مال صوفي وهو بحظني..
كعدت يمهه.. اطفالهه نايمين بالكاع..
-حبيبتي. اني اليوم ردتج تجين ردت انطيج شغله..
عدلت كعدتهه:كولي شكو
-هذولي.. تستاهليهن.. انتي ورده..
ضحكت ودنكت:لالا خليهن ماعدكم خطيه علي ستوهه مسوي عمليه لابنه ووراه مصاريف هوايه!
خفت من كالت مصاريف هوايه..
-لا حبيبتي خير من الله..
اشواق:ها.. اني هل شهر مااخذت منه خطيه ماعنده علي..
-لالا عنده عنده.. بس اريد منج شغله..
اشواق:ادللي بعيوني!
-بس توعديني تحجيلي الصدك واحلفج بروح امج وابوج متضمين عني
شي!
دنكت وسكتت.. شوفي اني اعرف علي ديخوني.. واعرف انتي تعرفين هل شي وتعرفيهه منو هيه ومتكولين.. لا تضمين عليه احجيلي.. لان حتى لو ماعرفت منج اني اول وتالي اعرف! مو ؟ لو مومو؟
صفنت بوجهي..:اني كتلج من قبل عندج شي سألي علي! يعني شعرف اني؟ انتي وياه تفاهمو؟!
-علي مايحجيلي.. واني حلفتج بأهلج.. لتخافين مااكوله منو الي حجالي والله.. وروح ماما مااحجي.. اكوله عرفت عن طريق خواتي ..
دارت عينهه ع الفلوس بحضني كانن..
كلت:هن الج.. بس احجي الله يخليج ارحمي حالي عاد!
اشواق:ماتجيبين اسمي مو؟
-ابد والله!
اشواق:ترا علي خاطب..
عبالك طبر وشك راسي بالنص.. حتى نسيت شلون احجي.. بس بداخلي هواي اسئله.. مادري منين ابدي. احس جسمي ثلج ولساني ثكل حيل..
اشواق:اوووه لو ادري هيج يصير بيج ماكلت.. منتهى؟ منتهى؟! تسمعيني!
هزيت راسي بأي.. دنكت.. اشوف المريت بي بلحظات.. دموعي عليه.. حزني وقهري.. اخطائي الي لهسه ادفع ثمنهه. امي الراحت..
كل هذا ماصار بعينه وراح خطب!
رفعت راسي .. صوتي مخنوك كوه احجي:منو هي؟
اشواق:وحده.. اله تعرفينهه؟
-اي.. كوليلي منو هي!
اشواق:موظفه.. ومطلقه..
-وين اداوم؟
اشواق:مدرسه..بمدرسة....
-عدهه اطفال؟
اشواق:لا ماعدهه..
صبت بدموعي بعد مااتحمل اضمهه:وين شافهه؟
اشواق:صدفه صايره.. بنت خالتهه طالبه يم علي.. وجايه وياهه اكثر من مره.. وصارت القسمه!

وبعد شنباگ؟
وانه انباگت عافيتي
وتگلي الوادم القسمة!
(منقول)
مسحت دموعي:انتي شايفتهه؟
اشواق:ها.. والله كوه علي اخذني.. ماردت اروح.. اي هي حلوة.. كلش حلوة..
-اطلعي من بيتي..
اشواق:شنووو؟
عطت :اطلعي من بيتي بسرعه لا احرگج انتي وجهالج هسه!
بقيت مدنكه وابجي.. بسرعه هي لملمت نفسهه والاطفال وطلعت..
شلت الشدة وشمرتهه بالكاع وراهه.. ورا ماطلعت.. احس روحي اطشرت واتشتت.. مابيه حتى حيل اوكف.. عمريش الي خلص بس هم وضيم.. ياحسافه عمري الضاع وياك هيج..
كل هذا ذنبي حبيته؟ هو لوبيدي كان من اول دكه دكهه اله شلعته وذبيته..
لزمت تلفوني.. اخابره لولا؟ ارزله ؟ اعاتبه؟
لا احسن شي اكله تعال ضروري ومن يجي اتفاهم وياه وجه بوجه..
دكيت اكثر من مرة يله جاوب..
علي:شكو خبصتيني؟ عندي محاضره متفهمين انت؟
-تعال هسه للبيت..
كطعت الخط محجيت اكثر.. اتصل اكثر من مرة.. الجهاز ميلحك يسكت..
سمعت صوت السياره بالباب..
دخل مقزوع كلش ويدور بعيونه
علي:شكو ؟ مصطفى شبي؟ شصاير؟
وكفت كباله.. اضحك.. اضحك ع المهزله السواهه بيه..
علي:شكووو!
-هه.. خطبت؟ بالعافيه.. شوكت تعزمني ع عرسك؟
عوج حاجبه وباوعلي صفح:منو كلج هل حجي؟
-خطيبتك! المطلقه! الشريفه! بنت الاشراف..
علي:لا تخربطين واحجيلي شكو؟
عطت بي كل مابيه من صوت..حتى كلمات طلعن عدل وكلمات اختنك صوتي بيهن:كافي تستغبيني! كافي تذلني اكثر! اعرف كل شي! بس والله والله! وروح امي احركك انت وياهه بيوم عرسك!
بقه واكف مثل الصنم ويباوعلي.. اني من شفته هيج تخبلت..
ملخت نفسي دكيت ع وجهي حتى ثوبي شكيته..
كمشني بأثنين ادي.. وصلني للغرفه..
خلاني ع الفراش.. حيل مابيه ابعده ولااصرخ بس دموع تجري..
نزع ثوبي المشكوك مني وطلعلي غيره.. وهو يلبس بيه يكول:مو كتلج مااستاهلج.. ليش ورطتي نفسج ويايه..
عقلي يرد علي بس مااكدر احجي.. اكله مو عفتك اني ليش رجعت.
ليش تقدمتلي وليش تزوجتني..
اذا هيج ناويهه ويايه ليش رجعتني الف خطوه وره بعد ماردت انساك وعودت روحي بدونك!
راح جاب مصطفى واجه يمنه.. خلاه بصفي وواجه هو من الجه الثانيه.. تمدد صفح وحضني..
مااعرفك ياعلي ولا عرفتك لليوم.. تحبني لو بس تشفق عليه..
تحبني لو بس كاسره خاطرك.. ولو اعرف خاطرك ماينكسر ..
مادري شصارلي بين ادي نمت.. كعدت لكيته ماكو.. لا هو ولامصطفى..
كمت ع حيلي اريد امشي احس رجلي متشيلني ومثل الخدر بيهه..
راسي يفتر والغرفه احسها كلها تفتر بيه..
طلعت كوه.. لكيتهم كاعدين بالصاله.. فاتح تلفزيون ويباوع..
من شافني بقه يباوعلي بترقب.. منتظر شي مني عبالك..

يتبع

طبعا هل قصة بيهه شي😕 كل مااريد اكملها لو يعطل الفون لو يخلص الاشتراك الله اعلم منا مااختمهه شيصير😭
كنت اريد انشر هل بارت ويه ال17 بس فجأة راح النت😡
اسفه لان تأخرت عليكم حبايب