رواية مابين النسر والشيخة الفصل العشرون 20 - بقلم زهراء العراقيه

حسين

امي كالت
هاي جواهر مرت اوليدي حسين
تعالي يمة سلمي على مرت حماي ام ناصر

اتقربت جواهر وما كان بودي تطلع الهم ولا تتعرف عليهم

ها اهلا وسهلا ... اتقربت سلمت على ام ناصر .... بس ما عجبتني نظرات احلام لجواهر اللي سلمت ابسرعه وطلعت

ام ناصر
هي هاي بت الشيخ ...
كالتها بغيض ...

اي هاي مرتي ...
كلتها مبتسم ... اللي ادري عنه خطبوها لناصر وما انطاهم الشيخ وهسة  اني تحت حماة من ضمن اولادة اعد ....

احلام
على الخير ولو انتم ما عزموتنا وسويتوا أفراحكم بوقت احزانه ....

امي كالت

من اتوفى ياسر يا يمة ما ندري صادف بنفس وقت ملچة رغده

اي وما انتظرتوا الحزن يخلص و زوجتوها

امها سكتتها ....
هسة مو وكت العتاب ...وانشالله ماكو عتاب بين الاحباب ... بس يمة حسين .. لازم تقدم عمامك لناسك ويجون يخطبون  اختك منهم هاي الاصول ترة

ليش  اختي و يطلبوها مني واحنه هم صرنا اهل ابو قيس نسيبي   ما يحتاج كعده رسمية ...

كلتها متقصد اسمعها  وافهمها اني وين صرت .... وسويت الي رادو عمامي  ..

اشوية وراحوا ...اجتني امي تلوم يمة اشبيك جنت تحجي وياهم هيج  مهما كان ذولة اهلكم

يا اهلي انت الثانية ......

رحت للغرفة ناسي تلفوني  اني رجعتي هيج وقت على مودة ...

شفت جواهر كاعده ومطيتني ضهرها ...
جوهرة

كعدت يمها

ليش ضايجه

هاا حسين رجعت تاخذ تلفونك

اي بعدها يقين ما تحجي وياج

هزت راسها ب اي

حبيبتي لا اضوجين مسألة وقت

ما اعتقد

اني نصحتج لا ادخلين نفسج بهيج امور

اشلون ما دخل نفسي .. ذولة اهلي من يدخل عيلنا عزيز بوحده بت شوارع حتى بس يعند وية ابوي ما ادخل 
المهم هاي الحية نغم اتخلصت منها واتحمل العواقب

نغم نغم هسة حتى اسمها كرهته

اهااا اخاف من اذكره اتحن الها

ولو هي كلامها يزعج بس على العكس حبيت شكلها وهي غيرانه ....

كوم حسين ارجع لشغلك

اي دوم ضايجه صيري مثلها

وكفت ثايره واني اضحك عليها

منو هاي اصير مثلها ...نغم الفاسقة ؟؟؟
اعيونها صارت اكثر اثارة وهي تخزرني بقوة و مصعد حاجب ومنزلة الثاني

اروح الم ملابسي احسن

هههههههه
ها صدك فتحت الكنتور ...وكفت يمها واحك بلحيتي  اضحك عليها

نزل الي الجنطة ..

دتعاي جريتها
اشرت بحواجبها

ارووح لا تلزمني
حضنتها من خصرها .....

انت ما الج شبيه ........... انت وحده وحضيت بيها اني ............ منو الي اتجي يمج شي؟ ....... محد انت وبس ........ لو النسوان مثلج جان عشنا بسلام . شرف واخلاق وعفة و كل هذا كل تصرفاتج عقلانية تمشين بالمنطق اكثر من العاطفة ..... مو مثل بقية النساء وهذا النادر البيج ...

ابتسمت اهااا غيرت يعني

ما غيرت يا غيورة ...طلعتي نار

لزمت لحيتي

طولانه خفف منها ...

غيرتي  السالفه ههههه تعالي خل نكمل طولي بزعلتج  وخل اراضيج ...

ماكو

تعالي

ارجع لشغلك  .....بس بالليل .....

اخذتها  لحضني  و بستها وذبت بيها ...وخرت عني ببطئ وكالت وهي تلهث

اروح اساعد ليان ...

اي روحي
..وصلت يم الباب وما حست على نفسها غير وهي مرفوعه عن الارض

هاي شنو

اني الحاكم اهنا واني الآمر  الناهي   حطيتها على السرير ورحت قفلت الباب ...

........
تمت خطبة ليان بحضور عمامي لأن محسن وامي ضغطوا عليه الا قبلت ..
وبنفس الكعده جايبين الشيخ خال عزيز   اللي عقد اللي اشكد احبه هالبركة على ايدة  دخلت الدنيا من جديد مع ارق أنسانة..

ما طولت خطبة ليان شهر وبدت تطلع اهواي هي وجواهر اجهزن ومرات تجي رغدة ........

عزيز صار صديقي والي اعرفه ما مرتاح بعده .... مرتة الثانية ما اتريدة بس لأطفالها عايشة وهذا الشي هو وافق عليه قبل الزواج بس يعقد عليها تلم اطفالها ...  كونه تكفل بيهم كأخ لأبوهم ..  
اما الاولى بس تخلق المشاكل .....

***
ليان

بعد ما عقدنا اني و قيس شفته اكثر من مرة  وتبادلنا الارقام .. بالاول كنت حذرة وياه وما انطي مجال ماعندي مواضيع مشتركه وياه لكن بنهاية الشهر واني اجهز بديت اخذ عليه خاصة هو ما مخلي حواجز بينا يشاقة ويضحك اهواي ..واهواي يحجي ...صرنا نسهر لنص الليل مرات اتمر ساعه وهو بس يحجي واني اسمعة
اما عزيز ما اعرف  احس صرت اشوفة مذنب بعد ما كان ملاك ... يعني ظلم مرته وكسرها بزواجه للمرة الثانية .... اشكد كنت اتنماه بس ما يوم تمنيت يسوي هيج 
من اسمع باسمة   گلبي ما يرجف ذيج الرجفة الاولانية لكن اتوتر كأنه ذنب ...
اما قيس فرض نفسه فرض
حتى هو يطلع ويختار ويانا ....

واجه يوم عرسنا    كان يوم من العمر .......  بأفخم قاعة وفندق  .... وطبعا جواهر واكفة وياي وام قيس بس اتعيب ما عاجبها شي المصيبة جدهم امر رباب مرت اب قيس تجي و اسلم على ام قيس بالعرس ما عدهم عود تفرقة والامر لازم ينفذ

اني كاعدة على الكوشة البيضة والي اتحيطها ازهار الياسمين ... دخلن نسوان كبل للمنزع  اظن وحده منهن رباب....

جواهر جانت يمي رادت اتروح

لا اتعوفيني

ضحكت
ليان اشبيج هيج خايفة ترة مراح ارافقج للغرفة هههههههه

عافتني وراحت ...كانت مثل البدر ...
اهنا دخلن نسوان عمامي واحلام  و امها .. 

اجتي ام قيس يمي وكفت
واسلم على نسوان عمامي

***

يقين

اجتي رباب وشفتها اشلون صايرة رشيقة وياهي التجي تسالها شنو من حمية مسوية تضحك واتكول الزمن هو اللي غيرني وبهاي نصفني وضعفت ... راجعة  اصنف وتضحك اووف منك جدي ومن حكمك من كلت رباب تجي واسلم على ام قيس اوووف اووف انت راح اتخليها تقهر ام قيس

قريب الغروب دخل حسين بهيبته توني انتبهت اله بارزة عنده كم شيبة حلوة قاطة هالمرة بني .. دخل لاخته من شافته دموعها طلعن .....اني يمها ....حسيته هو هم دمع وباسها من راسها ومدري شنو همس

***
ليان

كال الي
صيري سباعية وحافظي على بيتج الجديد ....

باسني ... و دخل قيس وابوووه والشيخ هم .....

اخذني عزيز اقصد عمي عزيز من ايد حسين وحط ايدي بايد ابنه و ام قيس وكفت يمنا تهلهل وهوسات ...
اني احس ايدي انتقل الها دفوو ايد عزيز .. بس ايد قيس خلتني ارتجف و احس بطاقة تجدد بيه
حسين طلع وتركني اباوع وراه .... واباوع لأمي الي مكترة على صفحه واكفه وتبجي ....هاي هي راح افارق عائلتي ..

الشيخ طلع ... بعد ما اخذولنا صورة وياه .. كان فرحان بزواج اول حفيد اله

بس عزيز بناته ما قبلن كالن انريدك تاخذ صورة ويه امنا ...راحت الام نزعت الحجاب والعباة ورجعت ...

***
يقين

امي اني ومرام صابغات شعرها سلفري و بدلة وردية تزهي .. ..

صفن عليها ..
هاي شمسوية ؟

ابتسم ووكف يم العروس وطكينا صور وياهم ...اهنا طلعت جواهر و رباب متلفلفة بعباة وجواهر خالعتها ولابسة قاط حلوو مغيره الفستان

سلمن على ابوي ...  ورباب باركت اله على زواج ابنه...هو صارله اسبوع ما شايفها لان اني ومرام عايفات ابيوتنا ونحضر للعرس و لازكات بيه بالبيت رغم علاقة بامي تحولت باردة حتى عرك ما بيها لان من تحجي وتتعارك يسكت صاير حتى ما يجادل .... بس هو التزم ويانا بيتنا يحب لمتنا احنا اولادة ..

مرت جدي من غيضها من امي كالت

رباب يا ليش متلفلفة دنزعي العباة وتعاي اخذي صور ويه العرسان ورجلج

لا لا انه شنو خل ام قيس تاخذ

عود يابة مسوية نفسها خيرة ...

جواهر
عوفج من العرسان تعالي نكص صور ويه ام قيس ترة احنه بنات خالات ..

هي امي بالكوة متقبلتها بالحفلة ورضت اسلم عليها يبووو يا عمة ...

بابا جان ياخذولة صور كل اشوية هوسة توكف يمه ويه العرسان ويطكون ساعه خالات ساعه عمات ساعة البنات  ...

وجان يشوف رباب من سمر الخبيثة اللي صرت اموت منها اشلون تتلوك لرباب .. نزعتها العباة ووكفت يمهن حتى ياخذن الصور
  اني اهنا ودي الارض تبلع رباب ..صايرة رشيقة و لابسة ثوب اسود اسواريه وعقد كرستال و مكياج  سموكي طالعه كانها لعابة ....اني و مرام وحده اتباوع للثانية
بغيض اوووف

عزيز
روحي رباب البسي عباية
صوته خشن ...كلها سمعته

وهاي عود خجلت ادور عباتها سمر انطتها الها  .. اتريد تلبسها وكعتها  ... و جواهر تضحك ..... ترجف واحوالها اتخربطت ...

جواهر حتى اتخفف الحرج

عادي هي مثل امه للعريس 

.انحرجت اكثر رباب وبابا اكلها اكل بعيونه وعمتي اااخ يا عمتي سحبت منها العباية وراحت يم  بابا  خلتها  يمه وهي ابصفهم وكفت وكالت اخذونا صور ....
وكفت يم امي اخوزر بيهن .. 
واشوف بابا اشلون هام بيها ... شعرها اسود ما صابغته هالرباب ..  اووف مكياج امي برز عمرها والتشنجات اللي بوجهه هاي مكياجها افضل اووف وحتى الثوب شو گلب عليها ويه الشعر صارت مصنعه من وكفت رباب ظليت بس اقارن ... بس امي مرة واصلة للخمسين ورباب توها تلاثين . العمر هم اله حوبته ..
طكولهم صورة وابسرعه رباب لبست العباة وشردت عن الانظار بس بابا ظلت انظارة وراها وراح ....
امي اهنا تركت قيس ابنها وراحت اختفت مدري وين
سالت عنها كالو بغرفة المكياج ...
رحت اهنا النسوان بدت تطلع   و لبسوا العروس وطلعت  و القاعه بدت تفرغ وامي ماهي يم ابنها ..
دخلت شفتها واكفه وو جهه عليه شافتني وجواهر و جهه على امي

امي بسرعه كالت
اش ما اريد بناتي يدرن ...
شنو ندري

سكتن من شافني .. وامي كانها باجية ...

و جواهر انتظرتها تلبس و طلعنا سوة ...

شنو كالت لأمي ؟

.....

ثاني يوم الصبح هوسات العالم ...احنه مسوين عزيمة غدة وذبايح وخصبة

وامي من يوم الصباحية اشتغلت حقد على ليان بس اذبذب حجي اطلع حركة رباب بيها  .. اللي البارحه اجه اخذها من بيت جدنا بالليل  وما قبل تاخذ ولدها ظلوا يم بيت الجد مكيفين بالهوسة

التهينا بالغدة للمعازيم ورباب اجت  جابها ابوية من الصبح
وامي بس اتريد تكتلها والثانية ولا مهتمة ...

بعد العرس بقيت كم يوم ...
لاحظت على بابا تغير جذري ...دومه مبتسم ... وامي سوتلة عركة لأن قيس ودة ليان لهلها وهي مطالعة السابع اشكد كرهتها هاي ليان المهم بابا ماله علاقة وسوت العركة وياه ... لا رد وجادل ولا زعل  واجهه ببرود قاتل وطلع من البيت ..!!!

***

حسين ...
من رجعت جواهر للبيت واني الحسبات اجيبني وتاخذني ... صارلي يومين حاير و ضايج .....

***
ليان
حسيت بخنكه وغربة واني اهناك ... وقيس بس يريد رضاي لأن احسه متعاطف وياي حيل ... اخذني لهلي ...نهار ورجعت ...واتلكتني عمتي برزالة نااااشفة
ما مرباية على الاصول ومو تربية عشاير ..
تذكرت اهنا جواهر من امي هم اتزف بيها تسكت وتكتفي بالسمع ومن اتخلص امي زف اتكوم ... سويت مثلها وسكتت ...يمكن حقها بس شسوي غصبا عني رحت لهلي حيل مشتاقة لبيتنا ...

***
يقين
مرت عشرة ايام
وامي تشكي من ابوي اتكول اقل كلمة ما يجاوب صاير و يطلع من البيت  .. حتى اخر مرة ما رجع خابرته ...يكول ما اجي عيب كدام مرت ابنج اتعلين صوتج عليه خلينا هيج افضل النا...  وكله يم رباب ..!!!

***
حسين

الحيرة  و الغيرة حاوطت وغلقت على كلبي لازم أسالها بعد العقل غاب عني

رحت الها جبتها  من المطبخ واخذتها للغرفة

هااا حسين شكووو

اكلج بس عندي سؤال

اتفضل

اي يي هذا اقصد عمي ابو ناصر يعني ..

اشبيه

اجه خطبج لأبنه بالماضي

هااا ما ادري يمكن عادي اني خطابي اهواي

كالتها برتباك

اي اهواي هههه بس  بتهم جانت اتعرفج نبراس صديقتج ..  من خطبوج لناصر اخوها ليش ابوج رفضهم ...

ها حسب علمي يعني . بابا رفض لان  لان

ناصر بعده ممتوظف ؟؟

ها اي ابنهم ما عنده وظيفة

ناصر

اي ناصر ابنهم الجبير

هااا خوش لعد

شنو الخوش

يلا ارجعي لمطبخج ......
راحت متوترة واني النار اشتعلت بيه جذبت ليش جذبت ...
زاد الشك وتحول يقين بأن كلام ختام بيه صحة ... بينها و بين ياسر قصة حب قديمة والا ليش ما صححت ببساطة ان الي خطبها ياسر مو اخو ناصر اصلا مزوج من خطبوها اني جنت متوهم ما اعرف  المن رادواها لان محسن وصل الي خبر من جنت مسافر بان اولاد عمي راد واحد منهم يناسب الشيخ ببته الوحيده وما انطاه .....

فكرة ان جواهر جانت تحب شبيهي ما خلت عقل براسي .... جذبت بكل برود وراحت ....اذن الكلام اللي كالنه نبراس واحلام  لختام ورغدة صحيح بينها وبين ياسر حب قديم ........

نزلت ما اشوف اللي كدامي  ..
سمعت صوتها وراية

حسين ....حسين وين طالع العشة راح يصير ....ما التفتت عليها ...و رحت للكراج ......

***
يقين

حطينا العشا على الميز ..
وكعدنا
ختام

يقين شنو رأيج بتلفوني الجديد

ها واخيرا شريتي واحد ..

ممم رغودة جابته الي
وحطته ابصفها يم الماعون

جواهر ما شاركت بالحديث وجان بالها مو يمنا ..

اها على الخير بس ادرسي ولا اظلين بس اتكنكين

لا عيني اشعندي اني قابل عندي علاقات وحب ..لو حبيب ينتظرني بباب المدرسة هههههههه
شو تباوع لعمتي الي بالها مو يمها وتضحك

***
حسين

رجعت للبيت نص الليل ضايج لا اكدر احاسبها ولا اكدر اتغاضى الغيرة والشك دخلن لگلبي شنو صاير بينهم وشنو نوع علاقتهم .... بس هي شريفة .. يمكن علاقة عابرة بسيطه هي صديقة اخته جانت حسب ما كالت نبراس ..واكيد شايفها  و خاطبها ... اكيد ما لازم ايدها 
مو هذا المهم اني اعرفها كلش زين ما تمشي اعوج ...بس اللي راح يخبلني لا اتشوف ياسر بيه ....  اتعاشرني وتتخيلة ..اشلون اتوافق تزوج واحد بيه لمحة شبہ من حبيبها السابق اذا بينهم علاقة حب مو بس سالفة خطوبة .

دخلت للغرفة ...
كامت الي وعلى وجها القلق

حسين وينك حبيبي .. اجتني و حاوطت بكفوفها وجهي

حبيبي مو اتفقنا ماكو سهر باستني واني اعيون ادور بيها الحقيقة ..
وخرت عنها ...

اشبيك حبيبي ...

ناصر من خطبج وين شايفج

اشبيك حسين ليش لزكت لناصر كولت الك خطابة عابرين حالهم حال غيرهم حتى بابا ما يذكر السالفه لانها سالفه نسوان وراحن لا اكثر ..

عابرين  وكعدت وهي يمي اجت

اي  عابرين حتى ناصر لا شايفته ولا اعرفه

كمت على حيلي مضايق من جذبها
لزمتها  من حنچها

اذا هم عابرين ليش الجذب ؟؟؟

اعيونها توسعن عليه

وخرت ايدي عنها 

وبأنظارها تستفسر مني

شنو نوع علاقتج بياسر ... 
شفت بعيوني رجفت سرت بيها وخوف واضح .....

ح حسين ...

اي احجي
سكتت وسكوتها موتني ...
كعدت على السرير وحاولت افهم منها شي لكن سكوتها عصبني خفت افقد اعصابي اكثر واندم عفتها و نزلت للاستقبال .... 

الصبح ...

الدنيا ضاقت بيه سكوتها اكد الي صحة الكلام دخلني بمتاهة  لا اكدر احاسبها على ماضي ولا اكدر اتقبل الامر صعب من اتكون عدها علاقة بشخص اعتبرته نظيري  بكلشي تاليها حتى النحبها تطلع نفسها .... !!!!!! لو خطبة وما صارت مو مشكلة بس مو حب وعلاقة !!!

صعدت مثاقل الخطى ....

جانت هي الثانية هم كاعده ..
دخلت اخذت ملابس ورحت للحمام ..طلعت ... اريد اكمل لبس واطلع

لكيتها لابسة عباية وحاطه يمها جنطة ملابس صغيرة

ما حجيت بس باوعت للجنطة ورحت امشط ..

حسين وصلني لهلي ....صفنت عليها من خلال المراية

افضل الابتعاد هاي الفترة ... احسن لاثنينا واعوفك تفكر وترتاح هم ...

ما رديت ... بهذا موقفها اكدت الي وما جذبت شي جنت اتمنى تستمر بالجذب و ما اتأكد   ... !!!
اخذتها واثنينها نتهرب من انظار بعض ...دخلت لبيت اهلها وما باوعت وراها ......

ايام وافكاري ما رحمتني كلساع بفكرة شكل تاخذني غيرتي ....

***
يقين
عمتي راحت لبيت اهلها وكلنا شكينا بينهم شي لان ماخذه جنطة وباتت وهاي مو عوايدهم يتفرقون عن بعض ...تاكدنا بينهم شي من ظلت ثلاث ايام ...خابرت امي اعرف شصير اهناك كالت الي اظن عمتج رجلها ما يريدها ذبت بيت اهلها وما سال وهي مريضة هسة حيل

اني علاقتي بعمتي صارت بس سلام بارد من اشوفها بالبيت ولا احجي وياها ...وهي جانت  تداري ابني بغيابي وبوجودي ما تتقرب اله وهو يركض وراها كرامتها و كبريائها اقوى من اتنزل من نفسها اشوية وتحاول تعتذر مني ..

***
حسين
سمعت من عزيز  جواهر متخربطة ...ونايمة بالفراش صارلها ايام ..

عفت كلشي بايدي ورحت الها  جانت الدنيا عصر....

دخلني اخوها علوان ... و مرت ابوها اذنت الي اصعد الها فوك ما تكدر تنزل ..
سوت الي طريق وصعدت ....شفتها مطروحه على الفراش ... وعلاكه دوة على الميز غير الكانونة المشكلة بأيدها .....

حسين ..
اشلونك

صوتها ضعيف وتعبان

بست كصتها ..

انت اشلونج ..اخذت ايدها بستها ....

ما اتحملت اشوف المرض ماخذ منها حيل .بوستها من خدودها وضليت ابوس بيها اعتذرا وخوفا من خسارتها ...

ليش هيج جسمج حار

من احزن هيج يصير بيه ..

كالتها وي اتكح ....

سندتها وحطيت وراها مخده

شربتها ماي ...
والعب بشعرها

اول مرة اشوف شعرج هوسة

ابتسمت بخفوت

بس اتخبلين ....

اني خجلانة منك ...بس والله جنت مراهقة...

حطيت ايدي على حلكها سكتتها

لا اكملين ....مالي حق بالراح اعرف ...

سمعنا صوت رباب بالممر اتسلم ..

باوعت للحمام وكلت الها

هذا الحمام اهنا ...

اي
توب هاي غرفتج احسن من غرفتنا بعد نبقى اهنا ...
ضحكت ورحت دخلت للتواليت ...

سمعت رباب دخلت سلمت خلصت ابسرعه و رحت يم المغسلة .. اعدل بشعري

واسمعها   اتلوم بيها

هيج دهورتي نفسج ...لو كايلة خطبني وما صارت قسمة ....ليش جذبتي ..

ح حسين جو

جواهر تكح

هسة يا خوفي نبراس اتكول الهم شافتج ببيتهم وحدج وية ياسر مختلين اووف  ....

اريد افتح الباب ايدي ما اطاوعتني واذني متستوعب اللي اسمعة .. !!!

لازم انشوف هاي نبراس  ونتفق وياها
لا تفصحج اكثر

اش  حسين ...اه اهنا

حل السكوت وطلعت من الحمام واثنينهن اعيونهن عليه

اتباوع الي بخوف لا سامع شي ...واني اعصابي اشنجت وحسيت بالعار ...

هزيت ايدي
واندارت انظاري بينهن رباب حاطة ايدها على حلكها 

اخذت تلفوني و مفاتيحي على الميز يمها ..

حس حسين ...وين رايح

لزمت ايدي  سحبتها منها ودفعتها .. 

ورقتج راح توصلج
لزمتني مرة ثانية

وخري 
دفعتها  وطلعت و
رباب
عزة العزاج يا رباب
اسمع خوية ..  تعال

عفتهن

واني مسطول ..
حسيتها وراي تمشي وخلفها رباب

تعال حسين .. لزمتني من ساعدي .. اوكف الله يخليك نزلت ابسرعة ...صار بوجهي ابوها وهي وراية تنزل  ...وعثرت ورباب لزمتها .. ما اعرف اشلون وصلت يمي وابوها يسال
اشبيكم ؟؟؟

حسين الله يخليك تبجي وتترجى توه رجع الها صوتها الخداعه ...

دفعته كدام ابوها ..

اشبيكم .. كومها وهي عافته ولزمتني من ياختي

حسين  والله

وخري لعبتي نفسي
وكعت بالارض
واهلها نصهم طلعوا على اصواتنا
بس اريد اطلع حاس الدنيا دارت بيها ووصلت للنهايتها ماكو تالي بعد ...
.وهاي تتجرى وتبجي
وابوها يوخرها عني وترجع تتوسل ...بس اريد اطلع الباب صار شبعده  عني

***
ليان

عمتي سمت بدني ورحت لبيت الجد يم رغدة ...  نزلت من غرفتها من سمعت اصوات وحسين معصب وشفت جواهر تتوسل لحسين يسمع وهو يدفع ويريد يطلع وعلوان يساله اشبيه وابوها يلزمها ويوخرها عنه وهي ترجع تتوسل جانت منهارة على الاخير وما حاسة  بالي حوالها

رغده
يا هاي اشبيها
وكفن نسوان اخوتها يتفرجن 

حسين بس اسمعني
وخري
علوان وخر بس اريد  طريق خلوني اطلع منا ..

بدا يفتح اول دكم قميصه . مختنك

اشبيك حسين
ما انتبه الي

والشيخ ساله اشبيك

عمي هاي بتكم يمكم  .. وخلصت السالفة ...

عايد
شكو شنو اشبيك ليش هيج

خوية بس اريد اطلع
صايرين بطريقه

حسين والله الي سمعته غلط ... حسين اني اموت اذا طلعت  انت هسة ... ظل الله يخليك

بوية لا تتوسلين
سو اله طريق وخروا منا

راد يطلع .. وجواهر لطمت على وجهه

ليش بوية هيج
تعالي ادخلي لغرفتج
عافت ابوها وراحت للحديقة اتريد اتلحك بيه وكعت على الارض و لزمته من رجله

الله يخليك ...

بالكوة جانت تنطق صوتها مبحوح
رباب كومتها
وهو باوع الها ولمحت دمعة نازلة من عينه وخلة وطلع ما التفت وراه وهي تنحب ورباب اتحضن بيها واهلها اجو وراها .. 
دفعت رباب و ضربتها ونزلت عليها ضرب
كله من وراج كله من وراج ..
شبعتها ضرب واحنه وخرناها عنها وابوها بالكوة دخلها لجوة
بس جانت مثل الغايبة عن الوعي

تعالي يا بعد شيبان ابوج ليش هيج اتكسريني .. تعالي ..
حطها على التخم بس هي مغمضة ووجه مغسول بدموعها .

يتبع

اكو مثل يكول اذا وكع الجمل كثرن سچاچینة
ترقبوا الفصل الاخير غد او بعد  غد ..
اريد تصويت +تعليق لتصل القصة لأكثر عدد