رواية مابين النسر والشيخة الفصل الرابع عشر 14 - بقلم زهراء العراقيه

#مابين_النسر_والشيخة

قدك المياس
من كتابات زهراء العراقية
الفصل الثالث عشر

يقين
مدري افكر بمحسن وعركتنا مدري بعركات ابوي وية امي اوووف خاصة بعد ما تزوجت مرام كام يصيح علني اريد ازوج .جانت اشوية سادة مكان بداخلة  وتحبة حيل واداريه و تسولف وياه مو بنته صديقته اشلون عمتي جواهر وجدي بالضبط من ازوجت ظلت بس امي بوجهة

دخلت عمتي شافت دموعي جانت توها جاية من بيت حسين

اشبيج يقونه
مسحت دموعي ودرت وجهي

مابيه هيج  هيج

ولج داتبجين
كعدت يمي وفرت وجهي مسحت الرطوبة البيه

اشبيج ؟؟؟

عمة محسن ما يحبني .... ما يهتم الي ..اتعارك وياي

اها  لهذا السبب مارحتي وياي اليوم

اناشغ واحجي

عمة اكوله افتح كام اشوفك شسوي بالشغل ما يرضى واخابره ينطية رفض

شي اكيد غير باب رزقة اشلون ترديه بس الج

لا عمة جان يفتح هسة مدري ليش متغير

لأن مل وهاي عادة الزلم من تتأكد من المرة صارت الهم اتصير من الروتين ما يحبون الاحاح و النكد ابتعدي عنه

لا هو عنده شي متأكدة

لا اخذيها مني ماعنده هالفاهي ما يعرف اشلون يرضي مرته ويرضي نفسه ..
يرادله  دورة يم اخوه ابو النسوان

هسة شسوي

كافي بجي ....لا اصيرين شبيهة رغدة

عاا لا ما اشبها

اصيرين مثلها اذا ظل هذا فارغ ويكبر الامور

اشرت على مخي
وحتى لو عنده وحده شنو يعني طلعيها

هااا
شطلع اني وين كرامتي والله لو أتأكد منه اعوفه

على كلامج هذا اظلين من غير زواج ... ماكو رجال ما ازوغ عينه يا عين عمتج ...كلهم نفس النمط ... عينهم على اي جسد يمشي على الارض  مدام قرب يمهم

المهم الصوج بيج  اشغلي نفسج عنه لا اتخنكيه

اقري ادرسي  ...

وباجر اعزمي صديقاتج يمنا رفهي عن نفسج بكعده بنات ... يلا يقونتي ما اريد الذبول يعرفلج طريق
كرصت وجناتي
كومي
يلا وانت شبه امج ما اعرف شحبيت بيج

ضحكت ورحت للحمام تسبحت وطلعت نمت بحضنها ....
رن تلفونها  رفعته  هي كدامي وشفته حسين ...

ما ردت فصلته ورسلت اله
يقونه بحضني ...روح نام ....

طردته للمسكين عبالي راح يزعل ..
رسل الها ((ليتنا كنا يقين !!!!))
ضحكت ..
ردت رسلت
نام حبيبي ...

ونزلت الجهاز ع الميز
اووف اشلون عدها قدرة هيج تبعده اشوكت ما اتريد هي هاي لو اني اتخنس واطلع اتبسبس وياه

عمة اشعجب ما زعل من اسويها بمحسن يظل يزعل

ههه هذا مو محسن .... هذا بيه عرج اروبي طاك بيه من كثر غربته هناك ؛ اكثر تساهل وتفاهم  ياخذ الامور ببساطة

اهااا !!!!
ثاني يوم عطلة وصدوك عزمت ربعي ثلاث صديقات مفضلات ... بالكوة الا قنعتهن وخو وحده بيهن اتصلت بأمها اتوسلها تجينا  ومني التوصيلة كلهن ...

وبطلب من عمتي اخابر ليان اعزمها ....لانها عارفه من حسين ليان ماعدها صحبة ودومها بالبيت خطية قصتها قصة هاليان ...جانت مخطوبة لواحد اربع سنوات تنتظرة يكون نفسه وهي جانت ضروفهم ع كدهم بس من اتغيرت اوضاع خطيبها صف ويه وحده ثانية وخانها وازوج غيرها وتركها  ..  البنية حيل تأزمت نفسيتها وظلت تتخوف وماعدها ثقة بأي احد واخوتها عايفيها ع راحتها خايفين عليها لأن من تركها اشلون التهسترت فترة  واتحسنت
عرفت قصتها من محسن ...
بالبداية رفضت بس اني الحيت ...

سويت اللمة واني بس اكول بگلبي اني اعلمك امحيسن راح تندم اني مو بحالك رحت طكيت صورة لقواطي العصير واجبرت صديقاتي يمدن اديهن  وطكيتها ونشرتها ع الاستوري مالي وعلقت  واللمة الزينة وية الربع وناسة ... وهنه خربانات  ضحك يقطع الحب شو بيذل ....وصلت ليان وصلها اخوها حسين وراح لبيت جدي دخل .. اني ببيت اهلي مسوية اللمه مابيه حيل لخطار الشيخ من يداهمونا

***
حسين

انتظر ست الحسن تطلع الي ..... وابن اخوها يمي ...بس دخلت عمته هو طلع ...

حياك الله

الله يحيج  اتقربت مني
اخذت كصيبتها المايله على كتفها بستها ..

وكعدت يمي جوهرتي ....

***
يقين

حنين  سالتني عن عمتي وينها

عمة خطيبها يمها

يااااي اريد اشوف اللي اخذها اشلونه صاك مثل اخته واشرت على  ليان ضحكت بخجل

ابرار
عيني هاي عمتج لو اعرف اشلون هيج مسوية جسمها طبعا بعدني شاكة بيها مسوية نفخ اماكن

لا عيني عمتي طبيعية ..

طبعا عرفتهن على ليان  ...

و جفتت علينا مخرب الملذات رغدة

ها عيني اشلونكم

البنات يعرفنها هي بنفس جامعتي بس بغير قسم فعرفتهن عليها من قبل

برار عوجت شفتها الي وهمست

اكلج من غير زعل ما احبها

ولا اني !!!!!

***
ليان
اوف اوف مدري اشبيه هسة وقتها
كمت من مكاني منحرجه وهمست ليقين تعالي فدوة
اخذتها عصفحه
لج عيني محصورة اووف اشلون احراج بس ماكلة سمج وشاربة كومه ماااي

ضحكت يقين
صدوك جذوب كالوا الج ما نفرغ ومستحية منا دتعاي فرغي تعاي

اخذتني للتواليت داخلي

حبابة انتظريني مو ترحين
ولج البيت فارغ بس ابوية لابس اعكاله يريد يطلع همين

لا حبابة تانيني

دخلت ....خلصت غسلت ادية وطلعت ..
يااااا هاي رايحة ...

عيني حكتني حكيتها اوووف زدات الحكة وحكيتها بالزايد .. وكعت العدسة .
يوووه دلزمها  ... وكعت مني على الارض

يبو يبو عيني غوشت من وكعت العدسة الطبية دنكت  ادور عنها فص ملح واختفت

حسيت احد طلع

ظليت اكول
وينها وينها  حتى ابرر انحنائي وعبالي امها لو اختها الصغيرة مطمنه ...

بوية اشبيج ...

وجهي صار تينه سودة من الفشلة كمت شفت رجال معكل اربعيني يطلع فد خجلت من نفسي دخلت وسط اهدومي

صوتي يرجف
لس لس لسنز ووكعت

يقين يابة يقين وينج

بصوت ناصي صاح يدري بيها عدها خطار وهي بالاستقبال واحنه يم الغرف وين تسمع ....

انوب اني خليت ومشيت  اشوية اتقدمت عن التواليت ومن ثولي وانحراجي واني بتك عدسة عثرت اجيت اوكع  ع وجهي

الرجال الله اسم الله

و يقين  بوية تعاي لاختج

على شنو ادورين ؟؟

لا هيج عموا مو مهم

صاح لمرته 

محد رد عليه

كلتي عدستج
هسة لزك ياربي 
اشكد طيب
عافني وراح للمكان اللي واكفة بيه دنك ..
اني وكفت
عمو مو مهمه عادي

هاي هي لكيتها ....بعد عمج اعيونج حمرة لا اتلبسن هاي السوالف ...
لا عموا حمرة لان فركتها هاي عدسة طبية عندي ضعف بالنظر
بالكوة بررت اله هو حطها بايدي وخطف من يمي
طلعت يقين كالت

ها  ليان شو تاخرتي

رزل بته
ساعه اصيح الج

هاا ماسمعت

هز بيده وطلع وهو شايل اطراف عباته

كرصتها من زندها وسولفت الها على عملتي خربت ضحك وكالت عادي بابا اسبورت والله حيل طيب لا اشوفيه ضخم 

...
يقين
  اوف حشر خشمه اخوية من عرف بأخت محسن جايه والله صوجي اني كولت اله ما اكعد راحة
راسلني قيس كلي يلا نفذي

ليان صدوك تعاي اراويج شغلة

ها شنو
دتعاي اخذتها وهي تتسال دخلنا للهول

ودزيت كف لقيس ابسرعه دخل للبيت وادخل علينا عود يابة توه جاي من برة

ها السلام عليكم
ياعيني مثل دوم المصدوم

***
ليان
كملت السبحة ودخل اخوها ييووو  اني حالفه ما ادخل بيتهم امداني
حيل خجلانه جنت ورديت السلام و هزيت كف يقين بمعنى خل نطلع

اوكفي خل اعرفج على اخوية قيس

قيس هاي يقين اخت محسن 

يا اهلا وسهلا ...

احم اهلا بيكم
يلا ولج
قيس خريج كلية هندسة

اني اندس بيها اريدها تمشي .واعيوني عليها ولا باوعت للولد ....

يلا اخذو راحتكم راح الولد. ..

شنو الشغلة

هاا  خل نقدم فطائرة تعاي تعاي ..

***
يقين
دزيت رساله لقيس
هي هاي وخبصتني اثنينكم خجلانين تهي بي...

طلعت ليان ورة ما اخوها اتصل عليها

***
ليان
يبووو طلعت لحسين كال تعاي سلمي على جواهر .  خرب مو البارحه يمنا اووف من طلعت قيس صار بوجهي واكف يم بابهم من شافني هم ارتبك و دنى خطية دكيته وهو ابسرعه اجاني

اتفلضي ادخلي ادخلي

دخلني وراح كدامي صاح لوحده من بنات عمامه دخلتني ... لكيت حسين كاعد وجواهر ومرت ابوها  سوة

سلمت ورحنا لبيتنا ....طول الطريق اباوع لحسين مبتسم عيني اذا خطيبته اليوم كاعده يمه وكانها بدت تاخذ عليه حتى الحجاب ذابته الله يسعده ويهنيه ...

***
حسين

بالليل خابرتها

يلا جواهر اني تعبان اتعرفين شنو تعبان خل نسوي العرس الاسبوع الجاي

ما الحك حسين ... بعدني ما مكملة وهمين البرادي الخياط كال اسبوع الا يكمل

خوش جواهر ...اني رجال ما اعرف اكبت مشاعري .... وين انطي وجهي هسة ...اروح للشقة مثلا

لا

اشوية صوتها انفعل

بيعها هالشقة النحس

ما ابيعها الا اتزوج تعبت اني من الانتظار . 
سديته واني اصلا ما ضايج وادري الموعد ما جاي بس اريدها ولو لمرة تسمع الي مو نطت روحي عليها

اتصلت

ليش اتغلقة بوجهي . 

الاسبوع الجاي زواجنا

هاا ؟؟!!!

سكتي

اي اي مثل ما اتريد ... 

ضحكت برضى
يعني الاسبوع جاي حاضنج

ههه لو ادري امنين طلعت الي وكلبتها لحياتي ههههه اي الاسبوع الجاي والله يستر عليه منك

الله لا يسترج كدامي هههههههههه

***
يقين
بشلنا بتحضيرات العرس تواعدت ويه الكوافيره تجيها للبيت اسوي تسريحة الها ومكياج .... وصار يوم العرس
اول ماكعدت عمتي وطلعت من غرفتها اهل البيت
مبروك
مبرووك

كلها تمشي واتبارك الها
بحيث كامت بس تهز براسها ملت
سألت عن جدي ليش لسه ما صاحي
مرت جدي
يا ابوج ليلة البارحة يحوس ما نام ومن الصبح طلع ما يتحاچة

ليش اشبيه

اشمدريني يكول جواهر ليش قدمت العرس ما كدروا ينتظرون بعد

صفنت عمتي وسكتت
هو مو جان يلح خل ياكلها منا وجاي راح يصحى الصبح ما يلكاها ببيته
اجتنا رباب من الصبح ..
بعدنا نتريك

واليوم المعرسة ضلع من اضلووعيى
وكللللللللللللللللوووووووش

مرت جدي هم طكتها بهلهولة
كلللللللللللللللللوووش

العيون الغزال اعيون جوهرتنه
صلو ع النبي والصيدة صيدتنا
وهلا وهلا

كلها اصفك حتى جهالها ترسوا البيت
طبعا توني الا حسيت عدنا عرس حقيقي  لان عمتي ما عازمه غير كم مقربة فقط العصر ولا مولد ولا شي ما تقبل بس يلا عدنا رباب طبعا جايبه عمتها وياها ...عمتها اصير اخت جدي يعني عمة جواهر يوه ما اريد ادوخكم بس ترة كلنا كرايب مداخلين ببعض حتى نسوان عمامي ..

رباب
ياا توكم تاكلون انه من الخمسة صحيتهم ووكلتهم وهسة جعت سولوي مكان
اليوم عرس الغالية
.الوحيده الهادية وما تحجي اهواي العروسة....
اشبيج جواهر شو شكلج ما عاجبني كالتها رباب وهي تاكل

لا اشبيه

سمر
قابل خايفه ههههههه

خزرتها رباب وكالت
اظنها هيج اول مرة تزوج رجال  ..

وضحكت  لأن زوج جواهر جان خال سمر الصغير

خلصنا ريوك ورباب بس تكفل  ..

نزل واخيرا عمي وست الحسن اليوم مراحت لبيت اهلها اتريد اتروح منا ويه ويه الزفه اذا اجت العصر

قحطان
رباب شو ما هوستي هيج بعرسي

ههههه ما حضرته للعرس بس حنة النسوان اجيت جا غير عمتك عرست عليه بمرضها

عمتها غمتها وكالت
اشفايتلي اعرس

هنه اثنينهن فلم هندي  ويضحكن الجنه والعمة

قحطان
والله ما عليه  شو غرت

وكفتله وكالت مو تدلل هسة اكفلك

يالقحطااان لا تفرح ترة سنسولها يجرح
واشرت على رغدة  وكللللووووش
خلتنا كلنا نفحط و رغده نطت نط حاسه بكرها لرباب زاد ...... 
.
ما قبلت تشتري بدلة بيضة نفش اشترتها حصر  .. ما قبلت تشتري بوكيه ورد ... كالت اريد ثلاث وردات  طبيعية ....
ما قبلت  تلبس  من ذهبها بس محبس الماس جابه الها الشيخ جدي وهي الوحيده اللي عدها محبس شذرته الماس
وقلادة بسيطة دمعة كرستالية صغيره و زنجيل ناعم  ... مع اسوار مثلها سنساله ناعم و بيه دمعات .... مكياج كامل يجنن عليها صار تسريحة  شعرها حل و برم من اسفلة و البرم رشوة  لون سلفري مؤقت ..
ما حطت طرحة بس تاج كبير حلووو

رباب راحت للصالون تتعدل
ورجعت النا مدبدبة اتخبل بالمكياج و بمشد كيم كاردشان الكرش خفان
ولابسة ثوووب يخبل كلوووووشة من جهة البطن و ميشة هي وصابغة
وتركص ويانا على الدي جي وعمتي تكعد يمنا اشوية وادوخ اكوم من يمنا   وهكذا احسها تعبانة

رباب شاورتني وهي تركص
ولج يقين هاي عمتج مداهسها اشلون بيها

بلعت  حبوب  بلكت تخف

بلكت

***
حسين

البارحة سوينا حنه   بالقاعة واليوم اخذت بس خالي وكم صديق الي قديم و مع جماعة محسن ورحنا للبوة

دخلت شفتها كاعده بكل هدوووء 

وخواتي ورايه وامي و خالاتي

***
يقين
دخل علينا سمو الرجولة الوسيم  ...
خرب بهبل لابس قاط رصاصي ياكل ويشرب وياه  دخل بكل ثقة وهدوء يباوع الها ويبتسم

شاورتني مرام
تذكرين دخلة محسن عليج هههههه
خرب حظي هل يقارن

شنو ذني امهاته كلشي ماكو محد تصفك تهوس هدوء صار وهو عيني كعد يشاقه وياها بس شو هي وضح عليها التوتر
ها وصدك ما باسها من راسها باسها بالاول من ايدها هالاوربي الكلاسيكي وبعدين من خدها هنيالي واني محسن لزك بكصتي لزك ههههه

رباب جنها نفاخه وطكت من شافتها هدوء من قبل اهل العريس ....

دخلت اتهفي بعباتها وجرت امي وياها

واحنة طكينا اصبع واحنه الحاكم سكتنا

حسوني خوش اخو يستاهل الهوووسة
عمة  عمتي جواهر  هم دخلت
ااتهفي بعباتها وادبج  وكالت
ام حسن كومي اتكتري والبيت اجت راعيته     

ام حسن الفطيرة تضحك

رباب
جبنالك وردة بصينية بت اشيوخ وبصراوية  .. 

هوسن و خلصن ...  اهنا جدي دخل
هو دخل حسن من باب الهول وشو مادخل ابسرعه شرد

بس هسة شو دخل وجان مايتفسر

وكفلة حسين و جواهر هم راحت اله باست ايدة وراسه  وحضنته وطولوا بحضنهم وهو يربت على ضهرها

هالجوهرة اغلى ملكي يا حسين .... وداعت المسمي عليه حافظ عليها ..
ومن هذا الكلام
تاليها العكل كلها طبت اخوة جواهر 
ومن ظمنهم ابوووية واخوية

جنا اني و ليان سوة
حتى قحطان اليوم لابس عكال واحنه استلمنا اكس مربع نضحك عليه

وطكوا صور كلهم الزلم وية العروسة وحسين ....لحظات مؤثرة من ودعوا بتهم الوحيدة ....

جابوا الها شال لبسته وعباية وبوشية وطلعت من البيت العروووس

***
حسين
هذآ اعتبره اول زواج الي ...حسيته بالفعل اول زواج بين اهلي وناسي واهل ديرتي ومرة من ديني اشاركني الحلوة والمرة ....
يمي اللبوة وخانسة واني اسوق والزفة ورانه  ...

قبل يومين من جابوا ملابسج ...
كعدت اشمشم بيهن

الو جواهر إذا مختنكه من البوشية انزعيها ....

هزت راسها

تدرين شنو شميت ..
كرصتني
ههههههههه

رفعت البوشية وبس اعيونها ضهرت
رفعته اني

ذكرتيني بعرس اخوج ......ااااخ يا لبووة
ودست سرعة وهملت الزفة والورانه ....

رحنا للفندق ونزلوني  الزوافيف ما خلوني ع راحتي  وزفوني عليها .....

..

اول ما دخلت جانت كاعدة واتهفي بايدها والذبول واضح عليها

اشبيج ؟؟؟
اجيتها خايف عليها

هوى هوى حسين مختنكة حيل .. 
فتحت المروحة واحنه بعز الشتا

بارده بارده طفيها

رجعت لزمتها  صايرة نااار هاي

جواهر انتي نار اتعرفين شنو نار

اريد غطى بردت بردت حيل

بالكوة تنطق

يا غطى كومي

اخذتها ومحاوطه بديه لا توكع ....

غسلي وجهج ...اسبحي ذبي ماي على جسمج حتى الحرارة اتخف
..
طلعت وعفتها واني حاير بيها الليل كله ...
 
طلبت علاج لنزلة البرد ماكو
خابرت لمحسن اجاني
جابلي ابر و مهدات

ولك ابر اني وين اعرف احقن

اني اعرف

انجب ولي يلا

ضحك وراح

رجعت الها  شربتها العلاج ..وهي شبه نايمه وترجف ....

وهكذا انتهى الليل ....
الضحى رجعنا للبيت وهي على حالها نويت اخذها للطبيب العصر ...
بس اخ من عنادها ما قبلت تتحرك ولا قبلت تاخذ الابر .....

كاعد على السرير يمها واتوسل

بس اضربيهن ادري مو زين عليج العلاج مدا يجيب نتيجه
راح يجيبون  الج جارتنا اووك

لا لا

ادري ليش

همست
اخاف

شنو بربج هذا الجبروت كله  و اتخافين  من حقنة.!!!!

وبالفعل ما كدرت اجبرها ما ضربت وما ضربت وضاله على المسكنات اشوية تخف وترجع الحرارة ...اني اسوي كمادات ...وما قبلت اخذها لطبيب

صار الليل وهم ما اكلت ...نايمة . 
اني هم  مالي نفس واشوفها كدامي هيج ذبلانه  .... نمت يمها واخذتها بحضني لليلة الثانية متنعم بريحتها بس من تشتعل نار گلبي يحترك وياها .... ادري شنو من نزلة برد بليلة عرسنا  .... هسة والله ما رايد شي بس خل تصحى

صحيح باليل تجي بالي  اتمكن منها بس ما طاوعني گلبي احبها واريدها بوعيها وهم  روحي تعبانه عليها واني اشوفها هيج نايمة ....

ثالث يوم من عرسنا ....
صحيت لكيتها مفتحه

حسين

ياروح حسين  صحيتي

لزمت كصتها زينه
اشسويتي بيه

ابتسمت ووجها شاحب

روحي اسبحي ...هسة اطلع اگول الهم يسون ريوك

اي جوعانه ..

جانت لابسة ثوب قديفه

ادفي زين من اطلعين من الحمام ...راح افتح الشباك اطلع الفايروس وارجع ادفي الغرفة .... 

فتحتها  ...

سمعت صوت الباب ....
وراها اسمع اصياح وبجي جوووة

طلعت اشوف شنو صاير وتركت جواهر بالحمام لهسة ما طلعت ....و من المحجر اشوفلك رغده بالصالة  تبجي  واتصيح

واالله ما ارد اله  ...يمة بهذلني وجابني لهنا وشمرني .......يوم عذبني وضربني واني حامل
تبجي وتحجي

سألتها
شنو مسوية غبية

حسين الله عليك روح اكتله شوف ايدي اشلون زركة

طلعت ايدها  صدك ضجت من قحطان ...
بس ما سرعت وتهديت

شنو مسوية ولج ... كولي

سالتها حتى على هذا الاساس اصرف

انت شنو اكول اذب الصوج بيه

والله عارف الصوج بيج انت ومتاكد بس
هذا زودها اني اعرف شغلي وياه

والله كلشي ما اسوي اله

اكرههه يومه موتني
حضنتها  امي واني واكف فوك روسهن

يلا كولي شنو السبب هالمرة ؟؟

السبب .........بيه يغلط عليه ..من رديته ضربني .......  ما اريده طلكوني

امي كالت يااا اسم الله

هسة اسكتي واهدي .... منا من اشوف شغ

صيحت بوجهي طلكني منه والله ما ارجع ولا راح اترجعني لخاطر حضرتك اتكوش على ابوهم واشاركه مو اخذت اخته هاي هي خليها
هي تتوسطلك عند ابوك ....
اجت اتخليني  امد يدي عليها وسط اصياحه اني حاير بيها واريد اعرف سالفتها وهي اشلون اتفكر بيه

شهكت ليان واعيونها وراية على المحجر ..التفتت وكلبي توجس المصيبة ...وشفت جواهر واكفة واتباوع النا من فوك المحجر بروبها الاسود الحريري واعيونها صوبي ترمي رماااح ....

يلا روح اضربها مثل ما سوه اخوها بيه لو تخاف تخسر نفوذ ابوها

ليان
كااافي دفعتها اسكت بيها

وجواهر هزت راسها وراحت  ........

يتبع

الرجاء التصويت   👄