رواية مازلت طفلة الفصل الخامس 5 - بقلم الكاتبة شمس السعدي

....البارت الخامس....
{#مازلت_طفلة}
#بقلم_الكاتبة_شمس

ضجت من ابوي وتصرفاته . حتى بالجذب حضني وگال مشتاقلج . كل همه الفلوس
مااعرف شلون مر الوكت وي امي واخواتي ..
بقيت اسولفلهن عن بيت الحجي .وعن عمه نضال .

امي تگلي ميخالف سايسيها وكملي شغلج ولاتخلين لزمه عليج .

-بس اني جاي اتعب يمه واشتاقيت للمدرسه اريد ارجع .
-يمه هسا انتي تزوجتي وامرج بيد رجلج .

تغيديت يم اهلي امي مسويه تبسي وخضره وخبز حار .بس اطيب من اللحم والاكل الي هناك .
اني راضيه بعيشتي يم اهلي ومااريد اروح هناك احس روحي غريبه .

بعدني مامكمله اكل . سمعت هورن سياره .
اجه ابوي كال حماج اجه ياخذج يله كومي .

استغربت من جيته بسرعه وضجت .
لبست وطلعت . صعدت بالسياره .
گال البيت وحشه بدونج بعد لاتطلعين .

هدى . هو انت وين شايف البيت كل يوم . هي كم مره شفتك بيهن من تزوجت لليوم .

مرتضى . هو اليوم حسيت بوجودج . عليج الله ماعندج اخت حلوه مثلج الي .ههههه

هدى . لاماعندي كلهن صغار بالابتدائيه .

مرتضى . اي عادي مو هسا انتي الفرق بينج وبين الحجي فوگ العشرين سنه .

سكتت ماحجيت وياه . هذا يحب يداهر واني مالي خلگة .

وصلت شفت المنطقه الي احنه بيها .
منطقه ريفيه بس حلوه . اول مره انتبه .

گتله مرتضى انتو كلكم گرايب هنا .

مرتضى . اي . جدي الشيخ هاي الگيعان والاملاك كلها اله ..

ابوي متوفي واحنه صغار . بعد وفاة جدي . لزم الشيخه عمي خضير ابو نضال وعنده ابنه جبير ماخذ اختي وفاء اسمه محسن بس هذا معلم ماله بشغله العشاير منعزل .لهذا عمي قرب اله حجي رضا اخوي وياخذه وياه ويستشيره بكل شي وصار ايده اليمنى .

وعندي بعد عم الي ماخذ اختي رجاء الواحد من ولده .
هذا اصغر عمامي .

جدي الله يرحمه بنى الكل واحد من ولده بيت داير مداير بيته مثل متشوفين . ذاك البيت الجبير هو الي گاعد بي عمي خضير وعائلته ووياهم بيبيتي ام ابوي مره جبيره كلش بس بعده عقلها براسها .
الي يشوفها يگول اصغر من امي .
لان هنه كلهن هنا يتزوجن وهنه صغار ..

فد يوم اذا تردين افررج واراويج البيوت ..

الله شگد حلو هيج مجموعين .

وهسا انتي انتميتي للمجموعه ..

لا انتو كلكم اهل وگرايب بس اني مو منكم .

انتي مرت الحجي بعد . يعني انتي الاصل .

وصلنا للبيت .

تلگتني عمه نضال . يله خاتون بسرعه بدلي وانزلي اليوم معزومين ببيت ابوي .
ومو تلبسين دشداشه بدلي شي حلو .مااريد اتفشل .

گالتلها امي الحجيه . لاتضايقين البنيه خليها تلبس على راحتها احنه مارايحين الغرب ..

بدلت فستان 👗 طويل ابيض ومخطط بنيلي.
خياط حلو .
وخليت عباتي على راسي ونزلت ..

گالت ع الاقل خلي احمر اخضر وجهج اصفر .

-بس اني مااعرف .

-تعاي اني اخليلج .

سوت وجهي خريطه بالالوان . شافتني الحجيه گامت تحجي عليها .

گومي يمه هداوي گومي غسلي لاتضحك العالم عليج .

الحجيه ماتگدر تمشي . اخذنا مرتضى بالسياره .
وصلنا البيت جدهم والي گاعد بي ابو نضال وهي تصيح بيت ابوي وبيت ابوي .

دخلت تعجبت ع الهوسه وبنات هواي .
واكو حجيه مخليله جربايه بالصاله . والكل ملتم حولها .
عرفت هاي بيبيتهم ام خضير .

گالت وينها مرت رضاوي . اشرولها عليه .

ياااا ولجن هاي بعدهي فرخه وينها وين العرس .
ولو اني اصغر منها وتزوجت بس بنات هالوكت ادري بيهن مايتحملن .

كلها ضحكت . تعاي حبوبه تعاي احبنج .

رحت يمها باستني وگالتلي باجي وفاء بوسي راسها . بسته .

وگعدت . بنات هواي ومااعرف بس ايات وجنات ونور لان يجن يمي مرات.

اجت ايات گعدت يمي .

اگلج ايات هذني البنات منو كلهن .

ايات . ذني كلهن بنات عمامهم وعماتهم الامي وخوالي .

هدى . بس اكو صغار بيهن . ليش ماخطبوا للحجي منهن .

ايات .. كلهن محجوزات . مو احنه ناس تاخذ من ناس يگولون ماتطلع بناتنا للغربه .
وخاله نضال هم ماتقبل وحده من گرايبها تشاركها برجلها الا غريبه حتى مايتخاربن .

هااااا وهي عندها اخوات ..

اي ذيج الي بصف بيبيتي هاي ابتهال . متزوجه من عمي عادل الي ماخذين خالتي رجااء .
وعندها اخت متوفيه بعد . وهاي ولدها اثنين جابت الصغير وماتت ورجع رجلها تزوج اختهن الصغيره هديل عمرها عشرين سنه جانت محجوزه الخالي لؤي بس زوجوها الرجل اختها علمود ولد اختها گالو تحن عليهم مثل امهم ..

ومن. ذاك اليوم لليوم خالي لؤي طلع للاردن يشتغل وبعد مارجع الا بالمناسبات ..

ياااا خطيه . جا ليش مااعترض .

جا هو بكيف واحد . هنا الشيخ اذا حجا حجايته كلها تنفذ .
اگلج وذيج الگاعده ع الدرج منو .

هاااا ذيج بتول . بنت عم ماما تصير حماة خاله رجاء . هاي الصغيره رادوا ينطوها جبر خاطر الخالي لؤي بس ماقبل .
وبقت هيج لاهي متزوجه خطيه ولا هي الباقيه .

اووووف اگلج والله هوسه وتدوخ عشيرتكم ..

ههههه اي جا شايفه بعدج . بس احنه هيج بكل مناسبه لو عزيمه مجموعين ..

زين والله انتو حتى حصار ماعندكم مثلنا ..

هههههه اي مو احنه ناكل من گيعانه وخالو لؤي وعمو هاتف يدزولنا من الاردن . من هيج ماحاسين بالحصار .
#بقلمي_الكاتبة_شمس
...................................................

حجيت بگلبي .. الله يساعد الي مثلنا . مرات نتغدا مانتعشا .
وهمه هنا فرشوا السفره وصبوا خيرات الدنيا كلها .
والمشكله الي يشوف جهالهم يگول ماشايفين يتعاركون على اللحم والدجاج .

خلصوا عشا .. شويه واجه عمهم الشيخ ووياه الحجي رضا .
اشرلي الحجي . گمت بست ايد الشيخ .

الشيخ خضير .. مبارك بنيتي .. وخله بأيدي فلوس .
التفتت على عمه نضال گالها .. هله هله بيها بنيتي احسبيها اخيتج وداريها ..

نضال .. يابويه جا شعندي وياها . هو منو الجابها غيري .

رجعنا للبيت بالليل .. حسيت الكل يعاين عليه بأستكبار .
ومن فوگ لجوه .
وهي الي تسألني ابوج فلاح . والي تسألني امج خبازة
يردن يقللن من قيمتي .
الدمعه صارت بطرف عيني .
بس امي الحجيه ماسكتتلهن وگالتلهن كلنة ولد تسعه ماكو فرق ..

من رجعت للبيت بس ابجي . ادري بروحي مااتحمل ودمعتي بطرف عيني .
جانوا يتگلي امي ام دميعه . لان اقل شي ونزلت دمعتي .

مرت الايام والحجي كل يجي يمي يتقربلي وياخذ شغلته ويروح يم نضال مايگدر يحجي وياها .
مرات اگول يمكن تحسب عليه الوقت .

يوم بعد يوم بديت اضوج منه وحبي اله وشعوري بحنانه انقلب ضيق ومرات اختنگ من يتقربلي .
ومرات اذب من راسي ورى مايخلص .
وتخربطت احوالي .
وگمت من اشتم ريحته احس روحي تطلع ..

گمت اذبل ولا اكل ولاشرب وروحي باهته .
واحس بحراره بجسمي رغم الجو بارد ..

شافتني باجي وفاء تخبلت راحت سولفت الامها ..
صعدتلي الحجيه رغم ماتگدر تصعد .
جاست راسي .
وبطني .
گالتلي يمه انتي هم غايبتلج .

صفنت . مافهمت شي .
همستلي باجي وفاء استحيت .

گلتلها ماادري اي يمكن . احجي بثگل من السخونه والتعب .

گالت گومي يمه . اخذي ملح وخلي ادرارج بي وخلي نتأكد .

وسويت مثل ماگالت . لانها گامت تهلهل وتصيح .
يمه والله عرفتها واخيرا يارضيوي راح تصير ابوي .
جمعت البيت كله على هلاهلها ..

اجت عمه نضال تركض . شكو عمه

ولج نضال يمكن هداوي حامل .

نضال .. يا منو يگول شلون عرفتن .

الحجيه . ولج تعلميني انتي اني ولدي حبلت وجبتهم لادكتوره ولاتحليل كشفوا عليه .

نضال .. هاا عود باجر ناخذها للدكتوره ونشوف لاتگولون الرضا خطيه يتأمل بالخالي بلاش .

الحجيه گالتلي اصعدي يمه نامي وارتاحي وبعد مالج شغل بالبيت .

بيومها البيت انگلب . ومااعرف الناس شلون درت .
والكل اجه يبارك .
وكل ساعه منزليني .
الحجي ماهو جان هو والشيخ بشغله ببغداد .
وقبل كان ماكو نقال حتى واحد يخبره .
فمايدري .

لليل يلة رجعوا . الجهال كانت منتضرته بالباب تاخذ البشاره . يمكن الكل فرحان اكثر مني .
مااعرف ليش ماحسيت بفرحه جائز لان جان عندي امل ارجع الاهلي ويمكن هذا الطفل راح يربطني هنا ويحطم مستقبلي ودراستي ..

من جاي الحجي والجهال محاوطينه انطينه بشاره هديوه حامل . هو طاير من الفرح ومطلع فلوس ويطش بالشارع .

دخل يركض مثل الطفل .
شاف البيت هوسه بين اخواته وجهالهن ونسوان عمامه وبناتهن .
صاح هديوه هديوه صدگ حامل .

اني گاعده يم الحجيه ماحجيت استحيت .

نضال .. على كيفك عيني بعدنا مامتأكدين باجر نشوف لاتتأمل هاي عمتي وحدها تحجي ..

الحجيه .. ولج شو ماتعرفين تحجين . شنو وحدهي تحجي قابل انتي احسن مني .
ولج اني ومرت خضير جنا نجيب نسوان المنطقه كلهن مايعرف طبيب ولا مستشفى.
هسا جاي انتي تعلميني .

رضا .. هاهي يمه مادام انتي الي گلتيها اني مصدگ هديوه حامل .
واجه باسني بگصتي .

وصاح مرتضى ولك روح طلع ذبيحه من جوه وخلي يذبحوها الوجه الله ويوزعوها .
اريد كلها الناس تاكل وتدعي يجي ولد يشيل اسمي .

شفته شلون فرحان وطاير . بس اني مو مثله مافرحانه واحس بخنگة وحسره بصدري .

الكل فرحانه الابنهم . بس اني منو يفرحلي .
احس الناس تجي تبارك مو الي للحجي والحجيه لان راح يجي طفل يشيل اسمهم ..

فضت الناس وصعدت نمت . واني ببالي حجي ايات من تگول . هسا بطنج تكبر وتصير مثل الطوبه ويجي الطفل بس يبجي ويدوخج انسي الدراسه احسن الج .
لان اني گلتلها مره اريد احجي وي الحجي ارجع اكمل .

ضجت وحسيته عائق بحياتي ومستقبلي . وماانكر كرهته قبل مااشوفه .
اعرف شي غريب الام تكره ابنها . وهاي نعمة الكل يتمناها .
بس اني مو ام مامستعده الهذا الشي . ماشفت شي بحياتي بس الذل والفقر وضرب ابويه واحتقاره .
وحتى بيت الحجي مخليني عندهم علمود مصلحتهم علمود الطفل .
هذا الكلام دوووم تگوله عمه نضال الي وهو الصحيح .
بعدني طفله ياربي . مااريده مااريده .

بقيت اهذي وابجي الى ان غفيت . وصبح الصبح اجه الحجي من الصبح گعدني .
گال غيري ملابسج بسرعه نروح للمركز نسويلج تحليل ونشوف وضعج . جان يوم جمعه .

اخذوني هو وباجي وفاء . لان عمة نضال ماقبلت تروح .

دخلت للتحليل اخذو مني دم . واني ابجي وادعي كون مو حامل .

عبالهم ابجي من الابره .

گال دكتور التحليل .. انت عمها جا رجلها وين خطيه .
بعدهي صغيره متتحمل .

الحجي ضاج بس ماحجه وسكت وحتى ماگاله اني مو عمها زوجها .

گال نص ساعه وتاخذون النتيجه .
واني ماخليت ايه ماقريتها . حتى اطلع مو حامل .
صاحو اسمي .
وگف گلبي .
راح الحجي يركض . گاله الدكتور مبروك حامل .
غمضت عيني واحس حنفيه مي تنزل مو دموع .
#بقلمي_الكاتبة_شمس
يتبع...