رواية مازلت طفلة الفصل الرابع والعشرون 24 - بقلم الكاتبة شمس السعدي

….البارت الرابع والعشرون ….
       {#مازلت_طفلة}
     #بقلم_الكاتبة_شمس

ولج شنو مستعجل .. مامصدگ وحدنا وغرفتنا مقفوله علينا .
جا اني المن خبصت الولد . خليتهم يخلصون الغرف بأسبوع غير اريد اشبع منج .
وانتي هسا جايه تگليله جوعانه ..

دتعاي اني اشبعج . واخليج تنسين الجوع كله ..

-هههههه لا حباب لؤي خلينا شويه نگعد . دوووم هاي سوالفك .

-يله يعني تعاي اعشيج بيدي . لان اخاف تموع روحج بين اديه ويخرب الشغل كله .
هو انتي بلايه كلشي تضلين ترجفين تگولين مكهربج اني
ضحكت هههههه .

تعشينا وخلصنا . ردت نزلت الصينيه وغسلت .
واصيل لازمتني . شسويتوا وشسويتوا .

گلتلها والله بس اكلنا .

يااا جا شمالكم هيج جوعانين .

دروحي اصعدي والصبح اني اعلمج الا تسولفيلي .

صعدت .. لگيته متمدد ع الجربايه ويباوعلي .
رحت للمرايه اريد بس الهي روحي بشي .
سويت روحي امشط .

گال .. هدوتي .

التفتت عليه . ذيج المره حجيتي شغله وضلت ببالي .

-شنو هي .

-گلتي جنك اول واحد يلمسني وبرضاتي مو جبر .
ليش گلتي هيج .

-اوووه انت موگلت الماضي انسيه ليش تذكرنا .

-لا والله ماقصدي بس لان شفت عيونج دمعن من حجيتي هيج جنتي متعذبه وليش رضيتي بهيج وضع .

-انت شفتني شكبري من جابوني لهنا . جان كلشي مفروض عليه .
ماشفت لاحب ولاحنيه .
ماانكر الحجي جان حنين عليه بالبدايه . وحتى حسيته ابوي الي حرمني من الحنيه .
بس بعدين تغيير وگام همه الاطفال وبس .
ونضال انت تعرفها .
يعني هذا الجبر الي جنت احجي اعليه .

گعدت ع الجربايه يمه . سحبني اله ونيمني على صدره .
باسني بخشمي .
من وجاي حياتنا احلى واحلى بعد .
وخاصه بعد ماصرتي مرتي گدام الكل .

جانت ليله حلوه . ضحك وسوالف وغزل ورومانسيه .
الى تكسرت الباب علينا .

مصطفى . ليش قافلين الباب اني نعسان .
وصعد على جربايتي .

لؤي صافن بوجهي .
خرررب هذا ابنج ماخذ خباثته من مرت ابوه .
دخلت علينا بلحضتنا الحلوه .

-هههههه ما لاتشبهه بيها .

-وهسا شلون والاستاذ مصطفى متمدد يمي .

-گتله صفاوي حبيبي انت صرت جبير وبالمدرسه عيب تنام يمنا .
هاي غرفتك بصفنا واني اجي بالليل انام يمك .

بالگوه وبالمناگر هو ولؤي يله قبل يروح على جربايته .
ولان تعبان نام بسرعه . غطيته وطلعت وحمودي اصلا من غير مااحجي ينام زين احسن من صوفي .

اجيت الؤي . گال . اگلج اقفلي الباب اني اخاف من شريجي على ساعه يجيت علينا .

طفيت الضوه واجيت انام . خليت المخده .
گال . لا لا لا . هنا تنامين دور هاي مخدتج .

واخذني الصدره ونمت على اديه ومن ذاك اليوم صرت متعوده الا بحضنه انام .

استمرت ايامنا حلوه وشقاوه لؤي ورومانسيته وعركه هو وصوفي وحتى من نطلع العيون كلها علينا لان فعلا اكتملت حياتي بوجوده .

ابوي يوم عن يوم تتدهور صحته يشكي من گلبه وضغطه يرتفع دووم . وكم مره اخذناه اني ولؤي .علاجات واطباء ومايفيد .
هو اصلا جبير بالعمر . وتعب بالفلاحه والشغل .
وياكل مايدير بال الضغطه وصحته الى تعب حيل .

صارت سنة الحجي. وسوينا ثواب وقرايه .
بس للنجف مارحت لان رحت الاهلي ابوي تعبان كلش . بس لؤي اخذ ولدي وياه .
گال يزورون ابوهم .

اني بتت عندي اهلي . ورغم ابوي جان ماراضي علينا ومايريدنا جان يريد ولد .
بس وكت مرضته احنه الشلناه .
ومگابليه . وگاعدين .
ومامنقصين عليه اي شي .

لؤي ورجل انعام هم زين مامقصرين بكلشي .
اجه لؤي ياخذني .
گتله . مااگدر اليوم ابوي وضعه ماعاجبني . وراح ابقى هنا .
هو ضاج بس ماحجه . ادري بي اتعود عليه .
وجهالي هم بالي يمهم .
بس گتله هي ليله وباجر تعال اخذني .
جان گتله ابقى يمنا .
بس بيت اهلي صغير كلشي وادري بي يتقيد .

بقينا مناوب على ابوي .
وحده تنام ووحده تگعد . خاف يحتاج شي .

گعدت الفجر.  لگيت نعوش غافيه وهي گاعده .
گلتلها روحي نامي اني راح اصلي واگعد يمه .
رحت اتوضيت واجيت .

شفت ابوي گعد وبالگوه ياخذ النفس .
گتله .. ها يابه رايد شي .

گال ماي . صبيتله ماي وجاي اگومه يشرب .
شفته فتح عيونه كلش على كبرهن . حتى اني خفت من يمي .
وشهگ . اني گمت احاول اشربه .
بس هو انتهى وگام يشوخر .

صحت صوت .. اجت امي واخواتي يتراكضن .
گلتلهن ابوي مدري شبي . يشهگ وفتح عيونه .

اجت امي شافته . صاحت صوت شعلوه . ولجن راح ابوج سلم روحه .
اني فقدت وحاضنته وابجي .
بويه هاك هاي الماي . اشرب بويه انت عطشان گمت احط بحلگه ماي بالگوه .
اخواتي وامي يصيحن . لمن الجيران علينا كلها .

اول مره اشوف هي موقف . واول مره اشوف ميت .
وابوي المات .وبحضني وعلى ايدي .
شمالي فاهيه وماانطيته الماي بسرعه .
راح من ايدي عطشان ..
ابجي وانوح .
تالي اجه رجال جيرانه .جبير .
گال المرته جريها راح تتخبل .
وسد عيون ابوي .
وگعد يتشاهدله . ويقرأ قرآن على راسه .
واني اون واهز بروحي من المنظر .

وين اروح وين انطي وجهي هسا .
منو النا .
صح ماشفت حنيه منه.  بس اسمه ابوي وخيمه علينا .
امي ملخت روحها تلملخ . رغم هي ابد ماشافت وياه الراحه ..
الناس انگلبت علينا .
اجت جيرانه . گالت يمه روحي خابري من يمنا عمامج اهلج خلي يجون .
#بقلمي_الكاتبه_شمس
…………………………………………

باوعت الفرقان . گلتلها گومي انتي رجليه مايشلني .
روحي خابري عماتي وعمامي .
الي ولا واحد بيهم سأل عليه وشافه وگال شمحتاج بمرضته وهو شهرين نايم بالفراش .
بس اسمهم اخوته ولازم يشيلون جنازته ..

كشفت الدنيا .. والناس انگلبت كلها . واني مگابله ابوي وابجي واخواتي وياي .
تالي طلعونه بالگوه ..
صار گبالي . لؤي .هو الوحيد الي يفهمني ومحتاجته بهيج وكت .
كتبت رقم بيت الشيخ لان بس همه عندهم ارضي .
وگلت الفرقان .
خابريهم وگليلهم يدزون على لؤي يجيني .

بعد مالتمت كلها . شالوه . واحنه نوكض ورى التابوت ونبجي .
لمحت لؤي اجه ومبين عليه . جاي متلهف .
سلم عليهم .
وشافني اركض ورى ابوي .
اجه سحبني وحضني وباسني براسي .
گال البگى براسج يعمري . صيري قويه اخواتج خطيه وامج منهارة

-شلون اصير قويه وهو مات بين اديه . فتح عيونه وراح عطشان . مالحگت انطيه ماي .
وگمت الطم على راسي ..
اشر الباجي وفاء لمحتها جايه .
گالها دخليها لجوه .

گتله . ما ماادخل اروح وياكم .

-وين ترحين وهي كلها بس زلم .

-مااسوي شي والله اروح بس احضر دفنته واودعه .

-گال . هدوتي يعمري . سيارتذ بيها الشيخ وولد عمي يعني مو فارغه . وين اخليج بنص الزلم .
اوعدج اجي من الدفنه اخذج .

سحبتني وفاء ورجاء جايه هم. گتله امانه عليك ودعه الي وگله مبريه الذمه ومودع بالله .

هز براسه وراح .

دخلني لجوه واني مامصدگه . امي منتهيه وشحالها .
اني اخذت زوايه وگعدت بزاويه طويت روحي وبس دموعي تنزل .
اجت الحجيه يمي . حاولت تهديتي تحجي وياي ماكو .
رحت بغير عالم .
گالت يمه . ولدج خطيه . همزين ماجبتهم اذا يشوفوج هيج يتخبلون . صيري عاقله هداوي .
وصبري امج واخواتج .

واني منو يصبرني . منو يعوضني سنين الحرمان الي عانيت بيها .
وماصدگت صارت عنده شويه حنيه . اخذه المرض والموت مني .

نسوان داخله وطالعه . ولطم ودگ واني ماواعيه الكلشي .
بس اسمع خطيه . مات بحضنها مصدومه .

ماحسيت على روحي الا على لؤي .
يهز بيه حيل .
يگلي . هدوتي ابجي صرخي سوي كلشي ولاتسكتين .
لاتخوفيني عليج .مايصلح تسوين هيج .
جهالج ذوله مگابليج ويبجون .

حضني صوفي ويبجي .وعيت شويه .
شفت لؤي .
نزلن دموعي . گاله خلص دفنتوه راح جوه التراب .
ودعته الي .گتله مبريه الذمه .گتله هدى مسامحتك
گتله نام مرتاح .
ابجي واحجي والكل مگابلني . عيالي كلهم جايين .
ويواسوني مافارگوني .
ولؤي حضني ويهدي بيه .
گال والله من الفجر اخذج انتي واخواتج وامج اله .
يله گومي اكلي وياي اني جوعان ومااكل الا تاكلين .
ذوله ولدج هم من شافوا حالتج خافوا ويبجون .

گتله .ليش ماخليتهم يم اصيل ليش جبتهم .

گال هاي اصيل اجت وجابتهم وياها .

التفتت عليها . ليش اجيتي وولدج خطيه يتبهذلون .

اصيل .. شنو ليش اجيتي غير اخيتي ومصابج مصابي .

بجيت من گلبي . لان الله عوضني بهيج اهل .

الفجر صدگ اخذنا لؤي ورحنا . زرناه ماشفنه بس تراب
وهو صاير جوه التراب .
عمت عيني عليه . حجينا وعبرنا عن حبنا واشتياقنا اله طول هذي السنين .

والي ماگدرنا نعبر عنه وهو عايش ..
وقرأنا قرآن ورشينا مي ورجعنا .
گال لؤي . خلي ازورجن الامام علي . يبرد گلوبجن .

لؤي والحجيه والبنات .
مافارگني كل يوم يجن للفاتحه الى ان خلصت .
لؤي هم شال مبلغ وخلاه بيد امي وگالها شتحتاجون اني هنا. 

اصيل . تگلي . ولج من اجه لؤي من الجنازه  . وسمع بيج مصدومه وماتحجين ولاتبجين ومو واعيه .
تخبل . واستأذن ودخل شالج واخذج للغرفه بين اديه .

من اروحله فدوه . جان ابو واخو وكلشي بالنسبه الي بالفاتحه . افتخرت بي وهو شايل الفاتحه على راسه .
ويعزب بيده .
وبينما . عمامي واولادهم عبالك همه الخطار .

خلصت الفاتحه . وكلمن راح البيته .
وفضى البيت علينا .
وبقينا وحده مگابله الثانيه .
امي تگول . اليوم انتن يمي باجر اني وحدي منو يواسيني .
وفرقان مصيرها تتزوج وتروح .
كسرت گلبي .
بقينا كم يوم . وكل وحده رجعت البيتها بس بقى بالي يم امي وفرقان .

لؤي ساندني هواي . وصبر عليه .
وحسيت روحي هملته .
شويه شويه الى رجعت لسوالفنا وضحكنا .
احاول مااخليه يمل من حزني ودموعي .
رغم هو ابد ماحسسني .
واحس بي يريد يتقربلي بالليل .
بس يخجل من حزني .
يكتفي بحضني ويبوسني .

الى ان طلع اربعين ابوي . وبعد مارجعنا من النجف .
گال . اگلج هدى .
امج واختج . موحلوه يبقن وحدهن بالبيت .
لازم نشوفلهن صرفه .
لو نجيبهن هنا .

گتله . امي بعدة هسا .
وبيتنا مايجيب سعر نشتري غيره .
تعرفه قديم .

گال . لا تبقى عدنا هنا وهي مثل امي .
واختج مثل اختي .
والغرفه الي يم الحجيه فارغه .
يگعدن بيها .

شفتها صعبه . گتله ادري بأمي ماتوافق . بس خلي تخلص عدتها ونشوف .

مرت الايام عادي . واني رجعت الحالتي الطبيعيه رغم مانسيت ابوي وشلون مات بحضني .
بس بحب لؤي واهتمامه گدرت اتجاوز الحزن .
ورجعنا مثل قبل واكثر اني وياه .
وصحيح جنت لابسه اسود .
بس خطيه هو شنو ذنبه مااتهنى خطيه بعدهي اول ماطلعت سنة الحجي توفى ابوي .

گمت بالليل وداخل الغرفه . البسله ملابس نوم ملونه ومرات الوان غامقه . صحيح حزينه . بس مايمنع البس الزوجي وافرحه . والحزن بالگلب مو بالملابس .
#بقلمي_الكاتبة_شمس
يتبع…..

………………………………

هلاو متابعيني الغوالي 😘
اعذروني ع اطاله القصه . بس صدگوني شگد مااحاول اختصر مااگدر .
لان اذا اختصرت القصه تفقد تشويقها وحلاوتها .
اتحملوني حبايب ..
😘😘😘😘😘😘
متابعه ممتعه ..