رواية مازلت طفلة الفصل التاسع عشر 19 - بقلم الكاتبة شمس السعدي

مساء الفل والياسمين عليكم حبايب ..

….البارت التاسع عشر….
  {#مازلت_طفلة}
#بقلم_الكاتبة_شمس

لؤي مو مثل الحجي . تلحجي رغم هيبته واسمه بس جان بارد بسوالفه وتعامله وحجاياته ..

بس لؤي حتى بمشيته تحسة نار ويحرگ الگاع من يمشي .

وصرنا نسهر كلنا بالهول ع التلفزيون. والحجيه مرات ماتطول تنام من وكت .
جنه ابد مانجتمع ونسهر سويه .
كل واحد بغرفته والحجيه مرات اگعد يمها وتنام من وكت بس هسا لا گمنا نسهر .
واكو واحد عنده مكينه مال حب . دوووم مرتضى يجيبلنا منها .

فبيوم رادوا يطلعون الولد .
گتله مرتضى حباب . جيب حب وياك من هذا ابو المكينه وحار كون من تجي .

مرتضى . صار . واصوله شتردين .

اصيل . اني هم اريد حب وبطل ببسي .

-تدللن ..
والجهال يصيحون . احنه نريد جبس جبس .

راحوا الولد ومن رجعوا .
اني جنت انوم بالجهال بالغرفه .
اندگت الباب عبالي اصيل .

گلتلها. ادخلي اصوله .

انفتحت الباب ودخل لؤي اتفاجأت .
گمت ادور على حجابي .

اتقرب وگال هاج هذا الحب وحار هم .

-شكرا .
- المرة الثانيه لاتطلبين من غيري فاهمه . شنو مو بعينج
-لا مو متعوده على مرتضى .

-بس مرتضى حماج واني رجلج وسحب الحجاب مني .

وطلع ..

انصدمت بأسلوبه وجرأته .
الحجي مو مثله . هذا شگد جرئ . ويمكن يتعمد يسوي هيج .

طلعت لگيت اصيل تسوي جاي .
رحت يمها .

-شبيج هدى شكو .

-ماكو شي بس هذا ابن خالج صاير يضوجني .

-شفته طلع من غرفتج شعنده .

-ولج يستفزني ويسحب حجابي ويتحكم بيه ويگلي لاتطلبين من غيري . ضاج لان طلبت حب من مرتضى .

- هههههه غير هاي علامة العشگ والغيره عيني .

-ولج شو انتي ماتستحين شنو عشگ . لايسمعج واحد دسكتي .

-ههههههه،الي يسمعج يگول مسويه مكسوره ولج غير رجلج .

-ولج يارجلي هو كله عقد سيد . والناس كلها تعرف هو حبر على ورق بعد شني رجلج .

صاح مرتضى . يله وين الجاي .

اصيل . اجينه اجينه .

اخذت الجاي واني رحت وراها . والحجيه هم گاعده .

سمعت لؤي . گلها يمه الشيخ باجر مسوي ثواب الموتانا والرضا هم .
وگال تعالوا .

الحجيه . الله ينطيه الشيخ . مامر خميس اذا ماذكر رضا بثواب .

گاعدين . وگال هدى اذا متصير زحمه فرشيلي .

الحجيه . يايمه جا انت عود ليش ماتنام يم مرتك .

خزرها لؤي . يمه مو گتلج لاتحجين هاي الحجايه بعد .
انسي السالفه هاي ويباوع عليه .

حجيت بداخلي . والله يربي الي يسمعه يگول كاتله روحي عليه .

خليت الحجيه . تدخل الغرفتها تنام .
دخلت وراها . گلتلها يمه بعد لاتلحين على سالفه لؤي ينام بغرفتي ترى اني وافقت الاجل جهالي .
ومااريد من لؤي غير شي بس يراعي ولد اخو .
اني هيج مرتاحه .

الحجيه . يمه بكيفكم اني هم لؤي گال لاتدخلين . بس يمه بعد انتي صرتي مرته وحرام تمنعيه اذا بيوم راد حقه .

سكتت وطلعت صار گبالي . وعيونه تجدح نار .
يمكن سمع حجينا .

درت وجهي اريد اطلع . گال اوكفي .

روحي اصعدي جهزي غرفتي . دور انام بيها .

گتله . حاظر .
وصعدت .

هي غرفتي اول ماتزوجت . ومخلين بيها غرفة الولد الي جانت قبل مايتزوجون .

هي مرتبه ومابيها شي .
جا ليش گالي اصعدي رتبيها .
ردت انزل دخل .

گتله ترى هي نضيفه .

گال اني شنو ناقصني .

گتله شنو ..

گال اني مو رجال بعينج .

-بس اني ماگلت هيج .

-جا ليش ماترديني .

-ليش انت رايدني . لو هم مثلي انجبرت .

-ولو فرضنا انجبرت. بس هذا عمر شلون نگضيه هيج .

-يااا جا شتريد .

-مااريد شي.  بس لاتختبرين صبري يهدوه وهمس بأذني ترى الذيب ماتعرفيه بأي لحظه يهجم .

-اگلك لاتحجي بالالغاز ترى اني ماافهم عليك .
ووخر عني لايگعدون جهالي .

ردت اطلع سد الباب وخلى ايديه .
انتي جنتي تحبين رضا .

-الله يرحمه شعليك اذا احبه او لا.

-هاهي الله وياج انزلي .

نزلت اركض والدرج صار شطوله . بس گلبي يريد يوگع مني همزين نضال ماهي جا شرتنا ع الحبل .

دخلت الغرفتي جهالي على نومتهم .
رحت نمت وهوا المبرده بوجهي وراح تفكيري بحجاياته .
وحركاته .
ياربي شجاني ليش هيج افكر بي . مو من عوايدي .
بس لان ماشايفه رجال هيج يعاملني.
بحدة ورغبه بنفس الوقت .
والله حيرني هال لؤي .
مااعرف شيريد مني بالضبط .

ثاني يوم جاي اغسل الولدي وابدللهم .
مر من يمي ويباوع عليه بنضرة بارده .وراح الغرفة الحجيه ..
وحتى ماگال صباح الخير .
يا.  هذا شبي وفوگاها مسوي روحه زعلان .
والله ياربي . هزيت اديه . ورحت للمطبخ .
وسويت الجاي والريوگ .
اجت اصيل . گالت صباح الخير

-صباح النور شبيج خير

-اوووف خيه الليل كله عندي الم مانمت .

-يا بس لاطلوگ

-لا يمعوده هستوني دخلت بشهري . يمكن تشلعات مثل ماتگول الحجيه .

-ها الله كريم . دروحي غسلي واني هسا اجيب الريو

خليت السفره بالهول .
وگعدنا نتريگ . واني اوكل بجهالي وابوس بمصطفى .
وهذا لؤي ماشال عينه من علينا .

لؤي . تتعمد تحرگ بروحي . گاعده گبالي ببرود وتبوس بجهالها . شجاني ماادري گمت اغار منهم .
ولك لؤي اصحى بحياتك ماركضت ورى وحده هيج.
حتى هديل ماركضت وراها اجتك ع الجاهز .
گاعد افكر وامي حجت وگطعت افكاري .

-يمه لؤي جا وليدك شوكت تجيبه . هاي صارلك كم شهر تگول اجيبه وماكو.

هي حجت امي هيج . واني احس اللگمه وگفت بزردومي .
#بقلمي_الكاتبه_شمس .
……………………………………………

گلتلها يمه جا هو اني رايح . ماتشوفيني هنا يمج .
حجيتها بعصبيه وگمت .
طالع اني للشغل في امان الله .

ومو تنسون اليوم من ورى الغدا ترحن البيت الشيخ .
ساعدنهم بالثواب .
اني مااجي ع الغدا . عدنا صيانه ونتأخر .

لمينا البيت بسرعه . واصيل الوجع مافارگها .
گلتلها روحي ارتاحي وجهالج يمي .

سويت الغدا وغديتهم من وكت . خلصوا غسلتلهم .
وبدلتلهم .
ونيمتهم .

گعدنا نتغدا وجهالي وياي . واصيل والحجيه .
وخطيه اصيل مااگلت من الوجع .

تالي الحجيه گالتلها شو گومي يمه خلي افحصج .
فحصتها .
گالتلها عندج ولاده بس اذا مو بالليل باجر .
طبعا الحجيه تفتهم ومولده نص الناحيه .
بس تگول بناتي وانتن مااگدر اولدجن اديه ماتنطيني تضل ترجف وحيلي مو مثل قبل .
بس من تفحص تنطيها بالمضبوط اذا گالت باجر تجيبين صدگ باجر .

خلصنا بدلنا اني لبست نفنوف اسود انطتنياه اصيل تگول صار ضيگ عليه .
وهي سمنانه . اني عكسها رغم جايبه اثنين بس الي يشوفني يگول لاحبلانه ولاجايبه .

اخذت جهالي وطلعت . وصلنا البيت الشيخ .
صار لؤي وعدي وهاتف ومرتضى والولد كلها واكفه بباب المضيف يمكن عندهم مشكله لو شي عند الشيخ .
هو يسولف من لمحني . اندارت عيونه عليه .
اني بسرعه دنگت ودخلت البيت الشيخ .

لؤي . من الصبح لسا ماشايفها بس ماردت احسسها اني اجبرها لو فارض نفسي عليها .
طلعت وطلعت حجة الصيانه ومااجيت للبيت.
الشيخ جان عنده قضيه ومشكله بين عشيرتين .
وملتهين وياه .
طلعت بباب المضيف اشرب جكاره لان زحمه اشرب يم الشيخ .
وشفاها اجت تتمايل . احس النار شبت بضلوعي .
هاي لابسه العبايه وهيج الخصر يتمايل وهي رشيقه تگول غصن بان .
جا اذا تمشي بلا عبايه شتسوي بيه .
اخذتني عيوني وراها . وهي بارده ماتعاين عليه لو تشفي گلبي بنضره .

هاتف . ها شگلت لؤي نروح . لؤي ها وين

-گتله ها شرايد .

- لاعمي سلامتك . ماندري هيج مدوهن ياخوي .

-اتعصبت من حجايته وضجت . گتله شنو مدوهن اعرف شتحجي مو كلشي يجي بحلگك تطلعه .

عدي . أفه عليك يالذيب لاتزعل تراه يتقشمر وياك .
وغمزلي .

مااعرف ليش احس هدوة خط احمر وصعب اوصله .
احس الناس كلها تعاين بنضره مو زينه عليه اذا تقربتلها
يمكن لان جانت مرت اخوي .واني متحسس من هاي الشغله .
جا ربي ماعرف يحطها بطريقي قبل طريق الحجي .
ولو هي كلشي بالقسمه .

اوووف اصبر يلؤي لاتستعجل . خلي تطلع سنة اخوك ولكل حادث حديث .

هدى ..
دخلنا البيت الشيخ تلگتنا مرته . وبناته بس نضال سلمت على الحجيه وراحت للغرفه .
گالتلها .. حجيه اعذريني بس اليوم خميس وجاي اقرأ قرآن للحجي الله يرحمه وتباوعلي .

الحجيه .. الله ينطيج يابنيتي بارك الله بيج .

شفت توته والبنات بالمطبخ .
رحت يمها .
ها توته شنو هالخبر السمعته بالعافيه .

ضحكت . اي بس ماكو شي رسمي لمن تخلص سنه خالي .
ابتهال . والله ابوي وسوالفه ليش مفضاها فد مره .
وحد ناس تعقد وتتزوج ورجلها ماطالعه سنته ووحد انتي وهمام .

همام يصير ابن حما رجاء .يعني تصير عمته بتول يحب توته وخطبها بس . الشيخ گالهم هي الكم بس من تطلع سنة الحجي يله نعقدلهم .
وهي هم بعدهي تدرس كليه تربيه .

ضجت من حجت هيج ابتهال . وعبالها عقدت برغبتي ماتدري كلشي مفروض عليه .
بس ع الاقل لؤي مافرض روحه مثل الحجي .
الي جنت طفله وماراعه طفولتي وعاملني مثل الوحش بأول ليله النا . الله يرحمه ويغفرله .

سكتت اني ماحجيت . بس بتول ردت عليها وتگلها .
يمعوده لايغرج العقد . اصلا مايباوع بوجهها ولاينام يمها كل واحد بغرفه بس غير الشيخ جبره هو غير اني محجوزه اله .ومن وراها انجبر .

طبعا هي ماحجت بصوت عالي . بس حجت بصوت يسمعني الي لان المسافه بينا شبرين او اقل .
اني واگفه يم السنگ انطي الصفاوي مي من الترمز .

ضجت حيل ومعناها الكل يدري زواجنا ع الورق .
مدام بتول تدري .
وماادري ليش حسيت بغيره وحرگة گلب .
وهو اني اصلا ماراغبه اصير مرته من البدايه بس ليش ضجت ماادري .

ساعدت البنات بالحلاوات والزلايط .
من صار وكت الصب .
دخلت الولد تصب وتسهم اللحم . لأن عندهم خطار بالمضيف .

اني سحبت نفسي لأن ماعندي اختلاط بولدهم واستحي منهم .
رحت گعدت بالصاله يم الحجيه .
جابن السفره البنات وفرشنها . وبدن ينگلن الخضره والزلاطه والتمر والتشريب .
الى ان وصلن لمواعين التمن واللحم .
وزعن وخلصن . الي يسهم اللحم لؤي .
حمودي وياه مايفارگه .
بس صفاوي يمي .
واحنه گاعدين . هو لاف دشداشته على خصره ودخل بيده ماعون .
گال هاج هذا الماعون الصفاوي همس .

الكل بقى صافن . اني استحيت .محد سمع من مال الصفاوي لان قرب حلگة يم اذني وحسيت بنفسه ومااعرف شصار بيه .
بس الحجيه سمعته .

توته طفرت ام الجفصات . احم احم كله صاير خصوصي اي ليش لا وتضحك .
استحيت كلش . رفعت عيني . صارت گبالي هديل .
مدري ليش صارت عيني بعينها ويمكن لان جان يحبها وتحبه .
ماادري ليش غرت منها ومن بتول الي اكلتني بعينها اكل #بقلمي_الكاتبه_شمس
يتبع….

…………………………

لليل هم انزل بارت الكم حبايب ..