رواية مُقيد أجنحتي الفصل الخامس وثلاثون 35 - بقلم 💗

البـارت السـادس والثلاثـون ..
بقلـمي مريـم علاء '

صخر:- بالحسين فلا اسكتلو بعد ..
عثمـان:- ول شمالك انت،  وعلي هسة يفصلك.. وينقلك للموصل اكعد واسكت صخيران ..

صخر:- خب ياكل وحل.. مو هي هيتة
عثمان:- چا انت شعبالك، ترى كلها صعدت بالواسطات .. هو ياهو صعد بزودة غيرك وغيري!؟
يول الزم اعصابك،  هذا مايخاف ..ولا تنسى بيمن مقتدين، وانت قيس ..

رد بعدم لا مُبالاة:- بطي**..
عثمان ;- شفت طي** ،اقصد لسانك وين راح يودينة ..اسكت يمعود..

-صخر:- يول شبيك انت،  عليش خايف
هذا رائد هذا، وين اكو رائد يسكر!!
وين اكو رائد عندو كرش رحمة لجدك؟

عثمان:- ترى هو بس وياك هيج ..
صخر:- طبعا مطلع خياساتة .. والله لو ما انت جان اني من زمان منقل .. عندي استعداد انزل لحدود ايران ولا اجي يم هذا الي وجهة يسد النفـس،  بشـرفي الي يريد يضعف،  لا ريجيم وعذاب

بس يجي يم هذا،  تنسد نفسـه لمدة 7 اشهر ..
عثمان:- لعـد شكد تحبة ..
صخر: هواي ..

صخر:- ثاني يوم وثالث يوم مر علينا طبيعي
لا هو اجة يمي ، ولا اني علت بي
بكل مرة .. واحد يحجي الحق ، أنة استفزة
الشغلة مو بأيدي .. اني الي ابدي

اليـوم الرابع تغدينا وطلعنة ..
اني انزل من الصبح .. هو يجي بعد الفجر
دخل للمشـتمل ..كال

عثمان:- تكسرت وعلي ..
شمر قميصة على وجهي
صخر :- ابن الحلوة .. ريحتك ما خلت حاسة شم علية..

عثمان :- هو بس سبع ساعات لابسة
لعد لو اسمر عليك ابو الـ١٥ ساعة شتسوي!؟
صخر :- اموت غير ، ليش اكو منفذ !؟
عثمان:- بشرفك سويلي هاي الأكلة الي تسويهة ، بيض وبصل وكرفس ..

صخر:- ليش .. طباخ الخلفوك اني .!؟
عثمان:- سوي خير بحياتج .. مرة وحدة !؟

صخر:- عمي خير وياك ما اريدة..
عثمان:- بشرفك جوعان ..حتى اكل ونصلي وونـام ..
صخر:- منك من الشيطان !؟

عثمـان:- امنيتي مرة تحترمني ..

:- شلون احترمك ، وانت حمار !؟
كال بفشلة:- وشبي الحمار .. كائن لطيف ..
صخر:- بس يبقى حمار..

صد وجهة ورفع البطانية غطى وجهة بعصبيةوكال :- انخمد احسن .. ما منك جزة ابن مروة..

:- يا هي خالتك هاي !
:- لا "****

صخر :-شخبار محبوبتك ولك..
عثمان:- بشرفك لا تكول هيج ، احس روحي مكرن..

صخر:- اكل خـر* عزيزي .. وكول شخبار خيتي !؟

صفن وابتسم كال بصوت نعسـان
:- مشتاق آلهة ..

صخر:- يحمار .. ما سألتك شبيك ..كتلك شلونهة ..

عثمان:- مو ذكرتني بيها .. ولك صخر تتذكر من كتلي المحبوب ما ينمل ..
وعفطتلكك .. ونركعت بشحاطة!؟

:- شلون انسى الشحاطة ، اي شبيها !

عثمان:- ما مليت ..هاي صار شكد ٣ سنوات احس ملكت الدنيا .. ماكدر اتعمق أكثر
لان احس روحي مكرن .. بس عاشگها
من اول يوم شفتها وي ابوها ..بالشمال الاكشر.. ما طلعت من بالي

صورتها لحد هسة من اطلع .. اخليها بجيب البنطرون .. كل ما امل واني هنا ..
بس اشوفهة .. لو من تخابرني تكول
شوكت ترجع ..اووووف صخر روحي تنسحل ..اريد اطير واروح يمهة

ولو ما وكفتك وياي .. جان هسة هي مو يمي  و ببـيتي ..

رفع صخر عيونة لفوك بغرور وكال
:- انت بدوني .. بسوگ الغزل ما تمشي ..

عثمان:- رحم الله والديك ..
رفع حاجبـه مستغرب كال
:- عثمانووو .. شني جنك راح تودع
ردك خجلني .. متعود على أخلاقك السزز
..

رد بضحكة:- على كلبك .. اخذك وياي اذا رحت..

صخر:- طيح الله حظك ..

...

صبح الصبح علينا باليوم الـخامس على دوامنة ..
كمت سويت الأكلة هاي الي يحبها.. اجة ويانة  صديقة ويا من ينزل بالمقر

كعدنة ناكل .. احب الريوك وي هالحيوان..
.. خليت الصينية كبالة. . ورجعت اجيب كلاص مي .. اول ما دخلت للمشتمل
لكيتة يبلع اللگمة الي بحلگة بسرعة

كعدت يمة وكفختة قوي على راسة
صرخ بوجع:- هااااي ليش !!؟

صخر:- انتظرني يحمار ..يثـووور
:- اكلك لا يقاوم .. جنة عيون مريتي ..

صخر:- جنك مشتهي الخـ** على الريوك..
عثمان:- لا بشرفك .. خنتريك وراها شتسوي سوي ..

اباوع عليه .. صار. ياكل سريع من سمع تليفونة عالشحن .. يرن ..
كام ويسمح ايديـه بملابسة

صخر:- ولك يالخايس .. ايدك ما غسلتها علمودهة .. إذا طبو علينة د١عش ياخذوني وانت ما تدري ..

سوى حركة اصبرلي بأصبعة
.. من سواها إيست.. لان هاي الحركة وي عثمان ، مثل حركة امي من اختها
تخابر علية.. وتسويها.. يعني تصير حرب عالمية ثالثة يلا اخلص ..

كمت كفيت رداني .. غسلت الصينية..
ورجعت مددت .. شوي وصارت هوشة برة
قبل موعد نزولي للمقر بـساعتين ..

دخل علينا الي ما يسمى.. بدون لا احم ولا دستور .. جيت اكوملة اجة بسرعة عثمان يركض .. كال
:- تفضل سيدي ..

كال هو :- صخر .. تنزل هسة عندنا
شك بسيارة مفخخة .. تروح اوكف يم سيطرة الـمرحوم فلاح .. وانتظر منك الرد على الاسلكي ..

صخر:- بدون اي تفكير .  لبست ملابسي وتوجهت للقاعدة .. ما خايف على روحي
بس تفكيري جان بحبيبة روحي .. والله وگت
جنت واتمنى استشهد.. هسة أتمنى ارجع سالم لعيونهة.. مشتاق آلهة .. وحگ هو علي الا ارجع واطلع ضيم كلبي بيها

بنت اللذين .. بايگة حسن النسوان كلها
وجمال اطباعهن..

قبل ما اصعد السيارة ونتوجـه للقاعدة
.. فتحت الجهاز .. مفتقدهة اليوم .. شفتها ما متصلة يعني باليل تتصل .. غلقتة ورجعتـه بجيبي.. ركبت موكل امري لله ..

صعدنا قرابة الـ ١٤ واحد .. تتوزع على كل السيطرات الي بصـلاح الدين ..
الشباب كلها تضحك .. هذا الي يكول هسة تطلع السيارة هي هاي الي كاعدين بيهة
وهذا الي يكول .. الله راح اروح شهيد
وادخل الجنة ..

وهذا الي يكول راح اخلص من ام زوجتي
كل واحد بيهم يحدد طريقة موتـه ويضحك
..
عثمان راد يجي .. بس كال آلة حبيب كلبي
:- عثمان .. انت ابقى هنا .. اخاف يجي اتصال ندزكم الأماكن المتحمل وجودهم بيها

الحمار هو كيف .. رجع يخابر..

اول ما وصلنا .. كل شوي نلزم كلوبنا
لان هاي المنطقة سكنية .. صح ما بيهة هواي عالم .. بس تعودت شوفتهم كل يوم ..

اذا صار باحد شي .. محد راح يسامح نفسه .
ويكون القصور من عدنة .. .

فوگ الساعتين احنة واگفين
الشباب كالو ماكو عدنة شي .. واحنة هم هيج
وصينة اهل المنطقة .. اي حركة مو طبيعية يتصلون بينة .. واكيد بقوة عدد من الشباب..

ركبنا متوجهين كل واحد لمقره ..
نص الطريق .. استوقفنا مكالمة من جندي قريب على مقرنا العـام ..

.. صاير هجوم مسلح على قواتنا
وهواي شهداء ..

هن كم كلمة .. خلتني ارجف رجف مثل السعفة .. محد اهتـم .. بيهم الي فرح لان نجة من هذا الهجوم ..

بدون اي كلمة .. رجعت راسي ليورى
متاكد العـار عثمان ما يموت ..

مشت بينة السيارة بسرعة .. ضحكت مطمن على صديق عمري .. جمعتنا جامعة مدة ٤ سنوات وبالتدريب هم نام على گلبي ..

حتى بالتعيين .. طلعنا نفس المحافظة
محظوظ بية هو .. الحمار ..
تخليت الموقف مثل كل مرة .. من كلبي يوكف عليه .. تالي ارجع الكاه حاط الصينية
وكاعد ياكل و الاكل طالع من خشمـه
يدك صدر ويكول :- لا تخاف .. بزونة اني سبع أرواح .. تخلف انت وتموت واني ابقى عايش .. تدري ليش !

ارد عليه بضحكة :- ليش !؟
عثمان:- اشرب مي على الريق ..

مر الوقت .. وما حسيت شلون وصلت
ومن اكول ما حسيت .. فعلا ما حسيت
لان اني حفظت لافتات الشوراع كد ما اقراها .. بس هالمرة .. عيوني صارت شاشة سودة .. وبالي مرسوم بي وجه عثمان الثـور ..

اول ما نزلت .. عثرت بجثة محد منتبـه آلهة
وكل عقلي أتاكد اخاف جثته .. وانا ادري بي عايش ..

صحت بصوت عالي مبحوح ..
خويني.. اخيك المرحوم .. هنا اخاف ماشفتة

تقدم شالة والدموع بعينة .. الا اني
احس بعدة موجود ..
توجهت للمشتمل مالتنة .. فتحة وعيونة راحت كبل على المكان الي يوكف بي
من يخابر مريتـه ..

مالگيته .. اكيد فات يقظي حاجتة
.. طلعت ادور عليه بالصحيات .. ما فقدت الامل .. لان هو كال ، العـار ما يموت

وانا اشهد هو عـار .. گلبت الدنيا عليه
عثمان ماكو .. توجهت اصرخ
:- ولكم كواو** صديقي وين !؟
كلها تباوع وساكتة ..

بس شفته كبالي ..رحت اركض عليه
لزمته من ياختـه ونترت بيـه

:- صديقي ويننننن.. عثمااان وين ..!؟
انت انت السبب .. خليت قواتنا تضعف هنا حتى تستفيد .. الله لا يوقفك

عن ايدي .. وصرخ ..
:- شلون أسويها ولككك ..شبيك انت مخبل
جا شلون بقيت انة هناا ..

صرخت:- لعد وين عثمان !!
نزل راسة وخلة ايديـه على وجهة وكال
:- نقلوا للمستشفى .. تعرض لطلقتين وحدة بنص الصدر ووحدة قريبة على الگلب..

نترت بيـه :- لا تعوووي جنك مرة
ما بي شي .. رايح اجيبـه وارجع
..

وين مكانهم بالضبط!؟
_ هي بنفس المستشفى ماكو غيرها .

مشيت .. المستشفى مو بعيد
.. مبتسم وبعدني متطمن .. بعدة عايش ..
اول ما دخلت المستشفى .. اخذوني الردهة
..

شفت صديقي بحالة .. لو ميت ولا شافتهة عيني .. مو هو صدرة الوسيع ملفوف بالشاش... وجهة مورم .. ايديـه ملفوفة

ونايم ، مغمض عيونة واني اركض وتعبان
تقدمت يمة وضربتة قوي على رحلة

صرخ موجوع:- شبيك نعال ..
صخر:- وين جنت ..!؟
عثمان :- امارس حقوقي .. شدتشوف !؟

ضحكت بقهـر:- بعد متگدر ..
سأل باستغراب:- ليـش !؟

:-ايدك ملفوفة .. حتى وي نفسك متكدر
ضحك وعقج وجهو وكال :-
شكد عاررر .. تعرف الاحتياطي ..

سكت شوي ورد كال :- جوعان لك عار..
صخر:- شتريد !!

عثمان:- اي شي !
صخر:- امري للـه احجي ..

عثمان:- بشرفك مشتهي باچة .. مريتي نازكة. ما تقبل أدخلها للبيت ..
اريدك توصيلي هواي ..

..صخر:- ما منك غير الخسارات ..
طلعت فرحان بي .. طلعت فريت ودبرتها

كال الدكتور مو زين ومدري شنو
هو ضربة بعرض الحائط .. وكعد يثرد وياي..
وكل شوي استغل الوضع .. اضحك على حالـه .. بس بداخلي ميت عليـه

النزيف ما توقف عندة .. بس حاولوا يسيطرون عليه ..

بنفس اليـوم بالليل .. كاعد يمة
كعد يصرخ من وجع صدرة
..

كمت أصيح دكتور
كال :- وين رايح !؟

:- أصيح أحد ..
:- تعال اكعد يمي ..

:- شبيك عار .. شيوجعك !؟
عثمان:- طي**..

صخر:- ابن الـ*** .. 

ضحك بوجـع واسترسل بكلامـه..
:- اكلك خويني.. شو جني مودع..

صخر:- اكل هوى .. ما بيك شي ..
عثمان:- دحترمني  مرة وخليني اكمل ..
انا شكلي مودع .. اريد منك بالك على امي ومريتي .. هن هذن الي طلعت بيهن من الدنيا .. وانت

ما راح اكلك تزوج مرتي .. ولا هالتمضرط
بس بالك عليها صخر .. بشرفك انت آخذ الراتب خلي بأيديهن . ولا تقصر بالفواكـه
يعني حرك جيبك ..راح تخلص مني

بعد ماكو ازعاج.. تنـام براحة بالليل
..

بدون اي تفكير .. كمت من يمة وطلعت برة
عقلي ما يستوعب .. ما أصبح بوجهة الزفر
الي جنت اكمل بي يومي ..

كعدت بالحديقة .. حديقة شنو
باقية بس حدايد .. سحبت حجارة جبيرة
وسحبت باكيت الچكاير مالتـه ..

كضيت عمري انا اجيب آلة التكة مال چكاير.. العار لو احسب على كم تگة
أخذ راتـبه كلة ..

الجو يكص كص .. كبل اجت ببالي سحابة
بس التفكير بيهة يحسن حالتي

چـاا حضنها شلون بي ..
بس كملتها دخلت يمة .. لكيتة مغمض عيونة
رحت يمة كلبي يرجف .. فتح عيونة يضحك
صرخت بي :- كو** بطل سوالفك الخ**

ضحك وكال:- داسويلك برفوة .. علمود متنصدم واشوف تعابير وجهك ...

صخر:- بشرفي كو** ابن *** ابن ***
وامك خوش مرة ما اريد اغلط عليها
يلا نطمر .. باجر تگعد مثل الحصان ما بيك شي ..

سحبت البطانية ونمت يمة بالگاع ..
كعدت ثاني يوم الصبح على صوت هوشة

كعدني ممرض كال
:- سيدي .. من فضلك اطلع برى. .

:- صاير شي !؟
رد بتوتر .. لا ماكو ..بس نريد نفحص المريض ..

طلعت غسلت ودخنت .. رجعت الغرفة مسدودة.. ما ركزت ..
جان بالردهة بنص الموتـه كمت نقلتة بغرفة وحدة .. بفلوس .. والمبلغ يسوى راسة
بس يصير زين أخذهم منة .. ما منكم بس الخسارة ..

طلع ممرض من الغرفة يصرخ
.. دكتور , الطلقة بعدهة بصدر المريض ..

كمت من مكاني مفزوع
سحبتة من ياختة وصرخت
:- شنو الخ** بعدها بصدرة.. انتو مو كلتو طلعناهة !!

كال بخوف:- والله مو شغلي سيدي ..
اول ما لحمت الطبيب رحت اركض بأتجاهة
.. قبل ما اصير يمة .. رفع ايدة بوجهي وكال..
:- بس تفهم اخي ..غلط طبي بسبب الجهاز الي المفروض يبين موضع الرصاصة ..
هسة نتصرف لا تخاف ..

نترت بي:- تحررررك لعد شمنتظر يموتت!؟

دخل يركض .. دخلت وكفني الممرض
:- سيدي ما يجوز ..

:- وخر من وجهي.. دفعتة ودخلت بس شافني ابتسم ..
كال:- بما اني جندي عراقي ..والي هيبتي
اطلعوا كلكم برى .. اريد انفـرد بصديقي
لا يروح بالكم بعيـد،  بس نحجي ولا تخافون ما اضربـه ..

كعدت يمة كال بضحكة بمعـاني ممزوجة بوجـع:- راح اروح للجـنة،  وانت راح تكعد يم ابو لهـب ..

صخر:- شلون تروح للجنة. ، اطلبك فلوس للموت ما تسددهن ..

ضحك وكال:- حاللني و واهبني بس هالمرة
..
:- لا ما حالّك ..كوم نرجع الاماعين تظل عليه ..

ضحك ولزم صدرة:- اكثر شي مكيف
بي من امـوت، 

;- هههههه،  ليش!

:- انت تغسل مواعين،  بس هنا،  اني اغسل هنا وهنـاك ..

صخر:- افــاا ..

عثمان:- شبي الشغل عيب!

صخر:- لا يابة .. بس ردت نوع الصدرية الي تلبسهة اجيبها للمـرة،  لان ملابسهة تتبلـل ..

عثمـان:-  ههههه،  بالك على امي،  ما تتحمل بسرعة توكع ..مهل الهة الخبر ..

صخر:- يعنـي من امهل متوگع!

عثمان:- لا توگع بس الحذر واجب
راح اشتاق الك عار ..

صخر:- اذا ظليت عايش ورة كل هالخريط
اني اموتك بأيدي ..

ضحك . تمدد وكال:- اطلع يلا اريد انـام..
صخر:- حجيت وياهة !
عثمان:- لا تخاف ..فهمتهة كل شي البارحة من نمت انت،  وفتحنا كامرة وامنت
دام هي وي امي،  وانت وياهن
راح انـام بگبري مرتاح ..

:- كول يالله بلكي تعيش ..
:- هههههه،  عليه ديون،  بلكت من اموت تنساهم ..

طلعت ما اتحمل بعد،  تالي عمري انزل دمع علمود هذا عثمـان ..
للعصر .. مات عثمان. 2019//4//19
يـوم الجمعة ..

ايـام بعدهة، وشلت جثمان صديقي
واعز ناسي .. خويني'' على گولتـة
وامـه وراي تصرخ

:- ما لحگت اشوف اطفالك وليدييي..
..

سارح انة بهمي،  خلينا بالجامع
ليلي سهرتة يم راسة اقرا الة قران

ما مصدك كل هذا الفلم السـريع
..اتمنى يطلع حلم، واكعد منة واكول الحمد لله طلع حلم .. لحد ما اجة الشيخ واتوجهنا للنجف ندفنـة ..صح جان من غير طائفة

بس من عشـاق الامام علي عليه السلام
ظليت صامد بس لشوكـت .. انة تالي عمري تنزل دمعة من عيني،  اريد اصرخ واخذة بحضني وابجي ..

بعد ياهو يخابر علي بأجمل لحضات عمري
بعد ياهو يخرعني واني نايم ويگطع خلفتي

المن اسوي اكل ..المن اسولف همي
علمن انصـب! الحمار راخ يدخل الجنة
وعافني وحدي

الي كضيتها ويا من بداية شبابي .. اليوم فارگني .. وراخ لمكان احسن من مكاني

نزلت وياهم،  اذب على گبرة التراب ..
كسرت ظهري  عثمان .. كسرت ظهر اخوك
..

شكد ماتو عزاز،  بكل مرة اكول تهون
بس ما تهون .. عمرة فراك الميت ما يهون على عزيزة ..

حشتاق لسوالفك يا صديق عمري ..
يا مجاهد .. يا بطل .. ياحامي عرضك ووطنك .. گال الشيخ بصوتـه بخشوع

قـال تعالى ( ولا تحسبن الذين قتلوا في سبيل الله امواتا بل احياءٍ عند ربهم يرزقون)  ..

الفاتحة ..

•يـَتبع...

دمرني هالبارت ..
اعتذر اذا نزلت دموعكم اليـوم .. بس هالانسان ترك اثر جميل ورسم ضحكة على شفافي شخصيا.. والله ما يهون عليه اودع عثمان بالقصة ..

اترحموا الو هوايي بنات ..
وما اوصيكم بقراءة سورة الفاتحة
اسمة الحقيقي عثمان ..

....