رواية مُقيد أجنحتي الفصل الثالث 3 - بقلم 💗

الحَـلقة الثالـثة
بقلمـي .. مريم علاء ..♥️

هذا البارت ، اكو كاتبة لطيفة مُبدعة ، وكُلش قريبة على قلبي ساعدتني بمـشهد من اناملهة الجميلة ♥️🫂
( fto_me14 )
اشكرج كُلش هواي

مُلاحضة ⛔️.. / شبـاب لا تنسوا التـصويت والتعليق على كل فقرة ، لان القُصة هاي راح اكتب بيهة البـارت يوم بيومة 'يعني "تفاعلكم يسوي الي واهسة"
وبـس يُبـا احبكُـم

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

عفت كل شي ونسيت حتى الزرالة ، اخذت خمس طوس و١٠ كرص خبز وكعدت يم جدر التشريب ..

ثردت الخبز على السريع ، وصبيت التشريب فوكاهم
العباية ضايقتني نزعتها وشمرتها حّـدي ..

كمت اخلي الكاسات بالصينية حتى يجون الولد ياخذوها..

توني مشيت خطوتين ، وسمعت صوته الي رج البيت من كال ..

_ صخر : ولج سُحـاب شنووو هاااي ..

_ سُحـاب : نسيت اني وين واني ليش وعقلي وكف ، وكعت الكاسات من ايدي ..

وهو وجهة ما يتفسر صار ، احمررر... بلعت ريچي بخوف ..

بحركة سريعة صار يمي لزمني قوي من كوع ايدي وكال بصوت عالي

_ بسرررعة وحدة تجيب عبايتها..

امي جانت قويبة على عباتي شمرتها الة
كمطني بيها تكمط ، وسحلني من المطبخ لغرفة ابن عمي المتزوج سحـل ..

اول ما فتح الباب شمرني داخل الغرفة
باوعلي بغضب واضح وگال:-

_ أنتِ شنو من بنية رحمه المحمد ، هذااا لبس ينلبس بشرفچ؟؟ ، لچ أنتِ متشوفيننن شلـون معاني جسمج ومفاتنچ واضحه!!

فرك وجهة بعصبيه ورجع گال:-

_هذا لبس وحده مترباية وبت بيوووت... ، بس تعرفين شنو مو صوچچ صوچييي اني الي خليتچ تطلعين مِـن البيت اصلاً...

مافتحت حلگي بحرف بس واگفه ومنزله راسي ..

لزم راسه بقوة وعصرة بأيده وگال:-

_يجي يوم يا سُحاب وتجلطيني والله

تقدم بتجاهي وصار گبالي حط عيونة الحاده بعيوني واردف بذوبان:-

_كُل هذا الحسـن اذا احد شافة غيري اذبحچ...

جرني اله ومد ايده ولزم القميص من جهة الصدر... ، وشگه من بدايته النهايتة !! ، لكن مِـن حُسن حضي چنت لابسة فانيلة نـص...

ما تحملت دموعي نزلت ،، دنكت راسي وبچيت بأعلى صوتي ..

رفعت عيني لكيتة صافن علية ، عيطت بي
اطلع برةةة ، اطلععع..

طلع وركع الباب ورا ، خليت راسي بين ايدي وابجي مادري ليش هيج يسوي وياي ،، هذا مو حب انتقام . كرهني بشـي اسمة حُب ..

دخلت عليّ اسماء زوجة ابن عمي ..

_يا سُحـاب. يعني انت جسمج ما شاء الله بارز
وهو بدون شي يتخبل عليج نوب تلبسين الة هيج .. يعني حقة محد يلومة..

_ اسماء رحمة الله انت وياي علية ما تشوفوا شلون يتصرف وياي ليش محد يحجي لا عمي لا واحد من الولد ..

_ بصراحة غير ، كلها ادري انت مرتة ، وكلها تدري انت تتدلين علية .. يعني من يصيحوج او يجبون سيرتج يكولون مرت صخر موش سُحـاب..

_ اسماء جاية تهونين عليه آو تزيدها ؟

_ ههههه لا حبيبي اسفة ، هو كال روحي انطيها شي تلبسـة ..

توجهت لكنتورها طلعت دشاشة .. لبستها وطلعت اشتغل وياهم .. محد حجة وياي شي ، لان متعودة علية كل ما يضربني لو يرزل بية .. يطلع يكول الهم لحد يحجي وياها ..

كعدت حد امي اتغدة ، بس ما الي نفس .. بقيت ادعي عليه بكلبي ..

.. كمت الم وياهم المواعين.. وكفت افرغ واخلي بالسنگ .. واحس مخنوكة بس اريـد ارجع للبيـت ..

دخل هو بأيدي صينية كبيرة ، عندة استعداد يشيل عشـر صواني ولا خيلي واحد يدخل للمطبخ غـيرة ..
حسيت نظراتة علية ، بس اني ما باوعت سويت روحي امسح بالكاونتر..

اردف .. بنات جاي سوو..

هو الجاي جان على النار بس كلها تشتغل.. خليت استكاين الجاي وصبيت. توجهت اودي للديوان بعدني توني وصلت يم البـاب سمعت صوتة وهو يكول
..
هيووو وين تعالي ، شبيج انتِ بابا موش زلم جوا ؟

_ انطيتة الصينية ، وصديت وجهي اريد امشـي .. لزمني من ايدي وكال ..

شني بوية زعلانة مني ؟ المفروض انة ازعل ..

_ سُحـاب : لا ما زعلانة ، وانت منو حتى ازعل منك او ازعل عليك ...
قرب وجهي لعند وجهة. بجرة من ايدي وهمس ..

اني روحج ، اني سندج.. اني زوجج...

_ توترت وبعدت وجهي..

ابتسم هو وكال ..
يبوي اذا الحـلو زعلان .. فإني اسف يبعد عيني انتِ ..

_ ما رديت علّـي ، بكُل مرة هيـج يكول ..
عفتة ورحت للمطبخ مو صاحي ، يكسر راسي بعدين يكلـي ٲسف .. تهي بهـي ..

رجعنا للبيت بس اني روحي طافرة من ورا ساعة السـودة الي عرفتك بيهة يا صخر..

انتظرتهم ينامون حتى اصعد للسطح واكعد الكعدة الحلوة مالتي ..

صرت احسب الخرفان ، الناس تحسب الخرفان حتى تنام اني احسبهم حتى اصحصح..

شي خروف اتخيلة صخر .. شي خروف اتخيلة اختة سمية شي خروف اتخلية مرت عمي..
واضحك علىهم..

صارت ساعة  ٢:٠٠ ضبط كمت من فراشي متوجهة للسطح بس خايفة ..

فتحت باب السطح لفحتني نسمة هوى باردة جانت اكو نضدة سحبت منها بطانية.. ﯠفراش .. الله امي لو تدري بالفراش هذا تشمرني منا ..

فرشت النضدة وخليت نعالي ( مكرم القارىء ) عود مخدة.. تمددت وغطيت روحي..

يمة تكص كص بس اني وحدة عرمة لازم كل يوم اصعد للسطح ما انزل الى يصيح اللــه اكبر ..

رفعت عيني للسماء نجوم والسمة صافية وشكلها حلو .. القمر كامل ومضوي عتمة السطح منظر كلش حلوو

صرت احجي وي النجوم اتخليهم صديقاتي الي حرمني منهم هالثور .
بدت تخلخل ذكريات الايام القديمة في بالـي

لحد هسة اذكر من جنت طفلة اللعب بالشـارع وي البنات .. سمعت صوت امي تصرخ.. توجهت بدون نعالي اركض للبيت الى بالي حسن اخوي بس شي ...

ومـن وصلت شفت ابوي وجهة ازرك وامي نايمة يمة تبجي وتصيح..

كوم حارث كوممم وين اروح بعدك حارث مو اني حبيبتك كومم احلفك بحسـن

الجهال ماشافوا منك شيي كومم حارث
هنا فهمت الي صـار ، فهمت ان بعد ماكو اب بحياتي..

بعـد ماكو ابوية.. بعد منو يرجع من السـوك كل يوم بيدة لعبة شكل ..

بعد محد يجيب الي موز ويصيح سُحـاب القـردة ..بعد من امي تريد تضربني وين اروح اختل ،، لان بعد ماكو ضهر ابوية حتى اختل ورا ..

بعـد رجل منو ادوس حتى ينـام .. بعد المن اكول اريد ربع..واذا امي تمرضت منو يسويلي  ثريد صمون وجاي

بعـد منو يسـوي الي ربطة حذائي لان ما اعرف اشدهة..
بعد منو يغني الي ولبتـول يمة البنات عشرة واكول كليلات..
توجهت يم جسمة .. بستة من عيوني وكصتة وراسة..
بست ايدة ورجلة.. الايد الي نكسرت علينة.. حضنتة واشم بريحتة الي ما اشبع منهة..

ودعت ابوية واني طفلة كل شـي ما فهمت من عندة ..
البـارحة جان يرزل بية لان اللعب بالمي مال مبردة وزعلت من عندة ..
دخل علية بليل ،،

_ بنيتي سُحـاب ، اني اسف يروحي ، چا انة غير اخاف عليج اذا رحتي منو يدوس رجلي بعدج ..
باس راسي واخذني بذاك الليل الاظلم ، اشترالي بـ٣ دينار. رجعـت للبيت مكيفة..

الصُبح من كعدت سوالي طاستين مو وحدة ثريد صمون وجاي يعرفني احبة..
وطلعت اللعب بالشـارع .. وصار الي صار ..

اخوية الي توة اجة للدنيا ، ما صار ٣ اشهـر ما شبع من عندة ..
٣ اطفال عاف ورا وراح ، بأيد مرة لا حول ولا قوة هي عافت اهلهة والعز والدلال علمود ابوية ..

خابرت امي على جدي على امل يحن كلبة عليها ويسحبها يمة للخارج..

بس جان ردة ..

_ اني بنتي ماتت من يوم ما ماتت امهة.. ما عندي مكان الج هنوب الج ولجـهالج .. سد الخط بوجه امي ..

احتارت امي وين تبقى ، ضلت معيشتنة تخبز وتبيع بس النـاس اكلت وجهة.. شلون مرة عايشة وحدج وغنج بنات حديثات..

فخالتي أقترحت على امي نعيش وياها وتبيع هذا البيت
وفعلا بعد مرور كم شهر أنتقلنا لبيت خالتي ..صار الي ما كان بالحُسبان ،

><><><><><><><><><><><><><

على قفلة البارحة ، خفت اليوم اخلي قفلة قـَوية ..
البـارت الجاي احلى ، ومن هسة اكول مُصايب سُحـاب هواييي ، لهذا تعودوا ♥️

احبكم