رواية مُقيد أجنحتي الفصل الثاني عشر 12 - بقلم 💗

(الحـلقة الثاني عشر)
بقلمـي مـࢪيم علاء 🦋⭐️

(⛔️ .. لا تنسوا التصويت ⭐️، والتعليق على كل فقرة ،لان هذا الشي يحفزني اكتب بارت 🥲🤍)

...............................................................

بلشت دوام ومن اول اسبوع بلـش صخر يوصلني
اول اسبوع ضل هو ، بعدهة رجع للدوام ،بلش ويانة حيدر وبدت البواري مالتـة ، يوم تاخذة النومة ، يوم يطلع الدوام وينسانة لو صخر هنا جان اخذنة وهو الممنون

اخخ يصخر ، والله وطلعت صگارهم
كعدت اليوم وجهي معبس ، اكره الدوام الصباحي ، اكررره يوم الثلاثاء ..

كمت اتمطى بجسدي يمين يسار، لابسـة التراك الشتـائي ، برتقالي وبي هذا الدُب الي ياكل عسل ..
البچامة تك صاعد ، وتك نازل فتحت باب الغرفة واني اجوعر بصوتي الانوثي ( جذب )

_ بَـتووووول ، يلا كومي دوام
بَتوووول . يلا عاد فضيني ..

_ بتـول: بسم الله ، شكو شبيج ايععع شنو هذا صوتج ؟

_ رفعت حاجبي بغرور ورديت :
شبييي يخبُل ، اصلا اكو عالم تتمنى اكول الهة صباح الخير ..

_ صحيح ، المهم حضري الريوك بين ما ابدل واجي ..

_ اردفت بصوت كأنة صوت الدلالة ام زكّي ..
واني اخلي ايدي على خصري ..
اءءء ، وليش عينييي ، مكسورة ايدج ، لو معوقة .. لو خدامة عند الخلفوج ؟

_ بتـول : هيووو يعمودة ، لسانج ولج ادري رشاشة ، روحييي ولج بين ما اجي حتى انت تبدلين واني اكف المطبخ

_ اردفت بفشلة :
چا كولي هجّي من البداية ، اني ما كان قصدي شي ترى !!

_ لااا ابدا ، قابل مثلا تتعاجزين من ريوك ؟

_ طبعًا لا ..
تركتهة وتوجهت للمطبخ اسوي الريوك التركي ..
وكفت سويت بيض عين وخليت زيتونتين يم الجبن الكيري ..وسويت جاي خفيف عود اتراك وكذا

بس خرب عليَ لحضاتي الممتعة ، ابو الغاز وهو يصرخ
_ غاز غاز ، عيني غاز ..

_ سُحـاب: لاااا عموو مو وكتك ابد ،شلون يخليني اصيح علية مهند بس نسخة عراقية ..

اردفت اُمي الي كاعدة بالكاع على الفرشة تضحك
_ ياهو مهند العراقي ؟

_ ياهو ، يااا ما تعرفي ، ابن حماج الشفيـة صخر..

_ كريـمة :يااا ولج مهند هذا الي يلعب ستين نفس يشبـه صخر ؟

_ لاا ، مهند  هو يشبهة ، شبيج انت يمة ؟

_ دنلصـمي لج ، اصلا صخر احلى ، اسمر العيون مرسومة ، والذقن يخبُل ، والطول المفرع ، والهيبة .. مهند شنو ؟

_ اييي صحيح ، اردفت واني ارفع بحواجبي
هااا يُمة ، شني جَنـج حاطة عينج على زوج بنتج ؟

_ردت  وهي تكوم وتتحسب الي
هايي وي منو تحجين ولج ؟

_ نهزمت من يمهة اركض واردف بضحك ..
ههههه ، شبيج ست الحبايب. صايرة ما تتحملي شِقة.  صيري نَـفهة هيج مثل بنتج

بعدنـي امشي واحجي وياهـة ، منطية ضهري لباب الحوش ، طخيت بصدر دافي
لزمني من خصري واردف

_ على كيفج بوية ..

صديت وجهي ، واشوف صخر واكف كبالي مبتسم ..

_ تحمحمت بخجل واردفت ، صباح الخير ..

_ صخر : صباح النور ، نشاط اليوم ؟

_ فرحانة ، متحضرة للرزالة ..

_ صخر : بس فهميني انتِ ليش اذية ، يعني لا طُلاب خلصت من لسانج ، ولا مُدرسات ..

_حجيت واني اتصنع المَسـكنة والطيبة
هااي شبيك صخر ، اصلا اني رب الهدوء
بس هن شادات وياي ..

_ ولج شنو شادات وياج ، اكو وحدة تكول لمدرستهة متعاركة وي رجلج وجاية ترزلين بينة ، لنفرض صـدك انت شلون تحجين هيج ؟

_ سُحـاب: شبيكك ، ترى هي لحت وياي ، هنوب لزمت  صديقتي ترزل بيهة خطية ضلت تبجي والله شنو ليش ما كاتبة التدريب ..

_ صخر : وااانت شعليييج بابا ، هي وطُلابهة انت شكوو ؟

_ يووو صخر ، والله انت ما توكف وي الحـق ، روح وافهم منهة ..

_ يلا روحي بدلي وتعالي ،

_ سُحـاب : توجهت للغرفة واني اهز كتف ، عبن اني فزت علي بالنقاش ..
لبست وطلعت لكيتة كاعد يم بتـول بسولف وياهة ، خوفج من هاي الگعدة ، حرام تكول مو ابن عمي واختي لا " ضرايري "..

_توجهنة للمدرسة ، راحت بتول للصف واني وصخر توجهنة للإدارة ننتظر ست الحسن  "فضلية "..
هاي شنو تحس امهة من سَمتهة فضيلة
المفروض يسموهة " ثگيلة "
لان توغف على الگلـب ..

دك الجرس جفلني من افكاري ، باوعت صخر منزل راسة بالجهاز هسة غير يشوف هاي النسوان الحلوة ، بلـگت تعجبة وحدة ..

ماكو ، خال راسة بهلمهجوم .. اول ما وصلت تتمخطر بالگعب مالتهة ، طولهة ١٩٠ وتلبس كعب ..

كال صخر :
السـلام عليكم ..

صدت وجهة ، من شافت صخر فردت الحلگ والابتسامة شگت الوجه ، اردفت وهي تنزك بصوتهة ..

_ اهلا ، وعليكُم السلام ..

_ طلبتي ولي امر الطالبـة سُحاب حارث
واني جدا اعتذر من عندج على الي بدر من سُحـاب ، طايشة شوي هي ، وعاطفية وي صديقاتهة ..

_ ثگيلة ( فضيلة ) : لااا استاذ ابدا ماكو داعي تعتذر ، المفروض هي تعتذر بـس عادي ..
المهم تفضل اشـرب شي ، خوما حضرتك تطلع هيج

_ لا مشكور ، عندي دوام ..
صد وجهة عـلي وهمس يم اذني

_ عندج مصرف مو ؟

_ ايي عندي ..
اباوع عليهة رفعت حواجبهة علية ، ياااا ضخونة هاي شمالهة ..

_صخر : يلا وايح اني ، بالج على روحج ..

سُحـاب..
ومن هُنا بلـشت ست ثگيلة ( فضيلة) تحاربني من كُل الجهات ، وتصرخ بوجهي من تتنرفز بس موش انـة الاسُكت الهة لا والحگ
انة هيـج طبعي عرمة ..

بيوم جنت كاعدة درس تاريخ وعندي شاغر
دخلت هي من البـاب ، دورت بعينهة
بس باوعت علية ، حركت حاجبهة واردفت

_ سُحـاب ، تعالي لغرفة ست هيام عندي حجي وياج

_ تمام جاية .. راحت واني امشي وراهة
بس دخلت كعدت على الكرسي واشرت بايدهة

_ كعدي هنا ..

_ اييي ست ، شردتي مني !!

_ سُحـاب ، عندي سؤال واذا هذا السؤال طلع برة هـاي الغرفة ، اعتبري روحج هاي السنة ساكنة الرحلة مالتج ..

_ اردفت بثقة واني اخلي ايدي تحت حنگي ؛ ايي بالله شنو سؤالج!!

_ صخر شنو يصير منج ، وليش هيج علاقتكم؟ قصدي شنو نوع العلاقة بينكُم !؟

_ سُحـاب :وهذا شي ما يخصج ، اعتقد ما مجبورة ارُد عليج !؟

_ رُدي سُحـاب ، وتادبي لا تحجين وياي هيج ..

_ سُحـاب :هففف ، ابن عمي ..

_ بس !؟

_ ايي بـس قابل شنو !!

_ هذا هو سُحـاب ، روحي ومثل ما وصيتج لان

_ بعدهة ما مكملة كلامهة ، كمت وعفتهة واردفت ،، حسبي الله ونعم الوكيل طلعت ورگعت البـاب وراي

اردفت هي بعصبية

.. ايا حيوانة ..

_ سُحـاب: والله لو ما مربيني جان عرفت شلون ارُد عليج
هاي شغلتهة مو خالية ، اخاف هاي د١عش لان شغل صخر بمُكان حسـاس
لا ، لازم اكول الـة حتى اذا يموت افرح وما احس بذنب

اول ما دخلت البيت ، اخذت التليفون وصعدت قفلت باب الغرفة علَي ..
طلعت رقمة واتصلت بـي ..

اول مرة رفضة ، رجعت اتصلت هم رفض
عفتة يمكن هو يخابر
والله واتصل ، رفعت الخط اجاني صوتة وهو يكول

_ هـاا ، باجي متصلة بية ، محتاجة شي ؟

_ احممم صخر هاي اني ، سُحـاب..
سكت ماكو صوت ، يااا شبي هذا شلت الجهاز مني ايدي حسبالي الخط فُصل ..

الووو صخر وينك يعمود
_ صخر : منو وياي !؟

_ يااا شبيك ،، موكتلك سُحـاب!!

_ عليج العباس ! يبـُا هلا احجي شنو مسوية من مُصيبة !؟

_ هاييي شبيكم وياي انتو ، يعني اني بس مشاكل ، ياهو الي احجي ويا يكلي هيج!

_ لا بوية ، مو هجّي بس انـة مستغرب لان بعمرج ما متصلة بية بدون سبب ..

_ ايي بصراحة عندي شغلتين الاولى مصبية على راسك والثانية طلب ، بـشنو حاب ابلشلك !؟

_ احجيي ولج ، عندي واجب ونزلت حسبالي بيكُم شي

_ باوع ، تتذكر ست ثكيلة مو !؟

_ ايي شبيهة !!

_ شسمة هي اليوم ، سألتني شنو نوع العلاقة بينج وبين صخر

_ ايي وانت شنو كان رَدج ؟

_ سُحـاب: كلت الهة ابن عمي ،،

_ وليش كلتي الهة هيج ، ليش ما كلتي زوجي
او على الاقل خطيبي او طالبني ، لازم تتشرفي بية ست سُحـاب..

_ هااايي شبيك صخر ، شلون اجذب يعني ،
بعدين منو كال اصلا اني موافقة على الزواج
لحد اليوم انتَ فارض علي هذا الزواج !!

_ صخر : سُحـاب ، ترى كاعد بنص الخطر على ساعة يَدخُل علينة داعش يفلش روسـنة ، روحي صايرة بخشمي ، عندج حجاية حلوة احجيهة ، ما عندج سدي حلگج لان كلامج مثل السـم ، وچاي تلوصين بالحجي
وهسة يلا روحي مني

_ سُحـاب: لا حباب اعتذر والله، ها هي مرة الثانية اكول الهة هيج ، بس هسة اجيت اكلك لان هي هددتني تبطلني من الدوام ، بس اني بالي يمك اخاف تسوي الك شي ، لان انت شغلك بمكان حساس /

_ اردف بحنية ،
صخر : تخافين عليَ سُحـاب!؟

_ هـاا ، مو بس عليك انتو مو في خدمة الشعب ، اني هم في خدمتهم اكيد وياك شباب حلوة ، حرامات تروح بيهة

_ حجة بعياط
سحُاااااب ، !!؟

_ يووو هاي شبيك ، غير انت من ضمنهم ! يعني ما معتبر روحك حلو !؟

_ بـٰٱعي سُحـاب ، سدي حلكج لان نغثيت

_ ها هي والله ، بقى الطلب احجي لو تدفرني منا !!

_ احجي اسمعج !؟

_ شسمة ، صخر اني تعبت من الروحة والجية للدوام اريد من عندك تسجلني بخط اني وبتـول لان حيدر ، يضرب بواري
لو يضل نايم ، لو يطلع للشغل وينسانة ..

_ صخر ، جؤؤ ( لا ) انسي وطلعي هاي الفكرة من راسج ، واني من ارجع احجي وي حيدر ،،

_ صخررر ، حباب لا تسوي هيج ، بخاطر باجي مروة والله تعبت من انتَ ماكو محد بحالنـة ،.

_ اانييي شلون وياج سُحـاب!؟

_ ديلا حباب ، الله عليك وانت اختار رجال جبير بالعُمر ..

_ ديلا روפــي هسة ارجع والله كريم ،،

_ بالك على نفسك ،.

_ چا خلي بالج على نفسج ، لان انت نفسي ..

Stoooooooop ✋

دوسي النجمة حُبببييييي 🥺🌟
شسمة تفاعلكُم صاير مو حلو ، بس لا مليتو وِلكُم!؟
باعو اذا مليتو يصير النشر مرتين بالأسبوع لان اني داتعب والله..

المهم احبكم ، شوفوني تفاعلكُم يبـُا اريد الكل يعلق على الفقرات حبايب ♥️🦋

رايكم بالبارت ..
وتوقعاتكم 💜