رواية مُقيد أجنحتي الفصل التاسع والعشرون 29 - بقلم 💗

البـارت الثلاثون √ بقلمـي
مـَريم علاء ""

•ماجـان للموعد فضل " حببتك من
الصدفة..//

-سحـُاب:- صفنت بوجهة واحسة من يحجي يخلي كلبي يرجف .. وبعد صفنة كال هو

- صخر:- سحابة يابة .. داخل اسبح، اريد دياتج الحلوة تحضر الي ملابسي اليوم ..

-صار ..
- چا احبج ""

- يوو صخر ' اصدقاء احنـة ..

- هاي هي .. مثل ما تحبين يا تعبي ''

- سحاب ;- طلعت چبـت ملابسة .. وخليتهم على الفراش .. ماكو دقايق وسمعت صوت قفل باب الحمام طك ..يعني طلع

واشوف واحد مصلخ، وبس التشيرت الي جان لابسة لافة على راسة، الله يُستر على الملابس الداخلية .. سوة المسافة الي بين الغرفة و الحمام خطوتين

دخل بسرعة ورگع الباب، وركض للصوبة يتراجف واسمع بس تطگ طگ سنونة

كال :- اشششششششهه، شهـل البـرد يامُحمد !؟

رديت عليه بصوت حـاد:- اذا انت من غير ملابس تفرفر .. الي يشوفك يكول طفولتك كلها بروسيا ..

ضحك بصـوت عالي .. وكركر من الضحك لدرجة بانـت سنونة، ولاول مرة اشوفة هيج يضحك ..ضربتلي صفنة بوجهة وهو يضحك

شكلة يخبل ..عيونة الي تطب لجوة من يضحك، خلت كلبي يتراجف وشعور حلو يغمرني،، لاول مرة اشوف كل حواسة تضحك

عيونة،، شفافة،، وگلبة
اييي اعرف الي يضحك، من الي يجامل

وهل مرة صخر ضحك.. يمكن يضحك يم
غيري هيج، بس كزكزت عليه خرب

انتبـه عليَّ شلون صافنـة عليه
بلـش يتحكم بضحكتة، وتغيرت ملامح
وجهة ..

سحبني عليه قوي قريب عالصوبـة
وكال وهو يتفحص ملامح وجهي

: هو تعالي، ليش هيج تباوعين
شنو ما عندج خوات ؟

رديت عليه واني ابعد جسمي عنة
: لا ما عندي بس وخر

كال وهو يشدد قبضته على خصري قوي
: دًفيني ..

- شلون يعنـي !؟
- شلون ما تحبين ..

- زين حلني منك، حتى اجيب الك ملابسك
تلبسهم وتدفى

تغيرت ملامح وجهة للانزعاج اردف
:- اني وين وانت وين

حليت روحي منة، وسحب بدلتة يلبس
بيهة، يلبس وعيونة عليه، والضحكة
تارسة وجهة

تقدمت اساعدة يلبس ساعتة
عيونة حاوطتني، ونظراتة ثولتني ثول

رفعت نفسي على اطراف اصابعي
حتى اوصل لخدة، سندت ايدي على صدرة
وطبعت بوسة على خدة

اتسعت عيونة مستغرب تصرفي
الي اني بذات نفسي، مستغربة شلون سويتها

ايديه حاوطت بطني بحنية، ورفعني
لصدرة اكثر .. غمضت عيوني بخوف وخجل
همس قريب من اذني بصوت دافي

:- عشگي انتِ، يا تعب سنيني وايامي
بنيتي الي كبرت كبال عيوني

تربات روحي انتِ ، كُلچ الي وبس مالتي
يا دِفو گليبـي ،، كلها بكوم وانت وحدج
مو بكوم لا، بنص هالگلب الاگشر
الي عاند كل هالكون، ورادج بس انتِ

هيبتي انتِ ..

- سحُـاب:- سارت بروحي رچفة، وذاك الشعور الحلو، حسيت كلبي طار ودكاتة تنسمع،، كلامة حلوو ويخوف

بي نوع من التملك حتى بالحجي الحلو
فتحت عيوني بخوف ممزوج بخجل من
حسيت على. انفاسة قريبة على وجهي

وايديه كلما هي تحاوطني اكثر
.. رديت غمضت عيوني

سمعت صوت تليفونة يدك
كبل هو كال بعصبية : خرب بليسك عثمااان
وظل يدردم لحد ما وصل للتليفون.

خربت ضحك بصوت ناصي
ردَّ عليه بعياط:- هااا زربـ*ن

- عثمان:- ليش طايح الحظ ؟
صخر: -اوقاتك الي تجي بيهن غير
تسوى كل ايامي الي گابلتك بيهن

- عثمان:- اني شمدريني شدتسوي !! هيج تبيع صاحبك، عشرة عمر
- صخر ;- ز*بـة على الصاحب .. انا الدنيا كلها هسة كبالي، وانتو كلكم خسارة

- ولفك اني يزب*لـة! ؟
صخر ;- صير خوش زلمة وفككك مني..
- وصخ،،

-سحـُاب:- سَد الخط بابتسامة
وِ تقدم باتجاهِيِّ بخطوات سريعة

سحبني لصدرة وكال بهيام وعيونة تنتقل
من شفافي لعيون وبالعكس

: يصير اروح للدوام بنص خد !؟

رديت بخجل ;- هــاا !!

- سويتي معروف كملي ..

رديت عليه واني ابعدة عني
; حلني صخر .. دوامك راح تتاخر عليه

- كال بصوت حـاد ; ما اطلع منا اذا. مو الخد الثـاني مطبوعة عليه شفافچ

رديت بجد: صدك تحجييي!!

- اي وعيونج

- صاير كلش انت؟

- جنت عاقل، انت تحارشتي ..

سحاب: مُصّر يعني !!

هز راسة بأي، وهو يكتف ايده لصدرة
تقدمت بخجل وادردم عليه بگلبي

هسة اني شچاني وسويت هيج
هيج احسنلج، يلا اكليها

رفعت نفسي لجهة خدة الثاني، بستة
وبعدت نفسي بسرعة ..

كال والابتسامة اعتلت وجهة
: اييييه هسة الواحد الة نفس يدوام
يلا يا تعبي، بالج على. نفسج
واذا محتاجة شي كليلي قبل ما اروح

- بس سلامتك ..

ابتسم وكال:- چـا سلامي وكل اماني يمج
ادعيلي ارد سالم .. يا سلامي

- بحفظ الماينام، يحرسك ويحميك
- يا ريت، كل سنيني الراحت وياج
يالله في امان الله،

سحاب: - اول ما طلع، ركضت للحمام اغسل وجهي، لان بديت احس النار صارت تطلع من ذاناتي، خرب يومك صخر على هالسالفة

هي مال حب بهـل الزلگ الي احنـة بي

مدري منين اجاني واهس انظف
ولا مو هذا التنظيف العادي، هذا الي نسوي
بس من نريد نشيل زوالي وبالعيد

لحد هسة اتذكر من امي تكلي
البنكة مال مطبخ الي كالت نظفيها

نعم عزيزي المشاهد، المراة العراقية
تجيها فترة تكلب البيت. ، وفترة انقلاب بالبيت

كنست ومسحت، مسحت الميز وكنتور حمورابي،، بديت من الـ10 لحد ما صارت الـ2
طلعت خيستهم .. المطبخ والمغاسل

هي الندارة تجي بين سنة وسنة
گلت خلي استغلها دامهة عندي اليوم

بس كملت لفيت راسي ونمت
كعدت كلت اسوي شي قبل ما يجي
بس شسوي، سوال حيل اكرهة

انفتحت باب الشارع .. دخل يقفل بقمصلتة
من شـدة البرد .. يمشي والهيبة الي بي
تنفرض على المقابل لا اراديا

جسمة، چتافة العريضة ، شورابـه
ونظراتة الحادة .. وكل شي بي يخليك
تحسب الف حساب حتى. تكلة

شتريد عشة .. خفت ينحرني
دخل للمطبخ من شافني، كال يتراجف
: يبـُا اشتاگيـت ..

- لحگت تشتاگ؟

- كل ثانية تمر بعمري مو يمج .. اكبر خسارة عندي. .. تعشيتي يبوي !؟

- هــاا، جيت اكلك بس خفت
- ليش الخوف !؟

- مو لان تعبان ..
صخر ;- حاجيني اگلتي! ؟
- لا غير انتظرك .. اشوف شنو تريد

-يبوي انة اكلت هناك،،

- تحجي صدك، واني ناطرتك؟
ابستم بمكر ورد كال:- عادي يبوي
سوي اكل وياج، وبعد من اكل برة اكلج قبل ما اطلع ..

- تمام هسة شنسوي اكل؟!
- صخر: شعندج بالثلاجة انتِ

- هو الي انت جبتهم .. تريد شي معين!

رفع عيونة لفوك وكال:- مشتهي خبيطة
اردفت باستغراب: هسة !!

-اي ..

- خوش اسويها الك ' وناكُل ..
- ديلا وياج اخلي .، قابل اخلي مريتي وحيدها

ابتسمت بوجهة وسبقتة للمطبخ
سوينة الاكلة الي جانت عبارة عـن "تمن وخبز ومرگة،، اخذت سراحية مي ورحت ورا

خلينة الصينية وگعدنا نسولف
: صخر احجيلي عنك اكثر!! ما اعرفك
هواي اني

رفع حاجبة بغـرور وابستم: افــاا،
بس هاي ماي عيوني الج

سند ضهرة على الحايط، وسحب باكيت الجگاير .. عيونة تركزت علية

- صخر:- واحد يحب وحدة ثولة ''

فتحت عيوني بصدمة .. ضحك هو
وكال:- صخر الي وياج هسة .. هذا صخر
الصدك صخر " يعني بس يمج اصير
شفاف مثل الچام ومو متقـصد، لا بس هي روحي الخلصانة يمج ترد ترفة ..

-زين الي تسوي، وهذا الحب، شلون وصلت الة يعني ' انت تفهمني مو!؟

ابستم ورٍَّد: فاهمج يتعبـي
باوعيني بوية، قبل ما شوفج ايامي
الوحيد الي جان مختلف بيها التاريخ
من طلعتي بطريقي، كل شي تغير، الدنيا
فجاة صارت حلوة

2003 /12/30 ليلة جمعة على سبت
جنت توني داخل المتوسطة، والشوراب
بدت تخط مثل سير النمل، بوجهي

شايل خشمي، وجهال المنطقة يخافون يجون من بابنة، جانوا يكتلون بحيـدر ويشردون
وهو الفاهي يفوت يبجي ويصيح
" كتلوني جهال المنطقة "

يجي يفازع بية، شلون انة اخو صخر وانكتل، واني الاغبر جنت اطاوعة،

وباخر يوم من سنة 2003 الگشرة على
الشعب العراقي .. بسبب القصف وطالبان

كاعد كبال باب البيت، والجگارة بحلگي
ادخن اتلفت اخاف يطلع ابوي

طلع الي يزاگط من يوم يومة ' حيدر '
كال: صخر، ولك صخر ..

سحبت الجگارة وخليتها ورة ظهري ورديت
بـنعم !!

حيدر: - مرت عمي جوة جتها الطلگة، امي تكول خل يجي ياخذنا لمستشفى قريب

-صخر ;- ليش هي حامل؟

-حيدر:- خاس عود انتو نفس البيت وما تعرف
-صخر:- ليش هو ابوك وعمك مخلينا نفهم
شي من ورة هالمشاكل..
هسة هي وين! ?
- جوة ناطريك تعال ..

اخـذتهم وانفش بريشي .. صرت جبير وبعد ما يطلعن اذا مو انة وياهن .. وناسي المرة وراي تصرخ من الوجع ..

والله شوي واسمع صوت طفل يبجي
.. حيل تشوقت اشوفـة، طلعت امي بأيدها
كمر صغير '' قطعة لحم بيضة وبيهة حَمّار
يخبل .. صفنت بوكتها

رجعت للبيت مدوده .. وتفكيري بهاي الطفلة
الي نورت حياتنة والبيت راح ترد بي الروح

اجت هالبت ونورت بيت الـ عۣۗہلي
ظلت المشاكل .. بس انة جنت اتهرب من واقعي من اكعد اناغي هالطفلة

كبرت اميرة الـ عہليہ ، وكل ما هي تزيد
حسن وجمال .. اتخبل من اشوف حيدر
لو غيري شايلهة، روحي تشوط
احسها تخصني هالطفلة

ايام قليلة ورجعت المشاكل ، وبيومها قرر عمي حارث الله يرحمة يطلع
لان ابوي الله يرحمة حيل ضغط عليه

قرر يروح، وياخذ روحي وياه..
كل ما افز الصبح، اشوف باجي تلم غراضكم

دخلت للغرفة من شفتهة راحت للمطبخ
اخذتها بين ايدي واشم بيها قوي

كبرت وراح تروح من يمي
بعد وين اروح اذا رحتي، بعد وي منو
احجي من اعوف جماعتي حتى اللعب وياج

يا بوية من راحت، تمنيت يبقى عمي
وتبقى المشاكل، بس المهم صوت ضحكتها
بالبيت من تناغي الهة باجيتي كريمة

صرت وحدي من بعدهـا ' او بالاحرى رديت لوحدي .. لان اني من يوم يومي وحيد
جانت الجهال تخاف مني لان جبير وعصبي

مرت سنين وهي ببالي
كبرت .. وتزوجت، وهي على بالي
من ايست قررت اعيش حياتي

اخذت زهراء .. ما سالت ولا دققت
حاولت احب . بس مگدرت ،، بحكم شغلي

حياتي عادية،، بزواجي جنت مرتاح
بس على. الرغم من كل خلاف بينة

هي جانت الي تخليني اهدأ
قبلت بيها " لان خوش بنوتة ''

انة موش مگـرن لجل احجي على وحدة، جانت بيوم من الايام عرضي.

بس طباعنة تختلف، انة دمي حامي
وسالفة الطفل طبعت ببالها

وبـعد ما أيسـت من حملها
كالت الي: صخر تزوج، اني ما مني جزّة

انة ما رديت وغلست بمزاجي ..
لحد ما يوم من الايام خابر عمي ايهب فرحان
ويضحك: بيت عمـك يردون يردون يمنا
امشينا نجيبهم ..

ما فرحت، جن نسيت انتِ وياهم
رحت يبوي، وشفت وحدة جنها گمرة
شعرها الاسود چنة سواد الليل طالع

وكل هذا اني اعرف انتِ نفسج سحابي
بنيتي .. بس خايف تطلع مو انت

مشت بينا السيارة، وذاك الشعور الحلو
نفس الي حسيتة، من چيتي للدنيا
وترستي ايامي الفارغـة ..

وياااا بوييي يا سحُـاب من دريت بسالفة
الكلب زوج خالـتج، ليلتها زين عيوني غفت
وثاني يوم نطيتة استحقاقة واستحقاق
ابو وعمامة ..

سحُـاب:- صدك صخر '' شسويت بي !؟

باوع علي ورفع تك حاجب وكال بانزعاج
: ما يخصج ..

صرت حتى البيت اخاف ادخلة
جانت النظرة حلال، وابن عمج تخطاهة
ودخل بالـ سابعة عشر

وصار الدوام بيتي الي يبعدني عنج
لان الغلط ركبني من ساسي الراسي

حست زهراء، وبدت تحاربج انت المكرودة
حجيت الهة، انة ناوي اتزوج

لاجل روحي تفور من اشوف كلها تحجي
وياج، وتكول حروف اسمج بشفاهةعادي

وانت الج مكانج، وان شاء ربي اعدل بينكم
ما ضاجت وكالت: براحتك

صعبت السالفة عليه من رفضتيني
لا خليت امام '' لا مرقد ما زرتة ونخيت امامـهُ ..

اني تالي عمري، اسمع اغاني واصفن
بلشت احب الشعر، انة ذاك الي ما عندة
وكت يحك. راسة كعد يضرب صفنات من وراج..

لكيت كل حرف يحجي الشاعر
يوصف معانيج ، صرت اني اناقض نفسي

وگعت وگعة، ترس على وجهي وحبيتج

- سحاب: - حرام اذا رفعت راسي
خدودي احس نار تطلع منهم

رمقني هو بنظرة، ضحك وفتح دزاعة
وكال:- تعالي، دفيني وادفيج

سحبني لصدرة وهمس
: هـاا، عرفتي ليش احبنج؟

هزيت راسي بخجل ..

...

زينب:- فاتحة هل ثلاجة الگشرة، اريد اقرر
شنو الغدة .. كل شي اكو

بس اني مالي حيل
واللع دحت بدون بتول وباجي

اخر شي قررت اسوي تبسي بيذنجان
توني اكشر .. دخل حيدر يضحك وفرحان

كال: زنوبة، امي وين؟

رديت باستغراب: ليش ..

- صخر اتصل عليه ' وثنينهم بخير

زينب بفرح:- الله عليك .. الف الحمد لله ربي
روح باجي بالغرفة كعادتهة ..

راح الهة وما اسمع بس الهلهولة مالتهة
طلعت من الغرفة تارسة الوجـه

صعدت بسرعة لهل مكرودة الي، عطلت
من راحت سحاب لليـوم

بتول، ولج بتيلة ..
كانت مددة. كامت مفزوعة

- بتول:- شبيـج!!

- زينب:- بشارة حلوة .. سحابة وصخيران
عكب باجر رادين

كامت على. حيلهة واجت لعندي
: الله عليج، يعني ما بيها شـي، عايشة مو

- اي وعيونج،

- الف الحمد لله ربي

زينب:- نزلنا واشوف باجي كاعدة وي حيدر
بعد فترة انقطاع، لان حابسة روحها والضحكة
شاگة الوجـه ; وتحجي ومنطلقة

مروة:- يوم الاحد اسوي برياني.. ودولمة
ونوصي كباب، واسوي دجاجة بالفرن
لان صخر يحبها ..

وانت يمة مشتهي شي. !?

رد حيدر بانزعاج: يمة السفرة ترستيها
لصخير .. وين تخلين اكلي! ؟

مروة باسف: يمة بس لا تغار من اخوك؟

حيدر: لا يمة عادي، الحياة حلوة
صار اسبوع كامل انت متحجين وياي
وعايفتني بدون اكل ' ومسوية حداد

واليوم ردت الروح بيج، ليش اغار

مروة بحدة:- ولك يمة انت كلكم نفس المعزة

حيدر:- سمعتهة، من جنة بالثالث ابتدائي
من تسوين 3 لفات لصخر والي لفة

يمة ليش ' جنت تقشمرين عليه
بحجة " اخوك جبير يحتاج اكثر "

- مروة: لا تحجي هيج يمة، اني عندي غير صخر وانت بالهدنيا؟

: ليش قدمتي على اسمي .. فهميني!

مروة: ولك شمالك

- اني اعرف ليش هيجي يصير وياي

مروة وهي تخلي ايدها تحت خدها
; ليش بالله

حيدر بحزن: لان اني الوسطاني
وهذا تسلسل دمرني ..

...

بتـول: واگفين اني وباجي وزنوبة
نحضر للغـدة، حيل مشتاقة لـسحابة

ندگت الباب دگـة خفيفة

مروة:- فوت يمة حاتم

- بتول:- دخل وعيونة تسلـطت عليه

كال:- شلونكم يابـة؟

ردت باجي وهي تغسل بالدجاج
: احنا بخير يمة، واذا تقصد على العالم
فهم بعز الخير

.. عيونة اجت بعيني كبل نزلت راسي

اردف هـوَ: شلونج بتول، شلون صرتي

رديت بخجل: الحمد لله زينة، احسن

:الحمد لله

فكت باچي حلگها باستغراب
كالت بحـزم: شهل سلام البارد
عبالك بعدكم بس ولد عم .. انتو مخطوبين يمة، تباوسوا، تحاظنـوا

شبيكم مثل الاخوان ..تقدمي يمة بتول
بوسي خطيبج، صار 3 ايام دوام

وانت حاتـم، شنو ما اشتاقيت لمريتك؟

حگ حاجبوا بدلال التوتـر، وابتسم مجاملة
دفعتني عليه بخفة، بس اني مايعة
كبل وكعت عليه، لزم ايدي بقوة

: على كيف باجي

- مروة: جا اذا تخاف عليها، خذها بين احضانك يا يمة

رفعت روحي بخجل وبست خدة
، مدري شنو الشـعور .. حلو ومـو حلو

ردت كالت باجي: اخذها وروحوا بالصالة
اعلمك اني يحظيي،

اخذ كف ايدي بين ايديه، ومشة بية للصالة
اول ما دخلنـا، سحبت ايدي منة

شتت نظراتة مني وكال
: شلون صارت ايدج !

- زينـة

: بيج شي! "

; لا، ،

: ليش هالبرود؟

بتول: حاتم لا تنسى احنة شنو
ولا تعلقني بيك .. وانت رايح اذا ممكن

حجيتها برجفة، لان تصرفاته تدل على. هذا الشي

اردف بعصبية: ليش شنهو الي بينة

- حبيبتك .. ووعدك الهة، لا تنسى
واتمنى تحجي وي الكل، حتى يبطلو يقربونة من بعض ..

رد وهو يعگد حواجبة: يعني انت رايدة هالشي

- رديت ببـرود: انتَ الردت،..
وخلينـا ننهي كل هذا ' لان محاجة بعد نواصل بي..

بلع ريگة بعصبية وكال:- عمج حد سنونة بعد
السالفة الاخيرة الي صارت، يعني ايسي
من هذا الشي

بتول: ايي لشوكت نظل هيج، انت تريد تشوف حياتك، عمرك شبقى بي؟

حاتم: احـد شكالج، احدد كالج
شوكت اجيت كلت الج اريد اتزوج، لان كبرت من وحدج حسبتي عمري وقررتي لازم، اتزوج

بتول بخوف:- اني هم اريد اشوف حياتي
ما مجبورين واحد يتحمل الثاني ..

فتح عيونة بغضب، تقدم يمي ولوى
ايدي ورة ضهري وصرخ بوجهي

- عندج شي ست بتول!!

- اوويي وخر ايدك ، داتأذيني اريد اشوف حياتي .. بعيد عنكم كلكم، مو شرط حب

نترت ايدي منة بعصبية، والدمعة صارت بطرف عيني،

شتـريد هسة انت ..

نـتر بعصبية بوجهي: ما اريد شي ، شوگعني بهل طيحان حظظ انييي؟

دفعني وطلع برة الصالة ينافخ
دخلت عليه زينب تسأل

: شبيكم يمعودة.. طلع الوجه ما يگصو السيف ، شجرالكُم 'بعدين شنو هالكلام هذا
ليش مـحد بينا يدري !

رديت بـقلق: يا كلام. !؟

زينب: كال يريد بهالشهر ، تسوون العرس
شكلة بعد ما يستحمل حتومـة ...

•يـَتبعُ ....

هذا البارت لخاطركم ، على الرغم من اللود الصاير وياي بالدراسة،

وعلى الرغم من ان الاحد عندي امتحان رياضيات والاغلب يعرف شنو معاناتي ويا
كتبت الكم،

مقصرة وياكم صح، بس انتو هم طُلاب مثلي

لهذا، اعذروني عن اي تقصير

النجمة لا تنسوها يمة

احبكم حيل 🥺😘☹️❤️