رواية ملحمة .. إرث سليمان الفصل التاسع 9 - بقلم Hend_AlBoor

قـبـل ان تحـاول اصـلاح الاخـريـن
اعـلـن الـحـرب عـلـى شـر نـفـسـك

يمامة : رجعت يم الجرباية ..

اسمع ..

القرين : ديتم استحضار جن ...

يمامة : احس رجلية متشيلني بعد .. كعدت ع الجرباية ..

شتسوي بيهم هلكد ليش هيج ..؟؟ ليش .. زين ليش داشووف شنوو الغاااية شنوو الرسااالة الدتوصلني

مشهد .. بغرفة السحر لام غدير المظلمة ..صنية كبيرة مملوء بصفحات المصحف المقدسة .. ممزقة و شموع مشتعلة تنبعث رائحة كريهة .. خليط من فضلات البشر و الحيوانات .. حذاء ممزق قديم ..

سجود الساحرة للشيطان و تمجيده و الكفر بالله و ذم انبياءه .. التعهد بفعل مطاليب الزنديق الموكل بارسال لها الجن كخادم ..

سجود الشياطين الاربعة لابليس .. خارج الغرفة واگف مارد حارس احمر البشرة مائلة للسواد ( زنجاري ) .. بجسم ضخم عاري الصدر و قرون براسه ذو وجه بشع مخيف ..

شايل بيده اليسرى صولجان ( اشبه بـ بوري اسود اللون راسه مدبب) يستخدم لحرق الجن العاصي ..

تظهر دائرة كـ بوابه غشائية بفضاء الغرفة امام سجود الساحرة و الشياطين .. بوسط الدائرة عرش عظيم مطرز بالالماس و الزمرد .. يجلس عليه هيكل عظمي ضخم جدا يصل حجمة لحجم بيت ..

ثم .. يقفز جن بوسط الغرفة .. تنغلق البوابة و تختفي الدائرة ..

ام غدير : رفعت راسي كانوا بشر واگف گبالي .. وگفت و انطيت الامر للاتباع يوگفون ..

استعدلوا حيلكم ..

بقيت اباوع عليه بحيرة ..

قرين ام غدير : مستغربة .. بسبب شكل صاحبنا ..

يوليس : مولاتي .. انه من الجن

ام غدير : استغربت لان ما يشبه اشكالكم

روش : احمم احمم .. ضوئي سيدتي اشكالهم مثل اشكال البشر ..

ام غدير : اياً كان شكله المهم تابع .. تابع مفيد

يوليس : ستكون احد اتباع السيده ايها العفريت ..

مليك : ( جن ضوئي .. عفريت .. مسلم .. هيئته كـ هيئة البشر وجها و جسدا .. طويل القامة ..متناسق الجسم .. بشرته بيضه تعكس وهج مثل الـ لمع.. ملتحي الوجه بشكل خفيف .. عيون سمائية صافية نادرة اللون .. يمتلك ملامح حاده .. شعر رأس اسود .. يلبس مثل ملابس العرب الجاهلية .. )

هبطت بمكان يختلف عن عالمنا .. كأنو داخل احد قلاع المملكة الجبلية العفنه ..

( بهمس وية نفسه ) عالم البشر المحرم ..

التفتت ع المارد .. من شفت الشياطين و ريحة المكان ادركت اني بوسط شر ..

لا انتظر امرا منك ايها المارد ..

يوليس : لولا وجود الساحرة .. جان هاي اول خطوة و اخر خطوة له بعالم البشر .. بس ضبطت اعصابي ..

هذا عالم يختلف .. هنا الجن يفقد اغلب قوته .. فـ اياك و العصيان

دنهش : هه ع اساس هم هناك مستخدمين قوتهم ..؟؟ السياده للنار هناك و هنا

روش : واگف مقابيل مراية مكسورة يعدل بكذلته .. تخربطت من السجود

احتاج كاوية شعر مثل الـ عند البشر .. الا استطيع استخدامها ..؟؟؟

الكل يباوع عليه باستغراب ..

روش : ماذا ..؟؟؟؟!!!

التفتت ع السيدة

ماظن الاهتمام بجمالي يعرقل اعمال سيدتي ..!

ام غدير : اشرت لـ يوليس بالكلام .. لانه مكلف بجمع معلومات اي شي احتاجه ..

يوليس : التابع الجديد .. مليك .. جن ضوئي .. كافر .. يؤمن بـ اله يظنون انه يوجد فوق السماوات .. يتبع اخر رجل قال انه نبي .. عفريت ابن سيد قومهم .. قوة الجن الضوئي تعادل قوة مية من الجن الناري .. لهذا هم اقوى الجان بس مسالمين لاسباب خاصه ..

دنهش : اعتقد راح يسبب مصاعب بسير الاعمال مولاتي .. و احنا مكتفين بحماقة روش

روش : ع گولة البشر .. مضغوط مني

ام غدير : هذا الـ جنت اني بحاجته ..

اباوع عليه و مبتسمه .. حسيت اختلافه الكامل عنهم .. وراه قوة عظيمة ..

يمامة : كمت افكر اترك البيت .. اريد ابتعد عن كولشي .. جسمي تعبان و عقلي منهار .. ماكو افكار منظمة .. بزياده التوابع .. اعتقد حالتي الخارقة بلا فايدة .. مجرد اذية لروحي .. غفيت ..

امشي بالشارع الناس تذبح بعضها .. ناس تاكل ناس .. كمت اركض و اعيط .. الدم و الاشلاء بكل مكان .. اركض و مادري وين متوجهه ..

لگيت نفسي بمكان بناياته عالية بس صخور .. كانها جبال منحوته .. و اعمده اسطوانية عالية كولش .. كمت امشي بين الاعمده دخلت بساحة صخرية

كرسي عظيم .. حجمه بحجم بيت .. يگعد عليه هيكل عضمي ضخم كولش .. كاعد كعده ملوك ساند ظهره ع الكرسي و ايأشر بايده .. راسه متجه للاسفل ..

باوعت جوا .. اطياف الناس الـ شفتهم قبل اشوي .. بنفس الوضعيه جواه يتذابحون و ناس تاكل احسام ناس .. الناس جواه بحجم النمل ..

انتبهت ع الدمار وية حركة ايده .. عبالك ديلحن و الناس تتراقص .. يلحن لخراب و قتل ..

من الخوف حسيت جسمي فارغ .. رجعت ليورا و كمت اركض و اركض .. مادري وين طبيت بمكان بيوت عادية قديمة ..

ماعرف اشلون لگيت نفسي بغرفه .. من شفته انهاريت بالبجي

شفت النبي ﷺ مريض و نايم ع ظهره .. من شفته انهاريت ردته يگوم و يشوف الناس كمت احجي و اني ابجي

رسوول الله .. اااالناااس .. ناااس دتذبح نااااس .. گوووم فدوووة گوووم احجي وياااهم ..

واگفه گباله ماشوف وجهه لان نايم .. نهض ديگعد .. صار وجهه كبالي ..

فزيت من النوم ..

لا اله الا الله ..

كعدت ع حيلي .. جسمي يرجف من منظر الهيكل و الناس و الدم ..

الحمدلله .. حلم .. فدواتك ربي .. نزلت من الفراش ..

القرين : كابوس ..؟

يمامة : ماعتقد .. لا مو كابوس .. الرسول ﷺ من يجي بالمنام هاي رؤية

طلعت رحت توضيت .. اباوع ايدي ترجف .. رجعت صليت الفجر و كعدت اقرا قرآن ..

نزلت اسوي ريوگ و الحلم يدور براسي ..

اكيد الهيكل يعبر عن الشر .. شنو الرسالة ؟؟؟ كل رؤية بيها رساله لصاحبها .. اعرف .. اعرف الناس كامت تاكل بعضها ..

القرين : ممكن مجرد وهواس و اضغاث .. ليش تشغلين بالج بي .. يجوز الشيطان ديوصلج هذا الشي هلكد متفكرين بي

يمامة : منام بي محمدﷺ .. مستحيل يكون اضغاث و وهواس .. معناها رؤية و لتناقشني بشي ميخصك

انتشروا الشياطين .. سكتت و اتحرك قريني من كدامي ..

روش : هذا الوجه الوحيد يصبرني ع العبودية تحت ايد هاي الساحرة ..

دنهش : توجهت ع قرينها

تحسب روحك من الجن .. لو اني قرينها اخليها تسلك درب الاب عزازيل بيوم ..

القرين : خلص روحك من العبودية بيوم و بعدها خطط لصاحبتي ..

اتجاهلته و رحت كعدت ع يسار يمامة

دنهش : فور دمي بقيت بمكاني اريد اهد المكان ع راسه ..

ميفرق شي عن هاي الكافرة .. انه عبدها

يوليس : اهدا .. تهورك هذا يسبب مصاعب

روش : معقولة متعرف شنو سبب منكدر ندخل غرفتها ..؟

القرين : علمي محدود بعلمها ..

روش : مممم احس بيك تكذب

القرين : تجاهلته ..

يمامة : بقيت راسي مدنگته ع الفون اگلب بشغلات بس ماشوفها .. اذني و عقلي و عيوني يمهم .. افقد شي من توازني بوجودهم .. فد يوم افقد و اتبالش وياهم ..

كمت اخذت كرسي و طلعت برا بالحديقه .. اختنگت .. بقيت كاعده جان
تطلع خالتي الله اعلم وين راحت ليا مجنة ..

حسبي الله ..

روش : شلون دتمشي مهمتك ..؟

هفاف : ع اتم حال .. طفل اعتقد يوم يومين و يموت ع ايدي ..

يوليس : اياك .. السيدة گالت تخويف فقط ..

دنهش : و اخيرا شرف المكان .. او بالاحرى صار ضيق الافق و يخنگ

يوليس : ابن سيد قوم الضوء .. اصحاب الصولجانات البيضاء .. العفريت المبجل .. ماذا ..؟ انا لا ارى صولجانك ..!!!

اتقربت منه وجه بوجه

هل اذلوك قومي و اخذوه منك .. اووه لمن قدمت نفسك قربان هذه المرة ..؟؟ ايها الخاااائن الكاااافر

مليك : يفكرون بقتال .. في عالم البشر ..؟؟؟!!!

( بصوت هادئ ) لا تفكر بذلك حتى .. فإن كنا تجاهلنا قتالكم في عالمنا .. فلا تتوقع مني قتالا هنا ..

روش : احنا معشر الجن لنا قدرة خارقه ع التكيف وية البيئة الـ نتواجد بيها .. يعني نحجي اي لغه باي مكان .. هذا المتعالي يستهزء ..

احجي بلهجتهم لو تحتاج تعليم ..؟

مليك : عفتهم .. انتقلت استكشف المكان ..

دنهش : اعتقد هنا نهايته ..!

واحد يباوع ع الخ ثلاثتنا و نضحك باستهزاء ..

حذيفة : مخليت خل و ملح مخليت سيد مرحتله .. مخليت امة الثقلين .. و النتيجة صفر .. ابوية بجهة و حسين بجهة .. حرت حيرة بس الله يعلم بيها ..

بتت بالامام الكاظم ع .. رحتله مخنوگ و الدنيا هاده حيلي .. رجعت للبيت الظهر .. اول مطبيت سمعت عياط حسين .. متوقعت ابد اطب و الكي البيت هادئ

ام حذيفة : هنااا اني هنااا عيوووني ماعوووفك

حسين : شتريدين منيييي وخررري .. ووووخري شتريددددين عوووفيني

ام حذيفة : رافع راسه يباوع بوجهي و يضرب بية .. وجهه ذبل من البجي و يعيط .. ماريد ابجي كدامه حتى لا ابين ضعيفه و خايفة لازم ابقى قوية ..

بس گلبي يتگطع عليه .. گلبي ديوجعني ع ابني .. ابني ديموت گبال عيني .. كمت اقرا ايات يهدا بس حيله ينهد .. و يهد حيلي وياه ..

حذيفة : ها يمة .. هدا

ام حذيفة : نومت حسين .. طب حذيفة جريته منوك ايده و اخذته للهول

وينك ..؟؟؟
وووينكم وين عايفني ..؟؟
ااااني ام ماتحمل كل هذااا زوجي و ابني .. حذيفةةةة سووووي شييي .. ووووين جنت ..؟

حذيفة : كعدت ع التخم .. راسي راح ينفجر .. خليت ايدي ع راسي ..

يمة جنت بالكاظم ع .. جنت ادور حلول .. شبيدي و مسويته اريد افتهم شسوي و كل هالكابوس ينتهي

ام حذيفة : حذيفة .. ابني ..
حسين كام يوصف الجن بالتفصيل .. اذا اني هالكبرني مداتحمل الوصف اشلون هو طفل و يشوف .. ابووووس ايدك سووي شي .. اخووك رااح يمووت

حذيفة : عفت امي و طفرت من مكاني .. نويت اطب اكتلها كتله عمرها متنساها ..

يمامة : نظفت الحديقة و كعدت ادور بالگوگل ع تفسير للمنام ..

مازن : هاا صباح الخير

يمامة : صباح النور .. كول مساء الخير

مازن : وين بعد مصاير الظهر من ايأذن تدللين

يمامة : اتريگت لو اسويلك

مازن : لا تسلمين اكلت اشوي ..

يمامة : ديجي مازن يكعد يمي .. و طب حذيفة ركض ع مازن ..

حذيفة : اول مفتحت الباب صار ابنها بوجهي .. ركضت عليه لزمته من ياخته سحبته حيل .. ضربته نام بالگاع ..

يمامة : كمت من مكاني ..

لييش تضربه ... شبييك ااانت ؟؟؟

اشو هذا هجم علية صياح .. اني اشوي و اشرد منه .. من الجن ماخفت هلگد

حذيفة : درت عليه .. فاقد اعصابي

اااااااانتي .. هاااااااا

يمامة : كدامي منظر .. حرب مو مثله .. شكد قوي .. يتصارع ويه قرينه بدون ميعلم .. قرينه بوسوس له باذيتي و هو رغم الاعصاب و الاذية فارض سيطرته ع قرينه ..

بقيت صافنه ع الـ داشوفه و هو يصيح علية .. الجن تسطروا واحد بصف الخ و السعاده مالية وجوههم .. يهتفون لقرين حذيفة و يشجعوه .. و يحرضون قرين مازن ع القتال ..

حذيفة : لزمت روحي بالحيل گبالها

ماكووو سحررر .. ماكووو
و الـ دنعيشه هذااا شنوو .. انتووو شتريدوووون ؟؟؟

روش : حرب بين البشر ..

دنهش : هههههه هيمنة الجن .. و عبالهم هم خلفاء الارض ..

يمامة : شاگوله لا جنت غلطانه .. الشي الـ جنت اظنه مجرد قصص و السحر ميصيب الا الضعيف .. كله ظن غلط ؟؟ شاگول و اني داشوفهم يصولون و يجولون باعمال الشر

(بهدوء) سحر .. يمكن شياطين .. بس يبقون خدم و تبقى انت وريث ع الارض ..

حذيفة : اني اصيح و هي صافنه بوجهي .. و اني من تعبي و اعصابي اخذ نفس سريع .. وجهه هدأ كلشي بية ..

شنو ...!!

يمامة : مديت ايدي لمازن .. سحبته من ايده و وگف .. مشيت من نص الشياطين .. خطفت من يم شخص حسيت بجسمي لسعة برد .. و ريحة مسك

دنهش : عبرت من وسطنا بعد هذا كلامها
لو جان اخر يوم هذا لازم اوصل لجسدها

منووو الخليفة ياااا فااااااجررررة ... كاااااافرة

روش : خليت ايدي ع وجهي

كالعادة .. دنهش الغبي

مليك : ع اصوات الجن انتقلت انتقاله من فوك لجوا بثانية .. البشر .. ريحة الطين الـ تفوح منهم تشرح صدري .. مثل ما وصفهم جدي .. كانهم مخلوقين من الجنة ذاتها ..

بقيت اراقب .. بكل حرف نطقته كانو وجهته لدنهش مباشر .. بالنسبة لجن شرس مثله جانت هاي اهانة ينحكم عليه بالموت .. دفعته للتهور و الهجوم ..

(بسخرية) احمق ..

دنهش : اتوجهت ع مليك ..

اظن انت تعرف .. اسباب الحجب عنا ؟؟

مليك : و لماذا تعتقد .. الستم ملمين بالعلم كما تدعون ؟؟!!!

دنهش : فقط لانك تتبع الدين الذي تتبعه هي ..؟

مليك : كل بشري محفوظ ليست هي فقط لكل منهم حوله جنود من الملائكة تحفظه .. هل اعتقدت ان يتركهم الله لكم فريسة سهله ..؟؟

يوليس : هه دعك من هذه الخرافات .. ربك و جنوده ..

مليك : اوصل الها لعد ..

يمامة : صعدت بغرفتي من القهر الـ شفته و الالم الـ داحس بي .. عرفت العالم مو بس النا .. احنا بداخل صراع .. كل هذا الشي يخنگني .. اني مالي طاقه بي ..

فدوواتك ربي مالي طاااقة بكل هذااا .. ماااكدر اتحمل شي فووگ حملي .. عيني .. عيني .. فدووة

غدير : كعدت متاخرة طلعت سمعت صوت يمامة تبجي .. طبيت ركض

يماامة .. شبيج عمري .. هااي شكوو .. شصاير خوما امي اذتج ..؟؟

يمامة : كعدت بالگاع انهاريت بالبجي .. اذا ماكو بشر احجيله لازم افضي همي بالبجي لان انفجر ..

محسيت ع غدير من طبت .. ملگيت الا نفسي بحضنها ..

غدير : عفتها تبجي بحضني لحد متهدا حتى افتهم منها .. سكنت ..

شصاير يمامتي ..؟؟

يمامة : بس تعبانه .. ردت ابجي و ارتاح

غدير : عادي تجيني هيج حالات هاي لان منطلع .. گلبي انتي ارتاحي اليوم اني اكمل الشغل .. ماشي

يمامة : هممم ..

احس روحي ذبلانه .. ما الي خلگ لاي شي .. اريد انعزل و العزلة صارت مستحيلة بوجود قريني ..

حذيفة : رجعت للبيت .. رحت لغرفتي و عقلي مو براسي .. راح يخبلوني .. و هاي منين طلعتلي .. وريث شنو ..؟ خدميش .. بيها شي؟؟ معقولة عمتي مشربتها شي ..!؟

ام غدير : رجعت للبيت الظهر لگيت غدير بالمطبخ ..

ها بعدكم ممتغدين ..؟؟

غدير : لا هسة اصب ..

ام غدير : اشو وحدج لعد يمامة وين ..؟

غدير : تعبانة اشوي مردت اضغط عليها

ام غدير : و اخوج ..؟

غدير : بغرفته اكيد ..!!

ام غدير : اي زين .. زين ..

رحت للغرفة ..

مليك ..

مليك : نعم ..

ام غدير : وگفت بحالة استغراب ..

متظهر الاجلال ..!!

مليك : اعرف البشر انواع من خلال الكتب .. بس انو اجي تابع عند اسوء نوع .. هذا الـ مجنت اتمناه و لا اطيقه !!!

جتفت ﭼـفوف ايدي ليكدام ..

عذرا سيدتي ..

ام غدير : اريد افك عمل ساحر ابيت .. داز زناديق و اتباعه .. هيمنتهم ع البيت كاملة بحيث البشر الـ بي يتنفسون مشاكل .. اعتقد تعرف المطلوب

مليك : القضاء عليهم ..

ام غدير : اكتفي بطردهم و ان جبتلي اسير فهذا عمل عظيم ..

مليك : المارد الـ يدخل بحرب وية عفريت ينتهي سيدتي ..!

ام غدير : انت تاخذ الاوامر و بس .. اذا اسرت واحد تجيبه ..

مليك : تمام .. الموعد ..؟

ام غدير : من يحين اگولك ..

مليك : مابيها اي صفة من صفات البشر .. حتى ريحتها الطينية منعدمه ..

يمامة : غفيت كعدت قريب المغرب صليت العصر و نزلت البيت فارغ .. بلله مازن و غدير اكيد بغرفهم .. خالتي مالها حس لا هي و لا الشياطين ؟؟؟

كعدت ع اخر درجة بية خمول و كئابة بحياتي محاسة بيها ..

القرين : راحت بشغل .. يرافقوهم الاتباع عدا الجن الموكل بعمل يبقى

يمامة : اتلفتت حولي ..

( بهمس ) اعتقد كلهم راحوا ..

القرين : ماعتقد لان لازم تترك حارس بالبيت ..

يمامة : بسلا روش .. اني ناقصة هم

ام حذيفة : سووووي شييي هلك ابني .. هللللك ..

حذيفة : اجتي حالة حسين سمعت عياطه نزلت ركض ..

ابوية وين ..؟؟

ام حذيفة : طاااالع .. و شيسوي ابوووك .. شيسوووي ماعنده غير الصياح و السب انووب يخبل الطفل بالزايد ..

اديان : اباوع ع حسين شلون لازم رجلين امي و يباوع ع زاوية الغرفة و يعيط .. كل جسمه يرجف .. احس گلبه خلص من البجي .. كمت اشوف الموت بعيونه .. كعدت ويا الحايط و ابجي

حذيفة : شسوووي يمةةة .. وديته زورته مفاااد .. وووين اووودي بعد ووين فهميييني

ام حذيفة : رووح عليها .. رووح ع عمتك ..

حذيفة : بصياح ..

تخبلتيييي يمةةةةةة .. مارووووح لووو تنطبق السماااااء ع الاااارض

ام حذيفة : شلت ابني اريد اروحلها انزل ع رجليها بس تترك ابني .. خلي تاخذ روحي و تعووفه

حذيفة : لزمتها ..

وووين .. متروحيلهااا ززززين .. يمةةةة

ام حذيفة : نزلت ع رجله ..

ابووووس رجلك يمةةة .. لخااااطري

حذيفة : كعدت راسا بالكاع ..

يمةةة لاااا .. اروح فدوووة لتراب التمشين عليه .. اني .. اااني اروحلهاا

القرين : اليوم شفتي الجن الجديد ...؟

يمامة : لا .. عساني لا اشوفه اني ناقصه

القرين : يتبع الدين الـ تتبعي ..

يمامة : مسلم ..

القرين : اي

يمامة : و شنو الفايده ..؟؟؟ مو كل مسلم مؤمن .. مادام حاي لاعمال شر حاله حال الشياطين ..

كمت داروح للمطبخ سمعت صوت حذيفة .. وكفت ارجع اصعد ..

حذيفة : رحت لبيتهم طبيت للمطبخ ماكو احد ..

ام مازن ...؟

طبيت للصالة داخل البيت .. شفت يمامة ..

اوووگفي ..

يمامة : عاط بية يبس دمي .. درت عليه .. وجهه احمر دم من الاعصاب

تفضل ..خالتي ماكو ؟؟؟

اجة طاير علية .. رجعت خطوة ليورا ..

حذيفة : رحت عليها بدون وعي جريتها من ايدها و اخذتها

يمامة : اااانت ووووين ماااخذني .. عووووف داااگووول عوووف

القرين : شصاير .. شنو اليفكر بي صاحبك ..؟

قرين حذيفة : يفكر تساعد اخو .. مدافتهم شي من عقله .. افكاره متخربطة .. حتى هو ميعرف ليش تحرك هالخطوة ..

يمامة : سكنت من سمعت قرينه .. و شفته طببني ابيتهم .. بس احس گلبي بحنجرتي ..

ام حذيفة : يماااامةة .. حسييين ديموووت يمةةةة .. ابوووس ايدج سوووي شي ..

يمامة : وجوههم الحزن و التعب هالكها .. و اني عبالي عندي هموم .. بين كلام امهم و صوتها الرايح .. حسيت ع ايده لازمه ايدي بقوة .. التفتت عليه .. و شلت ايدي ..

ما اشرد .. ممكن !!!

حذيفة : ماعرف ليش جبتها .. مادري شي بداخلي لو مالگيت حل غيرها .. نسيت نفسي .. هديت ايدها بسرعه ..

باوعت ع حسين ضعفان حيل .. عيونه مورمة ..

شبي .. ليش هيج هلكان؟؟

ام حذيفه : واكفه و حضنت حسين بين رجليه حتى ميسمع ..

(بهمس و نبرة حزن) مسكون .. يمامة ساعديني يمة .. انتي بنت معالج اي شي تعرفي سوي بابني

يمامة : باوعت عليه مداشوف بي اي جن .. صح اني بنت درويش بس ماعرف شي عن الدروشه و العلاج .. ممتمرسة ع اي شي .. عدا الرقية بالقران ماعرف اسوي شي

خالة ماعرف عدا الرقية بالقران .. ماعرف شي عن عمل ابوية

ام حذيفة : اني ارقي كل يوم يهدا و يرجع .. بس رقي يمة رقي بلكي ع ايدج يتعالج ..

يمامة : دنگت و سحبته من حضنها .. اباوع عليه عدا قرينه ماكو شي .. و قرينه صغير كولش ضعيف مابي اي اذية ..

حسين : ماااماااااا .. مااااااا .. مااااااا اجاااااااني .. يمووووتني مااامااا

يمامة : خليت ايدي ع راسه بعدني مبادية عاط .. ركض ع امه و ايأشر وراية .. وجهه ميتفسر من الخوف راسا التفتت ..

( بيني و بين نفسي ) هفاف ..!!!!!!

كنبصت ع رجلية .. دنگت راسي و سديت عيوني .. خالتي ..

حسبي الله ..

هفاف : رحت المغرب دورية ع الطفل شلت سجين بيها دم

( بصوت مخيف ) ههههاااا هههههاااي .. تعااال الي .. حسسيين .. تعااال هاهاهاها

ام حذيفة : ماكووو يمةةة .. ماكووو شيي ماكوو گليبي

حذيفة : كلتلج يمة ماكوو حل ..

ام حذيفه : وووين عممممتك ليييش مجبتهااااا ليييش عنااااد .. اخوووك يمووت كدام عينك و اااانت راااكب راااسك .. جيييب عمممتك

يمامة : اني و كاعده سحبت حسين علية

القرين :( بهمس) ديري بالج ..

يمامة : خالة اطلعوا ..

صار سكون بالغرفة .. بس صوت هفاف الجايف تارس المكان ..

حذيفة : رحت عليها داسحبه من ايدها جان تلزمني من ايدي .. منعتني ..

بس خليتي ايدج عاط .. ماعتقد تفرقين بشي عن خالتج .. شسويتن بينا ...؟؟

يمامة : بس رفعت راسي عليه ..حليت ايده

خالة اطلعوا ..

ام حذيفه : امشي يمةة .. يلا يلا ..

اادياان گوومي ..

حذيفة : طلعنا برا و سدت الباب ..

انتي تأمنين بيها و تسلميها حسين .. يمةة شبييج

ام حذيفة : متخاااف عليه اكثر منييي .. اخووك كام يبول ع روووحه .. اسلمه يمةة اسلمه و اسلم رووحي .. اعرف ابوها و امها

يمامة : باوع علية .. ماكو شي ..

حسين : اكووو .. اكووو .. اجااني .. ماااماا

يمامة : يشهك و يحجي لزمته من وجهه بيدي ..

شدتشوف ..؟

حسين : جني .. يخووف .. يضحك عليةة .. يريد يكتلني يكوول تعاال لو اجيك امووتك .. امك متخلصك مني ..

يمامة : يبجي جسمه كله يرجف ..

جذاب لو امك تلزمه تموته ..

هفاف : هاهاهاهاهاها متشوووفني اااامك ..

حسين : متشووفه .. هوو يكول ماخليها تشووفني

يمامة : بس اني داشوفه وياك ..

سكن جسمه و دموعه وكفن .. خشمه يخر .. صفن بوجهي بحالة استغراب

حسين : تشوفي مثلي

يمامة : همم .. و ما اخاف .. لان قوية .. انترليش تخاف ..

( بهمس و ملاطفه ) ميكدر يلزمك

هفاف : جذاااابة ههههه تجذذذب عليك .. لان طفل يقشمرووك .. متشووفني حذاابة ..

حسين : تقشمرررريني .. سمعججج و اجاااااني راااح يلزمنيييي

يمامة : من كلام هفاف .. حسين انهار بجي .. من اتقرب زايد لزمته بيميني .. كام يعيييط حسين و امه تدك بالباب

ام حذيفة : حسسسسييين .. يمةةةة هنااااا ااااني

حذيفة : شديصييييير .. عووووفي .. ااااافتحي البااااب

هفاف : عووفني .. اااخلي سبييلييي مووولاتي ..

يمامة : اشهد ان لا اله الا الله و ان محمد رسوول الله

هفاااف : اخلييينيييي موووولاتيييي .. راح يذبحوووني .. اخليني .. عوووفي ايدددي فدووووة

يمامة : مادري ليش انكسر گلبي عليه و هو راكع و يتوسل و يبجي ..

انطقهاا ..

داحجي وياها محسيت الا ع سهم من دخل بجسمه خلة كل جزء بجهه .. كطعه

انصدمت حسيت گلبي وگف .. فتحت ايدي ..

حسين : رااااح .. ااااختفى .. ماامااا .. اااااختفى الجني ااااختفى شررد من يمااامة

يمامة : بقيت بمكاني .. نزلت جن شكله مرعب .. دوى الخوف بداخلي يبس جسمي ..

ماختفى داشوفه مگطع گدامي و دمه بكل مكان .. معدتي من الخوف مدري من المشهد كامت تگلب

القرين : غبي شلون تظهر نفسك الها

قرين حسين : غلطة جن .. بس ريحتني هالغلطة .. اذاني اكثر من رهب صاحبي ..

الشيطان الحارس : لقد نال جزاء خطاءه .. الفشل في عملية تعني الموت ..

ام حذيفة : اول مفتح الباب حسين .. ضحكته ردت روحي .. احس الدم رجع بوجه ابني حضنته و ابوس بي

يمة شگ گلبي عياطك .. موتني الف موته روحي .. رووحي يمةة ..

اخذته مني اديان .. رحت ع يمامة

يمامة : وگفت و اني اباوع ع اشلاء هفاف .. اجتي امه علية .. تبوس بية و بيدي .. سحبت ايدي ع السريع

لا خاالة العفو

ام حذيفة : صار فترة مشفنا ضحكة حسين ..

يمةة .. عرررفت عررفت ايدج بيهااا بركةةة .. ما قنطت ابد من رحمة الله .. استجاب دعائي ربي

درت ع حذيفه ..

جدهااا الرسوول .. جدهااا يمةةة جدهااا

حذيفة : رجعت امي ع اديان و حسين يبوسن بي و هو يسولف اشلون لزمت الجن .. جانت كاعده جان توكف .. وجهه ميتفسر من الخوف ..

شصاار ..؟

يمامة : درت عليه .. خشونة صوت رجعت جزء من وعيي .. ارتبكت

مادري .. فجاءة ظهر نفسه و اختفى ..

حذيفة : شكيت بامرها اكثر .. وگفت گبالها و عگدت حواجبي

محد يشوف الجن بس السحرة ..

يمامة : اني من الشفته ماعدت احس بشي .. كولشي بي ذبل .. باوعت عليه

( بهدوء ) شتقصد ..؟

حذيفة : لزمتها من زندها حيل و جريتها علية ..

انتي دزيتي خددددمج عليييه .. ديكوول لزمته بيدهاا

يمامة : اريد اسحب ايدي ماكدر .. لازمها حيل ..

انت اكيد تخبلت .. و ليش داسوي سحر لناس ماعرفهم

حذيفة : متكدرين تقشمرين موالي .. لججج مخليت امام و مرقد سنة و شيعه ما زرته مخليت امة مرحتلها و مفاد .. منو ااانتي .. منوووو

يمامة : بنت الـ انت مواااليه .. جدددي .. تقتنع متقتنع يمك اربع حياطين ..

اريد احل ايدي منه .. فجاءة ظهر شخص گبالي بالباب .. يلبس عربي قديم .. رأساً سلب نظري و لفت انتباهي .. بلحظه شكيت كمت اشوف الملائكة .. بقى بمكانه يباوع علية .. سكنت بيد حذيفة و اني عيني ع الوراه ..

مليك : شفت الحارس طار من البيت المجاور .. انتقلت مباشرة ع صوت البشر .. صارت كبالي يمامة قريبة الساحرة .. اذا اني مداتخيل لاحظتها شافتني .. التفتت وراية ماكو شي ..!!

حذيفة : تحاول تسحب ايدها مني .. فجاءة سكنت و تباوع كدامها .. التفتت وراية ع الباب ماكو شي ..؟

يمامة : رجعت انتباهي لحذيفة ..

حلني ..

رخى ايده و سحبت روحي منه ..

اتوجهت للباب و شتت نظري .. حيلي يرجف من الواگف بالباب .. مستحيل يكون بشر .. بس احسه انسان .. جان لازم اكمل خطواتي ..

دار براسي ممكن شيطان .. ممكن جن .. ممكن روح ساكنه البيت .. و كل هذني كافيات يوگفن نبض گلبي .. و هو مثبت نظره علية ..

وصلت يمه وجه بوجه .. رفعت عيني عليه .. عيونه يضون مو عيون بشر

عبرت الباب .. عبرت من خلاله .. حسيت ابرودة بكل احشائي .. كأنو روحه لمست روحي ..

بهاي الثانية وگف نبضي ..

ــــــــــــــــــــــــــــ

اعـتـذر منـكم نيـازكـي البـارحـة مكـدرت اكتـب بـارت لـضـروف خـاصـة

دمجـت لكـم بـارتـيـن هنـا ..
تـقـبـلوا اعـتـذاري لـطـفـاً .. مـتـابـعـة راقـيـة ♡