تحميل رواية ملك وكتابة بقلم مريم سمير pdf

أنتي حرامية وامك حرامية وابوكي حرامي!!

_ انت اتجننت؟ انت بتكلم مين كده؟

ضحك ° يعني كل الفلوس الي معاكي دي من السرقة؟ وانا بقول بردو ازاي تبقي مديرة شركة في السن دا

ضربته بالقلم ، قام متعصب ف البودي جارد بتوعي مسكوه _ شايفة انك تروح علي رجليك احسن ؟

° خليهم يسبوني

_ صوتك الي كان عالي من دقيقه راح فين؟ لو شوفتك بالصدفة حتي صدقني هحاسبك علي كل كلمة قولتها ، سبوه

كنت دايما اسمع إن مينفعش نتعاقب علي حاجات معملنهاش! بس لحد امتي هفضل اتعاقب علي حاجة مليش ذنب فيها؟ محدش كان ليه ذنب في كل الي حصل، الحياة لحد أمتي هتفضل مش عادلة؟ هيفضل طيف الي حصل ملاحقني طول منا عايشة؟ بس انا بسبب كده معشتش! لا حبيت ولا اتجوزت ولا عرفت أخلي راجل واحد عاوز يبقي قربي ، كنت بقعد مع عرسان بعد إلحاح من عمي بس النتيجة واحدة ، والي بحس بيه واحد ، الظاهر اني مكتوب عليا افضل لوحدي ودا الأسلم ، كرهي للرجالة عمره ما قل ، كان بيزيد مع كل مرة وكل قعدة وكل موقف .

= اه يعني انت عاوزني اشتغل في شركتها ؟ الشركة الي كلها ستات ومش بتشغل رجالة اصلاً ؟

° مهو يبني كل لما تقدم علي وظيفة يا اما بيقولوا هنرد عليك يا اما بترفضك ، مريم عندها شركة كبيرة ممكن توافق تشغلك معاها لو قولتلها

= وممكن متوافقش ، أنا مش عاوز احطك في موقف وحش بسببي ، هدور علي شغل في مكان تاني

° يعني تبقي مهندس ومتخرج ب امتياز ومش لاقي شغل؟ ، أنا هكلمها ملكش دعوة انت

___

‘ مريم هانم ، فيه راجل عاوز حضرتك برا

_ راجل مين؟

‘ بيقول إن اسمه عصام السيد ومعرفة قديمة

_ عمو عصام ؟ أيوة أيوة دخليه بسرعة

° ازيك مريم ، عاملة ايه وحشاني اوي

_ ازيك يا عمو ، انت الي واحشني اوي اوي ، اخبار صحتك ايه ؟

° الحمد لله والله في نعمة ، كنت عاوز منك خدمة

_ خدمة؟ ، اكيد اتفضل

° فاكرة احمد ابني؟ ، الي سافر يكمل تعليمه برا

_ أيوة طبعاً فكراه ، ماله؟

° رجع حالياً هنا ودور كتير علي شغل بس مش لاقي خالص ، ف لو ينفع تشغليه معاكي هنا؟

_ هنا؟ ، حضرتك عارف إن مفيش اي راجل موجود هنا

° اه مفهوم ، معلش يبنتي لو عطلتك

_ استني يا عمو مقصدش والله ، دا انا اديك عنيا

° حبيبتي ربنا يخليكي

_ خليه يجي بكرة الساعة تسعة الصبح

° متحرمش منك ابدا ، جميلك دا..

_ جميلي؟ بس دا انت مربيني والباب كان قصاد الباب

° ربنا يرحمه ابوكي كان راجل مفيش زيه

_ يارب ، ربنا يديك الصحة ، اكيد هشوفك تاني لازم

° اكيد إن شاء الله ، هسيبك دلوقتي عشان معطلكيش

° بكرة من بدري تبقي عندها ، أنا عارفها مبتحبش التأخير نهائي

= هي وافقت؟

° وافقت ، وبعدين دا انتوا كنتوا قريبين اوي قبل ما تسافر

= أيوة بس كنا ، زمانها مش فكراني ، المهم أنها وافقت

° الحمد لله ، اتجدعن وشد حيلك

أخيرا؟ كنت يأست ألاقي شعل في البلد دي وكنت بفكر أسافر بس كنت برجع اقول هسيب ابويا وامي لمين ؟

° مريم هانم ، فيه راجل برا وبيقول أنه جاي بخصوص انترفيو!!!

_ دخليه

دخل وبصلي من فوق لتحت

= مريم !!! يخرب عقلك دا انتي اتغيرتي خالص

_ افندم ؟؟؟

= هو انتي مش فكراني؟ كنا مع بعض واحنا صغيرين لحد قبل ما اسافر و..

_ بعد اذن ذكريات الطفولة ، احنا في مكان شغل

=..

_ أنا مبحبش الكلام الكتير ، الكلام يبقي علي قد الشغل وبس ، وتيجي في مواعيدك أي تأخير مش هسمح بيه نهائي ، انت الراجل الوحيد هنا والكل عارف نظامي يعني لو فيه حاجة حصلت غلط هتبقي انت السبب فيها ، أنا بقالي أربع سنين بعمل اسم الشركة دي ياريت تبقي متعاون معايا ، أنا كسرت اهم قاعدة عشان باباك مستحيل ارفضله طلب ، اتفقنا ؟

= اه تمام اكيد

_ مكتبك رقم تسعة تحت ، هبعتلك شغل لازم تنجزه في اسرع وقت

هز راسه ومشي ، كنت سخيفة معاه ؟ علي الرغم أنه.. كان وحشني ، هو الوحيد الي مكنتش بخاف ألعب معاه ، كان طيب وبينقذني دايما من لوم بابا وماما ليا عن فشلي في الدراسة ، لحد ما قررت في يوم ابقي زيه ، شاطرة زيه ، ناضجة زيه ، يضرب بيا المثل زيه ، بس نسيت يبقي عندي قلب وكل الي حواليا يحبوني زيه .

° انت بتعمل ايه هنا؟

= الموظف الجديد

° نعم؟ مريم هانم وظفت راجل !!

= يعني ، تقريباً ، لسه متثبتش

° انك تدخل هنا وتقعد علي مكتب دي حاجة كانت مستحيل تحصل ، أنا ليلي

= احمد

° ودي منة ، نانسي ، داليا ، اسراء

= أهلاً بيكم ، إن شاء الله نعمل شغل كويس مع بعض

° أكيد ، نسيبك تخلص الي وراك ونقابلك في البريك ، في البريك بنكون في الكافيتريا

هز راسه وسط ما ما البنات بتهامسه قد ايه هو وسيم ، جنتل مان ، كلامه راقي ، أسلوبه حلو ، بدلته تجنن .

_ ايه اللمة دي؟

‘ مش قصدنا يا مريم يهانم ، بس دا وقت بريك و..

_ ومن أمتي كان فيه ضحك بالصوت العالي دا وقت البريك؟ ولا عشان جه راجل يبقي فيه تسيب؟

= نعم؟

_ استني انت ، كل واحدة فيكم علي مكتبها ، فوراً

كلهم في لمح البصر كانوا برا الكافيتريا ، بصيتله ف بص علي السقف = لاء دا انا لازم اروح أقابل مهندس الديكور الي عمل الشركة دي حالا

_ اشمعنا ؟

= لون السقف لو بصلي هيبقي احسن كتير

_ بصلي ؟ دا انت جاي تهزر بقي

= هو انتي مبتتضحكيش ؟ أبدا ؟

اتجاهلت سؤاله وبصيتله _ خلصت الشغل؟

= أيوة ، فيه تاني؟

_ انت خلصته كله؟

= تقدري تراجعيه لو عاوزه

_ هبعتلك شغل تاني محتاج يخلص

= يعني مش عارف من غيري الشركة دي هتمشي ازاي ، أنا شايل الشركة علي كتافي وساكت

_ انت لسه جاي من اربع ساعات!

= متدخلنيش في تفاصيل لو سمحتي

مشيت خطوتين ف وقف قدامي _ فيه ايه؟

= تاخدي سندوتشات جبنة ب خيار؟

_ نعم؟؟؟؟

طلع من شنطة الضهر بتاعته سندوتشات = لسه امي بتعملها واخدها معايا كل يوم الصبح ، كنتي بتحبيها اوي لما كنا في ثانوي

_ لاء شكراً ، أنا فطرت

مشيت من قدامي وانا مستغربة ، لسه فاكر التفصيلة دي ازاي بعد ما سافر ورجع! ولسه طنط بتنزله بيهم غصب عنه؟ ، ضحكت لما افتكرت ذكرياتنا ، كان آخر وقت حلو بالنسبالي ، قبل ما كل حاجة تنهار حواليا ، وابقي معروفة ب إن

ابويا وامي الله يرحمهم واخدين حق مش حقهم ، اتهموهم بالسرقة ، وحياتي؟ انتهت .

_ ميعاد الشغل خلص

= لسالي ملفين بس ، اتفضلي انتي وانا هخلصهم وأمشي

_ أنا حاسة اني تقلت عليك في الشغل النهارده

= لاء بلاش سوء الظن في نفسك بقي ، دا حيالله تلاتين ملف وأول يوم شغل ليا

_ طب سيبهم وكمل بكرة عشان تلاقي مواصلات

= أنا مستحيل اسيبك تمشي لوحدك في ساعة زي دي ، انتي هتروحي ازاي ؟

_ ب عربيتي

= طب بالسلامة انتي

ضحكت وبصتله ، وقف قدامي ف كشرت تاني

= اه ، طيب ، أنا همشي محتاجة حاجة ؟

مشيت ومردتش = الله يخليكي ، في رعاية الله

رجعت ضحكت تاني بصوت واطي ، كان بيضحك كل الي في العمارة ايام زمان ، كان الشاب الألذ في المنطقة ، لسه زي ما هو متغيرش ، رغم إن كل حاجة اتغيرت .

_ انت واقف مستني ايه؟

= عربيتي البورش بتتغسل وجاية

_ طب ودمك الخفيف دا هيتقل أمتي زهقتنا ؟

= مستني ميكروباص يمريم

_ طيب ، تعالي أوصلك

= لاء متتعبيش نفسك

_ ماشي

= ماشي ايه؟ طب اطلبي تاني ما اكيد مش اول ما تعزمي عليا هقوم جاري علي العربية

_ تعالي أوصلك

= لاء متتعبيش نفسك

_ طب بص ، أنا لو لمحتك جاي ورايا..

= لاء بصي انتي ، انتي محدش يعرف يهزر معاكي يعني؟

_ لاء

= تمام ، يلا بينا

_ انت بتعمل ايه؟

= هسوق

_ تسوق ايه؟

= العربية!!

_ انت عارف دي بكام وموديل ايه عشان اسيبك تسوقها؟، دا محدش بيقرب نحية فوانسها دي انت بتقول ايه؟

= خلصتي؟ ، هاتي المفاتيح معنديش ستات تسوق عربيات والرجالة جنبها ، أنا كلامي خلص ومش برجع في كلامي وانتي عارفة

_ اه ، حلو

= لاء بس سواقتك مش قد كده

بصيت عليه وهو جمبي ورابط الحزام وباصص من الشباك ، كملنا الطريق ، كان بتكلم بس مكنتش برد ف سكت ، يعني يجدعان اخش بيا في ترعة ب اسلوبي دا؟ لاء وارجع ازعل إن محدش بيطيقني !!

وصلنا ونزل = امي فوق وانتي وحشاها اوي ما تيجي

_ يعني جو قديم وبلدي

= مش فاهم ؟

_ اطلع بقي ألاقي مامتك عند خالتك وايه دا زمانها جاية وامسكي اشربي عصير المانجا دا وانت حاططلي فيه منوم

= ايه الي بتقوليه ، احنا معندناش مانجا

_ ياراجل! دا الي لفت نظرك في الي قولته ؟ وبعدين الوقت اتأخر

= دا زمانهم بيبدأوا اليوم منتي عرفاهم ، تعالي بس اتعشي معانا

_ اصرارك مريب!

= والمنوم غالي

ضحكت _ أحمد!!!!

= اركني بسرعة أنا جعان

دخلنا العمارة وخبط علي الباب، مامته فتحتلي واول ما شافتني حضنتني ، كان وحشني احساس الحضن ، من وقت ما ماما اتوفت ومحدش حضني من بعد العزا ، مامته كانت ست طيبة وانا بحبها جدا وكان زعلي من البعد اني مش هشوفها كل يوم .

كانت مجهزة غدا بكرة من بليل ف طبخته! ، محشي وبشاميل وحاجات بيتي من ايدها

_ مكنش ليه لزوم خالص يطنط والله

° الف هنا يحبيبتي ، كلي دا انتي خاسة خالص

_ اكل الاسبوع كله دا يحجة ولا ايه ؟

° ما تتربي بقي وتاكل وانت ساكت ، كلي يمريومة ليكي واحشة والله

_ تسلميلي يذوبة ، زهقت من أكل الدليفري والله

= زهقتي من الدليفري؟ فعلاً حياة صعبة ، ربنا يكتبها عليا

° احمد ، فيه جبنة وخيار جوا ، ادخل كل

= خلاص خلاص مش متكلم تاني دا انتي زعلك جاحد

فضلنا نهزر ونحكي عن حاجات زمان ، ذكرياتنا سوا وبلاوي كانت لسه فكراها

° ويومها ام ابراهيم الي طلعت شالته من تحت ايدي ابو ملحق الساقط

_ يحبيبتي كان ملحق دين!!

° طب ما دي الكارثة ، دا انا فضلت فترة ينادوني ام لهب

ضحكت ف بصلي = ايه يا كيميا؟

_ لاء بص ، أنا مبحبش الهزار

= بجد والله؟ طيب ، ماما متعملي ل مريم شاي ب اربع معالق سكر

_ بس انا مش بشربه أربع معالق!

= اه دي درجتك في العربي ، خلاص سكر برا

_ يا سكر!! ، طب بلاش افتح في القديم

= خلاص يمريم

_ ازي عزة دلوقتي؟

= معاها سامح وبسلمة ، خلاص يمريم

_ فاكر ابو عزة ؟ لاء وعاملي فيها خجول وبتخبط علي الباب وبتتكلم وانت باصص في الأرض

= خلاص يا مريم

_ عزة ممكن نخرج بعد المدرسة ؟ وعينك ما تشوف الا النور بعد ما رفعت وشك

= كدابة ، عيني مشافتش النور شهرين من الخبطة الي ابوها ضربهالي في عيني

كانت قعدته وحشاني ، كلامه ، لمعة عنيه ، لهفته وهو بيحكي عن حاجة وتنهديته قبل ما يقول مصيبة ، وقلشه الي اتقل من حجر رشيد .

_ اتبسطت اوي النهارده ، أنا متشكرة اوي يطنط مش عارفة اقولك ايه

= طنط !!! طب وأحمد الي صدره ولع عشان تطلعي اصلا ؟

_ تيجي بدري الشغل ، أنا مبحبش الهزار

= افندم؟ الشغل الي كمان تلت ساعات ؟ متهزريش يمريم أنا منمتش

_ أنا قولت الي عندي ، سلام

= مريم ، استني ، لازم اقولك حاجة

_ حاجة ايه؟

= ربنا ينتقم منك ، يلا بالسلامة

ضحكت ونزل وصلني لتحت ، دا تقريبا اجمل يوم عدي من يوم الحادثة ، مضحكتش من قلبي غير النهارده ، بسببه .

_ احنا هناااااااام

اتنفض من مكانه ف حاولت اداري ضحكتي

_ شكلك مش نايم ولا ايه يباشمهندس ؟

= دا علي اساس الي كانت معايا امبارح مين؟

_ احنا في الشغل

= انتي جاية العصر!!!

_ أنا المديرة!!!

= انتي.. ،ماشي اقتنعت تكسبي الصراحة

_ خلصت الشغل؟

= اه كله تمام

_ تمام ، لو فيه حاجة محتجاها هبعتلك

= مريم

_ نعم؟

= يعني مش هتخلصيني من سندوتشات الجبنة ب خيار؟ امي كترتهم عشانك ، هنضاعفهم ونديهم للي جمبنا ولا ايه؟

_ تاني؟ ، أنا فطرت ، واحنا هنا في الشغل

= طيب طيب ، هبقي اكلمك بعده ، الشخصية الي متتعاشرش الي ماسكة الشيفت دلوقتي

_ أحمد انت خدت عليا اوي!!!

= يعني الخيار ب فلوس حرام عشان متتاكلش ولا ايه مش فاهم؟

_ يادي النيلة!!!

طلعت مكتبي وبدأت اشوف الشغل المتراكم ، سمعت وقت البريك صوت بنت بتضحك ، يعني أنا جايبة الخليل كوميدي يشتغل معايا ولا ايه مش فاهمة؟

° يعني انت فاكر أنها عملت الشركة دي كلها ب الاجتهاد؟

= اه ، هي ما شاء الله شاطرة وطموحة و..

° حرامية

= نعم؟ ، مش فاهم ، يعني ايه؟

° زي ما سمعت ، انت متعرفش أن باباها ومامتها اتهموا ب أنهم خدوا من البنك قرض كبير جدا ومدفعوش وطلعوا نصابين واتحكم عليهم بالسجن بس ماتوا قبل تنفيذ الحكم

_ انتي بتقولي ايه؟ مستحيل دا يحصل ، أنا عارف مامتها وباباها كويس ، كانوا طيبين اوي

° مش انا بس الي بقول! كل الناس عارفة الي بقولهولك دا

____

اليوم خلص وركبت عربيتي ، لمحته واقف تاني ف سوقت نحيته _ مش لاقي مواصلات بردو؟

أتجنب يبصلي ورد وهو باصص النحية التانية

= هلاقي تاكس كده ولا كده جاي

دلوقتي

ضحكت _ طيب تعالي أوصلك ، ممكن أتنازل واخليك تسوق انت وامري لله

= لاء ملوش لزوم ، أنا هتصرف

كانت طريقته رسمية ف بصيتله ب استغراب ونزلت

_ هو فيه حاجة يا احمد ؟

= لاء مفيش ، كله تمام

_ مش باين! ، شكلك مضايق من حاجة ، فيه حد ضايقك من الي شغالين هنا؟

= لاء

_ ماشي ، أنا ماشية

= مريم هو..

رجعت وقفت قدامه _ فيه ايه؟ عاوز تقول ايه ؟

= انتي عملتي الشركة دي ازاي ؟

_ ازاي يعني ايه ؟

= يعني باباكي ومامتك اتوفوا بسبب ايه ؟

_ انتي عملتي الشركة دي ازاي؟

= ازاي يعني ايه؟

_ يعني باباكي ومامتك اتوفوا ازاي؟

سكتت وانا بصاله في عنيه _ هما.. زي ما اتقال عليهم؟

= انت الظاهر نسيت انت بتكلم مين ، أنا صاحبة المكان الي انت بتشتغل فيه ، انت مالك ب حياتي تسأل عنها ليه ؟

_ أنا مش قصدي أنا..

= أنا الظاهر كنت غلطانة لما اتساهلت في التعامل معاك ، كنت فكراك لسه زي زمان ، مكنتش غبي كده ، المفروض عارف بابا وماما كويس! انت كنت ابنهم!!

_ يا مريم افهميني أنا كنت بسأل عشان..

= ايه ؟ خايف المرتب الي هتاخده يبقي ب فلوس مسروقة؟ ، كل قرش في الشركة دي من فلوس ابويا الحلال وكبرتها ، اتطمن

سيبته وركبت العربية ومشيت ، مكنتش عيطت ب الزعل دا من ايام وفاتهم ، ليه كان فارقلي اشرحله؟ ليه كنت عاوزة اقعد قدامه اقوله لاء مش دي الحقيقة ، لازم تعرف كل حاجة ، مينفعش انت بالذات تفهم غلط! ليه فارقلي كل دا؟ وليه كلامه وجعني بالطريقة دي؟ كان المفروض خلاص اتعودت علي اي كلام يتقال في الموضوع دا ، ليه هو لما قاله حسيت أن اول مرة يتقالي؟

_ مريم

= خلصت الشغل؟

_ أيوة ، كنت عاوز..

= فيه ملفات بعتهالك ، عوزاها تخلص النهارده

_ أنا لازم اتكلم معاكي

= هو فيه كلام بينا؟ ، انت موظف هنا يعني الكلام بينا شغل وبس ، تخلص شغلك وانا اشرف عليك هي دي علاقتنا ، عاوز تتكلم في حاجة بخصوص الشغل تمام ، لو حاجة تانية ف اتفضل شوف شغلك

مشي ، كنا بنتعامل قليل اوي ، علي قد الشغل والميتينج والشغل المطلوب من كل حد فينا ، كان دايما بيحاول يتكلم معايا بس كنت بمنعه ، مش عاوزة الموضوع دا يتفتح تاني مش هعرف اتكلم في كل دا ، حسيت ب خنقة ف طلعت علي سطح الشركة بعد ما خلصت شغل

_ انتي ايه مطلعك هنا؟

= انت ايه الي طلعك؟

_ شوفتك وانتي طالعة

= وانت تطلع ورايا ليه ؟

_ مريم ، ممكن تهدي؟

= أنا مش عاوزة اشوفك ولا اتكلم معاك

_ بس انتي لازم تفهمي أنه سوء تفاهم ، أنا مش قصدي اجرحك

= وانت ملكش أي حق تدخل في حياتي بالشكل دا

_ احنا واحد!

= كنا ، لما كنا عيال

_ أنا مش عاوز اكون سبب في عياطك وزعلك

= كل الكلام الي اتقال عنهم كدب ، بابا كان اشرف راجل في الدنيا ، عمره ما قبل يدخل علينا قرش حرام ، عمره ما فكر ياخد حاجة مش من حقه لا هو ولا ماما ، اشتغلوا سوا وهما عاوزين بس يكبروا الشغل بالحلال ، بس لما الضربة تيجي من اقرب حد ليك؟ يمكن تموتك زي ما حصل معاه ، دراعه اليمين اكرم مراد والي عامله توكيل خد قرض بمبلغ كبير اوي ب اسم بابا ، كان بيتخلص من أي ورق يجي بخصوص القرض دا من البنك ، لحد ما فاتت المدة وبابا وماما اتقبض عليهم ، مكنش معاه المبلغ دا في اتحكم عليهم بالسجن ، خسروا كل حاجة ، حياتهم وبيتهم وبنتهم وصاحب عمره ، مستحملوش الظلم دا ، ماتوا! مقهورين وحقهم ضايع ومش عارفين يعملوا حاجة ، ماتوا وسمعتهم بقت كده من غير ما يعملوا أي حاجة ، ماتوا وسابوني لوحدي ، السبب في دا كله كان اكرم مش هما والله ما هما

كنت بعيط وصوت شهقاتي بتعلي _ اهدي عشان خاطري ، ربنا اكيد هيظهر الحق وكل حاجة هتتكشف

= انت كنت هتصدق زيهم

_ أنا لو كنت مصدق مكنتش جيت سألتك ، والله لما سمعت مصدقت ، أنا عارفهم ومتأكد أنهم ميعملوش كده ، أنا الي جيت سألت ومعرفتش اسأل سؤال صح ، أنا آسف يا مريم والله آسف

سيبته ونزلت ، روحت ويومها فضلت اعيط لحد ما نمت ، مروحتش بعدها الشركة وتابعت الشغل من اللاب توب ، صوت عالي جه من تحت ف نزلت بسرعة

_ انت بتعمل ايه هنا!!!

= يعني يجدعان هبقي حرامي ب ورد؟ ليه ؟ حرامي عاطفي ؟

° قفشناه بينط من سور الفيلا يهانم

_ سور !!!! انت طلعت علي السور ؟ ليه مفيش بوابة؟

° يا حرامي يا جاسوس يا هانم

= جاسوس؟ منك لله يا محمود ، هو الي قالي اعمل كده عشان اصالحك

_ محمود مين؟

= صاحبي ، مدير العلاقات العاطفية عندنا في الشلة

_ سبوه دا اخويا

= نعم؟ لاء امسكني تاني يحبيب اخوك دا حرامي اهون من الي قالته

ضحكت _ سبوه وروحوا شوفوا شغلكم

طلعوا برا ف رجعت بصيتله ف بص علي السقف _ ايه؟ عاوز تخلي السقف بصلي هنا كمان ؟

= بوظوا الخطة ، طب يجدعان والله ما اصول

_ ليه كنت ناوي علي ايه اكتر من كده ؟

= كنت هجيلك من البلكونة مأجر سلم ب دم قلبي

_ انت بتعمل كده ليه؟

= أنا بجد مش قصدي ازعلك ، واحنا صغيرين كنتي اغلي حاجة عندي ، مكنتش بحب ولد تاني يكون عاوز يلعب معاكي ، ولما كبرنا شوية مكنتش بحب لا عمو ولا طنط يزعقولك عشان تذاكري ، مكنتش بحب اشوفك زعلانة ل اي سبب ، مكنتش عاوز اكون في يوم سبب في زعلك ، حقك عليا والله ، ايه يرضيكي وانا أعمله؟

كنت بصاله وانا بدمع ، اول مرة حد يقولي كلام زي دا ، يمكن اول مرة احسه!

_ الورد يجنن

= يعني خلاص؟ سماح؟

_ ماشي مش زعلانة

= أخيراً ، لاء بس البودي جاردات الي معاكي دبابة ما شاء الله ، مرضتش اضرب حد فيهم عشان اكل عيشهم

_ يا راجل ؟

= عضلات القلب ملهاش تمارين يمريم

_ اه منا عارفة اكيد

= مضطر استأذن ورايا حاجة مهمة جدا لازم اعملها

_ حاجة ايه؟

= هعدم محمود العافية

من اليوم دا ونظرتي ليه اتغيرت ، رجعنا تاني اقرب اتنين لبعض ، بيته بقي بيتي التاني ، مامته وباباه رجعوا تاني في مقام مامتي وبابايا ، رجعت اضحك تاني ، احلم تاني ، انام من غير منومات تاني .

_ مين دا ؟

= دا عبدالله ابن رجل اعمال معروف جدا ، بجد مش مصدقة اني هعمل صفقة زي دي

_ مش ملاحظة إن عنيه متشالتش من عليكي من ساعة ما قعد؟

= طب وطي صوتك عشان الشغل بيبوظ! يلا عشان نبدأ ميتينج ، اه احمد صحيح بتعرف تصور؟

_ اه ، ليه؟

= عوزاك توثق الصفقة ب صورتين بس محدش ياخد باله

_ جبتي للشخص الصح ، أنا طول عمري نفسي اطلع فوتوغرافر اصلا

دخلنا الاجتماع وخلصنا = احمد ، خليك انت ، الباقي ينزل يكمل شغله

_ يعني ، ولما يتشك فينا؟ ، طب وليه مش مبينة طيب؟

= افندم؟؟؟ هو انت الي عملته من شوية دا

؟

_ لا بس ايه رأيك ؟

= هما دول الصورتين ؟ انت فتحتلي ألبوم! ، ومشغل الكشاف وانت بتصورهم ليه ؟ بتقلب نور؟ هو دا الي من غير ما حد ياخد باله؟

_ هو حد خد باله!!

= دا ناس متصلة بيا من الشركات التانية بيقولولي خفي إضاءة شوية ، بس ارجع واقولك أنا الي غلطانة ، علي مكتبك

_ بس دا مش اسلوب حوار يا مريم

= واحد ، اتنين ..

_ هو انا هفضل في الاستغماية دي كتير؟

= أحمد خف هزار واشتغل

_ أنا طالع عيني ومبنامش

= اه

_ أنا بكون طالع كل يوم الصبح مش عارف هرجع بيتنا ولا لاء

= يفدائي

_ أنا شايل الشركة وساكت ومفتحتش بوقي

= فيه بتاع خمسين ملف عاوزين يخلصوا ، يلا بقي يا بطل ورينا الهمة

_ لاء دا انا هوريكي استقالتي دي مبقتش عيشة ، أنا مش مخلص ملفات يا مريم

= هتخلصها يا احمد

_ علي جثتي يا مريم

..

= لسالك كام ملف؟

بصلي ب طرف عينه ف ضحكت _ خلاص كفاية عليك النهارده

= أنا مش عارف انتي بتعملي معايا كده ليا ، هو عشان أنا طيب؟ عشان مفيش راجل هنا غيري ؟ عشان عبقري ؟

_ خف دراما يا احمد تمثيلك يقرف

= طب أنا عازمك علي العشا

_ بجد ؟ فين ؟

= المكان الي يعجبك

_ القبض نزل بقي وصوتك علي

ضحك = بتكلم بجد اختاري اي مكان ناكل فيه سوا

روحنا مطعم وقعدنا ، مسك المنيو وبصلي

= مريم

كنت ببص علي المنيو ف رديت وانا لسه باصة فيه

_ نعم؟

= هو دا لحم خنزير؟

_ نعم ؟؟

= كل الاكل بالفرانكو أنا مش فاهم

بص علي الطربيزة الي جمبنا الي لسه نازلها الاكل

= وبعدين هما بينزلوا العينات هنا الاول عشان لو عجبهم الاكل ينزلوا بالطبق الكبير ولا ايه؟

_ لاء العينات دي هي الطبق اصلا

= نعم؟؟؟ ، طب قومي أنا غلطان اني بخليكي تقرري نروح فين

_ طب هنروح فين؟

= علي افخم وأحلي مطعم هتروحيه في حياتك ، يلا بينا

ساق ووقف ف بصتله _ مصمد!!! مصمد يا احمد ؟

= حبيب قلبي يا عبده ، ألحقني ب الكبدة والممبار بقي خلينا ناكل

قعدت قدامه وبصتلي = انتي نسيتي انك كنتي بتاكلي عشر سندوتشات كبدة ولا ايه؟

_ خلاص يا احمد

= ولا نسيتي الممبار الي كنتي بتفرجي علينا المحل عشان خلص؟ مبلاش تمثيل بقي

_ اطلبلنا حواوشي كمان

= أيوة كده دلعني

قعدنا ناكل ونتكلم عن كل الي فات ، يمكن رجوعه ليا خلاني ارجع اعيش تاني؟ ، لو مكنش موجود كان هيبقي شغلي كل حياتي ، مبضحكش حتي ، بتعامل ب حزم مع كل الي حواليا ، ماشية ب قواعد مستحيل اخالفها ، كسرت كل دا مع احمد ، كسرته وانا مبسوطة .

_ نعم؟؟؟ طلب ايه؟

= طلب أيدي ، فيه ايه؟

_ والله كنت حاسس ، قولتلك من اول يوم قولتيلي دا ابن رجل اعمال ، يعني ايه يعني

_ انت مضايق ليه؟

= أنا ؟ لاء طبعا

_ اخويا ، الله يباركلك

= قلبي يا اختي ربنا ينتقم منك

_ أحمد!!!

= أنا مش مرتاحله

_ بس شكله شاب كويس ف هرفض ليه؟

= ترفضي عشان.. ، ممكن يجيلك الأحسن ؟

_ بس عشان كده ؟

= وبعدين متقدملك ب الCV بتاعه!! ليه مقدم علي وظيفة؟

_ والله شاب كويس جدا بقولك

= يبقي تلاقيه مش شاطر في شغله

_ هو الي ماسك شغل باباه كله

= يبقي طايش مهو كتر الفلوس غلط

_ سمعته زي الجنيه الدهب

= يبقي تافه بقي ومعندوش طموح

_ بيسافر كل شوية برا عشان يطور من شغله

= طب وبيطير ولا ايه؟

ضحكت _ عندنا حفلة النهارده في الشركة

خبط علي المكتب = حفلة من انهي نوع؟

_ لاء هنمضي صفقة مهمة وفيه شركاء فيها من الخارج ف عاملين حفلة في الشركة هنا

نزل وهو لسه متعصب! ، كملنا شغل وبعدها روحت البيت طلعت كل الفساتين الي عندي ، فضلت اجرب فيهم كلهم لحد ما لقيت واحد مظبوط عليا جدا ، طالعة فيه مختلفة عن الي بطلع فيه كل يوم ب اللبس الفورمال بتاعي .

_ أنا تحت

= بجد؟ جيت ليه ؟

_ عشان أوصلك

= أنا نازلة حالا

قفلت الفون وبصيت علي المرايا للمرة الأخيرة وانا بضيف اخر اللمسات عليا ، نزلت ووقفت قدامه

= يلا؟

_ شكلك.. حلو اوي

= شكراً

_ ترضي بتوصيلة من واحد من عامة الشعب ؟

ضحكت = ممكن نتمشي أنا مش عاوزة اركب عربيات

_ اه اوي اوي ،اتفضلي

مشينا لحد ما وصلنا الشركة ، لما دخلت الانوار كلها اتسلطت عليا ، مديرة الشركة وصلت اهم واحدة في اليوم ، ابتسمت من تقديمهم ليا ومن الخطاب الي اتقال عني ، وقعنا الصفقة والحفلة بدأت ، يمكن كل البنات الشركة كانت عاوزة تتكلم معاه ، يقولوله قد ايه هو طالع البدلة الي لابسها لايقة عليه ، عبدالله جه وقف معايا ف بصيت علي احمد لقيته باصصلنا

° شكلك مختلف جدا عن كل المرات الي شوفتك فيها

= متشكرة اوي يا عبدالله بيه

° بيه؟ هو انتي لسه مفكرتيش في موضوعنا ؟

= لسه عاوزة شوية وقت

° خدي وقتك براحتك خالص

_ انا لازم امشي

بصيتله ب استغراب = ليه؟

_ امي تعبانة شوية ف لازم اروحلها

= استني انا جاية معاك ، بعد اذنك يا عبدالله ، اكيد المكان مكانك ومكان كل الموجودين

خرجنا برا _ انتي سيبتي معازيمك عشان تيجي معايا ؟

= اكيد مامتك اهم ب كتير

_ ربنا يسامحني بقي

= علي ايه؟

_ امي عندها برد مفيش حاجة

= نعم؟؟؟ امال قولت ليه لازم تمشي؟

_ عشان.. مش عاوزك تتجوزيه ، متتجوزهوش يا مريم

= ليه؟

_..

سبقته ب خطوتين = مش فاهمة تصرفاتك بجد ، سايبين حفلة مهمة جدا لمجرد انك مش حابب الشخص دا و..

_ أنا بحبك

وقفت فجأة جه وقف قدامي

= طب نروح ل مامتك ولا نرجع الحفلة ؟

_ نبطل استهبال ؟ ايه رأيك ؟

ضحكت = انت عاوز ايه يا احمد ؟

_ أنا بحبك ، وعاوز اتجوزك

= أنا عاوزة اروح

_ بجد والله ؟ طب يعني ايه بذمتك ؟

كنت متوترة ومش عارفة ارد ، مش عارفة اوصف احساسي أي ساعتها ، خايفة ولا متوترة ولا مبسوطة ولا عوزاه يأكدلي الي سمعته .

اتمشينا ، مكناش اتكلمنا طول الطريق ، وصلت وبصيتله

_ احمد ؟

= ها؟ انطقي بقي؟

_ بكرة فيه شغل عادي مش إجازة

= نعم؟

_ تصبح على خير

كتمت ضحكتي لما فتح بوقه وطلعت علي فوق ، منمتش يومها ، يمكن من كتر الفرحة؟ كنت عاوزة اقوله وانا كمان ، يمكن خوفي من الرجالة لسه موجود ، لكن كنت متأكدة أنه مختلف عنهم ، أنه اطيب واحسن راجل قابلته ، هقوله بكرة؟

روحت الشركة وانا ناوية ارد عليه ، نبقي سوا دايما ، ميبقاش فيه خوف بعد النهارده .

فضلت مستنياه لكن مجاش! ، الشفت الاول خلص وهو لسه مش موجود!

° مريم هانم

_ أيوة فيه حاجة ؟

° مكتب رقم تسعة فضي النهارده

_ نعم؟؟؟ دا مكتب أحمد ؟ فضي ليه ؟

° مش جاي

تاني

_ مش جاي تاني ليه؟

° اشتغل في شركة تانية

_ ايه التخريف دا؟ ، شركة ايه دي الي هيشتغل فيها؟

° شركة اكرم مراد

_ انتي بتقولي ايه !!!!!

_ ايه التخريف دا؟ شركة ايه دي الي اشتغل فيها؟

° شركة اكرم مراد

_ انتي بتقولي ايه؟

° مبعوت إيميل ب اسم الشركة الي هو شغال فيها حالياً

بصيت علي الايميل بسرعة ، اسم الشركة واللوجو واسم احمد رباعي! ،

خدت عربيتي بسرعة وروحت عندهم البيت ، لقيته ف خدت نفسي ، طلعنا البلكونة وبصيتله

_ مجتش النهارده ليه؟

=..

_ يعني تعبان مثلاً من كتر الشغل أو الضغط ؟ ممكن اديك إجازة زي ما تحب

= أنا مش جاي الشغل تاني يا مريم

_ ليه؟ ما اكيد الي شوفته دا مش حقيقي ، انت اكيد معملتش كده ، طب ليه؟ دا انا قولتلك كل حاجة! محدش كان يعرف السبب الحقيقي غيرك ، مكنش واثقة في راجل غيرك

=..

_ لاء رد عليا ، متسكتش ، قول أي حاجة ، انت معملتش كده صح؟ مشتغلتش في شركة الي كان سبب في موت امي وابويا!

= المصلحة أهم

_ انت موطي صوتك ليه؟ بص في عنيا وانت بتتكلم ، انت عملت كده؟

= أيوة ، عملت كده ، أنا عاوز أمن مستقبلي ، مديني مرتب مكنتش احلم بيه ومنصب عالي في الشركة مش مجرد موظف عندك

_ عمل كده عشان عرف انك عندي في الشركة ، اني شغلت راجل ف اكيد الراجل دا مهم عندي!

= وانا مليش دعوة بالخلافات الي بينكم

ضربته بالقلم _ انت أحقر انسان أنا شوفته في حياتي ، ياريتني ما عرفتك ، ياريتك ما رجعت تاني ، أنا عمري ما هسامحك ، انت حيوان مستحيل تكون بني ادم

من بعد اليوم دا تقريباً وكل حاجة اتغيرت ، بقيت واحدة معندهاش احساس ، كل الي يهمها الشغل وبس ، كنت بحاول اسحل دماغي في الشغل علي قد ما اقدر عشان مفتكرش الي حصل ، اتوجع تاني ، اعيط تاني ، واخد صدمة عمري فيه تاني .

رجعت للمنومات تاني عشان اقدر انام ، كنت فاكرة إني هحس اني عايشة وهو موجود ، كنت دايما خايفة اموت من غير ما احس اني عشت ، ازاي عرف يعمل معايا كده؟ ، ازاي هان عليه كل حاجة ؟ ، وازاي دا نفس الراجل الي حبيته ؟

° لازم نقبل دعوة الحفلة دي يهانم

_ أنا مش قادرة النهارده خالص

° بس دي حفلة مهمة وممكن نستفاد منها ب صفقات كتير

_ طيب طيب ، كلميهم في البيت خليهم يحضروا طقم فورمال عشان هخلص الشغل الي في ايدي واروح علي هناك

كانت حفلة كبيرة اوي ، معزوم فيها اهم رجال الأعمال ، مديري الشركات ، والشباب الشاطر جدا والي بيعمل فرق في الشغل ، الحفلة بدأت ومعاها بدأت المجاملات ، بعدت بعد ما زهقت من الابتسامة في وش كل حد فيهم ، وقفت اشرب لمون ، جه عبدالله وقف جمبي

° انتي كويسة ؟

_ حاسة اني مصدعة اوي

° شكلك مبتناميش يا مريم ، شكلك تعبان اوي

_ كان فيه شغل لازم يخلص ، بعد الحفلة هروح انام إن شاء الله

° تحبي اوصلك دلوقتي ؟

_ مينفعش امشي دلوقتي ، يعني ممكن كمان ساعة

° طب لو احتاجتي أي حاجة قوليلي

_ متشكرة يا عبدالله

منظم الحفلة مسك المايك وبدأ يعرف عن رجل اعمال صغير ظهر فجأة وأثبت نفسه في فترة صغيرة ، قال اسمه! احمد !! ، ظهر ساعتها ب بدلة فورمال براند ، ساعة ماركة وشكله المهندم ، قلبي بدأ يدق بسرعة ، مكنتش عاوزة اشوفه تاني! ، كنت فاكرة اني حتي لو شوفته صدفة مش هحس ب حاجة ، مش هحس ب وجع ولا افتكر كل الي حصل ، معرفتش أكره ودي اكتر حاجة بكرهها فيا ، بوهم نفسي إن اكيد اخر مرة دي كان شخص تاني ، مستحيل يبقي احمد حبيبي ، اطيب واحن راجل شوفته ، ازاي كل دا يطلع كدب!!!

قال كام كلمة وبعدها خلص ، الكل صقفله وظهر أكرم وهو بيقول أنه بقي دراعه اليمين في فترة صغيرة ، أنه جابله صفقات ب ملايين وأنه كان سبب في أن شغله يوسع في فترة قليلة ، كان مع كل كلمة بيقولها بحس اني في حلم ، حسيت ب ضيق في نفسي ، حاولت انظم التنفس بتاعي بس.. فجأة وقعت ، مدرتش ب نفسي الا وانا في المستشفى متركبلي محاليل ، بصيت علي السرير جمبي لقيته نايم ووشه ليا ، ضغطت علي الزرار الي جمبي ف الممرضة دخلت

° حمدالله علي السلامة ، إزاي متاكليش كل الفترة دي

_ هو ايه الي حصل؟

° جابك بالعربية بعد ما اغمي عليكي ، جوزك؟ ربنا يخليكم لبعض ، دا منامش غير من شوية

_ طيب ممكن تصحيه؟

صحيته ف قام مخضوض = ايه ماتت؟ لاااااااااا

أنا والممرضة بصيناله واحنا فاتحين بوقنا

° فاقت الحمد لله!

= اه ، تمام الحمد لله

° استأذن أنا

مشيت ف رجعت بصيتله _ انت ايه الي جابك هنا ؟

= مكنش ينفع اسيبك وانتي كده

_ وانت مالك بيا؟ يخصك في ايه يا.. احمد بيه؟

=..

_ جبتني في العربية الي جبتها ب فلوسه؟

= أنا..

_ انا مش عاوزة اشوفك تاني ولو حتي صدفة ، تنسي انك كنت تعرفني اصلا ، ممكن تمشي؟ ارجوك لو سمحت

____

° مريم

_ عمو عصام ؟ ، اتفضل أهلا وسهلا

° هو انتي متعرفيش احمد فين؟

_ فين ازاي ؟

° مرجعش البيت بقاله تلت ايام

_ يمكن بايت في الشغل؟

° لاء ، روحتله هناك ملوش اثر وصاحب الشغل قال ميعرفش مكانه فين ، تليفونه مغلق دا اول مرة يعملها

_ اكيد هيرجع إن شاء الله متقلقش ، تلاقيه مسافر أو حاجة

° طب لو كلمك أمانة عليكي تطمنيني

_ اه اكيد يعمو إن شاء الله

مشي وانا قلقانة ، عمره فعلا ما بات برا البيت ، يمكن سافر ومقالش ليهم ؟

_ لازم نتكلم حالا

= أيوة حضرتك مين؟

_ أنا محمود صاحب احمد

= اه ، هو عندك؟

_ لاء ، عند اكرم مراد ، محبوس

= نعم؟ محبوس ازاي!!!!!

_ احمد دخل الشركة ب مفاتيح عمل عليها نسخة بحكم أنه بقي قريب جدا من اكرم ، فتح الخزنة وشاف فيها الملفات الي تثبت برائة باباكي ومامتك الله يرحمهم ، صورهوملي وبعتهوملي وحطهم مكانهم ، كان بيكلمني علي التليفون وفجأة ظهر صوت رجالة وهجموا عليه والخط بعدها اتقفل

بدأت اخد نفسي بصعوبة = احمد عمل كده؟

_ مكنش قصده يعمل أي حاجة غير أنه يثبت براءة مامتك وباباكي والناس كلها تعرف انهم ناس بريئة وأنه هو المجرم الحقيقي مش هما

عيطت وقعدت علي الكرسي = لازم نخرجه من الي هو فيه! ، أنا..

نديت بصوت عالي = صقر ، جمع البودي جاردات كلهم وتعالي معايا وقولهم أن ورانا طلعة خليهم يعملوا حسابهم

روحنا عند الفيلا بتاعته الي كانت كلها واقف قدامها رجالة كتير

° قلبي يرجالة ،

الخطة كالآتي هتهجموا وانا هقعد هنا ادعيلكم بالثبات

_ نعم؟ انت مش داخل معانا ؟

° هو مش صاحبي اوي فاهمة

_ اه ، انت بقي محمود مدير العلاقات العاطفية في الشلة؟

° ايه دا هو حاكيلك عني؟

_ يعني ملكش في الاكشن من الاخر

° مستحملش اشوف دم قدامي

_ يحنين ، طب اسمع صلاة النبي حلو ؟

° عليه افضل الصلاه والسلام

_ انت لو منزلتش هرقع بالصوت اخليهم يجوا يعدموك العافية

° الفاتحة يرجالة؟

_ ربنا يتمملك علي خير ما احنا رايحين نخطب ، تصدق بالله؟ انت لايق عليك فعلا تبقي صاحب احمد؟ انزززززل

نزلنا والرجالة بدأت تتشابك مع بعض ، كنت بضرب معاهم ب حكم اني معايا حزام اسود في الكاراتيه

° اتنين ، تلاتة ، أيوة كده دلعني ، لاء الله ينور والله

_ انت واقف تعد الي بيقع!!!

° يارب النصر لينا والهزيمة للأخرين

جه واحد من واره ضربه ف وقع ف ضربته وبصيتله

° ادخلي انتي ، قولي ل احمد ان كان ليه صاحب وقف وقفة أسد

_ صباحك فل انت خدت خبطة رقدتك علي الأرض!

° كان نفسي اعمل حاجات كتير اوي قبل ما اموت ، كان نفسي..

_ محمود ، قوم يا محمود بدل ما اقسم بالله اكمل عليك قوم

دخلنا البدروم ولقناه مربوط = مريم!!!

جريت عليه _ انت كويس؟ عملوا فيك حاجة ؟

= انتي ايه الي جابك هنا ؟

° حبيب اخوك ايه الدنيا ، ربطوك ليه خير؟

= لاء مفيش يحبيبي دا حكم في الشايب ، انت لو مسكتش هقوملك ، هو الي قالك ؟

هزيت راسي ب اه وانا بفك الحبل = مكنتيش تيجي ، دا خطر عليكي

_ انت عملت كده عشاني؟ كان ممكن يأذيك

° هو متكرم دلوقتي يا مريم ولا ايه مش فاهم؟

_ انت بتتكلم ليه يا محمود ؟ ، انت كويس اهم حاجة؟

= أنا كويس ، انتي كويسة ؟

° يعني بعد اذن الحب ، يعني ناقص نجيب كامانجا ونديها معزوفة ، هو دا وقته؟

احمد قام ، فجأة أكرم دخل علينا ب مسدس

‘ علي فين؟ ، اكيد النهاية مش هتبقي كده ، الي هيتحرك من مكانه هضربه بالرصاص

كلنا وقفنا مكانا واحنا بنبص لبعض = مريم ملهاش دعوة خالص ب الي حصل ، طلعها من الحوار

‘ دا هي أساسه ، ايه خايف علي حبيبة القلب؟

= لو عملتلها حاجة هخليك تتمني الموت

‘ بس السلاح في ايدي أنا ، بلاش تهديدات فارغة ، نبدأ ب مين فيكم ؟ ، أنا بقول نبدأ بيكي اهو أريحك وتشوفي الي راحوا

وجه المسدس عليا ، طلقة طلعت منه بس احمد وقف قدامي بسرعة وخدها بدالي! صوتت وانا بترتجف ، نزلت علي الارض _ أحمد!!! احمد رد عليا

صوت البوليس ملي المكان ، كان محمود بلغهم واحنا في الطريق ، اتقبض عليه هو والي معاه وأحمد اتنقل علي المستشفى ، يمكن ممرش عليا اسبوع زي الاسبوع دا ، بين إنعاش ، أدوية ، نقل دم ، الامل كان ضعيف الطلقة جمب قلبه! ، كنت خلاص حفظت صوت الاجهزة الي هو محطوط عليها ، قاعدة معاه طول اليوم واخر كل يوم مبيصحاش ،

حرك صباعه ف بصيتله ، فتح عنيه وبصلي

= صوت عياطك قالقني كل يوم ، محدش عارف يقعد معاكي يعني؟

ضحكت وانا العياط مالي وشي _ احمد ؟ انت فوقت

بعدها كانت فترة نقاهة ، رجع تاني كويس ، الجرايد كلها ملهاش سيرة غير براءة بابا وماما من التهمة وإظهار الحقيقة الي السبب فيها بعد ربنا كان هو

_ أحمد

= قولي لأمي تعملي دكر بط عشان اتقوي بيه

° حبيبقلبي والله ما عاد في العشة وزة حتي ، انت كلت كله

= بقولك يماما واخد رصاصة يعني كل يوم فرخة

° منتا بقيت زي القرد اهو ، ما تقوم تشوف حالك دا انت واقف حالنا

= فعلاً امك جيشك الوحيد ، قلبي يست الكل

° اعملك شاي يمريم ؟

_ اه يطنط لو سمحتي

° حبيبتي عنيا

سبتنا ف رجعت بصيتله = انت كويس النهارده ؟

_ الواحد أمتي يرتاح في فرشته بقي

= هو دا مش بيتك ولا ايه ؟

_ لاء قصدي في بيت عش الزوجية

= امممم

_ يعني الواحد عاوز يستقر

= امممم

_ انتي عارفة إن الجواز نص الدين ، ولا انتي كنتي بتغيبي في حصص الدين؟

= بس انت الي كنت بملحق دين مش انا

_ متدخلنيش في تفاصيل دلوقتي بدل ما اقوم اكسر علينا الصالون

= اه

_ يعني بعد الرصاصة الي خدتها هتجرأ واطلب ايدك

= بتذلني يعني؟ لازم اوافق؟

_ أنتي المفروض توافقي علي اي حاجة والله اعوزها ، انتي مديونالي ب حياتك حرفياً

=..

_ ها؟ نخلي الشاي شربات؟

=..

_ لاء متهزريش انتي مبتحبنيش؟ لو مجبورة لاغيني؟ أنا اكيد عاوز رأيك

= منا مش موافقة!

_ حبيبتي يمريم ربنا يخليكي ليا ، حجة اسمع الزغروطة؟

واتخطبنا ، مكنتش اعرف السعادة الحقيقة غير معاه ، هي الست هتحتاج ايه غير راجل مستعد يفديها ب عمره؟ مستعد يعمل أي حاجة عشان بس متعيطيش .

° مريم بقولك معلش

_ يادي النيلة عليا ، انت عزمته؟ ، عاوز ايه يا محمود؟

° ام فستان زيتي دي ايه الدنيا

_ معاها يس ويارا

° طب ام بلوزة فحلوقي ؟

_ فحلوقي؟ ، لاء دي مخطوبة

° انتي كنتي عانس يعني واخر واحدة تتشبك في شلتها ولا ايه ؟

= ولما اقوم اقتلك يصاحبي خفة دمك هتفيدك ب ايه؟

° متباصي صحبتها يسطا ما احنا متفقين ، طب بقولك الي لابسة عباية سمرا ايه؟

_ دي الحجة جمالات!!!! هو أي حاجة وخلاص ؟

° بتكلم بجد والله ، الي لابسة نبيتي عيني منها بجد

_ دي ليلي ، شغالة معايا في الشركة

° الوضع الاجتماعي ؟

_ عزباء

° بتاخد كام في الشهر؟

_ أفندم ؟؟؟

وبحكم محمود وخبرته العاطفية ليلي أعجبت بيه ووافقت يجي يقابل باباه! يعني يتري عملت ذنوب ايه في حياتها عشان يحصل فيها كده بجد ؟

= اخلصي يمريم

_ مش عاوزة اقول هي عافية؟

= يبنتي كتب كتابنا بكرة وانا حاسس انك مغصوبة عليا

_ دا الاحساس نعمة

= يعني ايه؟ ألغي مع المأذون؟ ، كل شئ قسمة ونصيب

_ انت رايح فين؟

= مقدرش اتجوزك غصب عنك

_ أنا بحبك اوي والله

ملامح وشه اتغيرت ف أدركت أنه كان بيمثل!

_ والله ؟

= كنتي هتفضلي تقلانة لحد امتي مش فاهم؟

_ انت عارف اني واثقة فيك

= حبيبت قلبي والله ، مش هنعمل سقف بيتنا بصلي بردو؟

_ كلم المأذون ألغي معاه

تمت..