تحميل رواية مملكة السحر (نبوءة التنين) بقلم رباب حسين pdf

رواية مملكة السحر (نبوءة التنين) الجزء السابع 7 بقلم رباب حسين

مملكة السحر (نبوءة التنين)رواية مملكة السحر (نبوءة التنين) الحلقة السابعة

ليست كل الحروب تبدأ بسقوط السيوف فبعضها يبدأ بنظرة وبعضها بكلمة وبعضها بحقيقةٍ خرجت إلى النور بعد أن ظلت مدفونة تحت ركام السنوات.

الحقيقة لا تكشف أوراقها دفعةً واحدة بل يتمزق ستارها خيطًا بعد خيط حتى يجد الجميع أنفسهم في مواجهة حقيقة لم يكونوا مستعدين لها.

وحين يصبح المنبوذ هو الأمل الوحيد وتتحول اللعنة إلى مفتاح النجاة يدرك الجميع أن ما ظنوه نهاية لم يكن سوى بداية الطريق.

لكن أخطر ما في النبوءات أنها لا تمنح أصحابها القوة بلا ثمن ولا تفتح أبواب المجد إلا بعد أن تعبر بهم وادي الألم. فكل خطوة يخطوها المنتظر نحو مصيره تقترب معها الظلال أكثر وكأن الشر نفسه قد استيقظ ليمنع اكتمال ما كُتب منذ آلاف السنين.

وفي ذلك الكهف الذي جمع لأول مرة الملك بابنته والمنتظر بملكه والغريم بغريمه… كانت المشاعر تتصارع بصمت بينما كان القدر يبتسم؛ لأنه يعلم أن ما سيحدث بعد هذه اللحظة سيغير مصير المملكة بأكملها.

وحين ابتعدت أريانا عن أحضان والدها ووقع نظر فالين على نيراس الذي ينظر إلى كاسيان بقوة وحين انتبه إلى نظرة الملك انحنى أمامه على الفور وقال: مولاي الملك.

فالين: تعالى يا نيراس. عايز أعرف الكلام اللي بيقوله ميرفال ده حقيقي ولا لأ.

وقف نيراس وهو ينظر إلى أسفل باحترام وقال: للأسف يا مولاي أنا مش عارف الكلام صح ولا لأ. كل اللي أعرفه إني يوم ما وقفت قدام ميرفال وأنا طفل عنده ١٠ سنين إني لعنة وحلت على قومي. اترميت برا المملكة وأنا عارف إن ده لصالح البشر كلهم وأصبحت… منبوذ. لكن من وقت ما شفت الأميرة وحياتي كلها اتغيرت. وتحولت في يوم وليلة من منبوذ لمنتظر.

فالين: أنا كمان مش عارف ده حصل ازاي بس… محتاج أتأكد.

رفع نيراس نظره إليه وقال: تتأكد ازاي سموك؟

فالين: إنت تملك قوة النار زي ما ميرفال بيقول؛ وريني.

نظر نيراس إلى أريانا فقالت على الفور: لأ يا مولاي، نيراس ماينفعش يستخدم قوته دلوقتي.

عقد فالين حاجبيه وتحدث ميرفال قائلًا: ليه؟!

نظرت أريانا إلى نيراس وقالت: وريهم.

فتح نيراس ملابسه من أعلى عند الصدر. ففتحوا جميعهم أعينهم بدهشة؛ صدره محترق بالكامل. تقدم منه ميرفال ونظر إليه عن كثب ثم قال: واضح إن اللعنة اللي خرجت من ثورن ودخلت جواه خلت حالته أسوء.

أريانا: من وقتها وهو مش حاسس بقوة النار في جسمه ده غير إن حاول يستخدم قوته صدره ألمه جدًا. شوف حل يا ميرفال.

ميرفال: المشكلة إني مش عارف التعويذة اللي لعنته بالشكل ده وخلتني حتى مشفش قوته السحرية. وكمان ليه امتص لعنة أخوه!

فالين: وفين أخوه؟

تقدم منه ثورن وانحنى أمامه كما فعل نيراس وقال: أنا أخوه.

تقدم منه فالين ونظر بيده ليرى ختم اسم فالريك على يده. نظر له بتعجب وقال: أول طفل يتقدم قربان ويرجع تاني.

نيراس: أول طفل يتقدم قربان ويرفضه مورجاث. مولاي؛ أنا عايز أعرف مين السبب في اللي حصلي أنا وأخويا. وليه أنا وهو نترمي برا سور المملكة وسط الوحوش طول عمرنا؟

فالين: كل حاجة هتتعرف في وقتها.

أريانا: أنا عايزة تحقيق شامل عن الموضوع يا مولاي. لأن اللي عمل كده هو السبب برده إني أفقد نظري طول عمري.

فالين بتعجب: إيه علاقتك بالموضوع يا أميرة؟

أريانا: عشان نظري مارجعش غير لما شفته وقوته ماظهرتش غير لما شافني. ده معناه إني مصابة باللعنة دي أنا كمان.

ظهر الغضب على فالين ونظر بالفراغ. ما تقوله أريانا صحيح فتنهد وقال: كاسيان؛ عايز تحقيق مع كل اللي بيجيد السحر الأسود في المملكة.

كاسيان بصدمة: أنا يا مولاي هحقق معاهم؟

فالين: إيه مش هتعرف تحقق مع والدك؟

كاسيان: معالي الوزير أكيد بعيد عن الشبهات. لكن أنا شايف إنه أحق وأجدر واحد بالتحقيق معاهم. وأكيد هو اللي هيقدر يكشف نوع التعويذة اللي أصابتهم كلهم.

نيراس: بالعكس، مفيش حد فوق مستوى الشبهات.

نظروا إليه جميعًا بصدمة من حديثه فأردف: بعتذر أنا مش بتهم حد معين. لكن تعويذة قوية بالشكل ده وتصل لدرجة إن كبير السحرة مش عارف هي إيه استحالة تكون من حد قوته السحرية ضعيفة. بل بالعكس دي محتاجة حد قوي في السحر الأسود عشان كده مش شايف إن استبعاد أي حد في المملكة كبير في السن حاجة صح.

أريانا: بس إنت قلت برده إن ثورن راح قربان لمورجاث وهو اللي ماقبلش القربان وحوله لدب. يعني ممكن يكون هو اللي لعنه.

نيراس: بس مورجاث مش بيتقن السحر.

فالين: اللي بتقوله ده معناه إن فيه حد من السحرة متواطئ مع مورجاث.

نيراس: وسموك شايف إن فيه تفسير تاني؟!

كاسيان بحدة: إنت مين أصلًا عشان تتهم كبار السحر الأسود بالخيانة؟ إحنا لحد دلوقتي مشفناش دليل واحد إنك فعلًا المنتظر وشايفك مستغل الموضوع وبتتكلم بقوة وبتوزع اتهامات كمان.

نيراس: لأ هو أنا بتكلم بقوة من قبل ما أعرف إني المنتظر. وأظن لو ماكنتش بالقوة دي ماكنش زماني عايش لحد دلوقتي وسط الغابة اللي برا اللي إنتوا رمتوني فيها.

أريانا بحدة: نيراس! كفاية لو سمحت. أظن محدش في المملكة كلها كان عايز ينفيك برا لكن السحر ده هو السبب في اللي حصلك وأكيد جلالة الملك لو كان عارف إنك تملك قوة سحرية ماكنش رماك برا زي ما قلت. كل اللي حصل كان غصب عننا ومكيدة محكمة. وماتنساش إني معاك في اللعنة دي.

تنهد نيراس وقال: أنا كل اللي قولته واللي مبني على منطق إن كل الناس يتحقق معاهم وخاصة كبار السن لأن اللي حصل من أكتر من ٢٣ سنة وده بيستبعد أصلًا الشباب. بس السيد كاسيان واخد الموضوع بشكل شخصي.

فالين: أنا فهمت وجهة نظرك بس مش مسموح لحد يكلم كاسيان بالشكل ده ويتهم وزير السحر الأسود بالخيانة.

نيراس: كلهم تحت الاتهام بالنسبالي. أعذرني يا مولاي أنا اللي اتنفيت وسط الوحوش. كنت بنام من غير أكل وبحارب كل الظروف عشان أقف قدام سموك دلوقتي. وطالما مهمتي إني أحمي شعبنا يبقى لازم أثق في كل القيادات اللي موجودة. ولو حضراتكم واثقين في حد عشان تعرفوه؛ أنا معرفش حد ولا بثق في حد.

ميرفال: لازم تثق في عدالة الملك. لو فيه حد خان شعبنا هو اللي هيحاسبه وبنفسه.

نيراس: أكيد بثق في جلالة الملك. ومش ناسي لما كلهم كانوا بيطالبوا بنفي وهو الوحيد اللي كان بيبصلي بحزن عشان عارف إنه بيقدمني للموت.

فالين: كان قرار مش سهل ويمكن أكتر قرار هندم عليه. لكن دلوقتي سيب التحقيق معانا ماتقلقش. أهم حاجة إنت دلوقتي. لازم نعرف نبطل التعويذة دي وترجع تستخدم قوتك تاني.

ميرفال: أنا هخليه معايا هنا في التل لحد ما أقدر أعالج المشكلة اللي عنده.

فالين: مفيش مشكلة. بس خلي بالك منه.

ميرفال: محدش يجرأ يدخل التل بتاعي يا مولاي.

أومأ إليه فالين وقال: يلا يا أريانا نرجع المملكة.

أريانا: بعتذر يا مولاي. أنا هفضل هنا مع نيراس.

نظر لها فالين مندهشًا وتحدث كاسيان بحدة: ليه تفضلي معاه؟

نظرت إليه أريانا نظرة جانبية ولم تتحدث، فقال فالين: عايزة تفضلي برا السور يا أميرة؟!

أريانا: أنا هنا في أمان. لكن نيراس هو مستقبل المملكة ولازم أكون معاه. خاصة بعد ما قولت لسموك إن اللعنة علينا إحنا الاتنين.

كاسيان: ووقت ما ميرفال هيفك اللعنة هتزول من عندك. مش شايف أي داعي إنك تفضلي هنا معاه.

أريانا: وأنا مش هطمن غير لما يفضل المنتظر تحت عيني طول الوقت. ده مستقبل مملكتي ومش هضيعه عشان أي اعتبارات تانية.

كاد كاسيان أن يتحدث بغضب ولكن تحكم بأعصابه في اللحظة الأخيرة ثم قال: ممكن اتكلم مع سمو الأميرة لوحدنا شوية يا مولاي؟

فالين: طبعًا.

أشار كاسيان إلى خارج الكهف كي تذهب أمامه فنظرت أريانا إلى نيراس وأومأت إليه حتى ها. فأومأ إليها نيراس ولحق بها تحت نظرات كاسيان التي تطلق سهام غضب مشتعلة ثم لحق بهما. خرج ثورن يرى ما سيحدث فهو يعلم أن نيراس يكن لها إعجابًا شديدًا.

لاحظ فالين ما يحدث فاقترب منه ميرفال وقال: قولتلك يا مولاي. كاسيان مش هو الاختيار الأمثل لسمو الأميرة.

فالين: بس هو بيحبها بجد.

ميرفال: من طرف واحد للأسف.

تنهد فالين بقوة وللحظة فكر بأن ما يحدث مع نيراس وأريانا له مخزى أكبر وأسباب سوف تظهر إلى العلن قريبًا.

أما بالخارج فوقف كاسيان أمام أريانا يحجب عنها رؤيته حتى لا ترى نيراس ثم قال بحدة: مش شايفة إن اللي بيحصل ده المفروض مايحصلش.

أريانا: إنت اللي مش شايف نيراس ده مهم أد إيه سواء للمملكة أو ليا. أنا مش بشوف غير وهو جنبي.

كاسيان: يعني المفروض يفضل جنبك طول الوقت! طيب لو اتجوزنا هيعيش معانا ولا هينام وسطنا؟!

أريانا: لحد ما نفك اللعنة نيراس هيفضل جنبي. لو دي الطريقة الوحيدة اللي هشوف بيها مش هتردد أبدًا.

كاسيان: إنتي معجبة بيه؟

أريانا: أميرة مملكة السحر والملكة القادم للشعب ماتعرفش معنى الخيانة. لو أعجبت بحد تاني واتأكدت من ده عمري ما هكمل معاك.

كاسيان: عشان عمرك ما حبتيني.

أريانا: وأنا عمري ما قولتلك إني بحبك.

كاسيان: بس إنتي ليا ومحدش هيقدر ياخدك مني.

أريانا: لحد دلوقتي لأ. لكن زي ما قلت لو أعجبت بحد تاني أنا اللي مش هكمل معاك.

نظر إليها كاسيان بحزن ثم قال: طيب… أنا مش همشي. هفضل معاكي.

أريانا: ده معناه إنك مش واثق فيا وده شيء مش هسمح بيه بس هعدي التجاوز ده عشان عارفة إنك بتغير عليا. لكن وجودك هنا مالوش أي داعي ده غير إنك مكلف بتحقيق مهم. ماتنساش إن لو عرفنا مين اللي عمل السحر ده هنقدر نعرف الطريقة اللي نبطله بيها. يعني إنت كده بتساعدنا أكتر وده دورك في خدمة شعبنا.

تنهد بضيق. يعلم أنها تعامله كأميرة للبلاد وهي تملك شخصية قيادية قوية. ولكن كل ما كان يرجوه أن يرى نظرة حب في عينيها. كتلك التي ترتسم داخل عيون نيراس كلما رآها. أما الآن فارتسمت نظرة أخرى… غيرة. لاحظ ثورن نظراته وأنفاسه المتلاحقة التي كادت تحرق ما حوله فقال: إهدى يا نيراس. هو خطيبها وإنت مالكش حق تغير عليها.

نيراس: بس هي مش بتحبه.

ثورن: طيب إهدى عشان العصبية بتأذيك.

نيراس: قولها تبعد عنه. مش قادر اتحكم في نفسي.

لاحظ ثورن علامات الألم على وجهه فذهب نحوهما على الفور وقال: مولاتي. تسمحي بكلمة ضروري.

تنهدت بضيق من حديث كاسيان معها. فهو يحتد بالكلام ويتحدث معها بغضب وهي لا ترى سببًا لهذا. فهي تبحث عن علاجها وعن طريقة لإنقاذ شعبها ويتهمها بالخيانة.

وقفت مع ثورن بعيدًا عن كاسيان الذي رمق نيراس بنظرات الضيق. ثم قال ثورن: لو سمحتي بلاش تقفي مع كاسيان قدام نيراس دلوقتي. هو متضايق وده بيأذيه.

نظرت أريانا نحوه فوجدته ينظر إليها بحزن فقالت: هو متضايق ليه؟

ثورن: أظن السؤال ده إجابته عنده. لكن أنا مهمتي حمايته.

لاحظت أريانا خروج الملك من التل فقالت: هما خلاص هيمشوا.

اقترب الملك منهم وقال: أنا لازم أرجع المملكة وأوقف الحرب. وعايز اطمن الملكة عليكي. هي هتفرح جدًا إنك رجعتي تشوفي تاني وكله بفضل نيراس.

زفر كاسيان بضيق ثم قال فالين: يلا يا كاسيان نرجع القصر.

كاسيان: تحت أمرك.

ذهبا معًا وهو يرمق أريانا بحزن. “هذه بداية النهاية.” هذا ما تردد داخل عقله. ثم لحق بالملك وغادرا.

وفي تلك الأثناء كان هناك من لبى طلب الحضور عند مورجاث ووقف عند بابه ينتظر الأذن بالدخول. وحين دخل تقدم منه مورجاث بغضب وقال: كل ده عشان تيجي يا زادور؟!

زادور: المملكة كلها كانت في حالة تأهب من ساعة ما الأميرة اتخطفت وكمان إعلان الحرب. إوعى تكون اتجننت وخطفتها فعلًا.

مورجاث: اتفاقنا كان واضح. إنت طلبت أخوفها عشان أمنعها من زيارة ميرفال عشان ماتخرجش برا السور وتقابل المنبوذ. وأنا نفذت ده لكن فجأة ظهر المنبوذ قدام الوحوش وحاربهم بالنار.

فتح زادور عينيه بصدمة وقال: لأ! دي مصيبة. كده كل حاجة هتتكشف. والناس هتعرف إن النبوءة اتحققت والمنبوذ هيبقى المختار.

مورجاث بغضب: أمال أنا بقالي يومين بطلبك ليه؟! شوف حل. لازم نخلص عليه قبل ما قوته تكتمل.

زادور: قوته مش هتكتمل بسهولة. بس هو كده هيبقى تحت حماية الملك ده لو عرف الحقيقة. وطالما الأميرة عرفت يبقى هو هيعرف. أنا هخلص منه بس لازم أخطط للموضوع الأول.

مورجاث: لو فشلت أنا هدخل جوا المملكة وأقتله بنفسي حتى لو بعدها حارب البشر كلهم. أنا قادر أموتهم زي ما موت كل البشر العاديين.

زادور: بلاش تهور. خلينا نفكر ونوصل لحل سوا.

لم يكن مورجاث ليهدأ وهو يشعر بأن نهايته قد اقتربت. فظهور النبوءة معناه بداية الحرب الأخيرة.

أما رايث فعاد إلى منزله سعيدًا لأول مرة حين رأى نظرات التقدير التي تحيط به من كل من حوله وخاصة الملك بعد أن كان يرى الخوف والاشمئزاز يرتسم داخل عيون كل من يراه. والآن قد نال التقدير الذي لطالما حلم به وهذا بفضل مجهوده الذي بذله منذ أن بلغ العاشر من عمره. وتأكد بأن بالاجتهاد والأخلاص سوف ينال ما يريد.

وحين رأه فالريك ورأى تلك الابتسامة الواسعة على فمه قال: واضح إنك فرحان يا رايث.

رايث: لأول مرة يا بابا أحس إن ليا قيمة والناس بتحترمني وتقدرني. حتى السيد كاسيان قالي إنه معتمد عليا في الحرب. عندي إحساس إننا هنفوز في الحرب دي.

فالريك: طالما إنت موجود في الجيش أنا مطمن. أنا واثق في قدرتك على التحكم في الماية وعارف إنك أقوى مني.

فيسرا: هيكسبوا ويرجعلي بالسلامة. أنا واثقة من ده. مش هخسره هو كمان.

ربت فالريك على كتفه وقال: لأ… هيرجعلنا منتصر.

ابتسم رايث وهو يرى نظرات الثقة داخل عين والده. وهذا ما جعله يشعر بالفخر أكثر.

أما بذلك التل؛ فبدأ ميرفال يبحث عن طريقة ليبطل هذه اللعنة. ونيراس يجلس بالخارج يتأمل الطبيعة من حوله وقلبه يشتعل بالغيرة.

اقتربت منه أريانا وجلست بجواره وقالت: متضايق ليه بقى وطلبت مني أبعد عن كاسيان؟!

نظر نيراس إلى عينيها مطولًا ثم قال بتعجب: أنا عارف إنك حاسة باللي أنا حاسس بيه بس مستغرب إنتي ليه متجاهلة الأمر.

أريانا: إن يعني الرابط اللي بينا قوي! ما أنا عارفة إن لعنتنا واحدة.

نيراس: لأ… مش قصدي كده. أنا قولتلك إن حاسس إننا بنكمل بعض. مش حاسة بده؟

أبعدت أريانا عينيها عنه وقالت بارتباك: مش فاهمة تقصد إيه.

نيراس: ارتباكك قدامي عكس قوتك اللي بتتكلمي بيها مع خطيبك كاسيان، وده معناه إن قلبك مش معاه، ومعناه برده إن الرابط اللي حاسس بيه هو اللي جواكي. مهما تهربي منه هو موجود. وأظن إن ده إجابة سؤالك. ولو سمحتي ماتقفيش معاه قدامي تاني لحد ما أقدر أخرج قوتي من جديد. ولا أقولك ولا تقفي معاه قدامي خالص لأني وقتها برده مش هعرف اتحكم في قوتي وممكن أحرقه قدامك.

تعلقت نظراتهما ببعض، هو يقرأ ما بقلبها ويكشف المشاعر التي تدفنها وترفض أن تصدقها دون رحمة. لا تنكر أن قوته وجراءته تنال إعجابها دائمًا خاصة حين دافع عن رأيه واتهام جميع سحرة السحر الأسود بالخيانة ولم يتراجع عن رأيه حين اعترض الملك. وهذا على عكس كاسيان الذي يرضخ للأوامر دون نقاش.

قاطع تلك النظرات خروج ميرفال من التل الذي قال: نيراس… تعالى لوحدك معايا جوا.

نهض نيراس وأريانا أيضًا ثم قالت: ليه لوحده؟!

ميرفال: خايف يمتص أي سحر أسود تاني وده ممكن يموته. معلش يا أميرة خليكي هنا مع ثورن.

نظر لها نيراس يطمئنها ثم دخل الكهف..

ميرفال: هجرب تعويذة الطرد تاني يمكن اللعنة بتاعت ثورن تخرج منك ويفضل بس اللعنة الأولى.

تنهد نيراس وأومأ إليه بالإيجاب ثم أغمض عينيه مستعدًا لذلك الألم الذي سيشعر به الآن.

رفع ميرفال عصاته السحرية وقال: يا ماء الحياة اغسلي أثر اللعنة. يا ريح الصفاء بددي ظلام السحر. يا نور السماء أخرج السحر الأسود من هذا الجسد.

سقط نيراس أرضًا وهو يمسك بصدره متألمًا بشدة. ثم خرج ثعبان أسود من صدره وسقط مغشيًا عليه. ارتفع الثعبان أمام ميرفال ينظر إليه بعيون حمراء تدب الرعب في كل من يراها. فرفع ميرفال عصاه وأخرج نورًا شديدًا منها أحاط بذلك الثعبان حتى بدأ يختفي وسط الضوء تدريجيًا وظلت العيون تنظر إليه والجسد يتلاشى حتى اختفى تمامًا.

ابتسم ميرفال بسعادة فقد نجحت التعويذة والآن سيستطيع نيراس أن يستخدم قوته من جديد وبقى فقط تلك التعويذة التي تمنع اكتمال قوته.

وفي تلك الأثناء لاحظ الوحوش وجود ثورن على أعلى التل فصعدوا جميعًا بسرعة ووقف ثورن ينظر إليهم بصدمة وينظر إلى أريانا التي ارتعشت من الخوف واختبئت خلفه.

تُرى من سيحمي أريانا الآن؟!

…..