تحميل رواية من البندر للارياف بقلم مصطفي جابر pdf

أنا لقيتلك بنت الحلال اللي هتشيلك فوق راسها وتريحك وتطمني عليك.

حازم ببرود : هو احنا مش هنخلص من الموضوع ده يا ماما

فوزية بأبتسامة : يبني انا بعمل كده علشان نفسي افرح بيك واشيل عيالك..المهم اي رأيك في هنية بنت خالك يا حازم بنت زي الفل بنت ناس ومتربيه وهتشرفنا.

حازم بصدمة : هو انتي بتسألي وبتردي علي نفسك يا ماما إيه ... وبعدين هنية مين؟ هنية الفلاحة؟ دنا عمري ما شوفتها.. هو انتي عايزاني اتجوزها علشان وانا نايم الاقيها بتصحيني وقت الفجر وتقولي اصحي يا حازم عاوزين نحلب الجاموسة تعالي امسكهالي؟.

فوزية بغيظ: احترم نفسك يا حازم دي بنت ناس وبتعرف ربنا ويعني اي فلاحه اي المشكله مهي بني ادمه زيها زينا من امتي وانت عندك تفرقة عنصرية كده؟

حازم بسخرية : يا ماما انا مقصدش انا عارف انها بتعرف ربنا ومحترمة بس هيا مش شبهي..انا عايز بنت شبهي كده افهمها وتفهمني .

فوزية بغضب : وهي البنات اللي انت تعرفهم هنا دول عجبينك يعني؟ انت عايز بنت من اللي قاعدين في الكافيهات ومسكين تليفوناتهم طول اليوم دول تبقي مراتك وام لعيالك؟!

حازم بسخرية: اهي اي واحده في دول هتكون أحسن من واحدة تصحيني الفجر علشان أفطر البهايم

فوزية بهدؤء: يا بني اسمع كلامي ووريح قلبي

حازم بسخرية: انا نفسي بس تفهميني... لا انا ولا هيا هنفهم بعض وهيبقي عندي مشاكل كتير انا ثقافتي مختلفه عنها وهيا مش متعلمه حتي.

فوزية بعصبية: طب لعلمك بقا انا مش باخد رايك انا بقولك علي اللي هيحصل تمام انا كلمت اهل البنت وبكرا الصبح هنسافر الارياف علشان تشوفها واهلها ودا اخر كلام عندي.

حازم بعصبية سابها وخرج..

فوزيه بابتسامة: انا متاكدة ان حالك المايل ده مش هبنصلح الا بيها.

بعد شويه.. حازم كان قاعد في كافيه معا صاحبه كريم

كريم: في إيه يا حازم جايبني علي ملا وشي كدا ليه.

حازم بغيظ: في مصيبة الست هانم أمي قررت إننا نسافر بكرا الفلاحين علشان نطلب ايد بنت خالي .

كريم بذهول : إيه ده بجد يعني خلاص اتحكم عليك يعيني يابني.

حازم ببرود : أيوه يا عم مش عارف أقولها إني مش قادر أتخيل نفسي متجوز واحدة حياتها كلها في الاراضي والبهايم .

كريم بضحك : يا راجل بص عالجانب الايجابي..كفايه انك هتصحي كل يوم تلاقي فطارك جبنه وقشطه وفطير وعسل حاجه كده اخر عز ويسلام لو شوية شاي عالحطب ده

حازم بضحك: والله يا كريم أنا خايف ألاقي نفسي بصحي بحلب البهايم الصبح قبل ما أنزل الشغل.

كريم بضحك : طب وهو انت شوفت قريبتك اللي هتتجوزها دي قبل كده؟

حازم بجمود:لا مشوفتهاش قبل كده بس امي بتقولي البنت محترمه وكفايه انها بنت خالي وخالي ده هو وبنته انا عمري ما شوفتهم .

كريم بابتسامة : لو مصمم ورافض الجوازه دي ارفض ومتسافرش وامك كده كده مش هتقدر تعملك حاجه

حازم بضحك : يا عم اهرب إيه دي أمي مسكة عليّا ذلة كل ما أقولها لأ علي حاجه تفكرني بالمصيبة اللي عملتها زمان..

تاني يوم..

حازم سافر ووصل هو وامه احدي القري في البحيرة ونزل من العربية..

حازم ببرود : يا نهار إسود يا ماما إيه اللي إحنا فيه ده هنمشي ازاي في الطين ده؟

فوزية بهدؤء: متنشف كده يا حازم وارجع لأصلك في اي إحنا هنا في بلدنا وبين أهلنا واصلنا

حازم بغيظ : بلدنا إيه يا ماما هو أنا المفروض أعيش وسط القرف ده وابقي مبسوط؟ ده أنا حاسس إني دخلت فيلم من أفلام الأبيض وأسود.

حازم وهو بيبص حواليه: وبصراحة أنا مستغرب الناس هنا عايشين إزاي لا نت ولا كافيهات ولا طريق أسفلت نضيف يمشو عليه واي الترعة دي واي الطيور اللي بتعوم فيها دي؟

فوزية بضحك: ده وز، زي الوزة اللي جريت وراك وانت صغير وعضتك واظن انت فاكر عضتك فين صح

حازم بتوتر: لا لا مش فاكر ولا عايز افتكر يلا نمشي هو فين بيت خالي ده

بعد دقايق.

بيدخل حازم وامه بيت خاله وخالهم بيستقبلهم

منصوى بأبتسامة : حمد لله على سلامتكم والله وكبرت يحازم وبقيت راجل مشاء الله عليك

فوزية بابتسامة : واحشني يا غالي عامل اي وعروستنا القمر عامله اي وحشتني اووي

منصور بابتسامه: هتيجي دلوقتي اهي تعالو اتفضلو. اقعدو

بعد شوية

حازم بملل وهمس: ماما انا خارج اشم شوية هوا علشان مش طايق نفسي.

فوزية بغيظ وهمس: ماشي متتاخرش.

حازم قام خرج وبياخد نفسه: اعوذوا بالله اي دا انا همشي امتي من هنا.

بيتمشي شويه بيلاقي جاموسة بتستحمي في الترعة.

حازم بسخرية: هو دا اللي ناقص جاموسة بتاخد حمام الطم طيب.

عيل حدف عليه كورة..

حازم بعصبية: مش تاخد بالك يابني انت.

الطفل بشقاوة: احدف الكرة يا عمو.

حازم بغضب حدف الكورة في الترعة: خلي الجاموسة تجيبهالك بقا.

العيال بصت له بغضب وجريوا عليه.

حازم بخضة: في اي.

العيال بصوا لبعض بغضب: انت بترمي الكوره في الترعه؟

حازم بجمود: اه رميتها انزلو هاتوها بقي

_ وننزلو احنا ليه؟طب متنزل انت..واحد نزل علي ركبته ورا حازم والتاني زقوا ووقع في الترعة .

_ ابقي خلي الجاموسه وهيا بتطلع الكوره تبقي تطلعك بقي .

حازم بغضب وهو بيحاول يطلع : انا هربيكم من اول وجديد يفلاحين يولاد ال.

طلع حازم من الترعة وهو متبهدل علي اخره وقرفان من نفسه

رجع البيت و امه وخاله بيبصوله بصدمه : حازم اي اللي عمل فيك كدا.

حازم بغضب: اتزفت وقعت في الترعة فين الحمام اللي هنا.

منصور بضحك: الحمام علي ايدك اليمين هجيب لك جلبية من جوا تلبسها

حازم مشي وهو متعصب ودخل الحمام...

بعد شويه..

خرج حازم من الحمام وهو لابس الجلبيةوشاف بنت ما..

حازم كان لسه هيتكلم .

البنت باستغراب: انت مين ودخلت هنا ازاي ياباااا ياباااا

بيطلع منصور بخضة من الاوضه هو وفوزيه: في اي يا هنيه.

حازم بذهول: اي ده هيا دي هنيه؟ ازاي معقولة الجمال ده الله اكبر .

هنيه بغضب: اي قلة الادب والتربيه دي مين دا يابا.

منصور بابتسامة: اهدي يا هنية دا حازم يا بنتي بن خالتك فوزية.

هنيه بسخرية: اااه دا عريس الغفلة بقا.

حازم بذهول: نعممم؟ عريس الغفلة؟

منصور بحدة: هنية عيب كدا امشي علي اوضتك.

هنيه بغيظ ل حازم: ماشي يابا بس هقولك حاجه انا عمري ما كسرتلك كلمه بس انا مستحيل اوافق اتجوز الواد الفافي بتاع البندر ده.

مشيت و حازم بيبصلها بذهول: بقي انا واد فافي؟

منصور بتوتر: معلش يا حازم هي هنيه كدا لسانها دبش حبتين بس قلبها طيب.

حازم بابتسامة: لا بخالي بقي معقول هزعل منها دنا سيبت بنات القاهره وجيبت امي وجيت مخصوص علشان اطلب ايدك منها واتجوزها واتمني ان حضرتك توافق.

فوزية بذهول : انت قولت اي؟.

حازم بابتسامة: قولت اني عايز اتجوزها يا ماما

فوزية زغرطت وهو خاله اخده بالحضن وابتسم...

في اوضة هنيه..

كانت قاعده وجنبها اختها الصغيرة..

هنية بغضب: هو ابوكي مصمم يجوزني ل الواد ده؟انا معرفهوش بس شكله عيل من بتوع البندر اللي اهاليهم بيصرفو عليهم

رباب بضحك : وانتي شوفتي منه اي يخليكي تقولي عليه كده دا شكله حلو اوي و متعلم وبن خالتك وبعدين ابوكي مصمم عليه.

هنيه بخبث: لو ابويا فضل مصمم عليه هيكون عندي شروط وهيا ان اللي هتجوزه يكون راجل ويقدر يشيل المسيولية واظن ان الواد ده مش هيقدر

رباب بخوف: هو عمل اي علشان تحطيه في دماغك... ربنا يسترها علي الواد.

عند منصور..

منصور بهدؤء: احنا يابني ملناش طلبات ومتاكد انك هتحافظ علي بنتي.

حازم بهدؤء: بس انا عاوز اسمع راي العروسة يخالي

منصور بهدؤء: انا واثق ان هي موافقه.

حازم بهدؤء: معلش يا خالي ريحني عاوز اسمعها منها.

بتخرج هنيه من اوضتها..

هنيه بجمود: انا موافقة لاني مستحيل اكسر كلمة ابويا بس عندي شرط.

حازم بتحدي: اي هو شرطك.

هنيه بخبث: عشان اوافق اني اتجوزك تعيش معانا هنا في البلد دي تلات شهور تزرع و تحصد وتفلح الارض معانا و تعيش زينا.

فوزية بلعت ريقها وقالت في سرها: باظت للجوازة.

حازم بابتسامة: انا موافق علي شرطك يا بنت خالي.

هنيه بخبث: ولو مكملتش التلات شهور دول ومتحملتش تعيش وسطنا يبقا اعمل حسابك انك اترفضت.

حازم وقف قدمها: وانا متاكد اني هقدر اقعد هنا واعيش وسطكم .

فوزيه ابتسمت وغمزت ل منصور..

بليل... عند فوزية..

فوزية باستغراب: اي يلي خلاك متحمس اوي كدا للجواز

حازم بهدؤء: يعني اوافق معجبش موافقش معجبش اعمل اي تاني بس يا ربي.

فوزية بهدؤء: انت بجد موافق علي انك تعيش هنا؟ ده انا جيباك بذل يا حازم.

حازم بهدؤء: اه موافق يا ماما ومش هرجع القاهرة غير و هنيه علي مراتي

فوزية بأبتسامة: اي حبيتها من اول نظرة.

حازم بتوتر: ل لا طبعا احب اي انا بس مبحبش حد يرفضني و هثبت اني مش عيل فافي زي ماهي فاكرة .

فوزيه بابتسامة: هنشوف... ربنا يسترها عليك من الاختبار ده.

بعد شويه...

كانت هنيه قاعده برا في الارض اللي جنب بيتهم وسط الزرع بتقرا في كتاب..

: بتقرائي.

هنيه بخضة: بسم الله الرحمن الرحيم انت طلعت منين.

حازم بسخرية و حاطط ايده في جيبه: عادي يعني الا صحيح انتي ماسكه الكتاب ده في ايدك ليه هو انتي بتعرفي تقري ؟.

هنية بهدؤء: هو حد قالك اني جاهله؟ انا متعلمه وبروح كليه وبعدين انت بتسال ليه روح نام علشان تستعد للاختبار وعلشان هصحيك من النجمه تحلب البهايم

حازم بصدمة: نعم ياختي احلب ال ايه ده مستحييل

هنيه بخبث: اي مش انت وافقت تعيش هنا وتعمل زينا وتبقي واحد مننا ومتنساش تحط علف وتبن ليهم ووريني هتكمل ازاي يا فافي.

حازم بغيظ: انا مش فافي.

هنيه تجاهلته وسابته ومشيت ببرود..

تاني يوم الفجر..

منصور دخل يصحي حازم..

منصور بهدؤء: حازم قوم يا ولدي يلا عشان نأكل البهايم و نحلب البقر ونفطر..

حازم بنعاس: بس بقا يا ماما انا عاوز انام..

منصور بضحك: انا مش امك اصحي يا حازم وبلاش كسل .

حازم فتح عينه بنعاس: اي في اي.

منصور بهدؤء: يلا اصحي يابني.

حازم بيبص في الساعة باستغراب ونوم: اي ده لسه الساعة اربعه يا خالي دا انا لسه نايم من ساعه.

منصور بهدؤء: محدش قالك تسهر يبن اختي يلا قوم ورانا شغل كتير.

حازم باستغراب: شغل اي دلوقتي اوعي تقول هنحلب البهايم.

منصور بهدؤء: اه.. خمس دقايق والاقيك وريا عند الزريبة.

حازم بصدمة :

الفصل الثاني من هنا

حازم قوم يا ولدي يلا عشان نأكل البهايم و نحلب البقر.

حازم بنعاس: بس بقا يا ماما انا عاوز انام..

منصور بضحك: انا مش امك اصحي يا حازم وبلاش كسل ده النهاردة اول يوم ليك في الاختبار.

حازم بيمسك التليفون ويبص في الساعة باستغراب : اي ده يخالي ده لسه الساعة اربعه دا انا لسه نايم من ساعتين.

منصور بهدؤء: محدش قالك تسهر يلا قوم ورانا شغل كتير.

حازم باستغراب: شغل اي دلوقتي اوعي تقول هنحلب البهايم.

منصور بهدؤء: اه.. خمس دقايق والاقيك ورايا عند الزريبة.

بعد شوية في الزريبة

دخل حازم وهو كاتم نفسه: اووف اي الريحه دي.

منصور بجدية : اتاخرت لي يا حازم يلا تعالي احلب الجاموسة عشان نفطر.

حازم بعدم فهم: طب انا احلبها ازاي.

منصور بابتسامة: زي الناس امسك من تحت زي منا ماسك كده واعصر وحاسب ترفصك علشان الجاموسه دي عصبيه شويه.

حازم بغيظ: عصبيه علي نفسها تبقي توريني هترفصني ازاي .

بعد دقيقه..

حازم كان واقع علي الارض و بيتألم من رفصة الجاموسة: اااه بطني.

منصور بسخرية: احمد ربنا انها مرفصتكش في وشك

حازم بيعدل نفسه :لا لا انا محدش رفصني انا اتزحلقت بس مش اكتر.

منصور بضحك: طب قوم ياخويا قوم سيب الجاموسه وحط العلف للحصان عشان نفطر.

بعد شوية

دخل البيت لاقى هنيه بتحط الفطار بص للاكل بجوع.

هنيه بتكتم ضحكتها: اي اللي بهدلك كدا.

حازم عدل نفسه : ها ولا حاجه انا جعان اوي عاملين فطار اي بقا.

هنيه بابتسامة: عيش و جبنه قريش و عسل و فطير وفول وبيض.

حازم بص للاكل بجوع وبدء ياكل..

حازم باعجاب: الفطير حلو اوي اوي.

منصور بابتسامة: ده بالسمن البلدي بتاع الجاموسة اللي رفصتك.

حازم كح وهنيه ضحكت...

حازم بأبتسامه: بعيدا عن العبث اللي بيحصى معايا ده بس الجو هنا جميل فعلا والزرع حلو اوي والمنظر لطيف.

منصور بهدؤء: الاراضي والزرع دي حياتنا وحياتكم انتو كمان لولا شوية الزرع ده مفيش حد هيعرف يتنفس .

حازم باستغراب: اي علاقة النفس بالموضوع.

منصور بهدؤء: علشان الاكسجين اللي بيطلع من الزرع ده يا حازم ولا انت متعلمتش الكلام ده في المدرسة؟

حازم بذهول: هو انت متعلم يا خالي.

منصور بهدؤء: مش شرط اكون متعلم عشان اكون فاهم وخلص اكل يالله وتعالي وصلنا علشان نروح الارض

بعد شويه حازم وخاله كل واحد فيهم راكب حمار

اول ما وصلوا الارض ونزل حازم من علي الحمار وجاي يربطه جري منه.

منصور بخضة: انت واقف تتفرج اجري امسكه بسرعه اوعي يهرب منك

حازم طلع يجري ورا الحمار...

حازم بغضب: حد يوقف الحمار بن الحمار دا بسرعه هششش اقفففف يا حمااار.

الحمار جري و راح ناحية البيت واختفي و حازم بيجري وراه علي اخره..

حازم وهو بينهج: ا ا امسكو الحمار.

هنية بخضة: مالك في اي.

حازم قعد علي ركبته بياخد نفسه: الحمار جراني وراه في كل حتة هو مجاش هنا.

هنيه باستغراب: لامجاش قوم من علي الارض.

سندته يقوم و حازم تليفونه رن ب رقم خاله..

حازم وهو بياخد نفسه: الحمار هرب يا خالي.

منصور وهو بيطبطب علي الحمار: يابني انا نسيت اقولك انه الحمار بيحب ياخد لفة قبل ما اربطه وبيرجع لي الارض تاني.

حازم قفل في وشه: هنيه.

هنيه: نعم.

حازم وهو بينهج: انا مش عايز اتجوز انا تعبت

هنيه ضحكت وهو سرح في ضحكتها.

حازم بسرحان: اول مرة اشوف ضحكه حلوه كده

هنيه بخجل: طيب يلا عشان تروح الارض.

حازم بتوتر: طب انا معرفش الطريق ونسيت ممكن توديني.

هنيه بهدؤء: ماشي هوديك تعالي

حازم بغيرة: داري شعرك اللي طالع برا الطرحه دا الاول.

هنيه بتدخل شعرها جوا الطرحه.

هنيه بجمود: علي فكرة الطرحة بتتزحلق عادي يعني.

حازم بغيرة : لا مش عادي انتي هتكوني مراتي وانا محبش حد يشوف شعرك انتي فاهمه.

هنيه بعصبية: لا مش فاهمه وبعدين انت لسه مبقتش جوزي

حازم مسك ايديها بغضب: متستفزنيش احسن لك يا هنيه.

هنيه بألم زقته: ايدك دي متلمسنيش تاني.

سابته ودخلت جوا جري و حازم بيتنفس بغضب.

فوزيه باستغراب: في اي يا حازم.

حازم بعصبية: مفيش حاجه انا غاير رايح الارض والبت اللي جوا دي متخرجش غير وشعرها متغطي كله.

فوزية باستغراب من رد فعله: جرا اي يا حازم هنيه طول عمرها شعرها متغطي في اي اكيد لو بان منه حاجه هيكون غصب عنها فا اي معصبك اوي كدا انت بتغير عليها؟

حازم مردش و بيتنفس بغضب.

فوزيه بخبث: مش دي الفلاحة اللي مكنتش عجباك هتموت اوي كدا لي لما شعريتين بانوا منها ها ما البنات اللي انت كنت تعرفهم مش بيلبسو طرح حتي وكنت بتحبهم .

حازم بغضب: كان ماضي وخلص وهيا دلوقتي بقيت تخصني سلام بقي علشان خالي مستنيني.

سابها و مشي وهي ضحكت في نفسها: والله ووقعت يا حازم...

بعد شويه في الارض..

منصور باستغراب: مالك يا ولدي.

حازم بغيظ: مفيش حاجه انا كويس هروح اشغلك مكنة الري و هسقي البهايم عشان حرام كدا مشربوش.

رفع باستغراب: هتعرف تشغل المكنة وتسقي البهايم؟

حازم بجمود: اه يعمي انا شوفت فديوهات وععرفت هعمل كده ازاي

بعد شوية عند مكنة الري..

حازم بيدور علي زرار يشغلها مش لاقي.

حازم بأستغراب: هما بيشغلوها ازاي دي مش المفروض يكون في هنا زرار

: دي بتشتغل بالحبل..حط اربط الحبل علي الجزء اللي طالع من الماتور ده واربطه حلو وشد جامد هتشتغل معاك .

بص للصوت لاقها شايلة صنية اكل و تجاهلته ومشيت

عند منصور..

هنيه بهدؤء: الاكل يابوي تؤمر ب حاجه تاني.

منصور بهدؤء: نفسي في شوية شاي عالحطب من ايدك العسل دي ..

حازم جه بهدؤء: وياريت انا كمان تعمليلي كوباية معاكي

هنيه بجمود: تمم.

حازم قعد قدلمها واتنهد: بصي انا عارف اني ذودتها واتعصبت عليكي بس انا مش عارف اتأقلم هنا وبحاول عشان.. سكت وهيا بصت له ..

هنيه باستغراب: عشان اي.

حازم بتوتر: م مفيش بس انا عاوز اقولك اسف علي اني زعقت لك.

هنيه بهدؤء: عادي ولا يهمك يا حازم.

..

بعد شويه..

حازم بيحاول يفتح موضوع: احم الا قولي لي يا هنيه هو انا بجد في نظرك واد فافي.

هنيه ببرود: بص لنفسك وانت تعرف.

حازم برفع حاجب: بصيت وملقتش حاجه ليه يعني شايفاني كدا و مش موافقة عليا.

هنيه بهدؤء: انا مش موافقة علي افكارك يا حازم مش عليك انت.

حازم بعدم فهم: دي فزورة دي طيب.

هنيه بهدؤء: لا طبعا بس انت تفكيرك مختلف اوي عننا انت شايفنا بصورة مش كويسة وصورة غلط في غلط و بتتكسف تقول ان اصلك فلاح مع انه دا اصلا فخر ليك علي فكرة احنا هنا عايشين في امان وراحه بال وجو حلو تتمني تفضل فيه مش زي عندكم في مصر دوشة عربيات وزحمة و توتر و حجات كتير لكن هنا راحة بال .

حازم بهدؤء: مش كدا انا بس اتولدت هناك واتأقلمت هناك هنيه بهدؤء: طب جرب يا حازم جرب تحاول تتأقلم هنا وشوف بنفسك الفرق

: اي ده مش دا الواد اللي وقعناه في الترعة امبارح.

بص حازم للعيال بغيظ و هم بيضحكوا.

هنيه بضحك: انت وقعت في الترعة؟

حازم بغيظ: لا طبعا.

احد الاطفال: لا وقع جنب الجاموسه ههههه.

هنيه ضحكت علي اخرها

بليل...

كان قاعد علي السطح بيشوف المكان حولين منه حس بالراحه فعلا.

منصور بصوت عالي: حااازم يا حاززم تعالى بسرعه يا ولدي.

حازم نزل جري: في اي.

منصور بجمود: عبدالسميع هايج و محدش قادر يربطه.

حازم باستغراب: عبدالسميع مين.

منصور: التور اللي في الزريبة.

حازم باستغراب: انتو مربيين تور كمان.

منصور بغيظ: دا مش وقته يلا بسرعه تعالى اربطه.

حازم بتوتر: اربط اي وانا مالي انت عايز تضحي بيا ولا اي.

هنية بسخرية: خليه يابوي هروح انا اربطه

حازم بنرفزة : اقعدي اتنيلي هدخل انا اربطه.

منصور بضحك: طب استني اجي معاك يمكن تحتاج مساعدة.

حازم بغيظ: كنت ربطته انت يخالي بدل الفرهدة دي انتو جايين عليا بخسارة انا عارف.

فوزية بخوف: ما بلاش يا حازم دا تور مش جاموسه.

حازم بغيظ: فرقت يعني يا ماما ما الاتنين جسم واحد

هنيه ببرود: اه فرقت ولا اقولك لا مفرقتش فعلا يمكن تتصاحبوا سوا منتو شبه بعض

منصور بزعيق: بسسس انتي وهو انتو هتفضلو تتكلمو وتسيبو التور البي هيكسر الزريبة.

حازم بغيظ: لا يا حج مش هننساه يلا.

خرجوا كلهم ووقفوا قدم العنبر

حازم بلع ريقه بخوف: هو اي الاصوات دي؟.

خاله بجمود: دا التور هايج وعمال يخبط راسه في الباب

هنيه بخبث: يلا ادخل ورينا شجاعتك كدا.

حازم بيشمر كمه وقال بفخر: هوريكم طبعا يانا يا التور النهارده.

فتح الباب ودخل و بص للتور بأستغراب.

حازم بصدمة: بقي ده التور اللي عامل الضجة دي كلها وانتو خايفين منه؟ واتاريكي عامله شجاعه وبتقولي هدخل اربطه انا... دا لسه صغير يا خالي.

منصور بتوتر : ماهو مش دا التور بص جمبك كده.

حازم سمع صوت انفاس حادة من جنبه بلع ريقه بتوتر وبص و صرخ بخضة: يااااامااااااا ديناصور.

طلع يجري جوا العنبر والتور بيجري وراه .

فوزيه بقلق: ربنا يستر يارب... حازم يا حبيبي انت لسه عايش.

حازم من جوا وهو واقف علي جنب وبيستخبي: انتي السبب ياااما..كان مالهم بنات القاهره فضلتي تقولي بنت خالك بنت خالك طب مكلهم بنااات فرقت اييي دي من دي

كلهم ضحكوا وهم برا...

هنيه بضحك : ادخل يابا الحقه بدل ما يحصله حاجه جوا .

حازم بغيظ من جوا: اسمعو كلامها وحد ييجي انتو بتضحكو علي اييي حد ييجي يشتت انتباه التور وانا هحاول اربطه

حازم بص للرباط بتاع التور وفوزية حدفت طوبه اتجاه التور

التور بص لفوزية وحازم نزل بسرعة مسك الرباط بتاع الطور وفضل يشد فيه لحد ما ربطه

منصور بتسقيف: لا برفو عليك والله انك قدرت تمسكه وتربطه ده طلع عيني وانا بحله

سكت بتوتر.

حازم بصدمة: يعني انتي اللي حليته اصلا؟

منصور بتوتر : ها اه مانا حليته عشان خاطر امشيه شويه بس مقدرتش عليه بس انت جدع طلع عصبك ناشف هروح اصلي المغرب بقا.

مشي بسرعه.

حازم بغيظ ل فوزية: عاجبك عمايل اخوكي دي؟

فوزية بتوتر: وانا كمان هروح اصلي المغرب قبل ما يفوتني سلام.

مشيت جري و حازم بص علي هنيه لاقاها قاعده .

حازم باستغراب: قاعده كده ليه مش هتروحي تصلي انتي كمان.

هنيه وهي بتحفر في الارض: ياعم دول بيهربو تعالي يالله علشان اقعد

تاني يوم ..

حازم صحي علي صوت امه بتصحيه.

حازم بنوم: في اي ياما النهاردة الجمعه بتصحيني ليه

فوزية بخبث: هنية تعبانه

حازم قام بخضة: تعبانه مالها طب جبتوا دكتور.

فوزيه بابتسامة: لا دا دور برد عادي معرفش كانت سهرانه بتعمل اي طول الليل والجو مطر عليها.

حازم ابتسم وهو بيفتكر...

فلاااااااااش باااااااااااك.

هنيه وهي بتبص للسماء: شكلها كدا هتمطر.

حازم باستغراب: لا طبعا الجو صافي مستحيل تمطر خالص .

هنيه بابتسامة: هتشوف.

خمس دقايق والجو مطر فعلا..

حازم بضحك: يا كسفتك يا حازم.

هنيه بضحك: لا والافيه لايق عليك اوي.

حازم بابتسامة قام ومد ايده ليها يقومها: يلا ندخل عشان مش تبردي.

هنيه وهي بتلعب في المطرة: لا طبعا انا بحب المطرة جدا تعالي نلعب فيها الله.

حازم بابتسامة: هتبردي كدا.

هنيه وهي فتحت دراعتها وبتستقبل المطر: عادي هخف تاني.

حازم باستغراب: بتعملي اي.

هنيه بابتسامة غمضت عنيها: بستقبل المطر جرب كدا تفتح دراعاتك وغمض عينك واستقبل المطرة هتحس ب اجمل احساس حسيته قبل كدا.

حازم وقف جنبها و عمل كدا وغمض عينه..

هنيه فتحت لاقته عامل كدا اتسحبت ومسكت شوية طينه وحدفته بيهم..

حازم بغيظ: بقا كدا تبهدليني طب تعالي بقا.

هنيه جريت وهو مسك طينه وحدفها بيها...

باااااااااااك..

فوزية باستغراب: اي روحت فين سرحت في اي.

حازم بهدؤء: ولا حاجه طب هي كويسة طيب.

فوزية بابتسامة: متخفيش هي بس كسلانه شويه.

حازم بهدؤء قام: تمم هروح اطمن عليها.

فوزيه بهدؤء: ماشي.

عند هنيه.

رباب بهدؤء: خدي اشربي العلاج ياختي تحبي المطر زي عينك.

هنيه بأبتسامة: ده جوي المفضل ده دا العشق .

. احم احم

هنيه بأبتسامة: حازم.

حازم بأبتسامه : عرفت انك تعبانه ف جيت اطمن عليكي.

هنيه بابتسامة: تسلم يابن عمتي.

حازم بابتسامة: انا طالع برا عاوزة حاجة اجيبهالك وانا راجع؟ .

هنيه بابتسامة: تسلم متحرمش منك

مشي وهنيه ابتسمت و رباب ضحكت: ايوه بقي اخيرا والحب بان عليكي .

هنيه ضحكت...

بعد شوية كان حازم واقف معا خاله برا

بييجي واحد ويزعق معا خاله

- هو صحيح يا حج منصوى انت هتجوز هنيه لواحد تاني غيري؟

حازم بغضب: مين الحيوان دا ومالك ومال هنيه!

حسين بغضب: حيوان؟ هو انت الواد الفرفور بتاع القاهره اللي عايز تتجوز حبيبتي ده انا هربيك.. يا عز يا محسن تعالووو.

جم اتنين شباب..

منصور بغضب : اي يحسين قلة الادب دي عيب كدا في اي

حسين بغضب: عيب؟ امال لو انت مش عارف يعمي اني بحبها وعايز اتجوزها كنت عملت اي..فضلت اقولك يعمي حوزهالي تقولي مش دلوقتي مش دلوقتي اتاريك سايبها لابن اختك لكن احنا لسه فيها اهو يا تجوزهالي بالذوق يا هتجوزها غصب عنك..

حازم بغضب هجم عليه ومسك فيه ونزل فوقه ضرب و عز رايح يضرب حازم هو و محسن الناس اتلمت وسلكت بينهم بالعافيه...

بعد شويه...

حازم بيمسح علي وشه بغضب.

منصور بهدؤء: خلاص اهدا يا حازم المشكلة خلصت وهم اتاسفوا لنا وابوهم هيربيهم.

حازم بغضب: انا عاوز اكتب علي هنيه دلوقتي مش هستني لحظة واحدة يخالي

منصور بصدمة: حازم اهدا مش كدا يابني.

حازم بغضب: مش ههدا هنيه هتكون مراتي ودلوقتي حالا.

منصور بهدؤء: بس...

هنيه مقاطعه: وانا موافقة ياباا وانسوا شرطي.

منصور بصدمة: اي.

هنيه بهدؤء: ايوا يا بوي حازم اثبت في تلات ايام انه قد اي حاجه مش واحد فافي .

فوزية ب ابتسامة: خلاص بقا يا منصور نكتب دلوقتي و بعد يومين الفرح

منصور بتفكير: طالما هنيه موافقه ف انا كمان موافق.

حازم بص ل هنيه بابتسامة

تمت