رواية من الجنون للعقلانية الفصل الثاني 2 - بقلم تقى مصطفى

_بت يا ليان مش دة اخوكي برضو؟

بصيتله عشان اتأكد لقيته باصصلي كأنه بيشوف انا

فعلا ولا مش انا و فجأة لقيته جاي ناحيتي انا و

فريدة فضلت الف حوالين نفسي اعمل ايه اعمل

ايه في الوضع المهبب اللي وقعت فيه دة بس يا

ربي.

_ليان تعالي نروح الحمام بسرعه قبل ما يجي خلصي.

شدتني و روحنا ربع ساعة كدة و لقينا يوسف بيرن

علينا عشان نطلع طلعنا و قعدت ابص ملقيتش زين

موجود حمدت ربنا و فريدة اخدتني و روحنا عند

الباقي.

_ايه كل دة السباق هيبدأ؟!

_اخويا جه كنت عاوزني اعمل ايه يعني كان لازم اختفي لحد ما يمشي.

_طب يلا يا اختي اركبي.

_فريدة خدي موبايلي خليه معاكي.

ادتهولها و قبل ما اركب العربية وقفني صوت يوسف وهو بيقول بتحذير

_ليان الخسارة ممنوعة.

_و ايه الجديد مهو دة العادي.

_يا ليان ركزي السباق دة مهم لفريقنا لازم تكسبيه.

_يووووه خلاص يا يوسف فهمت.

دخلت السباق و لقيت اللي ضدي بيزنق جامد عليا زودت بنزين لحد ما عديته و فزت بالسباق.

بعد ما نزلت من العربية جات فريدة و باقي الفريق

عشان يسلمو عليا بحرارة كعادتهم بعد كل سباق

بفوزه و بعدين فريدة رفعت الموبايل بتاعي قدام عيني وهي بتقول

_ليلو هو زيزو دة مين اللي بيرن عليكي.

اخدت منها الموبايل بسرعه

_يمصبتي دة اخويا.

اعمل ايه.

اروح فين اهرب من تحت عقب الباب مش هيجي على مقاسي.

رديت بنبرة مرتعشة

_ا..الو يا زيزو.

_ايه يا ليان انتي فين؟

_انا ..انا في الدرس المستر قال هيأخرنا النهاردة.

_اممم و ماما تعرف انك هتتأخري في الحصة؟

_اه انا اتصلت بيها و قولت لها.

_طب قدامك قد ايه و تخلصي عشان اجي اخدك.

بصيت لهم عشان اخد منهم إجابة عشان احنا مفكرناش في السؤال دة سوا.

يوسف قال جنبي

_اقفلي يا ليان الموبايل و ركزي في الحصة لو سمحتي.

كتمت ضحكتي و كملت الحوار بعد ما فهمت قصده

_طب هو احنا قدامنا قد ايه و نخلص يا مستر.

_نص ساعة ان شاءالله.

_بيقولك نص ساعة يا زين و نخلص.

_طيب انا هاجي اخدك لما تخلصي.

قفلت الموبايل و اخدت حاجاتي منهم بسرعة وانا بقول

_يلا لازم نرجع السنتر قبل م النص ساعه تخلص.

_يلا يا اختي انا مش عارفة انتي خايفة كدة ليه عادي قوليله روحنا نجيب حاجه.

_بس يا زفتة انتي انا اصلا مش عاجبني السكة اللي احنا ماشيين فيها دي مش عارفه انا بسمع كلامكم ليه اساسا.

ضحكت و رجعنا السنتر تاني قعدنا فيه لحد ما لقيت زين بيرن عليا و بعدين بعت رسالة

_ليان انا تحت خلصتي؟

شوفت الرسالة و نزلت و هما نزلو ورايا و بعدين روحت العربية و انا مقررة اني هقوله كل حاجه عشان مش عاجباني السكة دي.

_ايه اخبار الدرس يا لولو؟

_كويس ماشي الحال الحمد الله.

_طب عايزك بقى تشدي شوية عشان تجيبي مجموع عالي.

_حاضر يا زين هحاول.

_شاطرة يا قطتي.

_زين انا كنت عايزة اقولك حاجه،ينفع؟

_يسلام طبعا،كلي أذان صاغية.

_بص هو.......

_فيه ايه يا ليان متقلقينيش كدة؟

_طب بص اوعدني انك مش هتزعل مني.

_اممم كدة يبقى هببتي مصيبة،قولي يا ستي مش هزعل منك.

_انا .....

قاطعني صوت موبايله وهو بيرن ف شاف مين المتصل و قالي

_طب ثواني يا لولو معلش.

_لا ولا يهمك براحتك.

بعد شويه

_ها يا لولو كنتي عاوزة تقولي ايه؟

_لا خلاص كنت هقولك بس انهم في السنتر

امبارح طلبو مني رقم ولي الأمر عشان درجة

الامتحان بتاعتي مش حلوه و انا اديتلهم رقمك

انت.

_ بس؟

طبعا مقدرتش اقوله الحقيقة عشان زين دة مش بس

اخويا الكبير لكن انا كمان بعتبره ابويا و بخاف على

زعله معرفش ايه اللي خلاني هببت العمله دي

بس و اتعرفت على العرر دول.

_اممم بس كدة.

شغل العربية و هو بيسألني

_وليه يا ترى درجتك مكانتش حلوة؟

_الامتحان كان صعب يا زين والله.

_ليه دي مادة ايه؟

_فيزياء.

_يلهوي يا ليان دي سهله اوي بتحطي القانون و تعوضي بس.

_اه طالما هي كدة ليه كل الناس دول بيشيلو فيزياء يا ترى؟

_عشان الفيزياء دي ال كوين محتاجه حد بيفهم بس مش اكتر.

_اممم ماشي اللي تشوفه.

تليفوني رن و كانت فريدة قلبت عيني بملل و عملته سايلنت بس زين لاحظ

_مين اللي كان بيرن عليكي؟

_دي فريدة صحبتي.

_هي مش دي البت اللي انا قولت متكلميهاش تاني؟

_اه هي بس والله يا زين انا عايزة اقطع علاقتي بيها بس خايفة اكسر قلبها أو تزعل مني.

_متولع يا ليان انتي بتكلميها ليه اصلا بعد ما انا قولت لك كدة؟

_م عشان خايفة تزعل مني.

_يا ليان انا مش هقولك هي مش كويسة و الصاحب ساحب و

الطيور على أشكالها تقع و كل الكلام الحلو دة،

انتي مينفعش بنوته جميلة زيك محترمة كدة تكلم

الأشكال دي شكلها اصلا مش زيك تربيتها مش

زيك مينفعش حد شبهها يكون واخد سنتي في

حياتك حتى.

_حاضر يا زين مش هكلمها تاني خلاص.

_وعد؟

_وعد.

_طب يلا طلعي موبايلك اعملي ليها بلوك و

أمسحي رقمها و اصلا ماما قالت هتجيب ليكي

مدرسين برايفت عشان هي حاسة انك مش

بتذاكري في السناتر.

طلعت موبايلي و عملت ليها بلوك فعلا زي ما قال

و مسحت رقمها ووريته و قعدت افكر لما اروح

هبعت لهم اقولهم ايه؟

مفوقتش غير على صوت زين لما روحنا البيت

طلعت و سلمت على ماما و بابا و غيرت هدومي

و قعدنا نتغدا سوا في جو اسري لذيذ بس زين نده

عليا و احنا قاعدين

_ليان حصل معايا حته موقف انهاردة لازم احكيهولك.

_قول حصل ايه؟

_صاحبي كان سايب عربيته في مكان سبق

عربيات كدة انهاردة روحت اجيبهاله لقيت بت

شبهك طبق الأصل منك.

اتوترت شوية بس حاولت أبين الشجاعة

_سبحان الله يخلق من الشبه أربعين.

_فعلا والله سبحان الله.

خلصت و دخلت اوضتي ارتب أفكاري شوية و بعدين حسمت الأمر مسكت الفون بتاعي و فتحت الجروب و بعتلهم

_جماعة انا اسفة بجد بس السكة بتاعتكم دي مش

سكتي و مش عاجباني انا بس كنت عاوزة اجرب و

ندمت اني جربت دة مش اسلوب حياتي و لا انا

متربية على كدة انا ماما هتجيبلي مدرسين في

البيت هطلع من الجروب و ياريت محدش يرن عليا

او يحاول يكلمني بأي طريقة لإني مش هرد على

حد ،شكرا.

و طلعت من الجروب فعلا و مسحت ارقامهم كلهم من عندي و الباب خبط و دخل زين ف قولت له بتردد

_زين انا عايزة اقولك حاجه.

_قولي يا لولو بس هتتكلمي المرادي ولا هتسكتي.

_لأ هقولك كل حاجه بس متقاطعنيش و متزعلش مني.

_حاضر.

قعدت حكيتله كل حاجه من اول ما شوفتهم و بقيت اروح معاهم السباقات و كل حاجه وهو كان قاعد يسمع بهدوء غريب لما خلصت قالي

_خلصتي كدة ولا في حاجه تانيه؟

_لا خلصت مفيش.

_طيب انا كنت عارف اصلا كل حاجه من البداية.

_ايه!!!!!