رواية من فجر ديسمبر الفصل الرابع والأربعون 44 - بقلم Zoka 🌷

من فجر ديسمبر
🍁
🍁
سندتهه واخذتهه كعدت ع الجربايه .. رحت طلعت هدوم من الكنتور بلوز وبنطرون وكوت وضليت حاير هاي شلون حتلبس وهيه ترجف واصبع متكدر تحرك ...
- ربى تكدرين تلبسين بس شويه كوي روحج
- شهاااب اكله ايدي ثكلانه ماكدر اشيلهه
- جا امشي هيج هسه مال تبديل هيه

رحت جريت شالهه لبستهه الهه شلون مجان ورحت فتحت الباب ورجعت شلتهه وطلعت
ضل المفتاح بالباب ماخذته وماكدرن اسيطر بعد جان طلعو ولد وبنيه من المصعد وكبل اجوي ساعدوني انطوني المفتاح وسدو الباب والبنيه راحت فتحت باب المصعد تشكرت منهم ونزلت بالمصعد والولد وياي .. اخذني بسيارته للمستشفى
عبن انه نسيت السويج فوك انشدهت ...

جان يحجي عربي مكسر وانه كل بالي يمهه
ماجاوبه بس عله كد جلمتين .. وصلنه المستشفى
وكبل دخلناهه طوارىء وبس حجيت للدكتور
عله كلبهه كبل اخذوهه نقلوهه لغير ردهه انه
ماجنت شايل كل الفلوس بس الاستلمتهن وجان بالي اضيفهن ويه العندي هناك .. وهاي الحساب لازم يندفع اول شي ... رحت انطيتهم العندي
وكلت بس اتطمن عليهه وافهم علتهه واطلع اجيب الباقي ... راد الولد يدفع ماخليته ماحب اصيرن مديون لاحد ... عشت بخوف وتوتر مصاير هذيج الساعه وهمه ياخذوهه من حجره لحجره عاد كعدتبعد ماضل بيه حيل خفت عليهه واحنه بغربه لو صارلهه شي شكول شحجي ...

وره ساعه يلا اجتي الممرضه وخذتنه لحجرتهه
طيب كبل ليمهه كضيت ايدهه وبست راسهه وهيه
بس فتحت شويه عاينتلي وردت غمضت .. اخذني الدكتور بره نحجي ..
- فهمني دكتور شني الي بيهه
- هذا الوضع من شوكت عدهه
- من هيه زغيره يضيك نفسهه ويصير عدهه خفقان وهواي مرات تغيب عن الوعي جم يوم وترد تصحى
- اي واضح هذا الشي مو من يوم وليله هيه عدهه مرض قبل لو من الولاده هيج
- لا موش من الولاده من عمر خمس سنين بس هيه جان عدهه فقردم حاد وتعالجت منه بس دكتور مصاير عدهه ثكل بايدهه كبل هاي اول نوبه
- تعال وياي للغرفه حتى افهمك حضرتك شنو دارس
- تحليلات
-كلش زين

مشينه لحجرته وهوه فتح التخطيط والرنين وحطهن جدامي وضل يأشر عليهن ويشرح
- شوف هاي الصمامات مسؤوله عن الانقباض والارتخاء حتى تساعد بتدفق الدم هنا شديصير
اختلال بالانقباض يعني هو اكو نوعين من الامراض التصير بالصمام ياما ارتخاء دائم يخلي الدم بحاله سيلان دائمه ياما انقباض يمنع وصول الدم ..شوف هاذا المجسم العندي بي هذني الردهات وهالفوك الصمام بي باب يصير يفتح باتجاه واحد هذا هنا ديصير الخلل ينقبض فيعتصر كلبهه يضيق النفس لان ماكو دم كافي ديوصل واي خلل باعضاء الجسم ناتج لان دم مديوصل فهمتني
-فهمتك دكتور فهمتك
- اي والشغله الثانيه تكرار الاختلال بنبضات الكلب على مدى هالسنين ضعفت الكهربائيه الي المسؤله عن تنظيم النبضات تعرف انته هاي مسؤله عن كل نبضه بالثانيه واهمالكم لهالشي طول السنين هذيج ادى لاختلال الصمام هسه
- ماهملناهه دكتور فرينه بغداد كلهه بدكاترتهه
بس مامش نتيجه
- على كلاً هاي الحاله يحتاجلهه عمليه تبديل لصمام وشحن الكلب بصعقات ترجعله حيويته
وفقر الدم بعده لاتكلي تعالج
- دكتور مالهه علاج الا عمليه
- العلاج يتعب ومدام بعدهه بشبابهه خلي تخلص منه هاي بالكبر مايتسيطر عليه مثل هسه
- زين دكتور شكد اطول فتره تكدر بدون العمليه
- كنصيحه مني لاتطول اكثر من شهرين كحد اقصى .. راح اخليهه هسه على الادويه وتنتبه
لاتتعبوهه لا نفسياً ولا جسدياً اي نشاطات متعبه ممنوع .. الاكل تنتبهلي عليه ودائماً تدفي نفسهه وكل عشره ايام سوي تحليل شوف نسبه الدم شكد تزيد حتكبلهه مقويات تستمر عليهن ومثل ماوصيتك شهرين كحد اقصى حفاظاً على جسمهه لان التاخير شفت شلون اول مره طلع بايدهه فما بالك اذا انهمل اكثر
- لا ان شاء الله مانطولهه ..

اخذت الراجيته وتشكرته وطلعت رحت لحجرتهه
جانت كاعده رحت كعدت يمهه ولامست خدهه وابتسمتلهه ...
- شلون صرتي
- احسن
-وايدج
- اكدر احركهه بس شويه تنمل ..شكلك الدكتور
- يكول ديربالك عليهه مايعه متتحمل
- هههه شهاب مو وكت شقاك كولي من صدك
- يكول زينه زينه بس لازم تاكلين زين عندج فقر دم
-اهووو اي مو راح
- لا ماراح بعده
- اففف
- بنيتي انه حطلع للشقه اجيب باقي الفلوس نسيتهن ولازم ادفع هسه . ماطول عليج انتي نامي ارتاحي
- ماشي بس مو تتاخر
-لا شلون اتاخر واعوفنج! بس نامي لاتفكرين باي شي زين بويه
- تمام بويه تمام

ضحكت وكرصت خدهه وطلعت جان الولد بعده ينتظرني تشكرت منه وهوه وصلني .. رحت اخذت الفلوس واخذت ملابس الهه ورديت نزلت اخذت سيارتي ورحت للمستشفى ...

دفعت باقي الفلوس ورحت جبت اكل ورحتلهه
جانت نايمه كعدتهه ورادت تروح تغسل بس ايدهه ترجف وكل ماتشيلهه شويه ترد تنزلهه تتعب وتكلي حيل ثكيله .. غسلت ليهه وكعدت وكلتهه
ونحجي ونضحك وبعدين عفتهه تنام وطلعت رحت للدكتور سالته عله ايدهه وكلي هيه ترجع طبيعي منا لباجر بس ترتاح ..

رحت جبتلهه الدوه وانطيتهه حبايتين شربتهن وابره ضربوهه بالوريد وضلت كلساع تنام وترد تصحى .. انه جنت افكر بعمليتهه شلون !!
لا ادري بحالنه نضل كاعدين هنايه لا ؟ فلوس منين ادبرهه وانه سالت عنهه تطلع ب السبع ملايين وياهن مصاريف العلاج والمستشفى الي كلساع جيب جيب .. وكل هاي بصفحه وحيرتي
عله صحتهه اخاف تزيد حالتهه اذا تاخرت بجمع الفلوس ...

جنت صافن عليهه وفكره تجيبني وفكره توديني
عاد هيه صحت انه كربت ليهه وحطيت ايدي
اليسره عله خدهه عاد هيه ميلت راسهه عليهه
وكالتلي ..
- ليش ملابس محبسك
- ذكرتيني بي هاذ وينه بجيبي اضمه من اشتغل اخافن عليه يتشخط لو يصيرله شي
- حافظ عليه حباب وبس تخلص شغلك ارجع البسه اريد دائماً اشوفه بايدك
- صار تدللين .. بس شعندج ويه هالمحبس فهميني
- اريد اشوفك مميز بي تستاهله لانك تحميني دائماً
- يابعد رويحتي انتي

طلعت المحبس لبسته ورجعت امسد عله راسهه
لحد ماغفت وانه صارت نومتي عله القنفه كعدت متشنج ظهري وجتافي كمت اطك بظهري ورحت اغسل رجعت لكيتهه كاعده ووجهه ذبلان هيج روحي تختنك من اشوفنهه هيج بنيه من الحور جنهه نسمه بارده مالهه اذى لاحد نفس متكدر تاخذ براحه وبالكوه تمشي ليش يعني ليييش ...

- هااا صباح النشاط
- صباح الخير شلون نمت هيج
- دبرتهه بس حسبي حسابج ترجعين تفرجين ظهري اي لاعبالج اضل بس ادلل هم اريد انه شويه
- ههههههه صااار تستاهل ندللك ابو الشهب
- ههههههه منين متعلمتهه هاي ولج
- من وليد
- صخام الصخمك ياوليد اجيتلك يومين وذاع صيتك
- حباب هالولد وكلش ينحب دمه خفيف
- هييي بويه شمالج
- ههههه شكو شحجيت غير نسيبنه بعد
- عوفي حرمته تمدح بي انتي مالج شغل باحد زيين
- زين زين لاتضوج .. اريد اسبح
- اي يلا كومي انه جبتلج ملابس
- وشوكت نطلع
- يجي الدكتور يطمني عليج ونطلع
- زين

ساعدتهه كامت للحمام وبعد اكو رجفه بجف ايدهه اليسره كلتلهه..
- اجيبلج الممرضه تساعدج خاف تتعبين هيج وحدج
- لااا ماتسوه بعدين اكدر تره مو هيج اني مابيه حيل ،،قويه لاتخاف
- عفيه ببنيتي عفيه تفرحيني هيج يلا انه كاعد هنايه انتظرج

طبت تسبح وانه كمت فتحت الشباج تتهوى الحجره
وضليت واكف واعاين من الشباج وتالي سمعت صوت شي طاح يمهه ضليت واكف ومتردد ماريدن احسسهه انهه ضعيفه بس من صاحتلي بصوت يرجف كبل رحت فتحت الباب وطبيتلهه
جانت لافه المنشفه عليهه ومجلبه بالمغسله وواكفه
وايدهه عله صدرهه .. ركضت ليهه وشلتهه وهيه تبجي بسكوت مددتهه عله الجربايه وكعدت بسدهه
وكضيت وجهه باثنين ايديهه واحاجيهه ..
- اهدي بنيتي اهدي رويحتي فهميني شني صارلج احجيلي بويه بس كليلي
- كلبي يدك سريع فجاه وايدي ماكدرت اشيل بيهه شي شهاب ايدي حيل ثكيله ليش احجيلي

ضميتهه لصدري وابوس براسهه وجبت البطانيه غطيتهه وكمت سديت الشباج واجيت ليمهه وهيه بعدهه هيج شعرهه مبلل وبس دموع وجتافهه كلهه طالعه رحت للحمام جبت ملابسهه ومنشفه ثانيه وكعدت يمهه نشفت شعرهه واهدي بيهه بعدين كلتلهه ..
- كااافي ربى كااافي بجي موش هيج اعرفنج كويه وهالاشياء ماتهزج
- شهااااب
- ياااعيونه وكل هله كولي
- ماريد اموت هسه اريد..
- اشششش اششش لاتجيبين هالطارري عله لسانج نوبه الثانيه شني تموتين شننني هالحجي هاذ مارضى منج هالحجي بنيتي علاجج موجود وانه هنايه اداريج بعيوني لو كلبي تحتاجي انطيه لج
لاتخافين من شي

تكربت وحطت راسهه عله صدري وانه حضنتهه حيل وضليت اشتم بيهه شويه وهيه كالتلي ..
- جيب ايدك
اخذت ايدي اليمنه وحطتهه عله كلبهه ورجعت راسهه ليم ركبتي وضلت كل مايعتصر كلبهه تشد عله بلوزي وانه ايدي عله كلبهه اجيس نبضاتهه الي شويه تتسارع وترد تهدا جان تكلي
- دتشوف شلون اني لامه بلوزك بايدي هيج اني احس كلبي فجاه يصير
- لاتخافين بنيتي شده وتزول اريدنج هاديه وصابره ماريدن يهزج هالمرض اريدنج تستندين عليه وتتكوين بيه وايدي بايدج ونعبر هالشده وتتشافين اوعدج يرويحتي انتي

كربت راسهه ازيد لركبتي وانه دنجت بست راسهه
وتلمست جتفهه ثلج وشعرهه بعده رطب وخرتهه مني وخليتهه ترتاج ع المخده ..
- لازم تلبسين جسمج ثلج
- خليه فد شويه مابيه حيل هسه
- لاا شني تمرضين هيج انه البسج
- شهاب شنو ماا استحي شتلبسني كافي شايفني هيج
- لاتخافين ماسويلج شي حباب انه هسه
- شهااب
- شمالج بنتي ماراح اكلج
- شهاب عيب عيب شنو تشوفني هيجي اموتك
- زين اكفي راح اطفي الضوا وماشوف شي زين هيج
- اممم دعوفهه هسه كتلك شويه ارتاح والبس
- لااااااا تتمرضين شلون تضلين هيج اجه الدكتور شكله بله !!!
- اففف زين سد البرده هم

ابتسمتلهه وكمت سديت البرده وطفيت الضوا واجيت شلت البجامه لبستهه الهه بالاول وهيه ايدهه عله جتفي وبعدين وكفت كريب منهه وفتحت المنشفه ذبيتهه عله جهه وشلت الفانيله لبستهه الهه وايدي كل مجان اطخه بجسمهه انعم من الثاني
رديت جبت البلوز هم لبستهه وايدهه اليسره من شلتهه علكيف لبستهه .. صح انه ماشفت شي بس الحسيته كلش كافي يوصفلي كل شي ...

-هااا هاي خلصنه بعد شكو
- زين شكراً
- عفواً .. خلي الخاولي براسج لا تذبيه
- ماريييد احب شعري هيج بارد
- بويه اسمعي الجلمه لاتضلين بالعناد
- اففف شهاب
- شنييي شهاااب شهااب جاي اكلج تمرضين حطي عله راسج هم يحتاج نتعارك بيهه
- لاا ماشي ماشي

عفتهه وطلعت شويه اهدي نفسي ورحت للدكتور كتله يجي يشوفنهه حته نطلع .. وهم حجيتله عله الصارليهه .. وهوه كلي خف ايدك عله العمليه
انه لو بديرتي بنفس الساعه اطببهه العمليات بس هنايه تربطت لافلوس عندي ولا اكدر بدون اهلهه

انطاهه ابره ثانيه هم بالوريد وسوالهه تخطيط
ثاني واجه بعدين كالي ..
- تكدر اطلعهه لان كل الي نكدر عليه كتبته الك بالعلاج وهاي الابر تاخذهه عند الحاجه تضربهه
والكارت عندك شوكت متقررون العمليه خابرني

تشكرت منه ورحت ليهه ..
- شلون صارت ام راس يابس
- امممم زينه احسن هسه
- بيج حيل نطلع هسه لو تردين ترتاحين بعد
- لاا طلعني ضجت
- انتي من كلشي تضوجين شسالفتج
- ماحب الاماكن الخنكه اريد اشتم هوا ضجت
- تدللي .. شوفي حلبسج الكوت فوك هذني هدومج
ونمشي
- شنو اطلع هيج مبهذله
- هسه هنه خطوتين للسياره
- يلا هسه هي ضلت على هاي

لبستهه الكوت وشالهه واخذت هذيج ملابسهه وطلعنه وهيه مجلبه بايدي وتضحك ومنظرهه هيج بجامه من جوه وكوت من فوك ومدنفشه بالشال
وضحكه بسيطه تريحن كلبي بيهه ...

اخذتهه للسياره وطول الدرب هيه فاتحه الجامه وتعاين بابتسامه هاديه ونقيه لكلشي ومن نزلنه كالت..
- شهاب ماريد اصعد
- جا وين تردين غير ترتاحين
- مرتاحه ماعليه شي خلي نكعد هناك شويه
- الجو بارد ربى مو زين عليج
- حبااااب والله ضايجه ماريد هم اصعد واضل محبوسه بين اربع حيطان وهسه مو لابسه هالكوت بعد شكو
- بس مانطول

ضحكت ومشت جدامي جان اكو العاب جم مرجوحه وزحليكه بلاستيك ويمهن مصطبات
كعدنه وهي تجتفت وانه اعدلل ليهه الكوت عله ركبتهه عاد جرت ايدي وعكدت حواجبهه ..
- كافي لاتضل هيج قلق وتقلقني وياك خلينه مرتاحين مابيه شي لتخاف
- موش بيدي انتي كلشي عندي ماريدن يصيبج شي ماتحمل
- مو كتلي مدامني موجود ماخلي شي يصيرلج بعد شكو خايف وهاي عندي العلاج وداتحسن لاتضل تقلقني بخوفك هيج

رفعت ايدهه بوستهه وهيه ضحكت وضلت تعاين للمجان وتتبسم وتاخذ نفس قوي وتالي كالت ..
- شهاب غنيلي
- هههههه شغنيلج
- بكيفك كون اغنيه انته دائماً تغنيهه
- هااا ذكرتيني باغنيه تركيه جنت دايماً اغني بيهه هذيج السنين اسمهه شجر الزان ...اكفي حنطيج تلفوني وعايني الترجمه حته تفهمينهه
- اييي يلا

فتحت الفيديو الجنت محمله وانطيتهه وصرت اغنيلهه وهيه تتبع وياي ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

-حيييل حلوه
- هاي جنت اسمع يدكوهه بالكهوه الي براس شارع العماره الجنه كاعدين بيهه اول ماوصلت هناك كمت كل يوم اسمعهه لحد ماطبعت بالي
وجنت اغنيهه وماعرف كل معناهه لحد ماتعلمت
احجي تركي وفهمتهه وحبيتهه ازيد
- يعني تقصد توصفك
- بذاك الوكت كلشش توصفني جانت مثل دوه للجروح بالغربه
- انته ليش سافرت وشنو جروح ؟ مافهمت
- تعاي نطب جوه واحجيلج كلشي

كامت وانه سندتهه وصعدنه للشقه واخذتهه تمددت ورحت تمددت بسدهه وصرت احجيلهه عله سبب روحتي وكلشي صار وهيه جانت هاديه وبس تسمعلي بعدين كالت ...
- بس الولد كلبه طيب
- اي هو غرته الدنيا ومالهه هسه المرض كضى بي والله بالي يمه وكل ليله افكرن بيه
- لعد ماتخابره شوفه خطيه
- ماريدن احد يسمع عنه شي ولهيج كاطعت الكل حته رقمي غيرته
- ميخالف حاجي بس اطمئن عليه وارجع اغلق هذاك الخط
- هم صدك والله كلبي يمه خلي اكوم اتطمن عليه

رحت طلعت خطي القديم وشديته واجتني كومه رسايل من ولد عمي وابوي واكيد وليد حارك الدنيا طنشتهم كلهم ورحت خابرت نعيم ... تطمنت عليه وجان شويه متحسن حسب حجيه وضل يسالني ويني وشني الصاير وياي ماحجيتله شي وكملت مكالمه وسديته للخط وفتحت الثاني ...

رحت سويت شوربه وتغدينه بيهه ولليل طلعت جبتلهه معلاك وتساعدنه بالمطبخ ماترضى تكعد
وثاني يوم اندكت الباب الظهر جنت هستوني راحع من الشغل رحت فتحت جان تطلع هاي البنيه الي شفناهه من طلعنه للمستشفى .. جايه وشايله ماعون كيك ...
- تفضلي خيه حياج الله
- شكراً اجيت اسلم على المدام بارحه عرفت من زوجي رجعتو من المستشفى
- اي والله ..تفضلي اكعدي

رحت صحت ربى وهيه وكفت تعدل بشعرهه وطلعت راحت سلمت عله المره وكعدن سويه
وانه عفتهن وطبيت للحجره وضليت اكلب بالتلفون ادور عله شغل بجم صفحه كلولي عليهه ..
اريد اجمع حته لو نص فلوس العمليه بس مااضل كاعد هالشكل واتصفن عليهه وهيه تضيع من ايدي

وره ساعه اجتي ربى وجابت الكيك وياه عصير
وكعدت ..
- هاا شحجيتو
- هالبنيه كلش حبابه من بغداد هيه بس زوجها كردي منا
- شسمهه
- ليال .. صارلهم سنه كاعدين هنا تكلي ضل بالي يمج من اول ماشفت زوجج شايلج تكلي ضليت الليله كلهه احجي عله زوجي ليش عافكم ورجع
- هااا يعني كلتيلهه احنه متزوجين
- اي لعد شكللهه
- هههههه ماتسوينهه صدك
- ههههه لاااا
- كيفج انتي التخسرين
- اممم اكلك انطتني رقمهه وكالت خاف تحتاجون شي خابروني واذا زوجج طلع واحتاجيتي شي هم تعاليلي .. كالت هيه جانت تشتغل بالاسكان بس من تزوجو عافت كلشي واجتي ويه زوجهه
- اصيله والله .. انتي اذا حبيتيهه اكعدي وياهه تريدين تروحين لشقتهه تدزين عليهه يمج كيفج
- اي والله همزين تعرفت على بنيه هنا ع الاقل اكعد وياهه وكت ماتطلع وماضل وحدي اتصفن
- عليش ماترسمين !!
- ماريد مالي واهس
- تريدين اجيبلج كتب
- لاا ماريد تسلم كلش مالي واهس بيهن هالفتره هيج مثل مليتهن اريد اغير
- مثل شني تغيرين
- مثثثل نطلع للثلج
- لااااا لاااااا لهنااايه وحدج
- حباااااب هسه قابل شكايلتلك هو ثلج وبالشوارع امااانه شهاااب
- بويه تتمرضين واخافن عليج اكعدي وسكتي
- اااااااففف زين نروح الالعاب مو جنت تكلي هنا حلوه العابهم
- خااايبه جا شحجيت هسسسه مو اكلج تتعبين اخاف عليج
- ايييي شنوووو لا هاي ولا هاي يعني اضل بس كاعده مااا اخذني حباب مانصعد بالخطرات
- هنه كلهن خطرات وعاليات وسريعات واخاااااف عليييييج صيري زينه وعود نروح بس مو هسه
- امممم نشوف

راحت وانه كلساع اصيحن عليهه تعوف كلشي ماتسوي وهيه تعاند ونرد نتعارك ونرد نتصافى
تالي جبتهه وكعدتهه بالحجره وكفلت الباب ورحت نمت .. من كعدت الصبح لكيتهه لازكه بظهري ضحكتني من صباح الله .. وانه ايامي كلهه صايره حلوه عبن اتصبح بهالوجه الملايكي .. تلمست خدهه وكمت رحت غسلت وبدلت حته اطلع للشغل
لكيتهه كاعده ورايحه تسوي الريوك ..
- بويه انتي عليش ماتكعدين جم مره اضلن اعيد بالحجي
- يعني هسه شنو شمسويه هو ريوك خما تطلع بدون اكل
- انه اسوي لرويحي شبيه مكرم
- لاا عاد مو هيج كله انته هم خطيه
- هاا شني التغير
-هههه اريد اداريك حتى تطلعني
- اكطعي نفسج من هالسالفه تصيرين زينه وتخلصين علاجج يلا نطلع
- ايي شكو بيهه يخلص العلاج قابل يضل

كعدت اكل وهيه راحت للحجره وبعدين كمت اريد اطلع جان تجيني وشايله بيدهه لفاف ..
- البسه الجو بارد خاف تتمرض
- اي والله همزين جبتي
اخذته وانه البسه هيه تعاينلي وكالت..
- انتبه على نفسك
- صار وانتي علاجج لاتنسي بنيتي
-لا ماانسى هسه اخذه

طلعت وانه كلش نشط وجودهه وياي مصورلي الدنيه غير شكل ..يمكن انه الوحيد المستفيد من هالعركه الصارت واتمناهه ماتفض ونضل عايشين هيج براحه وحدنا ...

بالشغل انه كل مايصيرلي فراغ اطلع صورتهه اعاينلهه واريح نفسي بيهه وارجع اكمل الشغل
لحد مارجعت لكيتهه محضره الغدا والحمام موش مثل اول الكاهه لو نايمه لو مبوزه وضايجه ..
استغربت تغيرهه هاذ ورغم انه نبهت عليهه ميه مره ماتشتغل شي ومتجوز ...
- رببببى
- هاا
- بويه يمتى راح تسمعين الجلمه وتكعدين هسه انه عاتب عليج كايلج نظفي واطبخي بس اكعدي ترجفين كلبي بحركتج هاي اكعدي اكلج ارتاحي اخاف عليج ماريد تتعبين بااابنتي افهمي عاد
- شهاب شبيك والله مابيه شي اصلا كلش مرتاحه
ومسويت شي بس عزلت هيج ع الخفيف وطبخت
يعني شلون مناكل !!!
- انه كاعدلج هنايه واريد اشوفن شلون هالخفيف مالج
- هههه شبيك تعزيل ابني تعزيل يعني ميتعب
قبل جنت البيت كله شايلته شنو ماتذكر
- لااا بويه شلون ماذكر جنتي جنج وطواط ليل نهار تهورفين ولانوم ولا اكل وهاي تاليهه
- هههههه وطواط هههههه اني شكل وطواط
- تصيرين بعيني وطواط من تعاندين ضلي حبابه واشوفج هذيج الحور
- ههههههههه النوب حوووور
- هههه لج امشي امشي صبي الاكل

رحت سبحت وطلعت بسرعه واخذت الصينيه وكعدنا نتغدا وهيه كالتلي راحت يم البنيه وضلن يسولفن ..شفت نفسيتهه مرتاحه ووجهه مورد
اطمئنيت عليهه وكلت من الزين اجتي هاي حته تلهيهه ... كملنه اكل وضليت يمهه بالمطبخ لحد مانضفناه سوه وطلعنه ..
- ربى انه حنام كعديني بالخمسه زين
- زين ماشي
-شراح تسوين
-اباوع تلفزيون
-زين

رحت نمت وكعدت عله صوتهه كمت لبست وطلعت للمحطه خلصت شغل بال١١ رجعت
اخذتلهه وياي حليب فروله كلت هاذ احسن شي لمزاجهه ... تلكتني واخذت العلاكه مني ومن شافته ضحكت من كل كلبهه ...
-شكراااا كلش فرحتني بي
- هههه  اشبعي جبتلج باكيتين
- ايييي تسلم تسسسلم

طبيت ذبيت هدومي بالحمام وغسلت وطلعت جابتلي العشه وكعدنه ناكل وهم رحت وياهه للمطبخ من انه موجود ماعوفهه وحدهه باي شي
وحته من اطلع يضل بالي يمهه كل مااكول اجيبلهه تلفون والنوب اكول ادري بيهه تروح تحاجيهم واعوفه ...
جنت متمددواكلب بالتلفون وجان تجيني ..
- شهاب اشو ملابسك بيهن ريحه بانزين
- اي عادي عوفيهن
- انته وين دتروح كل هذا الوكت
- اشتغل موش كايلج
- احجيلي الصدك انته تشتغل شغلتين لو مثل ماحجيتلي قبل  كولي شهاب بدون جذب
- لا اشتغل شغلتين ..وهاي الثانيه شفت ليلي بالمحطه مال بانزين
- شهاااااب
-هاا شكو
- يعني ليش تشتغل هيج ليش داتعب نفسك هيجي
واني عايفتك تروح لان اكول شغلك هذا وخاف ميقبلون والله لو ادري ولا اخليك تتعب نفسك هيج
- بويه لا تعب ولاشي حاله حال اي شغل
- بس انته دترجع تعبان من الصبح تطلع وترجع هم بليل ميصير هيج
- بويه احنه زلام هالسوالف نطكطك بيهن لا تخافين ماعليه شي
- شهاااب عوف واحد منهن عفيه لاتضل متعب نفسك هيج علمودي هسه مو عايشين مرتاحين وممعتازين شي ليش هيج داتعب لتضل تفكر بيه اني ممحتاجه شي
- تعاي ليه بويه تعااي .. عليش هيج خايفه تره انه كبل جنت اشتغل كله هيج وادرس همين انه زلمه ماعرف اكعد واحط رجل عله رجل افهمي هالشي بنيتي موش علمود شي بس انه ماحبن الكعده ولاتنسين ورانه ايجار والمصرف يعني اضل كاعد منين نجيب هاا جاوبيني
- اففف افف .. زين يعني مدا تتعب الله عليك
- من اشوفن اهتمامج هاذ انسى كل التعب

ضحكت ودنجت خجلانه وانه اعاين لينهه واتمعن بهالتفاصيل السحرتني من يوم يومهه ..
رحنه سويه نفرش اسنونه وانه اتحارش بيهه واشاقيهه وهيه حلكهه كله وغف مال معجون وبعدين تعاركنه بالفرش سويناهه مثل السيوف ونعتارك بيهن .. وتالي رحنه نمنه ..

وثاني يوم الصبح هيه كعدتني وتريكنه سوه وطلعت للشغل وانه مرتاح ضحكهه وراحتهه
هالشكل تنعشني .. لليل كملنه العشه جان تكلي

- شهاب راح يصيرلي شهر ممداومه والامتحانات شلون بيهه ماريد اخسر هاي السنه حباب
- جنت افكر بهالسالفه وردت اكلج وانتي سبكتيني
اريد اروحن لكليتج واخذ التقارير واسويلج اجازه
واخليج بس عله كد امتحانات نص السنه تروحين
شفت هاذ احسن حل لين صراحه رجعه لبغداد ماكدر عليهه عبن رادلهه هواي وكت حته انرتب امورنه وانه ماكدر اعوفج وحدج واضل رايح راد
بين بغداد واربيل صعبه
- لا هاهيه حلك حلو بس كون يقبلون ومايطلعون بسالفه صفح
- لا ان شاء الله تسهل
- زين واني عندي مشروع للتخرج لازم اسوي
مجسم ومخططات واكتب البحث عليهن هاي شلون !!
- هاي خليني افكرن بيهه هم والكالج حل
- اممم اووكي مدامك تطلع هيج حلول زينه فكر على راحتك .. بس شوكت تروح
-  باجر اترخص منهم وعكبه اروح بس بالي يمج شلون تضلين وحدج
- ماعليه شي اروح يم ليال
- وزوجهه يمتى يجي !
- بالخمسه مرات بالاربعه هيج تكول
- يمتى مايجي انتي تردين هنايه زين
- ماشي تدلل
- صايره حبابه هااا
-  مو صوجك والله
- هههههاااااي تعاي بويه اتشاقه يمعوده

راحت للمطبخ ولحكتهه وضليت اشاقيهه وهيه ساعه تصير عصبيه وترد تضحك ام كلب الفطير

ثاني يوم ترخصت من صاحب الشغل اثنينهم وبالليل هيه نامت وانه كضيتهه اتصفن بيهه واشمن بشعرهه اهجس روحي تثكل بس يجي طاري البعد عنهه ...
طلعت من ساعه ٣ ونص حته اصل ويه دوامهم
وهناك رحت حاجيت رئيس القسم مالهم وضل يحجي عليش هالغيابات ومنطيهه جم انذار وفصل اولي همزين تلاحكت واجيتهم .. شوفتهم التقارير
وكلتلهم عدهه عمليه وبعدهه باربيل وهمه من شافو تاريخ وتاكدو عاد لانو شويه وضليت اركض هنا وهنا ع الاجازه هاي ... وجانت سالفه يرادلهه
روحه للعميد والعميد ماموجود وضلو يتفلسفون براسي .. عاد رحت سديت الباب وكعدت ويه رئيس القسم كتله ....
- عمي الله بالخير ... شوف حالتي انه طالع من ٣ الفجر من اربيل وهاي صارلي ساعتين اركض هنا وهنا علمود اجازه ومحد راضي يسهلهه زين انتم تشمروني ليم العميد هوه انه اعرفن يمتى يجي
شلون بالله اعوفن البنيه هناك مريضه ووحيدهه واضل اركض وراه حته يوقع !! ماتسووهه تسهيل امر هسه شريدن منكم موش شفت بعينك وتعرفون بيهه مريضه وهاي شدتهه صارت شلون تخسر السنه !!!

- اكعد واهدء ونحلهه ان شاء الله

- الله يخليك استاذنا الرحمه حلوه وهيه شاطره
وهاي سنتهه الاخيره غير تطك وتموت اذا انفصلت لو تضيعن عليهه السنه من يمك سهل امر

- يعني هسه شكد تريد اجازه

- هيه موش شكد اريد هيه ماتكدر اداوم كلبهه تعبان ووراهه عمليه يعني سالفتهه مطوله انه اريدن بس تمشيلي الامور لحد امتحانات نص السنه .. تره كلنه جنه طلاب وشايفين هيج حالات بعد عليش مصعبيهه

- زين زين خليك انتظرني ارتب كم شغله واجيك

راح مدري وين وانه ضليت كاعد بمكتبه وانتظر بي وره نص ساعه رجعلي وكال..
- هاهيه دبرت شغلتك
- ماكصرت الف رحمه عله والديك .. والاساتذه
انطيتهم خبر
- اي اي هاي السالفه يمي بعدين نحجي بيهه
عدنه اجتماع وناقش بي هالامور بس خلي تشد حيلهه للامتحان
- اكيد ان شاء الله ...

تشكرت منه وطلعت وانه احمد ربي واشكره يسرلي امري ... طلعت كبل لاربيل ...
وصلت بالليل وتعباان فد نوب ..

تلكتني بوجه مبسم ومحضرتلي الحمام .. الحلو بيهه من تشوفني راجع من شغل او من درب طويل
ماتكعد تحجي وتسأل تسويلي كلشي وتخليني ارتاح
وتالي يلا تسولف ...

عاد سبحت وطلعت حطت الاكل وتعشينه سوه
وانه كتلهه ..
- دبرت السالفه بنيتي
- جنت اعرف راح تقنعهم كلش جنت مطمئنه لروحتك هاي .. سبع والله ماقصرت بشي
- ماكصر ويه روحي انه بويه
- هههه .. مبين عليك التعب تريد افركلك ظهرك
- اييي والله اهم شي جتافي تشنجت بعلي
- زين كمل اكل وافركهن الك
- شني هالدلال كله بويه
- ههههه مو انته مدللني بكلشي ودتتعب وياي لازم اردلك بالمثل
- اريدج سالمه وكون ماتتعبين نفسج بشي هيج ترديلي كلشي
- ان شاء الله

كملت اكل وكعدت شويه بين ماشربت الجاي وكلبت بالتلفون شويه وعاد رحت للحجره نزعت بلوزي وتمددت عله بطني واجتي جابت الفكس
وكعدت تدهنلي ظهري وجتافي وركبتي وانه شويه شويه كمت اغفي ونمت عله هالحال ...

وثاني يوم مادري شلون كعدت عله صوت يمي فتحت عيني وشفتهه تطلع ملابس من الكنتور
- ربى بيش ساعه
- بالعشره
- خرررب بحظج لج عليش مكعدتيني
- شنووو ماكو شغل اليوم مو جاي تعبان اكعد هنا وارتاح
- رببببى موش تعرفين انه اتفكت ويه الولد بس يوم شلون ترديني اضل
- وشراح يصير يعني .. والله ماكو طلعه اليووم خليك وياي شهاب عفيه والله انقهر عليك منا راجع تعبان وطريق طويل وشغلك يتعب وهم تريد تطلع بالليل مايصير هيج والله تره ماراح نموت من الجوع اذا ارتاحيتلك يوم
- اذا انفصلت من الشغل اجي العب بيج لعب فهمتي
- هههههه مااااشي .. تكوم تتريك لو تكمل نومتك
- لاا يانوم بعد
رحت وياهه سوينه الريوك وكعدنا ناكل وبعدين
اجتي جابت الملابس وحطتهن عله القنفه تريد تعزلهن وانه ضليت احجي عليهه ..
- انتتتتي ماتجوزين جم نووووبه كتلج لاتضلين اتعبين نفسج اكعدي ارتاحي
- ياا شهاب يعني شلون تضل الملابس مشروره مانجمعهن
- انه اجمعهن وانتي صفطي هيج المفروض يصير
ماريدج تشيلين سلات ولا تتعبين بالمسح والكنس
افهميهه عاد بطيتي كلبي
- هسسه شبيك قابل الشغل راح يموتني
- لااااا انتي بجيج وحزنج الضامته بكلبج هو اليموتج
- بجي ؟شوكت باجيه
- شني انه شفت تبجين يمكن ..يمتى والله نسيت
هاا يمكن بمالت الحمام لاا موش هاي مره ثانيه
- شوكت اتذكر شهاب
- يالله راحت من بالي بس انه شفتج بالعباس جنتي تبجين مرتين شفتج
- هههههههههههههههههه
- هييي شمالج بنتي شجاج

ذبت الي بيدهه ركضت حضنتني وباستني مرتين بخدي وهيه تضحك .. انه ضليت بين المصدوم وبين الفرحان بيهه ماعرفن حيل تفاجات وهيه جانت محاطه ايديهه وره راسي وتضحك وتعاينلي
عاد جريتهه كعدتهه عله رجلي وكلتلهه...
- شني الصار فهميني
- اني ماباجيه تره
- بس انه شفتج
- ههههه بس مو من صدك
- يعني شني
- ههههه شهاااب
-شننني احجي
- الفجر تذكره ههههههه
- يعني .... لاااا عليج علي هاي شربطهه بهاي يعني متاكده متاكده مابجيتي
- ايي
- يعني هاذ كله من .. من هذاك الحجي والمدري شني الحد هسه مفاهمه
- ههههه ايي هو هوووه
- هههههااااااااي هااااي شلون ياربي سبحانك بس بطلي ضحك وفهميني وحده وحده
- شوف هو اني مابجيت بس بصراحه جنت مقهوره وبداخلي حزن تعرفه انته يعني اني احاول اتناساه بس يبقى موجود واذكره فانته مو تقربت مني واحساسك هو بالاصل عالي وياي فكمت تشوفني ابجي يعني هذا انته دتشوف حزني وتعبي بهيئه بجي مني دتفهمني يعني احساس اترجم بصوره
- هااااااا
- ايي هسه انته مو متتذكر شوكت شفتني ابجي بس متاكد من هالشي هاي صوره بالك اجتي ترجمه لاحساسي الي يصيرلي
- حلوووو حلوووو وهاي بعد كل مايصيرلج احساس انه اشوفه
- مو دائماً بس بوكت تعبي
- وشلون يصير هيج
- شنو نسيت اني شنو انطيتك مرتين مو كتلي مزج روحي ويه روحج عبالك هي بس كلام !!
- يعني صارت من صدك!!!
- بعدهه مو كلش بس بدات تصير
- وانتي عليش فرحتي هيج بيهه
- فرحت لان ماجنت اتخيل راح تصير عبالي الشي الجنت افكر بي خطا بس هسه لااا تاكدت ان كل ظنوني صح بصح
- زززززين ماصار الوكت نكعد ونحجي كلشي من الاول
- لااا شهاب شوكت حتخلصني من سالفه احجي
يعني مافهمت اني اخليك تفهم لوحدك وتشوف بعينك الي عليه بس افسرلك كم شغله مبهمه
- يلااااا عمي ماشي راضين ... تاليهه نعرفهه وين تروح يعني
- اي بدا كلشي يجي ترقب بعد وبعد اخبلك والله ههههههههه
- هوه انتي تحارشتي بيه اليوم فهسه انه الاخبلج
- لاااا
- شننني لا انه كتلج اذا تحارشتي بيه اتحارش بيج بعد شكووو
- بس هاي فرحه مو تحرش
- تحرش بويه بيهه بوس ومحاضن شتردين بعد
- دعوفني لعد خلي اكوم
- ووووويييين خلي اخذ حكي
- شهاااب

ماخليتهه تحجي شي وجريتهه لصدري وانه ابوسهه بوسه متعطش وبالكوه متحمل كل ماتريد تفلت من ايدي ارجعهه اكوى .. ورفعت ايدي غمضت عيونه ورجعت ايدهه وره راسي وضليت مطول وياهه لحد ماخليتهه تتجاوب وياي بكل هدؤها ... وتالي كمت شلتهه بين ايدي واخذتهه للحجره ......
.
.
يتبع
😛😛😛😛