تحميل رواية «من غير ما ناخد بالنا» PDF

_ الساعة 6 يلا

بتقولها وبتقوم تلم حاجتها، رفعت عيني من على اللابتوب وببص للورق الكتير إللي قدامي وبعدين ببص لها :

_ أمشي أنتِ، أنا لسه قدامي شوية

_ كملي بكره، عشان مش هتعرفي تيجي لوحدك.

رفعت حاجبي باستغراب:

_ مش هعرف اجي لوحدي فين

اتسعت عينيها بصدمة، وقالت:

_ ايه ده أنتِ نسيتي، مش أنا قولتلك أول امبارح هنخرج

خبط على دماغي بإيدي بخفة:

_ أوف سوري نسيت بس أنا لسه مافكرتش

رهف ماردتش وأنا رجعت ابص في اللابتوب تاني، اتفاجئت بإيديها مسكت إيدي عشان أقوم

_ يلا يا ما أنتِ لسه هتفكٌري.

_ ثانية طيب ألم حاجتي

لمّيت حاجتي، وخرجنا أنا وهي من الشركة، وركبنا العربية ورهف شغّلت أغاني وساقت بأقصى سرعة كالعادة

وصلنا المكان بعد فترة، نزلنا ودخلنا الكافيه، المكان انواره هادية وصوت الست أم كلثوم مالي المكان وصور فنانين متعلقة كلاسيكي أوي، الناس إللي فيه هادية ماعدا ترابيزة قاعدين عليها شباب وبنات وصوتهم وصوت ضحكهم عالي، ودي إللي رهف ودّتنا عندها .

رهف بابتسامة:

_ هاي يا جماعة

كلهم بصّوا لها وبعدين نظرتهم اتحوّلت عليا وبصّولي باستغراب

_ لمى صحبتي و هتبقى صحبتكم إن شاء الله

رحبوا بيا جداً ماعدا واحد قاعد هادي وكان بيبص لي بنظرات كأنه يعرفني أو شافني قبل كده، بدأت تعرفني عليهم، أبتسمت رهف وهي بتشاور عليه وقالت:

_ ده بقى أنس أخويا وصاحبي وجاري أنا وهو صحاب من الطفولة

ابتسمت وأنا بحاول اندمج معاهم، قعدنا شوية وقومنا نمشي، ركبنا العربية

_ اتبسطي يا لوما ؟

قولت لها بابتسامة:

_ جداً اليوم كان حلو أوي

ابتسمت رهف، وقعدنا نتكلم لحد ما وصلتني البيت، نزلت من العربية

_ هنروح بكره الجيم ولا اي

_ اه طبعاً متتأخريش بس

رهف بابتسامة:

_ اوكي سلام يا حب

_ سلام

طلعت السلم بخطوات سريعة جداً، دخلت الشقة لقيت ماما بتصلي، دخلت خدت شاور واترميت على السرير بتعب.

ــــــــــــــــــــــــــــــــــــــــــــــــــــــــ

لا اله إلا الله وحده لا شريك له له الملك وله الحمد وهو على كل شيء قدير

|تاني يوم الصبح|

قومت بدري جداً عشان نروح أنا ورهف الجيم، لبست لبس الجيم و خدت معايا هدوم خروج في الشنطة عشان مش هلحق اجي البيت أغير للشغل وحطيت كحل وملمع شفايف، وخرجت لقيت ماما بتحط الفطار على السفره

قولت لها بابتسامة:

_ صباح الخير

_ صباح النور يا لوما

قعدت ودورت بعيني في الشقة وقولت:

_ أومال فين لمار

_ في الكلية

_ أممم

رهف رنت عليا فقولت وأنا باكل آخر لقمة وبعديها قومت:

_ همشي أنا بقى

ماما بصت في التليفون وقالت باستغراب:

_ لسه بدري على معاد شغلك

_ لأ ما أنا رايحة الجيم الأول

_ ماشي خلى بالك من نفسك

بُست رأسها وقولت وأنا بلبس الكوتش:

_ حاضر يا حبيبة قلبي

نزلت بسرعة لقيتها قاعدة في العربية وماسكه التليفون، ركبت وقولت بابتسامة:

_ صباح الفل

قالت رهف بابتسامة:

_ صباح الورد

وصلنا بعد فترة، نزلنا وطلعنا وكان مشترك قولت لها وأنا ببص على كل حته في الجيم:

_ أتمنى ننتظم بس

_ ياريت بجد وأحسن حاجة أن هو جمب الشغل مش هنتأخر يعني

_ مين اللي قالك عليه

_ أنس

قالت كده و لقيناه قدامنا، بص لي لثواني بنظرات مش مفهومة، فركت في إيدي وبصيت للأرض، مد إيده لــ رهف وقال بابتسامة:

_ رهوف عاملة إيه

مدت إيدها وقالت بابتسامة:

_ الحمدلله أنت عامل إيه

_ الحمدلله

بص لي ومد إيده وقال بابتسامة:

_ عاملة إيه يا لمى

ابتسامته كانت حلوة اوي، ببتسم وبمد إيدي:

_ كويسة الحمدلله

أول ما إيدي لمست إيده حسيت برعشة خفيفة

_ المكان حلو اوي

قال بابتسامة:

_ كويس إنه عجبكم اسيبكم بقى

ابتسمنا وهو مشي وأحنا روحنا نتمرن وبعد ساعتين مشينا عشان كان فاضل على الشغل ربع ساعة

ـــــــــــــــــــــــــــــــــــــــــــــــــــــــــ

ربنا آتنا في الدنيا حسنة وفي الآخرة حسنة وقنا عذاب النار

فتحت الباب لقيت ماما قاعدة بتقور كوسة وبتنجان، رميت الشنطة والمفاتيح على السفرة وقعدت قدامها ورفعت كمام البلوزة

وقولت بحماس:

_ هاتي هاتي أعمل معاكي

_ هتعرفي

قولت وأنا باخد بتنجانة:

_ عيب عليكي يا ماما … بقولك صح خالتوا كلمتني وقالت لي بتتصل بيكي تليفونك مقفول قولت لها أنا في الشغل

_ تليفوني كان فاصل ولما فتحته كلمتها

خرمت بتنجانة حطيتها جمبي عشان ماما ما تشوفهاش ولا أكن عملت حاجة

_ أمم وكانت عايزاكي ليه بقى

_ عشان تأكد عليا معاد خطوبة ريتاج … أومال هتجيبي عربيتك أمتى من الصيانة

خرمت تلات بتنجانات وحطيتهم جمبي وأنا ببص لها بخوف ومسكت كوسة وقولت:

_ مش عارفة هكلمهم بكره كده

_ أومال فين اللي أنتِ عملتيه

قولت بخوف:

_ جمبي

_ هاتيهم طيب

بلعت ريقي وطلعتهم من جمبي براحة وماما بصت لي بابتسامة وحطيتهم في الطبق إللي قدامها، قربت الطبق منها ولسه الابتسامة على وشها، ضربت على صدرها بصدمة لما شافت البنتجان مخروم

رفعت بتنجانة وقالت:

_ هو ده إللي عيب عليكي يا ماما هناكله إزاي ده

قومت جريت على الاوضة وقفلت وقولت:

_ خليليه خليليه

قالت بغضب:

_ ده أنا إللي أقوم أخللك دلوقتي يا لمى يا رب أعمل ايه بس

ضحكت وطلعت بيجامة ولبستها وقعدت على التليفون

ــــــــــــــــــــــــــــــــــــــــــــــــــــــــ

اللهم صلِ وسلم وبارك على سيدنا محمد

|في شقة أنس|

دخل أنس وقعد على الكنبة بتعب، خرجت أمه من المطبخ لما سمعت صوت الباب بيتقفل

_ اتأخرت كده ليه

قال أنس وهو بيقلع الشراب:

_ عشان ماروحتش الشغل وروحت الجيم

_ ماشي يا حبيبي كلت ولا احط لك تاكل ؟

_ كلت مع أحمد

سكت ثانية وقال:

_ بابا جه ولا لسه ؟

_ لسه أتصل من شوية وقالي جاي

قام بتعب وقال وهو بيدخل الاوضة:

_ حلو ممكن لما يسألك راح الشغل انهاردة قوليلوا اه راح

اتنهدت أمه وقالت:

_ انتوا هتفضلوا كده لحد أمتى

_ لحد ما يقتنع

رفعت إيدها وقالت:

_ ربنا يهديك يا أنس يا رب

ــــــــــــــــــــــــــــــــــــــــــــــــــــــــ

لا اله إلا أنت سبحانك إني كنت من الظالمين

|تاني يوم الصبح|

قومت على صوت المنبة قفلته ولقيت لمار نايمة استغربت أنها لسه نايمة المفروض عندها محاضرات بس قولت يمكن مش هتروح انهاردة، قومت غسلت وشي ولبست لبس الجيم وخدت هدوم معايا وحطيت ميكب خفيف وخرجت لقيت في المطبخ، دخلت لقيتها بتعمل الفطار

قولت وأنا باخد خياره من الطبق:

_ صباح الورد يا ورده قلبي

لفت ماما بصت لي بقرف وقالت:

_ صباح الزفت على دماغك

روحت لها وبُست خدها وقولت:

_ خلاص بقى يا وردتي ماكنوش خمس سبع بتنجانات

بصت لي وماردتش، فقولت:

_ خلاص بقى هكلهم

_ ده لو اتحشو أصلا

لسه هرد عليها لقينا لمار بتصوت، خرجنا بسرعة لقيناها بتجري في الشقة وهي بتلبس بصت لينا وقالت بعصبية:

_ ماحدش صحٌاني ليه

ضحكت على شكلها، ماما قالت:

_ أهدي طيب أنا ماعرفش أنك هتروحي

قالت لمار وهي بتلف الطرحة:

_ أنا مني لله عشان ماحطيتش تليفوني في الشاحن

ماما اتنهدت ودخلت تكمل الفطار وأنا بصيت في الساعة واستغربت إن رهف ما اتصلتش لحد دلوقتي، أتصلت بيها وأول ما فتحت

_ ألو يا بت أنتِ فين

ردت عليا بصوت كله نوم :

_ في إيه يا بت ده لسه بدري على الشغل

غمضت عيوني وقولت وأنا بحاول ما اتعصبش عليها:

_ والله يعني مش المفروض نروح زفت الجيم

_ إيه ده نسيت طب استنى خمس دقائق وهكون عندك

قولت وأنا باخد المفاتيح من على السفرة:

_ لأ مع نفسك يا ما أنا همشي سلام

_ ماشي يا جزمه سلام

نزلت ووقفت شوية لحد ما لقيت تاكسي شاورت وركبت، بعد فترة وصلت نزلت وطلعت وأنا مش عارفة المفروض ابدا بإيه لقيت مشاية فاضية روحت وقفت عليها وشغلتها بعد شوية لقيت أنس بيطلع على المشاية إللي جمبي بصينا لبعض ثواني

فقال بابتسامة:

_ لمى عاملة إيه

_ الحمدلله وأنت

_ كويس الحمدلله أومال فين رهف

قولت من غير ما ابص له:

_ جاية

هز رأسه وشغل المشاية بسرعة عالية جداً استغربت بصراحة بس قولت يمكن متعود بعد شوية تعبت وقعدت أرتاح لقيته جه قعد جمبي وبينهج جامد، كان معايا ازازة مايه طلعتها ومديت إيدي لي أبتسم وخدها

كل شوية يبص عليا كأنه عايز يقول حاجة بس متردد، تجاهلته وبصيت في التليفون لقيت لسه فاضل على الشغل ساعة

لبست شنطتي عشان أقوم أشوف أعمل ايه تاني بس قبل ما أقوم، قال:

_ ما تجيبي رقمك