رواية منطقه 13 الفصل الثالث عشر 13 - بقلم mem141162

المنطقه 13
للكاتبه مريم السعدي

.............🍁.........

حسيت وخالتي تدللي بالسايق وهو يدردم
شجابني اني هنا لو ادري مماخذ العشره

محد كلك ترضى اني سالت وانت رضيت شوي شوف طريقك

هاي هنا كلها عصابات اصلا محد يفوت شون عايشه هنا انتي
لا هنا ماكو اني اعرف دربي لتخاف حيفن الشارب شثخنه على وجهك

سكت واني اباوع عالشارع بس اشجار وترابه حتى مو اشجار مثمره لا بس مجرد منضر وممرتبه متروكه وكتفرقه واكو مجمعات بدو الناس يقللون حدما كمنا منشوف ناس بس جول
ابو التكسي وكف
كال

اني لهنا. حدي شمدريني مو علاسه انتي جاوبته خالتي بنتره

دمشي عيني دمشيييي شبيك ينعلس لاخلقه ولافلوس ولاسياره بيها خير

مااكدر امشي بعد نزلي وباوعلي بقلق باوع لخالتي
هذي بنتج

وانت شنو شلك خص

خاف انتو عصابه تجاره الاعضاء وماخذين هالطفله من الشارع

معلليك اكولك
تحجي وتفتح جنطتها بعصبيه باوعلي السايق عاكد حاحبه همس،عمو شتصير منج المره

خالتي جاوبته واباوعله مايسه. جر نفس ودار وجهه طته خاله الكروه ونترت
عساك متهنيت بيها امشي يمه امشي

نزلت وياها وتعبت من المشي اباوع لنعالي. -- مكرم السامع
صفحه مشككه وطالعه اصابعي سوده من التراب وضعييفه رجلي. حيل احس بس هيكل وصايره هلكدوتها عبالك بالشمس بينت اكثر ضعفها. الدنيا صارت نار حاره كلش وخالتي تمشي وتنهد وهي سمينه ومكرمشه عيونها منه الشمس وصلنا مكان بي رجال عده ستوته يجمع مثل الاغصان اليابسه مال اشجار من الكع ومخلي حزمه شكبرها عالستوته حجت وياه خالتي

وبيانه يعرفها كلها صعدو اوصلكم ويباوعلي ويباوع لخالتي. همس
عليله هاي الصغيره
شويه مالها خلك درد اوديها يم نعيمه
اصعدي اوديج

صعدنا وصلنا لمنطقه بيها فرع صغير وحتى تنور طين بيها فرع بي اربع بيوت وواحد منهم جينكو جرتني خالتي ومشينا طبينا لبيت من البيوت جانت بابه تك واحد مكسوره ومايله على شعرايه وتوكع بالكع وحتى اذا وكعت متاذي احد لان ماكلها الزنجار فتحت الباب خالتي وطبت صاحت
نعيييمه. وينج ام حمادي
جاوبت المره هله هله بحجيه ضجاوي

هله بيييج بالمهلي
وطلعت المره وجهه ازرك ومطكع وجوه عينها اسود حيل وربطتها مبزكه ووياها طلعو خمس جهال يطلعون اصغر مني كلهم حفاي وهدومهم مشككه واحد منهم وجهه ملفوف بوصله سوده تك عينه

وبوستها لخالتي ورحبت بيها بحيل صدر

صبينا البيت كله غرفه وحده وحمام بي دجه ومنور حتى بالمنور جان اكو جاهل نايم رغم المنور مفتوح سكفه اباوع بالوجوه كلهم وصخين وشعرهم مفتل باوعت لخالتي تحجي
جبتلج هاي البنيه امانه نعوم. سنه سنتين واخذها منج وبين يوم ويوم اجيج اجيبلج خوش مصرف بس ديري بالج عليها يتيمه تره
خوما وجعانه
لا مبيها شي ديري بالج عليها
اي بعيوني تعاي يمه اشوفج
صدقه لمحمد هاي تنكرط ضحاوي. شتصيرلج
ااا عرف اعرفها مالج دخل

يعني تجهزيها للشغل احد رايدها اله. يعني
مادري هسه دديري بالج عليها نعوم تره تخسريني
لالا يمه لا هو اني اكدر بلياج. لو ماانتي اكدر اخلص من السكير اني وجهالي
ديله رايحه اني بطيت هواي عالبيت
مليكه- جلبت بخالتي ماعرف ليش هلكد خفت باوعتلي تبسمت
يمه هنا احن عليج من بيت عمج لتخافين وذولي مثل اخوتج جهال يونسوج

جتي بنيه يمي جرتني من اديه كالت
تلعبين وياي توكي
كمت وعيوني على خالتي مالي غير حل ولااعرف افكر ولااني المركزه من وره الجوع والفقدان. الصابني رحت وي البنيه جان اسمها جنه لعبنا وتضحك تونست شوي وصاحت امهم
يله. تعااالو بس بصوت عالي يخوف كلهم انجمعو وجيت وياهم شفت صينيه بالكع بيها ثريد. خبز احمر والجهال التمو وكلهم بدو ياكلون بديهم لاغسلو لا بخاشوكه. رغم جوعي بس لعبت روحي بس مكدرت توني اكل لكمتين والصينيه خلصت. جنه كالت
يووم لساتني جيعانه

نترت امها
وووبرررص ماتشبعين. كومن يله عالبيت تنضفنه اريده يلك.
وكامن الام نامت والولد طلعو واني وياهم انضف تنضيفهم يخزي

بعد منا اكو وصخ
حشكي جوه افراش عليش متعبه روحج
مو يصير نمل
هو كله نمل ويضحكون
بقيت صافنه. نمت يمهم دنيا مغرب وكهرباء ماكو متت حر بس غفيت من تعبي. كعدت من النوم الصبح عالصياح. مال ام وكمزن البنات. جنه والاصغر منها

كومن امي متخبله

كمنا باوعت تلفون معلك موبايل شعجب عدهم من انتبه ديدك مكتوب حجيه ضحاوي خفت امد ايدي والام تصيييح بعلو صوتها

عبالك مخبله واسمع مصايح الولد
اخر نوبه يمه والله اخر نوبه

مديت راسي شفتها تجويهم لو روحي طلعت تخلي السجينه بالتنور وتجويهم

بله وعي صيحت
لالا خطيه. والله خطيه.
والتفتت عليه خزرتني جنه جرتني وهي ركضي ورايه عبالك مخبله. مو صاحيه ولزمت ايدي بقوتها حسيتها طكت من ضعفي بيدها وخلت السجينه على ايدي نار هي عيطه وهي روحي اغمى عليه. متحملت بعد جوع والم. حسيت بجنه تصحى بيه

وحدنا بالمنور وصنطه والجهال يشهكون يمي كلهم مجويتهم كلمن بيده كم اثر بس اني اثر واحد مبطبطه. وجنه تهفي بيدها

همست اسكتي

وينها

راحت بيت شارد كبالنا

وانتو شون تتحملون هيج

راح نشرد انه وياهم.
وين ترحون عزه

تجين ويانا

بقيت صافنه عليه. عيونها وكحه وسبعه كالت
تجين لو تضلين هنايا
هي هاي امج
لا
لعد منو
احنا لمونا من الشوارع. كل اسبوع يهدونا. نجدي وبليل. يلمونا

ووين تردين ترحين وياهم

لاهل الرحم اهل الرحم هواي

منو يلمكم

واحد اسمه منذري. هو لمانا. وعلي وغازي. اهلهم نطوهم مايردوهم. وورده. امها ذبتها بالطرف. بالبستان. وجابوها مكمطه

بلعت ريكي واباوعلهم يتصفنون علي وغازي وكحين كلش كالو

مااضل بليل بليل نهج. نضل نمشي لون مانصل

جان يطلع عمره ب١٠ سنين بس كلش ميخاف

والتلفون رجع دك
باوعتلهم
هاي خالتي
شدراج
اني قريت
وانتي تعرفين تقرين

اي اعرف عفيه جيبو اخابر خالتي
يعني ماتجين ويايه
لالا اخاف اني
كيفج
كامت جنه جابت التلفون بسكوت وترجف وتهمس بسع بسع ياله. قبل لاتجي خابرت دكتين وردت الو نعوم
خاله وبجيت بقهر خاله فدوه فدوه تعالي اخذيني. موتتني جوتنا كلنا. الله يخليج تعالي اخذيني

كالت جايه جايه اليوم انعل والديها

وسدته واخذته مني وردته لمكانه اشرتلي لاتكولين لخالتج. احنا نريد نشرد

لامااحجي بس عفيه خاف يكتلوكم
احنا كل يوم ننكتل وذيج النوبه بنيه نرجس ماتت. لان جوتها ببطنها

عززه بعيني
شفتي مو جاي اكلج. نشرد لوين مالله عده كاع. مو عليوي
اي انه وغازي نباريكم فد شمس نعوفها لونها تريد حليب وانه مااكدر
شمس الطفله. بالكماط.
علي -- غازي-- جنه -- ورده -- شمس
ضحيه عمل الزنا. ضحيه الحرام. او ضحيه عوائل مفككه. دفعو ثمن تفككها من صغرهم همه. جنت اشوف بعيونه الخطط هو وغازي غازي اصغر منه باشهر او سنه مو هواي لان نفس الطول والضهريه. كضوها. تبشبش وعقاب الهم. بس غده سوت مركه وخبز اكلو اكلت هواي بيومها لان جوعانه حتى محسيت بطعمها من جوعي.

للعصر وطبت خالتي. جانت نعيمه توها طابه. من بيت شاري وتفاجات بيها خالتي محجت شي كالت جيت اخذ البنيه
ونترت نعيمه
ليش ياا شبيج ضحاوي
لا جيت اخضها يردوها اهلها بطلو

كيفج كمت متردده خايفه على روحي وعلى جنه اللي ماكضيت وياها غير يوم بس شكد خفت عليها بهالبيت نسيت الصلاه والعباده نسيت كلشي دالبس حجابي ركض ركض بوستني جنه وشاورتني

ماراح انساج وراح ادعيلج الله يحفضج

ابتسمتلي كالت
تتوقعين نكدر نشرد
تذكرت تراجيتي شكد عزيزه عليه نزعتها من اذني جانت ام السله وخليتها بيدها واتلفت
هاي ذهب. جنه بيعوها تجيب فلوس هواي

همست باذني وقبضت بيدها عليها

رايحين. لمقام ال----
مقام امام من الائمه قريب عليهم. مااكدر اذكر اسمه لان ينعرف موقع المنطقه اعتذر

رايحين لذيج المنطقه. ونكول الهم نريد نخدم ونحجيلهم قصتنا بلكن الله يلفونا

متاكده مراح يعوفوكم

انه كلت لعلي اغسل حمامات فد ماريد افتر بالشوارع وهاي تجوي بيه

انشاء الله

بوستها وطلعت واباوع لعلي وغازي حسيت القلق بعينهم والتحلف لنعيمه. جان يشكي لخالتي. وخالتي تكوله شسويلك يمه هي هاي حياتكم لعد من ذبوكم
م اهلكم شتضن تصير سكت وباوع لنعيمه جرت عينها كالت

عباله اكوش غيري يلفي ترد ليحاي لون ماوين طرت خلها ببالك علاوي ترد ليجاي محد يلفي احد

طلعت مهزومه بروحي ووي كل خطوه. امشي اذب كومه دموع صار عدي هم جديد جنه والجهال شنو راح يكون مصيرهم

وصلنا. مثل. العرصه. بيها كم محل. ملابس مخضر وريحه طليان. كلش قويه. وطبت خالتي كالت

نشتريلج هدوم. جانت عيونها حايره. طبينا للسوك اي فرحه ماعدي حايره لحيرتها. كلسا اكول هسه يصير انفجار واموت مثل بابا واخلص هسه الله ياخذني عدهم شعدي باقيه محد يكدر يبقيني عده محد يريدني. طبت خالتي للسوك على ابو محل ووكفتني على صفحه ساعه تتوسل بي يباوعلي ويهز براسه لاعذريني مااكدر مااكدر وهي تتوسل بهدوء وتكوله انطيك بالشهر هلكد وهو قافل راحت على محل لخ ابو اللحم  وهم رافض اشترت كم غرض وبقت صافنه عليه كعدت عالرصيف
وين اوديج ييمه وين اخذج مرت عمج بعد شوي تشرب من دمج ولد عمج سر---  واستفردو بيج
وين اخذج عليتي كلبي

بجيت بقهر ونصيت جرة حسره ونترت كومي كومي. لو اعرف. انطرد كومي لج كومممي راحت لبو المخضر رادت منه عربانه مال مسواك  اشترتها جانت عدها فلوس هواي بس ماعدها مكان استغربت  ورغم مماكله  شي. بس اي طعم بحلكي ماكو حتى المي ماريده  بس اريد احس. بامان تعبت. وصلت درجه اعتب على اهلي  بموتتهم

اخذت خالتي العربانه بهميه والجيس مال ملابس شكبره. ومشت وتدفع بالعربانه وصلنا لمنطقه شبه مقطوعه صعدت كيه. وصعدت العربانه كانت قماشيه وبالكيه مشت كاعدين ليوره شاورتني

حسج ميطلع حختلج
بقيت صافنه عليها مامو غير بس ٢ بالكيه. خلت دشاديش بالعربانه كالت اصعدي بيها طبي انتي صغيرونه عفسي روحج
صعدت صافنه عليها ودحست فوكايه باقي الغراض. وسدت العربانه. شاورتني يم وجهي

مخنوكه
لالا

هسه وصلنا
نزلت وجرت العربانه ومشت بهمه واني  اتهزهز وي كل جر بالعربانه مبته خوف هناك وحسيتها وكفت كالت

شو ولا ستوته شون اكضيها مشي
مشي ساعه ساعتين

وردت مشت.
يمه خومامخنوكه
لالا خاله لا القماش خفيفا اكدر اتنفس ديطب هوه
جا خوش

وضلت تمشي دك تلفونها ردت
ياااا وينك وصم ساعه اخابر ماترد     تغوسلت بمي جهنم. كووون يله تعاالي رجليه صارن خيوط

انه يم الفلكه. مال صويحب  جاي اتانيك

وكفت طولت حيل وره وين سمعت صوت سياره وواحد يدردم
يوميه وطالعه وتعالم جيبوها وين لفييتي
اي للسوك. وين اولي الرجال بعد جم يوم يجي من السفر لا خركه بيها حظ عدي ولا  قماشه ادوسها بمكينه فضها لاتلغي زايد لااخلي يفرك حلكك المفجج

اصعدي اصعدي 
شالت خالتي العربانه او هو يمكن وخلوني ببطن سياره بس دااسمع الصوت عالي مو كان بالسياره بالداخل ومن داباوع من زروف خياط العربانه شفت روحي ببدي سياره بيكب

بقه كومه يمشي ضلوعي تكسرت

وصلنا وديور ابو السياره واحد صاح 
شعدج بالبدي

جاوبت خالتي بنتره
خرك مال نسوان لو همات حتفتشوني خلي يجي المنذر يشوفلي جاره. وياكم

هو المنذر وصه كال عينكم على ضحاوي هسه الوش معصبه. وفاير دمج.  ياعيني. اطلع  ابو خبزه  اطلع.

مليكه- حسيت بالعربانه انفتحت ورجعت انسدت صاح واحد
فوت افتح الباب. حياوييي
ورجعت مشت السياره شوي وسمعت هوسه زلم. وتطكطك قوي مال حدايد وريحه مال حديد ولحيم قويه. واحد كال

فوتي عمه. بسع. شرار مال لحيم تره يطشر عليج

اي اي. فايته

وانجرت العربانه وهدا الصوت بس صوت البنكه هاي كلها اني خانسه. صوت تقفل صار وهمس

يمهه مليكه خومااختنكتي.

بقيت ساكته اخاف احجي وخاله فتحت العربانه كامت تطلع ركض ركض بالغراض رفعت راسي كالت اطلعي بالعجل طلعت واتلفت
مطبخ. مرتب مربع. نضيف كلش مبي كاونترات بناء صايره. وبي قنفه وحده كرويته وبي تلفزيون ديشتغل وبنكه وصوت المبرده عالي لزمتني خالتي من ايدي قوي وجرتني ليفوك واني اتلفت. كل البيت فاررغ وصب كاشي ماكو الدرج مابي سياج عبالك توه مبني حتى درجاته. صب خشن طببتني بغرفه فارغه تماما سدت الباب ميته خوف تهمس وتتلفت بخوف خوفها خوفني الي هم.

بقيت ساكته اخاف احجي وخاله فتحت العربانه كامت تطلع ركض ركض بالغراض رفعت راسي كالت اطلعي بالعجل طلعت واتلفت

مطبخ. مرتب مربع. نضيف كلش مبي كاونترات بناء صايره. وبي قنفه وحده كرويته وبي تلفزيون ديشتغل وبنكه وصوت المبرده عالي لزمتني خالتي من ايدي قوي وجرتني ليفوك واني اتلفت. كل البيت فاررغ وصب كاشي ماكو الدرج مابي سياج عبالك توه مبني حتى درجاته. صب خشن طببتني بغرفه فارغه تماما سدت الباب ميته خوف تهمس وتتلفت بخوف خوفها خوفني الي هم.

باعي مليكه ههاي الغرفه الج ديربالج تنزلين جوه ابد ابد. حدما تصير فرصه احاجي المنذر بلكن يقبل كالتها بتوسل.

وتتلفت باعي. هاي الغرفه الج هسه اجيبلج فراش ووهاي سله خلي بيها هدوم الجبتهن الج. ووهاذا حمام مبي بس بلوعه. ولوله مال ماي تسبحين بي ووهاي البلوعه الصغيره تفتحيها من تردين تفوتين بيت الراحه. زين. ووهاي هم شسمه. خاولي الج
تحجي واني اهز راسي موافقه

يعني خاله ماانزل
ابددد ابد ابد مليكه حدماا اني احاجي المنذر بلكن يقبل كون اذا مقبل ادزج دار ايتام ماعدي غير حل يمه

جانت ميته خوف ووجهه احمر راحت جابت فراش وتتلفت لانحاء البيت. وجابت هدومي وصابونه. وبطل شامبو بوكتها اسمه ايبك حد الان الماركه براسي لان اول شامبو استعمله كل حياتي جنت معتمده عالصابون ركي

نزلت خالتي وتباوعلي وتحذر باصبعها فاكه كل عينها
حسج. عينج. تنزلين.

اي اي خاله والله
وراحت طلعت من الغرفه.

شفت الغرفه اللخ بعد بناء ممخلصين حتى الحيطان لازم تنلبخ. الحمام بس بوري وبلوعه بي حتى كلوب مبي الطابق الفوك مبي سياج عالجوه اذا اعثر اوكع بالطابق الجوه اموت يمكن رجعت للغرفه اباوعلها متربه شبعانه تراب.

جبيييره ونفهه وبيها شباك ابو طلاكتين. ومصبوغ بالابيض. صبغ ثخين حاولت افكه منفتح. ملحوم. عفته. وصوت هوسه بره. الشباك صاير عالشارع لان الصوت كله يمي الغرفه. بيها بنكه شغلتها اشتغلت. بس ضوه بيها اصفر صغير.

وكمت مدام بعدها ضاويه. طبيت على كيفي للحمام. نزعت هدومي ولبست من الهدوم الجابتها خاله جانت هدوم مال نسوان حيل جبيره عليه. بس لبستها همزين الملابس الداخليه على كدي كفيت هدومي بملابسي الداخليه واحس كل الحيل بيه.

رغم المكان مجهول رغم خوف خالتي بس احساسي جان كلش حلو غرفه وحدي واقفل الباب محد يتعرضلي. غسلت هدومي القديمه وشلت الفراش ومسحت الغرفه. مره مرتين وخمس مرات كامت تلهث حتى الشباك جلفته ومسحته

جنت اتصرف بكل هدوء والمي افكه على كييفي حتى ليطلع صوت الدنيا غوربت واني سبحت وادور على مشط لان صار هواي ممسرحه شعري شوي وصعدت خالتي بسكوت تهمس

يمه تنزلين جوه اكلي ورجعي صعدي قافله باب المطبخ. محد يفوت
اي خاله خاف ماعدج اكل.
ضحكت هزت ايدها همست
امشي عمت عيني امشي

نزلت وكلسا تتلفت للغرفه تبتسم. كالت
بس كون يقبل ببقيتج. هنا. وحتى وان قبل حياتج حتصير جحيم بعد منا وهيج

كملنا الدرج وخاله تحجي شفت مشط عالمرايه الجوه مال مغسله

خاله عادي انزل شعري
روحي يمه بس بالعجل اولا موهسه لمن تصعدين صعدي وياج

خوش مشيت وراها شايله طرف دشداشتي الطويله عليه واشوف عالميز صينيه. جبيره برياني وعليها. لحم كومه. مسلفنه

بلعت ريكي باوعت لخالتي تبتسم همست
اكلي يمه حدما تشبعين اكلي

كعدت بالكع صافنه منين ابدي اخذت الخاشوكه واباوع للصينيه واباوع لخالتي.

واتذكر يوم يوم. بيت. جدي ذكريات السوده مسحت كل بياض. الحلوه وكعدت اكل كل لكمه تنزل شهدد كمت بله مااحس على روحي اكل سريع. واشبع روحي. واباوع للصينيه خاف يخلص خاله تحجي واني اهز راسي

يمه مليكه اذا قبل المنذر ببقيتج هنا تره. حياتج تتغير هنا مو مكان عادي هنا سجننن ممنوع تطلعين منه سجن مدى تلحياه
واني اهز راسي

اكل. وشرب احسن مايكون. وشتردين يجي ليمج بس ممنوع تطلعين. من الباب. مو بعدين تكليلي ورطتيني شوفه عينج. اني. حاولت كل المحاولات محد رضى يستقبلج.

هزيت راسي موافقه.

كالت
راح تشبعين. باحسن اكل وشرب وعيشه. بس. حتكونين. مسجونه و زوجه. موخوش ادمي. وجهالج هم يطلعون مو خوش اوادم. مثل ابوهم

بلعت اللكمه. همست
خاله مريد اتزوج
هزت راسها تبتسم. ييمه. وين وكعتي. عسى ايامج احسن من ايامنا عجبج الاكل كالتها تهمس بحنيه

اطيب اكل اكلته بحياتي خاله عادي اكمله

كملي كله هني ومري

بيومها اتذكر بلشت اكل ب٥ وكملت بال٨ ٣ ساعات اكل حدما حسيت روحي اكلت مال شهر ليكدام. وكفت شلت الصينيه همست
عوفي عنج عوفي هسه يجون ياخذوها انتي اصعدي الا انده عليج الا تردين

خوش خاله بس ردت سجاده
ابتسمت واني منيلي سجاده
زين القبله منين

والله يمه مادري ماعرف

بقيت صافنه شون وصعدت ماخذه المشط ويايه. طبيت لعالمي الجديد قفلت الباب وتمددت عالفراش لزمت بطني الله شكد طيب جان الاكل واللحم مايع ماييع. شككد الحمد لله ربي الف الحمد لله

كمت سرحت شعري وكع هواي منه لان صار هواي ممشطته ضفرته. وكمت لبست حجابي النشف وره مغسلته احس روحي قويه حيل ضليت صافنه القبله منين وتذكرت كلام ابويه
يابه اذا معرفتيها وين انوي وصلي وربج يتقبل دامج تردين تصلين توكلت على الله وصليت. والواجبه وبلشت احسب شكد ضاله بذمتي. صلاه

وكعدت الليل كله اصلي هوسه بره اكو ابد مهداو حيرني وضعهم وكلام خاله براسي وكلما اسمع طكه جوه اكول اجه رجلها وراح انطرد بيومها اندعيت هواي انه ميطردني والله يجفيني كل شره

مداعرف. بيش ساعه. ولااعرف الضوه من الضلمه لان الغرفه مصبوغ شباكها بالابيض تقربت منه وجلغته باضفيري منشلع ثخين بويه

جبت الماشه مالتي وبديت اشخط تشخط بمسافه. سنتيمات كدرت المح. السما كانت رصاصيه يعني طالع الفجر هنا حتى صوت وذان ماكو بس ضحك وصياح شباب وتطكطك حديد رجعت صليت انتباني الفضول كملت صلاه. ورجعت للشباك اباوع من عده عالشارع ومن متتوضح الصوره اشخط بعد بالماشه. بقيت اباوع شفت فرع الكاعدين بي بي كم بيت ومسدود بالصفحتين صبات عاليه شون طبينا لعد اباوع الفرع كله حدايد بالكع وواحد منا وواحد منا يلحمون يسوو سقيفه حتى فوك بيتنا عاليه. من فوك السطوح

وواحد بعيد يشتغل بمولده. بقيت اباوعلهم  مستغربه.

رفعت راسي كدامي بالضبط بيت بي درج ليفوك الجوه ممبني مكامل حتى طابوك مكوم جوه بس الفوك كامل درج وبلكون وبيها باب خشب مفتوحه وطالعه برده حمره مشرشبه بيها اكسسوارات بس كلش سوقيه والضوه احمر خافت والبرده تتحرك بفعل الهوه

مكينه اللحيم تشتغل ويلحمون يسوون سقيفه. فوك الفرع كلهم بالفانيلات ومحد كاعد كلها تشتغل  بهمه من انتبه على البيت اللي بصفنا بي ولد يرتب بشغله ركزت زين شفت سلاح. منهذا الجبير يصفطهن بعلب خشب كل فد عشره او اقل بعلبه ويقبطها. ويلفها بشريط رصاصي لاسق
كان بين اسنانه يقطع الشريط ويلزكه ويرتب اللخ فوكاها

لكيت كبالي بالضبط كرويته. خشب تك من يداتها مكسور ماهو وبيها مندر ومخده واحد كاعد عليها يدخن والثاني بصفه. يدك بسمار يعلك بدايه التغليف والثاني يلف بالجينكو الحيرتني سالفه وحده بس

الراس مال فرع من الصفحتين مسدود بكونكريت عااالي كلش منين احنا طبينا وهاي السيارات منين فاتت دخت

بقيت هواي اراقب الشمس طلعت وهمه معافو الشغل واحد طلع من بيت شايل صينيه شكبراتها. على راسه. جان يطلع عمره بكد  حمودي اخويه  الصينيه مليانه لفات. وكلاصات جاي ابو الورقي. وترامز مال جاي  ٥ والتمو عليه. اللي غسل غسل واللي  بوصاخه ايده. اكل اكل. وصبو الجاي وياكلون طب الولد بكد حمودي للبيت مره لخ جاي صينيه لخ

يمكن هذا امه تطبخ الهم حسيت بجوع من شفتهم ياكلون بشهيه ويضحكون صفنت يمكن اكو بعد من هذا الاكل مال بارحه  ويمكن خالتي ضامته بالثلاجه يابه جعت لان صنطه. كلش

اكيد ماكو احد بالبيت بس خالتي نزلت كم بايه شفت خالتي بالغرفه كبال الدرج نايمه. عالجربايه هاي عدها جربايه خاله زين مديت راسي وحدها والتلفزيون معلوك مبين توها نامت رحت للمطبخ بالتختل الباب مال مطبخ مقفوله همزين فتحت الثلاجه ماكو الاكل دورت لكيته بجدر صغير نطعج بس يلمع خالتي مثل ماما كلش نضيفه طلعته لكيت بصل اخضر وطرشي بماعون ولميت لبن هم اخذت ماعون خليت عليه الاكل واللحم والتمن والبصل وشوي من اللبن والطرشي وصعدت فوك ركض حتى محميته قفلت الباب وكعدت اكل

خاف خاله عايفته لرجلها عيب لابعد اكو كملت الماعون واني اباوعلهم باوعت لحديقه بيتنا ليجوه شفت منور وره البيت يطلع عالحديقه. اللي بيها شجره وحده بس الحديقه مستطيله صغيره وباب البيت مال خالتي طبكه وحده. باب وحده صغيره وطرمه طويله رفيعه اذا كملناها نروح للمطبخ هاي باب المطبخ شفت كفاها هسه بالمطبخ من الداخل بيت حلو مرتب بس عبالك ممكمل بناء والبيوت هنا كلها ممكمله بناء كلهن عالنص عبالك الشارع ترابه شفت برميل ديفور بي شي اسود عرفته كير لان ابويه بنه واعرف وبدو يزفتون الشارع

كمت اغفي واني عيوني عالفرع وره البيوت اللي بالفرع جول بستان نخل مبين اعلى من البيوت شنو هالمكان الغريب غفيت على رازونه الشباك وفزيت من انركعت ايديه بالماعون كمت غسلته بالحمام ومن طلع الضوه خفت انزل بعد البيت صنطه كللش عفت الماعون بالغرفه نضيف ورجعت لفراشي تغطيت واباوع للبنكه. مرتاحه رغم كلشي
وغفيت حلمت بابويه.

موقف مره جان احمد ديساله

يابه اذا واحد ماعده  اكل يوكل جهاله الجواعه ولكه فطيسه. بالشارع واخذها وسواها الهم اكل هاي هم تعتبر حرام

وابويه جاوبه
لايابه متعتبر حرام لان ماعده غيره يوكل جهاله بيها حتى الامراض البيها باذن الله تبرى بس اذا اكلها واحد متمكن تصير ببطنه مرض ويتسجل حرام بذمته

فزيت من نومي. يعني ابويه قصده على اكلي الاكلته حلال عليه حرام عليهم بقيت صافنه هذا الاكل حرام يا اربي  حاجيني حرام هذا الاكل الطيب التلذذت بي

ياربي شون مو طيب والله يخبل

رجعت غفيت ومهمومه. اني مدااكدر امنع روحي عن اللكمه الطيبه المحرومه منها وهي

يتبع ----

.....................