رواية منطقه13 الفصل الحادي والستون 61 - بقلم مريم السعدي

لليل خابرت خليل جاوبني. "ها أسونه" "خليل تكدر تجيني؟ "ها كبن" "لا بس ضجت من الحكي ممتحمله، والله روحي مفرفحه بعدني على قاسم." "أدري مصار ساعة من رجعت من يمنا" ما حكت شي بس أني صايره ما أتحمل. "ديله حدز السايق عليج" "أوك" بدلت واجه خليل، جان ببالي أبات يمه. دا أطلع، كالت: "وين رايحه بهالليل هاي؟ ون بلوه بلاني الله بيها." "خاله، خليل حيجى عليه." "وين ترحين؟ نترت: "أستغفر الله، أبات يمه." "متستحين مكابلتهم يمه؟

عرسان ذوله، سوده عليه ششاف من أيام عرسه." "لا خاله، أبقى عدهم غرفه صغيره، مرتبين بيها الفراش، باجر أرجع وي قاسم." "انتظري أجي وياج، قلبي نار على قاسم، عفته وندمت." طبت وفركت وجهي بعصبيه. خابرت خليل همست، حكيت له. كال: "هلا بيها خل تجي." "أني راح أبقى." "أي كيفج بس وحدج." "شكو عليه مليكه بصفي؟ "براحتج" سديته منه دا أصعد، دق تلفوني. أبو ضل. رديت: "ألو" "ها أسينات" "نعم" "أكولج تباتين بيت عمتي؟ "أي" "أدزلج ضل وياج؟

"أي دزها عادي." "خاف تضوجج، ثبرتني تره. وهذا مينعاف أخوج." "لا لا دزها ما عندي شي." "أوك ديله جتج." طبت ضل ومرت أبويه صاحت: "حروح أني." "روحي خاله ما أجي." "أوي عشتوا كيفج." صعدت ضل وتسولفلي عالهوسه الهناك، كلسا جاي واحد يشوفه. وأني صافنه عليها تعبانه، أحس روحي ما بيه حيل لأي شي، حيلي من الهبطه راح. خليل -طبيت بعد غياب يومين عن البيت. دا أفتح باب الشقه وركضت زمرد لحضني. شلتها أضحك وأبوس بيها من خدها، أمي ورايه.

نترت: "نزلي نزلي ولج، مزين ظهرهه صكطتي." خجلت مشافت أني دتنزل، جلبت بيها شايلها مثل الطفل. "لج يوم هاي العافيه بس بصورة بشر، خفيفه ريشه." "نزلها ولللك، ظهرك ليطك." أكولها: "خفيفه خفيفه." وأوزن بيها وهي تضحك حاضنتني. نزلتها أمي زنبرت. وتدردم: "جنها حولي شالها على أفاده، عبالك زعطوطه." وأني خربان ضحك، أباوع لزمرد وجهه دم خجلانه. "حبيبي حمام حمام." "أي صار." ركضت حضرتلي الحمام وهدومي.

مديت راسي، أمي فاتت للغرفه لزمتها من زندها. "وين رايحه؟ "أحضرلك عشا." "تعاي عوفي العشا، متعشي، تعاي سبحيني، رجلك تعبان ولج." "من عيوني." تحكي وتهز بشعرها وتأشر على عيونها. طلعت قبلي وأني أبدل. واستلمتها أمي: "معيب عليج متخجلين؟ كولي عمتي بالبيت، كولي عيب." وهي خانسه. طلعت صحت: "يووووم، شنو الفلم؟ تره حلالي، أخلص من أمها تطلعين أنتي." سكتت وتدردم. تعشينا وتمددت بالهول. نصت عليه: "خبيبي كوم نام جوه." نترت أمي:

"عوفي متشوفي نايم؟ شتردين منه خلي يرتاح." باوعتلها وضحكت. "خاله القنفه مو زينه على ظهره." قمت مبتسم، مدري شون حعوفها، أني أدري راح أشبع عقوبات من وراها. يوميه كامز. طبيت للغرفه همست: "وقتي الفون عالأربعه." سكتت وجرت نفس. "لتضوجين زوزه الأحد أجي." "شفهمنا من الإجازه؟ "من أجي أفهمج عالإجازه." قلتها وغفيت تعبان، هبطه وتعب وي قاسم. الحمد لله والله وكلت ما أشوفه بعد، توه سنه حمزه الها شهرين طالعه. حضنتني وأني كملت راحتي.

للأربعه دق المنبه. وبدلت حضرت الشغلات الآخذها ويايه وتبكي. أحضن بيها وأشم. "لج قلبي لتبجين، شون نبطل؟ "شون حشتاقلك؟ "باجر تداومين وتنسيني، باعي صدق السايق مال بيت خالي وصيته يوديج لأمج باجر الشهر." "أوك." حضنتها أبوس براسها وأتلمس بشعرها. "حشتاق هواي تره." "أني هم والله." بست أيدها، رفعت رأسي شفت أمي. تقربت بست رأسها: "يلا يوم رايح." "الله وياك." أمي نترت بزمرد: "مزين يمه تبجين؟ مزززين." ابتسمت، قرصت خدها وطلعت.

عيونها تباوعلي، التفتت عليها أبتسم: "فوتي نامي." "أوك." أسينات -قاسم تحسن، ووقف على حيله. رجع لبيتنا وضل أخذها أبوها. دا أغسل ببدلته همس: "سلام كال الأحد زواجكم." هزيت راسي: "أعرف." "أم سلام مشتريه كلشي." "أمم." "والغرفه البارحه جابوها." "أدري." "شمدريج؟ "ضل گالتلي." "ها هه، ليش أحسج مفرحانه؟ " باوعت له. "ما أعرف." "تعاي يمي شوي." تقربت وكعدت يمه.

"أسونه تره سلام صفقه رابحه لكل وحده. صح متزوج وعنده طفله. بس والله مكتبله يرتاح بزواجه. باعي هوو." وضحك. "ههه." "أدري بي حقنه ميبين حبه، بس فد قلب شايل، فد طيبه ميتحمل يأذي أحد، والله ذاك اليوم واحد تعاقب، هو عاقبه عود هو وهيبته وهاي." "لليل كال عود علساس بلاحسي روح وديله أكل." خلاني أضل صافن عليه، قلت له: "رتبه أنت جيس تمن." ابتسمت. جر نفس وتنهد: "وداعتك يستاهل صبر، وأنتي بعد بأسلوبج." وجر نفس.

باوع عالشباك المطل على هول بيت مليكه. همس: "الجماعه شونهم؟ ابتسمت: "زينين." "شكالت من خطفوني؟ " كعد عدل ويسأل. بقيت أباوع له، شكوله بله؟ أكوله حبيبها أنقذك؟ تلاشت ملامح وجهه وهز رأسه همس: "لو بعد خمسين سنه متنسى الصار، كذب من تكول نسيت." ماجاوبته. قمت همس: "وين رايحه؟ "أنزل أنام." "مم دروحي، دوام عدج باجر مو؟ "أمم." نزلت وحضرت أغراضي. خابرت ضل. رديت: "ها ضله." "أسونه فتحي كامره." "يا ستار شكو؟

"قميصي انقطعت الدكمه." قالتها وبجت. فتحتها باوعت بعينها: "هسه ليش البجي يا عيني؟ "أني صوجي، قلت لها للمنظفه تغسله، تالي شلعت دكمتين، شون أروح باجر؟ "لبسي التيشيرت." "وصخ." "ميخالف كومي نغسله." "تعبمي كوني ويايه، أني حغسل شالي وغسلي تيشيرتج." "أوك عالمغسله." "أي يلا." أخذت الفون وياها. خلته عالمغسله بالمرايه وتمسح بدموعها. "كافي ضل عيب مو صغيره أنتي." "أي أذب عليه زاهي؟ "لا تايت شوي." "ما عندنا، أروح من بيبي."

"لا خلي زاهي يكفي." "باعي أني هم دا أغسل شالي بالزاهي علمود ميطكه لأن أسود." "أوك." قامت تباوع لأيدي وتجلف. ويايه. ضحكت والدنيا كلها ضحكت لي. "بقي البوري مفتوح عليه، خلي يخلص الزاهي منه." "عافيه ضلوله." "هيج صار نظيف؟ "غسلتي الرقبه؟ "أي." "الردانات؟ "أي." "الإبط؟ "أي كلهن صارت نظيفه." "عافيه." وسمعت صوت سلام: "ضللل بابا وينج؟ "بالحمام بابا." "دتسوين؟ مد رأسه عكد حاجبه، شافني شال أيده ابتسم. "هلو." "هلو أبو."

نصيت وشالت تيشيرتها ضل. "باعي أسونه صار نظيف." "أي صار نظيف." بقى يباوع لضل مكتف أيديه ومنتجي على صفحة الباب. "هسه شون أذبه بالغساله؟ "أي." تقدم أبوها همس: "طيني بابا أنشفه مو؟ "أي أي بس دوس تنشيف." "خوش." باوع لي، ذب جكارته همس: "خوجان ذبته بالغساله." "مو تتكطع الدكم." ضل همست: "مو غسلته بابا." "تبللت هدومج باباتي." "هسه أبدل أسينات." "ها ضله." "لتروحين أبدل وأجي حتى ننام." "أوك أنتظرج."

سديت البوري التفت رافع حواجب يباوع عالغساله وباوع لي. همس: "قاسم شون صار؟ "أحسن الحمد لله نام." هز رأسه والتفت عالغساله. أباوع لجسمه بالفانيلا النص ردن وتذكرت من جان نايم نصيت رأسي. رفع رأسه باوع للشاشه ابتسم. كتف أيده كال: "هسه عالخميس أمي تمر عليج." هزيت رأسي. هز رأسه ونصه وأني التهيت شريت قميصي النشف. التفتت شفته يباوع لي ويدخن، شوكت ورث ما أدري وأني ناطيه ظهري للكامره. باوعت له: "وينها ضل؟

بلع ريق دار وجهه همس: "دتبدل هسه تجي." تنهد وهو وداير وجهه همس: "شعجب ملابسه حلقتج؟ باوعت لأيدي وأتلفت وين خليتها؟ أنشدهت باوعت له عاقد حاجبه. "شبيج؟ "ما أدري وين خليتها، نزعتها مدري سوكت أتذكر ضميتها مدري وين خليتها." جر نفس وهز رأسه، شال أيده مخليها بأصبعه الصغير: "هاي هاي لتدوخين." صفنت فكيت عيني. "شجابها يمك؟ هز رأسه ونصه: "السايق لقاها بسيارته." غمضت عيني وخليت أيدي على حلقي: "شكد فشله."

هز رأسه باوع لي بعتب: "مضايقتج؟ "لا جبيره." وطبت ضل. قالت: "بيباي بابا روح نام، يلا أسونه ننام." أباوع أبوها عكد حاجبه صافن عليها باوع لي وباوع لها. "روح بابا." دفعته. "شون تنامون بابا؟ "ايييي بابااا، تأخرت لازم أنام هسه هسه." طلعته وسدت الباب همست تعدد بأيدها: "فرشت أسناني وشربت حليبي وسرحت شعري وحضرت كلشي وبابا نشر تيشيرتي بعد شنو؟ "ههههههه هاهي سباعيه." علقت التيب لامب، علقته وكمزت للجربايه وتغطت. همست:

"البارحه وصلنا لمن الأمير طلب منهم يدورون على صاحبه، فرده الحذاء الأزرق." "ايي ضلوله." تمددت أنام فليت شعري همست: "نسيت أفله." فلته ورجعت نامت. وبقيت أسولف أعشق بيها لمن تخلي أيدها جوه خدها عالمخده وتبدي عينها تنعس وماتكول أي وبعدين. وراها تخنس وتنام. توني أسكت وأسده سمعت باب غرفتها انفتح وطب ضوه. هدأت أشوفه نصه باسها وتلمس خدها، غطاها زين، شال الفون وشافني أنصدم كان. بدون فانيلته، رفع الفون لوجهه همس:

"أعتذر توقعتها ناهيه المكالمه." "تونا كملنا القصه وغفت." طلع من الغرفه سد الباب بهدوء والفون بيده. ابتسم وبقى يمشي طب لغرفته وسد الباب. ما كال مع السلامه وأني انتظرت. شغل الضوه ورفع الفون همس: "خو منمتي؟ "لا لا." كعدت عدل وسحبت شعري. رفع الفون وفر الكامره. صفنت غرفه جديده. كانت تخبل وبردات جديده. وتيب لامبات يمشي بهدوء ساكت. كمل وفر الكامره. على وجهه. ابتسمت. جر نفس وصعد رأسه ليفوك. "أي شي عدج تردين تضيفي؟

"لا لا كلشي تمام." "أمّم." سكتت. رجع الفون عالميز البصفه وجر المخده نام عليها. غطى جسمه والتفت عليه. "شجنتي تحكي وي ضله؟ "هيج قصه." "قصه؟ رفع حواجبه: "انطردت من وره قصه." ومد شفته: "جيد." دار وجهه طفى التيب لامب. ورجع باوع لي: "مو هواي دتعلقيها بيج، دتكبر تره." بقيت أباوع له ما أعرف. أحس تحتاج أحد يحاجيها أكثر من قبل ونحتاج نسافر بخيالنا قبل لا ننام. "مممم." هز رأسه. "منو علمج هالشي؟

"والدتي جانت تحجيلي قصه قبل لا أنام." "ها، الله يرحمها." "تدرين؟ " غمض عينه وهمس. "تعرفين تفكير فريده كان أوسع من تفكيرج. كانت تكلي لازم تعتمد على نفسها، تنام وحدها، تلبس وحدها، يكون الها ذوق خاص واستقلاليه." "ما أعرف، إذا تريد أو تشوف الدنسوي غلط." "لا لا براحتج، أني ما قلت غلط بس دا أشوفج يعني أقصد. ثنينكم صح، كلمن وجهه نظره." "صحيح فعلاً، أني أركز عالحنان والتواصل الفكري العاطفي. مو بس وياها حتى وي أخوتي."

"أمّم، منتبه صح هواي يميلون الج أكثر من أختج." درت وجهي شلت شعري ونزلت عالمخده. باوعت له شفته مضيق عينه. "تنامين؟ "فد شويه." هز رأسه تنهد. "وأنتي هم تحبين تسمعين قصص قبل لا تنامين؟ "ههه، كلمن بداخله روح طفل." "أحس ضل هواي بيها منج، مو صح؟ "ممم." "شوكت آخر مره سمعتي قصه؟ غمضت عيني أتذكر. "جنت صففف بله همم صف رابع." "بكد ضله تقريباً؟ "لاا هه، رابع عام." "بشرفج تره جبيره جبيره مو مال قصص." "أمي ما جانت تشوفني هيج."

"وهاي تعوف أبوج ملطوع بالغرفه وتجي يمج، لحق الرجال نام." بقيت صافنه عليه. ضحك ولزم طرف أنفه، عيونه دمعت. شال أيده: "آسف ههههه خربطت." ما بديت أي تعبير. "أي شنو آخر قصه سمعتيها؟ "تريد أسمعها يعني؟ "نسمع شورانا." "تخوف." "لا هه، ما يهم." هيج وحده حكيت شفتي، عكد حاجبه بحركتي، بعدت عيني أحكي وقلبي يدق سريع ليش راد يحاجيني، ليش هالقرب المفاجئ. بس انطلقت: "وحده متلبسها جن." "أمّم." ابتسم. "والله شبيك؟

"أي هسه أني قلت لج كذابه؟ "أي فجابوا شيخ، أمها قالت لهم كذابه، هاي كلشي ما بيها." "ها عود هاي أمها؟ "أي أهل قبل ما يصدقون." "أمّم." "فالعشيره التمت جايبين شيخ ويضرب بيها خطيه." "أمّم." "آخر شي قامت تحكي بالكردي." قلتها وغطيت وجهي خايفه. عقد حاجبه: "شنو يعني؟ "يعني هي ما تعرف تحكي كردي، شون حكت؟ الشيخ كال هذا الجن كردي." "هاا ههه متلبسها كردي." "أي." "ممم تخوف عود هاي." "أي شنو."

تخيل وحدة تحكي لغة من كيفها بدون ما تتعلمها، مو كانوا ممصدقيها، منو بذاك الوقت يصدق بوجود الجن؟ أنا هسه وما أصدق. هههه لا عادِ، موجودين ترى. والله أنا ما شايفة وما أصدق بشيء ما شايفته. ههه تعاي يمنا بالجول وتفرجي بأنواعهم ههههه. صفنت عليه. صدق؟ إي والله شبيكِ. يعني، يعني شايفهم بعينك؟ هز رأسه يبتسم. يعني صدق لو تتشاقى؟ والله شبيكِ. شلون صاير شكلهم؟ أخاف متوهم. لا يابا معروفين قصار وريحتهم وعيونهم حمر ويخطفون.

عزززه مامااا! ضحك وغصّ. عليك الله قول والله. والله شبيكِ ههههه. يعني حقيقي؟ إي جول ونكاسى ولعبان نفس. زين جايين يمكم؟ إي مره حكى وياي حتى الله يرحمه حمزة. كان موجود، كنا نمشي نطلع عالشارع. بليل ولحقنا. وين رايحين؟ وين رايحين؟ أشرت له. حنروح عالشارع سيارات. لا لا أخاف من السيارات وطفر. بقيت فاكة حلقي. تتشاقى مو؟ همس: كيفكِ. بلعت ريقي. يخوّفون. لا مخلوقات غريبة يعني. أنا إذا شفتهم أتخبل يمكن.

لا تخلّين ببالك إنهم يقدرون عليكِ وتخلص القضية. حمزة شسوى؟ حمزة ما يجاوبهم خبلوه وما يجاوبهم. حبيبي. امم. بقيت صافنة، قام يغمّض ويسد بعينه ويرفع بحواجبه. همس: ها تنامين؟ إي. يلا تصبحين على خير، روحي ارتاحي تعبتكِ. أوك. جاي يسدّه. نترت: أوقف أوقف. شبيكِ؟ لا تسدّه حباب الله يخليك. شبيكِ حتبكين؟ ما أدري خفت، عافيه لا تسدّه، قاسم مو هنا كان صعدت نمت يمه. عقد حاجبه: وين يمه بغرفته؟ إي. وأنتِ من مو موجود تصعدين تنامين يمه؟

إي لعد وين. ومن مو موجود؟ أنزل يم مرت أبوي بس اليوم بايتة بيت خليل. بقى صافن عاقد حاجبه. شنو؟ ما أدري، واقفة تباتين بغرفة أخوكِ. وين أروح لعد؟ جريت نفس إذا أبات جوه كل يوم. يعني مشاكل تصير. هز رأسه وهمس: نامي ما أسدّه. أخاف يخلص الشحن. راح أربطه. أوك. غمضت وأفتح عيوني عليه وهو يباوع لي ويغمّض. غفيت سمعت همسته: أسينات. ما قدرت أفتح عيني: همم. كل يوم أظل وحدي لحد ما أغفى وأفكار مو حلوة تجيني، اليوم ونستيني. اممم.

تصبحين على خير. امم. غفيت وأخيرًا. حسيت عالمنبه مالتي طفيته راسًا وأباوع له نايم عقد حاجبه من دق المنبه ورد عدله مغمّض من طفيته. أبو ظل. هم. أبو ظل كعدها لظلولة. فدوة تلفونها يمك شلون أخابرها؟ همس: أوك. والتفت باوع لي ابتسم: صباح الخير. هلاو صباح النور، حروح أنا بس كعد ظلولة تتأخر. أوك. أعتمد عليك. إي أقوم. يلا باي. الله وياك. سديته منه وكمت بدلت ودقت ظل. أسينات. ها ظلولة. باي باي. باي باي حبيبتي. سدته مني وطلعت.

جنت أحس براحة غريبة صابتني. إحساس جديد اكتشفته به، أمشي وأتذكر كلامه ضحكته وهمساته. تدخل لقلبي دقة غريبة. وأغمض قوي. لحد ما كملت دوام ورجعت للبيت. أم سلام كانت عندنا تنتظرني ومرت أبوي. تبسمر وتحكي وأم سلام ما دايّرة بال. بوستها قالت بدلي دنروح نجهز. صعدت بدلت ونزلت وياها اشترينا هواي شغلات وتمشي وتنصح. انطي مال. قلبه ملجوم. تحملي منه. وخلي ظل بينكم تقربكم. صيري أنتِ الأمان والحنان أسونة.

جنت أهز رأسي وأتذكر حكي البارحة وأردد بداخلي يستاهل والله. اكتفيت بكم كلمة ونظرة وصار عندي أمل أخليه يحبني. السبت كملنا كل شيء وأم قاسم ألحت الحنة ببيت جدي وجوي جماعتهم ونزلت مليكة كانت طالعة كلش أنيقة. ومرتبة بسيطة. عزمت صديقاتي 2 بالجامعة وتوسلت بأحمد يقول لست نور تعتذر، قال اعذريني وأنا أتوسل به آخر شيء انطاني رقمها قال لي خابريها أنتِ. خابرت وعزمتها باركت لي بارتباك وقلت لها. قلت لأحمد يعزمكِ قال أخجل خابري أنتِ.

همست: شلونكم أنتِ ومليكة؟ أحمد شلونة؟ زينين بس أحمد دنلح عليه يتزوج قافل. سكتت ردت أفهمها ترى مو أحمد العريس. قالت إن شاء الله أقدر أجي. وبلشت مراسيم الحنة أم سلام هي الحنتني، كانوا أشكال يحكون وبسامير نسمعها وأنا ومليكة نسمع ونضحك. رقصنا سوى بهدوء ومرت أبوي ورقية يقلدون ويضحكون عليها وعليّ. وإحنا لابسينهم. شاورتني: لو ما مخلية قاسم يرجعه أبو قبضة ما كان أنا متشفية بهم والله أنتِ اللي وقفتِ بعيني.

لا ولج حباب أخوي وضحكت صوت عالي حضنتها وهي خربانة ضحك. ونترت مرت أبوي: عيب هاي السوالف تضحكن وحدكن عيب الخطار ياخذ على روحه بعدين أنتِ عروس ثقلي شوي شيكولون. ماخذة حصتها قبل العرس النوبة الأسبوع كله تقضيه عندهم. كانت تحكي صوت عالي أم سلام ردتها: عيني اللي يحكي مرده لنفسه. كل من أعرف بروحه، ارقصي ارقصي أسونة يمه افرحي اليوم حنتكِ. ابتسمت وكملت رقص.

يمكن حنت أتمنى أمي وياي بس اليوم ما ردت أبكي ظل. بدلتها تخبل كليًا ومفتوح سوارها سويالي لو شعرها نزل عدلي. وأنا ما أقصر ولا أتأخر. كملت الحنة وصعدت يم مليكة. سوينا أقنعة ونسولف ونضحك. طب أحمد وطفرت لغرفة قاسم. خابر سلام. رديت: ألو. هلا أسينات شلونكِ؟ هلا أبو ظل. اعذريني ما اتصلت بعد من يوم اللي سولفنا بس ثاني يوم التحقت. لا عادي. ظل نامت؟ إي من زمان. ليش بقيتها يمكِ؟

مو من نلتحق والله يظل بالي، خالة هواي تنام من وراء السكر وهاي تحب تكتشف أخاف تلعب بشيء ولو عمرها مو مال ما تعرف بس هم تخوف. إي والله مخبلتني. لا حبيبة. زين آآآ محتاجة شيء لباچر لو كل شيء جاهز عندكِ؟ لا ما عندي شيء. أمي قالت ما تروحين صالون؟ لا لا صديقتي تمكيجني هادئ ومليكة تسشور شعري. لِمَن مسشورته هو سرح. سكتت. جر نفس همس: أغراضكِ غزت الكنتور. إي خطية خالة قالت رتبتهن.

طردوني كل ما أخلي هدومي بكنتور تقول لي لا مو هذا ويدفعون تالي صفيت باب وحدة. ههه كافية عليك. امم تنهد. أعوفكِ تنامين أكيد تعبانة حفلة وهوسة. امم. يلا تصبحين على خير. وأنتَ من أهله. سديته ونمت وكلمة كلمة تتمرجح ببالي مثل المراجيح الولد الفجر ينزلون اثنينهم. وحضرت هدومهم. كعدت الصبح مليكة مخابرتني ميت مره. كمت وطبت صديقتي. سبحت وهوساتهم وياي خطية مليكة طبخت الغداء أحمد خلته. من الصبح يطلع وقلت له لا ترجع لليل.

تمكيجنا ببيتهم وسوت شعري صديقتي. نزل على ظهري وشالته ببساطة. والمكياج ما توقعتها ماهرة بهالشكل. لبست بدلتي اللي حضرتها وكعدت أنتظر. نزلت جوه وجوي جواريني مرة ومرت أبوي كعدت مرت إبراهيم وأمها ومليكة بصفي وصديقتي ومرت خليل وأمها وفيروز وضل تكمز. طكوا لي بالميت صورة. إخوتي طبوا وبدلوا ونزلوا. وجوي أهل سلام فعلًا إحساس يخوف بس لاكو مزايق ولا أبد. دخل قاسم ابتسم وعيونه لمليكة باسني من رأسي ولبسني.

سوار شاورتني: ألف مبروك أسونة. وخليل هم خطية تقرب لبسني صاح على مرته: هاي شلون ينفتح تعاي. وتقربت زمرد لبستني وياه قلادة نازكة ما تحملت دموعي انجمعت ومرت إبراهيم قدمت هدية مغلفة مليكة همست: هاي جايب هدية؟ انجبي ولج. وتفاجأت بمليكة تلبسني مخبس بوستني تباوع بعيني. يا رب تشوفين أيام أحلى من هاي الأيام اللي شفناها. غمضت وهمست يا رب. وطب سلام.

كان كلش مرتبك أكثر مني، نزلوا البرقع وسلموني إخوتي له. الهلاهل ترجع وهو يستغفر ربه. يهمس: يمه مكافي. طلعني صعدت بالسيارة حتى ما مزينها. وطلعنا. باوعت له هو عيونه عالشباك. نسيم معلي المسجل ديسوق نتر به: معود طفي صدددك جذب. إي إي شبيك. طفاه باوع لي. درت وجهي. يمكن حقه ويمكن أنا هم حقي ظل كاعدة لقدام ساكتة. وصلنا لبيتهم. نزلت أمه هلهلت بس. بيت عمته طبوا على أعصابهم طبينا للمشتمل. كعدت بالهول وأصيل وإسراء ورقية يتبشبشن.

باعي مبدل الغرفة عشتوا يلوكلها. رقية: إي ينطيهن للفكر. ما درت بال رغم تقصدوا يسمعونا. طب سلام أمه دتهلهل خزرها سكتت. ظل طب لغرفتها وطلعت كعدت بصفي شاورتني: أنا جوعانة شوكت يروحون؟ غصيت ضحك والعيون صارت عليّ. طبت لحضني ظل خجلانة وتضحك. همس سلام: شبيها هاي شكو؟ شاورته أضحك: تقول جوعانة شوكت يروحون. ضحك وجرها حضنها. ما أدري أيش صار بهم طب أبو سلام بارك واندعى وأشر لأخواته. يلا يابا عشاكم هناك خلوا العرسان يرتاحون.

خليل طب ابتسم ودار وجهه عني همس: سلام. أقول لك خابروك؟ لا. وقف وشال فونة شكو. باوع له وباوع لي. تقرب شاوره. سلام فك عينه التفت وفرك وجهه هز رأسه قال له 8 نطلع. إي أنا هم قلت هيچ. طلعوا كلهم بس ظل بقت. سلام ذب رباطه وحذاءه. والسترة. وأنا كاعدة بالهول. همس: أخذي راحتكِ أنتِ ظل بابا خليل قال أخذها يمي اليوم وي فيروزة تروحين؟ لا أبقى يم أسونة. أسونة حتكابلكِ وتكعد ما تروح بعد. صفنت عليه: أبد ما تروحين.

ابتسمت لا ما أروح أبد بعد. لعد حروح وي فيروز. هزيت رأسي أوك. وطلعت ظل. أباوع سلام يوصي خليل عليها بباب المشتمل وطب قفل الباب ما اندار عليّ بقت يباوع من الشباك فرك وجهه والتفت. الهدوء موحش بس هوسة الحكي هناك بالبيت الجبير. تقدمت مبتسم شال البرقع نصيت عيني مرتبكة فعلًا خفت رغم مو صغيرة وأفهم بس هالشي زاد خوفي. وقفني باوع لي بتعب عيونه مطفية. همس: أتمنى تسامحيني على هاليوم لأن ما قدرت أضبط أعصابي. لا لا عادي.

خربت فرحتكِ؟ لا لا. هزيت رأسي، بعدت عيوني منه. دار وجهي بلمسة من حنكي فره عليّ همس: نورتِ دنيتنا أنا وضل. نصيت رأسي تقرب باس رأسي لو التمت الدموع بعيني. باوع لي تنهد: ليش ترجفين؟ لا عادي. أسينات. هم رفعت عيني بعينه. عبس حلقه وجر حسرة. همس بتفهم: ننطي مجال لأرواحنا تتقارب محد راكض ورانا. هزيت رأسي براحة وغمضت هم على قلبي. بقى يباوع بوجهي: إذا صعبة عليكِ أنا أصعب. أعرف دا أحس بيك.

ابتسم تك خد لزم إيدي تلمسها وشالها طلع من جيبه الحلقة لبسها لي باليسرى وباوع بعيني. شلونها هسه؟ حركت إيدي باوعت له: تمام صغرتها. امم. باس إيدي نصيت رأسي. همس وعيونه بعيني وعالمكياج وعلى حمرة شفتي بلع ريق: ألف مبروك. هزيت رأسي منصية بخجل همس: أخذي راحتكِ. طبيت للغرفة راسًا نزعت وفليت الماشات ومسحت المكياج ومسحت صبغ الأظافر. دق الباب: بس دقيقة. إي براحتكِ بس تعاي تعشي.

أوك لبست بجامة عرسان وبقيت شعري محلول طلعت كان بالفانيلة والسروال الأبيض. ابتسم ونصه: هاي خليل جابها. خطية حبيبي. ورفع رأسه باوع لي ونصه همس: تعاي نشوف أكل المصلاوية. كعدت قباله صرت ياكل ويباوع لي وينصي. كان كلش مستغرب وجامد ياكل بترتيب رهيب وهدوء. همس: ما يندرى ظل أكلت لا. هههههه خربتني ضحك. شمعرفها حايرة ببطنها. امم. باوع لي تنهد غسل ورجع كمت أشيل الأغراض وهو يباوع لي. كملت رجعت للهول: آآآ تشرب چاي؟ والله يا

ريت باوع لساعته وباوع لي: تدرين انطونا إنذار. صفنت. ابتسم: باچر بـ 8 نطلع أنا وأبو الخل. خوماكو شيء؟ لا هو إنذار أنا صوجي ما أخذت إجازة زوجية. ما يخالف بس ديروا بالكم. ابتسم هز رأسه وتنهد. تعاي شوي كعدي بينما يخدر الچاي. جيت كعدت يمه. كعد عدل وتلمس شعري على طوله ابتسم باوع بعيني. همس: هواي حلوة أنتِ بس أنا شوي إحساسي مخربط. نصيت رأسي همست صوتي راح: أنتَ قلتها خل نأخذ على بعضنا وعندنا مجال.

اممم بعد إيده وحك رأسه كمت صبيت الچاي أحس وجهي نار من الخجل. شرب چايه وطب للغرفة ربط تلفونه عالشحن باوع لي. هاي شسمه حك لحيته أي شيء تحتاجون السايق قوليله. أوك. أوو حك حاجبه: حاولي أختك بنات عمتي أبد لا ترديهم غلسي للحكي. هزيت رأسي. قال: تنامين لو ما منعسانة؟ قالها مرتبك. وتذكرت حچايه مليكة: أبد لا ترفضي دوسي على روحكِ من يطلب منكِ بس ترفضي بعد ما يطلب. هزيت رأسي فات للحمام.

غسل وطلع ينشف بوجهه، فتح جنطته وخلى ملابسه وداخليات. طبيت اني للحمام غسلت ورجعت شفته نايم ومشغل تك تبل لامب. تقربت للصفحة الثانية، عيونه تحركت تجاهي ونطاني ضهره. تمددت وافرك بيدي ميتة خجل. نمت على ظهري جامدة. التفت مغمض عينه، بقيت اباوعله. صدك يعني تزوجته؟ صدك صار رجلي وحبيبي؟ شلون قدرت أخذ عليه بهالسرعة؟ شلون قدرت أحتوي الخوف اللي أخافه منه؟ فتح عينه شافني اباوعله. رجع سد عينه، همس: نامي ارتاحي. اوك. درت وجهي ونمت.

حسيت فجرية إيده طخت بإيدي من ديتحرك، ظلمة الغرفة كلش. حسيته رفع جسمه باوعلي ورجع شمر روحه عالمخدة. شوي وقام. طلع بره الغرفة. ما رجع بعد. قمت أشوفه بهدوء خاف يحتاج شي، شفته نايم بلا فانيلا على بنه عالقنفة مال صالة. غافي. رجعت للغرفة نمت. كعدني الصبح بنغمة هادئة على كف إيدي، فتحت عيني. لابس هدوم العسكرية وجنطته بإيده، همس: حروح اني. قمت راسًا، باوع لزيكي ودار وجهه ووقف. ما اتريكت، ليش ما كعدتني؟ هناك نتريك، تقرب

مرتبك باس راسي وتلمس شعري: دير بالك على ضلوله. اوك، أمانة الله ورسوله، ترد بالسلامة. عفية دير بالك على روحك. لا يظل بالك، يله مع السلامة. الله وياك. طلع، ذبيت مي وراه. باوعلي مستغرب عاقد حاجبه، شافه أبو صاح: في أمان الله حجي. ها يابه، إنذار كالوا. أي، شمدريني شو صارت غفل. الله وياك ابني. اسينات: توني اسد الباب واندكت وطبت مرت خالهم، هلهلت ونطتني فلوس: هاي هديتج.

وراها العمات يباوعون بالوجوه، أحس يدورون ثغرة وطبت ضل تركض. أسونة انتي ببيتنا؟ هههه ما أروح بعد اتطمني. طلعوا وراها، ما سمعت كم كلمة تسب البدن وسديت بابي، وبدت حياتي وي ضله. أسبوعين وسلام وخليل ما نزلوا، زمرد قامت تجيني على طول، نوبات تبات يمي. ورقية تنزل تكعد يمها وتاخذ الجو ما تخلينا نحكي. حجيها خطية تافه. مولات ومطاعم ولبس وصالونات. وتتباهى بنسيم. واني وزمرد ثنينا نفس القالب نخلصها بأمم وأمم.

لو أنصح زمرد شلون تتعامل وي خليل حتى تاخذ عقله ويقوم ما يخدر يباوع لغيرها مثل نسيم. وتحكي كل حجاية وكالت: إحنا وفريدة الله يرحمها كنا نسوي هيج، لذلك سلام ما قدر ينساها. حتى شفتي بالعرس روحه طافرة ما يقبل أحد يهلهل، عيني الحب للحبيب الأولى. جانت أبد ما تباوعلي من تحكي وتوجه كل كلامها لزمرد، رغم إنها كاعدة ببيتي. خبصتنا توها حامل واشتهت فد شي، وإجاها نسيم من أربيل جايب لها اللي تريده بس لأن توحمت.

واني أدري هالحجي كله تصفيط. كاعدة يمهم بس ساكتة وزمرد خلصتها أمم وأمم. جتني ضل. شاورتني. ورديت شاورتها. ضحكت تكمز فرحانة. وراحت وي فيروز. باوعتلي رافعة تك حاجب، كالت: باعي، إحنا هنا نختلف عن الديوانية والمنطقة مال أهلي، انتي حقج ما ماخذة. هنا منطقة راقية عندهم عيب واحد كدام واحد يشاور. تروحين تتعلمين. عيب، علميها تروحين يمها بغير مكان الخطار وتحكين براحتكم. ابتسمت إلها، قلت لها: صار. ودرت وجهي، زمرد همست:

تلفوني عالشحن خل أجيبه خاف يخابر خليل. راحت تجيب تلفونها من الغرفة وجابت تلفوني يدق. لج سونة هاي رجلج ديخابر. لا بربج، قمت مرتبكة وعيون رقية عليه، رديت: الو. هله اسينات شلونج؟ هلاو شلونك أنت؟ الحمد لله. طولت، هاي ضل خبصتني عليك ومخابرت بعد. ههه باجر أنزل الصبح اني يمكم بإذن الله. توصل بسلامة، يله في أمان الله. الله وياك. سديته وجتني زمرد تركض: ولج ولج خابري السايق دا أرجع هم يله ألحك أتحضر باجر يجون لج.

أي أدري ههه دروحي. عفية بقالج شيرة. خلصتها من تطلعين، مري للصيدلانية اخذي. نطت رقية: خو روحي للمركز واضربي ليزر شخلج. باوعت لها زمرد ودارت وجهها، همست: عفية أسونة خابري السايق. هذا بالباب. خوش، لج يله فيروز. يله باي كلبي، تقربت بوستني: من ينزلون أجيج لو تجين؟ أي إن شاء الله، باوعت لرقية: وانتي تعاي هله بيج. لا عيني، ما أعرف أنام إلا بفراشي، يله خل أروح خابروني البنات دنريد نروح للكوفي.

أي شكو من هالزاوية، جاوبتها زمرد واني ابتسم. باوعتلي وجرت عينها، كالت: ترى شعرج من جوه محروق، يرادله بالقليل شبر قص. ابتسمت: يلومي، ما يقبل أقص منه، أصبح يكولي أكوت عليه طويل. وجهها انقلب، فرت بإيدها وطلعت. زمرد ضحكت كاتمة ضحكتها. امشي ولي انتي، امشي كش. راحوا ومصيبتي مصيبة. مو نظيفة وأكيد جاي من بعد أسبوعين من العرس اللي ما لحك يعرس بيه. بقيت بحيرة، رتبت حضرت أكل خليته بالفريز، كبب مكبب علمتني عليه زمرد، غير تخبل.

حضرت كلشي وضل ويايه، خطية حتى مسح تعلمت تمسح. المنظفة قامت ما تطب عدنا. كملت شغلي ورحت بيت أم سلام اني وضل. واتفاجأ بوجهه ثقيل وتسبح منخفضة. خاف جيف حتى زمرد وما مريت لهم. بقيت أتصفن شبيها؟ كاعدة وتتحسر، آخر شي عافتني وطبت لغرفتها. خلتني بحيرة، جانت هواي تسولف عن أهلها وخواتها بكربلاء والحسينية اللي عندهم. والعوايا الهناك، شغير طبعها؟ رجعت لبيتي وضل ويايه. باوعتلي، كالت: جدو تعارك وي بيبي البارحة بليل. شمدريج ضله؟

كنا نلعب اني وفيروز بالمرجوحة وسمعت بيبي تصيح عليه. صفنت واني شعلية، ليش ويايه وجهها ثقيل؟ خاف هي ضايجة. غَلست عالموضوع. ثاني يوم دوام امتحانات نهائية، ما بقالها غير أسبوع. طلعنا اني وضله لدوامنا. واني بالدوام دز رسالة: اني بالبيت. رديت: الحمد لله على سلامتك. شكرا، حنام أخذي راحتج. اوك. كملت دوامي ورجعت بالخط متلهفة للبيت وأفكر هيج أسوي وهيج أسوي. طبيت للمشتمل راسًا، ضل توها طابة دتبدل، ابتسمت كالت: بابا أجه. وينه؟

بالغرفة يلعب بالموبايل. طبيت مديت راسي، ابتسمت: الله يساعدك. قام تقرب مني: شلونج؟ الحمد لله، تقربت مترددة ما أعرف أسويها لو لا، مثل أخوتي من أبوسهم من يجون لو عيب. بس لقيت روحي تقربت بسته من خده، صفن صفح وباوعلي بهالقرب تلاشت بسمته. بلع ريق يباوع صفح، غمضت عيني خجلانة، فشلت كلش. فتحتها شفته يباوع بملامح وجهي. جر نفس همس: رايح لأهلي اني دازت عليه، شوي وأجي حتى شسمه نتغده.

اوك، قلتها منخفضة رأسي. بقى واقف ما تحرك وتقرب لزمني من زندي، تقرب بهدوء باسني من راسي بكل هدوء وابتعد وطلع. بدلت وشلت شعري، مكياج خفيف وطلعت. ضل كالت: بابا راح. ببيت جدو. خل أروح أسلم وأجيج. خليت الأكل على نار هادية ورحت. أدور عليهم ماكو، وسمعت صوتهم بالصالة. أبو سلام وأم سلام وصوته هو: يمه، اني اللي رضيت واني اللي ردت، أبويه شعليه. وأم سلام تحكي بصوت ناصي وتبجي: لك يمه شلون هيج تسوي؟

يمه دا أكولج ما قدرت، حمزة، نسبتي لحمزة. يلوب ديموت ويلوب يصيح: أختي شلون؟ شلون تردين أعوفها وأخوتها حايرين بيها؟ ياهو اللي يسمع يصرف نظر. ميت واحد تقدم ويسمع بيها متخلف يبطل. وكفتها ويايه بضل ودلالها إلها. شلون ترديني أعوفها؟ عذريني. وشلون ما يصير عندك بزر؟ شلون أكدر أصبر، ولد ما يصير عندك ولد بعد، ولك دا أنتظر يوم يوم. يمممه البنية صارت بعصمتي، ما أريد أحد يتدخل واني عندي ضل بعشر ولد، شسوينا لأبويه عود.

أحجيلك كلمة حجي. اسينات: اسمع وشي شي بيه يتفسر ويوكع، شلون يعني ما أخلف؟ شلون يعني؟ يعني شنو وشلون؟ ختمها سلام: اني لو ما حمزة فلا أتزوج. تصدقين يوم لحد هاللحظة اني ما تقربت منها، لح يوم روحها ويايه. صوتها بآذني يرن، غير لو ما تتوسل بيه آخذها خاطر ضل ترتاح، والله فلا أتزوج. سدوا الموضوع والبنية ما تدري، ما أريد تعرف. مالها ذنب. اسينات: دق تلفونه واني متحجرة بمكاني أرتعش، وذكرى ذكرى توجع بذاكرتي.

دا اطلع، طلع هو، اختفيت. طب لهولهم، اختفيت ورا البوفيه، يحكي بالفون وينتر: الباجر هيج وكت الكل مستلم رواتبه. عمااااد، التأخير هذا منك أخصمك والله أخصمك. سده والتفت ديطلع ووكف. رجيت راسي عالخايط مغمضة، كلشي بيه يبجي، كارهة روحي، مو كلام كزاز ويجرح بيه كان. حسيته من طك شحاطته بهدوء مد راسه ورا البوفيه. طلعت من صفحة اللخ. صفن بوجهي. عيوني فتحتها بوسعها، الصورة ما دتوضح عندي والنفس ضاق. همس: من شوكت جيتي؟ نصيت راسي.

اسينات، تقرب يلزم إيدي، شلت كتفي وميلت راسي كاشّة. بلع ريق، طلعت من يمه بهدوء. لحكني طب ورايه صافن عليه بقلق وين ما أتحرك يباوع. دق تلفونه مرة لخ، باوعلي ورد. ديحجي، ما قدرت أبقى بعد، لبست صايتي وحجابي شلون ما كان، طلعت بره المشتمل. وين أروح؟ منين أجيبه لحمزة؟ ليش اني ما أعرف؟ شلون تأكدوا؟ ليش زوجوني لعدددددد؟ السايق لمحني كال: وين تردين عمو؟ وديني لخليل.

قلتها وغصيت، غصيت بجي، بقى صافن عليه ما قدرت أهدي روحي، تلفوني يدق بالجنطة. واني ما قادرة أنسى كلامهم. وأكثر شي وجعني: لعد تزوج أصيل، خلف لك ولد، خليها أم لضل وأصيل عندي. عني، والله أروح أوقع على عمتك وأكولها أزيدها لسلام. يمممه سدي الموضوع. أتذكر وأضرب براسي. وصلنا ونزلت ركض.