رواية منطقه13 الفصل الثالث عشر 13 - بقلم مريم السعدي

ببالي. اتذكر جنت من اسال عن خالتي امي تكولي جانت تجي وتجيبلي. هدايا بس ابوج كطع رجلها هي. تختلف عننا الله يهديها بعد. اني العليه نصحت
جنت اصفن وين غلطها. اختها ماتت وهي متدري بيها اختها الوحيده

بالعيد الجبير هالعيد حيل ثكيل جان متعببب حيل متعب بدون امي اول نوبه بدون صباحيتها وضحكتها وضحكت ابويه اناقتنا وترتيبنا والاكل المميز المحضرته قبل بيوم باقي بس تطبخه. الصبح.
حسيت بروحي الصبح. كعدت سبحت ولبست بجامه العيد اللي شتريتها وي ابويه من طلعت محسبت بفرحه ابد
لااكو وحده تكولي

هاي شطالعه. مفصله تفصال عليج.
ولااكو وحده تعدل. المخيطته بديها
ترحمتلها واردد كفيتي ووفيتي

طلعت انشف بشعري لكيت ابويه كاعد بالحوش صافن. بغير. ملكوت تقربت منه بسته من راسه

ايامك سعيده يابه الله يديمك فوك راسنا
باوعلي ابتسم همس
كون اشوفج احسن ناس ومرتاحه. يابه
ومد ايده على جيبه طاني عيديتي
كلشي بي غصه. تدمع عيونه وي دمعتي

حانت امي تكوله واني
يكولها مو طيتج البارحه بليل عيديتج
وهي تضحك وتنصي بخجل
مجنت افهم الديدور بينهم بس اصفن معقوله امي طماعه تريد عيديتين

بيومها الصبح عمي راجح خابر كال ريوككم عدي على روح جدو مسوي
ورحنا تريكنا وشوي سولفت وي رقيه رغم عدها خباثه بس شسوي ماعدي غيرها. العب وياها واحاجيها رغم جنت متحفضه. مااحجي كلشي

تونا كايمين من السفره واندكت الباب

طلع قاسم ابن عمي يشوف منو ورجع طب باوع لبويه كال

عمي هاي وحده تكول ام احمد موحوده
ابويه فز ووكع استكانه بحضنه ونفض روحه بمجرد ان سمع اسم امي وكمت وياه اعدل بحجابي قاسم اشرلي بخزره
كعدي انتي وياها شاب
كعدت ونصيت راسي رغم هالشي بس اريد املخه. بس فرض عليه الاحترام

رجع ابويه طلع وي قاسم وعمي واسمع الصياح واليبو

وابويه يصيح روحي كافي روحي
طلعت مهتميت وكفت وره الباب وخاله مروه هم طلعت مديت راسي اشوف مره سمينه مخشله بالذهب. تتعارك وي ابويه. والسياره الجايه بيها بيكب نيسان مكاجتوب عليها بالانكليزي

ابويه يصيح روحي بس
وهي تعد وتصف
موتتها تالي كون عساها بعافيتك اختي راحت سنين حارمني اكول بلكن يحن كلبه ويخليني اشوفها كلما اجي يكلولي شالو ومرجعو تالي تطلع ميته حركتني منهااا من الله لاينطيك كون تلحكها
صفنت عليها شنو تدعي على ابويه
صرت نار ابريه نصه راسه ايده ترجف وقاسم نتر بالسليق
اطططلع اخذها وروح يللله

ونزل السايق ضخم ويمشي بهداوه. افتر بكل ثكل شكله يخوف لاف عصبه. يشماغ على راسه وتيشرت ابيض وبنطرون كابوي
افتر لزم قاسم قاسم فش من الخوف هو بس هوسه لزمه من كتفي شاله بتك ايد
ايدددك شيلهاا من السياره لا ادوسك بيها يلهههه

وشمره دفعه بقوه قاسم. كلشي محجه بس يباوع لابو وسكت
عرفت هاي خالتي صعدت للسياره العالم التمت لمحتني وصفنت مبرطمه. همست

هاي بتها مو  اي بنتها تشبهاا. وغطت وجههه بالعبايه بجت وطلعت السياره باقصى سرعتها مشحوطه والعالم كلمن راح لدربه وابريه فات للطرمه وكعد يم الماطور وعمي راجح. على راسه
اهدا ابو احمد
رجفتني مشعوله الوالدين.

ميخالف خويه.
هي هاي هم اخت. فهمني اني بيدي قابل حركتها منها غير اخاف عليها.
ميخالف
مليكه- بقيت صافنه عليهم  وارجف وببالي ضلت. عبرتها وشكل الولد وسلاحه الصفح

هالفتره  مرت قاتل ومقتول انفجارات ركع. وموت بلاش. الكيلو

هواي تقتلو. هواي انسبو والامريكان بطبتهم. طلعت هواي. وياهم عصابات متعرف الزين من المزين كلها تخاف كلها ملجومه

فتره مرت.  وابويه ماكطع. سوالفه وردوده عن اسالتي.
جنت ام اله

ولببيتي
بده الدوام وبده الثاني متوسط. جنت اشوف صعوبه بس مدرساتي حبابات يفهموني لمن ماافهم. عرفو بيه يتيمه.
رقيه بت عمي ويايه. بالدوام. يعني لاتدكر بيه ولااتدكر بيها. كلمن بحاله

ايام مرت.  واخويه رجع. ويداوم هم ويايه يوصلني ويروح لمدرسته.

جان حيل شاطر. شعله مال نار. عكس ولد عمي. الي يوصلون تدفع. كم مره ومره. تلاشو وياه وهو رزن هاديء يسكت ويغلس اصدقاءه يكولوله ليش تعارك وياهم لتنطيهم مجال ميقبلللهم. يكولهم شعليكم ولد عمي ذولي

ويسكتهم

وخلصنا نص السنه. وامتحاناتها ورجع اخويه سافر. هالمره من طلع. روحي طلعت وياه. وحتى ابويه  ضل عينه عالدرب ويوصي وهو يهمس صار حجي

اول يوم للعطله الربيعيه. بلش متصورت روحي هيج راح اعشق ابويه. تعلقت بي وصلت حد كلما اشوفه صافن احضنه. ويبتسم.
وبليله. من الليالي ملتمين. بغرفه بيبي. هي عالجربايه واني بالكع   وابويه عالكرويت ديسولف النا  وسكت. باوعتله.

صافن عالسما مبتسم

يابه
ها يابه

يابه غنيلنا
ها ههه سمعتي علويه ههه تريد اغنيلها باوع لبيبيتي. بيبيتي ردت. غنيلها شرايده البنيه.

وضحك ابويه سكت شوي وغنه
مرينا بيكم حمد واحنا بقطار الليل وسمعنا دك كهوه وشمينا ريحه هيل

جان يغني من كلبه تطلع. ويتنهد غفيت. من سكت. 
عشر ايام من العطله مرت وجانه تلفون بليل. بيومها تمنيت ماعدنا خط

وكمز ابويه يرد
الو-- تفضل -- اي بلي اني ابو من حضرتك

من اباوع لابريه الوجه انخطف والحلك فتحه وعيونه ليفوك صافن سده وكعد بالكع ايده على راسه اخاف حتى اساله

بيبي تصيح من الغرفه
منو
سلمان
يمهه ردو عليه نشفتو ريكي،سلماننن
ها يوم ها
منو عالتلفون
جر نفس همس
ماكو شي يمه

ووكف محني وفات  الحمام. وطلع

كعدت بصفه
يابه منو اتصل
باوعلي شال ايده تلمس خدي همس

اخوج يابه اخوج
شبي
تنهد. واكع بمشكله الباجر اروحله
يابه بي شي
لايابه مبي هو بس صاحبه مات وهو مقهور عليه

سكت ممقتنعه ابد
وطلع ابويه الفجر هو وعمي سلمان على حضي التلفون الخطوط وكفت ماعرف ليش البدالات انتهت
وانتضر ابريه يجي يوم يوم. وطول سبوع
تالي اجه كوه يمشي طببه عمي راجح وجهه ميتباوع

وباوعلي كال
كلاص مي عمي بسرعه
ورحت جبتله شربه بالكوه وتمدد
همس غطيه ديرتاح عمو
اي عمو
غطيته وبقه عمو راجح عدنا بات ثاني يوم راح. وابويه حجه بتعب

يمه ادعيله لحمودي شديله فوطتج
يا شبي ابنك سلمان
واكع بهبيه صاحبه الوياه ديبني واكع من فوك البنايه ومات وانذبت براسه. وهو ميعرف يكذب كال توجيت بي لزمني حتى لا اوكع وكع هو والعشيره كايمه كاعده وفوتو للسجن وانسجن يمه
كالها ابويه ونصه يبجي بخنيك وببيتي تدك على رجلها  وتبجي

انهد حيلي على اخويه.
نترت بيبي
شكد انحكم
اربع سنين كالها وغطه وجهه والعشيره تكول حضرله  كبره. فد يطلع نقتله. ميكفينا. سجن

تخبلت وركضت عالسجاده اصلي وابجي بقهر متت يومين احنا حالنا مو حال والولد راح شبابه وابويه. راح يموت وراه ذبل عوده حيل

واني اتوسل بي
يابه لخاطري ماضلي غيرك لتاذي روحك
لايابه شبيه. كلها كم سنه يرجع. عادي الانسان يمر بضروف.
يابه صدك فدوه لعينك لتتاذي روحك
اي يابه وداعتج ويمسح دموعي
اهتميت بابويه اكثر وداريته اكثر بيوم من الايام نايمه واسمعه. يهمس وي روحه بنومه

لو مشتاقتلي تاخذيني

شوكت مو تعبني الانتضار والمتانه
كمت ميته خوف خفت ليموت نفسها بنومه وعيته فز
ها يابه
يابه فدوه وبجيت يابه لتعوفني مضل عدي غيرك
وين رايح نايم هياني عدج
سمعتك تحاجي امي
وين اني اصلا حتى محلمان بيها شكلت احجي
عرفت هالشي اشاره الي متت خوف هزيت راسي بالرفض حتى اخاف اكوله شكلت ويصير ميت مره حجيته بالحمام حتى ميتحقق كانما اني الشفته. للحلم موهو

وره يومين داوم ابويه للشغل طلع الفجريه. وي عمالته

واني كلبي وجعني طلعت وراه واباوعله التفتت من وصل نص الفرع ورد رجعلي
ها بويه بيج شي محتاجه شي
يابه فدوه دير بالك عروحك
ابتسم ورجع طب حضنني وباس راسي همس
والعده هالجمبده بالبيت. مايرد الها روحها مرتاحه بويه. الكاتبه الله يصير

طلع وسديت الباب ابتسم
الله يحبني لان اصلي واقره قران هواي مياخذه مني ورحت نمت يم ببيتي

توني اغفى واشوف بالطيف كانه امي مفرعه بالشارع لابسه ابيض وشعرها على طوله محلول وووجهه يضوووي بس ماواكفه على الكاع جن طايره

ومدت ايدها من اباوع الناس تروح واجي محد يشوفها ولاهي تشوفني. والمل يتصايح ويبجي والناس  كلسا تصير طيور بيضه تتحول بالشارع . هناك والمح ابويه يدور ويفر براسه ولمحها ابتسم واني اباوعلهم شون نضراتهمم مليانه اشتياق

واني حجت والصوت بي صدى
سلمان. امشي ويايه

صبوحه جيتيني مكذبتي نفس عادتج
امشي ويايه. بعد روحي

ولزمت ايده كادته وابويه صار مثلها تحول الى شوي شوي ابيض من بدايه رجله وصل لنص جسمه همس
صبوحه مليكه تتنانيني هي واني شون اعوفها
والتفت عليه يباوعلي ويتوسلني بعيونه يريد السماح والعقو
واني صافنه
باوعتلي امي ابتسمت
ملوكه سبعه ومعدله لتخاف عليها بعين الله تضل امشي ويايه
ودخل ابويه البياض لكل جسمه وعينه عليه. وطار
فزيت من النوم صفنت وصرخت بعلو صوتي
يااابه.
يابه لتروح فدوه لبست عباتي بييتي فزت وتصيح شكوو شبييج
يابه والله حيروح ويعوفني

الخوف اللي خفته بيومها مجنت حاسه بي قبل ارتعش.  وانخض لبست عباتي وركضت بيت عمي راجح لان راح وياه. وبيبيتي تدك والطم مكدرت ابقى بعد طبيت خاله مروه. تغسل بالكرراج وعمي محمد نايم بالعول طبيت اركض
خاله فدوه
شبيج ولج. شكوو ببيتج بيها شي
لالا خاله خابري عمي راجح عالموبايل ميته خوف على ابويه

بقت صافنه عليه

شبي ابوج
مادري طيف مر عليه
باع هاي البطرانه روحي يمه روحي ماكو شي نعلي الشيطان

خاله بروح ابوج
صفنت عليه عبست وجهه ذبت الصونده وطبت شالت مبايلها وطلع قاسم توه كاعد من النوم باوعلي رفع تك حاحب. كال

شبيج من الصبح
مرديت عليه واباوع لخاله مروه يدددك ومحد يرد كلبي عني ودموعي تجري عمي محمد وكف اجه
كال
شبيج عمي
مهتميت حيلي خلص مابيه احجي بعد ورد عني راجح
هااا
هاا راجح هاي صبحه تريد ابوها يمك
لا توني عفته ورجعت هو بباب الشرجي شتريد ملوكه

بهاللحضه صار انفجار بس بعيد هو بعيد وانرج البيت. رج طلعت للشارع  اركض  وابجي فاقده. واني مادري وين اروح خليل لحكني ويصيح
لج تعاي وين موليه
واني مادري وين اروح باوعتله. نفسي انكطع لزمني من ساعدي وخزرني
لج العالم تباوع خرب يومج فضحتينا
شهكت كوه اتنفس
خليل ابويه راح وروح امي راح
عيوني شبحت اباوع للشارع احس الدنيا تفتر عليه واحس بريحته صارت بصفي.

بيني وبين روخي
ها يابه مكدرت بعد رحتلها مفكرت بيه

وحق الحق. بهالحجي وي روحي
والجوامع كبررت  الصوت ضل باذني. يصير صدى

وكانما ربي يجاوبني اني وياج. لو البشر يترك. الله ميتركج بلعت ريك باوعت للسما. 

امنت بالله. ورجعت هادئه للبيت بيبيتي خطيه ميته بجي زاحفه للشارع بالباب  والنسوان يمها ملتمه طبيت بستها وانتضر
جنت متاكده راح وارجف اريد يوصل خبر ويكذب. الطيف
بسس هيهات

احس حتى البيت. تغير جوه. فرحان احسه. اتلفت لمكانه. ومكانها كمت رتبت حيل مبيه. اول بنيه تنتضر موتت ابوها المتامده منها بس مرتاحه لان ارتاح. لان شفت بعينه نفس ابتسامه قبل من يطب للبيت وتتلكاه امي

سبحت بيبيتي. تهيات لكلشي

واردد
مو وحدي الله شكبره ويايه

ساعه. ساعتين والباب اندكت غمضت عيني وكمت كوه سحلت روحي

طلعت فتحت الباب عمي راجح منصي وميت بجي قاسم صافن بوجهي وخليك وعمي محمد جرني لحضنه. حضنني واني

بس لشه بله روح

كلشي مكدرت احجي

وطبو كالو لبيبي.

راسن. بلحضتها تخربطت وانشلت حلكها. وايدها اخذوها بقه بس قاسم يمي

واني بس صافنه
بقه يباوعلي كال
شون عرفتي،باوعتله ونصيت
بلعت ريكي
لكو جثته
هز راسه وبجه منصي راسه

وكانما. كلي ابجي ويايه والدموع. مدري منين تطلع  بس بخنيك

وكف كال
اساعدج اشيل غراضج كومي عدنا
بقيت اباوعله واباوع للبيت

واتذكر

الله ويايه بس مابيه حيل ودعي بلكن ياخذوني يمهم

شال الغراض ويباوعلي
اخذ هاي
تردين هاي
واني بس صافنه
كوه جاب سياره واخذني رجعت لبيت جدي الهوسه والعياط واللطم واليبو  تعبتني
جرتني رقيه ماانسه وكفتها قاسم كاللها
خليها بالغرفه لتطلع تتخبل تره
وطبيت صافنه
شون حتكون حياتي
شون حعيش

وين اروح

معقوله. عافني
احمد من يسمع شيكول شيصير بي

اربع ايام حزني وعيوني منشفت. ولا اكلت شي بس مي وعيوني شابحه. عمي راجح حنين حيل. بقه نايم بالغرفه. يمي ويم ببيتي ورقيه ويانا

حدما كمل اسبوع فقت من صدمتي

صار الوجع ياكل بيه. والبحي ميبرد كلب
لاول مره بكل حياتي من عمري٣  سنين اترك صلاه.
من صغري. اصلي ولو غلط ومن كبرت تعدلت وهالفتره تركتها

منو اليتحملني. كلهم راحو

كلهم رجعو لحياتهم واني حياتي انتهت من راح

يتبع
مريم السعدي

---
يتبع