رواية مراهقة والاربعيني الفصل الاول 1 - بقلم ڼدىَ

#مراهقه_و_الأربعيني

،،،،،،،،بقلم زينب ماجد،،،،،،،،

الحلقه_1

اين قلبي من ذاك القلب المتحجر..
او كلما تقربت اليه خطوه.. ابتعد..
وكلما حاولت ابعاد قلبي عنه اقترب..
ف يتركني في نارً لا ترحم ولا تِذر..

المراهقه.. هي فترة انتقاليه من مرحلة الطفوله والاستعداد لدخول مرحلة الشباب..

عادة تكون من عمر 12 سنه الى ال18 او تستمر الى عمر 21 سنه...

في هذه الفتره.. يكون عقل الانسان متقلب .. مرحله ليست بالسهل.. ف فيها يتغير شكلك صوتك فكرك مشاعرك..

هنا يكون الانسان متقلب المزاج... يصعب على الانسان البالغ فهم ما يشعر به المراهق الا الاب والام..

لذلك يفضل احتوائهم وترسيخ المبادى الصحيحه في عقلولهم بدل تركهم لاشخاص مجهولين الاخلاق تعلمهم اشياء لا تناسبهم.. ف يقعون..

~~~~~~~~~ زينب ماجد ~~~~~~~~~

الموصل_حي الرفاعي_عائلة يحيى_الساعه 10 مساءاً 

يحيى:- دخلت للبيت بليل جيت من الشغل.. فتحت الباب صحت يووووووم

ام يحيى:- هلا امي هوني  انا تعال

يحيى:- اشونكي يمه..

-هلا حبيبي اشلونك انتا .. اش عملت على شغلة اقبال

-والله يما بعد حكيت مع اخوها وقال ان شاءالله خير .. بس انا خايف ما يعطوها..

-لا تقول هكذ قول ان شاءالله

-يما منو يقبل يعطي بنتو لويحد ما عندو اهل ولا عمام ولا عشيره

-اخوالك موجودين يا امي لا تقول هكذ وكل امرك لله..

-اخذت نفس.. امنت بالله يما امنت بالله.. الا  اقللكي صدق... ليليان وين

-تلقيها تدرس بالغرفه اش تريد منها

-جوعان تعملي اكل.. ناديت... ليلياااااااااان ... قمت على رجليه ومشيت وانا اصيح.. لك يا ليليااااااان

ليليان:- اهووووو اش يريد هذا ما يتركو الويحد يدرس براحتو..  بقى ينادي صرخت هااااا هااااا

-وجع يلي يوجع قلبك تعالي هوني احكي معك

-لا وفوقها يغلط..

ام ليليان: اي يا امي قومي شوفي اخوكي اش يريد..

-قمت هياني قمت.. اووف هااا يحيى اش تريد

-تعالي اعملي اكل جوعان كثيغ

-قاعده ادرس انا ما اطيق اعمل هسه اصبر

-اقللكي جوعان ما تفهمي انتي تعالي بسرعه لا تجبريني اتصرف غير تصرف..

-اوووووووو ليليان ليليان والله تعبت ما في غيري بالبيت يعني ما تقولو بنت تدرس وتعباني.. امشي للمطبخ وانا احكي. 

والله تعبت ما احد يحس بيا  يقول هاي البنت مسكينه انا من يوم يلي مات ابي انتو ما حد يرحمني..

يحيى:- لك قصي السانك لا تخليني انا اجي اقصو لراسك والله

-نصيت صوتي وانا اطلع الاكل من الثلاجه واحكي وابكي.. كثيغ اشتاق لابي هو الوحيد يلي يحس بيا

انا تعبت يارب موت واخلص من هلعيشه

يحيى:- بعدك تحكي لك يا ليليان كافي ايش قلتلكي بس اعملي اكل..

-اي وانا خدامه ليليان قومي ليليان قعدي.. ما حد يقول هاي البنت قاعده تدرس كل شوي قومي قومي

-ياااا الله انفجر راسي اشقد ما حكيتي ..والا اقللكي يلا احسن وانا يلي كنت جايبلكي هديه.. خففتي عني يرحم ابوكي

ليليان:- بلعت ريقي ااااا لا يعني انا ما قصدي اتضايق من عمل الاكل بالعكس انت فهمتني غلط انا احكي هكذ بس لانو مشتاقه لبابا وتعباني من الدراسه..

-حكي يفيدكي ما ينفع ويايا

-طيب بس اغشع (اشوف) اشنو الهديه

-راحت لغيرك يا حرام

-بيعطيك قلبك هدية اختك الوحيده تعطيها لغيرها

-صراحه لا.. بس هي حيوانه تحب مصلحتا بس

-لا لا ما هكذ ابدا.. كل القصه كنت تعباني يا اخي اشبيك انتا..

-بقيت ادحق بعيونا وابتسم.. طيب راح اعطيكي لما تكملي الاكل..

-لا لا لا هسه هسه علمود يصير عندي طاقه اكمل الشغل بسرعه.. 

-هههههههه طيب طيب... دخلت ايدي بجيبتي وطلعت كيس في شغلات بناتيه.. واعطيتو الها

ليليان:- طلعلي الكيس وبي اسوار وحجل و محبس وقلاده خناقه يصيرون من خيط اسود نايلون مطاط  

دحقتو وانا طايره من الفرح اخذت الهديه وحظنتو لاخي حبيبيييييييي احبك احبك احبك..

-وانا احبكي بس كملي الاكل يرحم اهلك ميت جوع

-يأمر حبيبي يهوووو

-هسه صرت حبيبي ... طيب وشغلة موت واخلص نسيتيها

-ههههههههههه لك لا تصدق كلشي.. انا احكي كلام فاضي

-ليليان كملي الاكل وتعالي اقيعدي معي عندي حكي نحكي انا وانتي بخصوص حنا

-اووو يحيى صدقني ما اريدو لحنا  بس امي.....

-كملي وتعالي نحكي

- ماشي خليت الاكل ع النار وقعدت البس بالاكسيسوار يلي جابم يحيى

كثيغ حيلوات وحبيتم خاصه القلاده ع رقبتي صارت تجنن..

لحظه قبل ما ابعث الاكل لاخي.. ضروري احكي عن نفسي شوي..

انا اسمي ليليان.. عمري 17 سنه.. صف خامس علمي..

مسيحيه بس اخي مسلم..

شغله حيرة كل من شافنا انا واخي.. اشلون انا مسيحيه واخي مسلم رغم انا وهو من نفس الاب..

ابي اسمو جرجيس.. مسيحي من ام واب مسيح.. اتزوج امي وكانو سعيدين بحياتم..

بس الله شاء وما رزقم اطفال.. وهو يحبها لامي.. ما يطيق يطلقها.. بس كان يحب انو يجيلو طفل..

7 اسنين ما تركو دكتور الا ورحولو كن يعالجو امي بس ما تعالجت..

تعسر الامر على بابا بوقتها.. الطلاق صعب عند المسيح ما يقدر يطلق براحتو.. الا بخيانه ودليل يثبت خيانتو يلا يتم الطلاق

هكذ قانون المسيح بالعراق الطلاق عندم كلش صعب.. وايضا ماكو زواج ثاني دينا ما يسمح بتعدد الزوجات..

ف بقى بابا حاير وهو بنفسو الطفل.. الى ان قرر يسلم ويعتنق الاسلام حتى تتغير جنسيتو ويسمحولو بالزواج من ثانيه..

وبالفعل اسلم... ولما اسلم اهلو كلهم تبرو منو اعتبرو كفر بدين المسيح.. فطردو منم وانتقل مع امي اللي ما طاقت تتركو وحدو.. وبقت وياه..

واتزوج مرا اسمها خالديه.. وبعد شهرين حملت خالديه بطفل وجابت اخي يحيى بعدها حملت بطفل ثاني وسمتو امير..

بس امير ما طاق كان مريض اول ايام وتوفى.. بعدها ما صار عدها اطفال وقيعدت وبقت مع بابا..

بعد سنين وبمشيئة الرب قدر لامي تحبل وتصير حامل.. كان بابا كثيغ سعيد بحمل امي..

وكأن معجزه صارت.. ومرت الايام وجابتني انا ليليان..

اخي كانت امو مسلمه فعلمته الاسلام وما قبلت يصير مسيحي..

وانا امي علمتني المسيح وما قبلت اصير مسلمه..

ابويا كان غجال (رجال) فقير يا دوبو يشتغل ويرجع يلف راسو وينام.. ما عليه بينا

بس الامانه لله كان يحبني كثيغ.. ويدارينو.. وكنت مدلله عندو .. لاني بنت حبيتو يلي من دينو الاصلي ويلي حاربت ووقفت وياه طول عمرو

كان يحب يحيى بس مو مثلي انا كان يحبني اكثغ..

بحكم جنسيتي يلي تقرأ مسلمه.. انجبرت ادرس الاسلام واطّلع عليه.. بدرس الاسلاميه..

وكنت احفظ ايات قران كثيغه.. بس ما اسلمت وبقيت مع امي احظر قداس كل يوم احد واصلي وانتمي لجذوري وما اسلم..

كبرنا وصار اخي اسلامي جيد ويحفظ القران بكثره وبابا ما كان يمانع عندو الدين انك تعبد الله ما كان يمنع نتبع من

اما انا فكان الصليب ما يفارق رقبتي وكل دعواي ليسوع وامنا العذرا..

قبل سنه شاء القدر وتمرض بابا بمرض سرطان الدم.. حاولنا نعالجو بس ما قدرنا 4 اشهر وفارقنا

كثيغ بكيت علينو..  كان حبيبي وصديقي وامني واماني.. من مات حسيت انو انا وقفت حياتي وما بقالي احد استند عليه

صح كان يحيى موجود بس مثل اي اثنين اخوه.. نتكاون على طول وبعدين نتصالح.. كثيغ مرات يقسي عليا بس يصالحني ما اقدر اكرهو ابقى احبو لانو اخي الوحيد..

من بعد موت ابي.. اخي يريدني اتزوج مسلم حتى اسلم.. وامي تريدني اتزوج مسيحي حتى ابقى ع ديني المسيح.. وما اكفر

انا ما كان عندي مانع بالاديان .. بس انا ما عاجبني تدخلم بحياتي بهكذ شكل .. لسه ما خلصت دراستي..

ومثل اي بنت.. تنتظر فارس احلامها يجي ياخدها بالفرس الابيض وامشي معو لمكان بعيد عن صراعات اهلي القوميه..

ابن خالي اسمو حنا .. تقول امي انو هو يحبني كثيغ ويريد يتزوجني.. بس انا ما احبو ابدا..

حنا شاب عمرو 21 سنه طالب كلية ما اعرف اي قسم ولا يهمني اعرف.. بس شكلو اشقر وعيونو زرق والشعر كفشه.. والطول ما اعرف كم مو طويل يمكن 170سم..

صراحه اكره هذا الشكل كلش.. احب صفات عراقيه اسمر شعرو مرتب ما كفشه.. خشن يعني احس بينو رجل

اما حنا فكنت احس نفسي جنبو غجال قد ما حلو ويتمايل بالكلام ويجبر حالو يحكي بغدادي عود حتى اغشعوني انا مثقف..

ما كنت احب هكذ تصرفات وشكل ابدا.. بس امي مصره اخذو وتقلي اخذي اللي يحبك ما اللي تحبي..

انا ما اريد اتزوج ابدا اي حب اي بطيخ.. امي تحكي وحدها.. اروح اخذ الاكل لاخي احسن..

خليت الصينيه وقعدت جنب اخي .. هو ياكل وانا شاركتو الاكل..

يحيى:- ما تعشيتي

-لا تعشيت بس اشاركك ما يصير ؟

-هزيت راسي ... مفجوعه..

-هع هع هع

-اقول ليليان حنا اش سالفتك انتي وامك وياه..

-يحيى دخيل ربك والله ما اريدو..

-طيب ليش عمتي تقول يريد يخطبك

-امي تحكي باللي يطلع بمزاجها..

-ليليان انا صديقي خالد تقدم لخطبتك امبارح   اشنو رأيك..

-يحيى اشنو تحكي انا ما اريد اتزوج

-وليمتى؟ ليليان انتي كبرتي

-اشنو كبرت يحيى عمري 16 سنه.. وكل اللي معي بالمدرسه ما متزوجين..

-وين تريدي توصلي بالدراسه.. اللي عندم شهادة هندسه ما فلحو ولا لقو تعيين وانتي تغيدي تدرسي ليليان فكري اكثغ بحياتك

خالد غجال والنعم منو وانا امن عليكي عندو اما حنا ف انا ما اقبل بي ولا اريدو ابدا.. خليها ابالكي

-يحيى وانا اقلك ما اغيد لا حنا ولا صديقك.. فهمت  قمت منه زعلانه واعصابي تالفه. 

يحيى:- ما على راحتك تتزوجي يعني تتزوجي اريد اتزوج واخلص .. ما اخلص عمري وانا اصرف عليكي وعلى امك..

ليليان:- اشنو اللي صرفتا علينو هااا .. خالي قاعد يبعث لامي كل شهر مبلغ واحنا نصرف منو..  استكثرت الاكل يلي انت تتسوقو للبيت..

اطمن منا ورايح اكل اندومي وما اشاركك الأكل .. ارتاح... تركتو وهو يحكي ويغلط ...رحت للغرفه لاقتني امي..

-اشنو يريد منكي يحيى

-يا ماما بس خلصوني ما اريد اتزوج حرام عليكم.. خلصوني

-يا حيوانه حنا يحبكي ومستعد يلبيلكي كل اللي تتمنيه اشنو تغيدي اكثغ ؟

-اللي اتمناه ما اتزوج بس... فهمتي..  رادت تحكي.. صرخت يا امي يكفي ما اريد اسمع شي لخاطر يسوع يامي

لزمت الكتاب اريد اقره بينو ما افهم شي قد ما عقلي بي كثيغ سوالف يعني اشنو ما اغيد اتزوج هي بالغصب..

طبقت الكتاب.. وحظرت جدولي وصفيت جنطتي وغراضي وفرشت الي ولأمي ونمت ع فراشي وانا افكر..

اوووف يحسبون عندي ام.. كل هما اتزوج وتخلص مني ولا كأني الوحيده.  وتجبرني اتزوج ابن اخوها المايع

وينك بابا لو انت هوني ما كان انا حالي هكذ كان منعتم وقلتلم هاي بنتي الوحيده ما اسمح لويحد يأذيها..

يا مريم العذراء يا أمي ساعديني ارجوكي.. صرت ابكي بفراشي كثيغ لوحدي.. شوي وحست امي عليا

-لا يا غبيه ليش تبكي انا اغيد مصلحتك بس يلا ابكي براحتك من يبكي كثيرا يضحك اخيرا.. ابكي اقللكي ابكي بتالي راح تضحكي ويا حنا كثيغ  

-ينعل ابو حنا

-اشنو قلتي ولك

-قلت تصبحين على خير امي..

<<<<♡♡♡>>>>

الانبار_الرمادي_بيت ابو حرب الساعه 11 بليل

عابد:- ولج انتي معليج بيه افتهمتي احب 10 عشرين انتي شكو شنو ترديني كلي الج

نور:- هو شنو شعليه بيك غير رجلي عجل اني ها شنو خراعة خضره يوميه حاب عليه وملابسك كلها حمر نسوان

عابد:- الكعده يمج تكصر العمر اكوم اشرفلي

-اشو والله متكوم .. عابد تبقى على هاي سوالفك وحق ال لا اله الا الله ساعه ما ابقى هنا. 

راد يطلع صرخت ما تطلع والله يوميه حاگرني وما اديرلي بال والله متطلع الا تفهمني امرك..

-لج وخري مني لا اجتلج والله بالله

-اجتلني ما اوخر افتهمت هسه تاخذني بيت اهلي وما ابقى والله

-لمي ملابسج عساج لا جيتي اليكول اني ميت عليج..

صراع:- دخلت للبيت اسمع صوت عرايك عابد ومرتو.. مشيت للهول ووكفت يم الدرج صوتهم واصل لاخر الدنيا

دحكت الحجي طلع.. صرخت شنو قضيتهم ذول

الحجي:-سوالف عابد يابه ما تعرفه عوفهم هم يهدئون وحدهم

-شنو نعوفهم يابه شهرونا باصواتهم خل اصعد اشوف شنو موضوعهم..

صعدت ومشيت خطوات لغرفتهم اسمع بس مرتو تبجي ..  دكيت الباب..

عابد:- منووووو

-انه صراع افتح

-هلا ابو حرب تفضل..

-فتحلي الباب ودخلت.. شنو انتم متستحون متگلون البيوت الها حرمتها صوتكم ولاصل لاخر الدنيا شجرالكم  

نور:- خويه صراع احجو وياه تعبت والله تعبت.......

عابد:- ابو حرب بس خل احجيلك.........

صراع:-بله اسكتو اثنيكم وانجبو خل افتهم اثنينكم تصارخون صرعتوني...

عابد:- صراع هيه......

-كلت انجب واطلع بره.. ما اريد ادحك وجهك كبالي بسرعه.. اخذ باكيت جكايره و طلع بعصبيه.. يضربه وجع طلعتو لان شفت مرتو تلم بغراضها

فكسرت بي حتى هي تستحي وتكعد.. درتلها انتي شجاي تلمين..

-اريد اروح لبيت اهلي

- اي مو هي لعب جهال يوميه اهلي... هذا بيتج واحنه اهلج.. سالفة اروح لاهلي عيب لا تعيديها سمعتييي

-لا ابو حرب والله مليت ما اكدر بعد.. تعبت من سوالفه يوميه

-شنو اللي ما تكدريله نووووور...اريد افتهم من تزوجتي شكان بالج الزواج ...هاااا يباوع الحلكج ويخلصها وياج فراش ... شوي هدي وكعدي وكبري عقلج

وغصب عنج تقبلين بي هذا رجلج..و المره المعدله تتحمل رجلها بالزينه والشينه..

شناقصج هاا كولي فلوس اكل ملابس عيشه كلشي ما كاصرج بعد شكو .

-ابو حرب وخيانته الما يتحملها اي بشر تعبت منه والله

-خيانتيش جابلج مره وحطها على فراشج؟.. گصر عليج وشفتي راتبو لصاحباته..

اكعدي شوي واكضبي السانج وياه اني من جوه فار دمي من صوتج بوجهو.. هو شلون..

حامل وابطنج توم موليه لاهلج شتسوين.. منو يتحملهم.. وعبالج من يصيرون نخليهم الج لو بقيتي عد اهلج

والله بيوم ولادتج ناخذهم منج.. فصبري وصيري ادميه وصوتج ما اريدو يعلى بالبيت ..

والا تشوفين مني شي ما يعجبج والقران.. تركتها وصفگت الباب وراي... ونزلت شايط على عابد.. لكيت امه واكفه كبالي

ها ام سعد ابنج التحفه وينه

-ابو حرب لا تتعارك وياه تعرفه هو طگه ونص

-اشو ابعدي من جدامي

-ابو حرب عدي  الليله على خير دخيلك...

-اششششش وطبي جوه انه وياه نتصافى.. طبكت الباب وراي وطلعت صحت عااااابد..

دحكلي وشمر جكارته بالكاع وسحكها.. مشيتله.. اول ما وصلت انطيتو راشدي..

-ابو حرب شسالفتك يخوي مو صغير وتضربني

-دامك مو صغير ..صير رجال و استرجل مو حسك  وحس مرتك يلعلع بنص البيت..

صوتك حسك اسمعو ومحمد ادفنك ..

-ما اريدها كوه.. اطلكها واجيب عشره احسن منها والله

-تاكل خ...   وتنجب افتهمت.. بنات الناس مو لعب بايدك تزوج واطلك بكيفك راسك اكصو والله

يا عار مره محترمتك ومقدرتك ومداريتك وحامل منك بتوم شرايد بعد ولك..

-دشوفها هم وجه هاي وادحك بيها حقي ادحك (اباوع) للحلوات اذا هي جنها قرد

-ما غيرك القرد يا قرد.. لك حامل بتوم تعرف شنو توم.. قندرتين حطهن على راسك وامشي مراح تتحمل وتتعب مو ثنين جهال ابطنك شنو من بشر انت..

ولك كديش  مرتك هاي.. حبها داريها شوفها شتريد .. انت تاليها وياك زوجناك كلنا تعگل بليتنا بلوه

-ابو حرب بس لا تدخل اني اعرف اتصرف وياها  

-اسمعني لك والله بالله حسك لو حس مرتك اذا سمعتو بالبيت انته حصتي چيله احطها بكلبك وشوف اذا ما سويتها.. وكول ابو حرب كال. 

دفعته ومشيت.. دخلت للبيت من الباب الثاني.. دخلت لغرفة امي الحجيه..

-ها الله يساعدج يمه..

-هلا ييمه شلونك

-شلوني بعد من وره هلناقص عابد..

-يمه هذا اغم توكع وذرة السانك وهو ما يتغير

-اريد اشوفه ما يتغير الا اصلخه والله.. انداريت على حلا بنتي.. شدسوين يابه..

-كاعده على الانستكرام بابا..

-باباتي ابتعدي من هلمواقع الطايح حظها تفسدج يا بويه..

-بابا قابل اني ما افتهم . صار عمري 17 سنه وانت تخاف عليه.  لتخاف باباتي

-اخذت نفس وكلتلها كومي سويلي لكمه بابا خل اكل ميت جوع

الحجيه:- عبالنا متعشي بره وما عزلنالك اكل

-لا والله متعشيت امور هواي براسي وما ادري دايخ شلون احلها

-كلنالك ييمه خل نخطبلك اخلاص ما قبلت

-يمه شتحجين انتي لخاطر الله..ما بيه خلك نسوان . خليني هسه كافي علي هموم الشغل مالتي الوضع بالعراق حيل تعبان ونقلوني لبغداد..

-ياااا يمه صراع.. نقلوك ليش

-بعد يمه الاوامر مو بكيفي لهيج ضايكه روحي دوامي اسبوع هنا واسبوع هناك.  مرار..

دحكت على ابني حرب نايم.. تمددت يمه وابوس بيه تحرك بفراشه.. الذيب مال ابوه شلونه

-ييمه خطيه عوفو نايم

-يمه مشتاگله الناقص ما شفته اليوم

-غير بمدرسته ضهري

-حاولت وياه يكعد زعجتو بلحيتي ضاج وكام يتذمر.. بستو وغطيتو وكمت..

-ييمه شلون تبقى هيج بلا زواج

-كاعد على كلبج يا يمه ؟

-لا يبعد امك بس اريدلك مره تطرد عنك وحشة الليل

-وحشة الليل .. اخذت نفس هو يحتاج بس يمه دايخ ما بيه والله خلني اعيش بوحشة الليل بوحدي
ولا اتجي وحده اداريني بليل وبالنهار تشلع كلبي

-ييمه مو كلهن مثل وجدان..

-وتردين اتزوج اخت وجدان... حتى تعل كلبي مثل اختها

- عجل ياهي التريدها

-ما اعرف يمه الله اذا قاسملي اتزوج مره عسما بالصين يجيبها ويزوجني بطرفة عين خليني هسه من هلموضوع

اتركيها على الله..

- ارد اشوف التاخذها ومتانيها تجي من الصين شلونها يا ابو حرب.......يتبع

#مراهقه_و_الأربعيني

،،،،،،،،بقلم زينب ماجد،،،،،،،،

الحلقه_2

الموصل_الساعه 6 ونصف صباحاً 🕡

جرس المنبه 🔔🔔🔔🔔

ليليان:-نايمي والجرس يرن... سحبت المخده من تحت راسي وحطيتها على اذني..

الام- يا ليليان ما قاعد تسمعي المنبه اقيعدي عاد..

-اي يا امي اي .. دقيقي بس نعسانه والله ... بقى الجرس كل شويه يرن.. الى ان قعيدت..

امي نايمه.. انا غسلت.. ومشطت شعري.. وظفرتو.. ولبست.. وطلعت.. ما من عاداتي اتروق (اتريك) الصبح..

لان ما احد يقعد وانا استعجل اطلع كن اروح ع بيت صديقتي ف ما الحق اسوي اكل.. اخذ من جيزدان ماما مصروفي ال1000 دينار واطلع..

رجعت الباب ورايه ومشيت ع بيت صديقتي ساره.. ما عندي خط.. نتمشى كل يوم ونرجع هكذ..

دقيت الباب.. شوي كن طلعت.. بستها وقلت صباح الخير يلا نلحق نوصل..

ساره- يلا... قريتي الامتحان صعب كثيغ صح..

-ما كثيغ بس يحتاجلو تركيز وانا بسبب امي ويحيى طاير عقلي..

-اشنو اللي صاير..

- طالبني غجال اسمو خالد من يحيى ويردني اتزوجو.. وتعرفي امي.. وانا حايره بينم..

-ما عليكي منم .. اقري واجتهدي والتوفيق من الله واللي كاتبه يصير..

-والنعم من الله..... بقينا نمشي لحد ما وصلنا ع المدرسه.. قبل ما يدق جرس الاصطفاف انا وساره وجهنا ما رفعنا من الكتاب كن نقره..

دق الاجرس واصطفينا.. واجت المدرسه تفتشنا.. ع الاضافر والشعر واللبس.. انا ما اخالف بشعري..

اضفرو والمو ما انزل لا قذله ولا شي ثاني.. ولا ابس تراجي ولا محبس واحرص قص اضافري كلما طولو..

التزم والمدرسات يحبوني.. بس يحاسبوني ع قلادة الصليب هم يعرفو ان جنسيتي مسلمه وانا مسيحيه لهكذ يقولو لا تلبسي القلاده ممنوع لبسم بالمدرسه..

بس انا ما انزعها حبا و ايمانا بيسوع .. اجت المدرسه.. فتشت القدامي.. واخذت منها القراصه الكبيره اللي تحت الحجاب..

فتشتني وقالت.. اش قلتلكي يا ليليان..ليش ما نازعه القلاده..

-ست ارجوكي والرب احبها وما اطيق انزعها ..

-لو ما احبكي كان عاقبتكي.. ما على كيفكي.. باكر ما تجي لابستها مفهوم..

-سكتت.. كملنا ودخلنا ع الصف.. كنت متوتره وانا اقره واحس كلشي ما حافظه من الماده..

امتحان كيمياء.. وصعبه غثيغ.. بس ظهلت مدرسة الرياضيات.. وقالت الامتحان ع الدرس الثاني طلعو كتبكم..

درسنا وصار الامتحان وكلعاده.. مغص قوي قبل لستلام ورقة الاسئله.. لحد لما قريتها اوووف انزاح همي وكانت سهلي..

حليت.. وانطيت الورقه.. ورجعت قعدت.. دق الجرس وطلعنا كلنا فرصه.. اخذت الكتاب واتحقق من اجوبتي.. صح بس بيهم غلط..

ساره:- اشلونكي ان شالله جاوبتي.. ؟

-غشعتها سهلي بس عندي اخطاء.. تقريبا اخذ ب 80..

-يلا عادي تعالي نشتري..

ليليان:-طبعا انا وساره صديقات من كنا بصف ثاني ابتدائي ووصلنا للخامس علمي ولليوم ما افترقنا.

لان جيران واصرينا نبقى سوا وما نفترق.. احس انا وهي كثيغ نتشابه.. ما نختلط مع البنات ابدا..

لأنو نحس البعض قليلات ادب كل حكّيم (حجيهم) بالشباب ف خفنا نختلط من يومنا وانعزلنا..

هي مسلمه بس كثيغ حبها .. رحنا نشتري جبس وعصير.. وقعدنا ناكل وجنبنا بنات يحكو..

من الكلام.. قالو ..غشعتو نورا يلي كانت معانا السنه الفاتت.. جاوبو اشبيها ؟

قالت ماتت بليلة عرسا.. ضجووالبنات يااا وخطي واشلون ماتت وليش.. وانا وساره نتصنت عليم..

قالو كثيغ بنات بليلة عرسم يموتو ما يتحملو الزواج.. يقولون الرجال يصير مثل الوحش و في بنات ما يتحملو و يموتو..

بقينا انا وساره ويحده تدحق بوج الثانيه.. احنا ابدا ما عدنا معلومات بالزواج وابدا ما في يوم حكينا بموضوع كبار.. نخجل كثيغ حتى من بعض..

كل اللي انعرفو هو من المسلسلات و الافلام المصريه لما يتزوجو و الغجال يبوس مرتو وبعد فتره تصيغ حامل.. هذا بس يلي نعرفو

ف قلتلها ايش يعني هلحكي..

-ما اعرف..

-يعني المرا تموت لما تتزوج..

-لا ما تموت بس انا سامعه من مرت عمي ان بعض الغياجيل (الرياجيل) لما يشوفو مره يصيرو مثل الوحوش

وجم احمر ويصكو اسنانم كأنو يريدو ياكلوها ..

-اول مره اسمع هكذ حكي بس يخوف .. يمييي بعد ما اتزوج لا اموت

-ما كلم يموتو.. في بنات قويات ..

-يعني صحيح هلحكي انا ما سامعه.. تعرفي انا كلشي ما اعرف.. بس بالافلام لما عبد الحليم يبوس شاديه هي تفرح ما يقتلا

-والله انك غبيه .. ولك انتي تجيبي عبد الحليم على غياجيلنا يلي ويحدهم كأنو زومبي

-ههههه ما علينا .. هذا حكي كبار نتخرج والرب يتكفلنا.. بس والله خفت ههه

-هههههه عابت اتركي الموضوع عيب نحكي في والله هاي البنات ما يستحو يموتو على هكذ سوالف..

-قيعد نحكي دق الجرس ودخلنا..

_________ابو حرب_______

صراع:- بدلت ملابسي وجاي اطلع دحگت مرت عابد طلعت وتريد تنزل.. فتشاقيت وياها.. حتى تنسى موقف البارحه لان خطيه هي هم مظلومه من رجلها الاعوج.. بس شنكولها روح وهدمي بيتج ارزلها حتى تخاف وتكعد..

ف صحت ها ولج شلونج .

نور:- هلا خويه ابو حرب صباح الخير

-هلا صباح النور.. ولج صايره دعبله دقللي اكل رحمه لجدج.. لا اطكين

-لا والله ابو حرب هههه اوووف مو من الاكل والله بس شسوي غير توم ...

-اضحك وياج يول بس كومي بالسلامه وجيبيلنا هلفريخات عسى ما تصيرين امل طه.. شعلينا

-هههه ان شاءالله تريد ريوك

-اي والله يا ريت بس بساع لازم اطلع لبغداد بسرعه.. الا اكلج عابد طلع

-اي من ال6.. طلع لدوامه..

-كون تحاجيتو بعد الصار..

-لا نمت ما حجينه..

-اي زين.. بس يحاجيج والله لكص راسو كص .. بس انتي هم صبري عليه.. وصيري خوش مره.

-ان شاءالله ..الله يحفظك خويه ويحفظ وليداتك.

صراع:- كعدت.. انتظر الاكل.. دك موبايلي.. دحگته اووو هم اخلاص.. رديت هلا ...

-هلا بيك ابو حرب

-شلونج.

-نسأل عليك والله صار اسبوع ما شايفينك..وينك .. بيت عمك عاد هم مر..

-والله اشغال تعرفين يادوب احك راسي بس ان شاءالله اجيكم انه هم مشتاقلكم.

-تشتاقلك العافيه يالنشمي..

-يعافيج الله.. عمي شلونه

-والله مريض شويه ويعتبك عليج لان ما اجيتو

-لا اجي والله الا زعل عمي بس نقلوني لبغداد وشوي الامور مخبوصه ف تعرفين..

-لا عمي ما عدنا شي بس اليحب يشتاق ويعتب..

-هههه الله يحفظكم.. عرفتها تلمح.. يله انه اروح لازم اطلع لبغداد اليوم من اجي امركم..

-تروح وترجع بالسلامه واني دوم ادعيلك يلغالي ابن عمي

-عساج سالمه بت عمي.. مع السلامه.. جاي ارفع راسي.. صار الحجي كبالي.. كتله هلا حجي صباح الخير

-اصباح النور بويه.. هاي اخلاص..

-اي بويه..

-دخلني اخطبها الك يا بويه وارتاح.

-ما رديته سويت روحي اكلب بالموبايل.. دخلت ام علي اختي ارمله بيتها بصفنا يوميه اطلع جهالها للمدرسه وتجينا

طبت :- ها شلونكم .. باست ابوي واجت باستني.. هلا بام علي الغاليه..

:- ما غيرك الغالي يلغالي الله يحفظك اليه بجاه الحبيب محمد ويخليك خيمه فوك راسي خويه..

-يحفظج الله خويه.. بس صيحي على مرت عابد ما طلع ريوك..

-خطيه خاف متأذيه من بطنها انه اروح اجيبلكياه ثواني..

صدك راحت جابته واجت خلته جدامي.. ما قبلت الا تكابلني وتاكل..

-سمعت ابوي يحاجيك شيريد منك..

-ابوج وامج الضاهر كاعد انه علكلوبهم دقيقه والثانيه كالو تزوج ..

-خويه بيش احلفك لا تزوج اخلاص

-هههه والله يا خويه انه هم ما اريدها.. رغم هي بت عمي وخوش مره وخالة جهالي بس خافها تطلع مثل الاولى وابتلي

-والله خويه اخس من جان المرحوم ابو علي عايش لعبت بيه جوله انجوم الضهر كالتلي ذيج هنه شوفيهن من ضيمها

حجيها معسل وتخدع الواحد ببلسانها وهي اخبث خلق الله..

كاعد تحجي ام علي.. طبت ام سعد..

:- انتي ليش ما تخافين الله تحجين علمره عليش.. كاتلتج ماخذه حكج حك ولج شويه استجني ولا تلعبين بعكل الرجال بسمومج..

صراع:- ام سعدددد ... صوتج نصي كبالي وخليج برا الموضوع انه واختي لا تدخلين..

-جيتها كلها سم وتسمم بعقول الوادم.. حتى رجلها ما سلم منها ومات من سمومها..

صراع:- لمييييييييييعه... احترمي نفسج لا ومحمد اكلب البيت فوك تحت.. بيتها هذا ووكت اللي تغفى عيني وانطمر جوه الجول طرديها .. الا والله الاسمعه يغثها بكلمه راسو اكصو والله

-ما مرجيه منك ابو حرب تصيح اسمي بدون احترام وتهدد وتغلط.. وينو الحجي خل اشوف يقبل بأهانة ابنه

طلعت الحجيه من غرفتها.. والسبحه بأيدها..

-يا يمه ابو حرب شجاك.. اكعد يمه استهدي برحمانك ما يصير هيج مرت ابوك هاي

-حجيه اشو وخري منيييي.. شوفو والكل يسمع.. البيت الي وام علي عسى ترش دم على روسكم اليحجي والله اكص راسو افتهمتوووو

-يا يمه الرجال اتخبل ولك يمه مابيه حيل اجرك فدوه اهدي..

ام علي:- ابو حرب فدوه اهدي خويه انه تعودت على حجيهم ما عدت اهتم والله اتركهم لا يصعد ضغط بعد بيتي فدوه اروح لطولك انه..

-ولج ادافعلهم عينك عينك.. وينهم من مات رجلج هاااا.. شمروج انتي والتراب لا من بيت رجلج ولا من راتبه..

حتى فروخج شمروهم وتعيرج ابموت ابنهم.. دنعل ابوهم لابو منين ما طلعو هلجلاب..

الحجي:- هدي بويه وعيب هلحجي ذول بيت عمك.. ما يصير تعابهم.. والكلوب تصافت لا ترجع المشاكل..

-ماكو مشاكل لا من تحت حرمتك.. تضبها لا والنزل القران تشوف مني شي ما يعجب..

عفتهم وضربت الباب وراي وطلعت.....

_________ليليان________

-خلصنا الدوام وطلعنا انا وساره نتمشى.. بطريقنا في سيطره عسكريه.. بس الشرطه البيا ما مليحين..

على طول يسمعونا كلام او يتغزلو واحنا ننزل روسنا وما نرفعها ابدا ونصير نرجف لما يحكو معانا ونمشي وكأنو نركض نركض من قد السرعه والخوف..

مرينا.. وكلعاده .. شرطي صار يتغزل..

-لك اخ من عيونو الحلوه لك ادحگ عليها مو تكول عيون ..شمسين كاعدات بنص عيونها.. هالمهره

-اشقد ويحد ما يستحي هذا.. ساره امشي بسررررعه..

-لك والله قيعد امشي راح اعثر اشبيكي ..

-مرينا منم بسرعه يلا تنفست واحس راسي صدع من الخوف والرهبه..

وصلنا للبيت:- لقيت بيت خالي عدنا.. سلمت عل الماشي وطلعت ع غرفتنا انا و امي..

بدلت وردت انام.. صاحت امي..:- ليليان وينكي يا امي صار ساعه تبدلين تعالي

-اوووه .. يا يوم جايه هياني.. مشيت عدها..

-تعالي اكلي

-ما اريد ... اريد انام..

-قلتلكي تعالي اكلي وبعدين نامي..

-هوووف.. قيعدت معاهم.. كن ما اطيقهم اكرهم.. مرت ابويه هم قيعده وتحبهم وتحكي معاهم منطلقه.

الام:- اشلونو حنا

-مليح بس تعبنا كثيغ

الام:- ليش اشبينو هو ولد تمام وعين الرب تحمي

-يا اختي صار سنتين راسب بالمرحله الثانيه .. عجزنا واحنا نقلو ادرس يا ابني انتبه ع جامعتك.. مخلص وقتو كلو على الموبايل

-اييي يا اختي هكذ هم الشباب كلم نفس الاشي.. ما يتركو الموبايل من ايدم..

ليليان:-اذا هكذ الشباب انا ليش ما تشتريلي موبايل اشقد انا بيكي كن تشتري موبايل ما تقبلي حتى امسك موبايلكي..

-انتي انضبي يبنت.. علمي ودراستك صعبه اش تعملي بينو هااا

-وحنا هم دراستو صعبي علوم حاسبات.. لو بس ابويي يقدر على امي

-قلتلكي انضبي يبنت

-سكتت بس ما انسى واذكركي بيا هاااا.. حكت مرت خالي

-ههههه قديش سوالفك حلوي يا ليليان.. صايره تجنني الرب يحميكي يا بنتي..

-شكرررا

-حنا كثيغ يحكي بيكي وقال سلميلي عليا..

الام:- الله يسلمو حبيب خالتو.. مشتاقيلو كثيغ.. ليش ما يمر بينا..

-تعرفي هو يحب ليليان وينقهر لما ما تطلع تسلم علينو.. ف ما يجي..

-لا لا حبيبي هو يدلل ليليان ما تصير لغيرو..

ليليان:- اميييي

-ليليان بنتي روحي نامي ما قلتي تعباني..

-اغشع بأمي بتعجب.. تطردني والله.. كمت بعصبيه وتركتم.. ومشي ع الغرفه نمت..

للمغرب قعدت.. ما احد بالبيت امي قيعده تخيط ع المكينه و مرت ابي.. بغرفتا تصلي...

مشيت ع المطبخ. لقيت دست (الجدر) فيه مرقة باميه قليله.. حميتها.. وقعدت اكل بالدست نفسو بحس المرقه تصير اطيب

قيعد اكل دخلت امي.. :- اشلونكي ليلو

-مليحه

-اشبيكي

-ما بيا شي..

-اعرف من اشنو انتي زعلاني.. بس لما تكبري راح تعرفي انا عملت هكذ لمصلحتك..

-ها اي مصلحه هااا.. انا اقللكي ما احبو لحنا تقومي تلزقينو بيا..

-ما على كيفكي.. الجمعه بميشئة الرب ح يجو يخطبوكي لحنا وننتهي

-اش تحكي انتي.. امي انا اريدو ارجوكي بحقو ليسوع .. انا ما اريدو.. ما اطيقو

-قلتلكي ما على كيفكي.. خلص الحكي ولو اعترضتي قدامون يا ليليان والله ما تخلصي مني .. اذبحك..

-اذبحيني بس انا ما اتزوجو فهمتي.. تركتها.. ومشيت وانا نار.. يارب دخيلك انا خلصني ما الي احد..

انتظرت يحيى يجي.. وحكيتلو.. عصب وقام راح ع امي يحكي معاها بموضوعي..

سمعت امي تصرخ بوجو.. وهو يصرخ..وطلع ويحكي بصوت عالي ليليان اعطيتها لويحد اسمو خالد وانتهى الموضوع ما تتزوج حنا لو على موتي

صحت اشنو اعطيتني لويحد ما اعرفو حرام عليكم انا اريد اتزوج اتركوني.. مسكني من شعري وقال كلمه ويحده تطلع من فمك والله اذبحك وتوافقي غصب عنك... فهمتييييي..

ودفعني وانا صرت ابكي وادعي الرب يخلصني منم.. اجت امي قالت من باكر تطلعي معي لبيت خالك..

قلتلها ما اطلع وما اتزوجو لحنا والله ما اريدو واذا جبرتوني اقتل نفسي والله واخلصكم مني..

وتركتها وهي تغلط وتدعي عليه.. وان ابكي واقول وينك بابا.. تعال اغشع بنتك اشقيعد يعملو بيا..

انا تعبت بابا ما اقدر اقاوموم.. يا امنا العذراء انقذيني يااارب.....يتبع

#مراهقة_و_الأربعيني

،،،،،،،،بقلمي زينب ماجد،،،،،،،

الحلقه_3

........الموصل ........
الساعه 12 منتصف الليل

ليليان:-قيعده ابكي على حظي واتوسل بأبويي يرجع ولو يوم وينقذني من امي و يحيى وقسوتم..

الام:- بعدكي لسه تبكي يا غبيبي.. انا اريد مصلحتكي.. و حنا اهلو مليانين وحالتم عاليه   احسن من الفقر يلي عياشينو..

الى متى خالكي يبعثلنا فلوس حتى نعيش.. اريد ازوجكي واطمن عليكي يا بنتي  

-ماما لو كنتي صح تغيدي مصلحتي.. ما تزوجيني.. تنتظري وتتحملي معايي كن كمل دراستي ونسافر مع بعض انا وياكي ونعيش

ما هكذ تزوجيني لويحد ما احبو ولا اطيقو.. حرام عليكي..

-لك اشلون انا بيكي.. ولكي غبيي اشقد انتي وحيده ما تفتهم.. لو ردنا نسافر ب اشنو نسافر هااا

بنملك 100 الف كن نسافر بيم ؟.. ابو لحنا صاحب محلات كثيغه بالموصل واربيل.. وحنا صح طالب بس عندو منظومة انترنت..

بالشهر دخلو كذا مبلغ وهو قيعد يدرس .. يقدر يسفرنا برا ونعيش حياتنا.. فكري معايي يا غبيي

-ماما ماما والرب ما قاعد اطيقو لتفكيركي المادي.. امي انا ما سلعه تبيعيني حتى تسافرين تعيشين برا..

عدقلك (داكولج) انا ما احبو يا الله و حياة امنا العذرا انا ما اطيقو حرام عليكي.  افهميني اريد ادرس ماما ارجوكي

-ما على كيفكي.. من غدا (باجر)  نلم اغراضنا ونخبرو لخالكي يجي ياخذنا لنخلص من يحيى وجوز التيس يلي جايبو..

-انا ما اسافر ولا اغيد اسافر فهمتي

-قلتلكي ما على كيفكي اسكتي ولا كلمه اسمع منكي حيواني.  انا امكي وانا اعرف بمصلحتكي ما تيجي انتي وتقوليلي اشنو اللي لازم اعملو

نسافر غدا ع اربيل وخلصنا

-بقيت ابكي بمكاني يارب اشلون ورطي هاي.. اشلون اخلص منم.. اقتلم ولا اقتل حالي..

نمت وانا ابكي.....

............. بغداد .........
الساعه 12 ونص لليلا

ابو حرب:- نايم ودايخ بتفكيري ساعه اجيبها على حلا وحرب وساعه على حياتي..

عايده:- ها ابو حرب شو صافن..

-حجت وجرت ايدي تمددت عليها..

-دايخ ومشاكل الاهل ما جاي تخلص..

-افتح گلبك واحجلي دشوف شنو هلمشاكل اللي مدوخه الشهم مالتي..

-مدت راسهه دتخلي على صدري بعدتها ونزلت رجليه من السرير وكعدت.... شغلات ما تخصج. 

عايده - كعدت...اعرف متخصني واني زوجه الك بس بليل ما فد يوم طلبت اكثر لو ردت اتعدى حياتك.. يكفيني جيتك اليه وسفري وياك وين متروح..

بس احجيلي حتى ترتاح  ليش كاتم على گلبك..

-اخذت نفس.. سحبت قميصي وكمت.. عايده السوالف هواي منين تردين ابدي..

من دوامي ويوميه ناقليني لمكان.. لو  ابوي وحرمته وبلاويها.. لو من مرض امي وتعبها لو اختي الارمله وفروخها

لو عابد وسوالفه لو سعد  المتزوج على مرته بالسر وعنده 3 جهال ويريد يجهر زواجه لو اللاخ اللي ما اعرف وين يجي ووين يروح..

لو حلا الكبرت جدامي وانه ما اكدر اصادقها واعرف شبيها.. وما تستجيب لعمتها وفكرها بس الخوالها..

وانه خوالها ما ارتاحلهم.. بس... اخذت نفس ولبست القميص

-بعدها اخلاص تركض وراك..

-هزيت راسي بمعنى اي... دحگي اخلاص انه ما اريدها كونها اخت المرحومه زوجتي وجدان..

هي جانت خوش مره ونضيفه بس تنك.. ومشاكلها ما تخلص واختها مثلها..

جثير افكر اخذها واستقر والم جهالي بيها.. انه احتاج التلمني.. بتي تحتاج التصادقها وهي خالتها ومثل امها.. وحرب بعد جاهل ويحتاجله عنايه بدراستو 

ما عرف شلون ما اصفنلها اتعب..

-شنو خلصن بنات الناس وما بقت بس اخلاص تتزوجها

-تعرفيني اشك باضافري مال اجيب حرمه غريبه واحطها ابيتي وامنها على مالي وحلالي وجهالي.. مستحيل..

-هههه تقربت منه..عريف صراع ابو حرب يلي يحير عقول محتار .. ما عرفتك هيج

-هه هي هنا المشكله.. اكدر احل امور غير بس اموري اعجز احلها.. لاني شكاك وما اثق باحد ابد.. حتى امن بي..

تنهدت... الله كريم... اكوم اسبح واصلي صلاة الليل والله يدبرها..

،،،،،،،،،،الموصل،،،،،،،،،

ليليان:- لما نمت وانا ابكي.. كوبست .. واحلام مزعجه ما اعرف من وين.. خلصتو الحلم اركض واهرب من ناس ما اعرفم..

اخيرها ضربت بغجال طويل ولابس دشداشه.. وبالحلم كأنو دخلت بينو.. وتخبيت بجسمو .. بس اختنقت وانا اتخبى

لحد ما قيعدتو.. العرق يصب راسي ونفسي قوي.. قمتو من مكاني.. رحت شربت مي..

يارب اشنو هلاحلام المزعجه اش يعني مكافي علينو امي ويحيى وبلاويم..

هوووف.. رحتو غسلتو وجي ومشطتو شعري.. وبدلتو وطلعت ع بيت ساره..

مشينا انا وياها.. وحكيتولا عن الحلم.. وانو غجال لابس دشداشه دخلت بينو واختنقت..

ساره:- ولكي ليليان بس لا اخوكي يزوجكي لويحد طويل وعندو كرش ويلبس دشداشه..

-ويييييع اقتل روحي والله .. انا اتزوج ويحد يلبس دشداشه وعُربي .. عييييع ..  لا ساره لا تحكي هاكذ راح ابكي ..

-ههههههههههه  اشنو اسمو يلي خطبكي من اخوكي

-خالد .. بس لا تحكي ولا شي انا اعرف فارس احلامي غجال اسمر وحلو وعضلات ويلبس زي رسمي ما دشداشه

-خالد يا خالد.سمين وعندو كرش ودشداشتو وصخي وتعالي يا ليليان نضفيها ههههههههههههه

-ساااااااااره راح اضربكي هوني والله اسكتي راح ابكي لا لا ما هكذ ما هكذذذذذذ عااا

-ههههههه ولكي فضحتينا اسكتي وصلنا المدرسه..

-اوووف

-هههههههههههه .. اهووو دحقي منو قدامنا..

-دحقت.. نفسو الولد اللي يعاكسنا كلما مرينه.. نزلي راسكي.. وخل نمشي بسرعه.. معليكي منّو.. فتنا وهو حكي....

-يسعد صباحك يا قمر.. شنو هلجمال دخيلك الله.. بوياااااااي.. -صفّر-

-الطريق كان ما بينو احد .. فارغ تماما بس انا و ساره.. ف تجرأ وتقرب من عدنا..

ومسك ايدي..

-لج شبيج انه مو احجي وياج دسمعي ليش تحكريني.. تره كليبي متعذب بهلحسن..

-استحي واترك ايدي يا حقير..

-تمونين بالغلط يا حلوه.. بس كليلي شبيج وياي مو رايدج..

ليليان - عدقلك اتركنيييي.. والله اصرخ والم الدنيا عليك.. اتركنيي.. اصرخ وساره تصرخ معايي وضربته الجنطه ع راسو..

سحبت ايدي منو بسرعه.. وركضنا اني وياها.. وقلبي مثل الطبل يدق..

ساره:- اشقد ويحد ما عندو ادب.. يا امي قلبي رح ينفجر قد الخوف يلي ماليني..

ليليان:- انا من الخوف ما قدرت احكي بس امشي بسرعه وابكي.. وصلنا للمدرسه.. صفينا ع الاصطفاف..

وخلصت اليوم كلو ما قدرت انتبه على شي قد ما افكر اشلون راح نرجع.. وهو موجود..

لما طلعنا.. اتفقنا انا وساره نمشي من غير طريق..

دخلت ع البيت.. كان يحيى وصديقو موجود.. وامو قيعد تطبخ غدا الهم.. وامي واقفه وتحكي معاها 

قلت مرحبا.. اغشعت عليه امي بسرعه.. وجرتني للغرفه..

-ياااا امي اشبيكي على كيفكي اشنو صاييير..

-ارتاح قلبك ليليان.. اللي اسمو خالد صدق اخوكي الغبي هوني وجاي ليخطبكي..

-وانتي اشنو قلتيلو..

-اشنو اقول انا.. اخوكي يتفاهم.. خلينا نلم اغراضنا يا امي.. ونهرب..

-امي اشنو نهرب هذا بيت ابويي ومو من حقو ليحيى يزوجني ع كيفو.. ولا على كيفكي..

-ولكي وعوبه.. انا وانتي ما نقدر نواجو ليحيى نبقى نسوان وما نقدرلو.. خلي خالكي يتفاهم  وياه..

-اي امي خبري خالي يجي.. انا عندي امتحانات والله ما اقدر اهرب..

-تقلي امتحانات هلغبيه.. ولكي انتي اشنو من بشر.. راح يزوكي ويجبركي تتركي دراستك يا بنتي خلينا نهرب..

قيعد نحكي.. دخل يخيى.. سكتنا..

يحيى:- ليليان.. تعالي معايي

-اشنو اتغيد يحيى ؟

-هذا الغجال يريد يشوفكي..

-اشنو يشوفني انا بضاعه ويشوفني يحيى ما اريدو.. بس قلت همذ اجه ومسكني من شعري بقوهو ويقول..

-اسمعي ولك والله .. اذبحكي وما يرفلي جفن.. تعالي معايي احسنلك..

-اتركني حرام عليك الله يلي تحلف بينو ما يقبل باللي تعملو بيا وصرت ابكي

-عدقلك امشي قدامي..

-طيب بس اغير ملابسي..

-ما يحتاج امشي..

-طيب طيب.. امشي وانا امسح الدموع من عيوني.. مشيت قدامو ودخلت.. اتفاجئت بالغجال يلي جايبو

شعرو ولحيتو طوال ولابس دشداشه لونها رصاصي ووجهو اسود.. من شفتو والله نزلو دموعي..

هو اغشعني ونزل راسو.. وقال

-اهلا بالاخت ليليان جعلكِ الله من البنات المؤمنات المسلمات الى الله ورسوله..

-اشنو يحكي هذا.. كلامو فصحى.. ومنزل راسو ويحكي

خالد:- انا على بينة انكِ مسيحيه ولا ترتدي الحجاب الشرعي وسيهديك الله بهدايته ان شاءالله..

-انا ما كافره حتى يهديني.. انا مؤمنه..

-كل دين غير الاسلام لا صحة له يا اختاه..

-اشنو تحكي انتا..

يحيى:-ليلياااان

خالد:- اتركها يا اخ يحيى انا اريد ان اسمع ما تفكر به لكي اهديها الى الايمان بأذن الله.. وتكون من بنات الدولة الاسلاميه..

-يرجع يقلي يهديني.. دينا ما كافر وانا اعرف سيرة النبي محمد لما قاتلوه  قريش طلب من ملك الحبشه يحمي المسلمين لانو يعرف انه ملك مسيحي مؤمن..

لما تكفر كلام نبيك انتا الكافر اليهديك ما انا.. فهمت.. انا ما كافره ان مسيحيه مؤمنه..

تركتم وقمت بسرعه.. طلع ورايي يحيى راد يمسكني امي دفعتني وصارت قيدامو..

-ولك والله لاذبحكي حقيراااا تتجرئي اطلعي صوتك قيدام الرجال.. ان ما علمتك الادب ما اطلع انا يحيى..

الام:- ما تتزوجو فهمت بنتي ما تتزوج هذا الارهابي

يحيى:- اقتلكي انتي وياها والله..

مسك امي يريد يضربها وامو تحاول تبعدو ويصرخو.. انا دخلت الغرفه.. وصرت ابكي كثيغ

دخلت امي ورايي وقفلت الباب وقعدت تبكي وتنادي على روح ابي ليسمعنا ويغشع حالنا ومع منو تركنا

هذا اللي ترك دينو حتى يخلفو هكذ يعمل باختو.. تقربت لامي.. وحظنتها وصرت ابكي بحظنها بقوه..

ماما خلصيني من يحيى ارجوكي..

-قلتلكي يا بنتي خلينا نهرب وانا وعد اخليكي تكملي دراستك والرب

- ماما انا خايفه كثيغ.. ما غشعتي الرجال اشقد.مرعب شكلو ماما ما اريدو والله حتى كلامو غريب يحكي فصحى ..

-والله يا ماما ما اعرف اعتقد هذا ارهابي.. سمعتو يقول الدوله الاسلاميه..

-رفعت راسي الها.. اشنو هذا الدوله الاسلاميه..

-مجموعه شريره تعتبر نفسها تحارب لاجل الدين..

-ارهاب يعني ؟

-ما اعرف يا بنتي ارهاب ولا مليشيات .. ما اعرفم زين.. بس سامعه انو هم اشرار..

-باين على شكلو انو هو شرير ماما شكلو مخيف كلو شعر..

-اطلبي من يسوع يا بنت حتى يخلصنا منم.. يا روح القدس امنا وانقذنا وخلصنا من الاشرار..

-امين... نزلت راسي بحظنها.. وبقيت ابكي.. خبرت امي خالي قال غدا العصر يجي ياخذنا لان هو مسافر ع دهوك اليوم..

،،،،،،،،،،،،ابو حرب،،،،،،،،،

نقلوني لبغداد وانه ما اكدر اضل رايح جاي رحت على لواء اعرفه عدنا بالديره.. اتفقت وياه والغى سالفة نقلي..

ووانطاني كتاب.. ومنها اخذت سيارتي وطلعت للرمادي.. وصلت لهلي الضهر..

طبيت.. ام علي واكفه بالمطبخ.. تلكتني..

-هلا ابو حرب الكوه الخويه..

-الله يكويج ام علاوي.. منو هنا

-بيت عمي صالح

-هااا بس حظريلي الحمام ميت تعب.. حجيت وفتت جوه.. صحت هااا السلاااااام عليكم شلونك عمي

خليت سلاحي ع الميز ونزعت حذائي ورحت سلمت عليه.. وبست راسو.. اشلونك اشلون صحتك..

صالح:- الحمدلله نسأل عليك يا بويه وينك.. مختفي

-والله يا عمي بهالدنيا نقلوني لبغداد.. وجثير بلاوي علراسي ما احك اذني وها جيتي والله.. طلعت ارواحنا..

-الله يساعدك يابه حقك الدنيا تلاهي..

اخلاص:- ها ابو حرب شلونك .. شلونك زين  توه نور البيت ..

-هلا بيج خويه منور بيكم.. الله يحفظج..

-ابن الحلال بذكره تونا نحجي بيك انه وعمتي..

-عاد خير شر.. انا حكتني رجلي بالسياره.. بس ما عرفت منهو كاص بيه.. هههههههه

-يااا على بختك احنه نكص بيك لا والله بالخير كلت خطيه هلرجال يوميه ناقلينو..

-اي والله شنسوي هاي بعد امور الدوله تعبانه..

-اروح اجيبلك ماي بارد تعبان...

-اي والله الله ينطيج.. عطشان حيل دا احجي واجاني حرب.. صحت هلا بالذيب.. هلا بأبني الشبع..

كعد يمي .. اشلونك الدراسه..

-زين

حلا:- جذاب بابا ماخذ 4 بالاملاء.. حتى المعلمه طالبه ولي امره..

-اخ ليش بابا هيج..

-بابا صعب والله اريد ابطل..

-لا باباتي ما يصير.. مستقبلك هاذ.. مدتلي اخلاص كلاص الماي.. اخذتو.. وحجت هيه..

اخلاص:- حقو يابه لا احد يدرسو ولا احد يهتم بيه اشلون ينجح عمت عيني عليج خيه ام حرب لو عايشه يضل هيج الولد يرادلو متابعه..

-حلا ليش ممدرسه اخوج..

- بابا هو كوه يحفظ يتعبني والله..

-لا والله يا يابه كولي هلزفت الموبايل اللي مخليه راسج بي طول الوكت وما داريه عن اخوج..

ام سعد:- تعتب على هلجاهله تعتني بي شد حيلك واتزوج وجيبلك ام اداريه..

-هزيت راسي وما رديت..

ام علي:- خويه تكوم تسبح لو نصب الغدا..

-لا اسبح.. اكلو انه شبعان.. اترخص منك عمي تعبان ..

-اخذ راحتك يبوي..

صعدت سبحت و صليت ونمت.. ما كعدت غير العصر كلها طاشه.. فتت على غرفة الحجيه امي..

دحكت متمدده.. ها يمه كواج الله..

-هلا ييمه هلا بيك..

-ابقي ابقي نايمه لا تكعدين..

-لا ييمه ما نايمه بس متمدده من وجع ضهري..

-ياذيج ؟ خليني اخذج للطبيب

-لا يبعد امك عساك سالم.. هذا دواي اخذته والشفا من الله..

- بست راسها وكعدت.. والنعم بالله.. شلونج انتي شلون صحتج..

-نشكره ونحمده.. انته شسويت على سالفة نقلك..

-فضيتها.. وي اللواء ورجعت..

-بعد ما ترجع لبغداد..

-لا يبقى دوامي هينه مثل الاول..

-الله يريحك يا يمه ويصفي بالك..

-يحفظج حجيه.. ضايجه تردين اطلعج اشممج هوه.. خاف متضايكه من كعدت البيت ومشاكله..

-لا ييمه متضايكه عليك شوكت ترتاح.. ابنك يحتاجلو مداراة يا ابني ليا وكت راح تبقى هيج..

-يمه اذا انتي متضايكه من وضعي توكلي على الله وخطبي انه ما عندي مانع..

-يمه انه ما ضارني شي .. انه لخاطرك..

-الله يحفظج.. توكلي واخطبي اللي تعجبج..

-حتى لو اخلاص ؟؟

-مسحت وجهي وكمت امسح بشواربي وادحك بالكاع ورجعت دحكت بيها...يمه ما تناسب

-بت عمك هاي من دمك ولحمك.. صدك صارت مشاكل بس يمه هي بنفسها انته.. وخوش بنيه ونعرفها خدومه تلمك وتلم جهالك..

والشين التعرف احسن من الزين الما تعرف.. اخطبلك غريبه وطلعت اضرب منها شتسوي..

-هاهيه يمه التشوفينه .. تعبان والله حتى ما بيه افكر..

-الله يعينك وليدي.. انه اخل الموضوع انت اخذ راحتك يمه.....

،،،،،،،،،،الموصل،،،،،،،،

ليليان.. لما طلع الغجال من البيت يحيى قلب البيت ع راسنا.. يصيح ويغلط ويضرب بالبيبان.. ويتحلف الي ولامي.. وامو تهدي بيه

وامي قيعده تسمعو.. وتدعي علينو.. يخلصنا منو..

لليل يلا قدرت امي تطلع وتجيبلنا اكل ناكل انا وياها.. ورجعت قفلت الباب..

بقينا الليل كلو نفكر اشلون نخلص من المصيبه يلي بلانا بيا يحيى..

ثاني يوم.. ما قدرت اغيب وقلتولا لماما عندي امتحان وقلتلي روحي اليوم حتى لا يشك بينا يحيى.. خلي الوضع طبيعي..

طلعت خفيه منو.. ورحت على ساره ومشينا من طريق ثاني حتى لا يتعرضلنا الغجال نفسو يلي مسك ايدي البيحه.. (البارحه)

خلصنا اليوم ورجعنا هم من الطريق الثاني .. وصلت لفرعنا وساره دخلت ع بيتها.. وانا امشي..

صفت سياره ونزل منها الرجال الشرطي يلي تعرضلي البارحه.. ردت امشي..

مسكني من ايدي ويقلي

عابد:- ليش تشردين مني يا حلوه مو والله احبج .

ليليان-اتركني يا وصخ.. والله اصرخ والمو الناس عليك اتركنييي.. صرت ابكي وهو يضحك ويجر بيا للسياره..

عابد-ولج ما اطول والله بس احجي وياج شويه طاك كلبي صار يومين متمرين عليه ليش هيج تعذبيني مو انه ميت بيج..

-هو يجر وانا ابكي واصرخ اتركنيييي حقيييير اتركنيييي.. وان اصرخ طلعت مره عجوز من بيتم واجت تركض علينو..

-ولك اتركها قليل الادب ابتعددد..

-لتدخلين حجيه هاي صاحبتي وزعلانه واريد اصالحها انتي معليج

-ولك اشقد ويحد بلا مستحا انتا.. هذه بنت بيت ابو يحيى.. واعرفها اتركها..

-اي اعرفها ليليان يا حجيه صاحبتي.. لج حبيبتي ليش هيج تكبريها دصعدي بس نتفاهم..

-كذاب والله ابتعد ما اعرفك انا .. اتركني.. سحبتني المره منو وحكت..

الحجيه:- مع الاسف بنتو لابو يحيى يطلع منها هكذ تصرف..

-لا والله خاله كذاب.. قيعد احكي وطلع زوجها للمره.. الولد اللي كان ماسك ايدي بمجرد ما دحق الغجال..

ركب سيارتو وطلع... وتركني انا والمره يلي ترزل بيا.. وانا ابررر وابكي..

وما احس الا يحيى يطلع من بيتنا ويشوفني واجه يمشي سريع لغشنو اشنو صاير..

نشف دمي لما غشعتو ليحيى.. قلت انتهيت.....يتبع

☆☆☆☆

ترتيب النشر حيكون... يومين نشر ويوم استراحه..  ع الساعه 10 مساءا بتوقيت بغداد.. اما اللهجه من الحلقه ال4 حتتغير من المصلاوي للهجه العاميه.. استجابه لطلباتكم..❤

اللي اطلبه منكم تعلقون شكد متكدرون حتى ترتفع القصه وتطلع عند الكل وتروح تأثير الابلاغات..

تحياتي الكم....زينب ماجد 💕