رواية مراهقة والاربعيني الفصل السادس 6 - بقلم ڼدىَ

#مراهقة_و_الأربعيني

،،،،،،،، بقلمي زينب ماجد ،،،،،،،،،

الحلقه_8 و 9

وشمرتني بالكاع حيل.. تكومت.. وصار وجهي بالكاع وشحاطة اجت يمي.. كمت ورفعت راسي واني ابجي..

شفتو الحجي صاح وصراع دخل دحك.عليه واني ابجي واحك برجلي وهي كلها دم وايد تمسح بيها وجهي وابجي.. ورفع عينه يخوزرهم..

صرخ شنوووو هاي .. ويه صرختو.. دنك عليه لزمني من اكتافي ووكفني اني خفت يضربني رفعت ايدي فوك راسي و صرخت عمو والله ما سويت شي ما كسرت المواعين والله مو اني

صراع:- ام علي.. اخذيها .  انطيتها البنيه الهيام وتقربت لمرت الحجي.. انه شكلت.. مو كتلج حرمتي ما تگربين صوبها..

ام سعد :- كسرت امواعيني الخايسه ام الرجول..............

-انه شكللللللللللللللت كلت تكربين لو لااااااا .. على مواعينج مووووووو..

- هيام ما اخذتني بس وكفت وحظنتني وتدحك لابو حرب.. هو حسيتو حيموت كد ما يصرخ..جانت صينيه ع الطباخ مسفطين بيها المواعين الناقلينها ..

شالها وركعها هي واماعينها ..كظبتو الحجيه امو .. دفعها  ويصرخ .. بعد تردييييين مواعين..

بايد وحده ضرب كل اللي ع السنك خلاه يتكسر ويطشر بالكاع ويصرخ ومحمد لو جيتي يمها يا لميعه طلعتج من البيت على ايدي فهمتيييي

.. اني ضميت راسي بحظن اللي اسمها هيام بس انتبهت للحجي يدحك وما يدخل بابنو لما يتكاون  وي مرتو

..اخذتني هيام وودتني ع الحمام.. ودموعي تجري وشعري مكفش والدم يجري من رجليه..

جابت طشت وشمرت بيه سطل مي.. وكالت حطي رجليج بي.. ورفعت شعريه وبللته ولفته.. وسحبت صونده.. وكالت غسلي..

غسلت ودموعي تجري وي المي.. اجه اللي اسمو صراع ع الحمام وحجه.. بس كلامو يفزز لان صوتو عالي حتى لو يحجي ما يصرخ ..نبرت صوتو عاليه حيل

-هااا ام علي شبيها  ..

-اش ها يا ابو حرب .. عساها بحظ كلمن الو سبب بهلزواجه الكشره جاهله هيج يصير بيها دحك الدم ترس رجليها ووجهه خريطه..

عمي اليهود اشرف من عدنا على هلمر  ما بينا اليرحم هلجاهله . الله و اكبر

-دغسليها غسليها دا اشوف رجليها..

-اجت الحجيه امو .. حجت عمت عيني ييمه اوووي دحك.الدم رجليها راحت.. شصار يا يمه شصار متكدرين تشيلين المواعين لا تشيلين كلي لوحده تساعدج..

-عمه والله اني ما شلتهم والله هي البنيه شالتهم وركعتهم وبقت تصرخ وسوتني اني الكاسرتهم..

صراع:- ياهي منهن هاي..

-ما اعرفها.. وحده ضخمه و طويله..

هيام:- اكو غيرها لصخيمان اخلاص تعجبت لسه ما مسويه مصيبه.. هلسوسه الحيه

الحجيه :- ولج هيااااام انتي شو ما تكظبين السانج

صراع:- يعني اخلاص وكعت المواعيين؟

-ما اعرفها

صراع:- اخلاااااااص ..  يا اخلااااص

الحجيه:- انهجم بيتج يل ما تسكتين راح يتعاركون العمام من وراج اخخخخخخ منج يا هيام

-اي يا يمه هسه عاد شلون عمومه يوكلونه تبن ونكول عمام...

صراع:- اخلاااااااااص

اخلاص:-ها ابو حرب ها عيوني أمرني

صراع:-دحكت على ليليان .. هاي ؟؟؟

ليليان-هزيت راسي اي هي..

اخلاص :- يا انه شنو شبيه انه

صراع:- دحكت شسوي بلله.. ما كافي مصايب اختج جايه تكمليهن على كلبي انتي فكو عني رحمه المحمد فكووو

-يا ابو حرب بالقران ما الي شغل .. وحتى هي ما تدري جاي انطيها المواعين ما كدرت تكظبهم..

من حركة كلبي صرخت والله يا خويه ما قصدي.. انا اسفه يبنيه تره ما قاصده حبيبه شعندي وياج انه  بس انتي فهمتي غلط..

-هز ايدو صراع وصاح الكوه ربي الكووووووه

هيام:- كومي حبيبه كومي هو حتى قران الله صار لعبه بحلك ياهو الجان كومي بنيتي

اخلاص:- يا هيام ما مرجيه منج انه احلف جذب

الحجيه:- يمه حسبيها علي تره ام علي ما قصدها حبيبه لا تزعلين

هيام :- دحكت امي تتوسل رفعت حاجبي بتنرفز ومشيت ليليان.. حدري خيه حدري زين الله وصابر علينه

ليليان:- كمت وياها شوي شوي من رجليه ضمدهم ولفتهم واخذتني صاحت حلا فراش بالكاع فرشي بساع

-عمه تره ما مجبورين نخدمها الهاي كاتله عمو واحنه نكلها هلا..

-ولج انتي شنو من ابنيه اكلج فرشي

-والله عمه عذريني انه ما اخدم هيج شكول ..

-تركتنها وطلعت.  اجت الحجيه كالت ولج هيام كظبي السانج يمه ترانا ما ناكصين.

-هسه انه الساني طويل وانه البيه الصوج .. وكلهم ملايكه مو.. والله عمي صوجي شعلي بيكم.. عسى ناركم تاكل حطبكم..

اروح لبيت انجب واسكت هواي اشرفلي شمحصله متكليلي.. اخذت عبايتها.. وطلعت.. واني كعدت..

الحجيه طلعت وراها.. بقى بس ولد صغير واكف عمره ب 6 او 7 سنوات..

بقيت ادحك عليه.. كال تردين امدلج الفراش..

-لا خل اروح للمخزن عمو ما يقبل ابقى هنا..

-لا معليج ابقي اني احجي ويه بابا هم كلهم يخافون منه.. حتى عمو

-منو ابوك..

-صراع ..

-طلع ابنو لزوجي واني ما اعرف.. كلتلو اشنو اسمك..

-حرب

-حرب تكدر تمشيني للمخزن. 

-اي عادي اصلا اني العب حديد وقوي حيل

-ابتسمتله لبراءته واني كوه امشي.. اروح للمخزن احسن ما يعصب اللي اسمو صراع واني تعبت من صراخو باذني طبلة اذني انزرفت كد ما صوتو عالي

طلعنا اني وياه.. ودخلنا للمخزن.. تمددت.. بس تأذيت حيل..

-ليش تبجين.. يوجعج الدم..

-اي حيل يوجعني.. حظن راسي اني ما قصرت كمت ابجي بحظن الطفل وهو يكلي لا تخافين انه بعد احميج منهم ماشي

-ابتعدت والدموع بعيني وابتسمتله.. مدلي اصبعو الصغير ويكلي نتصاحب.. هههه اي.. مديتله اصبعي وخليته باصبعو وبوست اصبعي وخليتو على كصتي وهو نفس الحركه..

-اكفي اجيب الموبايل مال بابا ونلعب بيه انه وياج ماشي

-لا لا حرب لتجيبو يبقى يصرخ

-لا معليج بابا ما يصرخ عليه  

-لا لا تعال حباب ما اريد بس اريد انام..

-تمام نامي واني هين احميج   كعد يم راسي واني تمددت يمو.. بقى يمسح على شعري من الالم البيه كمت ابجي ونمت ادري شوكت  

-كعدت على ايد تلزم رجلي.. فزيت بساع عبالي فاره..  .. دحكت صراع دحك ..حرب نايم يمي.. راد يحجي.. واني شوي ادحك وشوي ادنك. 

اخر شي ما حجه مسح شواربه ونفخ بتنهد وصاح حرب بابا كوم ..

-ما كعد الطفل شاله وطلع..

رجعت للمخده كملت نومي.. ما حسيت لهناك دخلت مره.. واني نايمه كرصتني من ضهري ولوة اللحمه الكارصتني منها وتحجي

-دحكي ولج لا عبالج يصرخون واهتم.. هذا البيت كله بأيدي بحجايه اهده وبحجايه احركه وانتي نفسج تحت رحمتي لو اريد اسود عيشتج ومحد يدري

ولا عبالج هلنفخه الاسمو صراع يحميج هذا خطار يروح ويرد ماله خبر بالبيت كلو البيت بيدي فاحذري مني..

-بس خاله والله اني ما سويت شي..

-اخت الارهابي هششش .. هلسوالف عبيرهم على نوريه الخوثه مو علي انه .. ردت احجي..

شفت صراع واكف بالباب ومكتف اديه ويسمع.. من دحكتو هي حست بساع واندارت ووكفت..

طب وكال دحكي ام سعد.. لا عبالج اروح وارجع مالي علم بعمايلج وان جنت ساكت ف مو معناها ما ادري ..

الا والله لو وصلتي لعائلتي او اندكيتي بامي طلاكج بهلعمر على ايدي والله..

-هي ما حجت بس نافخت و راحت.. دحك عليه.. دنكت منو.. كال كومي لا تضلين هينا بارده تتمرضين وتكعين براسي ويحسبوج علي مره و ابتلش بيج  كومي..

سندت ايدي ع الكونيه وكمت على حيلي كوه.. كتلو عجل وين اروح..

-طبي بغرفة الحجيه.. يلا بساااع

-مشيت كوه.. هو طفى ضوه المخزن وطلع وراي.. بقيت واكفه هي يا غرفه مال الحجيه نسيت صاح

-حدري هين يابه

-مشيت وراه واتذكرت الغرفه اللي طلعنا منها.. دخلنا الحجيه نايمه بس انفتح الباب صاحت هااا..

فتح الضوه وكالها يمه خلها تنام هين المخزن بارد.. حلاااااا

-ها بابا

-كومي يابه شيلي اخوج واصعدو فوك يمي نامو ..

-ليش بابا ..

-عيفي عنج الموبايل وصعدي كلت بسرعه..

-رادت تشيل الفراش.. كاللها لا عيفي خل هاي تنام عليه..

-بس بابا هذا فراشي اكش..

خزرها.. بساع سكتت وصعدت.. واني واكفه ومستنده ع الحايط من الم رجليه..

-يمه عينج عليها تره ام سعد مكونه عليها و ما اريد اطلع عن طوري واسويلي مصيبه واطردها هي وابوي والله

-يا يمه انت هم على كيفك لا هيج ماخذ العالم صياح تراك انت التخسر هم بس الخير صايبهم وانته شيبك ترس راسك البكدك ولا شيبه براسهم..

-يمه انه كتلج عينج لا تغفل..

اندار.. انتي شو واكفه تصفنين.. ما تنامين. 

-هاا اي..  رحت للفراش تمددت..

صراع:-انه راح اخذ حرب يمي  انومو

الحجيه-علعلت نومت الطفل يايمه كلساع شايلو وجايبو

صراع-يلا تصبحين على خير..

-الخير يصيبك يمه يحفظك الرحمن.. ها بنيتي شلون صرتي

-هزيت راسي

-نامي ييمه ولا تشيلين هم تراه الخلقج ما نساج ولا تزعلين من ابو حرب تراه طيب دحكتي العصر يصرخ متنام هين وهسه هو تعنالج وجابج

ردت احجي وياه واكله جيبها بس اعرفو اللي ينصحه ويحجي وياه يعاند ويركب راسو تركته وحدو وانه اعرف ضمير ابني ما ينام وهو ظالم احد..

-هزيت راسي.. واني الدوخه والالم كله ذابحني من نمت وكعدت كأن الجروح تكومت عليه دفرات يحيى ووجع راسي كد ما ملختني مرت الحجي والم رجليه اضافه للقهر البقلبي والغربه الاحس بيها

كلها ادك براسي واتوجع احس حرارتي ارتفعت ردت انام ما كدرت بقيت بس اون بفراشي ساعه ابجي وساعه اون وشوي اغفى وارجع اكعد من الالم..

مر وكت ما اعرف شكد.. وسمعت جامع يأذن كامت الحجي وتصيح يا حي يا قيوم .. وطلعت واحس البيت صار بيه حركه بعد.ما هدئ والكل نام..

غسلت الحجيه واجت مدت سجاده وكعدت تصلي ...احس عليهم بس ما اكدر ابقى ادحك.الصخونه قفلت عيني والوجع هدني

لهناك دخل صراع كاللها هاي حجيه صباح الخير.. باس راسها.. مقبوله الصلاة ان شاءالله..

-يتقبل اعمالك يمه ويحفظك من كل شر بجاه السميع العليم. 

-يحفظج حجيه .. هاي شلون صارت

-والله يا يمه الليل كله تون كسرت خاطري..

-اني اسمعهم ومغمضه.. اجه تقرب وكمص يمي وحط ايدو على كصتي وكال هاي صايره نار حرارتها حيل عاليه

-يا

-دوه ما عندج خافض حراره براسيتول..

-والله ما عرف يا يمه دحك.الجراره ذيج بيها دوه هيام تعرفه انه ما اعرف الدوه. 

كام جاب الدوه و دور بيه وطلع حبوب..

-ندسني اني ما بيه اكول ها بس ونيت من الالم وطلع صوت..

-كومي يابه اخذي هلدوه وتصيرين زينه

-ما اريد

-ما على كيفج كومي تموتين ويكولون موتها وما بيه حيل انه .. كومي يابه

-درت وانطيتو ضهري وما رديت..

-هااه .. يمه هاي تشلع الكلب انه ما اتحمل اطك وياها وهي مريضه .. شربيها دواها تره ما بيه حيل اركض دكاتره و مستشفيات..

-اتركها يمه هسه انه اكعدها..

-انه رايح اكمل نومي ساعه وخابريني يمه خاف ما اصحى لدوامي..

-روح يمه انه اخابرك  .. كمت على حيلي... يمه .. ولج حبيبه كومي اخذي دواج.. هاي شيكومها وانه ما بيه حيل..

هي شسمها حتى نسيت..

-خاله ما اريد والله بس انام ..

-اي اخذ دواج ونامي والله تصيرين زينه..

-كمت على كيفي اخذت الدوه منها وانطتني مي ورجعت نمت.. وهي وراحت نامت اني بقيت اتألم لحد ما غفيت.. شوي وحسيت على ايد تلامس كصتي..

فتحت عيني .. دحكتو صراع.. ما حجه دار وجهو عني. وكاللها حجيه انه رايح للدوام اي شي يصير خابريني..

رجعت نمت.. بس نومه معلعله من الالم.. للشويه صحتني الحجيه اكل.. ما ردت .. غطتني ونمت. 

لهناك احتاجيت حمام.. كمت كوه.. دحكت بنيه تقريبا بعمري كلتلها ساعديني اوصل للحمام. 

دحكتلي من وره خشمها ورجعت ادحك بموبايلها.. سندت نفسي ع الحايط ومشيت .. دحكت موبايل الحجيه يدك وصامت على ميز التلفزيون ومكتوب ابو حرب..

اندرت للبنيه كتلها ابو حرب ديتصل .. كامت ردت ع الموبايل سلمت وتكله زينين بيبي كاعده بالهول.. لا  ما بيها شي جنها احصان هاي كبالي جاي تمشي..

تركتها وطلعت .. دحكت نوال كالت لج يولي حجابج وين لا يدحكج ابو حرب الا يسلخ جلدج..

-نسيتو بالمخزن البارحه.  تركتها ومشيت للحمام.. دكيت.. احد بيه.. بقيت واكفه.. طلع ولد ما اعرفو..

دنكت وابتعدت.. هو راح.. دخلت.. بيييع شنو هلريحه حطيت خشمي بملابس.. جيت اتقيئ اتخيل ادخل وره احد..

طلعت وبقيت واكفه بالباب على ما تفض الريحه.. دحك عليه الحجي كال ها.. كتلو اريد ادخل للحمام كال عجل فوتي شعندج مناطره الباب ماكو احد..

بالله هذا شكله..دخلت.. رفعت قميصي لخشمي وسديت الباب .. بعدني هسه دخلت اتفلش الباب عليه ورجال يصيح منو بالحمام. 

يا الله شلون مشكله شكله اني.. وكتلو شنو يستفاد.. فلش الباب من الدك.. خفت لا يفوت.. طلعت بسرعه..

دحكتو هذا الضعيف الويانه البارحه.. كال ها انه اسف عجل غير تكولين انه حتى امشي عبالي الجهال. 

ما رديت بس وجهي صار احمر من الفشله.. غسلت اديه ع المغسله..ورجعت لغرفه.. بعده البرد بعضامي واحس عظمي نحلان ومكسر كد الضرب الاكلته..

طبت الحجيه.. كالت ها يمه شلون صرتي.. كالها احسن.. طبت ام عبد.. كالت العروس شوكت دكوم.. الساعه 12 الضهر بيت الخلفها وتنام...

الحجيه:- خافي ربج البنيه مريضه الليل كلو ما نمناه خفنا يصير بيها شيء..

-عشتو ما نايمين لخاطر هاي اخت الارهابي والا انج لا انتي ولا ابنج حزنانين على ابني دام سهرانين على راحت هاي الخايسه. وابني جوه التراب

-شعليها هي بابنج ما هي الكاتلتو وان جان اخوها لا تزر وازرة وزر اخرى حرام تعلكين ذنب اخوها بركبتها..

-هي الوكعت ابني وغرتو وتكولين ما الها ذنب.. شنو انتي ادافعيلها

-انه ما ادافع الاحد بس ما نعرف الحقيقه شنو دام راح المرحوم الله يرحمه المشاكل ما تنفع يا ام سعد كفي عن البنيه حرام عليج. 

- ابني حلف بالقران وهاي الجذابه بت النغوله .. والله ان ما يبرد كلبي الا اخذ ثار وليدي من هاي النغله

وهدت تريد تضربني واني اتحامى بالحجيه وابجي وما احجي بس رافع ايدي على راسي.. دحكت الموبايل يدك جوه الحجيه طالع شوي منو دست رد..

والحجيه تحجي وتصيح والمره تتكاون وياها.. والموبايل يصرخ.. رفعتني الحجيه وخلتني ع السرير وهي واكفه وذيج تصيح. 

دا تحجي الحجيه انتبهت للموبايل دنكت عليه.  وكالت ها يمه.. لا والله ماكو شي .. يمه لا تصارخ ضغطك لا يصعد.. البنيه زينه والمشاكل تنحل يا وليدي

وهي تحجي المره الحقيره شردت.. العرفتو تخاف من صراع.. بقيت امسح بدموعي.. كالت لا تهتمين يمه.. كولي يا الله.. الما يعرفك ما يثمنك

اثبتيلهم انج زينه وخوش بنيه وخليهم يتندمون على تصرفاتهم هاي.. باستني براسي.. رجعت نمت وبجيت لحد ما تجرح بلعومي كد ما بجيت بسكوت. 

لشوي حسيت واحد يدك على ضهري.. اندرت.. دحكتو حرب يضحك بوجهي.. ابتسمت ابتسامه تعبانه..

-جبتلج كيكه وحليب تاكلين

-هزيت راسي لا.. ونزلت دموعي

-ليش تبجين .. بابا ضاربج ؟

-هزيت لا..

-عجل شنو ..

-اريد اهلي..

-هااا مشتاقه لابوج مو ؟

-بابا ميت

-وانه هم امي ميته

-انقهرت عليه من كال هيج.. مسحت على راسه...

-احنه البارحه مو تصاحبنه خل نصير اخوان..

-ماشي.. باسني بخدي وبستو وابتسمت..  انطاني الكيكه والحليب وكال انه راح اروح اكتب ماشي

-ههه ماشي..

-تركت الحليب والكيكه ورجعت نمت.. احس السخونه دترجع الجسمي وحيل دتعب اعضامي..

بقيت انام واتكلم واون من عظامي.. لحد ما غفيت.. كعدت راسي نار.. وابجي من وجع جسمي واحس حلكي ماصخ وناشف..صاير خشبه..

اخذت شوي من الحليب ولعبت نفسي ومي ماكو.. رجعت ابجي واستحي اكوم والحجيه ماكو.. بجيت لحد ما صدك جف حلكي وحرارتي زادت..

عيوني قفلو من الحراره .. وبس اون.. والحجيه ابد ما طبت للغرفه حتى اطلب مي لو تشوف حالتي بقيت ابجي هم لان ضدك حسيت بدلال الجنت عايشه بيه

يمكن اهلي ما جانو مدلليني بفلوس وطلعات بس عايشه مرتاحه اتكاون ويه يحيى واكلب الدنيا لو صخرني وحتى هو ما كان يقسي عليه هواي

بس من صارت الفضيحه تغير جذريا صرت ابجي على امي وعلى الموصل ومدرستي وغربتي هنا

واني اون واتألم وابجي.. انحطت ايد على كصتي. فتحت عيوني صراع..

-مو كالو صارت زينه.. الحراره نار شنو القصه.. يممممممممممه وينج حجيه..

-كومي يابه كومي دا اشوف .. صاير بيج ادري سابحه خوما سابحه..

يممممممه وين صرتي يممممه.. دخلت ضاحت ها يمه شبيك..

-عجل انه مو وصيتج..

-شبيها..

-كابه نار شبيها..

-اني مغمضه من الالم وهو يصرخ براسي.. دكعدسها خل ناخذها مستشفى

-لا ما اريد ما اروح بس مي الله يخليكم مي..

-حلااا بابا كومي جيبي مي..

-بابا گل الحرب يجيبلها انه ما اريدها

-حلاااااااااااااا

-جابت مي.. شربت والحجيه تلزم بكصتي.. ورجعت نمت.. كالت الحجيه كومي يمه خل ناخذج للمضمد يشوفج شبيج..

-ما اريد حجيه ما اريد.. اريد امي... وكمت ابجي رجعوني لامي..

-عمت عيني عليج يا يمه.. وان شبيدي واوديج.. حتى هيام ما جت اليوم وتدحك شبيج.. وتكعد وياج..

صراع:- عجل ام علي ليش ما جت

-هاي تتزعل ييمه ما ادري شجاها من الكلمه تضوج

-منو ضايكها..

-بس كلتلها لا تسوين مشاكل اسكتي.. شو هاي عافتنه وطلعت زعلت..

-يمه بدينج.. انتي تاركه امة محمد كلها وجايه على هلمسكينه تكليلها لا تسوين مشاكل..

انه جايب ثواب للمرحوم.. اروح امر عليها للبيت اجيبها هي وجهالها خلها تتعشى هنا..

انتي ابقي يم هاي وراقبيها يمه خاف بيها مرض ما زين وشمروها دتعدينه..

-اني اسمعو.. وهو يحجي.. ونايمه .. طلع والحجيه ادور على دوه وتكول والله يايمه ما اعرف البارحه منين انطاج دوه وصرتي زينه ما اندله ياهو..

بقيت كاعده واتألم وحرارتي عاليه.. شوي وطبت هيام.. كالت ها شلونه البنيه. 

-هلا بالزعلانه.. والله لو هامتج جان جيتي من الصبح

-والله عاد حرنه وياج حجيه نهتم كلتي لا تدخلين نسكت ابتلينه شنسوي ونعجبكم بيت الحجي..

اجت لزمتني ... يا سوده عليه هاي ليش هيج حرارتها.. طب ابو حرب.. ها ام علي ..

ها خويه..

-اذا تحتاج دكتور كولي حتى اخذها هسه كبل لا ينزل الليل

-لا يخويه هسه انطيها علاج وعندي ابره اضربها وتصير ورد..

-هااا اي زين..

-كومي بنيتي كومي اوووي بعدها بملابسها الاجت بيهن حرام محد انتبه وكاللها بدلي ..

يمه وين جنطتها..

-ذيج يم الميز

-جريتهم ادحك بيهم.. ابو حرب سبقني وكال لا ام علي هيج ملابس لا تلبسيها كلهن كصار ونص ردن. 

-اي انه هم كلت هيج.. انوبه شتا شنو ما عدها ملابس شتويه شو كل ملابسها مشلتحات..

فتحت خانة حلا.. وطلعت كلابيه منها و جيت كعدتها شيل من فراشها وهي مطفيه.. كتلها نزعي قميصج..

-لا عفيه الرجال كاعد.. استحي

-لج يولي عينو بموبايلو وما طبعو يصدصد ويدحك..

صراع:-شلقضيه

-اريد ابدللها وتستحي

-دام انتي هين انه صاعد انام جثير تعبان..

-اصعد خويه.. جاي يطلع وانه شلت ابلوزا دا ادنك ودحكت ضهرها ازرك كلت يااا هاي شبيه ضهرج. 

-شنوو 

-هاي ضهرها ازرك..

ليليان:-التهت ادحك على ضهري والرجال طب واني ما لابسه جريت البطانيه وتغطيت..

-شبيها دا اشوف

-يولي رجلج هو خل يدحك شنو هذا..

-بس شويه... جر كتفي ووخر البطانيه.. واني حاطتها على صدري ومغطيه روحي..

صراع:- ول هاي بس لا مريضه ..

-لا دحك يمكن اصار طك ماكلتلها جتله وهيج صاير.. يااا بس لا ام سعد لما جتلتها البارحه..

-متت خجل وهم كاشفين ضهري ويدحكون.. جريت نفسي وتغطيت.. ولتلها لا ما هي اللي ضربتني اخويه..

هيام:- اخوج طاكج هيج ؟

-اي لان ما ردت اتزوج بقى يدفر بضهري..

-عمى بعينو ان شاءالله كافر هاذ لو شنو .. شفت حتى هي مجبوره على زواجتك ما بس انته متخبل. 

صراع:-عجل ليش جابرج ع الزواج..

-خاله بس لبسيني القميص دار وجهو .. وهي لبستني كلابيه ما اعرف مال منو .. وكالتلي كومي حتى تنزل..

كمت فتحت البنطرون من جوه الدشداشه ونزعته   وهو داير ضهرو ويكلب بالتلفزيون..

-كعدت.. دار.. ما اعرف شلون حس اني كملت .. يمكن جان يشوفني بضل التلفزيون.. لان من يدور الشاشه تصير سوده

تقرب.. وكال اخوج ليش جابرج

-لان كل اللي بالمنطقه كام يحجي عليه من خرب سمعتي اخوك..

-مو انتي اللي جانت عندج علاقه بيه ليش فضحتي روحج..

-ما كان عندي علاقه بيه والله هو يلاحكني وغيرت طريقي حتى لا اشوفه ويتحرش بيه عاد لحكني للبيت حتى يحجي ويايه وكام يجر بيه للسياره وطلعو الجيران لان جنت ابجي ما اريد اصعد وياه. 

صراع:- هو حلف ع القران معقوله جان جاذب

هيام:- دام امو لميعه الما تخاف الله كلشي اتوقع والله .. والله انك يا ابو حرب جنت ظالمه..

-تراج دوختيني وانتي تلومين شظالمه لا طكيتها ولا اذيتها.. انه اعرفها واجيبها ابيتي.. غريبه وما هي من ثوبنه  شتردين اسويلها..

الله عالم شتطلع وان تقبلتها تكعد وتصير حرمه اليه ما هي الا رضى بقسمة الله والكاتبو .. بس لا تضنين ثاق بيها ..

ياما مرو عليه اشكال كلت ملائكه وهم شياطين وجيل هلوكت ينخاف منه ما اثق بيها لو يطلع اخوي من كبره ويعترف دامها غريبه فهي مجهولة الاخلاق .

ليليان :- سممني بهلكلام وطلع.. دنكت.. كالت لا تلومينه بعده ما يعرفج.. دا تحجي.. رجع دخل وصاح...........يتبع

☆☆☆☆☆☆

#زينب_ماجد

#مراهقة_و_الأربعيني

،،،،،،،بقلمي زينب ماجد،،،،،،،

الحلقه_9

ليليان :- سممني بهلكلام وطلع.. دنكت.. كالت لا تلومينه بعده ما يعرفج.. دا تحجي.. رجع دخل وصاح

-ام علي تعاي شويه..

كالتلو اي جايه.. وطلعت وراه.. بقيت كاعده.. شوي واجت.. كتلها شنو راد.. ابتسمت .. كالت انطاني فلوس اجيبلج ملابس باجر من السوك..

لان ملابسج كلهن ما يقبل بيهن مشلتحات واحنه ما عدنا التلبس تراكسود لو نص ردن لو قصير كلنا دشاديش وبالطلعه من نطلع نلبس جبه.

-هزيت راسي.. انطتني الدوه وضربتني ابره بايدها وكالت شويه وتصيرين زينه بس لا تنامين السخونه والفلاونزه ما يتناملها تزيد عليج..

انتي هم اكلتي ؟؟

-لا ما اشتهي

-عجل شلون اطيبين ما بكيفج هسه اروح اجيبلج مي لحم ابيض اتشربي اطيبين.. لا تاكلين خبز خاف ما زين عليج..

-هزيت.. راحت خطيه حمتلي تشريب اصفر هم يسموها تشريب ابيض .. وانطتني اشرب بخاشوكه.. وكعدت..

رفعت راسي.. كتلها اخلاص من 

-هه هاي الحيه ام راسي كبالج راس ابيض ووراج راس اسود..

-لا صدك والله البارحه حسيت اكو بداخلها حقد عليه لان كذبت جانت متعمده من كسرتهم..

-يولي مو زين بس هاي سوتها هاي سوسه خبيثه خليصان وما ادراك ما خليصان

-ههههه غير اعرف منو خليصان. 

-هاي تصير بت عمي عشتو..و اخت مرت صراع.. وحماتي اخت رجلي خالة حلا. 

-دخت.. ههه بس ما فهمتو..

-حقج هي صايره لخه.. انه افهمج الوضعيه كلها دحكي.. ابوي جان متزوج امي.. بعدين اتزوج ام سعد.. من تزوجها هجر امي  

صار ما يدحك بوجهه.  اخر مره تقربلها وصرت انه.. يعني من ال78 وانتي حسبي شكم سنه صالرو هاجر امي..

-وامج قابله..

-امي مره فقييييره من اهل الله انطيها سبحه وسجاده وصلاة ما تعرف غير الله.. ما تدور مشاكل

دوم تسدسد وتسكت حتى ما تكب المشاكل.. رغم هي اول وحده متأذيه بس تكول الدنيا مو دار راحه انه اريد الراحه يم الله..

ام سعد من تزوجت الحجي.. زوجت عمي صالح لاختها وسيطرن على عمامنا كلهم.. الساناتهن قويه ويتكابلن وي الرجال ويحجن وحظودهن كاعده لو شا يسون محد يحجي عليهن 

من صراع راد يتزوج.. هو بي طبيعه ما يحب الغرب ما يأمن ليش يكول ما اثق بيها.. كلنا ناخذ كرايب حتى ما يطبنه الغريب..

فقنعته ام سعد ياخذ بنت اختها اللي هي بنت عمنا وجدان.. ام حلا.. من اخذها وره سنه.. اخذوني لاخو وجدان.. صار زواج كصه بكصه..

وعساني لا تزوجت ...

-ليش

-تنهدت.. شحجي يا ليليان.. شفت قهر بس الله يعلم بي..

-انتي مطلقه..

-لا رجلي ميت مات ب2006 بالطائفيه.

-ياا خطيه. 

-الله يرحمه.. صدك مات وانكسرت بوراه بس ارتاحيت..

-ليش

-تسأليني على اخلاص منو.. اخلاص تصير اخت رجلي واخت وجدان مرت صراع..

جانت المدلله مال اهلها وامها بعد اسم من ام سعد بالف مره.. شايفه انجوم الضهر.. جان من ضيمهن يكللي ذيج انجوم الضهر شوفيهن..

احنه ولدنا كلهم شواغيل وما بيهم الفقير كلهم عدهم خير من الله ورجلي هم عنده خير ويكدر يطلع بيت وحدنا..

وما يقبل بسبب امه وخواته.. رغم صراع جان طالع بيت وحده مكعد وجدان.بس كم سنه ورجع ويانا ووجدان كلبت الدنيا واجت زعلانه لبيت اهلها شلون يبيع بيتها..

تالي عرفو بيه يريد يطلكها رجعها ابوها ثاني يوم..

-ليش يطلكها

-ما جان يحبها كلش.. ما مخلي عليها قاصره بس مو ذيج المحبه.. يعني من طلعت كال كلولها بعد لا ترد.. ورقتها وراها مو انه التمشيني مره..

وهو صدك تحكينو ساكت وهادئ بس كلشي يعرف ومرتو جانت تصف وي ام سعد على امي وكل كتله يكتلها لان تأذي امي..

حتى ملابس امي ما جانت تغسلهن.. تتفق هي وام سعد وامي فقيره تسبح وتغسل ملابسها حتى تتجفى الشر وهو من دره يبوووه كلب الدنيا فوك راسها..

ولو زعل وياها تجي تبوس بامي تعرف هي نقطة ضعفو وميردها..

وانه والله خدامه واركض بيناتهم على الولد وعلى عمي وعمتي وحتى اخلاص جانت ملابسها الداخليه انه اغسلهن. 

واذا فد يوم ما غسلتلها حاجه حسبي حركت عليه المرحوم وانجتلت جتله زينه. 

-جان يقتلج علمود اختو .. ليش هي متغسل ملابسها

-كتلج مدلله عد امها وابوها وحتى امها ما تقبل تزوجها تكول ماكو احد يستاهلها وتالي هسه هي التركض وي الرجوله بس اخذوني استغفر الله من ذنبها. 

دنحجي.. ودخلت الحجيه.. فكالت هاي امي شاهده ونور محمد يجي العيد ويمر عيد.. كلابيه وحده رجلي ما يشتريلي ولا ينطيني..

-عجل منو يشتريلج. 

-عيشتي على صراع.. جنت اجي لهين كل شهر 3 ايام.. صراع عندو العيد.. يجي محمل اشكال والوان وشتردين وشتحتااجين ام علي ما يسميني باسمي كد احترامو ..

كعدت الحجيه وكالت وشجاب هلسيره هسه..

-هيج جاي اسولفلها يمه.. اي..

-هو يحبج..

-يوووه .. لو اشعله العشره شمع والله ما اجازيه انه من زمان اكول هو ابوي مو الحجي.  لان الحجي ما داري عني .. فاك حلكه على مسعد شحجت وشكالت..

جنت من اجي وجدان مرتو تتضايق لان يكابلنا انه وجهالي هنا بالغرفه وحجي وسوالف وضحك.. ومحمل فواكه شنريد وشنشتهي

جان بذاك الوكت ماكو موز قله حصار .. هو لان مره تنسيت بموز كام كل ما اجي يدور الموز دواره ويجيبلي

وما يدخله وي المسواك..يحط المسواك والفواكه بالمطبخ و بكارتونه وبعلاكه سوده يحطه بغرفة الحجيه ويكلي جبتلج...

وتكعد الصبح وجدان صباح الخير ما تكللنه.. وتبسمر هي وخالتها..

ليليان :-و من وين تعرف اكلتو موز ههه

-هه من الزباله من نشمر بيها تبين وتضل تحجي وليل نهار تدعي عليه لان اخذ فلوس من صراع

رغم هو والله الله شاهد ينطيها.. ما مخلي قصره فواكه مسواك ملابس فلوس شتريد.. حتى من الخارج يشتريلها

بس تحب كله الها.. صح واحد يحجي الحق.. هو ما جان يطلعها لو يفتر بيها لو يونسها.  كل ما تكله يتحجج تعبان ما بيه حيل لو ممنوع.. المهم ميطلع يكره طلعة النسوان ويفرفرهن. 

بس هي تجي عد اهلها يخلي بيدها مصرف وين تشتهي نفسها تروح.. ما تمتنع.. وهو يدري بس لو كالتله راح اروح ميقبل يكلها ممنوع

بس من تروح وتجي ما يحاسبها يغلس حتى ما يضغط عليها.. وانه والله هو مو حسد بس واحد تحز بنفسه..

من اطلع هنا ثاني يوم المرحوم على راسي.. عيونو نار وياخذني وين اليوجعني .. توصلو وجدان  حجي ان اني طلعت..

صراع عنده عاده من اطلع يشيل مصرف يكلي هاي لجهالج رغم هو ياخذ جهالي بايده يتسوكلهم تراكسودات.. وامي تشتريلي ملابس

بس من اطلع لازم يخلي بيدي واذا يعرف اليوم اروح وهو مموجود يخلي عند الحجيه لو يكلها انطيها وانه انطيج..

وذيج تشيل روحها وتحركها شلون ينطيني.. وتصيح اي بس الها يدحك لحلك هيام.. وتحجي وتشكي لاهلها وتكلهن ما يديرلي بال بس الهيام..

وانه الاكلها من رجلي من يحركنه عليه.. وما اكدر اشكي واحجي ابعل بهلهم واسكت.. عود كلش اذا طكيت واجي لاهلي زعلانه

الحجيه هاي كدامها احجي.. اس واس ولا يسمع صراع وستري علينا ولا يتكاتلون العمام اكلها وج يمه والله تعبت جزعت ما اريدهم

لا اكله بيها خير لا عيشه لادنيا خليني هنا كاعده.. تكلي تهجمين بيوت انتي لو اطلكتي صراع ما يبقي بمرتو يطلقها ونتكاون..

وهمه كلهم ثاني يوم الصبح يجون لو زعلت وحتى وجدان يبقون يبوسون باديه بس سكتي ولا توصليها لصراع وتكبر..

ويطمطمنها وارجع.. يبووووه شكد شلت هموم منهم.. حتى ابوي وياهن عليه...

جان صراع لو يلعب وي علاوي ابني وجدان تكوم تبجي وتشكي لاهلها تكلهن تحرض بصراع عليه لان ما عندي ولد..

جان ما عدها حرب.. بس حلا.. وانه والله لا حاجيه ولا ابد.. بس علاوي طفل والسان وصراع يحب الولد يكعد يلعب وياه لو يلبسه الشماغ ويطكله صوره لو يحير شيسويله

يعني ابن اختو اكيد يحبو .. ما بيها شي.. وكل هذا الحجي ضامتو بكلبي والله لو انطق كلمه لصراع الا يتخبل عليهم..

بس امي جانت سكتي وسكتي ومنها شبعت الضيم..

-يا يمه شتفيد المشاكل متكليلي شجابج هسه ايام ولت ومشت..

-يمه هي مشت بس بعد الجامهن يدك بكلبي عجل عيشتي عيشة البنات ما شفت من عمري شي غير الركض وره العيشه..

وربج يا ليليان..من مات رجلي ردت اخذ غرفة نومي.. غير من حقي.. عمتي تعاركت وياي وتكلي اريدها لاخلاص هاي من اخوها هي احق بيها

اكلها غرفتي شلون انطيها.. وانكتلت وانطردت وانه بعدني العده ما طالعتها.. واجيت.. شسوه وشعمل صراع..

هجم بيوتهم عليها ودالهم بتهم.. كاللهم دام كتلتو اختي وطردتوها اخذو بتكم وحتى حلا ما تروح وياها تبقى عندي..

وصارت عمام وشكبرها و6 اشهر يله قبل يرجعها   .. هو شكد.هادئ بس وقت عصبيتو كافر

انتي زين بس غلط.. لا اذاج ولا سوالج شي قهرتي لان ما الج احد.. بس لو ادحكين عصبيتو الحقيقيه الا تشردين والله..

مره من المرات.. انكتلت الحجيه بسبب وجدان.. كتلها الحجي..

-ليش

الحجيه:- هيام شلون وياج.. سكتي يمه ماتت المره الله يرحمها. 

-ههه سكتنا يمه..

-لا صدك والله ليش ضربها الحجيه. سالفه وجدان وام سعد.. دخل الحجي ثاير علينا انه وامي.. بعد موت رجلي جنت عايشه هين

وكتلنا اثنينه.  جان بوكتها ابو حرب ابغداد دوامو.. صدك انهضمت.. ودعيت الله من كل كلبي صراع يكسر دوامو وينزل

وربج ثاني يوم نزل.. سلم عليهم بره وطب سلم علينا امي تلكته وكأن ما صاير شي.. بس انه جان وجهي ما يكصو السيف مهضومه

وامي تحلف وتخزر ما احجي كتلها لا والله بعد ما اسكت.. هو اجه سلم عليه عقد حاجبو وهو يبوس خدي ويسلم ويكلي خير خيرج ام علي شبيج. 

هزيت راسي وكتلو كل الخير بيا .. وكف.. كال شنو الصاير كتله ارتاح مو هسه الحجي..

دخلت مرتو تحظن وتبوس هو دحكني ما درتلها ولا اهتميت الها من تحجي ثكل وياها.. وشويه زكاللها وجدان اخذي حلا وصعدي فوك..

صعدت وهي بعيونها تتوسل بامي بعيونها عود اسكتني.. وامي تكرص.. بيا تالي كالتلي كومي سويلي استكان جاي..

كاللها صراع لا يمه عيفج من الجاي هسه دا اشوف ام علي منو غاثها.. كتلو كوم ارتاح خويه وانه بليل احجيلك..

كال حرام بالحرم هم عيني تغفى وارتاح وانتي هذا حالج.. احجي ام علي بالقران اجتلهم جوه اجدامج والله.. 

هو كال هيج وامي كرصتني حيل وانه نفجرت ابجي.. صاح شبيها يمه منو وياها..

ونزلت احجي احجي احجي وهو مدنك ويسمع ومن تسكتني امي يكلها اسكتي حجيه.  خلصت.. باس راسي وكال والاسمه محمد دموعج لاخذ بحيفهن..

وطلع ويه الحجي تكاتل شلون تضرب امي واختي.. وذيج المكاون الما تصالحو بيها الا بسنه ونص..

كمل عركتو وي الحجي وصعد المرتو.. واحنه وراه من دحكتو هيج عصبي خفت لا يجتلها موت لو هو يطك من عصبيتو..

وامي تضرب وتدعي عليها لان هيج صار بسببي طلع من الغرفه.. ودخلنا عليها لكيناها جنازه وبالكاع.  مدميها..

وخابر اخوها كايله تعال اخذ اختك وهيج منكم لا من خواتكم.. شالتها ام سعد و امي للمستشفى..

رادو يطلعونها يجيبوها هين كال اليدخلها والله يبتلي على عمرو اخذوها لاهلها ويريد.يطلك بس امي زعلت وياه..

وكالتله لو طلكتها وهجولت حلا لا انته ابني ولا انه اعرفك.. انه الصبرت العمر كله علمودكم تضلون تحت سكف ابوكم وما تتشتتون تالي انته اطلك مرتك..

وما طلك بس ما جابها.. رجع لبغداد اسبوع ونزل.. لكاها ابوها جايبها للبيت.. ما حجه.. ولا دارلها بال..

هي فوك.. هو ينام جوه.. يمنا انه وامي امدلو فراش وينام ويدز على حلا تنام بحظنه .. ويخليها فوك لا يدحكها ولا يريدها..

مرتين يروح بغداد ويرجع ولا صالحها ولا ابد..  حارت شتسويله ويرضى تحجي وياه تبوس تريد.. حتى وهو بالحام اطب عليه في سبيل تخضعه وما يخضع..

عندو فد.مكابره .. لو لبس واحد.ما يدحكو لو يموت وما ينغري .. لو تعرت كبالو يتفل عليها ويكوم وما يدك راسو..

كامت امي تكلي لا تمديلو فراش هين خل يشوف ما الو يمنه مكان ويصعد لمرتو تاكها وحدها..

ويجي وما يلكه فراش.. يتمدد وي ابني علي بفراشو وما يصعد.. انجبر اكوم اجيبلو فراش واكعدو اكلو ابو حرب نام بفراشك..

تالي امي زعلت وياه كام من يحجي ما ترد عليه.. لان ما يصعد المرتو.. اضطر حتى يصالح امي صعد بغرفتو..

بس عود يهدئ .. هانها بالاكثر تجي تبجي وتشكي يم امي تكلها ياخذ حاجتو غصب عني ويتفل بوجهي ويكوم وما يحجي وياي لهسه ولا يدحك.بوجهي..

تحجي وياه امي يكلها غصب عنها.. ما عاجبها ذاك الباب والله وياها.. جنت نايم يمج ما قبلتي عجل لا تدخلين بغرفتي وشسوي بيها..

و6 اشهر يله دك راسو وتصالحو..

-اووف صعب طبعو..

-حيل صعب طبعو ما ينحمل بس ع الغلطان.. تصيريلو ماي يصيرلج انعم من الورد.. تمشين وياه اعوج يشمر فوكاج تيزاب ويحركج..

وما ينلعب بعقلو.. ولا تكدرين تخدعينو بس امي ومو ينخدع بس من حبو الها يقبل بكلشي حتى ما تزعل..

ماتت الله يرحمها.. ومبريه الذمه بس السوالف تبقى والجرح جذب واحد يكول يطيب الانسان يتناسى ما ينسى..

وهسه خليصان لحكتنا.. من ماتت وجدان يردوها الو حتى تلمو غشتو.. وصارلو 8 اسنين ما قبل يتزوج..

ولا رادها ووالله من كالت امي راح اخطب اخلاص وصراع وافق فتحت صدري لله كتلو ربي حيه ثانيه وتجيبها بجاهك خربطها..

وصار اللي صار وجيتي انتي..

-بس اني ما اريدو..

-ولج ثوله شعدج انتي وما ترضين بيه لا اهل ولا اخو ولا ابو.. دكسبي واخذي

-لا ما اكدر .. هو بكد ابويه فدوه .. الا اكولج هو بس لا يجبرني

-باع هاي .. بوسي ايدج وجه وكفا لو التفتلج لو رادج.. هو متكبر بهلموضوع ابد ما يتوسل نفسه لاحد
.

-يعني ميريدني. 

-لا  والله الاعرف .. ولا يريد..

-اي احسن.... بلكت فتره يطلقني وارجع لبيتنا وارجع لمدرستي..

-ان شاءالله

-الحجيه جانت تقره قران.. صدقت وكالت بدال هلسوالف الماصخه كومي حطي ايدج وياهم بالمطبخ صايرات هوسه

-والله مالي شغل بيهن كومه نسوان.. لو الا هيام يطيح حظها يلا ترضين..

-هزت ايدها ورجعت تقره قران.. مدت ايدها هيام على كصتي كالت مو صرتي احسن.. هزيت راسي..

كالت عجل كومي خل نطلع بالحديق نشم هوى .. مشينا وطلعنا.. اجاها ولد شاب يطلع عمرو ب15 سنه كاللها ماما فلوس

طلعتل و انطتو  وكالتلو سلم على مرت خالك..

-يا خالي

-ههه يول خالك صراع

-لا بربج يمه هاي مرتو

ليليان:- استحيت منو دنكت وضحكت..

علي-يمه بدل ما تزوجين خالي عجل لو مزوجتني

هيام-تفلش راسك والله  لو يسمعك.. ميت ع الزواج ولك..

ضحك وهو يمشي ويكلها دهمي نفسج نريد.. هزت ايدها وتكول بكدك عبالنا الكمر يمشي يول وانته تريد حرمه. 

-هههه الله يحفظه..

-ويحفظج..

-كم طفل عندج..

-ما عندي اطفال جهالي كبال علي 15 و ساره 13 و جنات 9 سنوات..

-زين انتي هم عندج خوات لو لا

-اي عندي من ابوي 3 بس ما تربطني علاقه قويه وياهن لا يسألن ولا يتفكدنا.. على كولة المثل اخوتك من ابوك مثل الربع الرافكوك..

واخوان نائل و سعد.. وعلي اصغر من سعد متوفي وعابد الله يرحمهم.. اما من امي بس صراع ما عندي غيرو..

-زين شو ما دحكت خواتو

-خلصن العزه وطشن لبيوتهن.. يوين وتلكيهن يجن يشوفن اخت الارهابيه على كولتهم حتى يكعدن يغثن زايد..

-اووو يعني بعد فوك هذا

-هههههه مسيرتج طويله وطريقج كله شوك استعديلو

-دخلنا المطبخ واكفه ام سعد و نوال يطبخون.. حجت تم سعد شنو اديجن محنتيه ما تحطنها ويانه..

-والله خاله هلبنيه حيل مريضه لا تكل ولا شرب جان عاونتجن بس كلت اشممها هوى اليوم كله انحبست بالغرفه

-وانتي شدعواج هيج مهتمه بيها.. يطبها المرض عساها تموت..

-امشي ليليان..

طلعنا كعدنا بالحديقه عصر والشمس ماكو بس ضوه كلش حلو.. شوي وبردت.. كالت خل ندخل لا ترجعين تتمرضين

دنكوم دخلو بيت عمها كالت استلمي اجت خلوص .. ابتسمت.. دخلو سلمو هرجو البيت هرج سلام وحجي وسوالف

واني كاعده وياهم عمري ما شايفه هيج ناس وتجمعات .. عندي غريبه.. نزل صراع..

دحكتو.. كد ما حجت بيه هيام .. من نزل خطر الحجي براسي خاصه معاملتو ويه زوجتو السابقه..

الله لا يجمعني بيه ولا يخليه يريدني صفاتو ما تنحمل .. ما اكدر اعيش عيشة مرتو..

هو حتى ما دحك.بوجهي نزل كعد.. وما يحجي ويشارك لو بموبايلو لو يحجي ويه سعد كاعد يمو..

صبو الاكل ساعدتهم كمت اشيل الاكل وياهم عيب هم كلهم ينكلون واني اتفرج   ف كمت تجيب واحط ع السفره  

حجه من ورايه .. يابه طبي المطبخ لا تحطين انتي  وغيري دشداشتج تراها خفيفه..

-درتلو بس ما عندي غيرها..

-عجل طبي ولا تفترين هين بيها.. على ما ام علي تشتريلج ..

رحت وكفت بالمطبخ.. اللي اسمها اخلاص كأنو البيت بيتها محزمه وتصب وتعزم وشيل وودي وخابصه روحها..

جان تزكح بيا لا تكفين نكلي التمن.. كلتلها ابو حرب ما يقبل اطلع يكلي دشداشتج خفيفه.. بقت تخوزرني وتنفخ وتنكث باديها .

تالي كالت تعاي خضي هلصواني على ما يكملون نكل هم ميقبل.. وتقلد بحلكها عود انعوص واني ما منعوصه حجيي عادي..

كالتلها نوال لا تركيهم هم يكملون وهم نرجع ننكل بيهن عجل بيمن ننكل..

بقيت منتجيه ع الكاونتر وهي تمسح يمي بحركه وتنضف يمي وتكول قليلات حيا ولا يستحن خوش يوكعن الرجوله. 

شكد كلامها مو حلو.. مرديت.. طلعت منهم.. وكفت اباب غرفة الحجيه وادحك عليهم.  شفت حرب كاعد ويأشرلي. 

مشيت كعدت يمو.. واجت عمتي كعدت يمي وصراع يم حرب.. ادحك اكلهم كلو دسومات.. تمن مرك تشريب دليميه..

احنه ما هيج اكلنا.. العشا عدنا مو ضروري وحتى لو ردنا ناكل مكليات او كبب او قشطه وجاي او جبن يعني خفايف

هم هنا يعتبروها مقبلات هاي. ما ترضيهم كل اكلهم ثكيل ولازم لحم ع السفره .. اني وحرب ناكل بماعون واحد..

صراع شال وذرة لحم وحطها فوك التمن الدناكل بيه.. اكلت منو.. شال قوطيتين بيبسي وخلها كبالنا..

للحظه حسيت نفسي اخت حرب وهو ابويه.. وحيل حبيت الشعور لان شعور فقدان بابا خلاني بنقص اتمنى اللي اشوف مثل ابويه..

كملت اكل اول وحده وكمت.. كلت خل اشارك وياهم بالمطبخ عيب وبدل ما هم يطلبوها مني ويذلوني اني احس على روحي واكوم اشتغل..

فرحت للمطبخ حطيت زاهي وسفنجه وكعدت اغسل واجت نوال تشطف ويايه.. انوبه كامو ينكلون..

متنا لحد ما خلصنا.. كالت نوال صبي الجاي.. دلتني على الستكاين والصواني وطلعت وكل شوي اسئلهن. 

هيام كالت.. ليليان تره ابو حرب ما يشرب وياهم.. كتلها ليش كالت استكانه وحد ما احد يصب بيه يكش من البشر

-عود ليش

-هاي نفسيته لا الخاشوكه ولا الاستكان يشاركهم باحد  يكول ذني الاثنين يتخلن بالحلك وانه واحد جايب براطمه مخلي بيهم واجي اشرب وراهم لو اكل.. شهلزفر

-غير مغسول

-لا يبقى يتخيل ذن عليهن اثار حلوك.. وتكش روحو ذاك استكانو.. نزلي وغسلي زين.. وصبي..

نزلتو ودا اغسلو جان تدفعني اخلاص وتكول بالله شويه اغسل ما حسيت الا الستكان زرك ووكع بوسط الحوض وانفطر..

شطفتو وصبيت بيه انكسر متحمل الحراره عاد رحت جبت استكان جديد خليتو..

شلت الصينيه وكوه امشي اخاف توكع وابتلي.. لكيت الحجيه كبالي دنكت انطيها.. صاح نائل خويه ابدي من الحجي وعمي وافتري علينه وبعدها النسوان..

من الخجل والارتباك الصينيه تتهزهز انطيتهم.. ووصلت لصراع جان ماسك سبحتو ويفرك بيها.. من خليت كبالو

كال اي.. راد يمد ايدو.. بقى يدحك ورجع ايدو على شواربو يمسح بيهم.. وكلي كولي لام علي تصبلي..

-استكانك انكسر بلا ما اعرف والله.. صاحت ام سعد من هسه كسرتيلو استكانو عجل بالتالي شتكسرين..

همست ادري حاطه اذنج يمي..

-ما صار شي  انكسر الشر كولي لام علي هي تصبلي ..

-مصر الا ام علي شسوي .. رجعته وكتلها.. صبتله جديد وكالت وديه كتلها بس هو كال انتي كالت عوبه عودي عليج يتعلم الخدمه ما من غيرج..

كلت بكلبي شنو اني خدامتو واعلمو اني اخدمو.. جان تصيح اخلاص بعدج واكفه جيبي انه اوديلو الرجال تلكي منتظر..

خزرتني هيام واخذت الستكان مني وتكلي عوبه لا تصيرين.. كتلج انتي اخذي .. وتخزر حيل..

هاي شبيهم على استكان انخبصو.. اخذتو ومشيت دا اريد انطي .. جانت الزوليه مكسوره وجان اتعثر واوكع الاستكان بحظنو

نص صار على وجهي اطشر ونص على دشداشتو .. فز من مكانه وكام يهفي بدشداشتو على روحه ويكول هيج جاي ما ريده عساه جاي الاكشره احتركت

واني الجاي بوجي وكعدت بمكاني ابجي والعالم تضحك وهو يكول ..انكلعي يولي لنعل شيب الخلفج سويتيني مضحكه على هلجاي هذا..  ام عليييييي

-طلعت تكلو ها ها.. كاللها بقيتي بيها ها.. تركها وصعد يبدل واني كتلها مو كتلج ودي استكانو احسن احتركت بوجهي..

-ههههههههه دكومي يولي كومي يلعوبه ما من وراج فايده كومي غسلي...... يتبع

☆☆☆☆☆☆

ههههه حركه موفقه تكبر وتنسى ابو حرب هههههههه .. بينتلكم جانب من حياتهم السابقه حتى تتوضحلكم الاحداث الجايه بوضوح.. وايضا عرفت الشخصيات الكم لان بعضكم للان يخبط بيهم..