رواية مراهقة والاربعيني الفصل الثاني وثلاثون 32 - بقلم ڼدىَ

اسفه ع التأخير حبايبي لأن هلفترة كولش مبتعدة عن مواقع التواصل وملتهية بدراستي دعواتكم😘
#مراهقة_و_الأربعيني

،،،،،،، بقلم زينب ماجد ،،،،،،،،

الحلقة_46  & 47 (الجزء 2)

... وقت يلي خلصنا صلاة واخذ ايدي للتخت.. انتبه انو ايدي ترجف رجف ما طبيعي.. من الخوف و القلق و الارتباك .. وشعور ما اعرف اشلون اوصفو..

ابتسم وگال :- شدعوه هلكد اخوف انه ؟

-ااا لاا ما هيج بس ...

-لا تخافين حياتي .. هدي نفسج.. واطمني ماكو شيء يخوف..

تمدد ع التخت .. ومدلي ايدو .. تمددت وياه.. مسح على شعري .. وباس راسي .. وقرأ قرأن وهو حاط ايدو على راسي ..

ما اعرف ايه .. بس اللي عرفتو ان هو ديرتل قرأن.. صدق وگال :- تعرفين الله شنو گال عن الرجل و المرأه بهلوضع بالقرأن

-اشنو قال

-((هن لباسا لكم وانتم لباسا لهن)) .. دحكي شلون الله وصف العلاقه بالملبس .. انتي تصيريلي فراش يمنعني من الحرام .. واني اصيرلج غطا يسترج ويصونج ويحميج على طول ..

... امنت لما صار هيج يحجي وهادي وهو يعلمني ويشرحلي واني اشكد احبو وقت لما يشرح ويعلمني جثير احب استمعلو بتمعن..

مع هذا الكلام شوي شوي .. الى ان خلاني اسيرتو بلا ما احس .. وصرنا واحد....

..ما وعيت غير وهو يسحب ايدو من تحت راسي .. ويبدل حتى يطلع.. جنت غافيه من سمعت طبگت الباب..

دحكت الساعه .. ب 1 الظهر .. حيييييل هاي شكد نايمين ومحاسيين.. ادحك بالغرفه .. البردات نازلين والضوه مطفي يا دوب ضوه النهار يفوت من البرده ..

والاجواء كلها مو مال واحد يكوم من التخت ابد.. بس يلا كافي .. خل اكوم اشوف الدنيا شبيها ما بيها..

بعدني اريد اتعدل .. اندكت الباب .. بسرعه جريت الغطا واتلفلفت بي.. دخلت هيام صاحت صباحية المباركه عليكم ربي يترس هلبيت جهال ويفرحنا بيكم ويديم محبتكم

واستلمتنا هلهوله وره هلهوله .. واني اصيح .. يمعوده فضحتيني دكافي .. مو هسه اتزوجنا والله وهي هلهوله اطك هلهوله.. فضحتني فضاحه..

واني بمكاني استحي اكوم بس ملفلفه.. عاد طلعتلي ثوب البسو واروح للحمام بي وثوب لاخ البسو بصباحيتنا ولو هي دنيا ظهر بس هم يسموها صباحيه..

اخذت الثوب ودارت طلعت .. بدلت .. فات صراع .. سابح منشفه ملفوفه على خصرو واللخ زاتها على ضهرو ..

تقرب وكال صحي النوم يحلو .. واخذ وجهي بأديه .. وباس خدي واني بس مبتسمه بخجل وشويه وياها غباء .. لأن ما اعرف بهلمواقف شنو لازم اتصرف ..

-اااا اريد اسبح

-هههه تمام روحي يلا..

... اخذت الملابس ورحت للحمام .. سبحت ورجعت للغرفه واسمع هلاهل هيام والحجيه جوه ..

يريي والله فضحني شيخلصها .. صراع نازل ما موجود بالغرفه .. عاد بدلت وتعدلت ونزلت ..

رحت للمطبخ نور واكفه باركتلي وام سعد هم كالت يجعلها مبروك.. مدري شعجب طلعت منها .. والحجيه استلمتني محاظن وبوس

ودعوه اطك دعوه .. صلي ..

دخلت هيام كالت يااا وج مكصوفة الرگبه شعندج نازله ..

-اكلج جاي تحسسوني نازله من زحل .. هو شصاير تره صارلنا تقريبا سنه متزوجين ..

-ولخ اااخ من السانج لو بس تكضبي .. صعدي بغرفتج لا تنزلين .. يولي تعتبرون عرسان جداد خلي الرجال فرحان دصعدي ام السان..

... عاد صدك اني هم ما صدكت خلصت من الشغل و الدوخه صعدت بغرفة صراع .. غرفتي حاليا هههه

لكيتو متمدد.. ع السرير .. رحت يمو .. وصعدولنه الاكل اشكال والوان ..

وبقينا بالغرفه ما طلعنا ابد.. حتى بليل .. صراع ما نزل .. بس نائل جايب النا كيلو بقلاوه و بارك لصراع .. والحجي جايب كيلو زنود الست .. وهم باركلنا..

.. جانت فعلا اجواء عرسان رغم القهرني ان ماكو عرس وبدله وحفله ضلت بنفسي بس حسيت بأجواء عرسان..

.. صراع مو كن تزوج لا كأن استقال من العالم .. اسبوعين .. هو حتى الدوام ضربو وما داوم..

لا ينزل لا يطلع .. مكابلني وكاعد تكول طفل وجابولو لعابه .. دوم ماخذني بحظنو ..

بين وقت اللي نقضي مع بعض .. او وهو كاعد.يدحك اخبار .. او يتصفح موبايل .. او ينام.. وكل هذا وهو مخليني على ايدو

خلصها اسبوعين على هلمنوال .. ما ينزل بس بأوكات الصلاة يشوف اهلو وشكو ماكو ويصعد..

حتى الكل فرق عليه .. ويكولون ابو حرب حيل حلتلو المصلاويه خذت عگلو ونستو حتى شغلو..

.. وصراحه اني هم احس انحبست وياه.. اسبوعين بس بالغرفه حتى الاكل هيام يوميه تجي وتصعدو النا لليل يلا تروح..

اكلو ليش مداوم .. يكلي :- يولو اداوم واترك هلجنه العايش بيها .. الحك على الدوام وضيمو خليني مرتاح وياج..

وفعلا ارتاح ... نفسيتو فد مرتاحه.. دوم يضحك واعصابو راخيه ولا دقيقه مرت بهلاسبوعين وهو عصب او نتر على شغله .. فد مره نسى الدنيا..

... بس الشيء الحلو اللي لاحظتو بعد زواجي الفعلي من صراع .. ما عدت ليليان ذيج البنت المتشرده من اهلها وجت لهين بذل..

صار الي احترامي حسيت بوجودي له قيمه بهذا البيت بعد زواجي.. محد يحاسبني ابد.. او يغثني او يسمعني حجي..

اعرف ان البيت بيت صراع بس سنه واني عايشه بيه ما حسيتو بيتي.. بس بهلاسبوعين.. هو حسسني ان من بعدو هلبيت بيتي واني اللي امر وانهي ما هم اللي يأمرون عليه..

اني ما چنه هينا ولا بنت .. اني صاحبة البيت وهو يكلي اتصرفي على هلاساس .. انتي هينا مو خدامه البيت بيت رجلج يعني بيتج..

.. حبيت الاحترام والمكانه اللي انطانياها من لما تم زواجنا بس .. حيل كمت اتضايق من الوضع وهو مكابلني وميطلع..

حسيت ان الزواج مجرد نوم وفراش وحبسه بالغرفه .. لا يمل ولا يكل .. طلعت روحي وبديت اتململ منو واني اصلا اكره هيج وضع وحيل اخجل وهلشي سببلي مشكله ..

اتركو واريد انزل .. يكلي شعندج نازله ضلي هينا .. كمت ادير وجهي منو وانام واكلو تعبانه ..

وهو يضوج يكولي:- من شنو تعبانه شو كاعده وساكته يول لو رجعتي ادوريلج حجج.. ؟

المهم تمانعت هو الصبح كعدت دحكتو كام يبدل ديروح لدوامو .. بس ضايج ..

بدل وراح نزلت يم الحجيه .. جانت كاضبه ابن نور يبجي مصخن و نور رايحه تغسل لأبنها الثاني ونائل كاعد كوه بالهول منعس كوه مفتح

بس يريد ياخذ نور والطفل للمستشفى..

...دخلت كتلها صباح الخير حجيه ..

-صباح النور

... دنحجي واجت نور كالت ليليان عينج على احمد بس اخذ محمد للمستشفى خاف الحجيه ما تكدرلو وحدها خطيه ..

- بعيني روحي لتشيلين هم..

... طلعت هي ونائل واني اخذت احمد كعدتو على خصري وبقيت افتر بيه البيت لحد ما سكت شويه ... رجعت اكعدو يم الحجيه .. حجت

-يمه ليليان لا تضلين ساده بابج فوك وكاعده نزلي دحكي البيت شبي بس سلفتج تشتغل وعدها توم متعبينها خطيه خافي ربچ..

-يوم ما صوجي والله اشنو اسوي ما عتشوفين صراع ما يطلع من الغرفه وميقبل انزل .

-انه من يجي احجي وياه .. هسه هيرينا الريوك وكعدي الحجي خل نفض الهوسه لا يجونه وادم ..

... تركتها ورحت سويت ريوك وكعد الحجي وام سعد وتريكو وكالعاده تنظيف .. لل10 يلا جا نائل ونور

محمد طلع عندو التهاب بالامعاء وسخونه عاليه.. عاد تركتم و صعدت لكيت صراع متصل 6 مرات يا ستار ياربي شكو ..

اتصلت بينو .. رد ..

-الوو

-هلو حبيبي

-هلو ليونه شلونج

-زينه .. بس ضل بالي متصل 6 مرات اكو شيء ؟

-لا مو كلتي تعبانه البارحه فكلت اتصل اشوف اذا صرتي زينه ..

-هااا اي زينه الحمد لله

-اشتاقيتلج

-هههههه ... حجيت وياه شوي وقفلت .. ما اعرف احسو كام يهتم بيه زياده .. من بعد زواجنا الفعلي صدك صرت احس اني زوجتو والي مكانه عندو ويهمو امري ..

بس لو يبطل ملحه بقربو حيل اكرهو بذاك الوكت ما اعرف ليش ..

رجع من الدوام فات على امو كعد شوي اني نزلت احظرلو الاكل ودا اصعد احظرلو الملابس سمعت الحجيه تحجي وياه ..

تكلو يمه لا تقفل على البنيه بالغرفه تراها جنه حالها حال نور .. وهو يكللها هنه اسبوعين وسممتوني بيهن .. حسبوها عد اهلها مو كل جنه تروح عد اهلها اجازه .. اتركونا بحالنا مو سالفه هاي ..

وهي تكلو يمه يا اهل هي جانت معتكفه قبلك لأن متزاعله وياك وتصالحت وانت قفلت عليها وهلبنيه ضاله وحدها تفتر ..

ردها :- والله خبصتونا يمه بيتي جاي ابني بيه بس اكملو بالحرام ما ابقى اخذها واطلع ..

-جديد هلحجي يصراع بيت شنو عجل هذا بيت منو ماهو بيتك ؟

-يمه انه رجال رايد اخذ راحتي مشاكل ام سعد حجت ونور شكت وهلسوالف متصرف يمي ..

وكت الانه بالبيت حرمتي ما تنزل بس انه واجبها عود من اطلع شتريد تسوي ...تسوي .. اتمنى هلشغله تحفظوها وما ارجع اعيد ..

... طلع من الغرفه .. سويت نفسي دا امر اريد اصعد الدرج .. صعدت وهو وراي .. دخلنا الغرفه سوه ..

كضبني من ايدي واخذني الو .. وين وين وين .. حدري ...

-هااا

- مشتاقلج يبنيه ..

...ههههه واني هم بس كمل غدا

-يولو انتي غداي ..

-صراااع بس شويه كتلك كمل غدا وبعدين ..

-ول شبيج مو تكولين احبك وروحي بيك عجل وين حجيج هذا لو هو كلام السان

-ليش تكول هيج

-ليليان اسبوعين انه ما رايد اشوف غيرج وما مصدك انتي بين اديه بس احسج كوه متحملتني

ول بارده كل مشاعر ما عندج ليش .. هم صغيره وما تعرفين تره الحب مو تعلوم ..

... صراع ما اعرف بس كمت اتضايق

-تتضايقين مني ..

- جنت قبل احسن صح هسه تحبني جثير وتهتم بس ما اعرف

-هو شنوه اللي ما تعرفي ..

-دحكت بوجهو .. اروح احظرلك الغدا .. تركتو ونزلت .. شفت بيت سعد جايين ..

حظرت الغدا هو نزل سلم على سعد وكعد عاد وديتلو الغدا بالهول كابلو سعد ع الأكل ..

الجهال طلعو برا .. و الحجي وولدو كعدو بالهول وسوالفهم السياسيه كلعاده

دحكت نوال ونور بالمطبخ كاعدات رحت يمهم حجي وشقى وسوالف ..

وجابوها بحجي عن ازواجهن وعلاقتهن وياهم بضحك نوال تكول كل 4 ايام اشوفو و نور تكلها نائل زين لو بين بأسبوع

هو الحديث ضحك وسوالف نسوان بس اني بقت ابالي يعني ليش كل اخوتو ما مثلو هو شنو يختلف عنهم

ليش هيج مطين حياتي وما يكف عني لا ويطلعني اني الصوج دحك كل اخوتو عادي بس هو خابصني ما تحبيني وما ترديني وما تشتاقيلي ..

ما حجيت ولا كلت شيء عنو الهن رغم هن يحجن .. لأن هو دوم يحذر .. كلشي بينا بالغرفه يبقى بالغرفه ممنوع يطلع خارج حتى لو حرف..

بس انتبهت شو هسه كمت انتبه هيج يسولفن اني جنت مطفيه لو هن اول مره يحجن هيج ؟!

صار المغرب وهو كاعد وي اهلو وضحك وسوالف .. طشو يصلون واني واكفه بالمطبخ وحدي دا اكشر بتيته ..

جا وحظني من ورا ..

-حياااتي تعبتي اليوم مو

-لا عادي متعبت

-صدقه لربج .. انه راح اطلع مشتهيه شي من برا اجيبو الج ..

- بكيفك .... جيبلي نستله

-بس !! .. حبيبي يريد بس نستله كولي اجيبلو معمل نساتل مو يدلل العصفور مالتي

-هههههه حيااتي .. دخلت نوال هو ابتعد بسرعه وسوا نفسو يعدل بغترتو .. كح وكال يله انه طالع ما اتأخر لا يضل بالج

-بالسلامه عمري .. طلع ورجعت نوال دخلت وحجت

نوال :- والله وابو حرب رجع شباب وياج

-ليش

-دحكي ناسي عمرو ويحضن و يبوس ..

-ليش الزواج الو عمر

-لا بس الواحد يثكل

-يثكل على مرتو ؟ وبعدين بيني وبينو ما محظن كدام اهلو ومن شافج ابتعد.بسرعه وطلع

-والله وصايرتلو محامي ..

-فاتت نور وسألت بشنو نحجي وحجت الها نوال ونور تكلها مو رحمة الله اليوم شفناها دخيلج صارلو اسبوع ما طالع مكابلها وكاعد عشتو ..

ما رديت ... بقيت اكشر وهن يضحكن فاتت هيام .. سلمت عليهن واجت تباوسني وتكولي اليوم الگمر بين ..

كتلهم هاي كلكم منتظريني اطلع من الغرفه شنو مراقبينه

هيام:- لا يحبيبه عساكم دوم الراحه ما تفارككم ويخليكم گلب على گلب ..

نوال:- اسبوعين ليل ونهار يهيام ولج حتى لو اصفنلها ما ترهم ... يعني محبوسين حتى ما طلعو شيسوي متكليلي

شو سعد بصباحية عرسنا كابل اهلو واني تشكلت بالمطبخ تتذكرين بيوم الوكع نائل وانفشخ راسو واني وياج ووجدان الله يرحمها هينا تعلكنا

هيام:- عوذه من عينج يولي شرايده منهم الرجال صارلو سنين صايم والله حطلو كبالو خوش حلاوه عجل يفاركها ويكابلنا ..

......ويضحكن بسالفتنا شنو هاي والله لعبت نفسي حتى عيب كن ماكو مستحى ..

خلصنا شغل وهن كعدن يسولفن .. كعدت وياهم شوي ونعست من الصبح كاعده .. عاد صعدت نمت گبل ..

ما احس الا صراع متمدد بملابسو مال الطلعه ويبوس براسي ويكول حبيبي نايم .. .

-ايييي .. حجيت واني غافيه

-جبتلج حلويات و زنود الست التحبي

-عوفو الصبح اكلو بس طفي الضوه فدوه

-ما تكعدين ؟

-ما رديت .. راح تركو ع الميز وبدل واجه نام .. حل شد ماكو قفلت نعسانه يعني نعسانه .. حسيتو ضاج بس ما بينها ..

بس كال عاد ديريلي وجهج حدري لأيدي ما بس شامرتني وراج .. وهم ما رديت النومه بعيوني هو جرني وحطني على ايدو ..

كعد الصبح ما كلش مزاجو حتى ما اشتهى يتريك وطلع .. نزلت وياهم مثل كل يوم لل9 خابر كال حظري نفسج اجي اخذج فد ساعه دا اكمل اجراءات المحكمه ..

كمت تحظرت بسرعه .. اجه مزاجو ما كلش .. كال مسحي الحمره .. كتلو مو خاف صوره للجنسيه ..

صاح شحجيييت .. عاد بلكلينس كمت اخفف بس ضجت حيل هو اني شحاطه هي ورديه ..

نزلنا صورنا ورحنا للمستشفى سوولنا تحليلات .. طلع دمو O+ واني AB+ وجثير امور دوخه ..

كملنا وهو مزاجو بين بين بس اني عقد حواجبي ما فكيتم من لما صيح عليه ..

خلصنا ورحنا صعدنا بالسياره .. حجه

-شبيج ؟

-ما بيه شي

-عجل كالبه الجهره عليش .. فكيها بويه

-ليش منعتني من الحمره

-اوووو بدينا بهسوالف .. يعني مو شيء جديد تعرفين الالوان ما احبها ماخذج افتر بيج وشفايفج مرسومه شمنتظر الناس ادحك بشفايفج وتكول والله حلوه لو اسمعلي سكط يزتلو كلمه بسببج وابتلي بيه ..

-صراع شنو كلو بكيفك والله مليت

-ها بويه عجل شتردين تخوطين بشواربي ؟

-لا ما هيج بس اني احب المكياج

-ومنو كاضبو عنج عندج بيت ومكيجي لو بس فالحه تنامين بصفي بثوب البيت ما فكرتي تتمكيجن تعدلين نفسج ولا جني رجلج ونايم بصفج .. حسبة اخوج

- اهااا رجعتنه على السالفه اللي داقه عقلك .. تره الزواج ما بس هيج جزعت

-جزعتي منين يولو .. عجل شنو الزواج ؟

ولج حمدي ربج اكول كافي عليها طلباتي وما اخليج تنزلين للبيت اخاف اتعبين بطلباتهم .. اكو رياجيل تامر والعيال تأمر ومحد راحمهن وانتي اسبوعين وجزعتي ..

-زين و الحل شلون راح نخلص حياتنا كلها هيج

-يا حبيبتي شبيها حياتنا شنو اللي بالزواج ضوجج احجيلي

-ما اعرف بس ما مرتاحه ..

-عجل و الحل برأيج شلون ..

-ما ادري .. اخذ ايدي باسها وحجه

-هاي لان بعدج جديده والله وكلشي بالبدايه غريب و ما متعودين عليه بعدين تاخذين على هلحياة وتصير عادي والله بس لا تفكرين .. تمام؟

-هزيت راسي

-وهسه كليلي شمشتهيه نتغده لو حابه نكعد مطعم وناكل واطلبين اليعجبج .

-بكيفك ..

.. رحنا لمطعم تغدينا بيه ورجعنا للبيت .. نزلنا .. اني فتت لغرفة الحجيه وهو صعد فوك ..

استلمتني الحجيه اسئله واستفسار شسويتو وشكالولكم .. بقيت احجيلها ..

شوي ونزل صراع سابح وكاشخ بدشداشه لونها كحلي .. لاف اليشمغ على راسو ووكف يعدل بيه يمنا ويكول :- يمه محتاجين شيء انه طالع

الحجيه:- لا ييمه الباري يحفظك عساك سالم

اندار علينا .. يسلمج الله .. دحك عليه غمزلي وابتسم وراح

... گمت من يم الحجيه وصعدت بدلت ونزلت للبيت ويوم عادي مر .. لحد مكملنا كلمن فات لغرفتو..

مددت رجليه ع السرير يوجعوني و فتحت الموبايل اتصفح بيه .. شوي وفات صراع ..

-ها الله يساعدج

-دحكتلو .. هلا حبيبي .. نزع واخذ المنشفه وطلع
انوب حسيت عليه وهو يفوت ويبدل ويعطر بس بالي بالفيسبوك اتصفح واعلق ما يمو..

شغل تلفزيون و كعد .. سحبني وكعدني يمو .. شوي وحجه ..

:- اكول ليون احاجيج بسالفه وما تزعلين ؟

-تركت الموبايل جنب ..لا ما ازعل كول

-اول شيء اسألج .. ليش من تريدين اطلعين بمشوار تسبحين وتتمكيجين ويهمج تصيرين حلوه .. بس بالبيت هلشيء اخر همج ..

-ما اخر همي بس غير الواحد من يطلع لازم يطلع بشكل حلو خوما نطلع مبهذلين ؟!

-يعني يهمج الناس تشوفج بشكل حلو بس انه ما مهم شلون اشوفج ..

-لا ما هيج بس يعني هسه انت من تطلع مو تعدل وتتكشخ شمعنى اني .. هم مثلك

-شنو مثلي .. انه سبحت وتعطرت ولبست ملابس طلعه وطلعت .. جيت لهين نفس الحاله سبحت وتعطرت وبدلت ملابس خفيفه للنوم وجيت يمج يعني ما متغيره غير الملابس لأن لكل مكان ملبسه ..

بس انتي !!!

-بقيت صافنه بوجهو ما عرف شكول

-سمعي حبيبتي انه اعرف انتي صغيره وهالأشياء يمكن ما منتبهتلها .. بس حياتج وانتي بنيه تختلف عن ما هسه وانتي متزوجه ..

جنتي بس لنفسج محد يجيلج حره شلون تنامين وشلون تلبسين..

بس هسه تختلف .. انه رجلج والي حق عليج .. ادخل الكاج بثوب البيت وجهج .. لا مكياج لا ملابس لا اي اهتمام ..

من المطبخ و الشغل لهين .. يصير ؟

-اني سبحت الظهر ..

-وانه شعليه بالظهر عمري .. انه احجيلج هسه مو تكولين احب المكياج عجل ما تمكيجين ؟ ملابس نوم تارسه الخانه ليش ما تبدلين

-ما حبيتهم اخجل منهم

-وليش الخجل حبيبتي انه رجلج .. لحافج وغطاج .. تخجلين مني ؟

دحكي عمري .. انه اكدر اسكت وما احاجيج .. وابقى اصبر لحد ما امل وبعدها اشوف غيرج عندو هلامور وادورها بره ..

ومن اتعاتب اكول مرتي مقصره وحقي.. بس انه ما احب هيج واكعد اشكي من مرتي .. الرجال هو خيال مهرتو يعلمها ويخليها تمشي بمرامو ..

وانه احبج لهيج اعلمج ما اريد اشوف بيج الناقصه واسكت عنها واعرف انتي حبابه وخوش بنيه وتتعلمين مو صحيح .. ؟

-هزيت راسي اي .. بس خجلني بكلامو وهو حس .. فكال

-ما اريد احرجج عمري .. حسبيني روحج وجاي تحجي وياج لا تخجلين مني ..

وثقي لا تعتقدين ان اني اشوفج مو نضيفه او انقص منج بس هلكلام اكولو لج خاطر تهتمين باللي بينا اكثر حتى ميسبب فارق بيناتنا .. افتهمتي عمري ؟

-اي

.. باسني بخدي وكال هسه شنو ؟

-اروح اسبح واعدل نفسي !

-صدقه لالله هههه يلا حياتي منتظرج ..

-كمت منو ورحت للحمام .. تحممت ورجعت للغرفه لكيتو مطلع العلاكه الجابها

جايب شموع صغار مرتبهم ع الميز وفوانيس وحده جبيره ولخ اصغر منها ومرتبها يم الميز ورابطها ع الكهرباء ..

يحب يسعد نفسو ويصنعلو جو و يعيش جو الافلام ما بس يدحك عليهن ..

اندارلي وهو مكمبص يعدل بيهن وابتسم وكال نعيما عمري .. ابتسمتلو وكتلو شكرا..

وكفت ع الميز مشطت ومكيجت .. واندرت ابدل وهو ظهرو للتلفزيون يبحث فلم نكعد نشوفو..

كملت .. مدري مراقب وحس اني كملت شو بساع اندار .. اخجل اكف كدامو بهيج ملابس .. الا يطفي الضوا ..

عاد شلون وهو ترس الدنيا شموع وفوانيس .. الغرفه مشتغل المكيف باارد بس اني كمت اصب عرك من الخجل واني هيج كدامو ..

اني كل مره البس ملابس عاديه ربع ردن وشوي جو الركبه او تراك برمودا .. بس ابد ابد هيج ملابس ما اتقربلها بس بليلة الدخلت لهين وهيام جبرتني البس روب طويل ..

شفتو يتقرب اندرت للكنتور بساع ردت اطلع روب طويل البسو .. قفل اديه على خصري :- شدا تسوين ..

-ااااا شسمه ... اخذت نفس وتنهدت ..

-اذا خجلانه او بردانه كعدي تغطي بالجرجف عادي بس لتتضايقين..

..احس المشي گدامو اصعب من الوكفه يمو بهشكل . اشلون يربي .. شيخلص هلزواج .. بقيت ادحك بوجهو بغباء ما اعرف شسوي

هو ضحك وقرب راسي منو واخذني الو ...

....شفتو غط بنومو كمت طفيت الشموع و التلفزيون .. بس الفوانيس كانو كهرباء مو نار حقيقيه بس نصيتهم ورجعت للتخت ..

لكيتو مفتح عيونو خفيف .. حطيت راسي على ايدو .. حجه .. :- ليش تخافين مني

-ما بيدي وقتها بسرعه اتذكر الصار بيناتنا اول مره واخاف ..

-راح يصيرلنه الأسبوع الثالث .. وشهرين مرت ما نسيتي .. كل مره اكول يمكن تعودت وما تعودتي .. اسبوعين كابلتج حتى بلكت انسيج وكمت اشوف تزيدين ما تخفين ..

احس كمتي تتضايقين اكثر ولو بيدج حتى الزواج بيناتنا تلغي .. ليش ؟

ادري الصار بيناتنا اول مره غلط رغم انتي جبرتيني على هلغلط .. بس الى متى شوكت تتعدين ذاك اليوم وتنسين

-اني بيه صفه ما انسى .. اسامح واگلب صفحه اي .. بس ما انسى ..

لليوم اتذكر صياحك لما دخلت لبيتك وانت تكول عني .. كح وخليتوها براسي.. لسه اتذكر ضربك الي من بوكتوني الذهب .. من غسلت هويتك من رجعت من العزيمه وضربتني ع الجبه لو على تهمة حلا ولا حتى ذاك اليوم الجرحتني بيه .. كلشي ما اكدر انسى ...

بس سامحتك بيهم لأني احبك

.. اخذ نفس وكعد ورث جكاره .. تشكين بحبي الج ؟

-لا .. خليت راسي على رجلو وغمضت عيوني

... مد اصابعو بشعري وبقى يحك براسي خفيف وهو يدخن ويحرك بنفسو بالتدخين ..

اخذ الجكاره الثالثه .. كضبتها .. وشمرتها عنو .. وكتلو لخاطري يكفي اني احبك والله وما جاي الومك يمكن اني هم سبب باللي صار ما بس انته .. بس لا تأذي نفسك ..

شال راسي من رجلو وتمدد ورجع راسي لصدرو .. :- يمكن لأن الله لسه ما سامحني باللي سويتو لهيج ما نسيتي ..

-لا ليش تكول هيج .. انت ما بس اذيتني انت احتويتني وحبيتني وجثير حميتني ودافعت عني ..

- ابتسم و باس كصتي .. بس هذا اللي سويتو واجبي ما متفضل بي ..

-اترك هلامور .. نام وراك دوام .. هز راسو وغمض .. بس ما ارتاح .. حسيت عذبتو من كتلو ما نسيت وذكرتو ..

بعدها غفيت وما دريت سهر لا .. نمت .. ما حسيت غير الصبح وهو ماكو الساعه 9 ونص .. كمت وبعدو النعاس بعيني .. سبحت ونزلت ..

للظهر هو اجه تغدا راد يطلع ينام .. اجا حرب گالو بابا عمي سليمان بالباب يريدك ..

گالو وانت موكف عمك ع الباب بابا دخلو .. وراح كام للاستقبال ..

اني بقيت كاعده ويه البنات هيام و نور .والحجيه هم جانت كاعده و ام سعد.. نتعلل جاي وكعك ..

نص ساعه ورجع صراع دخل للهول .. تمدد وحط راسو على رجلي وصاح اخخخخ يا يابه والله تعبان..

الحجيه:- يتعب عدوك يمه شبيك

- حجيه راسي يوجعني بيه نومه اذا انام ما اكعد لباجر ..

-يااا نعساان !! ..يمه شو انت ساعه ووكت ساد بابك ونايم ما تنزل ولا نشوفك .. وتصيح نعسان

-ابتسم وهو مغمض .. فتح تك عين دحكلي ورد حجه وي امو .. :- على المبايل يمه ما نايم ابقى سهران بالمبايل

.. حجه هيج هيام ونور ابتسمن و دارن وجوهن يضيعنها .. والحجيه تكلو :- الله لا ينطي المبايل يمه راح يعمي عيونك اتركو وليدي ما زين خيولي

-ما اكدر يمه صارت سولتي بهلمبايل اموت اذا اتركو .. يحجي وهو مغمض ومبتسم ..

وهن يضحكن وام سعد. فهمت الرنه وكامت تهز بأيدها .. الا الحجيه ابد .. مستمره تكلو :- والله يمه خبلنكم هلموبايلات دشوف شتحصلون منهن غير طياح الحظ

هو كام من حظني وكاللها اي والله يمه لا عاب حلكج ما محصل غير طياح الحظ ..

.. وكف لحيلو وكال :- انه صاعد انام .. تصعدين

- المبايل مشغول حاليا ولوحتلو بأيدي بااااي هههههه

.. هو رفع راسو وكام يضحك بصوت عالي وهيام ونور خربن ضحك ..

هيام:- اهم شيء المبايل يول كووومي هههههه

-هز ايدو وهو يضحك .. راد يصعد وكفو حرب للايباد.ويكلو بابا شلون العب كلان علمني ..

كعد على الدرج ويكلو حتى انت يا بويه ضجيت بهللعبه .. اخذ الايباد منو وكعدو يتعلمون بيه ويلعبون ..

واني ادحك عليه .. من هو موجود ابد ما احب اشوف احد غيرو .. تبقى عيوني على طولو لحد ما يختفي من كدامي ويروح .. اعشك طولو وملامحو ..

واني ادحكلو سمعت صوت بره وصياح .. ركزت اذني ع الصياح .. صوت الحجي وبرزان ابن عمهم .. والكلام على علي ابن هيام

.. شال راسو صراع .. كال تسمعين الصياح هذا ابيتنا ؟

-اي صوت الحجي وبرزان يمكن ديحجون على علاوي لان يكلو هذا عليوي يريد يجيبلنا مصيبه ...

.. كام صراع بسرعه .. وهيام هم كامت .. طلع صراع وكف اباب الممر وصاح :- حجي دخلو جوا خل نفتهم شهرتونا الناس منا يابه ..

.. دخل برزان ( يصير عم علي اخو اخلاص) .. سلم على صراع ودخلو للاستقبال ..

برزان صاير اعصاب ويكلو ابو علي انت ربيتو بس اذا ما تكضبو لحط جيله براسو واخلص منو لهل كلب

صراع:- يول هدي يابه وخل نفتهم شمسوي علي ..

-متكاون وي ابن بيت ابو فراس ومطلع دمو وذول عمامهم تسلحو وانضمو لداعش بالفلوجه .. اكضبو لا يجيبلنا المصيبه الا بالله اگضي بي التوبه

.. بهذا الحجي هيام واكعه دك مخابرات لعلي حتى يجي وهو ما يرد عليها .. وهي تخابروا
. دخل ..

ضربتو وحجت بهمس :- طايح الحظ مو اخابرك ليييش مترد ناوي تموتني انته ..

هو وجهو جان معبس ما رد عليها بس وخرها من ايدو ودخل جوا يمهم..

زكح بيه برزان وراد يهد عليه وصراع يكلو اكف خل نفتهم والحجي يصيح انته محد چاوي اذانك ومتربي وكعو دك رزايل وهد عليه

عاد زكح صراع بعلو صوت .. اكفووو كافي مو حاله هاي صار ساعه اكلكم خل نفتهم.. وزكح بعلي :- اكعد انت فهمني شصاير يولو

-خالو هو اللي يلعوص بالحجي ورديتو انه ما عايل بي الصوج منهم والله

-فهمني وحده وحده يول خل افتهم

-جنه كاعدين انه وجماعتي وهو ويانه وبقينه نحجي بالوضع وداعش وهو مساند داعش .. وانه ما حجيت بس كلت الدين بري منهم ذول ناس بربريه همجيه

شو هذا يكلي وانت شعرفك بالدين روح دور اصلك وين واحجي اذا جدتك رافضيه وخالك وامك اولاد متعه ..

صراع:- جان حطيتلو القوندرا بحلكو وحلك الخلفو لهل صعلوك ابن الفگور

برزان :- انت مساندو بدل ما تردو

-عجل تريدو يفشر على عرضو ويسكت

-ذول دواعش تريد تهجم بيوتنا

-ومنو الدواعش يول خلگ لمة هتليه .. دنعل ابوهم لابو منين مطلعو هالاوباش ..

- دحج ابو حرب اي شي يصير من راس هذا المستهتر انت المسؤل جدامنا لا تكول ما گلنا..

- ول يابه غالط على عرضو وتريدو يسكت .. تراه الموت واحد ومكتوب يولو ما نموت بذله ..

... بقى صراع وبرزان يتراددون وعلي طلع يغسل وكضبتو امو تتكاون وياه وتكلو انت ما ناوي تستر عليه ولك خاف الله بيه وبخواتك يمه راح تهجم بيتي ..

والحجيه وكفت وي هيام ترزل بعلاوي وذولاك اصواتهم واصله لاخر الدنيا .. حرت وين احط اذاني كلها تحجي دخت ..

.. طلع برزان راح و فات صراع .. دحك بهيام تضرب وهو ينتر ويوخر بيها .. زكح علييييي

كالو هااا خالو ... وجا يمو ..

-شدخلك بهسوالف خالو احنه ناقصين يول وتروح تحلل سنه وشيعه ودواعش وهلطياح حظ

-خالو وين ما تروح كلها تحجي بهسالفه وانه....

-انت مالك بيها ابني .. استر على امك واسكت .. تسمع هلموضوع لا تدخل نقاش بيه ابتعد .. لا تسويلنا مصيبه ..

تره ما انطيت بيك جدام عمك حتى ما اخليهم يركبون فوك راسك الا والله ثم والله لو سمعت مره لخ حاجي بهيج مواضيع ما تلوم الا نفسك فهمتتتت ..

احترم نفسك ابني وفكر بأمك و خواتك ومعليك بالعالم يطفى يشتعل نارهم تاكل حطبهم .. صار معلوم علي ؟

... ان شاءالله خالو .. ووجهو محتقن .. بس دار وجهو صراع .. هو راد يطلع ..

كضبتو امو .. وييين استر عليه انته ما ناوي تعقل ابني ..

زكح بيها ... ماااا جاهل عدج انه وخرررري عني ..

تركها وطلع .. هي بقت تضرب على خدودها وتبجي ودكول صبري وصبرك ربي والله تعبت من هلولد

وكفنا اني ونور نهدي بيها والحجيه تكلها الاذان يأذن بنيتي فرشي سجادتج واطلبي من الله يهدي ..

فات صراع هام للمغسله يتوضى دحكها تبجي .. صاح شبيج

مسحت دموعها وكالتلو ما بيه شيء خويه ..

-عجل شكو تبجين

-خويه حملهم ثگيل وعلي تعبني لا يقبل يرد ولا يتعلم حرت وياه منين اجيه ..

-انتي شلون تضربي .. جاهل عدج هو وتضربين وتهينين بي وتردينو ما يرد

-اني امو خويه اضربو واكسر راسو لمصلحتو

-مصلحتو بالبيت ما كد جدام نسوان خوالو تحاسبي و تضربي وهن واكفات .. الولد كبر يا ام علي شاب ما جاهل وتهيني اكيد تعز نفسو ويعصيج ويكوم يصيح ويفرض نفسو

عيني على طاعتج وكبري جدام الوادم ما تكعدين تهيني وتقللين منو جدام الناس ..

شباب هليام ما مثلنا يتحملون ويسكتون وكتهم اغبر ويرادلهم خلك طويل على كيفج وياه

واحنه ما تاركينج شو وياج وياج بعد على شنو هلبجي .. كفي هلدموع وكومي صلي بلا ما كاعده تولولين ..

عافها ومشى .. عاد صدك مسحت دموعها وكامت تصلي بس بعدها مهمومه خطيه حيل تكسر خاطري

.. رحتلو وهو يدخل لغرفة الاستقبال ويمد سجادتو والحجي يصلي كعدت ع التخم .. كتلو صراع ليش هيج تحجي وياها خطيه اسلوبك جان جاف شنو فوك قهرها انت تزكح بيها..

يولو لمصلحتها خو ما اخليها تكعد تبجي وتحس بروحها ما الها احد غير اعلمها شلون تتصرف وي ابنها

واخذيها قاعده .. المهموم لا تكلو حقك وتواسي تزيد حزنو عليه ..اخلقو حجه من جو الكاع وحط بي صوج وازكح بيه وحسسو هو بطران وخلي همو يخف ..

.. حجه ووكف للصلاة .. ردت اكوم صاح استغفر الله وقطع .. ليليان باجر طالع واجب حظريلي جنطتي عيني

-اووو هم واجب .. وشوكت تجي

-والله ما عرف يابه .. يومين .. اسبوع ما عندي علم بس انتي حظريلي تراكسودين ..

-تمام عمري هسه اصعد..

... صعدت حظرلتو الجنطه و نزلت وكفت بالمطبخ للعشا .. فات صراع يمي وكعد ع الكرسي وسند راسو للطبله وصاح

-اااااخ يابه بالقران راسي صاير طبل يوج من الوجع .. ويفرك بگصتو ..

-كلو من وره الشموع مالتك ودحكتلو بطرف عيوني واضحك .

- يولو انه ارتاح اذا ما اطلعوها من خشمي الله لا ينطيكم .. اطالب بتعويض

- ههههي والله سالفتك تضحك .. خل الحكومه العراقيه تنطي تعويض وعود تعال بعدها انه اعوضك راتب صارلك شهرين ما مستلم .. وادور تعويضات بس براسي

-يلطلابه السوده لا الحكومه ترحم ولا انتي ترحمين عجل يابه وين ننطي وجوهنا ..

-هههههههههه كسرت خاطري ..

-ول يابه صار بيها كسر خواطر ... وكام ليمي لف اديه على خصري

-يااا ههههههه روح يمه روووح دا اشتغل هسه ..

-دانعل ابو الشغل يولو باجر طالع واجب حرام عليج والله

- حباب مو هسه بس اكمل شغل والله يكومون يحجون ..

- همس انه حباب .. شو ما تخافين ربج انتي وكضب حنجي

-هههههههه دنك وقرب وجهو .. الا تفوت نور وتكول اكول ليلياان .. وفزت ياااا عزا العزاكم

وهو بدل ما يوخر مني عود يركعها يعت بحنجي ويصيح انه كم مره گتلج گليلي بيتنجان بيتنجان بيتنجان طرشه انتي ما تسمعين وجابني بجف على خدي صحت ياااااا

وهو خرب ضحك.. كاضبه خدي غير اريد اتنفس من الضحك .. متت وهو احتقن من الخجل وصار احمر وايدو على عيونو و يضحك

... فرك وجهو :- يولو بهلشيب ويلكفوني بهلوضع والله فشله خرب بيومج .. مو كتلج صعدي بت الاوادم .. والله لنعل شيبهم اليوم انه الج ..

...ما فات للهول خجل .. فتح الباب وطلع .. شوي وردت نور ..

-يولي ما مكفيكم فوك جيتو هينا تكملون .. استحو خجلتوني

-اني شعليه لا رحت ولا اجيت هذا مكاني عمي فقيره ممتحرشه باحد .. هو الميكعد راحه شسويلو لابن نوريه ..

-فقيره ام المصايب هههههه بس ولج اخذي حذرج لا الحجي لو نائل يفوتون .. زحمه ..

-هو هم استحى خطيه ههههه ... بقينا نسولف ونشتغل .. دنكمل ... اندكت الباب حيل ..
صاحت يا ستار ياربي شكو ..

دحكنا من الشباك ونشوف عمومتهم فاتو صالح وعزام وولدهم وياهم ومسلحين .. سترك ربي.....يتبع

☆☆☆☆☆☆

#مراهقة_و_الأربعيني

،،،،،،،، بقلم زينب ماجد ،،،،،،،،،

الحلقة_47

دحكنا من الشباك .. شفنا عمومتهم فاتو صالح و عزام و وولدهم مسلحين گلنا يا ستار شكو ..

مشينا للهول بسرعه .. دخل محمد ابن سعد وكالو جدو اجدادي وعمامنا اجو يكولون راح يدكونا من ورة عليوي ..

الحجي صرخ يابه .. واطافرو الحجي وصراع ونايل

هيام:- عزا العزاني ان شاءالله راح ابني يمه الله لا ينطيك علي على مصايبك الجاتلني بيهن ..

وتلطم وتصيح يمه ابني يمة مصيبة ووكعت على راسي يمه..

وعمتي تدعي ويا ستار استر .. احنه بقينا مصفصفين .. نور جهالها من الخبصة كامو يبجون .. واخذتهم وصعدت ..

اني ركضت للمطبخ طفيت الطباخ وركضت ورة هيام واكفه بالكليدور وتتسمع ع الزلم بالاستقبال هي والحجيه ..

اني هم وكفت اسمع وياهم وعمامهم يتصايحون وراح ينجتلون ولدنا من ورة واحد مستهتر وامو ما عرفت تربي وما عرفتو تكضبوه

وعمي يتصايح وياهم ويكلهم اذا انتم عمامو وما تحاسبو احنه نكدر نحجي وصالح يكلهم هو بيد صراع ما عرفتو تكضبوه وصراع يردو .. وبرزان يصيح انه كلما احاسبو هيام تتزعل وتسويلها سالفه هاي تالي تربيتها

وهوووسه ما تعرف منو يحجي بيهم..

.. عاد هيام مسحت دموعها ورادت اتفوت كضبتها الحجيه :- وين فايته يمة اكعدي وخلهم يحلوها

-شيحلون يمه ما تسمعيهم بس بمصايبهم صايبيني .. خليتي افرغ البكلبي وخري عني ..

.. هو ماكو احد غريب كلهم عمومتهم وولدهم.. فاتت وكالت

السلام عليكم من رخصت ابوي وعمامي واخوتي .. جايين هسه تلوموني وتكلولي ما عرفتي تربي وينكم من مات ابوه ولليوم محد بين بيكم هسه تذكرتوني وتذكرتو ابني

مو انتم عمامهم .. دكيتو بابي شتحتاجين ما تحتاجين تعرفون هم بيا صف تدرون شكد اعمارهم .. مره اني شصير لعيشتهم لتبريتهم لو المن ..

ما تدرون عنهم ووكت اليغلطون تجون تكتلو وتردون ما ازعل .. علمتو وانه زعلت كعدتو وياه وحجيتو وانه كلت لااا .. بس وكت المصايب تكفخون على راسو

اني ربيتلي زلمه وافتخر بية لو مخنث جان سكت على فشايرهم وطعنهم بعرضو بس ابني زلمه خلى دمهم بطولهم وما خاف منهم ..

صراع:- لا خويه الضاهر الجماعه خايفين وجاي يزتون اللوم براس علي ولا جنهم فشرو علي وعلى امي واختي ..

يول اذا علي اتجاوز على ابنهم .. ف ابنهم تجاوز عليا وعلى عرضي .. شجالكم انتم الحك النا ونتراجف

صالح:- ذول دواعش يصراع يجتلون ولدنا ويخلون الدم للرجاب

-ويخلوها عجل عمي تريدهم يكفخون فوك روسنا ويدوسون اعراضنا ونخاف ؟

سليمان:- اكلكم انتم ليش تخلوها براس علي فروها على صراع ونكعد وي عمامهم و نكلهم ابنكم متجاوز على ابو حرب والكعده تصير الو ما على علي وتجاوزو .. مو ابنهم غالط ع الحجيه وام علي ..

.. كعدو يتناقشون وعماهم بين الصافين والهادين .. ساعه يرجعون على علي وساعه يكولون لا هاي نفر السالفه على ابو حرب ونحسب التجاوز صار عليه وعلى ابو صراع .. ونطلع علي منها

.. تركتهم ورجعت للهول شفت علي كاعد وامو تحجي وياه وتلوم وهو مدنك والحيرة بوجهو ..

فات صراع صاح ليليااان .. هيريني الدشداشه السودا والشماغ الابيض ع السرررريع ..

ركضت كدامو .. وعلي كالو خالو اروح وياكم .. كالو جهز نفسك اخذك وياي ..

عفتهم وفتت للغرفه طلعت ملابسو فات ويبدل ويحجي وي نفسو ومشغول ومخبوص 3 مرات يشيل العطر ويرجعو ميعرف شيريد .. عاد كتلو

... شتريد بس كلي اني اجيبلك ..

-موبايلي وييييين ماكو ..

-هيانو ..

اخذو ونزل يركض .. رفعت اديه للرب ودعيتو .. يارب احمي الي من كل شر يارب

نزلت الحجي يلبس عكالو .. عكال اسود و شماغ احمر وسعد بس دشداشه ونائل رسمي بنطرون وقميص وصراع دشداشتو سودا و واكف يلف اليشمغ على راسو ويحجي وياهم.. ويوصي بالحجي على الكلام اليحجونو يمهم..



اخذو علي وياهم وراحو البيت الولد اللي ضربو علي ..

طلعو كعدت شويه وهيام تبجي و نور كاعده توكل جهالها .. وعمتي تمددت وضربتلها عكس وتحجي وتصبر عليها وام سعد على كولة صراع الحيزبون كل شوي طارتلها كلمة ومشعوطتنا بمغثتها

الا شوي اطخ ابالي ادفرها بس تركتهم وصعدت لملمت غرفتي وسبحت وتمكيجت .. حتى من يجي صراع عصبي بلكت يشوفني متحظرتلو ويهدأ ..

شوي وسمعتهم اجو نزلت .. بس عمامهم كاعدين مدخلت .. بس اللي عرفتو متفقين وياهم ان يلمون عمامهم ويتفاهمون وياهم واسبوع ويكعدون العشيرتين يفضون السالفه ..

.. طلعو عمامهم والحجيه فاتت و هيام .. اني هم فتت يمهم كعدت .. دحك عليه صراع و رد يحجي وي ابوه وكاللها هيام ابقي الليله لا تروحين لبيتج كلشي يصير ذول دواعش جريذيه يغدرون ..

وهم يحجون كمت لميت المنفضات مال الجكاير ورجعت الطبلات لمكانها ورحت للمطبخ انضفهم..

شوي وفات صراع يطلع ماي .. اخذت كلاصو وانطيتو الو وكتلو ها شسويتو ..

- شسوينا .. كعدنا وطلبنا منهم اسبوع نحجي وي عمامنا وبعدها نكعد .. ولو تعرضولنا او واحد منهم دكنا خلال هلاسبوع نتكاوم العشيرتين ..

الا تعبان بالقران احس راسي راح ينفجر ..

-انتبهت اليشمغ شامرو على اجتافو و دكمة دشداشتو مفتوحه مديت ايدي وكتلو .. شو رتبتك وطلعت شلونك وهسه شلون جايني لا ودكم دشداشتك مفتوحه شنو نازع هدومك هناك ورفعتلو حاجبي

دحك عليه بأستهزاء وكال:- اي يول مو شفتلي هناك حرمة شلونها وانه تعبان عاد كتلها بويه بلا زحمه بلكت شويه ..

-ههههههههههههههههههههههه

-دنعل راسج المتروس نسوان

الحجي:- صرااااااع

-هااا يابه هاااا .. خرب بيوم الجابتني امي بيه ولكم ابتليت جيت لهل دنيااااا ..

.. مشى وهو يصيح يربي تعبان والله دخت .. واني اضحك على ردات افعالو وهو معصب خطية نعسان وكلها تكومت فوك راسو اليوم ..

صعدت للغرفه انتظرو .. بس طول فوك النص ساعه وهو ما صاعد .. طلعت ردت انزل سمعتو بعدو يحجي هو وسعد ..

تركت وردت ارجع للغرفه سمعت صوت بزونه صغيره تنوص .. ياا هاي بس لا فايته هينا والده.. مشيت سمعت الصوت بره بالشباك مو داخل البيت ...

فتحت الشباك شفتها صغييره خطيه وملفوف ذيلها بالسيم .. دا افلو واخلصها واصوات نور ونائل طالعه .. من سمعت اسمي من ضمن حجيهم ركزت وياهم..

هي تكلو .. مو هاي ليليان شو ما تشتغل ورجلها واكفلها سد لا ويكف بنص البيت يبوس بيها وانت ولا يمك .. ولا تكول هاي مرتي ولا تحس عليا ليش

وهو يصيح ويزكح بيها شلون تقارنو بصراع ويكلها تجيبيني وياه الله انطاه بالباكيت خو ما مثلي كلكم متكومين فوكي ..

وهي تكلو تريد بنيه وانه شذنبي ضايعه بينك وبين جهالي واهلك .. واكفه يم الشباك وفززني صراع وهو يزكح ..

- يولي شدا تسوي؟

.. صحت اشششش فضحتي

-هاااه وتكلي اش .. ولج حدري هين دشوف منو هذا التسكتي .. تقرب وسمع اصواتهم ..
دا تتسمعين عليهم ليليان؟

-تركتو ومشيت .. جا وراي

-انتي متستحين

-ما علقصد والله بس لان سمعت اسمي بحجيهم انتبهت ..

-هذا مو تبرير يول عيب عليج .. تالي وياج انتي

-صراع مو سمعتها تكول

-اششش ولا اريد اسمع .. فوكها جاي تنقليلي شكالو مشاكلهم بينهم بويا .. لو جيتي وشكيتيلي عن واحد منهم يحقلهم يكفون على الباب يتسمعون شتحجين ؟

-لا

-عجل بطلي هسالفه وتأدبي ..

-سكتت ومرديت .. هو اندار للتلفزيون .. كمت اخذت ملبس وبدلت بالسرير.. انتبهتلو ما حجه ويايه بعد داير وجهو..

.. جريت الجرجف .. التفيت وتكربت يمو .. شنو زعلت .. فز ..

-على شنو ؟!

-لان تسمعت ..

-لا يول دا افكر بسالفة علاوي .. تنهد و اندار فتحلي ايدو ..

-ويييع صراع شنو هاي .. وسديت خشمي بأصابعي

كام يشم بنفسو

-ول ياب شكو شبيه توني معطر

-لعبت نفسي من عطرك مدري ليش .. وييع راح اتقيء

-يول تحسسيني راش خياس على روحي شبيج ..

-مغير العطر

-لا هو نفسو هذا الاسود التحبينه

-عجل ليش شو صاير عطرو مدري شلونه .. لعبت نفسي منو ..

-انتي لعبتي نفسي هم اكوم اسبح اشرفلي ..

سبح واجه نام ارتاحيت من عطرو ..

....لثاني يوم موقته الموبايل كعدت قبلو .. كعدتو ونزلت للمطبخ حظرتلو الريوك ..

واكفه واحس الدنيا افترت بيه اريد استقر احس الكاع تتحرك.. كضبت الكاونتر و وغمضت لحد ما حسيت ركزت ..

فززني صراع وهو يحظني ويكولي :- شبيج عمري

-ما اعرف دخت

-يمكن تعبانه ارجعي نامي ارتاحي ..

-اكعد تريك ..

اخذ الجاي شرب منو وكال :- مستعجل لازم اطلع ..

تقرب لراسي وطبع بوسه على كصتي .. غمضت .. وحظنتو .. :- ترجعلي سالم مو

-ان شاءالله بحيل الله ..

رفع وجهي باسني بخدي :- ديربالج على نفسج ارتاحي ولا اتعبين روحج .. واليحجي وياج لو يغثج بكلمة بس كليلي اسمو انه اتصرف وياه تمام ؟

- تمام وحظنتو وتشكلت بركبتو اشتم واتنفس بي .. سلم وراح واني ادحك لطولو ..

الرب يحمي الي من كل شر ويرجعو سالم

.. لميت الاكل وصعدت لغرفتي بقيت ع الموبايل شوي وغفيت كعدت على اتصالو الي ب10 ونص ديسألني شلوني ..

وبقى 3 ايام هو بالواجب ما نازل بس على اتصال متواصل 24 ساعه يتصل حتى لو بليل ابقى اسهر وياه لحد مينام انام..

اللي بالبيت ابد ما سمعوني كلمة ولا غثوني لأن هو منبه عليهم يعرفوه ما يقبل .. حتى ام سعد كامت تتجنبني بشكل ابد ما تتصادم وياي ..

بس ع الشغل لان ما كلش انزل اكثر الاحيان بغرفتي .. فتبقى تحجي وتزت كلام بس متتجاوز ولا تغلط .. واتجاهلها عجوز شسويلها

.. بعد ال3 ايام .. الصبح نايمه وحسيت احد حظني وحط راسو على راسي .. فزيت بساع .. شفتو صراع اندرت وحظنتو ..

رجعت حبيبي

-لا بعدني

-هههههه مشتاقتلك .. اخذني بحظنو .. بس حيل تعبان .. من ابتعد ونام .. كال :- نبهي نور ما اريد اسمعلي صوت طفل .. راسي دايخ خل تنزلهم وتسيطر عليهم وما اريد جنس مخلوق يمر من الباب .

.. بستو وكتلو تمام ارتاح .. اندرت عنو .. دحكت ع الساعه ب8 .. وووو عجل بيش الساعه جا .. شو من وكت

نزلت ام سعد والحجي و نور كاعدين يتريكون .. طلعت الحجية من الغرفه .. صبحت عليهم وكلت

-نور صراع نايم يكول خل تكضب الجهال لا يصعدون ع الدرج ويسمع صوت لان تعبان

الحجية:- صراع اجه ؟

-اي نايم

- شوكت جا شو ما شفتو ولا فات عليه ..

ام سعد :- شيسوي بيج بعد يصعد للي تفيدو .. من نكلكم متغير محد يصدك هلنسى حتى امو ..

ليليان:- قبل ساعه اجه يمكن جنتي نايمه وما حب يكعدج .. كلش تعبان والله ..

-ما حجت كعدت ..

-نور فدوه انتبهي للجهال اذا يكعدون فوك لان نايم

-اكلج يعني جهال ويلعبون بالبيت وانه ما فارغه اشتغل يعني شسويلهم ازنجلهم ..

-والله حبيبتي اني شعليه .. العليه كتلج لو سمع وطلع يصيح ويتكاون .. بينكم مالي شغل

الحجي:- كضبي جهالج يابه ما بينا حيل مصيبه ..

.. نزل نائل جان تكلو اريد اروح لأهلي اشتريلهم ملابس للعيد اذا اكعد هينا حتى اعدام يعدموهم ..

.. كلهم استغربوا تصرفها .. هاي شبيها .. بس نايل ما اهتم كاللها عجل كومي اوصلج والعصر اجيج..

.. تريكت ونظفت البيت كلو .. اخر شيء وكفت ع السنك فتحت الموبايل اغنية لفيروز (يا طير يا طاير ع اطراف الدني)

اسمع و اغسل وافكر بصراع .. مشتاقتلو .. مال اترك هلمواعين واصعد اتوسد حظنو اشمو ..بالله شحصل من هالتنظيف ..

الا اغسل وانجب احسنلي ما بيه حيل مشكله وهو تعبان خطيه .. اغسل واحجي وي روحي

وفات صراع الخاولي على جتافو سابح وكال .. هاااا بويا اليوم فيروز

.. اندرتلو .. ابن حلال ههههههه ... كعدت ؟

-لا بعدني نايم فوك

-هههههههههههه

-بس ليش ابن حلال

-جنت افكر بيك اكول مشتاقتلو واريد اصعدلو بس من الصبح لسه متشكله بالبيت لان نور راحت لاهلها ..

... باسني بكصتي ..الا صدك الحجيه ضاجت لان ممسلم عليها الصبح وام سعد ما بطلت مغثه على ابو نساج والتهى بمرتو ..

-لا بالقران فتت عليها ولكيتها نايمه .. ورديت الباب وصعدت وهسه نزلت سلمت عليها وبست راسها وكعدت شويه واجيتج ..

-اي زين ..

-يول شرايج تريكيني جوعان؟

-اي مو بعيوني

-شو فيروز واغاني من الصبح .. خير يا طير

-ماما جانت تحب فيروز وكل يوم الصبح تشغلها .. فمن جاي اسمعها ما اعرف احس بأمان كان امي قريبه مني ..

الا صراع صدك ما سألت عنها گلبي نار عليها الى متى ابقى هيج ما اعرف شيء عنها ..

-وصيت جثير ناس بس يعرفون خبر يوصلولها او يكلولي اخبارها بس انتي هسه خليج بهلجو .. شكلج حلو وانتي تغنين ..

-ههههه ضحكت وكمت كمت اغنيلو وي فيروز وهو كاعد كبالي مستمتع و يدحك بيا ويضحك فاصل عن العالم ..

فاتت ام سعد ادحك من وره خشمها طلعت الجدر من الكاونتر وحجت :- لا هواي تغدينا اليوم

طنشت ولا كأنو سمعت.. حطيت الاكل الو يتريك وهو يستمعلي اغني واني اغسل .. فات الحجي ..

-من الصبح اغاني الناس تشغل دعا قران واحنه مصبحين ع الشر وعلى هلاغاني .. اندار الصراع.. وانت ما تردها شو عايفها على حل شعرها ..

صراع ميرد .. كاعد كبال الطاوله يغمس بالاكل و مندمج يستمعلي ومبتسم .. هز ايدو الحجي :- والله جنك انت راضيلها .. لا خربنا ..

طلع و هف الباب قوي .. اندرت ادحك وراه بنظرة ما عاجبني واهز ايدي ..

-يول جان اخذتيلج راشدي فد مره من هو واكف .. حجاها بأنزعاج

اندرتلو وابتسمت وكملت .. طلعت اغنية راجعين يا هوى ... ونستمع عاد كتلو .. صراع عود شتقصد بزهرة المساكين ؟

-دحك .. تقصد ارض فلسطين المحتله ..

- ليش هي فلسطين محتله ؟

-هستوج دريتي ؟

-لا بس صارلهم اسنين وووو من وعد بلفور وانت احسب فوك ال100 سنه يعني المفروض تعايشو مع اليهود .. ليش لسه يسموها محتله

-تبقى ارض محتله ومن حق العرب الفلسطيني واليهود داخليها غصب .. واجرام اليهود بفلسطين ما الو حد الله يعينهم ..

-اجرام !!.. اذا هم متعذبين واليهود جارمه بيهم عجل ما يشردون ؟

-يشردون منين غير كاعهم و بلدهم .. والارض عرض يابه ما تنترك ..

-هااا وشهل تناقض .. طفيت الموبايل وتخصرتلو .. وشمعنى يعني بس الموصل من دخلوها داعش صار اليشرد منها شريف و اليبقى داعشي وعرضو مهتوك ؟ ما تقنعني هذا مو انصاف

- مو هيج بس جثير ناس من اهل الموصل ساندو داعش واستقبلوهم ..

- وشدخل يعني اذا نسبة تعاونت وي داعش البريئ شذنبو .. ما احد.تعذب بكد المصلاويين من داعش .. الايزيديين اندثرو و المسيحيين تشردو وناس انقتلت وناس انظلمت والما وياهم يعيش بالتعذيب ..

ليش الييبقى بكاعو ويفضل الموت على البهذله والتشرد بالشوارع تسموه داعشي .. مو بقرأنكم مكتوب و لا تزر وازرة وزر اخرى ..

البريئ شذنبو بالمجرم ..

- هو اختلط الاخظر باليابس وتراها داعش لعبة امريكيه اسرائيليه يابه .. امريكا استخدمت ويانه سياسة (فرق تسد) وبثت بيناتنا شيوخ وعمايم وخلت ناس تتتكاون وي ناس .. اليصيح سنه واليصيح شيعه

وخبطتنا و فرقتنا وخلتنا ملتهين بالحروب وهي باكت الجوانا والورانا الا يول من شوكت العراق الخيرو يغرك العالم.. بيه تقشف والميزانيه فارغه ..

- عجل والحل ليش الى متى تبقى الموصل تنزف .. لا احد تفاوض عليها ولا احد حجى بيها .. باعوها وطلعو منها .. واهلنا وكل معالمنا ضاعت بيها لييش ارد افتهم ليش.. حجيت وبجيت

...جا حظني .. ول ول ول يابه هاي شبيج اليوم .. دنعل ابو السياسه لا بو خيرها يولو صايرتلي حنان الفتلاوي وتغردين شجالج بويه ..

-صراع اشتاقيت لأمي .. تعبت صارلي 8 شهور لا شايفتها ولا سامعه صوتها اريد اشوفها .. ابجي بحظنو

-يولي والله ماكو واحد اعرفو ما وصيت على اخبارها .. حتى خالج بلغتو بس يعرف شيء عنها يبلغني .. ادعيلها تكون بخير وسلامه لا تنصبين عزا وتفاوليها ..

.. بقيت مدنكه وابجي ..

-لتبجين عمري .. كومي اخذج لهيام افترهي يمها .. يمكن الجو هينا تعب نفسيتج .. يلا كومي يابه لا تضلين هيج ..

واني ابجي .. دخلت ام سعد .. :- خوش افلام والله استكانين وماعون صارلج ساعه .. حجتها ومشت

دحكلي صراع و حجه بضحكه :- فرصتج يولو هدي عليها وبردي كلبج وانه اكضبلج الباب ..

.. مسحت دموعي وضحكت .. شيخلصنا ..

-لا تخافين نشرد ..

-هههههه

-اروح فدوة لضحكتج يول والله متلوكلج الدموع ..

ام سعد :- شلون اليوم ما نتغدة .. طلعي اللحم كصصي ونكعي التمن بساااع . يلا عاد

-اليوم مرتي اجازه .. تعبت .. دبرو غداكم .. حجاها بشقا ويمشيني كدامو ويكلي .. يلا كملي دا اخذج لهيام

-وين هيام .. والغدا ابو حرب

-انه اخبر الحجي يجيب وياه من المطعم .. سمج دجاج شتشتهون..

-شنو ما عدنا نسوان ونشتري من المطاعم ..

-تركها وكال .. يلا حبيبتي بدلي بساع تره تعبان حتى ارجع انام وره الصلاة ..

.. ام سعد بقت ادردم.. دخل للحجيه كال الها :- يمه راح اروح لهيام اودي ليليان .. ما تجين ويانه

-لا يمه ما بيه حيل

-عجل شتهتهين ادزلج غدا ..

... تركتو يسألها وصعدت بدلت وتحظرت .. هو هم بدل وخلص گبلي .. طلعت .. سمعتو بغرفة حلا .. كاعد يمها ويبوس بيها ..

ويكولها :- لا تبقين هيج كاتمه على نفسج بويا.. شتردين كليلي لا تضلين هيج.. تردين اخذج لبيت جدج ؟

كالتلو ياريت ..

-عجل بدلي بساع خل اوصلج بطريقي ..

... تركها وراد يطلع انتبهلي ادحك عليهم وابتسمتلو ..

-هاا ..

-حيل تقهرني خطيه ..

-تنهد .. تتحسن ان شاءالله ..

... صعدنا اني وياه بالسياره وحرب هم اخذناه يروح لبيت جدو كعد ورا

فات الحجي كالو :- بويه ذوله مهددين لا تطلع استر علينا

-يابه هي روح وحده والها يومها خوما نكتم على ارواحنا الله الستار حجي

.. . اجت حلا .. وحجت اني اكعد بالصدر يم بابا انتي ارجعي ورا يلا..

دحكت عليه .. اابتسملي واشرلي ارجع .. رجعت يم حرب ..

وصلهم وما نزل .. ورجع كلي حولي يمي .. كعدت ..

-اي شلونج

-صراع دا احس نور دتغار هوايه ودتقارنك بنائل .. وحيل صايره تضوج مني

-حقها يول .. لا تزعلين منها خطيه .. مظلومه نور ..

-اني هم كلت هيج .. بس نائل شبي وياها .. ليش ميحبها

-نائل هم مظلوم .. انجبر بمرت اخوه .. صعبه عليه يحب المرة الجانت مرت اخوة .. عابد يكف بعينو ..

جان المفروض انه اتزوجها .. بس حسبتها ما ترهملي لا بيوم اكدر اخليها زوجه شرعيه نفسيتي ما تتقبلها اتكرب لمرة اخوي ولا اكدر اهجرها واظلمها ..

فرفضتها وكلت اتزوج المصلاويه كم شهر واطلكها وافتك ..

-عجل طلكني ..

-طلكت روحي بالثلاث من شفتج

-ههههههههه .. وصلني لبيت هيام .. وكال سلميلي عليها عود من اجي العصر انزل ما بيه هسه تعبان..

.. نزلت وراح .. دخلت تلكتني هيام بالهلا والمرحبا .. دخلت لبيتها .. لكيتها مطلعه المطبخ كلو وجاي تنظف للعيد ..

وتشكلت وياها هم تنظيف . وسوالف على سالفة علي .. وجابتها على مدرسة جهالها و شلون هاي السنه و شوكت تشتريلهم وشنو الوضع

اني فصلت .. تذكرت مدرستي .. شكد جنت اتمنى اكمل .. وامنياتي كلها ضاعت .. بس كلت افاتح صراع مدامو يحبني وما يردلي طلب بلكت يقبل !

... للوحده الظهر كوه خلصنا المطبخ ورجعنا الغراض .. اندكت الباب .. فتحو علي .. طلع صراع .. متسوك وجايب اشكال الوان ..

علي يدخل بالمسواك و ساره كاللها خالو وصليني المغسله راسي اشتعل من الحر ..

هيام دحكت .. كالت يولي بس لا يتغدا ..تورطت لازم اركب و الساعه فوك الوحده شلحك

.. تحجي وياي بصوت ناصي وسمعها .. صاح .. ام علي جبت مسكوف عليش اطبخين هاذ مسواك تسوكتو لبيتج حتى لا تحتاجين واطلعين صبروا لبين ما تفض سالفة علي ..

-عساك سالم يا خويه يحفظك و يرزقك من اوسع ابوابو يارب.. والله لولاك ما عرف احنه شحالنه ..

نشف وباس راسها ..

دحكتلو

-اكولك انت مو تعبان شجابك .. ؟

-ما اجاني نوم كلت خل اكوم اتسوك لام علي واجي

هيام:- لا والله يخويه ما جيت بهالظهريه لخاطر مسواك كول گلبك هينا ورديتلو ..

صراع:- هههههههههههه اي بالقران .. شلون ما جبتها اريد انام ما كدرت احس روحي مو بالبيت .. يولو اشتاقيتلها والله صارلي 4 ايام مو يمها ..

-دفوتو بالغرفه ارتاح حاره .. واخذها يمك انه اكمل الغدا واصيحلكم ..

-اي والله رحم الله والديج .. بس ام علي اهم شيء تكضبين جنات تراها تشعل شيب الخلفوني

-ههههههههههههههههه لا تخاف ازنجلها وما تفوتلكم

.. يحجون واني اضحك .. دخلنا جوا مكيف مشتغل .. ضربتو .. والله خجلتني شبيك ..

-ول هي مال خجل محترك جد جدي تراني .. عطشان يولو شو حدري ..

... كأنو صارلو سنه ما شايفني .. واني اكلو بلا اثار جانبيه فدوه تره عيب من هيام وجهالها ما اريد اتفشل بركبتي ..

ابتعد عاد بس توسد ايدي ونام بحظني .. غفى بثواني .. صاحت هيام على غدا .. كعدتو ما قبل

تركتو ورحت اكل..

.. للعصر رجعنا للبيت .. نور جايه .. اول مشافتني كالتلي

-شنو غرتي لأن رحت لاهلي نص يوم طلعتي

-لا والله ما ع القصد ومو ابالي صراع اصر اطلع كال غيري نفسيتج ..

-شو تهز ايدها ما عاجبها .. هاي شبيها

.. تركتها وطلعت لغرفتي .. صراع بدل وطلع لجماعتو .. خلصت شغلي وكعدت بغرفتي .. احسن من كلامهم المسموم ..

بقيت افكر بالغرفه شكول وشحجي وي صراع ع الدراسه حتى يوافق اكمل وبيا طريقه افاتح الموضوع وياه..

.. لليل فات واني افكر بالموضوع .. ابتسمتلو .. وكتلو هلا حبيبي .. تقرب وكضب حنجي وباسني من خدي وكال :- هلا عمري ...

ابتعد ومشى يبدل وهو يحجي ... شلونج

..زينه

شسويتي ما سويتي اليوم

-ابد ولا شيء مجرد روتين عادي

-ان شاءالله بس افرغ وعد اخذج لبغداد واونسج هناك ادري ضايجه.. بس صبريلي هلفتره الشغل لفوك راسي

-مشكور حبيبي على راحتك .. طلع للحمام واني كعدت افكر شكلو وشلون ابدي الموضوع وياه ..

.. فات بدل وجا يمي راد يفتح الغطا ويكعد .. كتلو :- طفي الضوا

-رجع طفى الضوا وشغل الفوانيس وكلوب صفر احمر ورجع عندي ..

-مشتاقلج يول

-اني صافنه بوجهو وافكر اذا اكلو يقبل لو يردني .. تقرب ويبوسني بركبتي بهوس وخابص روحو واني ضاربتلي صفنه ..

-ليلياان

-هااا .. شو انتبهت هذا موخر و صافن بوجهي ..

-يولي جاي ابوس بثلاجه لو شنو ..

-لييش!!

-ول يابه ضاربتلج صفنه وانتي بين اديه .. على اقل غمضي حسسيني انو عدج احساس شنو من بشر انتي ..

-لا مو هيج بس اجه بتفكيري شيء

-النهار كله عقل ماكو ومخلصتها تجفيص من اجيت يمج اشتغل عقلج لا والحظ اي والله ..

شو ابتعد مني وكام شعل التلفزيون ...

-هاي شبيك

-ما بيه شيء
ورث جكاره وكعد يدخن ووجهو للتلفزيون ..شنو زعلت

-لا يا بويه على شنو ازعل .. هو هذا حظي بعد .. اكو احد يزعل من حظو ..

-كلت بكلبي اهوو هذا زعل شلون راح افاتح وياه الموضوع على هلوضعيه اكيد يرفض ..

اندارلي يدحك بطرف عينو بوجهي وهو الجكاره بحلكو دفع الدخان وكال :- الحجايات الخانكاتج احجيهن بويه وارتاحي .. اسمعج

.. ابتسمت فهم عندي سالفه افكر بيها .. تقربت يمو واخذت الجكاره من ايدو .. مديت نفسي منو وطفيت الجكاره بالمنفضه ..

حط ايدو على ظهري .. يولو شكو شغلتيلي بالي ..

-تلزكت بيه وكتلو حباب احجي وياك ومترفض

-شكو

-بالأول اوعدني مترفض

-اوعدج وانه ما اعرف شنو الموضوع .. غير اعرفو حتى اقرر خوما اوعد وبعدين اخلف ؟ .. احجي اسمعج

-اليوم من اني عد بيت هيام

-اي

-لا تكول اي خليني اكمل سالفتي للأخير واحجي

-هاا العفو يابه اسفين ..احجي ..

-اي من اني عد هيام جابو طاري المدرسه ...تذكرت وضعي ذيج السنه من جنت طالبه .. شكد جانو يضغطون عليه حتى اترك مدرستي و اتزوج بس جنت معانده اهم شيء مدرستي

بس صارت سالفة عابد وانجبرت اجي لهين زوجه وراحت السنه واني والرب كل عمري احلم اخلص مدرستي وادخل جامعه ..

-اي المطلوب

- حبيبي فدوه خل ارجع للمدرسه اكمل والرب ما اخليك تحتاج اي شي والله حتى شتريد اسويل........قاطعني

-لا لا لا ابد انسيها هسالفه

-ليش تحجي هيج يعني دا احجي وياك فهمني

-شفهمج هلموضوع منتهي عندي .. ما عندي بت تفوت وتطلع مدرسه وهلتلعوص هاذ جدام الوادم ابد ما اقبلها

- ليش يعني

-ماكو ليش انه ما اقبل

-غير تفهمني

-ما يحتاجلها فهم هاي بتي وياج وهلمبطله ومنتظره قسمتها وتروح لرجلها دراسه شنو بويه

-بس حلا كالو هي جانت ممهتمه بدراستها وكسلانه .. صراع اني والله شاطره وامنيتي بالحياة اكمل دراستي

-مو كلشي نتمناه نلكاه حبيبتي انتي .. اتركي هسالفه

-بس اني اري...

-كتلج تركي السالفه بنيتي .. الا مو اتركيها انسيها ابد لا تحطيها ابالج ..

-ليش هيج تصدني يعني جاي اتناقش وياك اني هم حقي اكمل .......

-حقيش بويه دفلحي ابيتج وبعدين دوريلي دراسه ..لا فالحه وياي ولا وي العيال ولا حتى وي روحج .. كعدي وسكتي

-انت مو تكلي من تردين شي تفاهمي وياي شو احجي ما تسمعني وتسكتني ..

-بس لحظه خليني اسمع ..
وسوا نفسه يسمع بالاخبار ومركز .. واني اعرفو كلش زين بالو مو يم الاخبار بس يرد يسكتني ...

اخذت نفس ودرت عنو .. شكد حقير .. رايدني خدامه ابيتو وفراش لرغباتو ..

تراجعت عنو وابتعدت .. ودرت وجهي ابجي ..

صاح .. اوووو راح اتحط الدراسه حجه وتاخذللها زعله .. فكينا ليليان ..

-انت ظالم .. شنو ذنبي بيكم جبتوني مثل الاسيره من بيت اهلي وخليتوني خدامه الكم ولا كأن اني انسان والي احلام وامنيات

تعصب وتزعل لو ما فترشتلك .. واهلك يزعلون اذا ما خدمتهم .. زين اني شنو هااا بشر لو حيوان انطيني صنفي عندك ..

-يول مقصر وياج انه .. شنو اللي اطلبي وما جبتو ؟ بس دراسه ما اقبل وبعدين انتي نصبتيها مناحه على الدراسه وامة الثقلين مكلوبه شمدريج باجر وتفوت داعش النا وتسقط منطقتنا

يولي الرمادي منطقه منطقه جاي تسقط وانتي شادتلي حزام منا لشهرين ..

-وشنو يعني لو ما طبت داعش راح تخليني ادرس .. شدخلهم .. انت رافض الفكره كلها لا تحطلك حجه بغير شي ..

-هسه دخل تجي المدرسه والله كريم من هسه تحظرتي وتكاونتي ..

-يعني لو اجت وماكو داعش تقبل ؟

-الله كريم منا لذاك الوكت الف عمامه مكلوبه .. بس فكينا

-والله جذاب بس تريد تسكت السالفه

-يول شو متعرفين تحجين منو الجذاب.. احترمي نفسج لا بالقران راسج اكسرو .. ادب سز ..

كام طلع وهف الباب وراه بقوة ..

بقيت بفراشي ابجي .. يعني واذا درست شراح يضرو .. كل همو نفسو الاناني .. يريدني بس الخدمتو ولرغباتو ..

الله يلعنك يحيى بيوم البطلتني ووكعتني هينا .. الله ياخذك شذنبي بيكم .. كل الطلبتو دراستي ..

..بقيت بفراشي احجي وي روحي وابجي ..

اكوم اشوف صراع وينو لبست ثوب فوك هدومي ومشيت .. ردت انزل سمعت اصوات ولد عمو بالاستقبال بضحك عالي وسوالف .. اي جاي وجذب وجكاير .. الله ياخذكم

اكيد هو وياهم يتمضحك نزل مني حتى ما يناقشني اعرفو ينتظرني اهدئ واسكت ويصعد يتغزل ويسكتني بكلمتين عبالو

بس دشوف منو ترضى الا اطلع روحو والله .. اني الك ..

دخلت الغرفه .. بدلت كلابيه ومسحت المكياج ولميت شعري كعكه . والشموع قطعتهم من الكهرباء ..

وجبت غطا ثاني ما اتغطى وياه وتفلفت بي وخليتو جواي ..

لهناك دخل هو .. دحك.الملابس طارتها بالكاع من عصبيتي ومهوسه الغرفه و مطفيه الشموع وملفلفه روحي ..

هز ايدو .. :- عجل دحكي شكد انتي انانيه .. بس لخاطر دراسة زعلتي وغيرتي كلشي .. دليل ممسويه شيء الي .. تردين غايتج وبس

.. تقرب ينام .. دحك غطاه وحدو بمكانه واني متغطيه ومخليتو جواي ..

-براحتج ..

تمدد وحط ايدو على وجهو ونام ..

دحكت عليه .. بودي اكطعو المتعجرف مدري على شنو شايف نفسو ..

لثاني يوم .. وعيت وهو يبدل دحكتلو

-ها بردن خبالاتج لا

-درت وجهي منو

-يولو فكيها خلصينا

-ما رديت ..

-نزلي سويلي ريوك

- رفعت الغطا وغطيت راسي ..

-سهله يصير خير ...

.. نزل وراح طلع سمعت صوت سيارتو .. ما اتريك ..

شيصير لو يرجعني يعني .. شيخسر .. ليش مريدني اتعلم وادرس وادخل جامعه و اصنع نفسي .. يردني جواه ما اعلى عليه اعرف ..

... نزلت وكالعادة روتين الصباح.. بس للضحى واجه خبر ابن عمتهم مكتول وتراكضو الحجي و ام سعد و الحجيه راحو للعزا..

فرغ البيت بس اني ونور ...

واكفه انظف بغرفة الحجيه واصفط ملابسها وافكر بالموضوع ودايخه .. دخلت نور وكعدت ع التخت

نور:- يربي والله عيشه تكصر العمر .. ولج كرهتهم ولا طايقه اعيش وياهم

-چنچ بگلبي .. نفس شعورج

-لج يريدني بس للخدمه .. واني كل وجه ممحصله منو .. البس واتعدل وانتظرو يدخل ويشوفني متحظرتلو اليكول يخترع يتركني وينزل جوا على هلموبايل ..

-اوووو انتي والله بطرانه من كل عقلج ضايجه بس لان ما يجيج بليل ..

شفايتلي اصعد وما وراي شي الف راسي وانام مرتاحه .. الا العندي ما يشبع الزواج عندو بس هيج لا ويصنعلو جو وشموع وطقوس مهووس .. ولو درت وجهي ليله .. زعل و نتر ..

-اي اي لج مو يكولون ينطي الترجيه للماعندو اذان ... انتي ما حامده ربج على اللي عندج ..

-محمود مشكور ربي بس على شنو .. على صراع ؟ شو تفكيرو تفكير عربان وهمج وحابسنه بهلبيت .. بعد على شنو .. هزيت ايدي

- والله انج غبيه .. يول شو يدحك لحلكج .. وشحدو اليتعبج بالشغل لو واحد يحجي وياج حجايه .. كبالج يطلع يهد ..

وذاك اشترالج بيت 500 متر وجاي يبني بي حتى يكعدج .. وبعدين تعاي مو قبل اسبوع طلعج وكلج مطعم والبارحه اجه من الدوام اخذج لهيام .. شتردين اكثر ..

-اريد حريتي يول اختنكت عندو اختنكت.. حتى ابيت اهلي مو هيج .. مدرسه يوميهاشوف الناس اطلع وارجع تاخذني امي بالعطله لبيت خالي بأربيل ونتونس .. هينا نسيت نفسي اني انسان بالسنه حسنه لو طلعنا

كاعده هينا شتغده صراع وشيريد صراع ونوم وسبح .. لعبت روحي والرب ..

-يول احمدي ربج .. تره الدنيا ما بس طلعه وونسه .. اهم شي رجال يحبج ويحتويج .. الا منو الج غيرو ..

وحتى انه لا تكولين عندي اهل .. بدونهم جذب ما اندبر ارواحنه ..

يول ارمله ومات رجلي محد من اخوتي شال عشرة الاف وانطاني من هينا يدزولي مصرف .. ومن حجو بسالفتي اخوي وافق حتى ما رجعلي وشارني .. ويكلي اي اتزوجي احسن جهالج منو الهم ..

يا اهل متكليلي الا شجابرني على نائل وظلمو وكاعده هينا من هذا لذاك .. اتمناه نص من صراع هذا الما راضيه عليه وتكولين بس يدور سبح ونوم..

.... بقيت ادحك عليها وسكتت .. اني عقلي وين وهاي وين .. كملت شغلي وصعدت ..

العصر جا صراع .. حظرتلو ملابسو وما احجي وياه ولا هو حجه وياي .. بقى كاعد جوا ما بالغرفه هو ونائل .. بعدها طلعو للفاتحه ..

مهتميتلو ..

(التكمله تلكوها بالتعليق لأن ميسع الحلقتين تتعدى ال10الاف كلمه )تعللت وي نور شوي صار المغرب ومحد هينا صعدت بغرفتي وبالي مشوش واحس عقلي ما بمكانو .. ما جانت على بالي سالفة الدراسه وفجأ طلعت وهو صدمني برفضو حسسني اني ولا شي عندو..

... كاعده وضاربتلي صفنه .. صراع فات بس ما انتبهتلو لان صافنه ..

ما احس الا وهو يضرب السبحه البيدو ع الميز .. بصوت قوووي رعبني .. صحت

-هاي شبيك فززتني

-يولو شمفينه ؟

-شكو شبيك

زكح بصوت عالي :- انه شحاجي وياااااج شكايلج انتي ما ناويه تنعدليييييين

-اي غير افهم شكوووو ..... يتبع

☆☆☆☆☆☆

هذة الحلقتين ناشرتهم سابقا .. فنزلتهم سويه .. ملتقانه الأحد بحلقة جديدة ان شاءالله