رواية مرارة الايام الفصل السابع 7 - بقلم غير معروف

#مرارة_الايام

بقلمي #ميديا_الفهد

#قصص_من_حياتناM&T

البارت ال7

زمن..يوم يوم يلا كعدي حته تاكلين، احرك بيها وهيه ماكو مجاوب 😱

حوراء.. ولج شبيها امي ،

زمن. . مادري متتحرك ، ولج حوراء الحكي

حوراء.. يوم اكعدي والله اموت إذا صار بيج شي، حضنتها وسمعت نفسها ،،اجوي الحرس خلوها بسيارة الاسعاف وصعدنه وياها ، دخلوها للطوارئ ، واحنه برة
ورة شويه الطبيب طلع

الطبيب.. هااي ليش هيج هاملين المريضه ؟

حوراء.. دكتور امي شبيها الله يخليك لاتخلوها تموت

الطبيب.. امج تدري بنفسها عدها سكر

حوراء.. اي تدري

الطبيب.. لعد ليش هيج ارتفع عدها السكر ، شنو ماعدها علاج

حوراء.. اي خلصت من اسبوع ونسينه نشتريلها

الطبيب.. اي مو هيه حلويات حته نسيتو تشتروها ، شنو مستغنين عنها 😠 بقلمي ميديا الفهد

حوراء.. الدكتور يرزل بيه ويحجي، بگلبي هو بقت عليك دوس عليه عادي صرت مااحس بأي احساس،
حجه واني ساكته، كلتله دكتور كولي امي شبيها

الطبيب.. امج سكرها مرتفع كلش وحالتها خطرة ، السكر ضرب كليتها وهسه لازم نسويلها غسل كله،

حوراء.. سمحلنه الطبيب انشوفها بعد مغسلو كلاتها ،

يوم حبيبتي شلونج يابعد عيني، والله اذا صار بيج شي ماسامح نفسي كله منوراية الي يصير بيج، لو قابله بابو عزيز جان مو هذا حالنه، بس اني انانية ومافكرت بيكم ،

ام حوراء.. يمه حوراء ديري بالج ع نفسج وع اختج ، لاتتفاركن ابد واذا متت ،،بقلمي ميديا الفهد

حوراء.. يمه اسم الله عليج فدوة لاتحجين هيج والله كلشي مابيج الدكتور كال يومين وتطلع من المستشفى،

ام حوراء.. ولج خليني احجي مابيه حيل ، لاتقاطعيني بنتي
هاج هاي الورقه انطيها الاي احد وهمه يدلوج هذا بيت جدج ،

اذا متت خلي اخوتي يدفنوني ، وانتن غسلني لاتخلن وحده غريبه تشوفني ، هاي وصيتي ، ويا حوراء بت بطني اختج اختج ديري بالج عليها

وحته لو طردوجن ابقن كاعدات بابهم هذا بيت ابويه والي بي نصيب ، لاتتنازلن عن حقجن

حوراء.. امي تحجي واني وزمن نبجي بلكوة تحجي الحجاية من التعب والمرض ، تحجي كلمه وتتنهد يلا دكول الخ ،
انطتني ورقه بيها عنوان بيت جدي ، بقينه اربعة ايام بالمستشفى بس حالتها ماستقرت ابد بالعكس كامت تسوء واني وزمن منعرف غير بس البجي،

صارت بال7 الصبح اجتي الممرضه تشوف الصوندات الي خاليها ، من شافت امي ارتبكت ، وعافتها وراحت
بقيت مستغربه هاي شبيها ،
ورة شويه اجو دكاترة اثنين كعدوا يفحصون بيها وامي ولا حركه ولانفس ، كامو يسولها صدمات كهربائية، وهم متكعد انوب غطو وجها هذا كله كدام عينه،

زمن تبجي وتعيط واني اضرب بيها انجبي قندرة لاتبجين كلشي مابيها امي ، عادي هسه يغسلون كليتها وتصحى مثل ذاك اليوم ، لاتبجين اكولج ،
واضرب بيها موتتها ضرب بدون وعي يريدون يلزموني واني مااعرف شصار بيه،

طلعت كل حركتي وضيمي بهل مسكينه ، واصيح لاتبجين ، لحد ماوكعت من طولي ، فتحت عيني نايمه بس احس راسي صاير بكد الجبل حيل ثكيل فتحت عيني ، وشفت زمن، كلتلها وين امي ،، بيج قصص من حياتنا M&T

زمن.. حوراء شلون صرتي ولج لاتعوفيني الوحدي حبابه ماعندي غيرج بعد ،

حوراء.. لج جاوبي وين امي اريد اكوم ساعديني راسي ثكيل ،

زمن .. امي راحت وعافتنه اني وياج راحت وارتاحت من هل الدنيا ، 😭

حوراء.. مخبله لاتحجين هيج والله امي كلشي مابيها وديني عليها حبابه اريد اشبع من ريحتها وحضنها ولج اني موتتها زمن اني ،

كمت ادك والطم ع وجهي وملخت شعري الكانونه انشلعت من ايدي والدم يطفر من الشريان واني مااحس الوجع الي بداخلي اكبر من اي  وجع بالعالم ،

والكم اريد امي ودوني عليها لاتحرموني منها ، ليش بعد نظل عايشين موتونه وياها يممممه لاتعوفيني 😭

انطوني ابرة مهدئة ، ونمت شويه كعدت ، زمن واكفه يم راسي وتبجي ، بقيت ابجي وياها ، ماعدنه وسيله نريح بيها نفسنا غير البجي ، زمن ...

زمن .. هاا حوراء شتريدين حبيبتي

حوراء.. شنسوي هسه منو النه

زمن.. مادري 😭😭

حوراء.. ابويه وامي راحو يم زيد ، بقينه بس اني وياج ، إني بعد ماكدر اتحمل  هاي الحياة وكل الصبر الي عندي راح ويه امي ، بيج قصص من حياتنا M&T

زمن.. حوراء شبيج شدتحجين ؟

حوراء.. اني راح اروح تجين ويايه لوتبقين وحدج اختاري

زمن.. حوراء لاتخوفيني حبابه وين تريدين تروحين، لاتعوفيني 😭

حوراء.. زمن اني راح اروح يم الي احبهم هااي الدنيا مو الي

زمن.. ولج بشنو تفكرين حاجيني

حوراء.. راح انتحر تجين ويايه ، هاي الدنيا مو دنيا هاي غابة واني وياج منكدر نعيش بيها

زمن.. فدوة حوراء لاتحجين هيج ، ولج الله يغضب عليج وامي وابويه بعد متشوفيهم

حوراء.. اسكتي انتي صغيرة متعرفين شي ، اني اكبر منج وفاهمه الدنيا زين

زمن.. ويهون عليج امي ، ولج نسيتي حجيها وشوصتج

حوراء.. هيه وين امي 😭

زمن.. حوراء فدوة رجعي العقلج لاتخوفيني ، ابجي عيطي ضربيني موتيني بس لاتحجين هيج اروحلج فدوة 😭

حوراء.. زمن اني تعبت شوكت ارتاح ، بعد ماعندي حيل 😭

زمن .. حوراء مو عندج الورقه خلي نروح الخوالي ، بلكي ينعدل حالنه ونلكه بيت يلمنه بعد هل تعب الي شفناه

حوراء.. مادري خاف يطردونه

زمن.. انجرب ماراح نخسر شي ، شنشوف بعد أكثر من الي شفناه

سجاد.. حوراء وامها وأختها انطردوا من المنطقة بابشع صورة ، اني بعد الي سمعته لعبت نفسي منها ، بداخلي احس
انخدعت بيها ، لو صدك ابويه صار شهر يركض وراها حته يتزوجها زين ليش ماكلتلي من البداية ليش ضمت عليه، ابويه صح وهيه الي تريد تبلي ماكو غير تفسير ،،

ربي طلعها من گلبي اريد انساها

حوراء.. طلعنه من المستشفى واحنه عدنه بس 5 الاف ، وكلشي مانندل بكربلاء ، باوعت بالورقه بيها عنوان بس كلشي ماندل ولا اي نقطه داله منه ، شفت شرطي واكف يم المستشفى ،
كلتله عفيه اريد اروح الهذا العنوان ،وكلشي مااندل بكربلا ، كال اي تعالي
صعدنه بتكسي وكال لسايق وديهم لفلان منطقة ودلاه ع بيت جدي، طلعوا معروفين بالمنطقة

بس شنو اني وزمن نرجف منعرف شراح نلكه هناك وشلون راح تكون ردت فعل خوالي من يشوفونه ، نقرة بهل آيات، واندعي كون ميطردونه ،
وصلنه ابو التكسي وكال هنا سألوا نزلنه ،طبعا الشرطي انطاه كروة الله يجازي خير ، من عرف احنه من الحله ومنعرف اي احد وامي متوفيه

نزلنه من التكسي وكمنه نسأل الناس الي بالشارع شافنه جاهل صغير كال هذا بيت جد صديقي بالمدرسه اني اندله رحنه وياه وشفنه البيت يجنن مو بيت عبالك قصر احلى من الي جانت امي تسولفلنه عليه، بقلمي #ميديا_الفهد

دكينه الباب واحنه نرجف

فتحت الباب مريه جبيرة تقريبا اكبر من امي الله يرحمها ،

ام كرار .. نعم خاله منو رايدات ؟

حوراء.. خاله هذا بيت حجي حسن ؟؟

ام كرار.. اي خاله احنه ،انتن منو

حوراء.. خاله احنه بنات سناء

ام كرار.. 😱😱😱

حوراء.. بقت المريه مصدومه وعافتنه وطبت بدون اي حجاية، زمن تباوع عليه، كلتلها صبري، وره شويه طلع رجال جبير يمكن خالي هذا،

ابو كرار.. انتن منو ؟؟

حوراء.. انت خالي كمال مو؟ احنا بنات سناء

ابو كرار.. وين امجن ؟ وشلون اندليتن البيت

حوراء.. امي ماتت صار يومين ،ودلتنه ع بيتكم ، بس شنو خايفه ارجف من يحجي لان شكله عصبي

ابو كمال.. الله يرحمها وابوج وين ؟ وليش اجيتن علينه

حوراء.. ابويه هم مات 😔

طبعا كل هل اسئله واحنه بالشارع حته ماكلف نفسه ودخلنه للطرمه ، كعد بس يستجوبنه ، واحنه حالتنه حاله اني واختي وعبينه متربنه من الطم والشحططه ،

ابو كمال.. وشتريدن جايات علينه ، احنه امكم متبرين منها صار 20 سنه ،

حوراء.. بس امي بالمستشفى واحنه ماعدنه احد يدفنها ، وصتنه انو اذا ماتت اخوتي يدفنوني ، واني اجيت عليكم ، وبعد امي وابويه ماعدنه مكان اني واختي ، ابو البيت الي مأجرينه طردنه

ابو كرار.. استغفر الله ربي، تعالن دخلن هنا

ام كرار.. وين مفوتهن ابو كرار ؟ ومنو كال ذني صدك بنات سناء

حوراء.. خاله والله احنه بناتها وامشو للمستشفى واتاكدو وهاي جناسينه

دخلنه خالي كمال بالطرمه من التعب كعدنه بالكاع ، حته كلاص مي محد جابلنه وبناتهم ولدهم يباوعون علينه من بعيد عبالك بينه جرب او جايين من الفضاء

ابو كمال.. هذني منين اجني ، ادك ع اخواني البقيه  ونشوف شنقرر،، بيج #قصص_من_حياتناM&T

حوراء.. كاعدين بالطرمه وحده من البنات الصغار جابتنه مي ،، بقينه شويه كاعدين واجوي 4 زلم يمكن خوالي باوعوا علينه ودخلوا

ابو كمال.. دخلوا اخوتي وصار حجي بينه

حوراء.. دخلوا بقية خوالي ، وبده الحجي والصياح ناس دكول معلينه بيهن طردوهن ، خلي يولن ، لو الحجي عايش الله يرحمه ، جان طردهن

والبقيه يكولون لا حرام هذني بنات صغار وماعدهن احد ، يبقن بنات اختنه ، وامهن لازم تندفن

حوراء.. هذا كله واحنه منعرف شنو مصيرنه،
دخل ولد شاب وباوع علينه صفح عباله مجادي شال خمسه وانطانه ، حسيت بالاهانه ، كلتله شكرا احنه مو مجادي

كرار.. اجيت ع بيت اهلي واشوف الشارع بي سيارات عمامي استغربت شنو هاي شصاير عدهم ،
دخلت لكيت بنات اثنين كاعدات بالحوش مبهذلات حالتهن حاله عبالي مجديات شلت خمسه وانطيتهن وحده منهن كالتلي شكراً احنه مو مجادي ،استغربت اكثر

صحت امي ، يمه هاي شصاير ومنو ذني ؟

كرار.. نسيت اعرفكم عن نفسي اني كرار ابن خال حوراء ، خريج كلية آداب ، عمري 30 سنه ، طويل واسمر شعري اسود عندي لحية وشوارب خفيفه ،عيوني كبار سود وخشمي وحلكي صغار بين قوسين اموووت،
البنات يركضن ورايه 😂 لا اشاقه اني اركض وراهن ،
كشاخ اكشر فلوسي كلها ع الملابس والساعات ،
عايش حياتي طلعات وسهر ،ها نسيت اكللكم متزوج قبل خمس سنوات ،
وطالع من بيت اهلي الي هو نفسه بيت جدي، احنه عائلتنا طاكه عدنه فلوس تغطي عين الشمس ، جدي الله يرحمه عند اراضي وشركات بكربلاء وحته بغداد وارثهن أبا ً عن جد ،

ام كرار.. يمه ذني بنات عمتك سناء الي جدك اتبرة منها، امهن ماتت وهنه ماعدهن احد يعني راح نبتلي بيهن ،

حوراء.. واكفين يمنه وتحجي علينه وع امي كدامنه عبالك احنه حشرات مو بشر وانحس ، 

طلع خالي الصغير ستار ، كال تعالن فوتن جوة ليش كاعدات هنا ، ام كرار صدك جذب مكعدة اليتيمات بالحوش ،

ام كرار.. والله ميدخلن ذني البيتي لو مااعرف شيصير ، شمدريني بيهن شنو ماشنو شوفهن شلونهن ، تريدهن يختلطن ويه بناتي

حوراء.. من سمعتها هيج حجت تخبلت كلتلها واحنه هم ميشرفنه نكعد بيتج ، يلا زمن كومي شنو هل المذله

……………………………………………………………………

اسفه أتأخرت عليكم، يلا توقعاتكم شنو راح يصير ،،
ولاتنسون علقو وسوو لايك تفاعلوا لان متعرفون شكد افرح من اشوف تفاعلكم ويه القصة ، احبكم كلكم متابعيني
الكاتبة ميديا الفهد