رواية مرارة الايام الفصل السادس عشر

#مرارة_الايام

البارت ال 16 والاخير

بقلمي #ميديا_الفهد

#قصص_من_حياتناM& T

حوراء.. هو هذا حظي المصخم هسه شراح يصير بيه، أكيد راح يذبحوني ماكو غيرها 😱

كرار.. التمينه كلنه اجوي عمامي ، وكالوا الأبويه احنه مالنه دخل بيها انت خليتهن يبقن هنا انت وستار تحددون مصيرها ، تريدون تذبحوها تخلوها بكيفكم ،

من كالو تذبحوها تخبلت ، مهما صار ماخلي احد بتقرب عليها ويمس شعره منها ، هاي اول حب بحياتي ، لا تستاهل خانتني وماحجت من البداية لو هيه صدك مظلومه جان كالت حته ناخذلها حقها ،
اووف الف فكرة دور براسي مااعرف شنو اقرر انوب هيه بركبتي لازم اقرر ، راحوا عمامي وابويه ساكت

ام كرار.. متبقى ع ذمتك كرار طلكها شلون تخلي هيج وحده ع ذمتك هاي شلون تربي جهالك بعد يومين هل فاسدة

حوراء.. كاعده ع الدرج اسمعهم وانتظر كرار شيقرر ، اصلا هو ممتحملني اكيد راح يتخلى عني ، ربي كلها تخلت عني ماعندي غيرك ،

كرار.. يمه الله يخليج كافي لاضغطين عليه اني روحي طافرة رحمه الاهلج

عفتهم وطلعت رجعت للبيت ، تلكتني فاتن بلسانها الماينجرع

فاتن.. صرلك يومين يمها كاعد واني هنا مشمورة ادك عليك ترفض مكالماتي ، وين حبك وين الحجي الوعدتني بي

كرار.. يمعوده انتي شبيج ترة روحي طافرة وخري من يمي لا اخربلج وجهج

فاتن.. هاي اول مرة كرار يحجي ويايه هيج صح نتعارك ويكسر الغراض بس ابد ميهدد انو يضربني تخبلت ،،
اي عيني هاي حبيبة الگلب حوراء خانم گلبتك عليه بيومين طلعت موقليله، بس انت لو رجال مو النسوان يمشنك ، امك كلتلك ليش عايف مرتك رحت تركض ركض عبالك ممصدك

كرار.. كمت عليها ولزمت وجها حيل ، كلتلها ولج منو المو رجال ادب سزز اني رجال وغصبا ع الخلفوج ، بقت تتلاسن ويايه روحي طفرت روحي مناك حوراء والفضيحة الصارتلي منوراها ومنا هااي القندرة الي متسكت

فاتن.. انت تمد ايدك عليه لك اليوم اخلي اخوتي يموتوك نذل

كرار.. انعل ابوج لابو اخوانج روحي ع خوانج اريد اشوف كلب يوصل هنا ،،قصص من حياتنا M&T

فاتن .. تغلط ع ابويه نذل طلكني ماابقه وياك دفيقه وحده

كرار.. تغلط عليه وتهددني باخوانها ع مود عصرت وجها ودفعتها، وحوراء دميتها وكسرت ايدها وهيه ساكته

عفتها وطلعت وصلت للباب وسمعتها دكولي

فاتن.. انت اذا رجال طلكني

كرار.. اني رجال وسيد الزلم .وانتي طالق

فاتن.. 😨😨😨

كرار.. كل مرة تسوي هيج وانقهر عليها واكول حالتها النفسيه واصالحها واراضيها بس فوك ضيمي انوب هيج تحجي مليت منها ،وطلكتها
رجعت البيت اهلي محد موجود الكل بغرفهم ، رجليه اخذتني فوك ع حوراء،، بقلمي #ميديا_الفهد

حوراء.. كرار راح واني تعبانه من الضرب صار يومين وجسمي كله يوجعني وايدي أحس العظم يصل عليه ، اباوع ع وجهي بالمراية أخوف عيوني الكبار بالكوة مبينات منورة الورم وشفتي مجروحه حيل كمت ابجي ونمت

كرار.. دخلت للغرفه لكيتها نايمة ويمها الادويه المسكنة ، شكلها متغير عبالك غير وحده ، اني شلون هيج سويت بيها واني ادري بيها ماعدها شي وفقيرة بس ماكدر اثق بيها بعد شلون هيج تصدمني صدمة ، شسوي بيج يا حوراء لا بيه احبج وانسه الصار ولا بيه اكرهج واعوفج ، مااعرف شريد 😔

حوراء.. كعدت الصبح وفزيت فزة شفته متمدد يمي ، هذا شجابة هنا وشيريد 😣 اريد اكوم واخاف يحس عليه ويكعد ياربي شسوي ، بقيت جامده بمكاني شويه وخله ايده عليه وحضني ، كمت ارجف اريد انهزم منه ماكدر اباوع عليه وابقه وياه بنفس المكان ياربي خلصني

كرار.. كعدت لكيت نفسي حاضنها وهيه نايمه بقيت اشتم بيها ، اووف شكد ارتاحيت من شميت عطرها ردت الروح بيه ، خلي اكوم قبل لتكعد ماريد ابينلها حبي

حوراء.. حسيت بي بدة يصحه رأسا غمضت عيني وسويت روحي نايمة ، كام يشتم بشعري واني ارجف بس لا هم 🔞

كرار.. كمت نزلت وشافتني امي وتخبلت ، كامت تحجي عليه ودكولي شسوي يم هاي العاهرة

يمه الله يخليج روحي طافرة منا مصيبتي ومنا فاتن رحمه الوالديج لاتصيرين أنتي هم ضدي البيه مكفيني ،

ام كرار.. ليش شبيها فاتن

كرار.. طلكتها بلكي ترتاحين

ام كرار.. ولك اطلك الشريفه العفيفه ومطلك الساقطة ام الزلم

كرار.. يمه شلون يعني اهج واخلص تعبت والله تعبت كافي رحموا بحالي لكم ياناس ياعالم اني هم بشر

حوراء .. سمعت كرار يعيط خفت ، يمه شراح يصير ليش يعيط

كرار.. اجه ابويه كام يحجي عليه وكال العصر تحضر نفسك وتجي ويايه ترجع مرتك

تسريع للأحداث..........

حوراء.. صار شهر ع موضوعي وفضيحتي محد بعد حجى ، كرار رجع مرته بس شرطت عليه ميجي عليه ، اني بقيت شهر اخدم ومحد يباوع بوجهي ، ومرت خالتي مطينة عيشتي وكل شويه تهين وتعيرني واني ساكته ومتحملة ، طبعا زمن رجلها منعها تشوفني او تتصل بيه ، ومها امها وابوها ميخلوها تحجي ويايه او تكعد يمي خاف اعلمها ع سوالفي الموزينه إلي اني بنفسي مااعرف شسويت ،الكل يصيحوني« هيه لو انتي» ، اصلا نسيت عندي اسم ، اتمرمرت بهل الشهر ، بس حيدر شويه زين ويايه صح اني ماعندي حجاية وياه بس ابد مسمعني حجاية تغثني لو ضوجني ، من تتعارك مرت خالي ويايه هو يدافعلي وميقبل عليها

كرار.. دك عليه حيدر
📞هلوو حيدر شلونك

📞هلو كرار الحمد لله، اكولك كرار تره حوراء صار فوك الشهر ايدها مچبسة تعال وديها يفتحوها الها

📞اليوم ماكدر عود باجر اوديها

كرار.. رحت ثاني يوم الصبح ع بيت اهلي ، وكلت الحوراء تلبس عبايتها اوديها للمستشفى،بقلمي ميديا الفهد

حوراء.. رحنه للمستشفى ، كعد الطبيب يفتح الچبس وريحة الديتول والمستشفى تلعب النفس ، بعده يفتح بيها واني بعد متحملت وخرت ايده وركضت ع سطلة الزبل يم الباب وتقيئت كومه

كرار.. واكف انتظرها تخلص شو هاي دفعت الطبيب وكامت تستفرغ بالسطل ، رحت عليها
شبيج حوراء ؟؟

حوراء .. مابية شي لعبت نفسي من ريحة الديتول ، رجعت كمل الطبيب فتح ايدي ولفها باندج كالي عوفيها اسبوع بالباندج ، وسوي هذا التحليل وجيبلياه،
استغربت ليش عود اسوي تحليل هو كسر شعليه بالتحليل ،المهم سويت التحليل

كرار.. كعدنه ننتظر التحليل يطلع، وحوراء كاعده بصفي وتباوع ع ايدها،
شنو بعدها توجعج؟ بيج قصص من حياتنا M&T

حوراء.. اي شويه توجعني

كرار.. لزمت ايدها اريد اشوفها مورمه لولا

حوراء.. لزم ايدي واني رأسا سحبتها ودرت وجهي

كرار.. ضجت من سوت هيج، صاحوا اسمها حوراء امجد

كمت استملت التحليل ، ام المختبر كالتلي مبروك حامل 😳
منو الحامل ؟
الممرضه.. حوراء امجد ،هذا تحليلها والنتيجة حامل

بقيت بين المصدوم وبين الفرحان صار ست سنوات انتظر هاي اللحظه الي يصير عندي بيها طفل

حوراء.. راح كرار جاب التحليل ولزمني من ايدي واخذني للطبيب، ع كيفك كرار راح اوكع ، عوفني اني امشي

كرار.. طبيت للطبيب وانطيته الورقه ،
الطبيب .. مثل متوقعت ، حامل الدوة الكتبته الج ممنوع تاخذي مو زين عليج راح اكتبلج فيتامينات وفولك اسد يوميه حبايه الصبح ، وتراجعين طبيبة نسائية كل شهر

كرار.. ماصدكت بكلام الممرضه جريتها ورحت للطبيب وهم كال حامل ردت اطير من الفرحة

حوراء.. الطبيب يحجي واني واكفه مصدومه منو هاي الحامل

كرار.. اخذتلها العلاج ورحت افرح اهلي

حوراء.. رجعنه للبيت وبيت خالي كلهم كاعدين بالهول ، كرار مكيف لان اني حامل بس اني مافرحانه ،

كرار.. يمه البشارة حوراء حامل ، امي كيفت كامت تهلهل وتبوس بيه ، ابويه هم باركلي

حوراء.. ياربي شنو مصير هل الطفل خاف ينظلم ويايه لان امه بنظرهم وحده مو زينه 😔

كرار.. من الفرحة مااعرف شسوي اريد العالم كله يعرف راح يصير عندي طفل ، كلت الفاتن حسيتها مافرحت مو مهم المهم أني فرحان

تسريع للأحداث.....بقلمي ميديا الفهد

حوراء.. كرار بس اول اشهر فرحان وداير باله عليه ويومية يجي يشوفني، تعودت يومه اشوفه خلال اربع اشهر ، وراها كطع كام بس بيوم موعد الدكتورة يجي يوديني يعني اشوفه بالشهر مرة وحده جنت انقهر حيل ومنا مرت خالي ع نفس عداوتها ويايه تحاسبني ع كلشي ،

9 اشهر ولا شايفه زمن ولا سامعه صوتها گلبي يوجعني عليها رجلها حالف عليها يمين الطلاك اذا حجت ويايه ، رادت تعوفه بس اني حجيت وياها بالتلفون وكلتلها اني مصيري مجهول ،هاي قبل ماعرف إني حامل، ، كلتلها ابقي يم رجلج وابنج ومعليج بيه

كرار.. بالليل دكت عليه امي وكالتلي احنه باجر كلنه رايحين نزور ، وهاي راح تبقه حدها ، انت مو متقبل تبقى وحدها،
يمه اخذيها وياج واني هم راح اجيب فاتن ونجي

حوراء.. كالتلي مرت عمي باجر حضري نفسج راح نروح للزيارة
كيفت صار كومه ما زايرة ، مجنت ادري فاتن جاية ويانه

كرار.. كعدنه الصبح ،رحنه البيت اهلي اني وفاتن

حوراء.. كعدنة اني ومرت خالي حضرنه الاكل وترمز الجاي ، جان يدخلون فاتن وكرار ، ضجت من شفتها ، هيه مرتاحه وعايشه حياتها واني مذلوله وعايشه بالاهانات ، تباوع عليه ، اني هم ما سلمت عليها

كرار.. دخلنه اني وفاتن واباوع ع حوراء وفاتن وحده تريد تاكل الثانيه بالنظرات صدك ضراير

ابويه اخذ امي ومها وخواتي الصغار ، واني ويايه حيدر وحمودي وفاتن وحوراء

حوراء.. صعدت ويه كرار بعناد فاتن كاعدين وبيني وبينها حمودي ،

فاتن.. شلونه حسن ؟؟

حوراء.. صفنت عليها ياحسن هذا ؟

فاتن .. حسن ابني الي بطنج ، ليش ماكلج كرار اول مجيبين راح ياخذة منج ويسجله بإسمي😌

حوراء.. انتي شتحجين ، كرار هاي شتحجي والله ع جثتي تاخذون مني ابني ، الدنيا اگلبها عليكم

كرار.. كافي بس شكد تگرشن دوختني ،

فاتن.. ليش انت مفهمتها انو هذا الطفل الي ،انت مو هيج كلتلي ولهذا وافقت اجي بنفسي اخطبج اله

حوراء.. فاتن تحجي واني تخبلت اني احمل واتعذب وتالي هيه تاخذ ابني مستحيل،

نزلني هنا كرار تسوي اتفاقيات منوراية لان ماعندي احد يوكفك عند حدك هيج تسوي بيه ، كلشي احبة انسلب مني انوب لحكتوني ع روحي ، هذا الطفل روحي واني من سابع المستحيلات اتخلى عن روحي

حيدر.. كافي يمعودات شنو السالفه رايحين انزور لو نتعارك ،
.

كرار.. وصلنه والنار تطلع من عيون حوراء ، وفاتن لازمه ايدي وتمشي وحوراء ورانه كلساع اندار عليها وهيه تبجي

حوراء.. وصلنه شفت الامام الحسين كمت ابجي وانخيه ، انوب رحت ع امام العباس ، دخيلك يابو فاضل انظلمت هواي بهل الدنيا بستر زينب عليك اريد براءتي منكم انتو اهل البيت بجاهكم عد الله كون برائتي تظهر واريد اشوف حوبتي بكل واحد ظلمني 😭

سجاد.. رحت لكربلا ازور ،وشفت بنية تشبه حوراء معقوله هاي حوراء ، اي هاي حوراء، شبيها بلكوه تمشي

حوراء.. زرت ورجعت كعدت واقره دعاء وفاتن لازكه بكرار عبالك راح يطير 😏
طبعا كل شويه اروح للحمام بشهري وكل شويه انحصر ، رحت للحمامات ، كملت وطلعت واشوف واحد كبالي 😳 سجاد كمت ارجف

سجاد.. شلونج حوراء ، وين صفه بيج الدهر ؟

حوراء .. إني اتخيل لو هذا سجاد كدامي واكف ،بقيت صافنه واباوع عليه

سجاد.. حوراء من بعد مارحتي المصايب مافاركتنه وابويه اخرف واعترف بكلشي سواه بيج ، تندمت لان ماصدكت بيج

حوراء.. هو يحجي واني ابجي ،احس الدنيا تفتر بيه

سجاد.. احجي اي شي سبي اغلطي ليش ساكته حاجيني ،

حوراء.. شحجي وانتو هدمتوا حياتي ودمرتوها حسبي الله ونعم الوكيل عليك وع ابوك ان شاء الله حوبتي متتعداكم

كرار.. حوراء راحت للحمامات وأتأخرت ضل بالي عليها ،كمت اشوفها وين راحت وشفتها واكفه تحجي ويه ولد ، تخبلت ركضت عليهم ، بيج قصص من حياتنا M&T

حوراء.. سجاد يحجي ويايه ويكولي سامحيني غلطت بحقج ومااشوف الا كرار هجم ع سجاد ولزمه من ياخته

كرار.. لك انت منو وشعندك ويه مرتي ؟ احجي

حوراء.. العالم التمو علينه عفتهم وركضت ع حيدر صحته حته يجي انوب هذا هم لزم سجاد وكاموا يضربون بيه،

كرار.. اجه حيدر كلتله الزمه ولاتهده، حوراء واكفه لزمتها من ايدها ولج هذا منو احجي لا اموتج

حوراء.. هذا سجاد ابن ابو عزيز 😭

كرار.. تخبلت من عرفت هذا ابن الكلب ابو عزيز جلبت بيه كلتله ولك الله جابك الي من السما ولك صار اشهر ماخليت مكان مادورت بي ع ابوك اليوم شيخلصك مني

حوراء.. رجعنه للبيت وسجاد ويانه موتوا كتل ،

انجمعوا خوالي وحجة سجاد ع كل شي
والحمد لله ظهرت برائتي اهل البيت ماقصروا دخيلهم

كرار.. احجيلي ولك صدك ابوك هيج سوه بحوراء

سجاد.. اي صح ، بالبداية احنه منعرف بعملته وكال هنه يريدن يقشمرني حته ميدفعن أجار وصدكناه وره 3 اشهر اختي انهزمت ويه واحد وخلت راسنه بالطين ، بعنه بيتنه ورحنه لبغداد وابويه كام يكول هاي حوبة حوراء ولي سويته بيها ، شويه شويه وفقد عقله ،

كرار.. انت راح تبقه هنا منعوفك لحد مناخذ حق حوراء منكم ،

دك ع اهلك وعمامك يجون هنا ويقتص الي غلط بحق بنتنه، وكللهم الكم مهلة يومين ويجون واذا ماجوي انت تدفع ثمن غلطة ابوك

حوراء.. سجاد بالاستقبال يحجي واني واكفه وره الباب بس لشتي كلها تهتز ماعرف اوصف احساسي بذيج اللحظه، احس الله بعد هل تعب كله اخذلي حقي وظهر برائتي ، ربي الف حمد وشكر ربي من نصفنتني وظهرت برائتي ،

سجاد اتصل ع اهله وبنفس اليوم اجوي كرايبه شيوخ وعمايم وجايبين النكس ابو عزيز وياهم ، بدي اطب واموته بيدي حته الموت قليل بحقه ، كل عذابي وقهري بسببه كل الي صار بي ميكفيني ويريح گلبي ، شكد انضربت ونهنت وانبذت من الكل تسعة اشهر واني عايشه بقهر وذل الموت اهون عليه من الي شفته بحياتي امي ماتت بسببه وانحرمت من اختي حبيبتي ، اوف ماكدر اصبر اريد اطب اموته اريد اشلع عيونه بيدي ،

كرار.. دخل ابو عزيز إني مااعرفه كلتله منوه ابوك ، كالي ابو دشداشه الجوزي ، كمت عليه موته دك بوكسيات بلكوه شلعوني منه دميت وجه ، ولك بسببك تدري شسويت بمرتي وحبيبتي ماصدكتها وهنتها وضربتها ورادت تموت بيدي منورة عملتك السودة ولك اليوم اشرب من دمك ، اني احجي واعيط واضرب بي وهو يضحك ويعيب بلسانه ، طلع صدك فاقد عقلة ومخرف ،

حوراء.. سمعت عياط وضرب وخالي يصيح ع كرار عرفت بي ضرب ابو عزيز ، اوف اي اخذلي حقي منه الكلب النذل ،
صار حجي وفصلوهم بمبلغ جبير ، اني ميهمني لا فلوس ولا غيره الي يهمني برائتي الي ظهرت هاي اغلى من كل فلوس الدنيا ،
وفصلوهم مرة ،طبعا فصل المرة شي شكلي بس كدام العالم انو احنه كسرنه خشومهم بس لا خوالي اخذوا مرة منهم ولاشي ،

كرار.. بعد الي صار مااعرف شلون حوراء راح تسامحني ، المفروض مااتسرع واصدكها بس هيه وصلتني لهل مرحلة من بقت ساكته يمكن لو صارحتني من البداية جان صدكت بيها وكفت وياها ، الله يلعنك ياالشيطان ،

حوراء.. راحوا بيت ابو عزيز بس تمنيت يسلموه بيدي حته اشرب من دمه الخسيس ،
اجة كرار وشايل كومه فلوس ونطانياهن ، كلتله شنو هاي

كرار.. هذا حقج

حوراء.. اخذهن الك اني حقي رجعلي بيوم ظهرت برائتي كدام الكل ماريدهن

كرار..صعدت الفلوس بغرفتها وصحتها حوراء تعالي

حوراء.. صعدت بس صدك بعد إلي صار احس نفسي مااحتاج الاحد رجعت حوراء القوية الي ما عندي شي اخاف منه

ها كرار شتريد

كرار.. تعالي كعدي هنا اريد احجي وياج

حوراء مااعرف راح تسامحيني بعد كل الي صار لو لا بس ثقي بالله الي سويته بيج غصبا عليه ماكو رجال بالدنيا يتحمل انو مرته تطلع مو بنية ويكتشف بنفسه يمكن لو حاجيتلي جان ماصار الي صار

حوراء.. 😏 يمكن مو ، بعد إلي صار صار الزمن بعد ميرجع ليورة ، اني مسامحتك ع كلشي سويته بيه ، بس عمرك وحياتك ماراح تكون زوج إلي انت مجرد أب الهذا الي بطني

كرار.. حوراء تدرين بيه احبج واموت عليج انطيني فرصه اعوض عليج والله اعيشج احسن عيشة

حوراء.. كرار صعب ماكدر ، احجي وياه واحس بألم مو طبيعي اصلا من سمعت صوت ابو عزيز واني بطني كامت توجعني بس ع كيف عبالي من الخوف اتشنجت بطني بس كام الوجع يزيد كمت اعيط وكفت ع حيلي

كرار.. احجي وياها وكامت تعيط وتصيح بطني ، وكفت ومي جواها كمت اصيح ع امي عبالي بيها شي ،

ام كرار.. يمه جيب الجنطة مال ملابس الطفل مرتك راح تجيب

كرار.. دكولي مرتك تريد اجيب كمت مااندل طريقي انخبصت واروح منا واجي منا ، وحوراء بس تعيط ، لبستها امي العباية وصعدتها بالسيارة ورحت للمستشفى واكف انتظر برة شو ذوله أتأخروا يارب شوكت تطلع امي متت خوف ، بقيت الوب شويه وامي احتي وشايله بيدها ابني ، شلته ممصدك كبرت بإذنه

حوراء.. شفت الموت بعيني الله يساعد امهاتنة صدك اصعب شي بالدنيا الولادة ، بس من جبت وشفت الطفل خلوه بحظني كلشي نسيت يمه يخبل مثل الملاك ويشبه ابوه نسخة من كرار يخبل ، طلعوني خلوني بغرفه وحدي كلش حلوة اصلا المستشفى اجنن وخاصة بس للولادة ، كرار يمي شايل الطفل وباس راسي ومرت خالي فرحانه واني اضحك بس شنو الفايدة هاي فرحتي طولت اسبوع واحد ، ممكتوبلي الفرح ويه مرارة الايام الي معيشتني بتعاسة ووجع

كرار.. مر اسبوع وفاتن خبلتني تريد الطفل ماعرف شسوي ، دكولي انت وعدتني انت مو؟ رجال كون كد كلمتك ، وسجل الطفل بإسمي ، حوراء تكدر تخلف بعد وتصير ام مرة ومرتين وتلاثه بس اني ماكدر اصير لاتحرمني من هذا الاحساس ،
انقهرت عليها بس شلون اقنع حوراء وماصدكت رضت عليه وسامحتني ،

حوراء.. كاعدة بالغرفه ابدل بعلاوي يمه شلون حلو وناعم اريد اخلي بگلبي وماطلعه منه ، صعد كرار بس وجه مو طبيعي كالي جيبب علاوي فاتن تريد تشوفه
كلتله مانطيك ابني تريد خلي هيه تجي تشوفه مستحيل انطيكياها ،

كرار.. حوراء ادري بيج انتي عاقله وفاهمه ، خطية فاتن راح تموت ع مود ريحة طفل والله تحبه وتشيله بعيونها ، وانتي تكدرين تخلفين غيره والله شتريدين انطيج حته بيت اذا تريدين اسجله بإسمج

حوراء..كرار انت صاحي دتشوف نفسك شتحجي ولك شايلته بطني 9 اشهر تريد تاخذة مني ، ولك ليش هيج تسوي كل ما اكول يحبني وتغير تطعني الف طعنه ليش هيج تسوي، اني بشنو اذيتك حته هيج تأذيني ،

كرار.. حوراء قابل راح ابيعه هو ابنج ويبقه ابنج مجرد ما فاتن تربي واصلا افكر ابيع البيت واشتري واحد اكبر واقسمه وكل وحده منجن بيت ، يعني هو يمج يبقه تكسبين أجر بهاي اليتيمه

حوراء.. اني هم يتيمة وماريد اكسب اجر ، ابني عزيز ع گلبي مانطي

كرار.. لج ليش متفهميني هو راح يعيش وياجن نفس البيت ، حوراء والله تعبت من المشاكل اريد ارتاح واستقر كافي شحططه انتي بمكام واني بمكان كافي اريد ننجمع بيت ونستقر، انتي متريدين تستقرين ويصير عندج بيت وبراحتج تعيشين بيه بدون مااحد يضوجج

حوراء.. كرار عليه لسان واسلوب ، خلاني اوافق وفعلا اشتره بيت جبير وقسمه واثثه ، دخلت للبيت يجنن الأثاث حلو ، علي بحضني وفاتن اجتي عليه سلمت وبوستني استغربت بس ادريها بيها مو ع مودي ،

بالبداية شويه تاخذة والليل يمي ع هذا الحجي شهر واحد كامت تنطي ممه الصبح وبالليل يخبلني ميقبل يرضع مني يريد ممه كطع صدري وبقه ع الممه

كرار.. حوراء والله دخت خلي اودي يم فاتن هيه تعرف تسكته ولج والله مشتاقلج متحسين

حوراء.. بدة يسوي نفسه يضوج ومجلب يمي ميروح يم فاتن مادري هاي خطة عليه حته ياخذون ابني مني ، اكوله سويله جنسيه وهو يوميه يكولي اي وميسوي ، مر شهرين وطلعت حامل كله نعسانه ومالي خلك اريد بس انام ولعبانه نفسي ،بقة علاوي يم فاتن قليل يجي يمي لان مالي خلك نساوتي قوية ، عدت ال3 اشهر علاوي صار عمرة 6 اشهر كام ميريدني يستغرب مني ويضل يبجي ، اموت قهر واني اشوف ابني فرحتي الاولى وهو ميريدني ويستغرب مني مرت الاشهر وبالصدفه شفت المستمسكات ولكيت جنسية علاوي ومسجل بإسم فاتن تخبلت كمت ادك والطم ،بقلمي ميديا الفهد

كرار.. نايم الظهر واسمع حوراء تبجي وتعيط ،عبالي بيها شي ركضت شفتها كاعده بالكاع ومحفظتي بيدها ، اووف ، حضنتها كامت ادفع بيه وتضرب بقت شهر متحجي ويايه ،

حوراء.. علاوي ميريدني ويبجي وكرار ماكدر اباوع بوجه صح ممقصر ويايه ومعيشني احسن عيشة بس ماكدر انسه غدرة وشلون اخذ ابني مني ،
بااليل نايمه واجتني الطلوكه دكيت ع كرار وداني للمستشفى وجبت احمد صح فرح بس مو مثل فرحتي الاولى الي متهنيت بيها ، اتأقلمت ويه الوضع الجهال كبروا جهالي اثنينهم يصحولي ويصيحون لفاتن ماما ، كرار يوم يمي ويوم يم فاتن ، مصدكون اذا كلتلكم اني وفاتن صرنه مثل الخوات تحب جهالي ومساعدتني بيهم اعتبرت نفسي هديتلها علاوي ،

مها تخرجت وتزوجت، وزمن صار عدها بنيه تخبل وحجزتها الاحمد هههههه ، حيدر رجع لبغداد واتزوج واستقر هناك ،

فلوس الفصل مال بيت ابو عزيز تبرعت بيهن كلهن للأيتام بثواب روح امي وابويه ،

هسه عندي احمد وبنين ، صح علاوي ميعرف اني امه بس يحبني ويحب اخوته بس بقى علاوي حسره بگلبي

…………………………………………………………………………………

لهنا وخلصت قصتنا مرارة الايام، صح قصة حزينه بس بيها هواي مواعض وعبر ،اتمنى استفاديتوا من القصه ومتكون مجرد قصة عابرة مرت عليكم، وانو مو كلشي نسمعه او نشوفه نصدكه وبالتالي نظلم الي نحبهم ،لازم نحكم عقلنه، ومن انحب لازم منخلي العاطفه تاخذنه المكان الغلط، قراءة ممتعة أعزائي ربي يحميكم ويحفظكم من كل شر،

انتظروني بقصة جديدة ورة العيد ،، الكاتبة #ميديا_الفهد