رواية مرارة الايام الفصل الثاني 2 - بقلم غير معروف

#مرارة_الايام

بقلمي #ميديا_الفهد

#قصص_من_حياتناM&T

البارت ال2

حوراء.. صارت ب11 بالليل وامي كامت تعيط ، اني وزمن وحده تباوع ع الثانية نريد مكوم منكدر انشلينه من الخوف
ركضنة ونشوف امي وابويه حاضنين زيد ويبجون،
كل ضني متخربط مثل كل مرة ، بس ليش هيج يبجون لا مابي شي ولان تخربط ديبجون عليه،

بابا هااي شبيك كوم ودي للمستشفى ،تره مابي شي ، ابويه ميرد بس يبجي ،
يمه شبيكم والله مابي شي ليش تفاولون عليه، جبت مي واغسل بوجه ،
كوم حبيبي زيد كوم اليوم ماعندي امتحان العب وياك كوم حاجيني فدوة اروحلك ، وابجي ،
زيد بعد منو يتلكاني من ارجع من المدرسة ويبوسني ، بعد منو يتناكر ويايه بعد وين اشوف ضحكتك ياابو ضحكة الحلوة ،لك زيد كووووم 😭

بعد مرور ايام....

حوراء.. البيت كله أظلم اي روح للحياة مابي كلنه لابسين اسود ، ابويه وكم خير دفنوا ماسويناله فاتحة ، بالبيت واصلا منو يجينه لا عمام ولا خوال مثل الناس، اجوي الجوارين عزونه ،

امي وكعت علينه من القهر والطم وصار بيها سكر ، ومن مات زيد لليوم هيه بس لطم وبجي

ابويه نفسيته مدمرة حته للشغل ميكدر يطلع ، وكاعد بس يدخن ويبجي

اني وزمن نطلع صور زيد ونبوس بيهن ونبجي ،

كل هذا ونسيت اكو شي اسمه سجاد الدنيا كلها طالعه من عيني ، الحزن عشش بگلوبنة بفراك زيد

سجاد.. من صار العياط ب11 بالليل لان احنه نفس المنطقة الكل طلع ، وعرفت اخوها زيد متوفي ، حجيت ع نفسي كلت اني زعلت عليها وهمه واكعين بمصيبة ،
بقيت طول ايام الفاتحة ادك عليها اريد اطمن ،مجاوب الله يساعدهم فراك الاخو موسهل،
رجعت دكيت ورة 3 ايام مغلق ، للمدرسه ماكو مداوم ، تخبلت شلون اوصللها  #قصص_من_حياتناM&T

حوراء.. بقينه اسبوع البيت كآبة وحزن بكل زاويه من زواية البيت ، ريحت زيد بكل مكان ، لهسه صوته وضحكته وعياطه من الوجع بإذني ، احسه بعده عايش ويانه ،

زمن.. لج حوراء صح مو وكتها بس البيت فارغ مابي حته خبزة ،استحي اكول البابا والله صار يومين متت جوع

حوراء.. زمن صدك تحجين متشوفين حالة بابا يا أكل يابطيخ ولج بس دموعه كافي ، ابونه انكسر ولج دفن ابنه بايدة ،  اسكتي حته لو تموتين جوع متفتحين حلكج ودكليله ،

ابو حوراء.. اريد اروح اشوف البنات لان من اشوفهن گلبي يرتاح واشوف زيد بوجهن ، وصلت لغرفتهن واسمع زمن دكول صار يومين ميته جوع ،، اتخبلت الحزن تملك گلبي وبقيت بذكره زيد وافكر بي ونسيت العايشين بهل البيت مرتي وبناتي شياكلون شيشربون ، بس حوراء كبرت بنظري شلون متريد تضايقني وتطلب ، من باجر اطلع ع باب الله

حوراء.. رزلت زمن وبهل اثناء دخل بابا ، سكتنه ،
كال
ابو حوراء.. لاتسكتون بالعكس طالبوا بحقكم اذا يمي او يم احد غيري، وحبيباتي ان شاء الله من باجر الصبح اني طالع للشغل ، بقلمي ميديا الفهد

حوراء.. حبيبي بابا ماكو داعي لا تطلع اصلا اكو اكل كومه بس هاي متبطرة ، انت تعبان ارتاح كم يوم والله كريم ،

ابو حوراء.. لا بنتي خلي اطاع واشوف الناس بلكي التهي بالشغل وانسه همي وحزني ، وانتو هم من الاحد ترجعون لمدرستكم وداومون حرامات تضيع عليكم السنه

حوراء.. براحتك بابا ، بس اني مارجع لان ماكدر اعوف امي وحدها، وهيه بهل الحاله

زمن.. اني يمها وانتي سادس والدرس إلي يروح عليج بعد منو يشرحلجياه ، اني كم يوم ابقه يمها لحد متصير زينه ،

حوراء.. صار الصبح بدلت وكملت يمكن هاي اول مرة اروح للمدرسه وزمن مو ويايه طلعت من البيت ، طبعا مدرستي بعيده كلش عن بيتنه ، بس اني اطلع من وكت وامشي اكول هاي 500 دينار اضمها لو اشتري بيها اكل احسن مانطيها لابو الكيا ، اباوع البنات كلهن خطوط واحسن لبس ، مرات انقهر ومرات اكول الحمد لله يجوز احنه احسن من غيرنه ،،
المهم امشي وحسيت احد يصيحني انداريت لكيته سجاد ، ردت اركض عليه واشكيله همي مكدرت بس بقت عيوني يجرن دموع

سجاد.. يوميه انتظرها تطلع ماكو مشتاقلها ةتلفون مغلق ، طلعت الصبح هم انتظرتها وشفتها طلعت وحدها تمشي، طار گلبي وراها ضعفانه وتعبانه ولابسة اسود ، كلش متغيرة وشكلها يقهر ، مشيت وراها وشفت ماكو احد صحتها

حوراء حبيبي شلونج البقاء لله ، ان شاء الله آخر الأحزان

حوراء.. الحمد لله لا اعتراض ع أمر آلله ، الله ريحة من العذاب واخذة ،وابجي

سجاد.. لاتبجين ياعمري دموعج غاليه عليه ،وزيد هسه طير بالجنه ، حوراء فدوة العينج ليش تلفونج مغلق والله صار اسبوع مفرفح عليج اريد بس اعرف اخبارج

حوراء.. والله ناسيته بالكنتور ويمكن مابي شحن وطفه ،

سجاد.. بروح زيد اليوم شحني اريد اخابرج

حوراء.. اي ان شاء الله يلا اروح اني تأخرت ع المدرسه

سجاد.. وين تروحين وحدج ، امشي امشي نصعد بالكيه وإني اوصلج ، ولج هو انتي بالكوة تمشين وجهج تعبان واصفر

حوراء.. لا سجاد ماكدر اني متعلمه امشي وحدي، بگلبي هو اني ربع دينار ماعندي بجنطتي ، بقة يلح وحسيته عصب ، وافقت

سجاد.. وكفنه كل واحد ع صفحة واجتي كية وصعدنه سوة ربك ومابيها مكان بس مقعدين قبل الاخير ، يعني راح تكعد يمي اويلي 😍قصص من حياتنا M&T بقلمي ميديا الفهد

حوراء..صعدت كعدت، وسجاد كعد بصفي عزة شصار بيه ، طلع فلوس ودفع الي واله ، كلتله لا لتدفع إني ادفع بصوت ناصي ، كلشي محجه بس خزرني ، سكتت بس هو بقة يسولف شلون بقة باله مشغول عليه ومشتاقلي من هل الحجي وإني يس ارجف مادري شبيه

سجاد.. كعدت بصفها ودفعت الكروة ادكلي اني ادفع ولج شنو اني طرطور مردت اضوجها خزرتها وسكتت ، بقيت اسولف وياها وهيه ترجف خايفه، لزمت اديها شو هاي ماعت بدية 😂

حوراء.. يسولف ويحجي جان يلزم ايدي ردت اسحبها بس هو لازمني حيل بقيت مدنكه وارجف حسيت انتهيت من الخجل ونار تطلع من وجهي، احس الي بلكية كلهم يباوعون عليه ويسمعون حجي سجاد ،

وصلت للمدرسة بس كل تفكيري يم سجاد ، البنات سلموا عليه والمدرسات هم، طول الدرس اني افكر بسجاد وشلون كاعد يمي ويسولف ،

خلص الدوام طلعت لكيته هم واكف كمت امشي وهو ورايه 

سجاد.. ممصدك نفسي هم كعدت وياها وهم لزمت ايدها، كلت خلي من ترجع من الدوام هم اخليها ترجع بالكية
حبيبتي حور تعالي نرجع بالكية ماريدج تعبين وتمشين، واني بگلبي اريد اكعد يمها واشبع منها،
حوراء.. لا سجاد ماكدر هسه امي دكول شو رجعتي من وكت ،عفيه حلي ارجع مشي اني هيج مرتاحة

سجاد.. براحتج ياعمري اهم شي أنتي مرتاحة حور لاتنسين اتشحنين التلفون ،انتظرج ع نار

حوراء.. رجعت البيت شويه امي زينه كايمه من فراشها ، جبت ويايه واجبات زمن ونطيتهم الها ، وكعدت سولفتلها ع سجاد والي سواه

زمن.. اي عيني غاب القط العب يافار يوميه تسوحلين بيه وبالولد ونمشي نص ساعه ، من غبت اخذتي راحتج ، اي عيني شحني التلفون بس خاف امج تشوفه شدكوليلها ؟؟

حوراء.. فدوة الاختي حبيبتي ،اني اروح اساعد امي وانت هنا تبقين هم درسين وهم تراقبين التلفون حبابه 🙏🏻

زمن .. امرلي لله ، ديلا روحي كملي شغل بسرعه وتعالي خاف سجاد يدك

سجاد.. ابويه كل ماطب للبيت ياكل راسي بالرزايل والحجي اقرة لاتلزم التلفون لاتطلع مخبلني ، مرات اتلاسن وياه ومرات اسكت ،
رجعت للبيت ستوني دااكل وطب الوالد يصيح ويغلط

ابو سجاد.. لك ابن القندرة البارحة ليش مارحت للأستاذ رحيم ،خابرني اليوم ويكول ابنك ميحضر  للمحاضرات واذا حضر يضل يسولف ويحشش ، ولك ليش مفشلني كدام العالم ،

سجاد.. اهوو شيخلصها اليوم اصلا هو يكرهني وكل ماروح لمحاضرته انعس من الفهاوة مالته ،خلي يطير وهو محاضراته

ابو سجاد.. ابن الكلب مدكلي شلون تنجح اذا انت لا تقرة ولاتكلف نفسك ،بكلشي طايح حظك بلا كولي بيش فالح حضرتك ؟؟ بقلمي ميديا الفهد

سجاد.. يابة رحمه المحمد عوفني ترة مالي خلك لا للدراسه ولا هم يحزنون ، كام يريد يضربني دفعته وطلعت اسمعه يغلط ويسب وامي تسكت بي

حوراء.. خلصت شغل البيت وكاعده يم التلفون انتظر سجاد يدك ، ورة شويه دك اووف گلبي طار ،،
الووو
الووو هلو ياعمري شلونج
الحمد لله انت شلونك
بخير مادام اسمع هل الصوت الحلو
شكرا
حور تحبيني ؟؟
هااا مادري
ولج بنت الاوادم صار سنه ومتدرين بلا شوكت تدرين بعد كم قرن؟
هههههه هاي شبيك سجاد والله استحي
تستحين مني ولج انتي الي المفروض متستحين وكلشي تريدي اطلبي مني ، اليوم اريد اسمع منج تحبيني لولا حوراء الله يخليج لا شلعين گلبي اصلا اني ضايج وهاج من البيت

ليش شصاير منو مضوجك؟
اكو غير ابويه عايف البيت كله واكفلي ع وحدة بكلشي يحاسبني ،

ميخالف اتحمل هذا ابوك ويريد مصلحتك صح عمو ابو عزيز عصبي وصوته عالي بس يحبك ، ماكو اب يكره اولاده

يمعوده والله مليت منه ومن الدراسه ومن البيت كله ، المهم لاتنهزمين من سؤالي يلا كوليلي احبك ريحيني فدوة العمرج

يعني قابل الحب بالكلام ، الحب بالفعل ،

يعني متحبيني كولي هيج وفضيها ، يلا اني رايح بلكي الله ياخذني وارتاح

يمعود هاي شبيك اوكف ،وبعدين شنو هل الحجي شنو الله ياخذني ،اسم الله عليك منو الي اذا صار بيك شي

لعد شسويلج كلشي اطلب منج بطلعات الروح يلا توافقين تشلعين گلبي وگلب الخلفوني ، يلا رايح مع السلامه

اوكف سجاد لاتسدة الووو الووووو 😕

زمن .. هااا ولج شبيج ؟

حوراء.. جنت احجي ويه سجاد وزعل وسده بوجهي ، يريدني اكوله احبك والله استحي يعني من اول مكالمه يريدني انطلق واحجي حب وغرام ، لو ادري مماخذة هل التلفون الفگر

زمن.. زين ليش مدزيله مسج وكليله احبك بالكتابة هم تستحين 😒

حوراء.. مادري ولج يكوم يتعلم عليه كل ميريد شي ومانطي يتزعل وانوب اني اتنازل ،

زمن .. دطيري الولد يموت عليها وهيه تتعيقل ، ادور كرامه هو بالحب اكو كرامه ، انطيني التلفون

حوراء.. جرت زمن مني الموبايل وكتبت مسج ،طبعا اني مقبلت وردت امنعها بس صلفه مينكدر عليها

سجاد.. صرت نار سديته بوجها ورحت يم صديقي شويه وجاني مسج فتحته

✉ هلو سجاد لاتزعل مني حبيبي والله اني احبك ❤

فتحت  عيني حيل ممصدك معقوله هاي حوراء لو داأتخيل ،
طلعت برة واتصلت عليها

حوراء.. اول مارسلت المسج راساً إتصل عليه ، اويلي شنو هل الفشله
الوووو
ولج هلا وغلا بروحي وحياتي وعمري ، ولج هاي صدك دزيتي هل المسج لو اتخيل ؟

اي صدك قابل اتشاقه وياك ، بعدين انت شلون تسد الخط بوجهي ؟

اسف ياعمري اول واخر مرة شعندي غير حور اني انطيها عمري كله وبعدني مقصر

اسم الله ع عمرك ،يلا سجاد اروح ادرس صار اسبوع ماقارية شي ،مع السلامة
مع السلامة حبيبتي ،، #قصص_من_حياتناM&T

حوراء.. عزة ولج معقوله كلمه وحده هيج تغير وتگلب الحال ، هستوه جان زعلان ومطنگر فجأة هيج صار ،

زمن.. بابا لعد شعبالج بالكلمة الحلوة تكسبين بيها أكبر واحد ، بس انتي دفشه ومتعرفين تصرفين ،

حوراء.. بقيت افكر بكلام زمن وكلت صدك اني مااعرف احجي واتصرف ، يلا منا وهيج اتغير الخاطر سجودي

وره ايام كاعدين اني وزمن العصر تقريبا ب6 ندرس ، اندك الباب زمن راحت فتحته ،

زمن.. اندك الباب فتحته طلع ابو سجاد ، كالي ابوج هنا ، كلتله اي عمو هسه اصيحة

حوراء.. منو بالباب ؟
زمن .. ابو الحب 😂

ابو حوراء.. نايم ستوني راجع من الشغل واجتني زمن كعدتني ،
زمن.. بابا هذا ابو عزيز بالباب يريدك ،

ابو حوراء.. اويلي صار واحد بالشهر واني لهسه ممكمل فلوس الإيجار 😔
طلعت سلمت عليه ، ومااعرف شكوله،

ابو سجاد.. شلونك ابو زيد ، شلون صرت ان شاء الله احسن

ابو حوراء .. الحمد لله ،هذا امر الله ولا  اعتراض على امره،
ابو عزيز والله مااعرف شكولك ، بس فلوس الإيجار لهسة مكملن ، انت اعرف بظروفي

ابو سجاد.. والله شكولك ابو زيد بس اني هم عندي التزامات ومصاريف الولد والبنات ومدارسهم، بلكي تكدر دبرلي الفلوس منا لبعد عشرة ايام

ابو حوراء.. اي حقك ان شاء الله ادبرهن واجيبلك ياهن

حوراء.. بابا دخل ضايج ومهموم، كلتله شبيك بابا كال ، ماكو شي بس حسيت نفسي صغير من حجيت ويه ابو عزيز وكلتله ماعندي هسه، و الرجال حقة قابل يكعدنه بيته بلاش،

زمن.. شدعوة عليه خلصت الدنيا قابل ، تف شكد مزعج ابو فليس ،ماكافي عليه كل فترة يزيد علينه الاجار،

حوراء.. انقهرت ع أبويه شلون مكسور ظهره بالعيشة ومديدبرها اوف لو اني ولد جان هسه مو طلعت واشتغلت وساعدت ابويه ، ربي ليش خلقتني بنية 😢

سجاد.. بقيت احجي ويه حوراء بالتلفون واحسها بدت تتغير للاحسن ،
دكيت عليها ،جاوبتني بس صوتها مو طبيعي

حبيبتي حور شبي صوتج شنو مريضه ؟
لا مابيه شي بس شويه ضايجة
بداعتي عليج كولي شبيج

سجاد.. احجي وياها ومتقبل دكول شبيها واسمع اختها تكول ، كوليله شبيج ، خلي يعرف ابوه الجشع

حوراء.. احجي ويه سجاد وزمن نبصت روحها، وكامت تحجي، صح گلبنه محروك ع ابويه بس مو معناها تحجي ع ابو سجاد كدامه ، ركعتها بالكتاب وسكتت

سجاد.. زمن احجي هاي شبيها زمن شنو منورة ابويه، فهميني

حياتي والله ماكو شي معليك بزمن هاي زعطوطه متعرف تحجي

باعي تحجين لو هسه اجي لبيتكم واعرف شسوي يلا بسرعه احجي وخلصيني شبي ابويه؟

مابي شي بس اجة قبل شويه وراد فلوس الإيجار وبابا كاله ماعندي وابوك كاله منا لعشرة أيام دبرلياهن واني نقهرت ع بابا

يعني هيج الموضوع ، صح تصرف ابويه غلط بس مو معناها اختج تتجاوز عليه ودكول جشع ، عرفوا شلون تربونها

سجاد هاي شبيك ع كيفك ماكو داعي هل العياط واختي متربيه الحمد لله اعرف شلون تحجي

شنو قصدج اني مااعرف احجي بس الظاهر انتو مو مال احترام ، وخاي اختج اطيح حظها اذا سمعتها تتجاوز انوب عليه المزعطه ، بقلمي ميديا الفهد

اشكرك ع هل الكلام واعتذر مرة ثانية الك والابوك بس هو الفقير هل ايام الكل يدوس عليه ولازم ميحجي ويشكي لان مو مال احترام  ، ع كلاً تعال باجر اخذ تلفونك وخلف الله عليك ماقصرت،

انتي شبيج لج معقوله ع مود وحده جاهله تنهين كلشي، وخلي الج التلفون ممحتاجة اني

اني مانهي كلشي ع مود اختي بس انت مشفت نفسك شلون تعيط وتشمر بالحجي ، واني اول محجت ضربتها وسكتتها واعتذرت منك، بس انت مادري شبيك عبالك متحمل عليه وانفجرت اول مسمعت زمن ،سجاد روح الله يخليك ترة ماكدر احجي ، وسديت الخط

سجاد.. سدت الخط بوجهي اليوم انعل والديها 😠😠

……………………………………………………………

شنو رأيكم بالبارت وتوقعاتكم شنو راح يصير ،، لاتنسون علقوا ولاتسون الايك ،
قراءة ممتعه الكاتبة #ميديا_الفهد

ملاحظة ذمة بركبته الي يشيل اسمي واسم البيج ،لان اتعب واكتب ويجون ع الحاضر يخلون اسمهم