رواية مرج البحرين يلتقيان الفصل الرابع عشر 14 - بقلم ★الكَاتِبَة غَيَاهِبُ★

السلام عليكم و رحمة الله و بركاته

احممم حبيت انهي الروايه على خير لان اذا استمريت بكتابتها اقسم بالله راح اموت واحد 😂😂🤍

╔══ஓ๑♡๑ஓ══╗

كعدنا ثاني يوم تريكنه و الحمدلله اتصل علي باسم

باسم: السلام عليكم

صادق: وعليكم السلام

باسم: صادق تعال للجامع الي دائما نكعد بي

صادق: جايك

كمت لبست دشداشتي و طلعت ركبت سيارتي لان الجو يصمط مو مال امشي اخيرا وصلت نزلت و دخلت للجامعه باوعت للزويه الي دائما نكعد بيها

صادق: ها شلونك؟

باسم: بخير الحمدلله،  صادق؟

صادق: ها؟

باسم: انتَ تتذكر الي صار صحيح؟

صادق: شنو بالضبط؟

باسم: سفرتنه للمزرعه

صادق: اي اي

باسم: احمم انتَ تدري حسن يريد ساره؟

صادق: صحيح

باسم: و اني راح انطيها لان هيَ تكول اردي اتزوج و بعدين اكمل جامعتي

صادق: الموضوع راجعلها

باسم: عوفها هيَ و حسن اريد شي منك

صادق: كول

باسم: اريد اتزوج اختك على سنة الله و رسوله

صادق: باسم

باسم: والله اريدها على سنة الله و رسوله و ابدا ماراسلتها ولا سويت وياها مكسوره و اصلا انتَ جبت طاريها هواي كدامي و اصلا شفتها بالمزرعه بس والله شلت عيني بسرعه و حتى ما فكرت بيها غير و هيَ على اسمي

صادق: مادري راجعلها

باسم: خليها تصلي استخاره

صادق: ان شاء الله

سكتنه و صار الوضع هدوء باوعت عليه لكيته مدنك راسه و يلعب بالسجاده

صادق: راح اروح اني

باسم: الله وياك

صادق: تعال اوصلك

باسم: لا اريد اصلي هنا

صادق: براحتك

طلعت و توجهت للبيت دخلت و صحت نرجس و اجتي

صادق: زينب وين؟

نرجس: جاي تلعب ويا علي

صادق: نرجس تعرفين صاحبي باسم؟

نرجس: بلي مو هوَ هذا الب شوالنا بالسفره؟

صادق: اي هوَ

نرجس: شبي؟

صادق: يريد زينب

نرجس: ماعرف والله غير تسئلها

صادق: كليلها و هم خل تصلي صلاة الاستخاره

نرجس: تمام

صعدت بتعب على الدرج لحد ما وصلت لغرفة علي الدُر طبيت لكيتها وحدها كاعده تلعب بالموبايل و علي نايم

نرجس: زينب

زينب: همم؟

نرجس: اردي احجي وياج بموضوع

زينب: اي كولي

نرجس: تعرفين صديق اخوج باسم؟

زينب: اي؟

نرجس: طلب ايدج من صادق و يريد يعرف علمود نرجع للبصره و يتقدملج يم بابا

زينب: هاه؟ ماعرف

نرجس: كومي صلي ستخاره

زينب: خايفه

نرجس: صفي ذهنج و كومي

كمت توضيت و فرشت سجاتي و صليت من خلصت حسيت براحه بس مو ميه باليمه عدتها و عدتها لحد ما صارن اربع مرات باوعت لنرجس و كلت بخوف

زينب: كلهن مرتاحه بيهن

نرجس: باجر هم صلي و عكبه لحد ما يروح هذا الخوف

زينب: ماشي

فعلا مر يوم و يومين لحد ما زينب بنفسها حاجت صادق و الان نتوجه للبصره بعد فتره دخلنه و سلمنه و عتاب و الحمدلله الجد مهدي وافق و بالليل جنه كاعدين و زينب جانت لابسه عبايتها و متانين شوكت يصيحون علينا

وفاء: يُمه نرجس كومي صيحي زينب

نرجس: ماشي

كمت و صحت زينب بعد عشر دقايق اقنع بيها تدخل يلا دخلت و بيدها العصير وزعت و كعدت بصف صادق و اين رحت كعدت بصف امي

عماد: احممم اي شلونك باسم شخبارك

باسم: الحمدلله بخير انتَ شلونك؟

عماد: بنعمه

باوعت عليه طلع السلاح و حطه كبال باسم و ضحك باسم

باسم: اي؟

عماد: اي؟

صادق: والله لو تسكتون فشلتونه

حجي جواد: والله صحيح، احمم جاينك حجي مهدي نطلب ايد بنتك زينب صاحبة الصون و العفاف لابني الساقط باسم

ضحكنه على شقاوت حجي جواد

مهدي: نتشرف بيك حجينا و انتَ عشرة عمر

ضحكنه و قرينه الفاتحه الموضوع جان مفتوح بس مو بصوره صحيحه و جان عبالنه شقه

عماد: حجي شوكت تخطبلي؟

مهدي: حرك نفسك

عماد: كملت بيتي اريد مره

نرجس: اي اخذ ملاك

حجيتها و دخلت ملاك و الكُل باوعلها

صادق: الخير بذچره

ملاك: على شنو جنتو تحجون؟

نرجس: عماد يريد يخطب

باوعت عليها و هيَ تباوع لعماد بقهر

ملاك: اي منو؟

نرجس: انتِ

عماد: نرجس اسكتي بعد اخيج

ضحكت بهدوء و سكتت و كعدت ملاك بخجل بيناتنه لحدما خلصنه

مهدي: سوولنا چاي

زينب: بابا مو هذا عصير

مهدي: بنيتي اريد چاي

زينب: تمام

كلتها و طلعنه كلنا اني و نرجس و ملاك هم كعدنا بالمطبخ

زينب: اعتبر خطيبته؟

نرجس: لا بعد عقد القران

ملاك: امم صحيح

زينب: نرجس

نرجس: ها؟

زينب: الزواج حلو؟

نرجس: ويا اخوج اي

زينب: دكولي ولعباس؟

نرجس: ولعباس

زينب: يالذكيه اقصد من ناحية انتِ شايله بيت

نرجس: مادري

زينب: شوف اني اسئل منو

ملاك: باسم خوش ولد اكيد راح يدللج

زينب: احسه عصبي

ملاك: اركصيله

زينب: ماعرف

نرجس: ماعتقد يحتاج انتِ بس كليله بسومي

ضحكنه و اني صبيت الچاي و دخلته ملاك الهم و احنه كعدنه بالصاله الثانيه نحجي

نرجس: اجلو العرس خل اجيب

زينب: شعلي اني

نرجس: لعد شنو البس؟

ملاك: اكو بغداد هواي محلات تبيع للحوامل

زينب: ملاك منين تجيبين فستانج؟

ملاك: من باغي

زينب: لا عليج الله منين؟

ملاك: منا ماعندي احد ياخذني لبغداد

نرجس: ليش عماد ياخذج

ملاك: عماد يصير ابن عمي شلون ياخذني؟

نرجس: اخذي امج وياج

ملاك: اممم ماعتقد ترضى تجي

نرجس: ربج يسهلها

كعدنا نحجي لحد ما صاح صادق

صادق: نرجس

نرجس: ها؟

صادق: يلا خل نرجع

نرجس: مابيه حيل خل نبات هنا؟

صادق: شلون هنا لا خل نرجع

نرجس: لخاطري

صادق: اوففف يلا ميخالف

كملت كعدتي ويا البنات و صدفه اجه الكلام على حملي

ملاك: صدك يا شهر انتِ؟

نرجس: نكدر نكول الثاني

ملاك: بالضبط؟

نرجس: لا بعد كم يوم

ملاك: اممم الله يتمملج على خير

نرجس: تسلمين عمري

كملنا سوالفنه و جتي سالفه على سالفه لحد ما حسيت نفسي خلاص تعبت اريد انام تمددت و نمت و هنا ضلن يحجن فزيت على صوت طفل

علي: ماما

نرجس: ها حبيبي؟

علي: بابا يكول خل تجي اريدها

نرجس: جايه

كمت لبست حجابي و عباتي و نزلت لكيت صادق كاعد و بحضنه علي كعدت بصفه

نرجس: بيش الساعه؟

صادق: 2بالليل

نرجس: علي شتندك كاعد لحد هسه؟

صادق: بقى يمي

تثاوبت بخمول و صفنت

نرجس: ليش كعدتني؟

صادق: شو صايره كسوله؟

نرجس: شنو تريدني اللعبلك ضغط مثلا؟

صادق: لاحبيبي بس اقصد خل نحجي صار هواي ما حاجي وياج

نرحس: احجي حبيبي خايني؟

صادق: لا والله شبيج اقصد خل نتعرف على بعض اكثر

نرجس: اممم يلا

صادق: اني اسمي صادق مواليد 1990 احب القراءه و هم احب اقره لمجالس الحُسين استاذ جامعي بمحرم اخدم عندي موكب اسمه(نور من المهدي عجل الله فرجه) و هم اني من مواليد البصره بس شغلي بغداد احب الاكل و الحلويات هم

نرجس: اني نرجس مواليد 2001 احب الاكل و النوم و السهر و احب دراستي طالبة طب صارلها مأجله الدراسه سنتين بسبب زواجي منك و احب الحلويات كُلش هواي و هسه اشتهيت ككو بالفستق و هسه حبيبي صادق يروح يجيبلي مثل الملاك لان اني حامل و جاي اتنسه

صادق: هوَ صوجي اني كعدتج امشي بابا نروح نجيبلها ككو بالفستق و افررك البصره

كمت و اني شايل علي و رحنه للسياره و بديت افر البصره احد ما لكيت سوبرماركت مفتح جبت الككو و شويه حشبكلات هم و رجعت من رجعت شمرتهن بحضنها و صعدت اني و ابني و هيَ ورانا تاكل بالككو هيَ طبت للبنات و اني طبيت لغرفتي

ملاك: ولج منين جبتي هاي الحلويات؟

نرجس: صادق جابهن الي

زينب: الله يرحم جنت اتوسل بي يجيبلي وسفه على هيج خوه

باوعتلها و انطيتها العلاكه

نرجس: هاج جابلجن هذني

ملاك: هلا بابن العممممم

زينب: كافي لواكه و اكلي و فضيني يا لون تجيبين؟

ملاك: مادرييي اردي اجيب ماروني

زينب: صدككك نسيتت سارهههه دكو عليها

نرجس: اني عندي رقمها

دكيت عليها و شويه و جاوبت بصوت نعسان

سارة: الو؟ السلام عليكم

نرجس: حبيبي وعليكم السلام بس صحصحي

سارة: شكو؟

نرجس: يا لون فستان راح تجيبين؟

سارة: طبعا لان اني اخت العريس فا راح اجيب ذهبي

زينب: و اني شنو البسس؟

سارة: البسي ازرك فاتح

زينب: اممم لا ما اطلع حلوه بي اني راح اجيب ذهبي و انتِ جيبي غير لون

سارة: اجيب بنخضري؟

نرجس: اي حلو

طكيناها ضحكه كُلنا لحد ما قررن سارة تلبس احمر و ملاك تلبس وردي و اني البس اسود و زينب تلبس ذهبي

صبح علينا الصبح و احنه ما نايمين صفنت عليهن

نرجس: اريد انامم

زينب: ما تنامين ياهو كاضج؟

نرجس: اويي وخريي

وخؤن و نمت اني كعدت على ايد تمسح شعري فتحت عيني لكيته صادق

صادق: صباح الخير

نرجس: صباح النور

صادق: انزلي تريكي

نرجس: تريكت؟

صادق: لا متاني مرتي تسويلي

ضحكت و كمت اسوي الريوك وره ما لبست ملابس يو العبائه لان جوه جان الكُل موجود عماد اخو صادق

ملاك: نرجسسس

نرجس: ها؟

ملاك: ولجج بالغلط كلت اريد اجيب فستان احمر و عماد من يمه كب و كال لا

نرجس: صدك تحجين؟

ملاك: اي والله

نرجس: هسه غير يخطببب

ملاك: لوح ثلج مايحس

نرجس: الله كريم

زينب: بناتت عماد يكول اللون الذهبي مو حلو

نرجس: شنو سالفة لعماد اليوم؟

زينب: والله راح ابجي

نرجس: استهدي بالله شبيج جيبي ذهبي يلوكلج مالج دخل بي

سارة: ولجننن تخططن بدوني؟

نرجس: لا والله اني ولا خططت لشي

سارة: اممم عبالي

جابت ملاك مي لسيارة لان هل مره اجتي ويا امها و ابوهم و ابدا ما لمحنه باسم اني و ملاك نباوع لسارة حتى تحجي بس سارة مغلسه

ملاك: ساره ليش ما اجه باسم؟

سارة: هسه يجي وين يروح بس كال حسن صديق باسم يريده و هم راح يجي وياهم صديق حسن فا اذا تردن تسون چاي كثرن

ملاك: تمام همزين حجيتي جنه مسوي بس على العدد

حطينه الچاي على النار و صدك ما مرت ساعه الا و الباب يندك شفت صادق كام يفتح الباب و من فتحه طلع حسن و باسم

باسم: صادق

صادق: هلا ادخل

باسم: لا مو جايب صديقي وياي

صادق: حسن؟

باسم: لا رضا

صادق: هلا بي خل يتفضل

حسن: مايريد يدخل يكول خاف اسوي زحمه

رجعت لبست شحاطتي وطلعت  باوعت لكيت ولد طويل رزن مدنك راسه متجي على السياره

صادق: الله بالخير

رضا: الله بالخير و العافيه

صادق: تفضل جوه حاره هنا

رضا: لا والله مادخل

صادق: شنو ما تدخل تضل وحدك؟

رضا: اعذرني

تجاهلت كلامه و سحبته من ايده  ودخلنه للبيت

رضا: السلام عليكم

الكُل: وعليكم السلام

حجي مهدي: هلا بكُل خطار نسيبنه

حسن: و اني شنو حجينه؟

حجي مهدي: انتَ وليدي

حجي جواد: هلا بويه شنو اسمك انتَ؟

رضا: هلا حجينه اني اسمي رضا

جواد: اي شنو تشتغل عرفنه على نفسك؟

رضا: نقيب

جواد: امم و النعم منك و من شاربك

صادق: اجيبلكم چاي

صادق: نرجس حضرتي چاي؟

نرجس: اي اي هاك اخذه

ابتسملي و شاله و طبلهم وزع الچاي و رجعلي الصينيه

كعدو و اني طبيت لغرفة عمتي بديت انظف بيها لحد ما سمعت صوت زينب تصيح علي

نرجس: ها زينب؟

زينب: صادق يكول خل تضم ذني

باوعت لكيتهم المحفظة مالته و السويج اخذتهن و ضميتهن يمي و رجعت اكمل بالاخير عطرت الغرفه و طلعت

وفاء:بنيتي تسلم ايدج

نرجس: لا عامه عادي تردين بعد شي؟

وفاء: بس اريد تجيبيلي موبايلي اتصل على سناء

ضحكت و جبتلها الموبايل و رجعت انطينه و طبيت للمطبخ كعدت ويا البنات لحد ما دخل صادق

صادق: نرجس اريد السويج و المحفظه

طلعتهن و انطيتهن اله

صادق: اخذتي الخرده؟

نرجس: لا

طلع حمره و هم انطاني الخرده ووطلع

باوعت للبنات و اني اكللهن بغرورو

نرجس: اليوم نمنميات عليا

زينب: اويلييي راح ادلعنه اليوم

ضحكنه و فعلا الكُل بات و رضا كوه خلينا يبات يمنه بعد ما حلف صادق ما يعدي باب البيت حاليا هما طالعين بره يتونسون و اني و البنات بالغرفه مالتي نشوي مكياج و مشغلين اناشيد و نضحك و متونسين

نرجس: و اذا البحرين يلتقيان نتيجة لؤلؤ و مرجان و جبريل بسماء يصيح يامداحح غنيليي

زينب: صحت يطيور غنيلي و على عشك الذهب ميلي

ملاك و سارة: صحت يطيور غنيلي و على عشك الذهب ميلي

ضحكنه و جانت اجواء تجنن مليانه فرح

تمشي الايام لحد ما صار موعد عقد قرأن زينب و سويت نفس الي سويته و قريتلها دعاء الميامين و اني ابجي بفرحه و هم هلهلنا كُلنا بفرحه و سعاده

اني جنت لابسه الفستان الاسود و عباتي بيدي خاف يطبون الولد و فعلا طبوا و صادق باوعلي و اني اصلا جنت لابسه الحجاب و بس لبست العبائه و زينب ماجان احد غريب طب للغرفه دخل بس عماد و صادق و باسم علمود يلبسها الذهب و بعد ما طلعو رحت للمطبخ  و لكيت حسن حمدت ربي جنت لابسه العبايه اخذت الي اريده وطلعت رحت و انشغلت ويا زينب و باسم

ضليت صافنه و حسيت بعطش رحت للمطبخ جنت لابسه فستان وردي طويل و محتشم مايبرز اي شي و لا حاطه مكياج و لابسه حجابي دخلت للمطبخ و لكيت حسن دنكت راسي بخجل و اخذت  كلاص مي بهدوء

حسن: ما حجيتي ويا اهلج؟

سارة: على شنو؟

حسن: وعلي رايدج

سارة: خل اخلص كليه

حسن: تعالي بيتي و خلصيها

سارة: مايحتاج شفت شلون نرجس كعدت من الجامعه بسبب الزواج اذا صدك تحبني اخطبني و ها هيا

حسن: ماشي هسه احجي وياهم

طلع و اني ردت اوكع من اخوف و التوتر و فعلا حسن سواها و حجه ويا ابوي و شفت ابوي يباوع عليه و هز راسه

جواد: الك

حسن: اشكرك عمي و اوعدك احطها بعيني

جواد: تكمل دراستها و اخذها

حسن: اريد اخطبها

جواد: تمام شوكت ما تريد تعال و اني اخطبها الك

الكُل دره حسن لسارة و سارة لحسن و كُلنا فرحنه و صارت الفرحه فرحتين تمر الايام و اني صرت خطيبة حسن بس هو لا انطاني رقمه ولا شي بقينه غُربه لحد ما اخلص و اصير مرته بالحلال
اما عن زينب و باسم
اكتفو بس بالعقد قران و زينب رفضت تسوي عرس و تحط بي اغاني فا راحو لمدينة الزائرين بكربلاء و وره اسبوع هم يروحون للرضا

فعلا مر اسبوع و حضرو الجنط متجهين لانيس النفوس

ملاك: ادري شوكت اتزوج؟...

نرجس: الله كريم

صادق: نرجس حبيبي حضري چاي راح يجيني حسن و رضا

نرجس: تمام

بديت احضر الچاي الهم و هم اني مسويه كيك بس صفنت و تذكرت بنيه بالحفله حضرت كُلشي و ركضت جبت موبايلي و السيمكارت الي صار بي العرس ضليت ادقق بالفيديوهات لحد ما ركزت و لكيتها بنيه لطيفه و جانت لابسه لبس محتشم و لطيفه جدا

نرجس: ملاك تعرفيها هاي منو؟

ملاك: وينها؟

راويتها الفيديو و هيَ دققت

ملاك: اي هاي جانت جايه ويا رضا صديق صادق

نرجس: جذابه؟

ملاك: وعلي

نرجس: اريد اتعرف عليها مبينه لطيفه

ملاك: اسئلي صادق

نرجس: تمام

كمت كملت الچاي و دكيت الباب على صادق و طلع صادق

نرجس: صادق

صادق: عيوني

نرجس: سالمه عيونك اكلك اريد اعرف رضا عنده اخت؟

صادق: اي اجتي بالعرس

نرجس: امم تمام

طبيت و كلت لملاك الي كاله صادق ضلينه نسولف على العرس و شلون جنه فرحانين خلص اليوم و اني مشتاقه لزينب بس ماكدرت اتصل عليها

تمر الايام و جان يرجعون من الرضا و ستقبلناهم بالهلاهل و الچوكليت

بعد مدة من الزمن صارت اكو حفلة لبنت عم صادق و كُلنا رحنه نبارك و جان اكو ولد انعجب بملاك

حمزه: احمم انسة ملاك

ملاك: نعم؟

حمزة: منو والدج؟

ملاك: حجي قاسم هذاك ليش؟

حمزة: الصراحه انعجبت بيج و اريد اخطبج

سكتت اني و هوَ راح و فتح الموضوع ويا ابوي بس الحمدلله جانت كعده عائليه و الابنيه انزفت لبيت رجلها و ما نسمع غير ضربه قويه و صياح باوعنه من الشباك تماد كاض حمزه و يكتل بي بوكسيات و صادق يريد يخلص حمزه منه ماكدر لحد ما اجه رضا و سحب عماد بقوه

عماد: اكص لسانك يا نكس

حجي مهدي: عمادد اسكت

سكت عماد و عافهم و طلع ركب سيارته و لحكه صادق و رضا ضل يهدي الوضع ويا باسم و حسن و احنه ميتين خوف

نرجس: يمهه هذا شنو سوه

ملاك: يمهه ثور

سارة: يمهه شو هذا يخوف من يعصب

زينب: اي عماد مو مثل صادق عماد عصبي

نرجس: اي مو مثل رجلي

كعدنا ساكتين و ملاك بدت تبجي من الخوف خاف ابوها عبالها اكو شي بينها و بين عماد

ملاك: والله راح يشك بيه ابوي و اعرفه

نرجس: استهدي بالله مايصير شي بس اهدائي

ملاك: هذا كله من وره الغبي عماد

زينب: احترميني عاد

ملاك: اسفه بس تصرفاته تكول بينا شي

سارة: ماكو شي و سوء تفاهم

__
رحت وره لحد ما وكف السياره على الكورنيش و اني هم وكفتها و نزلت

صادق: انتَ صدك تحجي؟

عماد: احبها و ماريدها لغيري

صادق: تخطبها مو تتعارك و توكف قسمته

عماد: قمسته وياي اني الها و هيَ الي و ماتصير لغيري

صادق: انچب مو بكيفك

عماد: وحق ابو فاضل احرك الكون

صادق: استغفرالله ابويه اهداء الموضوع مو هيج

عماد بعد ما دمعت عيونه و اصلا عيونه صارن حمر
: والله احبها و اريدها

صادق: روح و حاجي ابوها مو تضرب الولد

عماد: اصلا جان غاثني من اول العرس

رجعنه للبيت و لكينه حجي قاسم ماخذ ملاك و راجعين لبيتهم باوعت لعماد بعتب و فعلا ضل شهرين ملاك ما جايتنه جانت بالعادة تجي و تبات لو نرجس موجوده راحت زينب لبيت حجي جواد ويا ساره و نرجس ضلت وحده بالبيت مكضيتها على الموبايل و علي الدُر وين ما اروح يروح وياي

نرجس: ملاك ليش ماتجين والله ضجت و صادق يريدنه نبقى هنا لحد ما اجيب

ملاك: ماكدر ابوي حلفني بعد ما ادخل لبيتهم

نرجس: ولج راح اموت من الوحده

ملاك: صدك يا شهر صرتي؟

نرجس: الرابع

ملاك: امم الله يتمملج على خير

نرجس: شكرا حبيبي يلا مع السلامه

ملاك: الله وياج

دخل علي صادق و اني باوعتله

نرجس: جيب امي

صادق: ليش؟

نرجس: ماعرف اكعد وحدي هنا و شوف بطني شكبرها صايره

صادق: امم بعدين نشوف الموضوع

نرجس: تره راح ادخل الشهر الخامس

صادق: اعرف

نرحس: جذاب

صادق: راح اظخلين الشهر الخامس بعد اسبوع

نرجس: صحيح

ابتسمت: حبيبي والله مهتم الج و احبج

نرجس: عبالي

ضحكت و طبيت اسبح خلصت و طلعت بديت اقره زيارة عاشوراؤ و اني حاط ايدي على بطن نرجس و هيَ غفت

رفعت ايدي و بديت ادعي

صادق: يارب بحق فاطمة الزهراء تكوم الي نرجس بخير و سلامه يارب عينها يارب

لميت مصلايتي و تمددت و نمت كعدنا على بوسه من علي الدُر

علي: بابا بابا بابا

صادق: هممم

علي: بابا عمو عماد يكول تعال اريدك

صادق: نازل

كمت غسلت وجهي و لبست دشداشتي و نزلت لعماد

صادق: صباح الخير

عماد: صباح النور

صادق: خيرك؟

عماد: اليوم اخطب ملاك

صادق: شنو؟

عماد: مثل ما سمعت و ابوي موافق

صادق: شوكت؟

عماد: اليوم بالليل

صادق: على بركة الله

سكتنه و بعيدن باوعت عليه و طبطبت على ظهره عفته و صعدت كعدت نرجس

صادق: نرجس

نرجس: همم؟

صادق: كومي حضري روحج

نرجس: وين؟

صادق: راح نخطب لعماد

نرحس: منو؟

صادق: ملاك

نرجس: شنووو؟ كول وعلي؟

صادق: وعلي

كمت و طلعت ملابسي و ملابس صادق و دشداشة علي الدُر

مر الوكت و اني كملت تنظيف البيت و فعلا بدلنا و رحنه لحجي قاسم و دخلنه

حجي مهدي: والله يا حجي قاسم اني اعتذر عن اخر مره ب ساليوم جايين و املنه بالله و بيك نخطب الانسة ملاك لعماد على سنة الله و رسوله

حجي قاسم: هلا و مية هلا و الابنيه بنتكم بس اني عندي شرط تخلص تعليمها و تكض شهادتها بيدها و تاخذون الابنيه

حجي مهدي: حقها

صفنت على صادق و همستله

: لو ادري جان اني هم كتلك اخلص دراستي

صادق: حبيبتي انتِ مرتي و اصلا ماتحتاجين الشهاده

نرجس: ليش؟

صادق: لان بعون الله تبقين مرتي لاخر نفس بيه

نرجس: تعرف شلون تسكتني

ضحكنه و قرينه الفاتحه و وره فتره تصير الخطوبه يعني وره شهرين لان عدها فتره مراجعه و امتحانات ملاك نفس سارة هم اول مرحله جامعه

وره فتره رحنه للدكتوره علمود نعرف جنس الطفل و اكتشفنه هاي تكون بنيه فرحت كُلش

علي الدُر: بابا عادي اسميها؟

صادق: ماعرف احجي ويا امك

نرجس:اي بس كلي اول شنو تريد تسميها؟

علي الدُر: دُره

ضحكت و كلت: ليش شمعنى دُره؟

علي: لان اني اسمي علي الدُر فا هيَ تصير دُره نفس اسمي تقريبا

نرجس: ها هيا دُره

ضحكنه و انتهى اليوم تمر الاشهر لحد ما صار شهرين و رحنه رسميا خطبنه ملاك لعماد و اني دخلت بشهري السابع و جنت كُلش اتوجع و بطني صارت چبيره و هم صرت امشي نفس البطه و تحدد موعد عقد قرأن عماد و ملاك و بنفس اليوم سارة و حسن

جان بعد شهرين و جنه مطمنين لان الدكتورة كالت ما اجيب اول ما ادخل للتاسع راح اطول لذا ما هتمينه هواي تمر الشهرين و اجه يوم العقد قرأن و الحمدلله عده على خير بس بالليل بديت اتوجع حيل كعدت صادق

نرجس: صادق

صادق: ها؟

نرجس: جاي اتوجع حيل

صادق: شنو اسوي؟

نرجس: مادرييي ويديني للمستشفى راح اموتت

ضليت افتر بالغرفه و اني تايه مدري شنو اسوي لبست شحاطتي و شلتها و نزلت بيها لجوه و بعياطها كعدت الكُل حطيتها بالسيارة و صعدت بصفه ملاك و اتوحهنه للمستشفى و اني ادعي ربي تعدي سلامات دخلنه و جابت طبيعي الحمدلله بعد مدة طلعوها بنيه بغاية الجمال سبحان الي خلقها شعرها على امها احمر و بيضه و هيَ اصلا طلعت تصرخ كعدت بالكاع من التعب حسيت روحي رجعتلي بعد ما هديت و الكُل باركلي رحت لنرجس و بس ايدها

صادق: مبارك حبيبي

نرجس: الله يبارك بيك

عدت الامور على خير و رجعنه للبيت طبينه و الحمدلله سلامات

ثاين يوم اجه رضا و اخته ويا و الكُل جان موجود حسن و سارة و زينب و باسم و العائله كُلها حتى امي كعدنا باجواء عائليه لحد ما طبو عائله صادق عمهم الصغير (ابو حمزه) ليث

ليث: مبارك عليك صادق ان شاء الله الذريه الصالحه و تشوفها عروسه

صادق: الله يبارك بيك عمي

حمزه: مبارك صادق ان شاء الله تتربه بعزك

صادق: الله يبارك بيك

كعدنا و عماد سلم على حمزه و حمزه ضحك و رجعنه سويه مثل العائله و اكتشف حمزه ان ملاك مُجرد اعجاب و راح لكن من شاف ضُحى كلبه بدا يدك بقوه و الكُل لاحظ نظراته و شلون يتجنبها

عماد: ها خويه؟

حمزة: لا ماكو شي

عماد: امم تمام تردي مي؟

حمزه: اي رحم الله والديك

انطه عماد مي لحمزه و جنه نضحك و فرحانين لحد ما حمزه كال: اعذروني لاوم ارجع للشغل

رضا: شنو تشتغل؟

حمزة: عندي محل عطور

رضا: امم

حمزة: تعال و عطرك على حسابنه

رضا: وين هنا لو بغداد؟

حمزه: عندي ثنين بس هنا اني الي اديره و بغداظ عندي صاحبي هوَ الي يديره

رضا: ان شاء الله

طلع حمزه و رجع الكُل لبيته

__

باقر: زهراء بابا زهراء تعالي

زهراء: ها بابا؟

باقر: تعالي بنيتي 

كعدتي يمه و بدا يسولف وياي

باقر: بويه انتِ السنه الي تجي تره وزراي؟

زهراء: اي باب اعغف (اعرف)

باقر: اي بنيتي سادس هذا مو لعبه ارديج اطلعين معدل

زهراء: ماشي بابا اطلع ان شاء الله

باقر: عفيه ببنيتي

ضليت كاعده يم بابا لحد ما كال

باقر:: اليوم عزمت النقيب الي ساعدج رضا

زهراء: اي

باقر : كومي ساعدي امج بالمطبخ شوي و يجي تره

كمت و ساعدت ماما لحد ما كملنه و فعلا اجه رضا و دخل و معد ويا ابوي و اتعذر على التاخير لان عساس جان يم صاحبه اجته بنيه و راح يباركله هوَ و اخته و همين رجع اخته للبيت فا اتاخر

زهراء: ماما

سُعاد: ها ماما؟

زهراء:  ليش بابا عزمه؟

سُعاد: هوَ اصلا من رجعج النا و ابوج يقنع بي يجي

زهراء: تمام

كملنه صب و وديت السفره اني لان بابا ميكدر بس كام رضا و بدا يساعدني و ياخذن مني الصينيه

باقر: والله مادري عود عازمك بس جاي اخليك تكوم

رضا: على بهتك حجينه ميخالف اني مثل ابنك

باقر: والنعم من شواربك

كملنه و بدو ياكلون

رضا: ليش الاهل مايجوني اكلون ويانا؟

باقر: بنتي تستحي

رضا: صيحهم خل ناكل سوه

باقر: بابا زهراء تعالي

طلعت بتوتر و فركت ايدي

زهراء: ها بابا؟

باقر: تعالي اكعدي نتعشه سوه

كعدت بهدوء و بدينا ناكل باوعت لرضا بتوتر لكيته يباوعلي و مانزل عينه

رضا: بيا صف؟

زهراء: سادس اعدادي

رضا: امم شاطره؟

زهراء: اي

باقر: بنيتي الشاطره

رضا: الله يحفظها

سكت شوي و بعدين حجه

: يعني عمرها 17؟

باقر: اي

كمت و اني اكول: غاح اكوم اسوي چاي (راح)

دخلت للمطبخ بتوتر و خجل غسلت ايدي و بديت اسوي چاي سمعت صوت

رضا: سوي مهيل احب  بي هيل

زهراء: يمهه خوفتني

رضا: اسم الله عليج بس حبيت اكلج حطي بي هيل

زهراء: تمام غاح احط هيل اطلع بغه(راح'بره)

طلعت و اني اضحك رجعت و بديت الم السفره ويا الحجيه و اجتي زهراء تريد تشيلها شلت الصينيه لان جانت ثكيله و وديتها للمطبخ

زهراء: شكغا(شكرا)

باقر: تسلم ايدك وليدي

رضا: لا عادي ماسويت شي

كعدنا نشرب چاي لحد ما كلت

رضا: حجينه

باقر: هلا وليدي

رضا: الصراحه اردي اتزوج زهراء

باقر: زهراء؟

رضا: اي

باقر: بس بعدها صغيره

رضا: ونتظرها بس اوعدني ما تصير لغيري

باقر: والله مادري يا وليدي

رضا: كول اي و الباقي علي

باقر: الك انتَ احسن من الغريب

ابتسمت و كمت ترخصت منهم و طلعت ركبت سيارتي متوجه للبيت فرحان دخلت للبيت بهدوء

ضُحى: الحمدلله فرحان مو عصبي

رضا: اممم اكيد افرح

ضُحى: تزوجت؟

رضا: حجيت ويا ابو الابنيه الي احبها و وافق

ضُحى: بدون ما تكلي؟

رضا: اجتي صدفن وعلي

ضُحى: ماشي

صعدت انام و اني مطمن

مرت السنين و صار مار على ذاك الموقف سنتين و هسه زهراء صار عمرها 19 ثاني مرحلة جامعه رحنه و خطبناها و صارت الي رسمي و ضُحى حمزه رادها بس اني ما قبلت الا لحد ما ضُحى توافق لان جانت متردده مرت الايام و اجه عرسنا اني و زهراء و عزمت الكُل و جنه فرحانين

حمزة: شوكت تحنين؟

ضُحى: عفيه حمزه ماردي هسه

حمزة: ليش؟

ضُحى: اخاف

حمزة: تخافين من شنو؟ وهلي احطج بين عيوني

ضُحى: و ملاك؟

حمزة: وحق عيونج جانت مُجرد اعجاب و راح انتِ ساكنه عقلي و گلبي

ضُحى: حاجي اخوي

ركض حمزه لرضا و هو يكولة

حمزة: و الزهراء وافقت هسه اتزوج ماطول الشيخ هنا و بعدين اسويلها عرس

فعلا عقدنا القران سويا اني و اخوي و بعد مدة سوالي عرس و زفوني

____

صادق: ولج دُره تعالييي

دُرة: ماما ماما

ركضت دُره و هي تضحك على نرجس و زينب جانت ترضع بنتها (فاطمة) و ملاك تركض وره (جعفر) لان بيده حصو يريد يبلعه و سارة كاعده لان حامل و ميته تعب و ضُحى بعدها بدايات حملها و زهراء بعدها ما حامل جنه كاعدين متونسين سويا و احنه نسولف و مايخله الجو من الاطفال علي الدُر شال دُره و باسها و هو ينطيها حلويات و دُره باسته و كعدت بحضنه تاكل

╚══ஓ๑♡๑ஓ══╝

╔══ஓ๑♡๑ஓ══╗

و لكُل بدايه نهاية و ها قد جائت نهاية روايتنه الجميله التي كُنا نُطلق عليها اسم: مرج البحرين يلتقيان و قد شاء القدر و التقى صادق بنرجس  و باسم بزينب و حسن بساره و رضا بزهراء و حمزة بضُحى و قد اغمضت عين تلك الفتاة الصغيره و ذهبت للنوم و اغلقت الام الروايه و اغلق الستائر و الاضويه و خرجت من غرفة ابنتها الصغيره و ذهبت للنوم هيَ ايضا
╚══ஓ๑♡๑ஓ══╝

الكاتبة: رُقيه(روكا)

الانستا

التيك توك

استقبل اي روايه حقيقيه الي تردي تراسلني لو على البوت مال تلي كرام لو على الانستا مع السلامه