رواية مرج البحرين يلتقيان الفصل الثاني 2 - بقلم ★الكَاتِبَة غَيَاهِبُ★

السلام عليكم
طبعا اليوم كُلش تعبانه و ماكدر انشر بالليل فاا راح انشر هسه المهمم اتمنى تعجبكم البارت كُلش طويل اتمنى تستمتعون بي احبكممم🤭🤍🤍🤍

┏━•❃°•°❀°•°❃•━┓

البصره الساعه 8:00 ليلاً

طب ببرود و دخل للمضيف لكه الكل متجمع ما عدا شخص واحد رفع حاجبه بستغراب و كال

"چا وين علي؟"

محد جاوبه و كلهم مرعوبين منه مشى بشكل سريع و وكف بصف الدرج و صاح بعلو صوته

"علي الدُر"

ما مرت ثواني و علي الدُر واكف يمه و مغطي عينه جاوب بتوتر

علي الدُر: ها بابا؟

رفع حاجبه و كله: شبيها عينك؟

علي الدُر: مابيها شيء

سحب ايده بقوه عن عينه و طلعت عينه مورمه، باوع عليهم بغضب السمه و الارض مشى بسرعه للمضيف و صاح

: منو سوه هيج بعلي؟

وكف واحد بتوتر و هو يكول

: ابني كنان بس...

ماكمل كلمته و اجته ضربه على عينه

و كال: ماكدر اضرب طفل بس اكدر اضرب الخلفه

نزل راسه الثاني و هو متضايق

سحب علي الدُر و رفع اصبعه بوجه الكل

و هوَ يكول بعلو صوته: اقسم بذات الله الي يمد ايده على خصله من شعر علي الدُر يترحم على الخلفه

كاله و شال علي الدر و صعد لغرفته

خله على الجربايه و هو يكول بغضب

: مو كتلك الي يضربك اضربه؟

علي الدُر: بابا و الله عمو وكف كبالي و منعني

: اني اتفاهم وياهم

باس راسه و ابتسم طلع من جنطته علاكه و انطاها لعلي و كله

: افتحها

فتحها علي بسرعه و لكاها اللعاب و حلويات باوع عليه و كله

علي الدُر: رحت للنجف بدوني؟

: هسه انتَ هذا الهامك؟

علي الدُر: بابا مو وعدتني تاخذني لماما؟

: من عيني باباتي بس مو هسه ماكدر

بدا يبجي و هو يكول

علي الدُر: يعني ماما راحت بعيد و ماتكدر تجي اني لازم اروحلها

حضنه بقوه و بدا يبجي ويا

و هو يكول: والله اخذك بس اصبر

علي الدُر: وعد؟

: وعد يا نظر عيني

نام علي بحضن ابوه و هو يبجي على حالة امه توفت و ابو يعوفه غصبا عليه و يروح للدوام مايشوفه هواي

باوع عليه و بدا يبجي بحركه و هو يتذكر مرته و بدا يحجي و يون و هو يكول

: وين عفتيني و حدي؟ مو تدرين بيا ما كدر اربي علي وحدي ليش عفتيني؟ مو كتيلي تردين تسمينه علي الدر؟ هاي شوفي علي الدر سميته مثل ماتردين و طلع يشبهج حيلل ارجعيلي يا نظر عيوني بغيابج اجر ونات

حط علي على الچربايه و طب للحمام سبح و طلع علك المكيف على الوضع الدافئ  تمدد على الچربايه و هو حاضن ابنه شم ريحته و نزلت دمعته و نام بهدوء
__
الصبح بقصر ال مهدي الساعه 6:00

صاح الجد مهدي : وينكم؟ شنو بعدكم نايمين؟

ماحس الا بشخص يكض رجله نزل راسه و ارتاحت معالم وجهه

علي الدُر: جدو جدو بابا اجه البارحه بس انتَ جنت نايم و ما كعدك

الجد: ايا نذل ليش ماكعدتني؟ لو خفت اكعد وياه و مياخذك بحضنه؟ هاه؟

علي الدُر و هو يضحك: لا جدو مو هيج

الجد مهدي: اكبر كلاوچي انتَ

بده الجد يدغدغ بعلي الدر و يلاعبه مسح على شعره ويا نزلت صادق باوع عليه بكسرة خاطر بس حاول يخفيها و كض ايد ابوه و باسها و هو يكول

صادق: كواك الله يابه

الجد مهدي: يكوي حيلك وليدي

كعد صادق و اجه علي بحضنه و بدو ينزلون لحد ما نزل كيان و اجه يم الجد و الجد هم باسه بخده و كعده بصفه بس علي حضن ابوه بقوه باوعله

صادق و كله: لا تخاف اني وياك  

علي: ما اخاف من احد اني ماطول انتَ بظهري

مرت الساعات و حطن نسوان اخوه الاكل يم الزلم و هنا هم كعدن اجتي اخت مرت اخوه

ردات تكعد بصف صادق لان ماكو مكان باوع صادق و سحب ابنه و ادنه بمكان ابنه و صار علي الدُر بالنص بينا و بين صبا ابنه  بدو ياكلون و هو يحط لكمه بحلكه و يحط لكمه بحلك علي لحد ما خلصو و كامو كلهم بدت النسوان تلم بالماعين و من خلصن وكفن على المغسله يغسلن المواعين و وحده تسوي چاي للكل

حجت ياسمين: ولج غمه كتلج لا تكعدين بصفه علمود يشوفج ثكيله

صبا: شمدريني ماصدكت اكعد بصفه

اجتي بنيه ثانيه اسمها زينب(اخت صادق): ها بنات؟ تحتاجن مساعده؟

صبا: لا شكرا
ياسمين: عليمن خيه غير خلصنا احنا هستوج تجين؟

زينب: والله دراستي اهم و انتن كلشي ماعدجن نظفن شنو صار عليجن؟
ياسمين: و شنو احنا خدامين عندج؟

علت اصواتهن و طب صادق دنك راسه و بدا يحجي ويا اخته: شبيج حبيبي زينب؟

زينب: شوفها شلون تحجي وياي
ياسمين: چاا غير انتِ اجيتي بعد ما كملنا تنظيف؟

صادق: اخيتي ميخالف هيا هم طالبة و متكدر تشتغل و البارحه خليتوها تشتغل لل2 بليل من وره عزيمتج لاهلج

ياسمين:  و شنو عيني ما اعزم اهلي؟

صادق: لا العفو اخيتي اكيد تعزميهم بس يعني انتِ هم مارعيتي انو هيا طالبه جاي تدرس

ياسمين: لا باخ عساس راح تطلع دكتورة

تضايق صادق من كلامها و صاح بصوت عالي: علاء تعال شوف مرتك
اجه علاء و وكف راح لياسمين و جرها من ايدها و هو يكول: شكو؟
ياسمين: متشوف اخوك محسسني واكفه كدامه راقصه ميباوع بعيوني

علاء صفكه و كللها تروح للغرفه و صبا هم راحت وراها بخوف وكف علاء يم اخو و حجه: اعذرني خويه البارحه ابني و اليوم مرتي اسفه اخيتي امسحيها بوجهي

صادق: لا تعتذر خويه و اني بس اطلع زينب من بيتنا اني اتوكل اشوفلي بيت يم شغلي بغداد

علاء: على بختك خويه و تعوفنا؟

صادق: اعذرني خويه بس اني هنا علمود زينب

كالها و عافهم و صعد
_
صبا و ياسمين

ياسمين: ولج اني يصفكني علمود اخوه؟ اني اعلمه

صبا: تره كلنا ندري صادق شخصيته قويه مثل ابوه

ياسمين: اني اشوفج شنو اسوي بي اني يصفكني؟ اي لازم يصفكني اذا متزوجة خنيث لايحل و لا يربط حاطينه تكملت عدد

صبا: ادري شبيج؟ تسودنتي؟ غير زينب هاي روح صادق هو مربيها

ياسمين: خيبه ويعت ابوي الي بالكبر اذا ما اخلي زينب اكثر وحدة مكروها بالبيت مايطلع اسمي ياسمين

صبا: ولج شنو راح تسوين؟

ياسمين بضحك: اني اكلج بعدين

صعدت فوك و  باوعت لابني و كلت: خلصت دروسك؟

علي: اي بابا

صادق: جيب الكتاب خل اشوف

جاب علي الكتاب و انطاه

صادق: شنو درسك؟

علي: بابا سورة الفاتحة

صادق: حافظها؟

علي: ايي

صادق: يلا اقره
علي:
بِسۡمِ ٱللَّهِ ٱلرَّحۡمَٰنِ ٱلرَّحِيمِ 
ٱلۡحَمۡدُ لِلَّهِ رَبِّ ٱلۡعَٰلَمِينَ 
ٱلرَّحۡمَٰنِ ٱلرَّحِيمِ 
مَٰلِكِ يَوۡمِ ٱلدِّينِ 
إِيَّاكَ نَعۡبُدُ وَإِيَّاكَ نَسۡتَعِينُ 
ٱهۡدِنَا ٱلصِّرَٰطَ ٱلۡمُسۡتَقِيمَ 
صِرَٰطَ ٱلَّذِينَ أَنۡعَمۡتَ عَلَيۡهِمۡ غَيۡرِ ٱلۡمَغۡضُوبِ عَلَيۡهِمۡ وَلَا ٱلضَّآلِّينَ 
صَدَقَ اللّٰه العَليَ العَظِيم

صادق: عفيه حبيبي و المعاني؟

علي: مو كلهن

صادق: خل نشوف ما معنى الحمدلله؟

علي: الشكر لله

صادق:رب العالمين؟

علي: خالق كل شيء

صادق: الرحمن الرحيم؟

علي: هيا من اسماء الله الحسنى

صادق: مالك يوم الدين؟

علي: ماعرف

صادق: شوف باباتي مالك يوم الدين،  يوم الدين هو يوم القيامه اليوم الي راح نوكف بي يم رب العالمين نتحاسب على شكو خطا نسوي و بعدها ندخل الجنه و نشوف النبي محمد (صل الله عليه و اله) و نشوف اهل البيت (عليهم السلام) و نشوف كل واحد نحبه

علي: يعني يوم القيامة هو الي يحدد ندخل جنه؟

صادق: لا هاي الدنيا هي تحدد من تطلع للمدرسه و تشوف مسكين انطي ربع او خمسميه، من نروح لاهل البيت ذب بالمرقد فلوس هاي رب العالمين يسويها جبيره و ادخلك الجنه، و لا تتهاون بصلاتك وكت الصلاه اركض على السجاده، صحيح انتَ بعدك صف ثاني عمرك 8 بس ميخالف عود نفسك من تسمع الاذان ترتاح اترك اي شي بيدك  ، هسه شنو يعني مالك يوم الدين؟

علي: مالك يوم القيامه

صادق: عفيه عليك باباتي

حضنه و باس راسه بهدوء و بعدين رجع علي يلعب بالعابه و يضحك اندك الباب و كام صادق يفتحه و لكاها صبا نزل عينه و كال: اامري اخيتي؟  

صبا بكلبها: اخيتي؟

تحمحم صادق و فزت صبا و هي تكول: جدو مهدي يريد علي

صادق: علي علي كوم جدو يريدك

كام علي و راح ويا صبا سد الباب صادق و رجع لصلاته فتح القرآن و بداءة يقرأ بصوته العذب سورة ياسين

بِسۡمِ ٱللَّهِ ٱلرَّحۡمَٰنِ ٱلرَّحِيمِ 

يسٓ١ 
وَٱلۡقُرۡءَانِ ٱلۡحَكِيمِ ٢
إِنَّكَ لَمِنَ ٱلۡمُرۡسَلِينَ ٣
عَلَىٰ صِرَٰطٖ مُّسۡتَقِيمٖ ٤
تَنزِيلَ ٱلۡعَزِيزِ ٱلرَّحِيمِ ٥
لِتُنذِرَ قَوۡمٗا مَّآ أُنذِرَ ءَابَآؤُهُمۡ فَهُمۡ غَٰفِلُونَ ٦
لَقَدۡ حَقَّ ٱلۡقَوۡلُ عَلَىٰٓ أَكۡثَرِهِمۡ فَهُمۡ لَا يُؤۡمِنُونَ ٧
إِنَّا جَعَلۡنَا فِيٓ أَعۡنَٰقِهِمۡ أَغۡلَٰلٗا فَهِيَ إِلَى ٱلۡأَذۡقَانِ فَهُم مُّقۡمَحُونَ ٨
وَجَعَلۡنَا مِنۢ بَيۡنِ أَيۡدِيهِمۡ سَدّٗا وَمِنۡ خَلۡفِهِمۡ سَدّٗا فَأَغۡشَيۡنَٰهُمۡ فَهُمۡ لَا يُبۡصِرُونَ ٩
وَسَوَآءٌ عَلَيۡهِمۡ ءَأَنذَرۡتَهُمۡ أَمۡ لَمۡ تُنذِرۡهُمۡ لَا يُؤۡمِنُونَ ١٠
إِنَّمَا تُنذِرُ مَنِ ٱتَّبَعَ ٱلذِّكۡرَ وَخَشِيَ ٱلرَّحۡمَٰنَ بِٱلۡغَيۡبِۖ فَبَشِّرۡهُ بِمَغۡفِرَةٖ وَأَجۡرٖ كَرِيمٍ ١١
إِنَّا نَحۡنُ نُحۡيِ ٱلۡمَوۡتَىٰ وَنَكۡتُبُ مَا قَدَّمُواْ وَءَاثَٰرَهُمۡۚ وَكُلَّ شَيۡءٍ أَحۡصَيۡنَٰهُ فِيٓ إِمَامٖ مُّبِينٖ ١٢
صدق الله العلي العظيم

صدق بهدوء و راحه سد القرآن و رجع كلشي مكانه جان مستعجل بس ماراد يهجر القرآن فا قراء كلام بسيط لحد ما يرجع و يقرأ بهدوء و راحه
لبس الدشداشه و نزل راح لابوه و باس ايده و هوا يكله

صادق: علي امانا بركبتك

الجد مهدي: لتخاف روح

راح صادق جان اكو عطل بالسياره مالتا و راح للفيتر يصلحها بعد ما كمل رجع للبيت لكاه البيت هدوء على غير العاده

صادق: السلام عليكم

الكل: و عليكم السلام

صادق: علي علي باباتي تعال

نزل علي بس جان خشمه طاك دم و محد معالجه ركض عليه صادق و باوع لابوه و كله: هاي الامانه؟

الجد مهدي: يا علي دخيلك

مشى الجد لعلي و رفع راسه كله: يابويه منو سوه بيك هيج؟

علي: ك-كيان ابن عمو

باوع صادق بغضب لعلاء و كله: ها علاء؟ وصلت بيك تخلي ابنك يضرب يتيم؟ هاه؟ وصلت بيك هيج؟ مو مخلي امانه عندك ليش هيج تسوي؟

ابتسمت ياسمين بخبث هي الي تحرض ابنها يضرب علي

جان يحاجي بغضب و هو كاضه من ياخته و يهز بيه نزلت دموعه بغضب و عيونه صارت دم صاح بعلو صوته: زينب البسي عباتج و جيبي لبسه لعلي و انزلي بسرعه

مرت خمس دقايق و نزلت زينب ترجف بس لابسه عبايتها الطويله وكفت بظهر صادق و كال: راح اروح و بويه اني اجيك بين فتره و فتره بس اني ما ابقى هنا و زينب تعيش يمي و من تجي خطابه كلولها ماتت اني ازوجها بيدي

من طلع ابتسمت ياسمين و كالت: اخيرا يمهه افسش الهوه من طلع شكد مكروه

صبا: ولج شو هذا صدك راح

ياسمين: احسن و انتِ استجني عوفي انسي شي اسمه صادق

صبا: ولج ماكدر احبه

ياسمين غمتها و عافتها تبجي وحدها و تلعب بموبايلها
_
يم صادق

كالها و طلعو ركبو السيارة متوجهين لبغداد محد حجه لحد ما طلع صادق  و باوع لزينب و كللها: خايفه مني؟

زينب: لا والله

علي: بابا وين رايحين؟

صادق: لبغداد يا نظر ابوك

علي: صدك بابا؟ رايحين لبغداد؟

زينب: صدك صادق رايحين لبغداد؟

صادق بضحكه: اي اي لبغداد بعد ماكو بصره و حر

زينب: يلا هم احسن خلصت من ياسمين و صبا العكربه

باوعلها صادق و كللها: لا تحجبن عليهم تعتبر غيبه

زينب: اسفه

نامت زينب و بحضنها علي و صادق بقى يسوق لبغداد و اول ما وصلو اتجه لبيته  شال علي و كعد زينب نزلو و طبو طبب زينب لغرفه و هو وعلي بغرفه و نامو
__

ثاني يوم بغداد المنصور الساعه8:30

صادق واكف يسوي ريكوك بهدوء و هو مشغل قرآن منصي الصوت فا صاير هدوء

كعدت زينب و كالت: صباح الخير شلونك؟
كالتها و هي تبوس راسه

باس جبهتها و كللها: صباح النور يا نور حياتي

علي: بابا جوعان

صادق: عمت عيني جوعان؟ كالها و هو يشيله لان زينب كملت الريوك و راح كعد بالصاله و جابت زينب الريوك و بدو يتركون بعد ما كملو حجه صادق بهدوء: زينب اريد اكلج شي

زينب: كول خويه اسمعك

صادق: راح تدرسين هنا بجامعه بغداد  و اني ادرسج بس اوعديني ماتنزلين راسي و متكولين لاحد اني اخوج؟

زينب: وعد خويه مانزل راسك طول عمري

صادق: عفيه ببنيتي يلا كومو بدلو خل اشوفكم بغداد

┗━•❃°•°❀°•°❃•━┛

خلص البارت الاول الحمدلله
البارت كُلش طويل اتمنى استمتعتو بي
البارت الثاني ان شاء الله على يوم السبت بعون الله

╔══ஓ๑♡๑ஓ══╗
الكاتبة رقيه
رواية مرج البحرين يلتقيان
╚══ஓ๑♡๑ஓ══╝

════ ⋆★⋆ ════

الحمدلله"3"
استغفرالله"3"
لا اله الا الله"3"
الشكر لله"3"
اللهم صل على محمد و ال محمد"3"

════ ⋆★⋆ ════

الانستا

تيك توك