تحميل رواية «مستشفى العباسية» PDF

انا حققت في جرايم كتير، بس أول مرة الجريمة تكون في مستشفى العباسية، مستشفى الأمراض النفسية والعصبية الأشهر في مصر.

في يوم بيوصل بلاغ غريب لرجال الشرطة عن جريمة قتل في مستشفى العباسية.. البلاغ كان غريب بسبب التفاصيل اللي اتقالت فيه: مريض نفسي قتل الدكتورة اللي بتعالجه بدون أي أسباب، ولما الدكاترة والممرضين دخلوا عليه وشافوا المنظر، كان مصدوم وبيقول: “مش أنا اللي عملت كده”، ولكن فجأة الشخص ده انتحر ودبح نفسه في مشهد مفزع وبشع لأقصى حد.

عشان يبدأ التحقيق في واحدة من أغرب الجرايم اللي حققت فيها.

…

أنا المقدم محمود أبو الوفا.. لما وصلنا البلاغ كنت مستغرب من كمية البشاعة اللي فيه، واتحركنا أنا والرائد سعد عبد التواب، ومعانا قوة من القسم على مستشفى العباسية. ولما وصلنا هناك لقينا الدنيا مقلوبة، واستقبلنا الدكتور عمرو، واحد من الدكاترة اللي في المستشفى، واتكلم وقال:

_ الدكتورة وفاء منتصر هي اللي اتقتلت على إيد حالة من الحالات اللي بتتعالج عندها، والقاتل اسمه مروان، وانتحر بعد ما خلص عليها.

= ممكن بس أطلع على الجثث قبل ما أبدأ تحقيق مع الناس اللي في المستشفى؟

_ تمام يا فندم، تحت أمرك أكيد.

…

دخلت الأوضة اللي حصلت فيها الجريمة، وكانت عبارة عن مكتب كبير وفخم يخص الدكتورة وفاء منتصر، المجني عليها. وعلى الأرض كان موجود جثتين.. جثة الدكتورة وفاء، واللي كان في جسمها أكتر من 22 طعنة، وجنبها بشوية كانت جثة لشاب في أواخر العشرينات، في جرح في رقبته، وجنبه سلاح الجريمة، واللي كان سكينة.

وده اللي خلاني أبص للدكتور عمرو وأقوله:

_ هو في هنا سكاكين في المستشفى يا دكتور؟ إزاي مريض نفسي يكون معاه سكينة ويدخل بيها على دكتورة؟ مش المفروض المرضى اللي هنا بيتفتشوا بصورة دورية؟

= في الحقيقة يا فندم، مفيش حد عارف هو دخل السكينة إزاي للمستشفى، ولكن ده في النهاية يا فندم مريض نفسي قتل، وبعدها انتحر، يعني اللي إنتوا هتدوروا عليه خلص على نفسه، والموضوع خلص.

_ وحضرتك جاي تعلمنا شغلنا بقى ولا إيه يا دكتور عمرو؟! إحنا هنا اللي نحدد ونقول إذا كانت القضية هتتقفل ولا هيبدأ التحقيق فيها. ولما يوصل وكيل النيابة، ساعتها هحددلك ناويين على إيه.

…

وبعد أقل من نص ساعة كان وصل وكيل النيابة سالم عبد العزيز، وكان معاه فريق من الطب الشرعي والمعمل الجنائي لفحص الجثث ومسرح الجريمة. وأول ما دخل وكيل النيابة لمسرح الجريمة وشاف السكينة اتكلم وقال:

_ هو إيه ده؟! إزاي المريض النفسي اللي المفروض بيتعالج عند الدكتورة داخل عندها ومعاه سلاح أبيض؟ جاب السلاح ده منين؟!

= وده نفس السؤال اللي أنا سألته يا سالم باشا، بس الدكاترة شايفين إن القاتل والمجني عليها الاتنين ماتوا، وعاوزين القضية تتقفل، مش كده ولا إيه يا دكتور عمرو؟

_ إحنا اللي نقول القضية تتقفل ولا لأ. وبعدين أنا عايز أقابل مدير المستشفى.. هو مش موجود ولا إيه؟

…

في الوقت ده لقينا راجل في الخمسينات من عمره بيقرب من وكيل النيابة وبيسلم عليه، وعرفنا إن اسمه عاصم الطيري، واتكلم وقال:

_ أنا فاهم كلام حضرتك كويس، بس حضرتك لما تشوف ملف مروان ده هتعرف وقتها هو جاب السلاح منين.

= مش فاهم إيه علاقة سلاح الجريمة بملف المريض النفسي اللي عندك؟

_ حضرتك ممكن تتفضل في مكتبي، وأنا هشرحلك كل حاجة.

…

سبنا رجالة الطب الشرعي والمعمل الجنائي يشوفوا شغلهم، واتحركنا مع الدكتور عاصم الطيري، مدير المستشفى، على مكتبه. ولما وصلنا بدأ يدور في ملفات عنده على الرف، عشان في الآخر يطلع ملف ويفتحه قدامنا، واتكلم وقال:

_ مروان ده في المستشفى من أربع سنين، عنده سلوك عدواني وغير طبيعي، ولكن ده بيحصل لما بيتعصب من حاجة. واللي دخلت مروان المستشفى هي والدته، مدام صابرين، وده بسبب إن أبوه بلطجي وكان بيضربه ضرب غبي لحد ما الولد بقى عنده سلوك عدواني، وكان بيتعالج نفسيًا، وأمه قررت، عشان تبعده عن المشاكل، إنها تدخله المستشفى هنا. بس من وقت للتاني، وبالذات في الزيارات الأخيرة، أبوه كان بيجي يزوره ويطمن عليه، وجايز يكون خد السلاح ده من والده، بحكم إنه بلطجي يعني.

= جايز كلامك يطلع صح، أو يطلع غلط، لسه مش عارفين. إحنا لسه هنعمل تحرياتنا وتحقيقاتنا، وهنعرف إذا كان والده اللي إداله السلاح فعلًا ولا حد تاني.

…

خرجنا من عند مدير المستشفى ورجعنا تاني على مسرح الجريمة، وكانت الرجالة خلصت شغلها. ولكن دكتور الطب الشرعي قال:

_ جريمة قتل مفيهاش أي تفاصيل.. الدكتورة وفاء منتصر اتعرضت لـ22 طعنة في جسمها وفي أماكن متفرقة، ومفيش أي تعليق على جثة الشاب ده، ولكن كل حاجة هتبان مع التشريح.

وكالعادة اتنقلت الجثث للمشرحة، وبعد رفع البصمات اتقفلت الأوضة واتشمعت بالشمع الأحمر.

ورجعت أنا والرائد سعد عشان نبدأ تحريات عن الجثتين: الدكتورة وفاء منتصر، ومروان جمال، المريض النفسي اللي كان بيتعالج في المستشفى واللي قتل الدكتورة وفاء.

وبعد 24 ساعة ظهرت التحريات، وفضلت إني أبدأ بمروان جمال.

عنده 27 سنة، بيتعالج في المستشفى بقاله أربع سنين، واللي دخله المستشفى هي والدته، مدام صابرين، بسبب إن الولد بقى سلوكه عدواني جدًا. وعلى حسب التحريات، إن مروان كان متغير فعلًا في الفترة الأخيرة، وكان بيعمل مشاكل كتير، زي ما يكون الدوا اللي بياخده بيشتغل بشكل عكسي. وكان بيحب يتكلم مع الدكتورة وفاء، وكان بيقعد كل يوم يحكي عن اللي مر بيه في حياته معاها، وهي كانت بتسمعه كويس وبتحاول تساعده.

والد مروان بلطجي، وكان محبوس قبل كده، وهو السبب إن ابنه يكون عدواني.

وبعدها فتحت التحريات عن الدكتورة وفاء.. التحريات كانت بتثبت إن الدكتورة وفاء كانت دكتورة جد جدًا، وكانت مبتقبلش الغلط، ده غير إنها كانت مرشحة إنها تبقى مديرة المستشفى، وقالت إن لو ده حصل هتسلم ناس كتير للشرطة، ومنهم دكاترة عاملين مصايب، وإن كل حاجة تحت إيدها، يعني هي لو ماتت ومبقتش مديرة المستشفى، الناس دي هتبقى في أمان.

والدكاترة دول كانوا تلاتة: دكتور أمجد، ودكتور عز، ودكتور عمرو، وممرضة اسمها صباح.

بس محدش عارف هي ماسكة عليهم إيه بالظبط؟!.. وده بيخلي احتمال موجود إن حد من الدكاترة دول هو اللي إدى السكينة لمروان عشان يخلص عليها.

…

وفي الوقت ده يوصلنا بلاغ من عمارة.. الجيران اللي فيها بيشتكوا إن في شقة في الدور الرابع خارج منها صوت صراخ مش طبيعي، وإن في حد بيتعذب فيها. ولما سألت: الشقة دي تخص مين؟.. اتصدمت لما عرفت إنها تخص والد مروان.

وعشان كده اتحركت أنا والرائد سعد بسرعة، ومعانا قوة من القسم، على مكان البلاغ. لكن وإحنا في الطريق بتوصل رسالة على الواتساب من وكيل النيابة، والرسالة كانت صورة موجود فيها تقرير الطب الشرعي الخاص بجثة مروان.

ولما بدأت أقرأ اتصدمت لما عرفت إن الموضوع فعلًا بفعل فاعل، وإن مروان كان أداة جريمة اللي استخدمها القاتل عشان يخلص على الدكتورة وفاء. السلوك العدواني اللي كان عند مروان في البداية كان آخره يخليه يتعصب شوية، ولكن أثناء فحص الجثة اتضح إن في عقار في الدم ملوش علاقة بعلاج مروان، وأثناء تشريح الجمجمة اتضح إن مروان أُصيب بجلطة قريب اتسببت في مشكلة في الفص الجبهي، وده اللي خلى سلوكه العدواني يزيد بشكل فج، وده اللي وصله إنه يقتل.

والسبب في الجلطة هو العلاج الغلط اللي كان بياخده مروان.

خلصت قراءة تقرير الطب الشرعي وأنا مصدوم، وفي اللحظة دي وصلنا لمكان البلاغ. ولما طلعنا عند باب الشقة اللي جاي منها الصراخ، كان الباب موارب، وفي ريحة أنا عارف كويس دي ريحة إيه جاية من جوه.

وأول ما زقيت الباب ودخلت… كانت الصدمة.

لقينا عبد العال، والد مروان، ماسك في إيده جركن بنزين وبيفضيه في الشقة كلها، وعلى الأرض كان فيه اتنين مربوطين وبيصرخوا.. ست في الأربعينات من عمرها وبنت في أوائل العشرينات، وشكل دي مدام صابرين وبنتها.

وأول ما عبد العال شافني اتكلم وقال:

_ اتأخرتوا ليه يا باشا؟.. ده إحنا مستنيينكم من بدري.. أهو على الأقل تلاقوا جثث قبل ما يبقوا شوية رماد.

= سيب الجركن اللي في إيدك ده يا عبد العال، وسلم نفسك، وبلاش تعمل حاجة تندم عليها.

_ الله! ده إنت عارف اسمي أهو يا باشا.. طب كويس، ده أنا طلعت مشهور. وبعدين يا باشا، هو إنت بتتكلم ليه؟.. ما تضرب طلقة كده عشان كلنا نولع، بالصلاة على النبي.

= اللي إنت بتعمله ده آخرته إيه يعني؟!.. ما إنت هتموت، ولو ما نزلتش اللي في إيدك ده وجيت معايا هتموت يا عبد العال.

_ مش هموت لوحدي، ولو حد قربلي هولع فيهم وفي الشقة كلها.

= سلم نفسك، وأوعدك محدش هيقرب منك. إحنا مش جايين نقبض عليك، إحنا جايين نحقق معاك عشان ابنك انتحر في المستشفى.

…

أول ما قولت كده، الشخص اللي كان بيهدد إنه هيولع في الشقة ساب جركن البنزين وانهار من العياط، ودي اللحظة اللي استغلها الرائد سعد كويس، وقرب منه ولوي دراعه ولبسه الكلبشات. وفكينا الست وبنتها، وطلعنا بيه على القسم.

وأول ما وصلنا ودخلته المكتب اتكلم وقال:

_ عاوز أشوف ابني يا باشا.. هو فين؟!

= جثة ابنك بتتشرح دلوقتي. وبعدين إنت جاي تندم على إن ابنك انتحر بسببك، ولا زعلان إنه مات؟!.. كل اللي حصل لابنك بسببك. معاملتك القاسية لأهل بيتك هي اللي وصلت ابنك لكده. ابنك، قبل ما ينتحر، قتل دكتورة في المستشفى، الدكتورة اللي كانت بتعالجه.

وإنت هنا عشان يتحقق معاك،عشان على حسب التحريات اللي عندنا، إنك زورت ابنك في المستشفى الفترة الأخيرة، وبعدها حصلت جريمة القتل اللي ابنك استخدم فيها سكينة، والكل بيقول إنك إنت اللي اديته السكينة دي، يعني إنت شريك معاه في الجريمة يا عبد العال.

_ محصلش.. أنا معملتش حاجة، ومعرفش حاجة عن السكينة دي.

= طيب، كنت بتزور ابنك في المستشفى ليه؟

_ عشان هو ابني يا باشا، إيه المانع إني أزور ابني؟!

= المانع إنك السبب في اللي هو فيه.. ولا حنيت في الفترة الأخيرة وعرفت إنك غلطت في حقه؟.. بس معتقدش اللي شوفته النهارده بيقول إنك متغيرتش، إنت زي ما إنت يا عبد العال. والأحسن ليك تتكلم وتقول اديته السكينة ليه.

…

فضل مصمم على أقواله، وإنه ميعرفش أي حاجة، وعشان كده رميته في الحجز لحد ما يتعرض على النيابة، وهي بقى تشوف إذا كان بريء ولا لأ.

وفي الوقت ده دخل عليا الرائد سعد، وقعد قدامي واتكلم وقال:

_ ممكن حضرتك تفهمني إيه اللي كان موجود في تقرير الطب الشرعي اللي بعتهولك وكيل النيابة؟

= تقرير الطب الشرعي بيأكد إن فيه شبهة جنائية، وإن الموضوع مش مجرد مريض نفسي قتل الدكتورة بتاعته عشان عنده مشكلة عقلية، لأ.. دي حاجة اتعملت بفعل فاعل، والشخص اللي عمل كده فاهم كويس في المخ والأعصاب؛ لأنه قدر يلعب بالفص الجبهي عند المتهم وخلاه يدخل ينفذ الجريمة بدون وعي منه.

_ أنا آسف يا باشا، هو إيه الفص الجبهي ده؟!

= بجد مش عارف يا سعد؟!.. الفص الجبهي ده ذُكر في القرآن الكريم، ولكن بشكل تاني.. تعرف الناصية، وذُكرت في سورة إيه؟

_ الناصية ذُكرت في سورة العلق: ﴿نَاصِيَةٍ كَاذِبَةٍ خَاطِئَةٍ﴾.

= بالظبط كده. وفي القرآن ده أسلوب بلاغي، وفسر العلماء إن صاحب الناصية يتصف بالكذب والخطيئة. ولكن التفسير العلمي قال إن الناصية هي الفص الجبهي في دماغ الإنسان، وبتكون في الجزء الأمامي، وهي المسؤولة عن القرارات اللي بياخدها الإنسان في حياته، وإنه لو حصل خلل في الفص الجبهي ده، ممكن الشخص يبقى عدواني جدًا، والمشكلة إنه بيبقى كده غصب عنه وبدون وعي منه.

وتقرير الطب الشرعي أثبت إن مروان كان بياخد علاج غلط طول الفترة اللي فاتت، والعلاج ده جابله جلطة في المخ. الجلطة تبان بسيطة، ولكنها عملت مشكلة في الفص الجبهي عند مروان، وبكده مروان بقى عدواني وبيتصرف من غير وعي. وبعدها فيه حد إداله السكينة وهو داخل عند الدكتورة وفاء، وده اللي بيوضح اللي حصل في طريقة القتل، والعدوانية والبشاعة اللي حصلت، سواء في قتل الدكتورة وفاء أو في انتحار مروان نفسه.

وإحنا دلوقتي عاوزين نعرف مين من الدكاترة التلاتة المشتبه فيهم هو اللي عمل كده؟.. معانا تلاتة دكاترة: الدكتور عز، والدكتور أمجد، والدكتور عمرو، ده غير الممرضة اللي اسمها صباح، واللي ما بينهم وما بين الدكتورة وفاء مشاكل، ومش مشاكل عادية. الدكتورة وفاء ماسكة حاجات على الناس دي، ووعدتهم إنها لما تبقى مديرة المستشفى هتكشف فسادهم وتسلمهم للشرطة.

وبيني وبينك، لو اتكلمنا مع الدكاترة مش هنوصل لحاجة، الناس دي فاهمة هي بتعمل إيه كويس، وعشان كده إحنا هنبدأ بصباح.. ممرضة غلبانة، ولو ضغطنا عليها شوية في الكلام هتتكلم وتعترف، وساعتها بقى نشوف مين اللي عملها.

_ أنا قاعد بسمع كلامك يا باشا، وأنا بفكر مين الشيطان اللي عنده التفكير ده! ده مش قاتل، ده عبقري؛ إنه قدر يستخدم بني آدم كأداة جريمة. أنا عمري ما شوفت جريمة كده في حياتي. كل الجرايم بتكون تقليدية وعادي بتحصل، لكن المرة دي أنا مذهول من تفكير القاتل ده.

= مش هنقعد مذهولين كتير.. إحنا لازم نتحرك، ودلوقتي أنا عاوزك تجيبلي اللي اسمها صباح دي، هنحقق معاها بشكل ودي ونعرف منها الحقيقة كلها.

_ تمام يا باشا.. أنا عرفت إنهم بيروحوا الساعة 9 بالليل من المستشفى، وعشان محدش يحس بحاجة هجيبها بعد ما تخرج من هناك.

= الله ينور عليك يا عم سعد، بالظبط كده.

…

كنت قاعد في مكتبي، والساعة كانت داخلة على 10 ونص بالليل، وفي الوقت ده لقيت الرائد سعد داخل عليا المكتب ومعاه صباح، الممرضة اللي طلبت منها تقعد، وكانت خايفة وقلقانة.

_ مالك يا صباح، متوترة ليه؟!.. إحنا هناخد منك كلمتين وهنمشيكي على طول.

= أنا تحت أمرك يا باشا، بس أنا معرفش حاجة، وبعدين أنا طول عمري في حالي.

_ هو أنا لسه سألتك يا بنتي؟!.. ما تهدي كده عشان أعرف أتكلم. أنا عاوز أعرف منك مين اللي كان بيدي العلاج الغلط لمروان اللي قتل الدكتورة وفاء؟

= علاج غلط إيه؟!.. أنا معرفش حاجة.

_ آه.. إحنا كده بنستهبل. أنا عارف إنك تعرفي كل حاجة، وإن كان فيه بينك وبين الدكتورة وفاء مشاكل، وإنك من الشلة اللي اتهددت إنها لما تمسك إدارة المستشفى هتدخل السجن. وأنا لحد دلوقتي معرفش السبب، بس حابب أعرفه، وده عشانك. ويكون في علمك أنا قاعد فاضي، ومستعد أقعدك قدامي 3 أيام، بس صدقيني، إنتِ الخسرانة مش أنا.

ولآخر مرة هسألك.. مين اللي كان بيدي العلاج الغلط لمروان؟

= ممرضة اسمها سماح، وكانت على علاقة بدكتور عمرو.. علاقة مش كويسة يعني، والدكتورة وفاء شافتهم مع بعض وصورت كل حاجة حصلت، وكانت بتهدد الدكتور عمرو بكده.. دي كل حاجة أعرفها.

_ عاوز عنوان الممرضة اللي اسمها سماح، وخلي بالك إنك هتقولي الشهادة دي قدام النيابة، ولو اتغيرت، حسابك هيبقى معايا كبير أوي.

…

أخدنا عنوان الممرضة اللي اسمها سماح، وغلطت غلطة كبيرة إني مخدتش إذن نيابة، ودي حاجة مش قانونية، ولكن كنت عاوز أتكلم الأول بشكل ودي معاها هي كمان.

ورغم إن الوقت متأخر، إلا إني وصلت أنا والرائد سعد لعنوان سماح الممرضة، وده طبعًا بعد ما اتحفظنا على اللي اسمها صباح.

كانت ساكنة في عمارة بسيطة، وكانت في الدور التاني. طلعنا براحة لحد ما وصلنا لباب الشقة، واللي كان موارب، وده غريب؛ عشان على حسب كلام صباح، سماح عايشة لوحدها.

فزقيت الباب براحة ودخلت، وكانت الصدمة، وآخر حاجة كان ممكن أتوقع إني أشوفها، عشان لقيت.