رواية متاهات الفصل الثامن عشر بقلم همس ليل

يسعد مساؤكم حبايب....قربنا على عيد الفطر...يارب يتقبل صيامكم وقيامكم...ويحقق كل أمانيكم...وكل عام وانتو بالف خير....ندعوا ربنا يعم الآمن والامان بلدنا وبسائر البلدان المسلمة ....تحياتي
متاهات
همس ليل
البارت الاخير
بقيت متيبسة بمكاني واني اباوع للبنية تحاول اتسكت الطفل...واريدها بس تلتفت...
ايدي على المحجر تضغط وابالي مية فكرة تجي...
وفجأة التفت...من شفتها حسيت جان الهوى مكطوع عن صدري...
وفجأة اجى دفعة وحدة...
كعدت على الباية مال الدرج اجر نفس..
طلع هشام من الغرفة يحاجيها وانتبهلي...
صعد على السريع...وكف مقابيلي...
_صبا شبيج...صار شي...اشو وجهج اصفر
هزيت راسي ...اريد اجاوبه ماكدر
جريت نفس...ماكو شي دخت شوي
_الحمد لله....تعاي سلمي
مد ايده كومني....وجان كامش ايدي من ننزل...
عيني على لارا الي وكفت بداية الدرج تباوع علينا...
_خوما اكو شي...شبيج صبا
_لا ماكو شي بس داخت...
وصلنا لاخر باية...بقيت واكفة عليها...وهشام نزل...
وبعد ايده بيدي...
لارا واكفة مقابيلي وبيدها طفل...
وحدة تباوع على الثانية...
هية تريد تبادر بس احسها متخوفة من رد فعلي...
واني ينعاد علية ذكريات مهند...
وعيت على ضغطت يد هشام...
_شلونج لارا....
نزلت عن الباية وهية راسا تقدمت تبوسني...
مافشلتها....
_شلونج صبا...خالة شلونهة
_الحمد لله
قدمت الطفل ...هذه روان بنتي..عمرها ١٠ اشهر
باوعت عليها...حلوة مثل امها...
بس ماكدرت امد ايدي والزمها...
_الله يحفظها...
جان صوت لارا بيه بحة ...لذلك ماميزته من حجت واني على الدرج...
سمعت صوت ثاني يصيح هشام...
وهذا الصوت ابد ما انساه...التفت شفت امه بالباب مال الغرفة...
رجعت باوعت لهشام...اشرلي بعيونه...
بقيت حايرة...اتقدم واسلم لخاطره...
لو لا...
بعدين تقدمت بثقة ...ما اريد احسسها تكدر تضوجني مثل قبل...
_شلونج خالة...
شفتها انتحست اعرفها اضوج من هالكلمة...
بستها...
_انتي شلونج
_الحمد لله
_صبا...ننتظر الريوك من ايدج ...حاجاني هشام
_صار هسة
رحت للمطبخ...اسوي وادردم وية نفسي...
اني ليش اصير ثولة وما افكر من يتعلق الموضوع بهشام...
مو كان المفروض اعرف كلشي قبل ما ارجعله...
هسة حتة ماعرف ليش هنة هنا...وليش باع ذاك البيت
ووووو.هواي تساؤلات ابالي لازم يجاوب عليها
كملت وخليت الريوك على الميز...
من كعدنا...حجت امه
_ماما...يحتاجلك خدامة ...صح البيت صغير..بس مع ذلك..يراد وحدة
_مو صغير البيت ٢٠٠ متر ...جاوبت لارا
هشام...اذا ام البيت تريد اجيبلها
التفت علية وهو يحجي...ها صبا تردين
_لا شسوي بيها...شلون اخلص الوقت لعد
ورجعت راسا سألت لارا..حتة مانطي مجال لامه اتظل تناقش هالموضوع
_شبي صوتج...
_صار عندي التهاب بالحنجرة
_ماعالجتيه
_دعالجه ..بس يكول الدكتور مايرجع مثل قبل
وكف هشام...يلا امي اذا خلصتي يدوب نلحك على المحكمة...
باوعت عليه شيسوي بالمحكمة...
المشكلة ما اكدر اسال كدامهم...
وهو مبدل ومكمل...يعني هم ماكدر اسأله بالغرفة
طلعوا وبقت لارا وبنتها يمي...
_خلي اساعدج
_لا ماعندي شي..وانتي حايرة بنتج
_اي والله شالعة كلبي حركة حيل...
خلي اروح انيمها....
رحت للمطبخ...واني اتذكر مهند...نام جوة التراب
وهية عايشة حياتها ومخلفة...
جنت داسوي غدة وهية دخلت...
_عندج كهوة
_هسة اسويلج
_لا اني اسوي بين ماتخلصين الغدة
خليت على الاكل على النار...وهية كملت الكهوة
كعدنا على الميز...
بقينا ساكتين نشربها...
_اعرف انتي ماخذة موقف مني...
ويجوز جان هاي الكعدة ماحصلناها ابد..
سكتت وظلت تباوع على فنجانها...
_بس اتمنى احجيلج الي بكلبي...
ماكدر احجي لواحد....
_وليش اني
_يجوز لان تدرين بالصار...
ويجوز لان جنتي قريبة من ...
ماكالت اسمه...بس حسيت صارت غصة عدها...
_الحجي ماينفع بعد
_صح...بس اعتبريه اعتراف...
اراحة ضمير....تخفيف حمل...
اي شي...
سكتت واني انتظر تبدي بالحجي
_ماعرف شلون ابدي...
اتهمتيني خليت بمهند...وجان المفروض ماأمله لان اعرف اهلي...
بس ماجان هذا قصدي...جنت اصور بس نحب كلشي
الباقي سهل...
مصورة هشام راح يوكف بصفي لان هذا مو بس صاحبه...اخوه
بس هشام اخذ صف مهند...
وامي ظلت تضغط...مرة تهدد...ومرة تقنع بيه
واني هم ضعفت لان مامتعودة على هيج ضغط
اخر شي انطت حجاية لام سرمد قبل ما اوافق
وكالت اذا ماقبلت راح تعوف البيت...
وتروح لاخوية الجبير...
واخوية ابو طه مايتفاهم مو مثل هشام...
وافقت لان ادري كلها ضدي...
_جان تكدرين اتصرين....
بس انتي حسبتيها وشفت حجي امج صح
_يجوز...لان هشام حجى نفس حجيها
_يعني هم جان شايفه مامناسب لج
_لا ...جان يشوفني مامناسبة لمهند مو العكس
_يعني شلون
_كال ماطولين وتبدين تذمرين...
وراح تخليه طول عمره يركض حتة يرضيج...
اعتبرني مو كد المسؤولية...
وكال مهند يحتاج وحدة تسنده وتوكف بظهره...
مع ذلك عاف القرار لي...
وبعد الخطوبة تفاجأت من سمعت بسفره...
جنت اتمنى لو بس يخابرني...
_شيخابرج وانتي صرتي على ذمة رجال
_اي بس بداخلي جنت اتمنى بعده يفكر بية
_شنو هالانانية
سكتت...
_عموما راح هسة ...وانتي مزوجة وعايشة حياتج
_تعرفين من عرفت غرك...روحي فرفحت ردت بس ارجع للعراق...
حسيت كلبي يريد يوكف...
وسويت مشكلة بس حتة اجي...
ردت بس اكون قريبة هنا...
مهند عمري ما انساه...حتة لو اتصورتي اني عايشة حياتي...
بقت غصته بكلبي...
روان جان اسم اتفقنا اذا جبت بنية نسميها ...
كامت دموعها تصب...واني هم...
صح...ما اكدر انطيها العذر...بس بنفس الوقت
حسيت هية بداخلها شي انكسر...
مهند هم استعجل وضعف ...
يعني مو كل اللوم عليها...
هالشي علمتنياه الايام...
_ومرات اصور هاي حوبته....
اني من زوجت لسة مارتاحيت....
عبالهم الفلوس هية الي تسعد...
اول مازوجت ...هو حاير بس بالونسة والعلاقات
واهله جبروه يزوج حتة يبطل هالسوالف...
بس مابطل...لحد ماطلع مريض عنده نوع من ماعرف شيسمونه...
بس خلل بكريات الدم...تقل ما تزيد...
ويحتاج بين فترة وفترة نخليله دمه...
ومن يدخل المستشفى لحد مايطلع عيني تطلع من كد مايتنحس...
بجت بنتها...
كامت وعافتني ...
مر اسبوعين همة يمي....اغلب الوكت هشام ياخذهم
ويطلعون مراجعات ماعرف مال شنو...
للظهر يلا يرجعون...
ويتغدون والعصر يكونون ملتهين يامة زيارة لاقارب...
يامة سوك يحضرون نفسهم حسب مافتهمت للسفر..
يعني ماصارت واختليت بامه...
واني هم جنت اجنبها...
بس علاقتي بهشام وكفت...
يوم الي اجو ..وبالليل من صعدنا للغرفة
طلع من الحمام...واني جنت كاعدة كدام ميز التواليت امشط
_هشام ...هسة ممكن تفهمني الي يصير
جان ينشف شعره بالخاولي...
_شفهمج ...اكو مشكلة اهلي اذا بقوا يمي
_ماكلت هيج...
بس احس عايشة بنص غموض...
اريد افهم...
_مو مكبرى الموضوع...هو فلم عايشة بنص غموض
كمت من مكاني وكفت مقابيله...
_اذا مو فلم...وماكو شي...
ليش ماتحجيلي على السنتين
_صبا ماطارت الدنيا...اصبري خلي اخلص من شغلة لارا وامي...
داشوفين الصبح وياهم معاملة...ومن الظهر لليل بالمعمل...
_واني مالي مكان بحياتك...
مو مهم اذا جنت عايشة قلقة...
مو مهم شريد
_استغفر الله...شنو الي يقلقج...
وبشنو مقصر وياج...
داكولج فترة وتعدي ...
تعصبت...ونرفع صوتي ...
_هو شنو فترة وتعدي...اريد افهم...
ابقى هيج مزوجة من شخص ماعرف شي عنه
ترة زواجنا عبارة عن فراش...اشرت على الجرباية
وسوالف مال ناس صار عشرين سنة مزوجين
صباح الخير...
تحتاجين شي...
شنو احتياجات البيت...
شلون شغلك
شسويتي اليوم
هذا ملخص حجينا...
مافد يوم كعدنا سولفنا ...تناقشنا...
حتة.عفتني سنتين ماعرف شسويت ...
من رجعت كل همك حقك الشرعي...
يعني بس الرغبة تجمعنا...
جان صوتي شوي شوي يعلى...
وهو واكف يباوع علية...
بس وية اخر حجاية تنرفز
_هية هاي فكرتج عن زواجنا...
رغبة وبس...شنو شايفتني كدامج...
بدون اعقل ...
وكل الي افكر بيه هالشي...
ليش فد يوم قللت احترامج...لو قصرت وياج..
لو شفتيتي ادخل علاقة واطلع من علاقة...
والرغبة مثل ماتكولين اكدر اشبعها بغير مكان...
اذا اريد...ما انتظر الا ارجعج...
بس صدكوا لو كالوا عقل نسوان...
عافني افور وطلع...وهم ماحصلت منه حجاية...
بس هالمرة غير... قررت اذا مانكون صريحين
واذا ما اعرف كلشي...
ما ارجع اكمل حياتي وياه...
هو استخدم اسلوب لا مبالاة...
كام يطلع الصبح للمعاملة وية امه واخته
ويرجعهم الظهر يتغدة ويطلع لليل يلا يرجع...
ينام بالغرفة الثانية...
بقى هذا الوضع اسبوعين...
واخرها بالليل...دخل الغرفة ...
جنت متمددة بفراشي...
وكف قريب من الجرباية...
اني سحبت نفسي وعدلت كعدتي...
_باجر راح اوصل امي ولارا لتركيا...
ويجوز اتأخر شهر او اكثر...
خلي امج واحمد يجون يمج هنا...
جان يحجي واني انتفضت من مكاني...
وكفت مقابيله...
_شنو توصلهم...شنو تتأخر...
وباجر...وموقع هالطرطورة شنو
أشرت على نفسي...
وماعرف شحجي بعد....عجزت عن التعبير
جاي قبل ليلة دكولي...
_ليش المفروض اخذ أذنج قبل شكد
_لا ليش تاخذه...اني محطة استراحة لك...
شكد هالمرة بالخير...سنتين لو تلاثة...
_شبيج انتي تخبلتي
_الي يعيش وياك يبقى عنده عقل
تقدم بأتجاهي ورفع اصبعه بوجهي
_وزني كلامج...لا اندمج عليه
_تندمني...ليش هو لسة ماتندمت..
_اشكرج يابنت الناس
ديريد يطلع...
_هشام...ثق اذا رحت هالمرة بدون ماتفسر...
ماراح تلكاني من ترجع..
التفت علية...
_اذا هيج انتي بايعة العشرة...مابيدي شي
طلع ...وعافني اشتعل نار..كعدت على الجرباية
الغلط غلطي المفروض ما ارجع اذا ماعرف كلشي
هاي استسهلها يغيب بدون مايبرر...
اندك الباب...ودخلت لارا
رفعت عيني لها...
اقتربت مني...صبا صوتكم عالي...
اسفة اذا ادخل...بس احنة مسافرين من الصبح...
يجوز ما اشوفج....
كعدت يمي على الجرباية...
_هشام كلش طيب...وصاحب مسؤولية...بس هو مايحب يشرح ولا يبرر لاحد
هيج طبعه مثل ابوية...لا تخسريه..
الصار سابقا ...امي لها ضلع بيه
التفت عليها متفاجأة...
_شلون
_ما اكدر احجي...تبقى هاي امي...
بس طولي بالج وياه...
وكفت...
_ليش حجيتي الحجاية وبقيتها معلكة...
جاوبتني بشي مغاير...
_اتمنى يوم تسامحين وتبرينا الذمة..
ولو ماشفتي غير بس الأذية...
طلعت وبقيت للصبح كاعدة...
ساعة اكول شنو قصدها من كالت امي لها يد
وساعة افكر صدك راح يسافر بدون مايجي يطيب خاطري..
معقولة...ظليت افتر بالغرفة لحد ماطلع الفجر...وصارت اكو حركة بالبيت...
رحت تمددت بفراشي...
تعبت من التفكير...حسيت واحد يفتح الباب غمضت عيني..
ميزته من عطره...جنت نايمة على جنبي الايسر...
وظهري للباب...
اقترب من السرير...ودنك باس كصتي...
ورجع باس خدي...واخر شي طبع قبلة على طرف شفايفي...
حسيت كلبي كام يضرب سريع...
جنت اتمنى اسمع حجاية منه...
بس ماحجى...عافني وطلع...
بطلعته الدموع صارن يجرن عشرة عشرة...
******

مر شهرين على سفره....
اول ايام جان يدك علية ماأشيله...
كتبلي بالفايبر...
_صبا جاوبيني ...
هم ماجاوبته...جنت مأخذة موقف منه...
وحالفة هالمرة ما اضعف...
لازم يخلي اعتبار لي...مو ينصرف براحته ولا عبالك عنده زوجة...
وزاد من اصراري من عرفت اني حامل...
يعني راح يصير طفل مو مال نبقى على الهامش من حياته...
لو نبني اساس حياة ثابتة وصريحة...
لو بلاها...
بطل يتصل...بس عرفت من احمد يخابره ويسأل...
احمد كال...أخذ على خاطره لان ما أجاوبه...
وشرحله سبب التأخير لان الفيزة مالت امه ولارا
تأخرت ومايكدر يعوفهم وحدهم...
اني دخلت بشهري الثالث...
وحامي جان اغلبه نعاس..
بس اريد انام...وين ما اكعد امدد واغفى...
احمد وامي اجو يمي...بس احمد مرات يروح للبيت
يجيكه ويبات ليلة ويرجع...
بليلة جنت نايمة...حسيت احد دخل للغرفة...
بس ماوعيت تماما...
من كعدت الصبح..ظليت صافنة...
جنت حلمانة لو فعلا اكو احد دخل...
ومنو يدخل علية...بعدين بعدت هالفكرة
نزلت جوة سنطة البيت...
باوعت الساعة العشرة...صايرة شكد انام...
دورت على امي ماكو...
دخلت المطبخ وتفاجأت بهشام كاعد يتريك على الميز...
بقيت واكفة ...ماعرف شصرف
التفت علية...وكام اقترب مني..
_شلونج صبا جرني لحظنه وباسني من خدي...
بس ماجان عندي رد فعل...رغم كلبي الي رجف بحضنه
انسحبت ...
_حمد لله على سلامتك...
شوكت رجعت..
_البارحة بالليل...
كعدت على الميز وهو هم اجى كعد مقابيلي
_بعدج زعلانة
_وليش مهم عندك زعلي
_صبا راح نرجع لنفس القوانة..
اني المفروض اخذ على خاطري منج...
شكد ادك عليج ماجاوبين ...
_ها...حقك...تعلمت اني الي اتنازل دائما
_ماكو بين المزوجين تكلفة..
ليش تحسبيها هيج...
_ليش هم محسوبين على المزوجين وطبيعيين
_باعي ترة تعبت من هذا اسلوبج...
صار شهرين غايب ورجعت نفس الشي انتي...
كام وطلع...
خابرت امي عرفت احمد ماخذها الصبح...
من شايفين هشام راجع...
للظهر من رجع ...جان متعصب...ويحجي كوة
واني بقيت ساكتة...
_لحد شوكت راح تبقين هيج..
_لحد ما تبطل تعتبرني شي هامش بحياتك
_لج منو معتبرج هيج...
انتي تتخيلي لو شنو
_خوش احجيلي كلشي صار سابقا...
وغير اسلوب الصمت هذا...
_مو الصامت اني لو انتي هسة
_حتة اتجرب شيسوي تجاهل الطرف الثاني
_يعني تقاسطيني وتجاهليني...
سكتت ماجاوبته..
_براحتج ماتلومين الا نفسج...
طلع ...بس الاسبوع صار جحيم...
استخدم لا مبالاة ولا كانه اكو شخص وياه..
والسلاح الي استخدمته ضده عكسه علية
بس اني كمت احرك بداخلي...
والصمت سيد الموقف...
بدة عندي لعبان نفس..
هم حمل وهم قلق وتوتر...
مرة الصبح جنت نايمة على القنفة ...
بعد ماطلع...طبعا هو ينام فوك واني استخدم الغرفة الجوة...
حسيت واحد يكعد بية...
جنت افتح عيني وارجع اغمضها...
اخر شي هزني ...حسيت انكلبت معدتي...
دفعته وركضت للحمام...تقيات...
من التفت لكيت هشام واكف بالباب
_شبيج
_هو اني شبية...اكو واحد يكعد واحد بهالطريقة
طلعت والخاولي بيدي امسح ايدي...
كعدت على القنفة...
هو ظل واكف مسافة عني
_جنت اوعيج...وانتي عبالك مغمى عليج..
رفعت رجلي على القنفة...وشبكتهن بيدي...
وخليت راسي على ركبي
_صبا انتي حامل
ماجاوبته ...
صاح ...مو داحجي وياج
_اي
_وعلى الحساب انتي بالثالث
_هم اي
_لج انتي شنو من بشر....
ماعندج تقدير لغيرج...
خلصت كل الطرق التفاهم وياج...
حسيته جان عصبي...يحجي ويكز اسنونه...
يمكن جان بوده يضربني...
بس عافني وطلع...بقيت على كعدتي
شسوي...كمت وكفت كدام المراية...
منو الغلط ..اني لو هو...
ليمتى يبقى العناد بينا...
اذكرت هبة من خابرتني...كالت اتنازلي شوي وحاولي تتفاهمين وياه..
فعلا...ليش ما احاول...
خوما نبقى نجر بحياتنا عرض وطول...
هسة لخاطر هالطفل...
خليت ايدي على بطني...
بيومها ظليت انتظره لليل...مارجع...
دكيت عليه...دزلي مسج ..تحتاجين شي
كعدت على ريحة جكاير...باوعت اني نايمة على القنفة
ومتغطاية...
الظاهر من جنت انتظره غفيت...بس منو غطاني...رفعت راسي ...
شفت هشام كاعد وايديه على رجليه والجكارة بيده
_هشام
رفع نظره لي...باوع لحظات
_ليش صبا ...دتعاقبيني لو شنو...
ترة تعبت...مين الكاها...
نزلت رجلي بالكاع...وعدلت كعدتي
_ما اعاقبك...بس نفسي افهم...اني هم تعبت من اسلوب الحياة بهالشكل...
الزواج مشاركة...
تعرف شنويعني شريك حياتك...
يعني تعرف عنه ويعرف عنك كلشي...
واحنة حياتنا ...ماعرف شلون اوصفها
حتة حجي نادر مابينة عدا الحديث العادي...
ماعرف حتة شعورك
_المشاعر فعل مو كلام
_ميخالف...بس الحديث يعرف الطرف الثاني عن طبائعك.....شتحب...شتكره
ردات فعلك على الامور
_ماتعلمت احجي وافسر تصرفاتي...والمفروض بالعشرة تفهمين الطرف الثاني..
_بالعشرة الطويلة... احنة بعدنا بداية الطريق...
ومرات نحتاج نفسر بعض التصرفات
شعل جكارة ثانية...واني رجعت لكعدتي مال الظهر..
بس هالمرة درت وجهي عليه...
جنت اتامله ...ابد مايوم شبعت من تأمل ملامحه

_وفاة مهند أذتني حيل جان اقرب لي من اخوتي...
جنت اعتبره صديقي وخويي...
ما احتاج اشرحله شي يفهمني من نظرة عيني...
والزاد علية ...حسيت بالذنب...كلت يجوز لو موافق
على زواجه من لارا جان ماسافر وغرك...
بس يشهد الله شكد منعته من السفر...
ماقبل كال الوضع بالعراق تعب ...
وبعد ما اتحمل...
وحتة من ماقبلت على زواجه لمصلحته...
اختي واعرفها...ماتتحمل...هسة زوجها مريض...
وهية بس تشتكي ومامتحملته...
انتي جنت غركانة بحزنج...وتزيدين اللوم علية
حاولت وياج...وجنت مستعد اكثر اتحمل...
بس جرحتي كرامتي وكبريائي...
وحتة مافكرتي يوم بقهري مو اقل منج...
على الاقل جنتي اطلعيه بدموع بلطم بعصبية...
مو مثلي...
عموما....طفى جكارته وشعل ثانية...
بعد ما وديتج...بقيت تلث اشهر ادك بكلبي كلمتج
بعدها قررت اجي اصالحج وكلت نطلع برة بلكت
تغيرين جو...
بهالاثناء خابرتني ام طه...مرت اخوية الجبير
كالت ابو طه خطفوه
اخذت امي وطلعت للموصل...
بقينا بين اتصالات وواسطات....
طلبوا مبلغ جبير...وشكد حاولنا...ماخفضوا الا قليل
ابو طه فلوسه كلها بالسوك...
واني ماعندي عرف هناك...
من سمعت حجيه عدلت كعدتي
_هو شعجب هناك عايش
_مرته مناك..ورادت يم اهلها...فنقل شغله هناك وصارله اكثر من ١٥ سنة ...
المهم....اضطريت ارجع لبغداد...وحاول اجمع كل الفلوس الي بالسوك...اضافة الى دين من الاصدقاء
ورجعت دفعتلهم الفدية...
هالشغلة طولت بحدود الشهرين...طبعا خلالها
جنت انطيهم دفعات...
_وين الشرطة وين الدنيا
_عصابة جان شغلها مرتب....
من طلع ...اهل مرته كالوا خلي نصفي املاكنا ونسافر...لان الوضع صار مو تمام...
هو هم حاول يرجع فلوسي...
اني رجعت اريد ارتب وضعي ...غركت بالدين...والمعمل هامله...
ماكو اقل الشهر...ورجعت خابرت مرته...
كالت طالع يستلم فلوس وبعد ما راجع...
رجعنا لهناك وبقينا اشهر ماخلينا مادورنا...
بس هالمرة محد خابر..ولاطلب فدية
اهلها صفوا الي يكدرون عليه وطلعوا لتركيا
وهي ماقبلت...جان عدها امل...
جبتها ورجعنا لبغداد...وبقت اغلب املاكهم معلقة هناك
بعدين أيسنا...كالت الحك اهلي...
وهم رتبت وضع ادزها لاهلها...
من رجعت من تركيا...صار سقوط الموصل...
والاحداث...امي ماقبلت تبقى...
ولارا جانت حامل وضعها تعبان ...اخذتها للاردن...
وابالي تبقى يم لارا...
وارجع ارتب اموري واجيج...
بس وصلنا بعدها كم يوم وكع رجلهة...
دخلناه مستشفى...وبقة اسابيع اركض وياه
_واهله
_كلهم ماخذين اقامة بغير دولة..وهو ولارا جانو ينتظرون يحصلون الاقامة هم...
بقيت اروح وارجع للاردن...بين شغلي الي ضاع هنا...
وبين وامي ولارا ورجلها الي ندخله ونطلعه من المستشفى...
_واني هشام من كل هذا وين
_وين ارجعج صبا...وين تبقين...
حتة البيت بعته...وايام هنا اشهر بالموصل..وبعدها اشهر بالاردن
وانتي جان عندج دوام وكلية...
زين اجيبج بنص هالمعمة ...
ثقي بالله تجي ايام ارجع انام بهدمي ماكدر ارفع راسي...
_على الاقل خابر ..كول ...مو عايفها هيج متدري عني شي
_جنت اخابر احمد واطمن عليج...وشرحتله كل ظروفي...
حتة فاتحة عمي حضرتها...
_وجان ليمتى يطول هالوضع...
_قبل ماتتصلين...بمدة طلعت اقامة زوج لارا..
وطلع وبقت بس هية..
اني رتبت وضعي واشتريت هالبيت...
وبعت املاك جانت لابوية ومخليها استثمار...وتقسمت بينا...
انطيت حصص اخوتي ورجعت المعمل يشتغل مثل قبل...
وجنت ناوي اجي اصالحج...
_لعد ليش لارا اجت لبغداد
_تأخرت اقامتها...فزوجها رادها تجي لتركيا...
تستقر حتى يكدر يروح ويرجع عليها...
_امي وياهة مقدمة...واجت هالفترة صفت الشغلات الي باسمها...
_ليش ماطلعت وياهم مابقى عندك احد هنا
التفت علية متفاجأ من حجايتي...
_بقى اهم انسان لي
ظليت اباوع عليه....
عفته ودخلت لغرفتي...
تمددت بجربايتي واني افكر...
انطيه العذر لو لا...
اول وتالي رجع علمودي...
عاف كل اهله...
كلبي يكولي اعذريه وابدي وياه صفحة جديدة
وعقلي يرفض...يكول خلة الكل بالمقدمة واني بالنهاية
زين والجاي ..هالطفل شنو ذنبه
غفيت على هاي الافكار...
كعدت على شبكة شخص...
خلى ايده حول خصري وسحبني لحضنه...
صار ظهري لصدره...
_هشام
_اشش ...نامي
خلى حنجه على راسي...
حاولت اغفى ماكدرت دكات كلبه تضرب بظهري
_هشام ليش ازوجتني
_تذكرين يوم شفتج على الدرج...
_اي
_عجبني خجلج...جنتي حيل مرتبكة من لبسج...
وجهج صار احمر طماطاية...
ومع ذلك بقيتي تجادلين بكبرياء...
بعدها ماعفتي بالي...
من طلب هشام نشتريلج خط...اشتريت تون...
جنت مراهن نفسي تخابرين فردت اتاكد
_شكد مغرور
هز جسمي بضحكته...
_بس من خابرتي حيل انقهرت...
وكلت مثلج مثل اغلب البنات...
ويوم شفت الولد يتحارش بيج اشتعلت نار
بقيت اراقبج تصرفاتج...من طلعين من المدرسة...
عرفت شنو انتي...وخطبتج
_ليش من رفضتك...ظليت اشهر بعيد وفجاة رجعت
_من رفضتي...اخذني الكبرياء شلون ترفضين
بس يوم جنت راجعة من الدوام...
واجيتي تتمشين...
حسيت كلبي يدك وية كل خطوة تمشيها...
بلحظتها كلت لازم تصيرين لي...
_شغلة تحدي
_اي لحد ماردتي تندعمين كدامي...
ماكدر اوصفلج شعوري...
عمري ماخفت هيج...
وبلحظتها عرفت شنو انتي بالنسبة لي
جان يحجي ويده تتلمس بطني
_شنو
جان حجينا همس عبالك نخاف احد يسمعنا
دارني على ظهري...وصار وجهي مقابيل وجه
_انتي كل حياتي
رفعت ايدي اتلمس وجه
_تحبني هشام
_لسة تسالين...مابينت تصرفاتي هالشي.
_اسمعها اريد
_احبج صبا...
ماكمل جان شفايفه هية الي تعبر عن شوكه ولهفته وحبه...
وين ماتوصل تترك اثر لحبه...
نمنا وكل واحد منا يبني امال للمستقبل...
يمكن بعضكم يلومني....
ويعتبر رجعتي غلط...
اكولكم بلحظة من عافني معلكة اعتبرت اكبر غلط جان قرار زواجي منه...
بس هسة من فهمته...من عرفت هو النوع الكتوم
من شفته كد المسؤولية...شفت خوفه على بيته وعائلته
لا غيرت رأي...
مشكلته الوحيدة قلة الكلام...صح مو مثل الاول...
... والمشكلة الثانية يريد اهتمام هواي
حاليا عندي ولد سميته مهند عمره سنتين وشوية
ما انسى نظرة خوف هشام علية من طلعت من العملية
ولا الدمعة الي لاحت بعينه من شاف الطفل يشبه مهند...
احمد اخوية من راد يزوج قنعته على هبة..
صح خبلة بس خوش بنية...
وامي بعد ولادتي بقت بيني وبين احمد...
وحيل متعلقة بمهند الصغير
ومهند اوووف ياحركة كلبي الي ماتنطفي...مرت خمس سنوات ..وبكل سنوية عبالك البارحة مات...
مانسيته ولا راح انساه...الي مثله اخو صعب ينسي
حتة هشام وبكل فرصة يسويله ثواب حتة بدون ماكول...
امه ولارا طلعوا واستقروا بالخارج...
بس تشتكي من زوجها لان دائما مريض
ماعرفت شلون جان لام هشام يد بالي صار بينا...
ولا يهمني...
المهم رجعنا سوة وهية بعيدة

انتهت القصة لكم....بس لهم الحياة مستمرة ...
الزواج مسؤولية...وشراكة...لازم كل طرف يتحمل الجزء الخاص بيه...
لازم كل واحد يتنازل ويضحي حتة تمشي الحياة
الطلاق ابغض الحلال لله...
لازم يكون اخر قرار بعد ماتنعدم كل الوسائل وتصعب العيشة بين الاثنين...
اتمنى استفاديتوا واستمتعتوا بالقصة...