رواية مياس قلب الشهم الفصل الحادي والأربعون 41 - بقلم لبنى الموسوي

#مياس_قلب_الشهم

للكاتبه #لبنى_الموسوي

صارت السنه مالت نهى الله يرحمها
الكل راح للوادي إلا اني ما گدرت بسبب نونه فظليت بالبيت بس جهاد جابلي تبارك لان شهم طلب منه هالشي

صارت السبعه بلليل وهم ما جايين .. ظل بالي تأخروا كلش

خابرت شهم اكثر من مره مغلق
طلبت من تبارك تخابر جهاد نفس الشي هم طلع مغلق

ظلينه نلوب اني وتبارك
گمت افتر على روحي
اروح واجي من القلق وادعي كون ما صاير وياهم شي

فجأه سمعت جهازي يدگ
باوعت رقم غريب

شلته ع السريع رغم اني ما اجاوب الارقام الغريبه بس مدري ليش گلبي چان يفور كلش

اول ما خليته على اذني انصدمت لمن سمعت صوت عماد

طار عقلي من راسي : هذا منين ديحچي يربي هو مو محبوس ؟؟!!
ردت اسد الخط وقفني تهديده

عماد.. اذا سديتي الخط راح تندمين مياس

مياس.. شتريد مني عماد
ليش دتتصل ؟؟ ومنين دتتصل ؟!

عماد.. الأريده منچ تعرفي
اما منين فهذا شي ميخصچ ××××

مياس.. راح اسد الخط

عماد.. ××××××××× اذا سديتي

مياس.. عماد اتركني بحالي
انت تدري لو عرف شهم باتصالك شراح يسوي بيك

عماد.. هههه كلشي سوه بس مع ذالك ما خفت ولا راح اخاف منه
متسبعتلي بي بت الكلب مووو
فرحانه ماخذه واحد بگد ابوچ ويا ريته ظال عليچ

مياس.. شنو تقصد ؟!!

عماد.. ههههه
انتي تدرين بي متزوج وعنده طفل ؟؟
ليش سكتي حاچيني تدرين لو لااااا

انضربت على راسي من كلامه
اني صارلي فتره شاكه بي واجه هسه عماد قطع الشك باليقين

ما گدرت احچي ولا حرف من الصدمه .. ظليت بس اسمع العماد حتى ما اگدر اسد الخط من خوفي منه

عماد.. اسمعي لچ اول وتالي راح احصل عليچ
بس والله اذا لزمتچ إلا ××××××××××××××××××××××××××××××××××××××××××××××××××××××××××××××

شاطت روحي من كلامه القذر
سديت الخط ع السريع وكلشي بيه يرجف .. الحچي الحچا ما سامعته بكل حياتي

حسيت الدنيا افترت بيه ونفسي گامت تلعب .. ركضت المغاسل ظليت استفرغ لحد ما فرغت معدتي للأخير

تبارك.. مياس صارلي ساعه احچي
جاوبيني عفيه منو هذا الاتصل ؟؟ وليش هالشكل صار بيچ لمن حچيتي ويا

مياس.. غسلت وجهي ومشيت : تبارك عوفيني هسه الله يخليچ

تبارك.. عفيه بس گليلي منو حتى اسكت
هذا الاتصال اله علاقه ببيت عمي ؟؟
خو ما صارلهم شي لا سامح الله

مياس.. لا كلشي ما بيهم

سمعت نونه تبچي لأن ظلت وحدها
ركضت شلتها افتر بيها والدنيا تفتر بيه بنفس الوقت

تبارك.. انطينياها عنچ

مياس.. لا عوفيها

شويه وسمعت رساله بجهازي من خوفي ظليت واگفه بمكاني ما گدرت اشوف منو

دگ الموبايل واني صافنه .. هزتني تبارك تحچي ويايه بس ما اگدر ارد عليها اخير شي ايست مني وراحت تشوف منو

تبارك.. ولچ هذا شهم

بس سمعت اسمه رحت اركض اخذت الموبايل منها وفتحت الخط

شهم.. الوو مياس

مياس.. وينك ظل بالي اخابرك وماكو

شهم.. بالطريق وشبكه ماكو هستوها يلا اجت
شبي صوتچ يرجف !!

مياس.. هااا
لا ما بيه شي

شهم.. احچي مياس صار شي بغيابي
الف مره نبهتچ لتضمين عليه شي

مياس.. اي صار

سكت شويه ما اعرف ليش بحيث بس اسمع الحركه يمه
دقيقتين وگال :

شهم.. شصار گولي

مياس.. عماد اتصل

شهم.. انصدم مثلي : شنو اتصل ؟!!
شنو عماد مو ب
شدتحچين مياس !!!

مياس.. اي
ما اعرف منين اتصل بس يمكن شارد لأن چان يحچي ويايه بثقه

شهم.. شنو يعني جاوبتييييي ؟!!

مياس.. اي جاوبته

شهم.. اني شگ

مياس.. قاطعته بسرعه : بس اسمعني الله يخليك
اني وتبارك ظلينه نخابركم بالنص ساعه ويطلع مغلق فظل بالنه كلش

صادف اتصال عماد بنفس الوقت فمن شفته رقم غريب جاوبت ع السريع لأن خفت ليكون صاير وياكم شي لا سامح الله وجاي يبلغونه

شهم.. تأفأف : احچي بسرعه مياس
شگالچ هذا الساقط

مياس.. تعال ونحچي

شهم.. ميااااااس
لتطلعيني من طوري .. فضيني شگال
واحذرچ تچذبين عليه لأن مراقب تلفونچ وراح اكشف چذبچ ساعتها

مياس.. مراقب تلفوني شنو ؟!!!

شهم.. مثل ما سمعتي
يلا بسرعه غردي

مياس..خفت من كلامه وصدگته مثل الثوله : نفس كلام كل مره
گال راح احصل عليچ واني ما خايف من شهم
وبعد حچه حچي قذر ما اگدر اگوله

شهم.. مثل ايش مياس

مياس.. دا اگلك ما اگدر احچي
كلام كلش عيب ينگال

شهم.. گلتيلي كلش عيب ينگال مو ؟!!
بس مو عيب لمن ظليتي تسمعين العماد القذر وهو يحچي الچ

مياس.. اني ما گدرت اسد الخط من

شهم.. اشششش لتكملين
جاي اني بالطريق .. خلي اوصل ونتحاسب مياس بسيطه بسيطه

مياس.. شبيك شهم

سد الخط بسرعه
ظليت اباوع للموبايل بعصبيه : فوگاها هو ابو الراهي
لو ما حتى عماد يعرف بسوالفك المصخمه شهم افندي

تبارك.. سوالف شنو
شبيچ مياس ؟!!

مياس.. تبارك عوفيني بحالي
حالياً ما جاي على بالي احچي ولا حرف واحد لذالك اترجاچ لتسأليني ابد

ظليت اروح واجي بعصبيه واحچي ويا نفسي

مياس.. خلص شهم لهنا وكافي بعد
صح ما اگدر اطلع من هذا البيت لأن روحي متعلگه بي بسبب نونه
بس راح اگدر اطلعك من حياتي وعقلي وهسه تشوف

والله يا ربي
هم متزوج ومخلف
وهم يلعب علينه وكأنه ممسوي شي
وبلأخير يصير براسي هو ولا غيره ويجي يحاسبني لأن جاوبت هذا الساقط

مرت ساعه تقريبا واني اكل بروحي من القهر والغيره لحد ما سمعت الباب الخارجيه انفتح
عرفتهم اجو وما ادري ليش خفت كلش

عفت نونه يم تبارك ورحت الغرفتي

ظليت افتر رايحه جايه اكل باظافيري من القلق والتفكير

فجأه انفتحت الباب وطب شهم بس چان يريد ياكلني بعيونه على گد ما عصبي
عاط بيه بصوت عالي ...

شهم.. انتي شلون تجاوبين رقم غريب
اني شموصيييييييچ

مياس.. چنت خايفه عليكم لأن تأخرتوا لذالك رديت

شهم.. لتتحججين بهالسوالف
دائماً تبررين اغلاطچ العوجه بتبريرات اعوج منها
يعني مثل ميگولون عذر اقبح من ذنبه

اني هنا بعد ما تحملت .. تقربت منه بعصبيه
وگفت گدامه وصحت بصوت عالي

مياس.. لتحاسبني على اغلاطي وانت كلك اغلاط تسمع لو لا

شهم.. فتح عيونه متفاجأ : شدتحچين انتي ؟!!!

مياس.. مثل ما سمعت
قبل لتحاسبني روح حاسب نفسك
شوف انت شدتسوين بلأول بعدين عود تعال عاتبني على تصرفاتي العوجه مثل متگول حضرتك

شهم.. مياااااااااااااااااس

مياس.. ايييييييييييييي
مياس مياس مياس
كافي مليت كافي
كافيييييييي

خزرني بصدمه .. تقرب مني ع السريع ولزمني من فچي حيل

شهم.. هاي عليمن دتصيحين ولچ

مياس.. بالگوه حچيت : شهم دتوجعني وخر

شهم.. مو قبل متجاوبيني
شلون تتجرأين وتعلين صوتچ عليه

مياس.. سحبت نفسي منه : من وراك غير

شهم.. شلون يعني من ورايه ؟!!

مياس.. جاوبني شهم انت ليش دتحاسبني على كلشي ؟!!

شهم.. رجلچ غير
وخايف عليچ بنفس الوقت

مياس.. تمام حچي حلو
واني لعد هم مرتك لذالك من حقي احاسبك مثل متحاسبني تماماً

شهم.. تحاسبيني على شنو ؟!!

مياس.. عن زواجك وابنك الضامهم علينه
وخيانتك النهى المسكينه الچانت تحبك وتحسب ماكو بوفائك بكل هالدنيا بس للأسف طلعت غلطانه

شهم.. منو گلچ هالحچي ؟!!

مياس.. عماد

شهم.. حلو حلو
واصلين مرحله ما شاء الله
بعد خاتون شگلچ عماد ال××××

مياس.. جاوب شهم
ليش دتتهرب من الجواب

شهم.. اجاوب على ايش ؟!!
انتي مخبله لو شنو بالضبط الخاطر الاسلام

مياس.. ليش ؟!

شهم.. شلون تصدگين بعماد بس اريد اعرف
نسيتي سفالته وقذارته
هسه صار كلام عماد مقدس وبي صك تصديق

مياس.. لا مو بس كلام عماد
اني هم كم مره سمعتك بالصدفه تحچي بالموبايل ويا وحده عن طفل مريض الي هو ابنك طبعا
لذالك صدگت كلامه بسرعه

شهم.. باوعيني مياس
مو اني اليمد ايده على مره لأن بس الما عنده رجوله يسويها
إلا اذا طعنته بشرفه ساعتها الحچي يختلف

ولا اني التعلي المره صوتها علي ويظل واگف يتفرج

لذالك راح اندمچ على سوايتچ هاي بس بطريقتي الخاصه

اما عن كلام عماد والحچي السمعتي بالصدفه حسب متگولين اذا ما طلعتي دتتجسسين عليه واني ما ادري

هسه راح افسره الچ بس علمود لمن اعاقبچ تعرفين بنفسچ تستاهلين العقوبه لان غلطتي غلط چبير مينغفر ابد

طبعا ما احب احچي عن اعمال الخير الاسويها حتى ليروح اجرها يم رب العالمين بس انتي جبرتيني وما خليتلي غير خيار

اني ما عندي طفل غير بنتي نهى ولا متزوج من الاساس
كل ما بالموضوع جندي عندي استشهد وعاف عائله كامله ورى

امه واربع خوات صغار وزوجته وابنه المريض
وحالتهم الماديه جدا ضعيفه

چان الله يرحمه الوحيد الاهله
وبما انو الله مفضل عليه من فضله الواسع فمن واجبي اساعدهم واوگف ويا ابنه لما الله يعافي ويگوم بالسلامه

وكل تواصلي ويا مرت الشهيد من خلال التلفون بحيث ما شايفها غير مرتين لأن كلما اروحلهم اتعامل ويا بيبية الطفل مو ويا امه

والوحيد اليعرف بهاي السالفه يوسف لأن وكت الالتحق اوصي عليهم حتى يشوف احتياجاتهم بين ما ارجع

يحچي واني صافنه بوجها لو بيدي اطم روحي بنص الغرفه حتى اخلص من الموقف الخليت نفسي بي

مياس.. يا ربي اني شجاني
شلون تسرعت هالشكل وسمعت من عماد الحقير

والله چنت شاكه هاي حاله انسانيه بس عماد الله يلعنه خربط كل افكاري باتصاله هذا

شهم.. صافنه مو
خليچ صافنه بلكت توصلين الصورة حل ويا غابائچ الماله حدود

طلع ورگع الباب حيل
خليت حجابي على راسي وركضت ورى شفته طلع من البيت

رجعت الغرفتي اكل بنفسي ندم على الشي السويته

مياس.. بهاي عملتي خسرتك يا شهم للأبد

ما اتصور راح تسامحني على صوتي العليته عليك بس والله مچان قصدي

غيرتي عليك عمتني وطيرت عقلي من راسي

ادري هذا الحچي ميفيد لأنك مستحيل راح تفهمني وگلبك مسدود عني بس ما عندي غيره

گعدت ع الچربايه ابچي لما صرت اناشغ
دخلت عليه تبارك بس شافتني بهالحاله انطتني نونه وطلعت لأن فهمت وضعي ميسمح للسؤال

ما اعرف شلون مر الوقت عليه وهمزين محد تفقدني لأن چانو جايين من سفر وتعبانين فالكل ناموا من اول الليل

للوحده شهم ما جاي
گمت الوب علي بس اخاف اتصل وحتى اذا اتصلت اكيد ميرد بعد كلشي صار

سمعت الباب انفتح گمزت من مكاني
طلعت ع السريع شفته هستوه ديدخل .. صرت گباله بس دار وجها شافني خزرني بنظره ما عرفت افسرها

-بعد ما دريت عماد شرد من السجن فارت اعصابي
وزاد الطين بله لمن عرفت من مياس هالقذر چان يراقبني واني ما ادري

واجهت مياس وانصدمت بردها عليه خصوصا لمن رفعت صوتها بوجهي
وطبعا عرفت السبب لأن هو هذا الشي الچنت خايف منه يصير وصار للأسف

طلعت من يمها بوجهي للمركز خابرت على محسن ساعه يلا اجاني

محسن.. نعم سيدي ظل بالي

شهم.. عماد شرد

محسن.. شنو سيدي
شلون شرد يعني ؟!!

شهم.. اني اسألك مو انت تسألني

محسن.. والله سيدي ما اعرف شلون
متفاجأ من هالخبر حالي من حالك

شهم.. انت شدتحچي محسن ؟!!
اني شوصيتك ولك

مو الف مره گتلك هذا الكلب ابن الكلب يخصني
مو گتلك هذا مسؤليتك اذا صار اي شي انت تتحمل النتيجه

گلت لو لااااااااااااااااا
چاوبني لتظل ساكت

محسن.. گلت سيدي گلت
بس وابو فاضل العباس اني داير بالي علي طول النهار
ولمن ينتهي دوامي موصي جماعة الخفر يخلون عيونهم علي طول الليل

شهم.. هذا الحچي ميصرفلي محسن
اريد عماد من چوه الگااااااااااااع

تحفرها وتطلعه الي وإلا بس رب العالمين يخلصك من بين اديه

محسن.. اهدأ سيدي الله يخليك
هسه ادز على جماعة الخفر واشوف شنو السالفه
اكيد واحد منهم متعاون ويا ومشرده

شهم.. بس تكمل مهمتك لم غراضك والله ومحمد وعلي وياك

محسن.. شنو يعني سيدي ؟!!

شهم.. يعني مالك شغلك هنا بعد

محسن.. لا سيدي
ابوس ايدك كلشي ولا تطردني
الله وكيلك عائله كامله برگبتي منين اعيشهم

شهم.. مو مشكلتي هاي .. دبر روحك بأي طريقه
يلا ولي من خلقتي

بس طلع من يمي خابرت ماهر هو الوحيد اليگدر يساعدني حتى اطلع من هالمصيبه

شهم.. ها خويي شلونك

ماهر.. هلا حبيبي
بخير اسأل عنك

شهم.. رحم الله والديك
اگول ماهر هذا القذر شرد من ايدي

ماهر.. منو ؟؟؟

شهم.. عماد منو يعني قابل

ماهر.. لا بشرفك
شلون شرد ؟؟

شهم.. ما اعرف يا حيوان متعاون ويا ومشرده
هسه احقق وياهم واشوف

ماهر.. وهسه شنو المطلوب مني

شهم.. ابو الوگفات الحلوه اريده منك للمره الثانيه

ماهر.. من عيوني
بس السالفه يحتاجلها وقت شويه

شهم.. انتظر مو مشكله بس المهم تلزمه الي

ماهر.. تتدلل ابو الشهامه

شهم.. حبيبي تسلملي يالغالي

سديت الخط منه وگمت للخفر .. نزلت دگ تحقيق بيهم من التسعه ل١٢ بلليل

چان عندي استعداد افصل الكل اذا ما وصلت للحقيقه بس حتى يرتاح گلبي
اخير شي اعترف واحد منهم شلون تعاون ويا مقابل الفلوس

شهم.. محسن ذبه بالتوقيف

-لاسيدي الله يخليك سامحني بس هالمره

شهم.. بسررررررررررعه

محسن.. صار سيدي

رجعت الغرفتي حولت اسمه بورقه للتحقيق وصحت محسن

شهم.. هاك هاي الورقه تسلمها للجنة الانضباط الصبح وتتوكل على الله

محسن.. شنو يعني سيدي ؟؟ مصر على قرارك

شهم.. اي
عالم مو گد المسؤوليه ما احتاجهم يمي

محسن.. مثل متحب سيدي

شهم.. الله وياك

خليت ورجعت للبيت .. اول ما طبيت صار مياس گدامي خزرتها على گد ما ضجت من الشي البدر منها اليوم

مياس.. ليش تأخرت ظل بالي يمك

ما جاوبتها خليت وصعدت فوگ
هستوني دخلت للغرفه حسيت ع الباب انفتح
درت وجهي وتفاجأت بمياس اجت ورايه

شهم.. شعندچ هنا

مياس.. اريد اعتذر منك
اسفه والله مو قصدي ارفع صوتي عليك

شهم.. اطلعي مياس

مياس.. شهم بس اسمعني

شهم.. ما اريد اسمع منچ ولا حرف واحد
اطلعي بسرعه قبل لا ابتلي بيچ

مياس.. شهم اني

شهم.. اطلعييييييييييي

مياس.. نزيت من مكاني : الله يخليك اسمحلي افسرلك الصار

جرني من ايدي دفعني لخارج الغرفه وقفل الباب
ظليت صافنه ويا روحي شويه وحسيت على دموعي بللت خدي

نزلت جوه دخلت الغرفتي وشبعت بچي .. بيومها للصبح ما گدرت انام من القهر

ومنا بدت معاناتي ويا الوجه الثاني الشهم

تغير تماماً للأسف
مو هذاك الحنين الچنت ما اسمع منه إلا الكلمه الطيبه

صار شخص ثاني ميعبرني ولا يهتم بيه وحتى ميشوفني گدامه ولا يحسبني بحياته من الاساس

مر شهر ع الموضوع والحال ظل مثل ما هو .. صار وقت عرس جهاد وتبارك وانخبصنه بالتجهيزات طول هاي الفتره

قبل العرس بيوم واگفه گدام كنتوري فاتحه الباب واتصفن ع الملابس محتاره شراح البس

ما عندي شي بي حظ للحفله لأن سنتين تقريباً اني لابسه اسود
بلأول على مهيب وبعدين على نهى الله يرحمهم لذالك ما اشتريت ملابس من زواجي

انفتحت الباب ودخلت منال عليه بس شافتني بهاي الحاله ضحكت بسرعه

مياس.. لتضحكين والله حايره

منال.. هههه تدرين ليش ضحكت

مياس.. ليش ؟؟

منال.. لان هستوني اجيت من سمر
ونفس هذا الوضع شفتها بس لمن دخلت عليها .. هم فاتحه الكنتور. وصافنه على ملابسها

مياس.. يعني محتاره مثلي مو

منال.. اي

مياس.. زين شلون بينه لعد

منال.. گولي الشهم ياخذكم تشترون ملابس للحفله ترى ما ظل شي

مياس.. منال صدگ تحچين
مو تدرين بي ميحاچيني صارله اكثر من شهر

منال.. ميحاچيچ شي
وينفذ واجباته اتجاهچ شي ثاني

مياس.. شلون يعني ما فهمت ؟!

منال.. بطلي ثول ولچ
يعني هذا واجبه .. اذا هو مياخذچ ويشتريلچ احتاجاتچ منو اليشتري لعد

مياس.. اي صح
يعني هسه شنو اصعد اگله

منال.. اي بسرعه لحگي علي قبل ليطلع حتى تاخذون سمر وياكم

مياس.. يلا رايحه

منال.. اركضي ههههه

صعدت ع السريع دگيت الباب صاح : تفضل
دخلت علي لگيته مبدل ديطلع بس عاينلي رفع حاجبه مستغرب جيتي

شهم.. خير !!

مياس.. اريد اشتري شي البسه العرس جهاد
ونونه هم ما عدها
وسمر هماتين
اذا ما عندك مانع اخذنه هسه حتى نشتري

شهم.. اي ماشي
روحي تحضري ع السريع

مياس.. اي ما اتأخر

نزلت طايره فرح
دگيت الباب على سمر ودخلت بسرعه

مياس.. سموره جهزي نفسچ شهم راح ياخذنه نشتري ملابس لعرس جهاد

سمر.. گمزت من مكانها : احلفي بالله

مياس.. ههههه والله
بسرعه جهزي روحچ قبل ليغير رأيه

سمر.. هوى حبيبتي هوووى

طلعت الغرفتي اركض لبست بنطرون بيجي وقميص طويل لون زيتوني
لفيت الشال بسرعه وطلعت لگيت شهم ينتظرنه بالصاله

بس باوعلي رفع حاجبه
دنگت اعاين الملابسي اريد اعرف ليش باوع عليه هالشكل ما شفت شي غريب

مياس.. شنو اكو شي ؟؟

شهم.. لا
سمررررررررر

سمر.. ها خالو

شهم.. يلا وين صرتي تأخرنه كلش

سمر.. هاي اجيت بس البس شالي

شويه وطلعت من غرفتها چانت لابسه مثلي تقريبا هم بنطرون وقميص طويل

شهم.. ما عدچن ملابس استر من هاي

سمر.. ليش خالو ما بيهن شي مستورات

شهم.. لا مو مستورات
ما اريد اشوف هالملابس عليچن مره ثانيه

سمر.. صار
بس خلي نشتري اشياء الحفله وكلشي تريد يجرالك

شهم.. يلا امشن

عفت نونه يم منال وطلعنه للمولات
٤ ساعات يلا اختارنه البدلات بحيث شهم عاط بينه اخير شي

شهم.. توبه اطلع وياچن بعد
إلا اذا تخبلت ساعتها محد يحاسبني على كلمتي

سمر.. خلصنه خالو
بس بقت الاحذيه والمكياج

شهم.. هلوووووو

سمر.. خالو لعد نلبس البدله ونمشي حافي
لو نطلع بلا مكياج

شهم.. سمر والله تعبت
اذا انتن اربع ساعات يلا اختاريتن الملابس
المكياج والاحذيه يمكن باچر الصبح يلا ترسون عليهن

سمر.. ههههه لا هذني منتأخر بيهن وداعتك

شهم.. ديلا خل نشوف

وهم ساعه كامله يلا خلصنه من كلشي
رجعنه للبيت ذبنه من الباب وراح ما اعرف وين

ظلينه طول الليل نگدر بيهن اني وسمر لحد ما غفينه
ثاني يوم گعدت على صوت الهلاهل .. عاينت الساعه بالسبعه

گمت بالگوه .. غسلت وطلعت للصاله شفت الكل گاعد

سمر.. ولچ ليش نايمه لهسه
گومي خلي نجهز روحنه للعرس

مياس.. ادري شبيكم خبصتوا الدنيا من الصباحيات قابل انتم المعرسين الخاطر الله

الحجيه.. چا هذا عرس جهودي شلون ما تردينه ننخبص

منال.. يلا تعالن ويايه

مياس.. وين

منال.. الغرفتي اجهزچن قبل لا التهي بالهوسه

مياس.. يا شعنده وتجهزينه

منال.. يلا ولچ
شعدها ام حلگ

راحت قبلنه ولحگناها اني وسمر
عاينت عليها محضره المعدات الحربيه هههه
شيره على خيط على مكاين كول دتجهز العروس

قفلت الباب وبلشت بسمر
حفتلها وسوت الشيره واخير شي لفت شعرها

ظليت صافنه عليها حتى ام الصالون متلحگها على هذا الشغل

مياس.. منال شلون تعرفين كل هذا ؟؟

منال.. ام زوجي چانت عدها صالون وچنت اشتغل وياها لذالك كلشي اعرف

مياس.. هااا مو اگول

منال.. روحي جيبيلي الكاويه من غرفة سمر نسيت اجيبها

مياس.. ماشي

خليت حجابي على راسي وطلعت
صار جهاد گدامي هستوه گاعد من النوم
بس شفته فرحت مثل اي طفله التفرح بالعروس والعريس

جهاد.. شو تضحكين
اذا على شكلي ترى هستوني گاعد من النوم

مياس.. هههه لا والله مو قصدي
الف مبروك

جهاد.. الله يبارك بيچ يا طيبه

مياس.. يااااااا نسيت الكاويه

جهاد.. ههههههه

رحت اركض جبتها من غرفة سمر ورجعت .. اول ما طبيت عاطت منال بيه

منال.. وين صرتي يمعوده مو تأخرنه

مياس.. هاي اجيت

كملت من سمر باوعت عليها صارت تخبل .. طلعت من الغرفه وظليت بس اني ومنال

منال.. لابسه شي جوه

مياس.. اي فانيله

منال.. اي زين لعد
نزعي وابقي بس بالداخليات

مياس.. يا والله استحي

منال.. مياس لتخليني اگوم اكفشچ
مو هستوني اشتغلت السمر گدامچ
فضيني بسرعه ما عندي وقت زايد اضيعه ويا مستحاچ

مياس.. يلا هسه راح انزع

نزعت التراك بس احس نفسي صخنت من الخجل .. ظليت بس بطرگ الفانيله
گعدت گبالها ضحكت من وجهي لأن صار احمر

منال.. على كيفچ ويا روحچ هاي ومتزوجه يعني مو جديده عليچ السالفه

مياس.. يمعوده صارلي سنين حتى نسيت كلشي
اگلچ خو متوجع هاي

منال.. ههههه لا متوجع بس تسمط سمط

مياس.. گمزت من مكاني : ما اريد بطلت والله

منال.. تعالي ولچ لتشلعين گلبي

مياس.. والله ما بيه اتوجع

منال.. تحملي لأن وراها راح تصيرين چكليته بلكت الاخ يموع عليچ

مياس.. شنو يموع عليه

منال.. لا يالكعبه
شوكت تشغلين مخچ بس اريد افتهم

مياس.. منو تقصدين شهم

منال.. لا ابويه الله يرحمه

مياس.. لا يمعوده هذا يموع بلد وميموع هو

منال.. اذكرچ بعدين
ديلا اگعدي بسرعه مو طيحتي حظ حظي

گعدت گبالها
هستوها دتشتغل بيه انفتحت الباب لان نسيت اقفلها...

يتبع..