رواية مياس قلب الشهم الفصل الرابع والأربعون 44 - بقلم لبنى الموسوي

#مياس_قلب_الشهم

للكاتبه #لبنى_الموسوي

و الله ما طلعت شمسٌ و لا غربت إلا و حُبّكَ مقروناً بأنفاسي ❤

طفيت الضوه وتمددت بصف شهم داير ظهره الي .. تقربت منه كلش لحد ما صرت يمه
عرفته نايم من انفاسه العاليه

ظليت صافنه علي .. گلبي يدگ سريع ممصدگه روحي نايمه بصفه
غمضت عيني واني اشم عطره لحد ما غفيت

فتحت عيوني الفجر الضوه هستوه طالع
خليت ايدي على راسي دايخه ما اعرف ليش
صحصحت شويه وچان انصدم بأيد شهم على بطني

جفلت بمكاني من التوتر واني دا احس على انفاسه الحاره قريبه مني

درت وجهي على كيف حتى لا يگعد وچان اشوفه دافن راسه برگبتي وأيده محاوطه خاصرتي ونايم على هالوضعيه

هنا اني گلبي وگف من صدگ .. كلشي بعد ما احس من كبر الصدمه
اريد اتحرك ماكو كأني نشليت

غمضت عيوني احاول استجمع قوتي شويه .. فتحت بخوف وبديت اسحب نفسي من حضنه بهدوء قبل ليحس

هستوني دا اوخر عنه تفاجأت من رجع سحبني اله وطوق خاصرتي

مياس.. دخليك ربي خلصني من هالموقف قبل  ليگعد
دخيلك يا الله دخيلك

ظليت حايره شسوي وشلون اخلص روحي من هالورطه .. دا افكر ويا نفسي سمعت نونه تتحرك نشف الدم بعروگي من الخوف

بچت بصوت عالي فتح عيونه بسرعه .. ظل على نفس وضعه شويه وطفر من مكانه بعد ما استوعب الموقف

گام ع السريع يفرك براسه ويگح .. دنگت منه لأن استحي اباوع علي ورحت النونه حتى اسكتها

حسيت علي طلع من الغرفه .. احتاريت بيها جوعانه تريد حليب وما اگدر انزلها ويايه لأن صعب اشتغل وهي بيدي

فجأه انفتح الباب ودخل شهم .. تقرب مني سحبها من ايدي يسكتها
عفتهم ونزلت ع السريع اسويلها الممه

رجعت فوگ لگيته ديصلي ونونه گاعده بصفه تلعب بالعابها
شلتها من يمه شربتها الحليب ولملمت الغرفه دا انزل وگفني صوته

شهم.. وين ؟؟

مياس.. الغرفتي

شهم.. ليش مو النسوان بعدهن بيها

مياس.. اي بس صار الصبح ما ظل شي ويروحن

شهم.. اسف على الشي الصار قبل شويه

مياس.. درت وجهي علي : اني الاعتذر .. خربت عليك نومتك

شهم.. ارجعي نومي نهاوي ونامي وياها بعد وكت

مياس.. وانت ؟؟

شهم.. شويه واروح للمركز عندي شغل مهم

رجعت للچربايه نومت نونه وحطيتها بالسرير .. ظليت متمدده ما اگدر انام
اسمعله يقره قرأن بالنص ساعه تقريباً اخير شي لف السجاده وگام

شهم.. شو ما نمتي

مياس.. ما اجاني نوم بعد
گمت ع السريع : نازله اسويلك ريوگ بين متبدل

شهم.. تنزلين هيچ ؟!!

مياس.. باوعت الملابسي : ماكو احد هسه الكل نايم واول ما انزل اروح الغرفتي اغيرهن

شهم.. لا يابه لا
فوتي لبسيلچ شي من ملابس نهى الله يرحمها يلا تنزلين

مياس.. والله هسه..

شهم.. ميااااااس
لتعانديني .. امشي سوي الگتلچ علي بسرعه وبلا لغوه زايده

مياس.. صوتك عفيه لتگعد نونه

شهم.. راح فتح الكنتور بعصبيه .. طلع جبه وشمرها گبالي : هاچ لبسي

ما حچيت شي
لبستها ونزلت للمطبخ دا اسوي الاكل سمعت الهلاهل اشتغلت .. درت وجهي شفت منال طبت تضحك ويا الحجيه

مياس.. الف مبروك ام جهاد
ربي يسعدهم ان شاء الله ويفرحچ بجهالهم

منال.. بعد گلبي ميوسه .. ويسعدچ يا رب

الحجيه.. المن دتسوين الريوگ

مياس.. الشهم يريد يطلع للمركز

الحجيه.. لعد سوي فدور للعالم راح يگعدون هسه

مياس.. صار خاله

بس طلعت الحجيه اجتني منال ع السريع لزمتني من ايدي وتحرك بحواجبها

مياس.. ههههه يا هاي شبيچ !!

منال.. شصار فوگ ولچ

مياس.. دنگت بسرعه : ما صار شي

منال.. شو ارفعي راسچ وخلي عينچ بعيني
علينه مياس .. اعترفي ولچ شسوالچ المضروب

مياس.. ههههه والله كلشي ما سوالي ليش متصدگين

منال.. هذا شبي ؟؟ اصعد هسه افلش الغرفه على راسه القافل

مياس.. هههه اگلچ متلتهين بابنچ ومرته وتعوفينه بحالنه

منال.. مياس الله عليچ احچي الحقيقه
شو وجهچ مورد مو مال مصاير شي .. لا لا ما اصدگ

مياس.. خجلت بسرعه : وداعة نونه مصار شي مهم

منال.. يعني صار
دحچي بشرفچ حتلو مو مهم

مياس.. نمت يمه ع الچربايه

منال.. فضحتني بصوتها : احلفي بالله

مياس.. لزمت حلگها : اشششش يمعوده ليسمعوچ

منال.. يلا يلا راح انصي صوتي
احچي شلون نمتي يمه

مياس.. ردت انزل بعد ما نومت نونه بس ما قبل لأن خاف تگعد لمن تحس بيه مو يمها

نام هو ونمت بعده .. حسيت الفجر لگيته حاضني بلا ميحس

حاولت اسحب نفسي منه بس ما گدرت لحد ما فز على صوت نونه

منال.. الله
وشسوه لمن شاف نفسه حاضنچ ؟؟

مياس.. ههههه
فز مخروع الله وكيلچ
طلع من الغرفه شويه ورجع اعتذر مني على هالشي

منال.. امممم تطور حلو
بلشت الامور تمشي صح واخيراً

مياس.. هههه لو اعرف بيش دتفكرين چان ارتاحيت والله

منال.. مو هسه بنيتي
بعدچ صغيره على هالسوالف

مياس.. احترگ الچاي يبووووو
شگول عليچ منال

منال.. هههه دذبي وسوي غيره احسن ميحچي عليچ بعدين

مياس.. هو هم هيچ
اگول صدگ شصار ويا العرسان

منال.. ما ادري بعدهم نايمين
هسه يجون بيت عمي يجيبون الريوگ ويگعدون حتى افهم منهم شصار

مياس.. خير ان شاء الله

طلعت من يمي ورجعت اسوي الريوگ .. حسيت على شهم دخل للمطبخ
درت وجهي علي شفته كاشخ كشخه من هاي التمام

شهم.. كملتي لو لا

مياس.. اي
بس انت وين رايح ؟!!!

شهم.. مو گتلچ للمركز

رفعت حاجبي باستغراب .. باوعتله صافن بوجهي انتبهت الروحي ودرت عنه بسرعه

خليتله الريوگ وگعدت اتريگ ويا لان بعد شويه يبدي الشغل وما الحگ احك راسي ساعتها

هستونه مخلصين سمعنه صوت الهلاهل .. عرفت اهل تبارك اجو جابو الريوگ
دا اطلع من المطبخ صاحني

شهم.. لحظه مياس

مياس.. نعم ؟؟

شهم.. مد ايده لجيبه : هاچ هاي انطيها التبارك هدية صباحيتها

چانت علبه ذهب .. اخذتها منه افتحها وتفاجأت لمن شفتها مداليه اية الكرسي نفس الجابها الي بزواجي  

ابتسمتله وطلعت من المطبخ .. شفت العرسان بالصاله رحت باركتلهم
شويه واجه شهم باركلهم وانطه الجهاد ورقه

مياس.. حبيبتي توته هاي هديه مني ومن شهم وان شاء الله تعجبچ

تبارك.. بوستني وفتحتها تضحك : عمري تجنن فدوه الگلبچ
شكرا شهم

شهم.. تلبسيها بالعافيه ان شاء الله

جهاد.. عاشت ايدك خالي

شهم.. وايدك حبيبي
يلا رايح لشغلي اني تردون شي

الحجيه.. لا يمه سلامتك

اول ما طلع شهم راحت تبارك ويا خواتها للغرفه وجهاد ظل يم ابوها بالصاله .. قريب الساعه يلا طلعن من يمها

سلموا حتى يرحون چلبنه بيهم ع الغده ما قبلوا .. ركضت الغرفت جهاد قبل لا يرجع لأن الفضول راح يموتني اريد اعرف شصار وياهم

مياس.. ولچ تبارك احجيلي شصار بسرعه

تبارك.. هههه اخذي نفس حبيبتي
شبيچ مو راح تموتين

مياس.. اي والله الفضول راح يموتني
احچي فدوه لتصيرين لئيمه

تبارك.. هههه اطمأني حبيبتي كلشي تمام

مياس.. گولي والله

تبارك.. والله

مياس.. عفيه بالسبع ولا تصورت راح يدبرها وهو بهالحاله
طلع جاكي واني ما عندي خبر

گحت فجأه .. باوعتلها باستغراب
اشرتلي بحواجبها ع الباب

درت وجهي وچان اشوف جهاد واگف ورايه يضحك راد يغمى عليه من الفشله

جهاد.. هذا منو جاكي

طفرت من مكاني .. طلعت وسديت الباب ورايه
رحت بوجهي للمغسله غسلت حتى اخفف حرارة الفشله من وجهي شويه

صعدت فوگ لملمة الغرفة ونزلت نونه ريگتها وبلشت بشغل البيت لحد الظهر

- بعد ما رجعت من الزفه نمت بسرعه من التعب .. حسيت على الباب تندگ فتحتها وتفاجأت بمياس شايله نهاوي وواگفه گبالي

باوعتلها چانن ملابسها مال نوم استغربت كلش .. وبعد ما عرفت بسبب جيتها وگعت ع العله
كلها سوالف منال ترتد تورط البنيه بيه بهاي الطريقه

ظلت تنوم بالطفله لحد ما غفيت على روحي بلا ما احس

گعدت الفجر على صوت نهاوي تبچي
فتحت عيني بتعب حسيت براحه مو طبيعيه مفتقدها من زمان

صحصحت شويه وچان انصدم بنفسي حاضن مياس و وجهي بنص رگبتها

گمزت من مكاني ع السريع وطلعت من الغرفه

رحت للحمام متفاجأ من نفسي ومستغرب الشي الصار ويايه .. ظليت اغسل واحاول اهدأ بنفسي لحد ما توضيت ورجعت للغرفه

دخلت لگيت نهاوي تبچي اخذتها الحضني .. ونزلت مياس تسويلها ممه

اول ما رجعت رادت تنزل ما خليتها واعتذرت منها عن ما بدر مني لان ادري بروحي حرجتها وحرجت نفسي وياها بهل تصرف  

استعجلت بالطلعه للمركز حتى اخلص من التفكير .. اول ما وصلت لهناك خابرت ماهر اشوف شصار ويا بسالفة عماد

شهم.. صباح الخير

ماهر.. هلا عضيدي
صباح الانوار

شهم.. حبيبي انت
بشر شصار وياك بموضوع عماد

ماهر.. ماكو شي رفعت بي تقرير بلاعتداء علمود نبرر سبب موته واليوم الفجر سلمنه جثته لاهله

شهم.. شگالوا ؟؟

ماهر.. شيگولون يعني
ابنهم وراح منهم وانت تعرف الضنه شگد غالي

شهم.. الله يرحمه هو الختار نهايته بأيده ما چنت حاب توصل الامور الهل مواصيل

ماهر.. الله يرحمه

شهم.. تعبتك ويايه
الله يجازيك بالخير وما انسالك فضلك طول حياتي

ماهر.. ما بيناتنا هالرسميات شهم .. لتزعلني منك يول

شهم.. هههه رحم الله والديك
يلا استأذن خويي

ماهر.. الله وياك

سديت الخط منه تذكرت محسن : اني ردت انطي درس عن الشي الصار حتى ينتبه الشغله مو اكثر

خابرته ما جاوب اكيد بعده نايم .. نص ساعه ورجع اتصل عليه

شهم.. ها محسن شلونك

محسن.. اهلا سيدي
بخير اسأل عنك يا طيب

شهم.. رحم الله والديك حبيبي
تعالي للمركز بسرعه

محسن.. خير خو ما صاير شي

شهم.. خير ان شاء الله
تعال وتعرف كلشي

محسن.. اقل الساعه واكون يمك

شهم.. هلا بيك

سديت الخط وظليت اشتغل .. فعلا اقل الساعه اندگت الباب ودخل محسن

محسن.. السلام عليكم

شهم.. وعليكم السلام ورحمة الله

محسن.. خير سيدي

شهم.. تعال استريح اول

محسن.. گول سيدي والله ظل بالي

شهم.. اني ما طردتك منا إلا علمود انطيك درس حتى ليتكرر هالشي مره ثانيه

محسن.. ادري سيدي
اني غلطان واعترف بغلطي

شهم.. مصار شي حبيبي
تگدر من اليوم ترجع الشغلك
وهسه وروح للمحاسبه خليهم يصرفولك راتب الشهر الفات على حسابي

محسن.. فرح خطيه : رحم الله والديك سيدي جميلك هذا على راسي من فوگ

شهم.. تستاهل محسن

محسن.. استأذن منك

شهم.. اخذ راحتك عيوني

كملت شغلي المتراكم لأن صارلي فتره ممداوم بسبب تجهيزات عرس جهاد ورجعت للبيت

غيرت ملابسي ونزلت يمهم .. هستونه دنتغده دگ جهاز مياس
رادت تگوم منعتها

شهم.. عوفي كملي غداچ هسه

سمعت كلامه وما گمت بس ظل بالي : منو ممكن يكون ديتصل بيه اشو تبارك وهنا

كملنه الغده والتهيت بالمطبخ وهوسته لحد ساعه ثنتين الظهر
تذكرت الاتصال فجأه رحت ع السريع لگيت ابويه متصل مرتين

خفت كلش من اتصاله بمثل هالوقت .. خابرته اكثر من مره ما رد عليه اخير شي دزيتله رساله : بس تشوف مكالماتي اتصل ضروري بابا

اخذت نونه ورحت الغرفتي .. هستوني طبيت رجع دگ عليه

مياس.. ها بابا وينك

اشرف.. هلا بنيتي 

مياس.. شنو هذا صوتك ؟؟ شبيك بابا

اشرف.. تعبان كلش

مياس.. سلامتك الف سلامه
شتحس

اشرف.. ما اعرف والله
صارلي يومين حتى للشغل مدا اطلع واخوانچ هم حال الضيم حالهم لأن محد الهم واني بهل وضع

مياس.. هسه راح اگول الشهم يجيبني الك لتشيل هم

اشرف.. يا ريت بنيتي ولو ازحمچ

مياس.. لا بابا شنو هالحچي
شويه ونصير يمك

اشرف.. هلا بيكم

سديت الخط منه .. شلت نونه وصعدت الشهم ع السريع
دگيت الباب لگيته متمدد دينام

مياس.. شهم

شهم.. ها مياس خير

مياس.. ابويه مريض كلش

شهم.. خيره شبي ؟؟

مياس.. ما اعرف بس حالته فدور بحيث حتى مدا يگدر يشتغل

شهم.. والمطلوب ؟؟

مياس.. اخذني اله هسه

شهم.. شنو يعني تظلين هناك ؟!

مياس.. على الاكثر اي لان من صوته مبين علي مريض كلش

شهم.. لعد ونهى ما فكرتي بيها

مياس.. اخذها ويايه طبعاً

شهم.. شنوووو !!
لا يابه اگعدي راحه .. وين تاخذيها

مياس.. لعد شلون شهم
تدري بيها متعلقه بيه كلش .. اذا بتت هناك شلون تنام ومنو الها

شهم.. منال موجوده
ان شاء الله شغلته بسيطه ومتباتين يمهم

مياس.. ان شاء الله

شهم.. يلا روحي انطيها المنال وغيري ملابسچ

نزلت ع السريع وصيت منال على نونه وطلعنه لبيت اهلي

وصلت فتحلي الباب مصطفى .. دخلت للبيت شفت ابويه متمدد وشحاله خطيه

مياس.. سلامتك بابا
من شوكت هاي حالتك

اشرف.. صارلي فتره بس هسه زادت كلش

شهم.. گوم ابو مصطفى خل اخذك للمستشفى

اشرف.. ما اريد ازحمك

شهم.. شنو هالحچي يمعود
يلا شو انطيني ايدك

سنده شهم گومه وجبت ملابسه .. ساعده يبدل واخذه للسياره
وگفت اباوع الهم صعده ورجعلي بسرعه

شهم.. طبي ليش واگفه بالباب

مياس.. طمني عنه عفيه

شهم.. ان شاء الله
قفلي الباب من جوه ولتفتحيها لأي احد منا لما اجي
ما اوصيچ بعد

مياس.. اي ماشي

طبيت وقفلت الباب بالسرگي .. نظفت البيت لأن هوسه كلش واخذت اخواني للحمام غسلتلهم

ساعتين واندگ الباب .. صحت منو سمعت صوت شهم فتحتها ع السريع

مياس.. ها بشر

شهم.. دوخري خل يگعد يرتاح بلاول

دخل سانده على ايده نيمه بفراشه وغطا .. باوعلي مبتسم :

شهم.. عاشت ايدچ خوش ترتيب

مياس.. شگلك الدكتور فدوه

شهم.. مابي اي شي

مياس.. شلون يعني مابي اي شي ؟؟

شهم.. والله ما اعرف
سويناله كل الفحوصات والتحاليل بس ما طلع بيهن خلل اخير شي الدكتور گال يجوز حاله نفسيه مو اكثر

مياس.. وشلون هسه ؟!

شهم.. خلي يصير العصر واخذه للدكتور اشوف شيگول على حالته

مياس.. شكرا الك تعبناك

شهم.. على شنو بويه ما سوينه شي
اريد انام شويه .. راسي يوجعني

مياس.. اي تتدلل .. امشي الغرفتي نام هناك

اخذته ورحت للغرفه .. نزل الفراش فرشته اله وطلعتله المخاديد
دا اطلع سمعته يگول :

شهم.. مياس بلاربعه ونص گعديني حتى الحگ احجز الابوچ يم الدكتور

مياس.. صار
انزع ملابسك واخذ راحتك طالعه اني

طلعت وسديت الباب ورايه .. ظليت يم ابويه اكل بنفسي علي واني اشوفه ديلوب گبال عيني ومو گادره اخفف عنه الألم

ما صدگت صارت الاربعه ونص .. گمت ع السريع اگعد شهم
دخلت لگيته نايم انكسر خاطري علي بس لازم اگعده

مياس.. شهم
شهم اگعددد

شهم.. اي گعدت
بيش ساعه صارت ؟؟

مياس.. اربعه ونص
يلا اني راح اروح البس ملابسك وتعال ورايه

طلعت من يمه سويت چاي ع السريع حتى يعدل راسه لأن شكله دايخ وتعبان كلش

صبيته ورحت للصاله شفت شهم واگف يم المغسله يمشط بشعره .. وگفت قريب منه انتظره يخلص وعيني على ابويه الگاعد يلوب بروحه

شهم.. اي عاشت ايدچ

اخذه مني شربه ع السريع وراح الابويه .. سنده وطلعوا سوه وهم وصاني ع الباب اقفلها وما افتحها لأي مخلوق منا لما يجي

تأخروا كلش للسبعه وهم ماكو .. رحت صليت و وگفت اسوي العشه الاخواني لأن جاعوا خطيه

هستوني مخلصه دا اجهزه بالمواعين اندگ الجرس 
باوعت من الشباك شفت سيارة شهم فتحتها بسرعه

شهم.. رفع حاجبه : ليش فتحتيها بدون متصيحين منو

مياس.. شفت سيارتك لذالك عرفتك اجيت
تفضلوا

طب ويا ابويه نومه بالصاله .. تقربت اباوع على ابويه شلون متغير والتعب واضح على وجها الشاحب

مياس.. شگال الدكتور

شهم.. كلشي ما گال بس انطا مهدئات وهاي هي

مياس.. شنو يعني شهم ؟؟ ليش محد ديوگع على علته الله يخليك جاوبني

شهم.. ما ادري والله ما ادري
سويلي عشه بس كون خفيف حتى توكلي واعلمچ على اوقات علاجه

مياس.. اي هو سويت شوربه علموده
راح اصب النه فدور لأن اخواني جاعوا

شهم.. ما اشتهي اني

مياس.. ماكو متشتهي
تاكل يعني تاكل

شهم.. ههههه شنو هي السالفه عناد

مياس.. اي عناد

عفته ورحت للمطبخ كملت تجهيز العشه .. دا اخذ السفره طب عليه مبتسم

شهم.. اساعدچ بشي ؟؟

مياس.. ههههه گول والله

شهم.. اي لعد ليش

مياس.. مديت ايدي : هاك السفره افرشها بالصاله يم ابويه

شهم.. جيبي

راح يفرشلها واني ظليت اضحك ويا روحي ع الموقف .. شويه ورجع حط المواعين بالصينيه واخذهن فد مره

تعشينه وانطا الابويه علاجه وعلمني على اوقاته بالنهار .. سلم حتى يروح
وصل للباب دار وجها عليه

شهم.. مياس اقفلي البيبان والشبابيك زين ولو تحترگ الدنيا متفتحين الباب الأحد لو منو ما كان

مياس.. صار
دير بالك على نونه عفيه وبوسها الي اول متوصل

شهم.. ان شاء الله
يلا مع السلامه

مياس.. الله وياك

راح وقفلت الباب ورى مثل ما طلب مني .. مر الوقت واني مگابله ابويه وحايره بي وبعلته المدا اوگع عليها حتى يرتاح وارتاح ويا

بعد ما نومت اخواني واتطمنت على ابويه تمددت انام بس بفكري الف شغله وشغله

ظليت على هالحاله افكر ..
شي بنونه
شي بابويه واخواني
وشي بشهم الما اعرف شلون تخلص سالفتي ويا لحد ما نمت على روحي

حسيت على صوت موبايلي يدگ فوگ راسي فزيت مخروعه .. باوعت للساعه فوگ الوحده
شلت الجهاز شفت شهم ديتصل جاوبت بسرعه

مياس.. ها شهم خير

شهم.. اني بالباب گومي فتحيلي بسرعه

مياس.. ياااااا
شصاير الله عليك

شهم.. دگومي يمعوده افتحيها وانت تعرفين

سديت الخط وركضت حافي .. خفت شصاير بحيث جايني بهيچ وقت
فتحت الباب وتفاجأت من شفته شايل نونه بيده

بعد ما طلعت من بيت اهل مياس رحت قابلت يوسف ومناك للجم لحد العشره يلا رجعت للبيت

اول ما فتحت الباب سمعت صوت نهى تبچي .. دخلت بسرعه شفت منال شايلتها وتفتر بيها تحاول تسكتها

شهم.. السلام عليكم

الحجيه.. واخيراً شرفت وليدي

شهم.. شبيها ؟!!

منال.. يمعود تسكت دقيقه وتبچي ساعه هاي احنه على هالحاله من طلعتوا لحد الأن

الحجيه.. وين مرتك شهم ليش ما اجت وياك ؟؟

شهم.. تبات يم اهلها يمه

الحجيه.. وكتها هسه ؟!
متشوف البيت مخبوص بالخطار علمود زواج جهاد

بعدين شلون تبات هناك وتعوف الطفله وحدها ما فكرت شراح يصير بيها وهي مو يمها

شهم.. استغفر الله رب العالمين واتوب اليه
فركت وجهي حيل : يمه ابوها مريض لذالك اضطرت تنام يمهم

الحجيه.. وبنتك هاي شيسكتها فهمني

شهم.. انطينياها منال

اخذتها منها افتر بيها بلكت تسكت بس بلا فائده

ساعه كامله انشلع گلبنه اني ومنال وياها اخير شي انسطرت من البچي ونامت بحضني

منال.. اللهم صلِ على محمد وآل محمد
واخيراً نامت

شهم.. خويه اخذيها الغرفة مياس نوميها هناك ونامي يمها .. بلكت لمن تظل بمكانها تجرها للطبح

منال.. اي هو اني ردت اسوي هيچ من اول

اخذتها مني وصعدت فوگ .. غيرت ملابسي وگعدت اتفرج تلفزيون ما اعرف شلون غفيت 

حسيت على منال تگعدني وصوت بچي نونه بأذني .. فتحت عيوني شفتهن گدامي

شهم.. ها بعدها تبچي

منال.. گوم خويه الخاطر الله
نامت نص ساعه وگعدت تبچي عجزت اسكتها بس بلا فائده

شهم.. وهسه شلون ؟!!

منال.. شلون يعني
گوم وديها الامها لأن ماكو غير حل .. الطفله راح تموت من البچي والتعب
حتى نوم مدتقبل تنام

شهم.. هاي ليش هالشكل متعلقه بمياس

منال.. شنسوي هي نحسه ما تلافي غير امها

شهم.. جيبيها عنچ وفوتي جهزي غراضها حتى اوديها هسه

منال.. اي الله ينطيك العافيه خويه

راحت تجهز الغراض واني ظليت اهز بيها بس معانده بنت الاوادم
عشر دقايق ورجعت اخذتها مني بدلت ع السريع وطلعنه

خليتها بحضني وما ادري شلون سيطرت اسوق على هالوضع .. اول ما وصلت خابرت مياس لأن مو مال ادگ الجرس بهيچ وقت

شهم.. ها ولچ شو سكتي ملعونه
من هسه تموتين على الخواره مبينه الشغله

حسيت على الباب انفتحت درت وجهي شفت مياس تعاين علينه باستغراب

شهم.. لتصفنين
شعلت شيب الخلفونه بالبچي لحد ما استسلمت وجبتها الچ

مياس.. اخذتها منه : عمري انتي
سوده عليه يروح امچ
باوعت الشهم : طب ليش واگف

شهم.. لا ارجع للبيت

مياس.. وين ترجع بهل وقت المتأخر
فوت نام هنا

شهم.. هذا وينه البيت خطوتين يمعوده

مياس.. الله عليك طب ولتعاند

شهم.. نايمين

مياس.. اي الكل ناموا

وخرت من الباب حتى يطب .. ظل يباوع شويه عليه وشويه على نونه لحد ما دخل واخيراً

فتت گدامه للغرفه .. انطيته نونه وفرشت الاخواني بالزاويه لأن نايمين بصفي چانو
دا اشيلهم منعني

شهم.. هاي شدتسوين ؟!!
اتركي عنچ اني اشيلهم...
انطاني نونه وشالهم الفراشهم

مياس.. نام هنا .. واشرتله على مكاني

شهم.. وانتي وين تنامين ؟!

مياس.. هسه انزل المندر من الكنتور وافرشه بهاي الجهه

راح نزلي المندر وفرشه بنفس المكان الاشرتله علي .. صرت قريبه منه بيناتنه بس فراش نونه

تمدد بملابسه لأن اكيد ميگدر ينزع واني موجوده .. نومت نونه على رجلي دقايق وغفت من التعب

خليتها بفراشها وگمت طفيت الضوه .. نمت بفراشي اباوع علي نايم وحاط ايده على عيونه

مياس.. شهم

شهم.. نعم

مياس.. انزع ملابسك حتى تاخذ راحتك
اني راح ادور وجهي عنك .. لتتقيد بيه 

درت وجهي شويه وحسيت علي گام دينزع .. غمضت عيوني وگلبي يدگ مثل كل مره اقترب بيها منه او نكون سويه بمكان واحد

شهم.. اخذي راحتچ تغطيت

ما صدگت گلي هيچ .. درت وجهي ع السريع اباوع علي
ظل على نفس وضعه حاط ايده على وجها لحد ما غفه

بقيت اراقب كل تفاصيله
وجها
شعره
شواربه
انفاسه الواضحه
جسمه البارز بالفانيله
لحد ما غفيت على نفسي

گعدت الفجر على صوت نونه .. گمت ع السريع شلتها حتى ليحس عليها

سويتلها ممه ورجعت نومتها .. باوعت علي نايم على وجها ومتكشف من الغطه
صعدت الحراره عندي من المنظر

گمت ع السريع غطيته ورجعت المكاني نمت .. حسيت الصبح على مصطفى ديگعدني

مصطفى.. ميوس اگعدي

مياس.. ها حبيبي

مصطفى.. ليش نومتينه بعيد عنچ
ومنو جاب نونه لهنا

مياس.. عمو

مصطفى.. لعد وينه

مياس.. هذا نايم هنا .. احچي واني مغمضه

مصطفى.. وينه ماكو احد

فتحت ع السريع ما لگيته .. طلعت للصاله ادور علي ماكو بس ابويه بعده نايم

رجعت للغرفه اخذت موبايلي وخابرته رد من اول المكالمه

مياس.. صباح الخير

شهم.. صباح النور

مياس.. وين رحت

شهم.. للمعارض

مياس.. ليش ما گعدتني اسويلك ريوگ

شهم.. تريگت هنا ليظل ببالچ
خو ما اذتچ نونه بلليل لأن نمت وما حسيت على شي بعد

مياس.. لا خطيه بس مره گعدت جوعانه وبس شربت الممه رجعت نامت

شهم.. زين لعد
ديري بالچ عليها ما اوصيچ .. وديري بالچ على نفسچ هم

مياس.. ان شاء الله

شهم.. مو تنسين دوه ابوچ

مياس.. لتوصيني

شهم.. خليتلچ فلوس جوه مخدتچ اخاف تحتاجين شي ومع ذالك اني راح امرلچ يوميه

مياس.. شكرا بس مچان الهن داعي

شهم.. بلا هالحچي الزايد

مياس.. ماشي اخذ راحتك

شهم.. الله وياچ

سديت الخط وگمت الشغل البيت .. مرت الايام بصعوبه لأن بعدي عن شهم مچان سهل نهائياً

صح يوميه اشوفه بس هالشي مو كافي .. الساعه اليجيني بيها متغني عن وجودي ويا تحت سقف واحد

وبعد مرور ١٥ يوم گعدت بثمانيه على صوت الجرس .. غسلت وجهي ورحت اباوع من الشباك شفته شهم فتحت ع السريع

شهم.. صباح الخير

مياس.. صباح النور

شهم.. ابوچ گعد لا

مياس.. ما ادري
تفضل ليش واگف

دخلنه سوه شفت ابويه گاعد .. سلم علي وگعد يمه
ظليت يمهم اريد اعرف شيريد منه

شهم.. ابو مصطفى خابرت اخوتك مثل ما اتفقنه وراح يجوك اليوم

مياس.. ليش يجون ؟!!

شهم.. ياخذوا الشيخ معروف هناك بلكت يوگع على علته بما انو الاطباء عجزوا عن معرفة السبب

مياس.. واخواني شلون ؟؟

شهم.. ردت ابقيهم يمنه بس عمچ اصر ياخذهم ويا

اشرف.. بالگوه حچه : لا اخذهم ما ارتاح ابقيهم واروح

شهم.. يلا اني اترخص واجيك العصر ويا جيتهم ان شاء الله

اشرف.. تعبناك ويانه

شهم.. اهل احنه ما بيناتنه هالرسميات

اشرف.. رحم الله والديك

طلع شهم بس روحي راحت بعد هالخبر السمعته منه .. ظليت طول اليوم الوب على ابويه شلون راح يروح وهو بهاي الحاله

جهزت ملابسه هو واخواني وكل احتياجاتهم .. للخمسه اجو عمامي
اتصلت على شهم عشر دقايق واجه هو هم

حضنت ابويه ابچي لأن حالته گطعت گلبي وخفت كلش لا اخسره على ساعه
ودعت اخواني واخذوهم عمامي وراحوا

رحت جبت غراض نونه وفصلت الاجهزه عن الكهرباء .. قفلت البيبان وطلعت ويا شهم

صعدت بالسياره باوعت علي وجها ميتفسر من العصبيه : الصبح مچان بي شي !!

استغربت وخفت بنفس الوقت
من الهوسه والقهر مچنت منتبهه على شكله وحالته المو طبيعيه

مياس.. شهم صاير شي ؟؟

شهم.. خل نوصل للبيت

خفت من رده كلش بس ما جاوبته ولا حاولت افهم شبي .. اول ما وصلنه للبيت اخذ نونه مني وگال :

شهم.. اسبقيني الغرفتچ

مياس.. وين ماخذها ؟!!

شهم.. المنال
يلا روحي الغرفتچ انتظريني هناك

مشيت عنه والخوف سيطر حتى على رجلي .. ما اعرف شمسويه من مصيبه وديحاول يحاسبني عليها

دخلت للغرفه وفتحت عيوني لمن شفت......

يتبع