#مياس_قلب_الشهم
للكاتبه #لبنى_الموسوي
وبعد شهر بالضبط گعدت الصبح دايخه كلش ومالي خلگ لأي شي ... بالگوه اشتغلت ويا البنات حتى لتزعل الحجيه وتصيرلي مشاكل من لا شيئ
للظهر واگفه ع الطباخ اسوي الغده ويا نهى حسيت نفسي الدنيا افترت بيه وبعد ما اشوف شي گدامي
لزمت راسي اريد احچيلها حتى تساعدني ما سيطرت على روحي ووگعت من طولي
فتحت عيوني لگيت نفسي بالصاله وشهم فوگ راسي بس مبين على ملامحه القلق
مياس.. شصار
شهم.. ليش هيچ سويتي بروحچ مياس ؟؟
مياس.. شنو ؟ شسويت ؟!!
شهم.. صك على سنونه : اني چم مره گتلچ اكلي ... فهميني تريدين تموتين نفسچ لو شنو بالضبط
ردت اجاوبه حسيت بدوخه .. رفعت ايدي الزم راسي تفاجأت من شفت المغذي مشدود بيها ،، فتحت عيوني على شهم
مياس.. هاي شنو !!
شهم.. ضغطچ صفر إلا شويه ... اخر مره اعيدها مياس انتبهي على نفسچ واكلي زين لتزعليني منچ ترى نخرب كلش
مياس.. اي ماشي راح اكل بس لتزعل
شهم.. هذا علاجچ اخذي بوقته اريد اجي الگا فارغ تسمعيني لو لا
مياس.. اي سمعت
هستوني دا اطب للبيت واسمع نهى تصيح الحگولي بكل صوتها
رحت اركض للمطبخ خايف عليها ليكون صارلها شي تفاجأت بمياس متكومه بالگاع متحرك ساكن
شهم.. هاي شصاااار ؟!!
نهى.. ما ادري شهم وگعت فجأه الحگ عليها عفيه ليصيرلها شي
ركضت شلتها وديتها للصاله وخابرت اخو نهى الچبير لان دكتور حتى يجي يطمنه
اجه كشف عليها طلع ضغطها مصفر إلا شويه همزين ما ماتت وطبعا سبب هالشي امتناعها عن الاكل من التحق مهيب لليوم
عاتبتها وشددت بالحچي وياها بلكت تخاف وتنتبه على نفسها شويه ... ولو حقها ما الومها بعد كلشي صار اذا اني من يمي تعبت هي شلون الله يكون بعونها
شهم.. نهى
نهى.. ها حبي
شهم.. مياس صحت بس يخلص المغذي افلتي منها و وديها لغرفتها حتى ترتاح ولتنسين علاجها بعد الاكل
نهى.. صار من عيوني
شهم.. تسلم عيونچ حياتي .. صاعد انام شويه
نهى.. براحتك گلبي
بعد ما تخربطت نهى صارت تهتم بيه كلش .. تگعد يم راسي توكلني مثل الطفل وشهم رايح جاي يجيب حلويات علمود الهبوط لحد ما نفسي لعبت
ما اعرف شلون اجازي هلاثنين بس فعلا هم نعمه من رب العالمين الي وطبعا ما انسى منال المتقبل امد ايدي بشغل البيت من يوم التخربطت لحد اليوم
بعد مرور شهر ثاني تحسنت تقريبا بفضل شهم ونهى ورجع وضعي طبيعي بس ظل گلبي متلوع على فراگ مهيب الما سمعت صوته من يوم ما التحق
صح چنت اعرف اخباره من شهم لان يتواصل ويا جماعته هناك ويسأل عنهم بس هالشي مو كافي حتى يريحني
فد يوم العصر گاعدين بالصاله نتابع مسلسل تركي ومندمجين وياها .. سمعت خطوات شهم ع الدرج نزل يريد يطلع للمعارض
شهم.. تردون شي طالع اني
نهى.. لا حبي سلامتك
دار وجها ديطلع وانصدمنه من انفتحت الباب وطبوا مهيب وجهاد
محد منه تحرك من مكانه .. الكل جفلوا ممصدگين دنشوفهم واگفين على طولهم گبال عيونه
دا اطلع للمعارض انفتحت الباب وطبوا مهيب وجهاد للبيت
شفتهم گدامي لو اني نشليت بگاعي من الصدمه ما اعرف شوصف احساسي بهذاك الوقت
ضحكوا بوجهي فتحتلهم ايدي اجو يركضون لحضني
مهيب.. شتاقيتلك وعلي
جهاد.. شتاقينه لرزايلك خالي
شهم.. يبعد روحي وكل هلي .. وحگ ابو فاضل مو بگد ممشتاقلكم اني يالسباع
ظل شهم حاضنهم ويبوس بيهم شويه وركضت منال عليهم ولحگتها الحجيه
وگفت بمكاني اعاين عليهم ودموعي تجري ممصدگه مهيب رجعلي بالسلامه ودا اشوف طوله گدامي
شبعوهم بوس ومحاضن وهم يضحكون عليهن لأن ما خلن شي ما سونه هلاهل على چكليت گلبنها عرس ومو اي عرس
شويه والتفت مهيب عليه بابتسامه .. شال جنطته وراح للغرفه
شهم.. مياس
مياس.. نعم
شهم.. روحي الرجلچ جاي تعبان حضريله الملابس حتى يغسل ويرتاح
چنت واگفه خجلانه اروح ورى اخاف ينتبهون عليه لحد ما شهم گلي روحي لرجلچ .. ما صدگت بسرعه رحت حتى احضنه وابرد نار شهرين من الانتظار
طبيت للغرفه ركض تفاجأت من ما لگيته : شنو معقوله طب للحمام بهل سرعه
دا احچي ويا نفسي حسيته سحبني بقوه لأن چان خاتل ورى الباب ..
درت وجهي علي حضنته بكل حيلي واني اصيح :
مياس.. شتاقيتلك يا روحي والله متت من شوقي الك واخيرا رجعتلي ممصدگه وداعة عيونك ممصدگه
هذا انت گدامي لو نايمه ودا احلم اذا حلم ما اريد اصحى منه واذا انت صدگ گدامي فما اقبل تعوفني بعد
مهيب.. حط ايده على شفتي : ههههه على كيفچ ويا روحچ حياتي اهدي شويه
انطيني فرصه خلي احچي اكلتيني بگشوري
مياس.. اي احچي ،، اصلا احچي ولتسكت ابد لان شتاقيت الكلامك ولصوتك الحلو
مهيب.. واني شتاقيت الحبيبة گلبي بگد رحمة الله
مياس.. حضنته حيل : الله عليك هذا انت يعني مو حلم
تفاجأت لمن گرصني من ايدي خلاني اعيط من الوجع
مياس.. اااخ هاي ليش خبيث
مهيب.. هههه حتى تتأكدين مو حلم
مياس.. رجعت حضنته : هههه احبك والله
مهيب.. واني اموت اموت عليچ مو بس احبچ ... بس وخري خلي اروح اغسل وارجعلچ متشوفيني شحالني
مياس.. شبي حالك اصلا تخبل
مهيب.. هههه بهل تربان
مياس.. هل تربان التحچي عنهن فخر الي ولكل عراقي
مهيب.. هههه حياتي انتي فدوه للسانچ العسل
يلا طلعيلي ملابس خلي اغسل
مياس.. مو تتدلل
ركضت طلعتله ملابس علگتهن بالحمام وراح يغسل ... گعدت بالغرفه انتظره على نار نص ساعه يلا طب للغرفه
مياس.. نعيما حبي
مهيب.. ينعم عليچ گلبي
مياس.. اسويلك چاي ؟؟
ذب الخاولي من راسه ودار وجها قفل الباب .. تقرب مني بابتسامه لحد ما صار يمي حاوط خصري وغمزلي
مهيب.. شسوي بالچاي هسه بس احم احم گبل اصحصح
مياس.. ههههه وهو شنو الاحم بلا ؟؟
مهيب . ها يعني متعرفي ،!!؟
مياس.. امممم لا اعرفه بس اريد اشوفه بعيوني
مهيب.. اويلي الله
يعني مشتاقتلي بگد ما مشتاقلچ
مياس.. واكثر وداعتك
مهيب.. تعالي لعد خلي اطلع ضيم الشهرين بيچ
مياس.. اوگف مهيب لحظه بس اسمع ولك اسمع ههههه
فصل فيشه خلص .... تقرب مني بلهفه والاشتياق چان سيد الموقف بهذيچ اللحظه
صار المغرب دفعته مني حتى اصحي لان ممنتبه ع الوقت
مياس.. مهيب
مهيب.. ها يروحه لمهيب
مياس.. راح يأذن
مهيب.. صدگ ؟!!
مياس.. هههه والله
مهيب.. گومي يمعوده لتصيرلي شيطان
مياس.. هاي اني متأكد ؟!!
مهيب.. باسني من خدي يضحك : لا حياتي اعترف اني الشيطان بس منو السبب يا ترى
مياس.. هههه انت السبب
مهيب.. لا حبيبي انتي السبب
مياس.. هههه دگوم خلي نغسل ونصلي
مهيب.. بس شرط هاا ... اريد بلليل داس ثاني
مياس.. تقصد ثالث ترى لحد الان ماخذ داسين ههههه
مهيب.. وان شاء الله راح تگعدين تحسبيلي خاتون
مياس.. لا حب اخذ راحتك الگاع گاعك والعب بكيفك
مهيب.. اخ الله شلون راح العب لعب مال سنتين ليگدام
مياس.. ههههه دگوم يمعود مو راح الوقت علينه
غسلنه ع السريع وصلينه سوه .. عفته يقره قرأن وطلعت اسوي العشه ويا البنات
شفت جهاد گاعد بالصاله يسولف ويا شهم .. تقربت منه اسلم علي
مياس.. الحمد لله على سلامتك جهاد
جهاد.. ابتسم بوجهي : الله يسلمچ مرت خالي
شهم.. وين رجلچ ؟
مياس.. ديقره قرأن
عفتهم ورحت للمطبخ بعدني ما طبيت استلمني نهى ومنال يتحارشن بيه
منال.. خوش غطه غطيتي عيني
نهى.. هاي شبيچ غير چان يلعبون
منال.. وعاد ليا شوط وصلوا
نهى.. انتهت بالتعادل بلليل الاشواط الاضافيه والفجر ضربات الجزاء
مياس.. يااااااا صدگ تحچن !!!
منال.. هههههه شوف البرائه مسويه روحها حبابه ،،، امي قبل شويه چانت تلعب احي بالغرفه
نهى.. بشرفچ حياتي سولفيلنه شلون چان اللقاء .. وغمزتلي
مياس.. ههههه والله عيب عليچن
نهى.. هو شنو العيب لتخليني اروح اختللكم بالكنتور حتى ارضي فضولي
مياس.. هههه وين شهم خل يجي يسمع مرته شدتحچي
نهى.. سامع حبيبتي لان اني ما فالحه بس بالحچي
انقهرت عليها من گالت هيچ .. رحت عليها حضنتها وگمت اشاقيها حتى اضيع الموضوع
مرت ليله من اجمل ليالي حياتي واني باحضان مهيب ... عرفت منه راح يرجع هو وجهاد بعد خمس ايام بس ما اهتميت لان ردت انسى كلشي وما افكر غير بس باللحظه الدا اعيشها ويا حالياً
عدت الخمس ايام بسرعة البرق ورجع مهيب التحق من جديد وچان وداعنه الهم ميقل عن وداع اول مره
رجع الخوف والقلق سيطر عليه مره ثانيه بس حاولت اتماسك واتفائل بالخير حتى ارجع اشوفه مره ثانيه
بعد شهر من التحاق مهيب تقريبا چنت گاعد اسولف ويا نهى بغرفتها ... حسيت نفسي دخت مثل هذيچ المره
نهى.. ها شبيچ ؟؟
مياس.. دخت كلش
نهى.. ليش يا ستار خاف هم رجع ضغطچ هبط
دتحچي حسيت على شهم طب للغرفه .. خجلت منه دا اگوم راسي افتر وردت اوگع لزمتني نهى ع السريع
نهى.. الله الله
شهم.. يا بويه شبيچ متگوليلي هم رجعنه لنفس السالفه شلون تالي وياچ
مياس.. لا والله دا اكل زين
شهم.. نهى جيبيلي جهاز الضغط خل اشوف ضغطها
جابتله الجهاز گعد يقيس ضغطي شويه ورفع راسه خزرني
مياس.. شنو شبيك !!
شهم.. تاكلين مو ؟؟؟ لعد وهذا النزول منين صار اذا دتاكلين
مياس.. صدگني دا اكل بس ما اعرف ليش هيچ نازل
نهى.. شهم
شهم.. نعم
نهى.. خاف حامل
رفعت راسي الها فاتحه عيوني من كلامها .. عاينتلي والابتسامه على وجها فجأه گمزت حضنتني
نهى.. والله حامل حاااااامل
شهم.. صدگ تحچين نهى !!
نهى.. اي شهم لان الحامل لو يصعد ضغطها لو ينزل مستحيل يستقر
بس حچت هيچ خجلت كلش .. گمت طلعت من الغرفه ع السريع واني احس دگات گلبي تقره الف من الفرحه
ركضت الغرفتي .. سديت الباب وشبعت بچي بدون ما اعرف السبب
شويه حسيت نفسي هدأت .. رحت للمرايه وگفت گبالها اعاين على روحي واتخيل مهيب حاضني من ورى ويبوس بركبتي مثل ميسوي دائما
بهلاثناء اندگت الباب وطبت عليه نهى
نهى.. شنو هاي عيونچ حبي ؟؟
مياس.. ولا شي حياتي
نهى.. ركضت حضنتني : فدوه اكيد فرحانه
مياس.. اي كلش
نهى.. بعد عمري ،، بس حاچيني فاتتچ لو لا
مياس.. ما ادري هي مخربطه بس اتصور اي
نهى.. لعد شهم گال اليوم ناخذچ حتى نحللچ
هيچ وتطلعين حامل مياس .. وربي إلا اوزع چكليت بنص الشارع
مياس.. هههه شنو هالگلب الطيب بس اريد اعرف
نهى.. مو اطيب من گلبچ
متدرين شهم شلون فرحان ليگول هو راح يصير اب مو مهيب
مياس.. انقهرت كلش من گالت هيچ : حياتي مو بعيده على رب العالمين الله يفرحكم ويجبر بخاطركم
نهى.. فرحتنا من فرحتكم وداعتچ
مياس.. اروح فدوه الكم انتو الزوج
نهى.. اسم الله عليچ ولچ لتحچين هيچ
صار العصر اخذوني شهم ونهى احلل .. كمل التحليل وگعدنه ننتظر النتيجه شويه وصاحوا اسمي
رحت وياها اخذنه ورقة التحليل ودفعت نهى الفلوس
نهى.. اشوفها اني لو انتي ؟؟
مياس.. اني شعرفني انتي شوفيها
نهى.. بسم الله
فتحت الورقه وهي مغمضه ... رفعت راسها ليفوگ تردد ايات قرأنيه من الخوف حسبالك النتيجه الها خطيه
نهى.. مياس راح اباوع
مياس.. يلا ولچ مو گلبي راح
نزلت راسها ع الورقه چان تعيط بصوت عالي خلت الناس تعاين علينه
نهى.. عاااااااااااااااااا ... ولچ حااااااااامل
مياس.. الله عليچ
نهى.. حضنتني حيل : اي والله والله والله
مياس.. يا رب الف الحمد لله والشكر
نهى..امشي بسرعه خلي نبشر شهم .. لا اوگفي بسرعه شنو انتي حامل
امشي على كيف
او لا اوگفي لتمشين خلي اشوفلج بلكت اكو عربانه اطلعچ بيها ليبره
مياس.. ههههه نهى
نهى.. ها حبي ها
مياس.. اصحي حياتي ترى اني حامل ما نشليت
نهى.. لا اسم الله عليچ شنو هالحچي
بس والله ممصدگه احس گلبي راح يوگف من الفرحه
مياس.. هههه يمعوده اهدي ليصيرلج شي لا سامح الله
اخذتني لازمتني من ايدي واحسها تريد تطير حتى توصل الشهم ... طلعنه برى شفته واگف منتچي ع السياره وشابك ايده ينتظرنه بس شافنه اجه ع السريع
شهم.. ها بشروا
نهى.. انطيني البشاره بسرعه حياتي
شهم.. الله عليج
نهى.. اي والله
شهم.. رفعت راسي : الف الحمد لله والشكر ربي
الف الحمد لله والشكر
الف مبروك بابا ربي يتمملچ على خير ان شاء الله
مياس.. دنگت خجلانه : الله يبارك بيك
نهى.. روح جيبلي جيس چكليت اوزعه ع العالم
شهم.. وين توزعي ؟!!
نهى.. هنا بالشارع
شهم.. من كل عقلچ !!
نهى.. هذا نذر حياتي غصبا عني وعنك اوفي
شهم.. ههههه شوكت تعقلين بس اريد اعرف
نهى.. التاخذ واحد مثلك حرام تعقل
شهم.. هههههه ديلا اصعدن بالسياره اروح اجيب الچكليت وارجعلچن
راح وصعدنه .. اقل الخمس دقايق رجع بيده علاگتين
شهم.. هاچ حياتي انزلي وزعي بس بداخل المجمع لا بالشارع
نهى.. وهاي العلاگه الثانيه شنو ؟؟
شهم.. هاي لبنيتي
مدلي ايده : تفضلي
نهى.. شبيها خلي اشوف عفيه
شهم.. هههه وانتي شعليچ هي حشريه
نهى.. ميوسه معليچ بي بداعتي خلي اشوف شبيها
مياس.. هههه هاچ حبي كلها گدامچ
اخذتها تدور بيدها واني وشهم خربانين عليها ضحك .. رجعتها الي وهي مبتسمه
نهى.. الف عافيه حياتي بس شرط كلهن تاكليهن بيوم واحد
مياس.. حييييل جايبلي المحل كله وتگولي اكليهن بيوم واحد
شهم.. هههه الف عافيه باباتي
نهى.. الله يعافيك وينطيك ويرزقك ويخليك يا شهم يا ابن سهامه گولوا امين
شهم.. ههههه ديلا اذا خلصتي لواگه نزلي وزعي الجكليت حتى نتحرك
نهى.. هههه اي نازله
راحت توزع الچكليت .. ظليت صافنه ممصدگه اني حامل خليت ايدي على بطني وابتسمت
عاينتلها بالمرايه صافنه ومبتسمه فرحت كلش لفرحتها واخيرا بدت الدنيا تضحكلها بعد كل التعب الشافته بحياتها
رجعت نهى تحركنه للبيت .. اول ما طبينه تلگتنه امي من الباب
الحجيه.. ها يمه بشر
شهم.. الف مبروك حجيه حفيدچ بالطريق
الحجيه.. كلللللللللللللللللللللوش .. تعالي خلي ابوسچ على هالخبر
لزمت مياس و وگعتلها دگ بوس : الحمد لله من هل خبر جاب مفعوله وياها حتى تفك ياخه عن البنيه
حسيت الحجيه فرحت كلش بخبر حملي وفرحت منال متقل عنها بس رنا مدري شبيها ضاجت وحتى ما باركتلي
ما اهتميت الأي شي لأن ما اريد انزع فرحتي بحملي
ظليت اعد الايام يوم يوم بس اريد مهيب يجي وابشره بهل خبر الحلو .. الدقايق ساعات والساعات ايام والايام سنين هيچ يلا مر الوقت عليه
بعد شهرين من حملي واگفه وحدي بالمطبخ اسوي النفسي حليب لان مجبوره اشربه بأمر من شهم وإلا شيخلصني من لسانه اذا يعرف بيه مخالفه اوامره
درت وجهي دا اطلع .. اجه ابن الحلال بذكره
شهم.. ها بابا شلونچ
مياس.. الحمد لله زينه
شهم.. عفيه عليچ هيچ اسمعي كلامي من الاول
مياس.. هههه واني اگدر ما اسمع كلامك
شهم.. اليوم عندي الچ مفاجأه العصر
مياس.. فرحت مثل الجهال : وشنو هي الله عليك
شهم.. مو گلنه مفاجأه .. بس اگدر اغششچ شويه
مياس.. ههههه يلا غششني
شهم.. راح اجيبلچ شي كلش تحبينه
مياس.. يعني شنو
شهم.. هههه لا لهنا وكافي خلص الغش بعد
مياس.. لو ما گايلي احسن هسه راح اظل افكر منا للعصر ... شيصبرني بلا
شهم.. ابتسمت ومديت ايدي على راسها : اصبري بابا الصبر حلو
مياس.. طلع من المطبخ ظليت صافنه ورى : شنو هذا الشي الاحبه والله راح اتخبل معقوله لعابه اي ماكو غيرها لان اني احب اللعابات كلش
صار وقت الغده تغدينه ورحت لغرفتي اتصفح بالفيس من ضوجتي .. ساعتين تقريبا دگت نهى عليه الباب
نهى.. حبي گومي ويايه عندي الچ مفاجأه
بس گالت هيچ تذكرت كلام شهم ... گمت من مكاني ع السريع
مياس.. شنو هي بشرفچ ؟؟
نهى.. دتعالي ويايه وتعرفين
ذبيت حجابي على راسي وطلعت وياها للصاله ... لگيت شهم واگف وگدامه علبه مغلفه غلاف هدايا
مياس.. فرحت كلش : هاي الي ؟!!
شهم.. اي الچ
مياس.. شنو بيها
شهم.. فتحيها وتشوفين
ركضت عليها بحيث ردت اوگع على وجهي لو ما شهم لزمني
شهم.. الله يمعوده شجاچ ما راح تطير على كيفچ
مياس.. هههه راح افتحها
شهم.. ابتسمت : يلا شمنتظره
فتحتها بلهفه واني افكر شنو ممكن تكون هل هديه ... نزلت دموعي بلا ما احس على نفسي لمن شفت كتب الثالث بداخلها
مياس.. مسحت دموعي : هاي شنو !!
شهم.. كتب الچ حتى تدرسين بس خارجي احسن .... واذا ع المدرسين فأني ونهى موجودين يمچ بيچ خير وتتدللين
عاينت النهى تضحك بوجهي ... گمت ع السريع وحضنتها حيل
مياس.. الله يخليكم الي يا اطيب ناس عرفتهم بحياتي
شهم.. ويخليچ النه يا احلى بنيه
نهى.. يعني هسه مياس بنتي هههه
مياس.. يمه شلون ام صدقه لله ،، وگرصتها بخدها
شهم.. هههه الله يعقلچن ان شاء الله
بيومها الفرحه ما وسعتني بحيث نمت والكتب فوگ راسي لأن ممصدگه راح ارجع للدراسه العفتها غصبا عني
ثاني يوم بديت ادرس رتبلي شهم جدول بالنهار الدرخيات وبلليل الشرح علي هو ونهى
الواهس مو طبيعي بحيث ٢٤ ساعه عيني بالكتب يا دوب بس اصلي واتغده اما الشغل فمحد يخليني الزم حاجه لأن حامل ويخافون عليه
بعد اسبوع گاعده الظهر بالغرفه اقره كالعاده حسيت الباب انفتحت رفعت راسي وانصدمت من شفت مهيب واگف يعاينلي بابتسامه
نسيت كلشي گمزت من مكاني ورحت اركض الحضنه ممصدگه رجعلي
مياس.. ابوس بصدره واصيح : حياتي واخيرا رجعت طولت عليه هالمره كلش ليش هيچ ليش
مهيب.. ههههه يگلبي انتي شسوي والله مو بيدي بالگوه شلعت نفسي حتى اجي اشوفكم يومين وارجع
مياس.. شتاقيتلك والقرأن
مهيب.. مو بگد شوقي الچ
التفت ع الچربايه مبتسم : ها بديتي تقرين
مياس.. فتحت عيوني علي : وانت شمدريك ؟!!
مهيب.. ههههه تخابرنه اني وشهم وهو گلي
مياس.. ضربته على صدره حيل : خبيث يعني تتصل بشهم وتنساني اني اعلمك
مهيب.. هههه لا والله حبي هن دقيقتين بس سألني عن رأيي بالموضوع وسديت الخط
مياس.. احبك والله
مهيب.. حضني : واني هم احبچ وميت بحبچ
مياس.. تغسل
مهيب.. اي والله ضروري اكلت جراب هناك
مياس.. الله يساعدك : ثواني واحضرلك الحمام
مهيب.. گرصني من خدي حيل : لك من صدقه لربك يا عسل انت
جهزتله كلشي وطب يغسل ... طلعت للصاله لگيت الكل مجتمعين يعني شافوا مهيب قبلي
مهيب انطاني خبر بجيته بس ما گلت المياس حتى تصيرلها مفاجأه وبنفس الوقت هو هم يتفاجأ بخبر حملها
من زمان اريد ارجعها للدراسه بس ما صارتلي فرصه لحد ما خابرت مهيب على رقم القائد مالتهم وبلغته بالفكره رحب بيها وما عارض
سويتلها مفاجأه وچانت الفرحه المرسومه على وجهه من شافت الكتب گدامها ما شايفها عليها لحد اليوم
اجو مهيب وجهاد وارتاحيت كلش من شفتهم گدامي بخير وسلامه .. گعدوا بالصاله شويه بعدين كلمن راح الغرفته يغسل حتى يذبون تعب هل اشهر الصعبه
طلعت مياس من غرفتها تضحك لأن فرحانه برجعت مهيب .. صارت عيونها عليه ابتسمت واشرتلها تجي تگعد يمنه
الحجيه.. ليش عفتي رجلچ وحده
مياس.. ديغسل خاله ،، اگول جهاد هم اجه ويا ؟؟
شهم.. اي فوگ بالحمام
دنحچي نزل جهاد ينشف بشعره .. عاينتله وابتسمت
مياس.. الحمد لله على سلامتك
جهاد.. الله يسلمچ مرت خالي
ربع ساعه ظليت وياهم اخير شي انسحبت اشوف مهيب خاف طلع من الحمام ..
دخلت للغرفه ما لگيته دقيقتين وطب ورايه .. بس شافني ابتسم وفتحلي ايده رحت اركض لحضنه
مهيب.. مشتاقلچ والكعبه
مياس.. هههه اني هم مشتاقتلك يعمري انت
رفع راسي بأيده باسني من شفتي بلهفه ... اريد ابعده حتى ابشره بخبر حملي ماكو فصل
دست على رجله حيل حتى اصحي .. عاط بصوت عالي
مهيب.. ااااخ .. ولچ ليش هيچ
مياس.. هههه اسفه حبي بس ما عندي غير هالطريقه اصحيك بيها
مهيب.. وليش تصحيني بت الحلال
اخذت ايده خليتها على بطني .. فتح عيونه على وسعهن لان عرف قصدي
مهيب.. شنو حامل
مياس.. اي حياتي
مهيب.. والله والله
مياس.. والله والله
مهيب.. يا ربي والله مدا اصدگ ،، مياس الله عليچ خو متتشاقين ويايه
مياس.. لزمت وجها بيدي : وداعة هالوجه الحلو دا احچي صدگ
رفع راسه ديعيط لزمت حلگه حتى امنعه فشله من اهله كلهم بالصاله
مياس.. هههه عليك الله اسكت والله عيب من اهلك
اخذني من ايدي وطلع يركض .. صفنت علي هذا شبي شديسوي
تفاجأت من وگفني بنص الصاله وعاتب شهم
مهيب.. ليش شهم چنت تعرف وما فرحتني مع الأسف عليك
شهم.. هههه مو ما حبيت اخرب لمياس مفاجأتها
جهاد.. شكو ؟؟
شهم.. راح يصير اب
جهاد.. گام حضنه : الف مبروك ضلعي
مهيب.. الله يبارك بيك يوم الألك ان شاء الله
منال.. امين
كلهم گاموا يباركوله وهو ما منطي فرحته لأحد وهالشي چان واضح من تصرفاته
ظلينه يمهم بالصاله لحد المغرب .. صليت وسويت العشه ويا نهى ورنا
نهى.. تعالي شو
مياس.. ها حبي
نهى.. تقربلچ مهيب ؟؟
مياس.. هههه شنو هالسؤال الغريب ؟!!
نهى.. احچي ولچ
مياس.. لا وين لحگ متشوفي گاعد يمكم من اجه لحد الأن
نهى.. حياتي لعد انتبهي لتخلي يروح بيها زايد علمود ابنكم
مياس.. شلون يعني ؟!!
نهى.. يعني وصي يدير باله من يتقربلچ وبس مره مو تتخبلون وتنسون ارواحتكم
مياس.. هلوووو ،، بلا هذا شيقنعه
نهى.. ههههه انتي قنعي لخاطر ابنچ
مياس.. ماشي گلبي مشكوره
خلصنه العشه .. رتبت المطبخ هستوني دا اطلع وكف مهيب بطريقي
مياس.. هههه هاي شبيك وخر خل افوت
مهيب.. غمزلي وابتسم : امشي للغرفه
رحت ويا اول ما طبيت جرني لحضنه دفعته ع السريع حتى افهمه بكلام نهى
مياس.. حياتي بس اصبر لازم تسمعني
مهيب.. شنو عمري گولي
مياس.. لتتخبل عليه لان مو زين على ابنك
مهيب.. انتي معليچ اطلعي منها اني وابني نتفاهم
مياس.. ههههه مهيب ترى دا احچي صدگ
مهيب.. ولچ هذا سبع على ابو لتخافين علي
مياس.. ههههه لا والله !!! دسمع لعد
ردت احچي خله شفته على شفتي سكتني وووو
طبيت غسلت وطلعت اقره لان ما كملت جدول اليوم بسبب رجوع مهيب
راح يمهم بالصاله ل١٢ دخل عليه لگاني ادرس
مهيب.. خاتون راح اشمرچ انتي والكتب من الشباك
مياس.. هههه ليش حبي
مهيب.. ادري بت الاوادم هن يومين وارجع اولي مگابله الكتب وگاعده شنو
مياس.. هاي سديتهن ولا يهمك
قفل الباب واجاني يضحك .. شمر الكتب من الچربايه وگعد گبالي
مياس.. مهيب
مهيب.. ها يروحه لمهيب
مياس.. اعقل شحاچيتك قبل شويه
مهيب.. ما اريد اعقل
مياس.. هاي شبيك مخايف ع الطفل
مهيب.. ولچ صارلي فوگ الشهرين جدي مشتعل يا طفل يا بطيخ
مياس.. ههههه مهيييب
مهيب.. بلا تنعوص شو تعاااااي
ايام قليله وصار وقت رجعت مهيب للحشد .. حسيت نفسي اختنگت من الوضع بس ما بيدي شي غير اصبر روحي منا لما الله يفرجها
مياس.. حبي لتتأخر عليه مثل هالمره الله يخليك
مهيب.. هههه ولچ والله مو بيدي
مياس.. حاول فدوه لگلبك والقرأن غيابك يتعبني
مهيب.. باسني من خدي : تتدللين يروحي
مياس.. دير بالك على روحك
مهيب.. وانت هم ديري بالچ على نفسچ
حط ايده على بطني : وديري بالچ على ابني وياچ
مياس.. شعندي غيركم
مهيب.. يلا صار لازم اروح حياتي
مياس.. حضنته حيل : راح اشتاقلك
مهيب.. واني هم ،،، مع السلامه
مياس.. الله وياك
لبست حجابي وطلعت ورى ع السريع ،، شفتهم ديودعون بيهم كالعاده بس اهون من وداع كل مره لأن تعلموا على روحتهم
وبعد اسبوعين من التحاق مهيب چنت نايمه الصبح فزيت ساعه سبعه وثلث على صوت صرخات بالبيت بس چان الصوت مرعب بشكل ....
يتبع..
مهيب 💔 مياس
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!