رواية مزهق للإقتصاص الفصل الرابع 4 - بقلم رمش عقيل

مزهق للإقتصاص.

بقلمي:رمش عقيل

تصويت لطفاً.التعليق بين الفقرات.🤍

꧁ـــــــــــــــــــــــ꧂

على المِيت جوادر تنصب الناس؟
وانا الميت عليك شرَاح تنصبني؟
انصبلك جوَادر داخل الرُوح
ياروح تشوفك وانتَ جَادرها

꧁ــــــــــــــــــــــ꧂

النار تلهب بكل زاوية من المضيف أصوات تداخلت،
صراخ، هرج، ركض بس ما گدرنا نحچي صوتنا ختنگت من الـ دخان هو ركض فتح الباب بكل قوته بس الگدامه چان كله محترگ عبارة عن نار ما بيه ممر ما بيه أمل

طلع الفون ماله يتصل وصوته يرجف ركض يدور مكان ما بيه نار بس ماكو ماكو غير اللهب صوت الولد بعيد يحچون وحـمزة يصيح وكلشي يدوي مثل طبول القيامة

أنـي ختنكت الدخان دخل بروحي ما بقى هوهاء اجه
لفني بجاكيت ماله. قماش صار بيني وبين الموت

سند راسي على صدره وصدره يدگ.

::-اديان عيني حبيبتي فدوه اروحلج تحملي

اديان::-راح انموت

::-ولكمممم يلاااا احفااد شدهاان كل خيرر ما بيكم

غفار::-ابن الكلب اجابك بنصاص اليالي تتختل

::-نعال على حلكك يلا ولكك راحح تموتت

أبتسمت وكتله

::-لو ادري ما جايتك

::-هوه اني حضي اغبر الاولى شهر وطحتلي بتهمه تكسر الضهر وهاي المره الثانيه احترك المضيف بينه

::-انتَ فگر حمزه

::-ههههه

نزل راسه يحچي بأذني

::-أحبچ من أول نضرة شفتچ بيها ومستحيل اضيعج

::-ههههه مبين كلشش

ماكدرت اكمل كلمتي الاخيرة وفقدت ما ادري شصار بعد...

"ريفان"

ما توقعنه يصير هيچ ولا توقعنه بنت الطُرماح توفي بكل كلمة بس الي يكتل عنده عادي يحرگ وهيچ صار
لا الولد موجودين كلهم ولا أعمامي بس الي بقوا يحاولون يطفون بس الگاع مشمورة بانزين مو نفط حرگ المكان كله ما ندري إنو أكو أحد جوه المضيف لحد ما إحنا نركض ونحاول نطفي إجا اتصال من الولد بعدها تراكضوا ومن عرفنه إنو أديان وزوجها الي جوه

وگعت على ركبي الرجفه حتلت جسمي صارت صرخات عماتي وامي تهز المكان تفتت گلوبنا وإحنا نبچي والنار شاعه عبرت حتى على بيت عمي صالح خواني باد حيلهم ظلوا يطفون لحد ما فتحوا الباب وطلع حمزة شايل أديان بإيده لافها بجاكيته وهيه مغمي عليها وهوه محترگه إيده ركض بيها عالمستشفى
الدخان خانگها وهيف وزهرة وعماتي وراهم
بس ما خلوهم يطلعون كعدنه تايهين وما خلينه أحد ما دگينه عليه وهمه ماكو.

مُنتهى::-هيف بالله تصلي على اخوج

::-ما يردد ماكو

أمي ونسوان عمامي يلهجن بالدعاء وإحنا نرجف نفتر بالبيت جدي واگف يباوع للمضيف ساكت بس عيناه تحچي هواي الناس گامت تجي ويجيبهم جدي للديوانية
واني مختنگةو دمعتي واصله گلبي واندعي ترجع بخير وسلامه..

فجأة طفرنا على صوت الولد جابوها ركضت أبچي
أباوعلهم دخلها حمزة ومصطفى كعد مصطفى يم راسها
صوته هادي يسألها بس هيه بالكَوة تحچي كل حرف منها بيه وجع گام يريد يطلع، بس حسنا هوه بعده ما يرتاح همست

::-روحي راحت يبعد روحي

::-يبعد گلبي

سمعنه اصياح بالحوش زهرة صاحت خايفه

::-مهدي تعارك ويه حمزة

رحنه أنشوف وصدگ لگينا مهدي لازمه من خوانيگه ويصيح مصطفى كاعد وحاط راسه بين ادي وسيف وغفار بس يردون يلزمون مهدي بس الأجنبي بعد شيلزمه

::-ولكفل زينب احطك اهنا واذبحك اذا حجيت ما ترجع الكك غلطه وصارت انطيناها الك خوش وهسه فارك

::-مرتيييي هيههه بيكيفكك باقيه اهنا على ما يرجعون اخوتك وعمامك وانشوف

ما شفنا اله ونزل بوكس بنص وجها طلعت هيف تركض الهم والولد بنصهم وما كادرين الهم هيف ركض تفز قلبها وتدفعهم الولد بالنص وما حد كادر يلمه

هيف::-مهديييي كاافيي شبلاااكك بهليل

مهدي::-ولحسينن لي احنه بذكرة اربعينه على هايي سوايتكك وچان مااتت لو تموت ما ترجع وان صاار غيررر هاذا الحچي انعل ابو اخواتي يابو حتى ولد عمي الساني ميخاطب السانهم طول العمر

طلع جدي وخرنه كلنه من طريقه وراح يصيح عليهم

مهدي::-هوههه هسههه يلااا ستذكر عنده مرة ويريدهاا ما اجه بيوم الجتنه ماا اجه عليهاا والله العضيم ماا طلع هوه السبب اگص ايدي

::-ولككك مهديي اني مو بگدك اوزن كلامكك واعرف شتحجي ولا ضل بس تهتر

صاح جدي

::-لااااا هااك بعدد اذابحوااا علمودد مرههه اذاابحوو شكباركم اصيرون

::-هااي المرة بت عمييي

دار جدي على مهدي وطگه راشدي

::-عوزكك بعدد بس تمد ايدك عليه لاااا صيحح لا صيح خوش

جدي دار علينه

::-يلااااا عدنهه مسرحيهه للبيت

رحنه نتراكض دخلنه وزهرة تلوب بس كاضتها امي راحت لـ اديان يمها رحت وراها اشوفها چانت نايمه رحت طلعت وكفت بالحوش منتضره هيف طلعت من الدوانيه بس بدون لا تعاين على شيء دخلت جوه جابت مي بارد ورجعت دخلت شويه واجت يمي خلت راسها على كتفي وگالت

::-تعبانه

::-حقج جايه من السفر لازم استقبال حلو بس تلگيناج بالمفاجئات على گولتج هههههههه

::-احفاد شدهان بيش تتلگوني قابل بالاحتفالات

::-مو بالله

::-اي والله

اجه مهدي دخل باوع علينه ودخل

هيف::-مهدي الكلب

رفعت كتفي السانده راسها عليه

::-انچبي هيفووو

::-ولييي لعد ليش طگ اخوي حترگ گلبي والله

::-عذري هو هم خاف والله اني اجيت اموت.

::-هوه هاذا الخلاني ما افشخه بطابوگه

::-تهون يبعدي كومي ارتاحي

نزلنا جوه شفنا ميليس متمددة يم زهرة وتباوع بالفون مالها وزهرة حاطة إيدها على عيونها سديت الباب وردت أرجع شفت أديان نايمة يم مُنتهى رحت اطمأنيت عليها وصعدت ويا هيف لغرفتها.

مرّ يومين الوضع طبيعي الحمدلله المضيف الولد كاموا يعدلون بي وجبنا كاميرات علگناهم بكل مكان بالحوش، بالساحة، بالبستان، بالترك، بالشارع، بالقطعة، بكل زاوية ممكن توصل احد النه.

الخطار ما خفوا بهاليومين بس عمتي خابرت جدي تتعذر إنها ما جت وكالت: أجيكم ويه رجعة اخواني
يعني تقصد أعمامي وأبوي من الزيارة

كنا مفكرين نروح نزور بس ما صارت فرصة وهاي السنة راحت الزيارة والخدمة وهيف زعلانه على مهدي فد مرة.

بخامس يوم من زعلهم كعدنا الصبح نتريگ
مهدي يمازحها ويحش عليها وهيه بعد اجتها الطنگورة مالته "شدهان" على گولة أمي.

رحنا واليوم جيه الولد وأعمامي إن شاء الله،
والعصر تجي عمتي

گمنه نركض نسابق ياهي تكمل قبل وتروح تبدل أديان
الحمدلله صارت زينة رحنا للسطح نغسله وننظف غرف الولد جونا صار كله حركة وحچيات ومَي وضحك بينا

زهرة::-شوفن اني مابيه حيل كلساع انزل واصعد فراح اشمر المي الوصخ من الستارة وحده بيچن توگف جوه ومتخلي واحد يفوت من باب الصاله خلي يفوتون من باب المطبخ

مُنتهى::-خوب من باب المطبخ احسن

هيف::-لا بالله علمود ينكسر ضهري بي شيطلعه للترك تعالي ريفان احنه نوگف وانتن نضفاً

مَنتهى::-وانتن شنو شغلجن يبعدي

::-نوگف الي يريد يدخل الهويه والشهادة

بدون ما نسمع ردهن طلعنه نركض سدينه باب االصاله. وكعدنه بالحديقه اني وهيف نگرز حب وامي وعماتي عليهن الطبخ والخبز اجه مهدي هوه وسيف داخلين وذيج الكشخه يسولفون ما منتبهين اجيت اصيح عليهم لا يدخلون

هيف::-محلفتج بالعباس لا تكولين

وصلوا للمكان الي يشمرن بي البنات مكان مخنوگ ريحته خايسة تراب وكأن الزمن واگف وهيف أول وحدة صاحت بصوتها القوي

::- أكلك سيف

سيف وكف داير وجهه عليها ومهدي وكف وياه عيونه حادة ينتظروها تحچي وهي تگطع نفسها بالحچاية وأول ما فتحت حلگها اريد تحچي بلحظة قذارة سطل مي نازل من فوگ مي وصخ ريحته تخنگ بحيث سود عيشتهم وحياتهم مو بس ملابسهم حتى نظرة بعضهم البعض تغيرت.

::- إي هاي حياتكم ما تملكون غير الوسخ

عيون مهدي تلبدت وچان باقي شعرة يفقد أعصابه،

ريفان::-عزااااا

هيف::-يمهه

مهدي::-اشتعللللل ابوكممم واحد واحدد ولكممممم ما شوفون ناااس جاايهه ولچننن غيررر تعاينن يلا اشمرنن المااي

على صياحه اجن نسوان اعمامي وامي

::-ياا يمه هاي شني

سيف::-يمه يمه راحت كشخه ابنج يمه

هيف::-ههههههههه يلا تكبرون وتنسوها

مهدي::-بالحسننن ابن الحسين كل البلا منجج انتِ ام راس

::-انچب كلشي وذبيته براسي اني شليي شغل لوو هيهه هيتهه هيف هيف ياهو الاجه وگال الصوچ بهيف هيف حايط أنصيص

كامت اصيح وكأنها صدك مو هيه وراحت دخلت جوه وشفت البنات بالصاله

مُنتهى::-احنهه مو گلنه گولن

ريفان::-چا شمدريني نسيت

::-امداج ومده ذيج الثوله سوتلها زعله عود ما ندري بخباثتچن احنه

رحت يم عماتي بالمطبخ اسولف وياهن من كملن ورحنه نغسل الحوش اني وهيف ونصنف عليهم

هيف::-هههههههه يمه عبالچن زعلت لا والله رحت للسطح گصيتلهم صورة من فوك ودرت من المطبخ طلعت بالدربونه وكصيت صورة الهم

::-ياااااا

::-اي والله ههههههه واذا ما سويتها استوري وثبتتها وبعدين هسه شويه وادزها بالگروب لا اهم شيء شعيب وسديم خاصه هارون هوه اكثر واحد متحمستله خربب ليمت يجونن حماس

::-عزاااا يموتوچ

::-لااا هسه من يوصل امير علمود احتمي بي چا ما رايده روحي هوه غير بوكس منه تفقدين الوعي سبوع

::-هههههههه يلا بسرعه خل نكمل

كملنه ورحنه نركض نبدل بس هيه رجعت

هيف::-باوعي البسي الفستان البوهيمي الاسود

ريفان::-لااا ما اريده

هيف::-أنچبي

راحت واني ظلتت طلع مني كلشي بس مدري شلون عجبني رأيها الخايس سبحت، ولبست نص ساعة ما حسيت بيها وگبل لا يدخلون هيف ركضت للساحة تباوع عالكاميرات مستعجلة،وبين صاحت علي لأن الكل التفت عليها هوه ضحك، راح لها حضنها من كتفها دخلها للساحة بعدين حاضنها حيل، وباسها هيه حضنته وقبلته بنحره وكأنها مضيعته من سنين.

الولد جايين بتجاه البيت واليسع وياهم
دخلواوامي ونسوان عمي كأن مفارگيهم سنة. واني شعيب لزمني حاضني عصرني عصر يبوس بوجهي ما يقبل يهدني اريده يهدني ماكو

::- ولججج وعلي مشتاقلج

من شاف مرت عمي وخر راح يسلم مصطفى، مهدي، سوالف ما عرفت على منو أسلم لفيت، شفت أبوي سلمت
عمامي من بعيد وصلت لأمير سلمت بس هز راسه

عكس سديم، هارون، واليسع ما خلو شي ما سألو عليه وسولفوا بس هو روحه بخشمه

دخلوا يسلمون على جدي وهيف يم شعيب، ومصطفى وهارون وگاموا يضحكون من جوه لجوه اخر شيء طگوها ضحكه عاليه

سديم::-ضحكونه وياكم

بس هيف بعفويتها ضحكت وشوفته شلون الطين الخيس حقهم بوكتها صدگ الموقف يضحك

ومهدي كأنه حس ركض يشوف وهيف راحت ضامه روحها بظهر أخوها واليسع، ملتهي بزهرة وبناتها شايلهن يبوس بيهن ميليس؟ تدلع وتغار منهن

بس من سمع صياح مهدي عاف الكل وگام يباوعلهم.

اليسع::-شمالك اصيح

مهدي::-گول الها تمسح الصورة العدها

اليسع::-يا صورة شمالك

هيف::-هااك الگف بس بربك لا تنطي التلفون اعذرني ما اگدر اجي بس اجي انكتل

سيف::-صلاافهه والله عمي صلافه زايدة منج شلون لحكتي موو زعلاانه

وهيه شمرت الفون وراح على يمين ايد اليسع ويه صرختها هوه لزم الفون

هيف::-يمهه گلبي طاح

صاحت مرة عمي عليهم

::-يلا زوارنه تبقون بالباب

واليسع شاف الفيديو وضحك

::-الگفي

كالها وهو يشمرة خلانه صافنين بس هيه لگفته وهو گال

اليسع::-هم خياله وهم صادود زين

هيف::-اعجبك ههههههه

مهدي::-وهممم صلافففه تعجبك

هوه راح لبيتهم حتى يسبح ويرجع واحنا دخلنا نحرر الأكل، نحضر المواعين نرتب السفرة على ما يكمّلون وسيف ومهدي كملوا واجوا يغنون على هيف

مهدي::-شيطانه شيطانه ومسويه زعلانه

سيف::-تقولي روح ابعد وهي لي ولهانه

هيف::-طيرر لككك

وهو يفور يريد بس يلزمها ويعض بيده وهي وره امي واكفه الخوافه رحنه نريد نودي جدي رفع صوته وگال

::- كلكم سفرة وحدة أريدها سفرة وحدة اليوم.

فرشناها بالصالة وإحنا نكتم توترنا لأن نعرف، إذا گعدنه عالسفرة سوا حتى اكل ما نگدر ناكل يبقى إحساس العزل يتغلغل بينا چنه نفضل ننعزل احنه البنات وحد
بس هالمرة شدوها أمر "وقار" تطير بالهوا واصيح وتتأمر على الرايح والجاي حتى ماكو مجال نصب أو ننقل وآخر شي راحت تتعارك ويه سديم كعادتها بينما "نقاء" كعدت بحضن اليسع تحچي وياه بصوت هادي بعكس اختها الشيطانة اللي ما تهدى..

كعدنا جهه من السفرة إحنا والولد بجهه
ونهايتها اعمامي وجدي والحظ الزفت وخلاني أگعد مقابيل أمير..

امير::-هيف وينها

زهرة::-هسه بس تلف شعرها وتجي

اجت لافه شعرها ولابسه كب.

مهدي::-حضري روحچ

گالها واجته كفخه من ابوي

::-اكل وسد حلكك عود بعدين

هيف::-حيلللل

كعدت تاكل وكل ساع ترفع راسها تضحك بوجهه وهو محترگ دمه يباوعها بنظرة لو يكدر يكضها چان كضها
ويكتلها ويخلص بس هي؟ ولا كأنها سادرة بضحكتها تتفنن باستفزازه تگابلت ويه شعيب على ماعون التمن
وإيديهم خربت كل شي.

غفار::- خرب بيكم اي والله لعبتوا نفسي

وهي عليها صلافة لو توزع للعراق كله تبقى منها شويه
والمشكلة محد يگدر يحچي لا عمي ولا أبوي
بس "وقار"، بعدهه تحچي وسديم گام من السفرة، شويه ورجع إجه حط شال على راسها وفرشه على متونها

::-شلون اكل

::-امه محمد كلها تاكل بشال اله انتِ

خلاها كلها انشحطت

جلال::-احترم نفسكك ولك

وميليس وهيف بعد شيسكتهم گامن يشهكن وهيف من كثر الضحك انشحطت اشرب بيها ماي واديان دگت على ضهرها

::- هااا اشربي زين لتختنگين حتى الضحك عدج عنف

تلوح بإيدها وتضحك

::- يمهههه دخيلج دگيني مره لو مرتين خل أصحى

وقار::-عمهه حييل حيل

هيف::-ترد..

ورجعت انشحطت من الكحه گام أمير سريع يمها وگومها وياه يمسح بحلكها وهي عينها راح تطبگ من الكحه واني يمها ألف مثل الدايخه بس أريدها تشرب نقطة مي كلشي تخربط أمي گامت تصيح عليها تريدها تسكت علمود تتنفس وهيه دموعها اصب وجدي وعمي وهي ولا چنها

::-تـنفسي يمه بس تـنفسي

أول ما وكفت وصارت احسن جرتها بضحكة طالعه من كل گلبها.

وسديم ما قصر كفخها على راسها وهو يضحك ورجع ياكل

رجعنه كعدنه وهيف تمسح دموع الضحك وتگول
::- يعني چنت راح أموت بس بموقف يضحك خوش موته والله.

وامي صاحتها يمها لأن ما دام مهدي مقابيلها يضلون هيچ

::-كله من وره الاجنبي وهاذا سالوفه

سيف::-موو اجي احط راسج بنص السفرة.

صاح بيهم عمي.

::-كاافييي.

هيف::-الأجنبي كافي عاد

مهدي::-ويگولون ليش اطيح حضها

ميليس::-امير لحد هسه اني ساكت ومتحمل

كلها التفتت الامير وهو يباوع عليها ساكت ورجع ياكل

انوب سديم ما لگه غير السمائي طلعت تچدح سكتوا وكملوا اكل واني همست

::-هيف هسه تنحسدين

::-ليش

::-كلها تعاينلج منا لبعد اشوي مخطوبه مخطوبه

::-هههههههههههه

ضحكت ضحكتها الرنانه خلتها كلها تعاين جدي خزرها

جلال::-راح اگوم هيف راح اگوم

::-اسفهه بس اذكرت سيف اصبح

سيف::-اي مو سيف مهرج

گالت مرة عمي

::-ماما لا تغصين حبيبتي اكلي لا تتعاركين وياهم بعدين

سكتنه بعد الضحك وكملنه الأكل بهدوء شلنه السفرة وحده وحده وزهرة سوت الچاي وأحنا غرگنا بالمواعين والضحك بعده ما خلص مال الولد يسولفون بالصاله
بس شويه راحوا للديوانية وإحنا، كل وحده بيدها شغله
هاي تمسح، هاي تنشف، وهاي ترتب. كملت لي بيدي وطلعنه اني وهيف نروح لغرفه امي لكينه غفار گاعد يم أمي، يسولف بهدوء هيف بسرعة لزمتني

::- لا تدخلين
::-هااا شبيج
::- ششش خلي نسمع خلي نسمع شيحچي

وگفنه بالباب نسمع مثل التماثيل صايرين نص فضول ونص خوف ونتمنى بس ما يلتفتلنه

::-يمه اخذها لـ دكتور خاف بيها شيء

::-عمه ما ترضى عناد شيء ما ادري بس ما ترضى هاي من التحق بابا گومي اوديج يم اهلي هم تتونسين ويه البنات وتباتين لاا ابقه بالبيت ازين بنت السگط منو يبقه يمج ما اخاف ابقه عادي وهاي اليل كله اني فاتح اتصال وياها والكامرات على البيت

::-خاف تستحي من عدنه وديها لعمامها

::-عمه دخيل الزهرة يا عمامها هذوله الچلاب

::-چااا يمهه مخليها بوحيدتها غير يصير بيها شي اخذ البنات يمها خاف تستحي

::-حيرتني وحرت وياها تليفونها هسه منوو تقبل زوجها يراقب تليفونها هيه رابطه تليفونها عندي تگول كلشي يصير ومحلفتني اذا ما كل يوميه ادخل علي

::-اسم الله هاي اضنها صايرة بيها خوفه لا سامح الله خاف احد حاچي وياها

فتحت الباب هيف على كيف نباوع علي حاط ادي على وجها

::-روحي احچي وياها انتِ شوفيها خاف بيها شيء والله موتتني.

::-اني هسه اروحلها

گامت امي طلع عباتها واحنه ركضنه نگعد يم البنات على ساس ماكو شيء

هيف::-راح اروح للبستان منو تروح وياي شو ضجت

::-ولج تحمس حمس يا بستان هاذا بهالضهريه

::-ما تروحين انتِ الخسرانه

گامت هيف تريد تطلع صاحت عليها زهرة

::-هيف اخذي وياج ملابس اليسع قبل لا يطلع وديهم اله واذا رايح وديهم وسفطيهم فدوه اروحلج ما بيه حيل اروح

::-بعيوني. بس وينهن

::-بالغرفه بالكنتور مالتي

::-تعالي ريفو

گمت وراها وهي تمشي گدامي لحكتها راحت جابت الملابس واجت طلعنه للحوش راحت بدون انذار للدوانيه دخلت عليهم بس گالت ماكو

::-چا راح البيتهم

رحت جبت عباتي واجيت اركض رحنه طلعنه والدنيا الضهر هستوها بال3تحمس حمس رادت ادگ الباب

ريفان::-خطيه خاف نايم

هيف::-چا شلون

ريفان::-اندري

انطتني الملابس وصعدت فوك الباب وطفرت وهو صاح منو اجه فتحتلي الباب دخلت وهو طلع يباوع باوع علينه ونوب على الباب اشر على الباب وگال

::-منو بيچن فتحت الباب

هيف::-شعليك

غميت نفسي ولچ غير داخلين بيتهم هوه شنو الشعليك يبوو انوب هو يباوعلها وهيه ضحكت گالت

::-اممم اني

گال تفضلن دخل واحنه وراه گعد وگدامه الحاسبه ويمه قوري الچاي وأكلاص

::-اي هذول الملابس وين اوديهن

::-حطيهم يمج

هيف::-ريفانه روحي وديهم لغرفته وسفطيهم وياج

باوع عليها

::-ريفان بعد اخوج عوفيهم

::-ريفانه وديهم

باوعت عليهم ثنينهم انوب اريد اروح بس ناسيه حتى وين غرفته ناسيه تفاصيل لبيت بس الحوش مذكرته ومستحيه اكول اني ما اذكر راسي احسه صدع اجت اخذتهم من ايدي سفطتهم وقبل لا تروح گالت

::-ريفان مي

وراحت ودتهم ورجعت وكفت بالباب التفتت عليه

::-موو گتلچ مي

::-وانتِ متروحين مكسرة

هوه گام بكل احترام چابلها مي واجه عزاا بعينج ان شاءلله

::-رحم الله والديك

::-والديچ.

انوب اني المستحيه همه عدهم عادي اويلي خرب يومج هيف

طلعنه وهو طلع ويانه وهيه تگمز ما تمشي

::-بعد لا تجن بوحدچن

وصلنه للباب ورجع اول ما فتحنه الباب ندخل شفنه..

يتبع...🦋🫣